VR 4.36 Kishkindha Kanda - Sarga 36 - Grantha

Collection of Spiritual and Devotional Literature in Various Indian Languages

View this in:

4.36 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡 - 𑌷𑌟𑍍𑌤𑍍𑌰𑌿𑌂𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌷𑌟𑍍𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।

𑌇𑌤𑍍𑌯𑍁𑌕𑍍𑌤𑌸𑍍𑌤𑌾𑌰𑌯𑌾 𑌵𑌾𑌕𑍍𑌯𑌂 𑌪𑍍𑌰𑌶𑍍𑌰𑌿𑌤𑌂 𑌧𑌰𑍍𑌮𑌸𑌂𑌹𑌿𑌤𑌮𑍍 ।
𑌮𑍃𑌦𑍁𑌸𑍍𑌵𑌭𑌾𑌵𑌸𑍍𑌸𑍌𑌮𑌿𑌤𑍍𑌰𑌿𑌃 𑌪𑍍𑌰𑌤𑌿𑌜𑌗𑍍𑌰𑌾𑌹 𑌤𑌦𑍍𑌵𑌚𑌃 ॥ 1 ॥

𑌤𑌸𑍍𑌮𑌿𑌨𑍍𑌪𑍍𑌰𑌤𑌿𑌗𑍃𑌹𑍀𑌤𑍇 𑌤𑍁 𑌵𑌾𑌕𑍍𑌯𑍇 𑌹𑌰𑌿𑌗𑌣𑍇𑌶𑍍𑌵𑌰𑌃 ।
𑌲𑌕𑍍𑌷𑍍𑌮𑌣𑌾𑌤𑍍𑌸𑍁𑌮𑌹𑌤𑍍𑌤𑍍𑌰𑌾𑌸𑌂 𑌵𑌸𑍍𑌤𑍍𑌰𑌂 𑌕𑍍𑌲𑌿𑌨𑍍𑌨𑌮𑌿𑌵𑌾𑌤𑍍𑌯𑌜𑌤𑍍 ॥ 2 ॥

𑌤𑌤𑌃 𑌕𑌂𑌠𑌗𑌤𑌂 𑌮𑌾𑌲𑍍𑌯𑌂 𑌚𑌿𑌤𑍍𑌰𑌂 𑌬𑌹𑍁𑌗𑍁𑌣𑌂 𑌮𑌹𑌤𑍍 ।
𑌚𑌿𑌚𑍍𑌛𑍇𑌦 𑌵𑌿𑌮𑌦𑌶𑍍𑌚𑌾𑌸𑍀𑌤𑍍𑌸𑍁𑌗𑍍𑌰𑍀𑌵𑍋 𑌵𑌾𑌨𑌰𑍇𑌶𑍍𑌵𑌰𑌃 ॥ 3 ॥

𑌸 𑌲𑌕𑍍𑌷𑍍𑌮𑌣𑌂 𑌭𑍀𑌮𑌬𑌲𑌂 𑌸𑌰𑍍𑌵𑌵𑌾𑌨𑌰𑌸𑌤𑍍𑌤𑌮𑌃 ।
𑌅𑌬𑍍𑌰𑌵𑍀𑌤𑍍𑌪𑍍𑌰𑌶𑍍𑌰𑌿𑌤𑌂 𑌵𑌾𑌕𑍍𑌯𑌂 𑌸𑍁𑌗𑍍𑌰𑍀𑌵 𑌸𑍍𑌸𑌂𑌪𑍍𑌰𑌹𑌰𑍍𑌷𑌯𑌨𑍍 ॥ 4 ॥

𑌪𑍍𑌰𑌣𑌷𑍍𑌟𑌾 𑌶𑍍𑌰𑍀𑌶𑍍𑌚 𑌕𑍀𑌰𑍍𑌤𑌿𑌶𑍍𑌚 𑌕𑌪𑌿𑌰𑌾𑌜𑍍𑌯𑌂 𑌚 𑌶𑌾𑌶𑍍𑌵𑌤𑌮𑍍 ।
𑌰𑌾𑌮𑌪𑍍𑌰𑌸𑌾𑌦𑌾𑌤𑍍𑌸𑍌𑌮𑌿𑌤𑍍𑌰𑍇 𑌪𑍁𑌨𑌃 𑌪𑍍𑌰𑌾𑌪𑍍𑌤𑌮𑌿𑌦𑌂 𑌮𑌯𑌾 ॥ 5 ॥

𑌕𑌶𑍍𑌶𑌕𑍍𑌤𑌸𑍍𑌤𑌸𑍍𑌯 𑌦𑍇𑌵𑌸𑍍𑌯 𑌖𑍍𑌯𑌾𑌤𑌸𑍍𑌯 𑌸𑍍𑌵𑍇𑌨 𑌕𑌰𑍍𑌮𑌣𑌾 ।
𑌤𑌾𑌦𑍃𑌶𑌂 𑌵𑌿𑌕𑍍𑌰𑌮𑌂 𑌵𑍀𑌰 𑌪𑍍𑌰𑌤𑌿𑌕𑌰𑍍𑌤𑍁𑌮𑌰𑌿𑌂𑌦𑌮 ॥ 6 ॥

𑌸𑍀𑌤𑌾𑌂 𑌪𑍍𑌰𑌾𑌪𑍍𑌸𑍍𑌯𑌤𑌿 𑌧𑌰𑍍𑌮𑌾𑌤𑍍𑌮𑌾 𑌵𑌧𑌿𑌷𑍍𑌯𑌤𑌿 𑌚 𑌰𑌾𑌵𑌣𑌮𑍍 ।
𑌸𑌹𑌾𑌯𑌮𑌾𑌤𑍍𑌰𑍇𑌣 𑌮𑌯𑌾 𑌰𑌾𑌘𑌵 𑌸𑍍𑌸𑍍𑌵𑍇𑌨 𑌤𑍇𑌜𑌸𑌾 ॥ 𑍭 ॥

𑌸𑌹𑌾𑌯𑌕𑍃𑌤𑍍𑌯𑌂 𑌕𑌿𑌂 𑌤𑌸𑍍𑌯 𑌯𑍇𑌨 𑌸𑌪𑍍𑌤 𑌮𑌹𑌾𑌦𑍍𑌰𑍁𑌮𑌾𑌃 ।
𑌶𑍈𑌲𑌶𑍍𑌚 𑌵𑌸𑍁𑌧𑌾 𑌚𑍈𑌵 𑌬𑌾𑌣𑍇𑌨𑍈𑌕𑍇𑌨 𑌦𑌾𑌰𑌿𑌤𑌾𑌃 ॥ 𑍮 ॥

𑌧𑌨𑍁𑌰𑍍𑌵𑌿𑌷𑍍𑌫𑌾𑌰𑌯𑌾𑌨𑌸𑍍𑌯 𑌯𑌸𑍍𑌯 𑌶𑌬𑍍𑌦𑍇𑌨 𑌲𑌕𑍍𑌷𑍍𑌮𑌣 ।
𑌸𑌶𑍈𑌲𑌾 𑌕𑌂𑌪𑌿𑌤𑌾 𑌭𑍂𑌮𑌿𑌸𑍍𑌸𑌹𑌾𑌯𑍈𑌃 𑌕𑌿𑌨𑍍𑌨𑍁 𑌤𑌸𑍍𑌯 𑌵𑍈 ॥ 𑍯 ॥

𑌅𑌨𑍁𑌯𑌾𑌤𑍍𑌰𑌾𑌂 𑌨𑌰𑍇𑌂𑌦𑍍𑌰𑌸𑍍𑌯 𑌕𑌰𑌿𑌷𑍍𑌯𑍇𑌽𑌹𑌂 𑌨𑌰𑌰𑍍𑌷𑌭 ।
𑌗𑌚𑍍𑌛𑌤𑍋 𑌰𑌾𑌵𑌣𑌂 𑌹𑌂𑌤𑍁𑌂 𑌵𑍈𑌰𑌿𑌣𑌂 𑌸𑌪𑍁𑌰𑌸𑍍𑌸𑌰𑌮𑍍 ॥ 10 ॥

𑌯𑌦𑌿 𑌕𑌿𑌂𑌚𑌿𑌦𑌤𑌿𑌕𑍍𑌰𑌾𑌂𑌤𑌂 𑌵𑌿𑌶𑍍𑌵𑌾𑌸𑌾𑌤𑍍𑌪𑍍𑌰𑌣𑌯𑍇𑌨 𑌵𑌾 ।
𑌪𑍍𑌰𑍇𑌷𑍍𑌯𑌸𑍍𑌯 𑌕𑍍𑌷𑌮𑌿𑌤𑌵𑍍𑌯𑌂 𑌮𑍇 𑌨 𑌕𑌶𑍍𑌚𑌿𑌨𑍍𑌨𑌾𑌪𑌰𑌾𑌧𑍍𑌯𑌤𑌿 ॥ 11 ॥

𑌤𑌿 𑌤𑌸𑍍𑌯 𑌬𑍍𑌰𑍁𑌵𑌾𑌣𑌸𑍍𑌯 𑌸𑍁𑌗𑍍𑌰𑍀𑌵𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌅𑌭𑌵𑌲𑍍𑌲𑌕𑍍𑌷𑍍𑌮𑌣𑌃 𑌪𑍍𑌰𑍀𑌤𑌃 𑌪𑍍𑌰𑍇𑌮𑍍𑌣𑌾 𑌚𑍈𑌵𑌮𑍁𑌵𑌾𑌚 𑌹 ॥ 12 ॥

𑌸𑌰𑍍𑌵𑌥𑌾 𑌹𑌿 𑌮𑌮 𑌭𑍍𑌰𑌾𑌤𑌾 𑌸𑌨𑌾𑌥𑍋 𑌵𑌾𑌨𑌰𑍇𑌶𑍍𑌵𑌰 ।
𑌤𑍍𑌵𑌯𑌾 𑌨𑌾𑌥𑍇𑌨 𑌸𑍁𑌗𑍍𑌰𑍀𑌵 𑌪𑍍𑌰𑌶𑍍𑌰𑌿𑌤𑍇𑌨 𑌵𑌿𑌶𑍇𑌷𑌤𑌃 ॥ 13 ॥

𑌯𑌸𑍍𑌤𑍇 𑌪𑍍𑌰𑌭𑌾𑌵 𑌸𑍍𑌸𑍁𑌗𑍍𑌰𑍀𑌵 𑌯𑌚𑍍𑌚 𑌤𑍇 𑌶𑍌𑌚𑌮𑌾𑌰𑍍𑌜𑌵𑌮𑍍 ।
𑌅𑌰𑍍𑌹𑌸𑍍𑌤𑍍𑌵𑌂 𑌕𑌪𑌿𑌰𑌾𑌜𑍍𑌯𑌸𑍍𑌯 𑌶𑍍𑌰𑌿𑌯𑌂 𑌭𑍋𑌕𑍍𑌤𑍁𑌮𑌨𑍁𑌤𑍍𑌤𑌮𑌾𑌮𑍍 ॥ 14 ॥

𑌸𑌹𑌾𑌯𑍇𑌨 𑌤𑍁 𑌸𑍁𑌗𑍍𑌰𑍀𑌵 𑌤𑍍𑌵𑌯𑌾 𑌰𑌾𑌮𑌃 𑌪𑍍𑌰𑌤𑌾𑌪𑌵𑌾𑌨𑍍 ।
𑌵𑌧𑌿𑌷𑍍𑌯𑌤𑌿 𑌰𑌣𑍇 𑌶𑌤𑍍𑌰𑍂𑌨𑌚𑌿𑌰𑌾𑌨𑍍𑌨𑌾𑌤𑍍𑌰 𑌸𑌂𑌶𑌯𑌃 ॥ 15 ॥

𑌧𑌰𑍍𑌮𑌜𑍍𑌞𑌸𑍍𑌯 𑌕𑍃𑌤𑌜𑍍𑌞𑌸𑍍𑌯 𑌸𑌂𑌗𑍍𑌰𑌾𑌮𑍇𑌷𑍍𑌵𑌨𑌿𑌵𑌰𑍍𑌤𑌿𑌨𑌃 ।
𑌉𑌪𑌪𑌨𑍍𑌨𑌂 𑌚 𑌯𑍁𑌕𑍍𑌤𑌂 𑌚 𑌸𑍁𑌗𑍍𑌰𑍀𑌵 𑌤𑌵 𑌭𑌾𑌷𑌿𑌤𑌮𑍍 ॥ 16 ॥

𑌦𑍋𑌷𑌜𑍍𑌞𑌸𑍍𑌸𑌤𑌿 𑌸𑌾𑌮𑌰𑍍𑌥𑍍𑌯𑍇 𑌕𑍋𑌽𑌨𑍍𑌯𑍋 𑌭𑌾𑌷𑌿𑌤𑍁𑌮𑌰𑍍𑌹𑌤𑌿 ।
𑌵𑌰𑍍𑌜𑌯𑌿𑌤𑍍𑌵𑌾 𑌮𑌮 𑌜𑍍𑌯𑍇𑌷𑍍𑌠𑌂 𑌤𑍍𑌵𑌾𑌂 𑌚 𑌵𑌾𑌨𑌰𑌸𑌤𑍍𑌤𑌮 ॥ 1𑍭 ॥

𑌸𑌦𑍃𑌶𑌶𑍍𑌚𑌾𑌸𑌿 𑌰𑌾𑌮𑌸𑍍𑌯 𑌵𑌿𑌕𑍍𑌰𑌮𑍇𑌣 𑌬𑌲𑍇𑌨 𑌚 ।
𑌸𑌹𑌾𑌯𑍋 𑌦𑍈𑌵𑌤𑍈𑌰𑍍𑌦𑌤𑍍𑌤𑌶𑍍𑌚𑌿𑌰𑌾𑌯 𑌹𑌰𑌿𑌪𑍁𑌂𑌗𑌵 ॥ 1𑍮 ॥

𑌕𑌿𑌂 𑌤𑍁 𑌶𑍀𑌘𑍍𑌰𑌮𑌿𑌤𑍋 𑌵𑍀𑌰 𑌨𑌿𑌷𑍍𑌕𑍍𑌰𑌮 𑌤𑍍𑌵𑌂 𑌮𑌯𑌾 𑌸𑌹 ।
𑌸𑌾𑌂𑌤𑍍𑌵𑌯𑌸𑍍𑌵 𑌵𑌯𑌸𑍍𑌯𑌂 𑌚 𑌤𑍍𑌵𑌂 𑌭𑌾𑌰𑍍𑌯𑌾𑌹𑌰𑌣𑌕𑌰𑍍𑌶𑌿𑌤𑌮𑍍 ॥ 1𑍯 ॥

𑌯𑌚𑍍𑌚 𑌶𑍋𑌕𑌾𑌭𑌿𑌭𑍂𑌤𑌸𑍍𑌯 𑌶𑍍𑌰𑍁𑌤𑍍𑌵𑌾 𑌰𑌾𑌮𑌸𑍍𑌯 𑌭𑌾𑌷𑌿𑌤𑌮𑍍 ।
𑌮𑌯𑌾 𑌤𑍍𑌵𑌂 𑌪𑌰𑍁𑌷𑌾𑌣𑍍𑌯𑍁𑌕𑍍𑌤𑌸𑍍𑌤𑌚𑍍𑌚𑌤𑍍𑌵𑌂 𑌕𑍍𑌷𑌂𑌤𑍁 𑌮𑌰𑍍𑌹𑌸𑌿 ॥ 20 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌷𑌟𑍍𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥

Browse Related Categories: