𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌃𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌅𑌥 𑌰𑌾𑌤𑍍𑌰𑍍𑌯𑌾𑌂 𑌵𑍍𑌯𑌤𑍀𑌤𑌾𑌯𑌾𑌂 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌮𑍁𑌨𑌿𑌃 ।
𑌆𑌪𑍃𑌷𑍍𑌟𑍍𑌵𑌾 𑌤𑍌 𑌚 𑌰𑌾𑌜𑌾𑌨𑍌 𑌜𑌗𑌾𑌮𑍋𑌤𑍍𑌤𑌰𑌪𑌰𑍍𑌵𑌤𑌮𑍍 ॥ 1 ॥
𑌆𑌶𑍀𑌰𑍍𑌭𑌿𑌃 𑌪𑍂𑌰𑌯𑌿𑌤𑍍𑌵𑌾 𑌚 𑌕𑍁𑌮𑌾𑌰𑌾𑌂𑌶𑍍𑌚 𑌸𑌰𑌾𑌘𑌵𑌾𑌨𑍍 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑍇 𑌗𑌤𑍇 𑌰𑌾𑌜𑌾 𑌵𑍈𑌦𑍇𑌹𑌂 𑌮𑌿𑌥𑌿𑌲𑌾𑌧𑌿𑌪𑌮𑍍 ।
𑌆𑌪𑍃𑌷𑍍𑌟𑍍𑌵𑌾𑌽𑌥 𑌜𑌗𑌾𑌮𑌾𑌶𑍁 𑌰𑌾𑌜𑌾 𑌦𑌶𑌰𑌥𑌃 𑌪𑍁𑌰𑍀𑌮𑍍 ॥ 2 ॥
𑌗𑌚𑍍𑌛𑌂𑌤𑌂 𑌤𑌂 𑌤𑍁 𑌰𑌾𑌜𑌾𑌨𑌮𑌨𑍍𑌵𑌗𑌚𑍍𑌛𑌨𑍍𑌨𑌰𑌾𑌧𑌿𑌪𑌃 ॥ 3 ॥
𑌅𑌥 𑌰𑌾𑌜𑌾 𑌵𑌿𑌦𑍇𑌹𑌾𑌨𑌾𑌂 𑌦𑌦𑍌 𑌕𑌨𑍍𑌯𑌾𑌧𑌨𑌂 𑌬𑌹𑍁 ।
𑌗𑌵𑌾𑌂 𑌶𑌤𑌸𑌹𑌸𑍍𑌰𑌾𑌣𑌿 𑌬𑌹𑍂𑌨𑌿 𑌮𑌿𑌥𑌿𑌲𑍇𑌶𑍍𑌵𑌰𑌃 ।
𑌕𑌂𑌬𑌲𑌾𑌨𑌾𑌂 𑌚 𑌮𑍁𑌖𑍍𑌯𑌾𑌨𑌾𑌂 𑌕𑍍𑌷𑍌𑌮𑌕𑍋𑌟𑍍𑌯𑌂𑌬𑌰𑌾𑌣𑌿 𑌚 ॥ 4 ॥
𑌹𑌸𑍍𑌤𑍍𑌯𑌶𑍍𑌵𑌰𑌥𑌪𑌾𑌦𑌾𑌤𑌂 𑌦𑌿𑌵𑍍𑌯𑌰𑍂𑌪𑌂 𑌸𑍍𑌵𑌲𑌂𑌕𑍃𑌤𑌮𑍍 ।
𑌦𑌦𑍌 𑌕𑌨𑍍𑌯𑌾𑌪𑌿𑌤𑌾 𑌤𑌾𑌸𑌾𑌂 𑌦𑌾𑌸𑍀𑌦𑌾𑌸𑌮𑌨𑍁𑌤𑍍𑌤𑌮𑌮𑍍 ॥ 5 ॥
𑌹𑌿𑌰𑌣𑍍𑌯𑌸𑍍𑌯 𑌸𑍁𑌵𑌰𑍍𑌣𑌸𑍍𑌯 𑌮𑍁𑌕𑍍𑌤𑌾𑌨𑌾𑌂 𑌵𑌿𑌦𑍍𑌰𑍁𑌮𑌸𑍍𑌯 𑌚 ॥ 6 ॥
𑌦𑌦𑍌 𑌪𑌰𑌮𑌸𑌂𑌹𑍃𑌷𑍍𑌟𑌃 𑌕𑌨𑍍𑌯𑌾𑌧𑌨𑌮𑌨𑍁𑌤𑍍𑌤𑌮𑌮𑍍 ।
𑌦𑌤𑍍𑌤𑍍𑌵𑌾 𑌬𑌹𑍁 𑌧𑌨𑌂 𑌰𑌾𑌜𑌾 𑌸𑌮𑌨𑍁𑌜𑍍𑌞𑌾𑌪𑍍𑌯 𑌪𑌾𑌰𑍍𑌥𑌿𑌵𑌮𑍍 ॥ ॥
𑌪𑍍𑌰𑌵𑌿𑌵𑍇𑌶 𑌸𑍍𑌵𑌨𑌿𑌲𑌯𑌂 𑌮𑌿𑌥𑌿𑌲𑌾𑌂 𑌮𑌿𑌥𑌿𑌲𑍇𑌶𑍍𑌵𑌰𑌃 ।
𑌰𑌾𑌜𑌾𑌽𑌪𑍍𑌯𑌯𑍋𑌧𑍍𑌯𑌾𑌧𑌿𑌪𑌤𑌿𑌸𑍍𑌸𑌹 𑌪𑍁𑌤𑍍𑌰𑍈𑌰𑍍𑌮𑌹𑌾𑌤𑍍𑌮𑌭𑌿𑌃 ।
𑌋𑌷𑍀𑌨𑍍 𑌸𑌰𑍍𑌵𑌾𑌨𑍍 𑌪𑍁𑌰𑌸𑍍𑌕𑍃𑌤𑍍𑌯 𑌜𑌗𑌾𑌮 𑌸𑌬𑌲𑌾𑌨𑍁𑌗𑌃 ॥ ॥
𑌗𑌚𑍍𑌛𑌂𑌤𑌂 𑌤𑌂 𑌨𑌰𑌵𑍍𑌯𑌾𑌘𑍍𑌰𑌂 𑌸𑌰𑍍𑌷𑌿𑌸𑌂𑌘𑌂 𑌸𑌰𑌾𑌘𑌵𑌮𑍍 ॥ ॥
𑌘𑍋𑌰𑌾𑌃 𑌸𑍍𑌮 𑌪𑌕𑍍𑌷𑌿𑌣𑍋 𑌵𑌾𑌚𑍋 𑌵𑍍𑌯𑌾𑌹𑌰𑌂𑌤𑌿 𑌤𑌤𑌸𑍍𑌤𑌤𑌃 ।
𑌭𑍌𑌮𑌾𑌶𑍍𑌚𑍈𑌵 𑌮𑍃𑌗𑌾 𑌸𑍍𑌸𑌰𑍍𑌵𑍇 𑌗𑌚𑍍𑌛𑌂𑌤𑌿 𑌸𑍍𑌮 𑌪𑍍𑌰𑌦𑌕𑍍𑌷𑌿𑌣𑌮𑍍 ॥ 10 ॥
𑌤𑌾𑌨𑍍 𑌦𑍃𑌷𑍍𑌟𑍍𑌵𑌾 𑌰𑌾𑌜𑌶𑌾𑌰𑍍𑌦𑍂𑌲𑍋 𑌵𑌸𑌿𑌷𑍍𑌠𑌂 𑌪𑌰𑍍𑌯𑌪𑍃𑌚𑍍𑌛𑌤 ।
𑌅𑌸𑍌𑌮𑍍𑌯𑌾𑌃 𑌪𑌕𑍍𑌷𑌿𑌣𑍋 𑌘𑍋𑌰𑌾 𑌮𑍃𑌗𑌾𑌶𑍍𑌚𑌾𑌪𑌿 𑌪𑍍𑌰𑌦𑌕𑍍𑌷𑌿𑌣𑌾𑌃 ॥ 11 ॥
𑌕𑌿𑌮𑌿𑌦𑌂 𑌹𑍃𑌦𑌯𑍋𑌤𑍍𑌕𑌂𑌪𑌿 𑌮𑌨𑍋 𑌮𑌮 𑌵𑌿𑌷𑍀𑌦𑌤𑌿 ।
𑌰𑌾𑌜𑍍𑌞𑍋 𑌦𑌶𑌰𑌥𑌸𑍍𑌯𑍈𑌤𑌚𑍍𑌛𑍍𑌰𑍁𑌤𑍍𑌵𑌾 𑌵𑌾𑌕𑍍𑌯𑌂 𑌮𑌹𑌾𑌨𑍃𑌷𑌿𑌃 ॥ 12 ॥
𑌉𑌵𑌾𑌚 𑌮𑌧𑍁𑌰𑌾𑌂 𑌵𑌾𑌣𑍀𑌂 𑌶𑍍𑌰𑍂𑌯𑌤𑌾𑌮𑌸𑍍𑌯 𑌯𑌤𑍍𑌫𑌲𑌮𑍍 ।
𑌉𑌪𑌸𑍍𑌥𑌿𑌤𑌂 𑌭𑌯𑌂 𑌘𑍋𑌰𑌂 𑌦𑌿𑌵𑍍𑌯𑌂 𑌪𑌕𑍍𑌷𑌿𑌮𑍁𑌖𑌾𑌚𑍍𑌚𑍍𑌯𑍁𑌤𑌮𑍍 ॥ 13 ॥
𑌮𑍃𑌗𑌾𑌃 𑌪𑍍𑌰𑌶𑌮𑌯𑌂𑌤𑍍𑌯𑍇𑌤𑍇 𑌸𑌂𑌤𑌾𑌪𑌸𑍍𑌤𑍍𑌯𑌜𑍍𑌯𑌤𑌾𑌮𑌯𑌮𑍍 ।
𑌤𑍇𑌷𑌾𑌂 𑌸𑌂𑌵𑌦𑌤𑌾𑌂 𑌤𑌤𑍍𑌰 𑌵𑌾𑌯𑍁𑌃 𑌪𑍍𑌰𑌾𑌦𑍁𑌰𑍍𑌬𑌭𑍂𑌵 𑌹 ॥ 14 ॥
𑌕𑌂𑌪𑌯𑌨𑍍 𑌪𑍃𑌥𑌿𑌵𑍀𑌂 𑌸𑌰𑍍𑌵𑌾𑌂 𑌪𑌾𑌤𑌯𑌂𑌶𑍍𑌚 𑌦𑍍𑌰𑍁𑌮𑌾𑌂𑌚𑍍𑌛𑍁𑌭𑌾𑌨𑍍 ।
𑌤𑌮𑌸𑌾 𑌸𑌂𑌵𑍃𑌤𑌸𑍍𑌸𑍂𑌰𑍍𑌯 𑌸𑍍𑌸𑌰𑍍𑌵𑌾 𑌨 𑌪𑍍𑌰𑌬𑌭𑍁𑌰𑍍𑌦𑌿𑌶 ॥ 15 ॥
𑌭𑌸𑍍𑌮𑌨𑌾 𑌚𑌾𑌵𑍃𑌤𑌂 𑌸𑌰𑍍𑌵𑌂 𑌸𑌂𑌮𑍂𑌢𑌮𑌿𑌵 𑌤𑌦𑍍𑌬𑌲𑌮𑍍 ।
𑌵𑌸𑌿𑌷𑍍𑌠𑌶𑍍𑌚𑌰𑍍𑌷𑌯𑌶𑍍𑌚𑌾𑌨𑍍𑌯𑍇 𑌰𑌾𑌜𑌾 𑌚 𑌸𑌸𑍁𑌤𑌸𑍍𑌤𑌦𑌾 ॥ 16 ॥
𑌸𑌂𑌸𑌜𑍍𑌞𑌾 𑌇𑌵 𑌤𑌤𑍍𑌰𑌾𑌸𑌨𑍍 𑌸𑌰𑍍𑌵𑌮𑌨𑍍𑌯𑌦𑍍𑌵𑌿𑌚𑍇𑌤𑌨𑌮𑍍 ।
𑌤𑌸𑍍𑌮𑌿𑌂𑌸𑍍𑌤𑌮𑌸𑌿 𑌘𑍋𑌰𑍇 𑌤𑍁 𑌭𑌸𑍍𑌮𑌚𑍍𑌛𑌨𑍍𑌨𑍇𑌵 𑌸𑌾 𑌚𑌮𑍂𑌃 ॥ 1 ॥
𑌦𑌦𑌰𑍍𑌶 𑌭𑍀𑌮𑌸𑌂𑌕𑌾𑌶𑌂 𑌜𑌟𑌾𑌮𑌂𑌡𑌲𑌧𑌾𑌰𑌿𑌣𑌮𑍍 ।
𑌭𑌾𑌰𑍍𑌗𑌵𑌂 𑌜𑌾𑌮𑌦𑌗𑍍𑌨𑍍𑌯𑌂 𑌤𑌂 𑌰𑌾𑌜𑌰𑌾𑌜𑌵𑌿𑌮𑌰𑍍𑌦𑌿𑌨𑌮𑍍 ॥ 1 ॥
𑌕𑍈𑌲𑌾𑌸𑌮𑌿𑌵 𑌦𑍁𑌰𑍍𑌧𑌰𑍍𑌷𑌂 𑌕𑌾𑌲𑌾𑌗𑍍𑌨𑌿𑌮𑌿𑌵 𑌦𑍁𑌸𑍍𑌸𑌹𑌮𑍍 ।
𑌜𑍍𑌵𑌲𑌂𑌤𑌮𑌿𑌵 𑌤𑍇𑌜𑍋𑌭𑌿𑌰𑍍𑌦𑍁𑌰𑍍𑌨𑌿𑌰𑍀𑌕𑍍𑌷𑍍𑌯𑌂 𑌪𑍃𑌥𑌗𑍍𑌜𑌨𑍈𑌃 ॥ 1 ॥
𑌸𑍍𑌕𑌂𑌧𑍇 𑌚𑌾𑌸𑌜𑍍𑌯 𑌪𑌰𑌶𑍁𑌂 𑌧𑌨𑍁𑌰𑍍𑌵𑌿𑌦𑍍𑌯𑍁𑌦𑍍𑌗𑌣𑍋𑌪𑌮𑌮𑍍 ।
𑌪𑍍𑌰𑌗𑍃𑌹𑍍𑌯 𑌶𑌰𑌮𑍁𑌖𑍍𑌯𑌂 𑌚 𑌤𑍍𑌰𑌿𑌪𑍁𑌰𑌘𑍍𑌨𑌂 𑌯𑌥𑌾 𑌶𑌿𑌵𑌮𑍍 ॥ 20 ॥
𑌤𑌂 𑌦𑍃𑌷𑍍𑌟𑍍𑌵𑌾 𑌭𑍀𑌮𑌸𑌂𑌕𑌾𑌶𑌂 𑌜𑍍𑌵𑌲𑌂𑌤𑌮𑌿𑌵 𑌪𑌾𑌵𑌕𑌮𑍍 ।
𑌵𑌸𑌿𑌷𑍍𑌠𑌪𑍍𑌰𑌮𑍁𑌖𑌾 𑌵𑌿𑌪𑍍𑌰𑌾 𑌜𑌪𑌹𑍋𑌮𑌪𑌰𑌾𑌯𑌣𑌾𑌃 ॥ 21 ॥
𑌸𑌂𑌗𑌤𑌾 𑌮𑍁𑌨𑌯𑌸𑍍𑌸𑌰𑍍𑌵𑍇 𑌸𑌂𑌜𑌜𑌲𑍍𑌪𑍁𑌰𑌥𑍋 𑌮𑌿𑌥𑌃 ।
𑌕𑌚𑍍𑌚𑌿𑌤𑍍𑌪𑌿𑌤𑍃𑌵𑌧𑌾𑌮𑌰𑍍𑌷𑍀 𑌕𑍍𑌷𑌤𑍍𑌰𑌂 𑌨𑍋𑌤𑍍𑌸𑌾𑌦𑌯𑌿𑌷𑍍𑌯𑌤𑌿 ॥ 22 ॥
𑌪𑍂𑌰𑍍𑌵𑌂 𑌕𑍍𑌷𑌤𑍍𑌰𑌵𑌧𑌂 𑌕𑍃𑌤𑍍𑌵𑌾 𑌗𑌤𑌮𑌨𑍍𑌯𑍁𑌰𑍍𑌗𑌤𑌜𑍍𑌵𑌰𑌃 ।
𑌕𑍍𑌷𑌤𑍍𑌰𑌸𑍍𑌯𑍋𑌤𑍍𑌸𑌾𑌦𑌨𑌂 𑌭𑍂𑌯𑍋 𑌨 𑌖𑌲𑍍𑌵𑌸𑍍𑌯 𑌚𑌿𑌕𑍀𑌰𑍍𑌷𑌿𑌤𑌮𑍍 ॥ 23 ॥
𑌏𑌵𑌮𑍁𑌕𑍍𑌤𑍍𑌵𑌾𑌽𑌰𑍍𑌘𑍍𑌯𑌮𑌾𑌦𑌾𑌯 𑌭𑌾𑌰𑍍𑌗𑌵𑌂 𑌭𑍀𑌮𑌦𑌰𑍍𑌶𑌨𑌮𑍍 ।
𑌋𑌷𑌯𑍋 𑌰𑌾𑌮 𑌰𑌾𑌮𑍇𑌤𑌿 𑌵𑌚𑍋 𑌮𑌧𑍁𑌰𑌮𑌬𑍍𑌰𑍁𑌵𑌨𑍍 ॥ 24 ॥
𑌪𑍍𑌰𑌤𑌿𑌗𑍃𑌹𑍍𑌯 𑌤𑍁 𑌤𑌾𑌂 𑌪𑍂𑌜𑌾𑌮𑍃𑌷𑌿𑌦𑌤𑍍𑌤𑌾𑌂 𑌪𑍍𑌰𑌤𑌾𑌪𑌵𑌾𑌨𑍍 ।
𑌰𑌾𑌮𑌂 𑌦𑌾𑌶𑌰𑌥𑌿𑌂 𑌰𑌾𑌮𑍋 𑌜𑌾𑌮𑌦𑌗𑍍𑌨𑍍𑌯𑍋𑌽𑌭𑍍𑌯𑌭𑌾𑌷𑌤 ॥ 25 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌚𑌤𑍁𑌃𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ॥
