VR 2.9 Ayodhya Kanda - Sarga 9 - Grantha

Collection of Spiritual and Devotional Literature in Various Indian Languages

Meaning, Multimedia

View this in:

| English

| Devanagari

| Telugu

| Tamil

| Kannada

| Malayalam

| Gujarati

| Odia

| Bengali

| Marathi

| Assamese

| Punjabi

| Hindi

| Samskritam

| Konkani

| Nepali

| Sinhala

| Grantha

2.𑍯 𑌅𑌯𑍋𑌧𑍍𑌯𑌾𑌕𑌾𑌂𑌡 - 𑌨𑌵𑌮 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌨𑌵𑌮𑌸𑍍𑌸𑌰𑍍𑌗𑌃 ।

𑌏𑌵𑌮𑍁𑌕𑍍𑌤𑌾 𑌤𑍁 𑌕𑍈𑌕𑍇𑌯𑍀 𑌕𑍍𑌰𑍋𑌧𑍇𑌨 𑌜𑍍𑌵𑌲𑌿𑌤𑌾𑌨𑌨𑌾 ।
𑌦𑍀𑌰𑍍𑌘𑌮𑍁𑌷𑍍𑌣𑌂 𑌵𑌿𑌨𑌿𑌶𑍍𑌵𑌸𑍍𑌯 𑌮𑌂𑌥𑌰𑌾𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 1 ॥

𑌅𑌦𑍍𑌯 𑌰𑌾𑌮𑌮𑌿𑌤𑌃 𑌕𑍍𑌷𑌿𑌪𑍍𑌰𑌂 𑌵𑌨𑌂 𑌪𑍍𑌰𑌸𑍍𑌥𑌾𑌪𑌯𑌾𑌮𑍍𑌯𑌹𑌮𑍍 ।
𑌯𑍌𑌵𑌰𑌾𑌜𑍍𑌯𑍇 𑌚 𑌭𑌰𑌤𑌂 𑌕𑍍𑌷𑌿𑌪𑍍𑌰𑌮𑍇𑌵𑌾𑌭𑌿𑌷𑍇𑌚𑌯𑍇 ॥ 2 ॥

𑌇𑌦𑌂 𑌤𑍍𑌵𑌿𑌦𑌾𑌨𑍀𑌂 𑌸𑌂𑌪𑌶𑍍𑌯 𑌕𑍇𑌨𑍋𑌪𑌾𑌯𑍇𑌨 𑌮𑌂𑌥𑌰𑍇 ।
𑌭𑌰𑌤𑌃 𑌪𑍍𑌰𑌾𑌪𑍍𑌨𑍁𑌯𑌾𑌦𑍍𑌰𑌾𑌜𑍍𑌯𑌂 𑌨 𑌤𑍁 𑌰𑌾𑌮𑌃 𑌕𑌥𑌂𑌚𑌨 ॥ 3 ॥

𑌏𑌵𑌮𑍁𑌕𑍍𑌤𑌾 𑌤𑌯𑌾 𑌦𑍇𑌵𑍍𑌯𑌾 𑌮𑌂𑌥𑌰𑌾 𑌪𑌾𑌪𑌦𑌰𑍍𑌶𑌿𑌨𑍀 ।
𑌰𑌾𑌮𑌾𑌰𑍍𑌥𑌮𑍁𑌪𑌹𑌿𑌂𑌸𑌂𑌤𑍀 𑌕𑍈𑌕𑍇𑌯𑍀𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 4 ॥

𑌹𑌂𑌤𑍇𑌦𑌾𑌨𑍀𑌂 𑌪𑍍𑌰𑌵𑌕𑍍𑌷𑍍𑌯𑌾𑌮𑌿 𑌕𑍈𑌕𑍇𑌯𑌿 𑌶𑍍𑌰𑍂𑌯𑌤𑌾𑌂 𑌚 𑌮𑍇 ।
𑌯𑌥𑌾 𑌤𑍇 𑌭𑌰𑌤𑍋 𑌰𑌾𑌜𑍍𑌯𑌂 𑌪𑍁𑌤𑍍𑌰𑌃 𑌪𑍍𑌰𑌾𑌪𑍍𑌸𑍍𑌯𑌤𑌿 𑌕𑍇𑌵𑌲𑌮𑍍 ॥ 5 ॥

𑌕𑌿𑌂 𑌨 𑌸𑍍𑌮𑌰𑌸𑌿 𑌕𑍈𑌕𑍇𑌯𑌿 𑌸𑍍𑌮𑌰𑌂𑌤𑍀 𑌵𑌾 𑌨𑌿𑌗𑍂𑌹𑌸𑍇 ।
𑌯𑌦𑍁𑌚𑍍𑌯𑌮𑌾𑌨𑌮𑌾𑌤𑍍𑌮𑌾𑌰𑍍𑌥𑌂 𑌮𑌤𑍍𑌤𑌸𑍍𑌤𑍍𑌵𑌂 𑌶𑍍𑌰𑍋𑌤𑍁𑌮𑌿𑌚𑍍𑌛𑌸𑌿 ॥ 6 ॥

𑌮𑌯𑍋𑌚𑍍𑌯𑌮𑌾𑌨𑌂 𑌯𑌦𑌿 𑌤𑍇 𑌶𑍍𑌰𑍋𑌤𑍁𑌂 𑌛𑌂𑌦𑍋 𑌵𑌿𑌲𑌾𑌸𑌿𑌨𑌿 ।
𑌶𑍍𑌰𑍂𑌯𑌤𑌾𑌮𑌭𑌿𑌧𑌾𑌸𑍍𑌯𑌾𑌮𑌿 𑌶𑍍𑌰𑍁𑌤𑍍𑌵𑌾 𑌚𑌾𑌪𑌿 𑌵𑌿𑌮𑍃𑌶𑍍𑌯𑌤𑌾𑌮𑍍 ॥ 𑍭 ॥

𑌶𑍍𑌰𑍁𑌤𑍍𑌵𑍈𑌵𑌂 𑌵𑌚𑌨𑌂 𑌤𑌸𑍍𑌯𑌾 𑌮𑌂𑌥𑌰𑌾𑌯𑌾𑌸𑍍𑌤𑍁 𑌕𑍈𑌕𑍇𑌯𑍀 ।
𑌕𑌿𑌂𑌚𑌿𑌦𑍁𑌤𑍍𑌥𑌾𑌯 𑌶𑌯𑌨𑌾𑌤𑍍𑌸𑍍𑌵𑌾𑌸𑍍𑌤𑍀𑌰𑍍𑌣𑌾𑌦𑌿𑌦𑌮𑌬𑍍𑌰𑌵𑍀𑌤𑍍 ॥ 𑍮 ॥

𑌕𑌥𑌯 𑌤𑍍𑌵𑌂 𑌮𑌮𑍋𑌪𑌾𑌯𑌂 𑌕𑍇𑌨𑍋𑌪𑌾𑌯𑍇𑌨 𑌮𑌂𑌥𑌰𑍇 ।
𑌭𑌰𑌤𑌃 𑌪𑍍𑌰𑌾𑌪𑍍𑌨𑍁𑌯𑌾𑌦𑍍𑌰𑌾𑌜𑍍𑌯𑌂 𑌨 𑌤𑍁 𑌰𑌾𑌮𑌃 𑌕𑌥𑌂𑌚𑌨 ॥ 𑍯 ॥

𑌏𑌵𑌮𑍁𑌕𑍍𑌤𑌾 𑌤𑌯𑌾 𑌦𑍇𑌵𑍍𑌯𑌾 𑌮𑌂𑌥𑌰𑌾 𑌪𑌾𑌪𑌦𑌰𑍍𑌶𑌿𑌨𑍀 ।
𑌰𑌾𑌮𑌾𑌰𑍍𑌥𑌮𑍁𑌪𑌹𑌿𑌂𑌸𑌂𑌤𑍀 𑌕𑍁𑌬𑍍𑌜𑌾 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 10 ॥

𑌤𑌵 𑌦𑍈𑌵𑌾𑌸𑍁𑌰𑍇 𑌯𑍁𑌦𑍍𑌧𑍇 𑌸𑌹 𑌰𑌾𑌜𑌰𑍍𑌷𑌿𑌭𑌿𑌃 𑌪𑌤𑌿𑌃 ।
𑌅𑌗𑌚𑍍𑌛𑌤𑍍𑌤𑍍𑌵𑌾𑌮𑍁𑌪𑌾𑌦𑌾𑌯 𑌦𑍇𑌵𑌰𑌾𑌜𑌸𑍍𑌯 𑌸𑌾𑌹𑍍𑌯𑌕𑍃𑌤𑍍 ॥ 11 ॥

𑌦𑌿𑌶𑌮𑌾𑌸𑍍𑌥𑌾𑌯 𑌵𑍈 𑌦𑍇𑌵𑌿 𑌦𑌕𑍍𑌷𑌿𑌣𑌾𑌂 𑌦𑌂𑌡𑌕𑌾𑌨𑍍𑌪𑍍𑌰𑌤𑌿 ।
𑌵𑍈𑌜𑌯𑌂𑌤𑌮𑌿𑌤𑌿 𑌖𑍍𑌯𑌾𑌤𑌂 𑌪𑍁𑌰𑌂 𑌯𑌤𑍍𑌰 𑌤𑌿𑌮𑌿𑌧𑍍𑌵𑌜𑌃 ॥ 12 ॥

𑌸 𑌶𑌂𑌬𑌰 𑌇𑌤𑌿 𑌖𑍍𑌯𑌾𑌤𑌶𑍍𑌶𑌤𑌮𑌾𑌯𑍋 𑌮𑌹𑌾𑌸𑍁𑌰𑌃 ।
𑌦𑌦𑍌 𑌶𑌕𑍍𑌰𑌸𑍍𑌯 𑌸𑌂𑌗𑍍𑌰𑌾𑌮𑌂 𑌦𑍇𑌵𑌸𑌂𑌘𑍈𑌰𑌨𑌿𑌰𑍍𑌜𑌿𑌤𑌃 ॥ 13 ॥

𑌤𑌸𑍍𑌮𑌿𑌨𑍍𑌮𑌹𑌤𑌿 𑌸𑌂𑌗𑍍𑌰𑌾𑌮𑍇 𑌪𑍁𑌰𑍁𑌷𑌾𑌨𑍍𑌕𑍍𑌷𑌤𑌵𑌿𑌕𑍍𑌷𑌤𑌾𑌨𑍍 ।
𑌰𑌾𑌤𑍍𑌰𑍌 𑌪𑍍𑌰𑌸𑍁𑌪𑍍𑌤𑌾𑌨𑍍𑌘𑍍𑌨𑌂𑌤𑌿 𑌸𑍍𑌮 𑌤𑌰𑌸𑌾𑌽𑌽𑌸𑌾𑌦𑍍𑌯 𑌰𑌾𑌕𑍍𑌷𑌸𑌾𑌃 ॥ 14 ॥

𑌤𑌤𑍍𑌰𑌾𑌕𑌰𑍋𑌨𑍍𑌮𑌹𑌦𑍍𑌯𑍁𑌦𑍍𑌧𑌂 𑌰𑌾𑌜𑌾 𑌦𑌶𑌰𑌥𑌸𑍍𑌤𑌦𑌾 ।
𑌅𑌸𑍁𑌰𑍈𑌶𑍍𑌚 𑌮𑌹𑌾𑌬𑌾𑌹𑍁𑌶𑍍𑌶𑌸𑍍𑌤𑍍𑌰𑍈𑌶𑍍𑌚 𑌶𑌕𑌲𑍀𑌕𑍃𑌤𑌃 ॥ 15 ॥

𑌅𑌪𑌵𑌾𑌹𑍍𑌯 𑌤𑍍𑌵𑌯𑌾 𑌦𑍇𑌵𑌿 𑌸𑌂𑌗𑍍𑌰𑌾𑌮𑌾𑌨𑍍𑌨𑌷𑍍𑌟𑌚𑍇𑌤𑌨𑌃 ।
𑌤𑌤𑍍𑌰𑌾𑌪𑌿 𑌵𑌿𑌕𑍍𑌷𑌤𑌶𑍍𑌶𑌸𑍍𑌤𑍍𑌰𑍈𑌃 𑌪𑌤𑌿𑌸𑍍𑌤𑍇 𑌰𑌕𑍍𑌷𑌿𑌤𑌸𑍍𑌤𑍍𑌵𑌯𑌾 ॥ 16 ॥

𑌤𑍁𑌷𑍍𑌟𑍇𑌨 𑌤𑍇𑌨 𑌦𑌤𑍍𑌤𑍌 𑌤𑍇 𑌦𑍍𑌵𑍌 𑌵𑌰𑍌 𑌶𑍁𑌭𑌦𑌰𑍍𑌶𑌨𑍇 ।
𑌸 𑌤𑍍𑌵𑌯𑍋𑌕𑍍𑌤𑌃 𑌪𑌤𑌿𑌰𑍍𑌦𑍇𑌵𑌿 𑌯𑌦𑍇𑌚𑍍𑌛𑍇𑌯𑌂 𑌤𑌦𑌾 𑌵𑌰𑍌 ॥ 1𑍭 ॥

𑌗𑍃𑌹𑍍𑌣𑍀𑌯𑌾𑌮𑌿𑌤𑌿 𑌤𑌤𑍍𑌤𑍇𑌨 𑌤𑌥𑍇𑌤𑍍𑌯𑍁𑌕𑍍𑌤𑌂 𑌮𑌹𑌾𑌤𑍍𑌮𑌨𑌾 ।
𑌅𑌨𑌭𑌿𑌜𑍍𑌞𑌾𑌮𑍍𑌹𑍍𑌯𑌹𑌂 𑌦𑍇𑌵𑌿 𑌤𑍍𑌵𑌯𑍈𑌵 𑌕𑌥𑌿𑌤𑌾 𑌪𑍁𑌰𑌾 ॥ 1𑍮 ॥

𑌕𑌥𑍈𑌷𑌾 𑌤𑌵 𑌤𑍁 𑌸𑍍𑌨𑍇𑌹𑌾𑌨𑍍𑌮𑌨𑌸𑌾 𑌧𑌾𑌰𑍍𑌯𑌤𑍇 𑌮𑌯𑌾 ।
𑌰𑌾𑌮𑌾𑌭𑌿𑌷𑍇𑌕𑌸𑌂𑌭𑌾𑌰𑌾𑌨𑍍𑌨𑌿𑌗𑍃𑌹𑍍𑌯 𑌵𑌿𑌨𑌿𑌵𑌰𑍍𑌤𑌯 ॥ 1𑍯 ॥

𑌤𑍌 𑌵𑌰𑍌 𑌯𑌾𑌚 𑌭𑌰𑍍𑌤𑌾𑌰𑌂 𑌭𑌰𑌤𑌸𑍍𑌯𑌾𑌭𑌿𑌷𑍇𑌚𑌨𑌮𑍍 ।
𑌪𑍍𑌰𑌵𑍍𑌰𑌾𑌜𑌨𑌂 𑌚 𑌰𑌾𑌮𑌸𑍍𑌯 𑌤𑍍𑌵𑌂 𑌵𑌰𑍍𑌷𑌾𑌣𑌿 𑌚𑌤𑍁𑌰𑍍𑌦𑌶 ॥ 20 ॥

𑌚𑌤𑍁𑌰𑍍𑌦𑌶 𑌹𑌿 𑌵𑌰𑍍𑌷𑌾𑌣𑌿 𑌰𑌾𑌮𑍇 𑌪𑍍𑌰𑌵𑍍𑌰𑌾𑌜𑌿𑌤𑍇 𑌵𑌨𑌮𑍍 ।
𑌪𑍍𑌰𑌜𑌾𑌭𑌾𑌵𑌗𑌤𑌸𑍍𑌨𑍇𑌹𑌸𑍍𑌸𑍍𑌥𑌿𑌰𑌃 𑌪𑍁𑌤𑍍𑌰𑍋 𑌭𑌵𑌿𑌷𑍍𑌯𑌤𑌿 ॥ 21 ॥

𑌕𑍍𑌰𑍋𑌧𑌾𑌗𑌾𑌰𑌂 𑌪𑍍𑌰𑌵𑌿𑌶𑍍𑌯𑌾𑌽𑌦𑍍𑌯 𑌕𑍍𑌰𑍁𑌦𑍍𑌧𑍇𑌵𑌾𑌶𑍍𑌵𑌪𑌤𑍇𑌸𑍍𑌸𑍁𑌤𑍇 ।
𑌶𑍇𑌷𑍍𑌵𑌾𑌽𑌨𑌂𑌤𑌰𑍍𑌹𑌿𑌤𑌾𑌯𑌾𑌂 𑌤𑍍𑌵𑌂 𑌭𑍂𑌮𑍌 𑌮𑌲𑌿𑌨𑌵𑌾𑌸𑌿𑌨𑍀 ॥ 22 ॥

𑌮𑌾𑌸𑍍𑌮𑍈𑌨𑌂 𑌪𑍍𑌰𑌤𑍍𑌯𑍁𑌦𑍀𑌕𑍍𑌷𑍇𑌥𑌾 𑌮𑌾 𑌚𑍈𑌨𑌮𑌭𑌿𑌭𑌾𑌷𑌥𑌾𑌃 ।
𑌰𑍁𑌦𑌂𑌤𑍀 𑌚𑌾𑌪𑌿 𑌤𑌂 𑌦𑍃𑌷𑍍𑌟𑍍𑌵𑌾 𑌜𑌗𑌤𑍍𑌯𑌾𑌂 𑌶𑍋𑌕𑌲𑌾𑌲𑌸𑌾 ॥ 23 ॥

𑌦𑌯𑌿𑌤𑌾 𑌤𑍍𑌵𑌂 𑌸𑌦𑌾 𑌭𑌰𑍍𑌤𑍁𑌰𑌤𑍍𑌰 𑌮𑍇 𑌨𑌾𑌸𑍍𑌤𑌿 𑌸𑌂𑌶𑌯𑌃 ।
𑌤𑍍𑌵𑌤𑍍𑌕𑍃𑌤𑍇 𑌸 𑌮𑌹𑌾𑌰𑌾𑌜𑍋 𑌵𑌿𑌶𑍇𑌦𑌪𑌿 𑌹𑍁𑌤𑌾𑌶𑌨𑌮𑍍 ॥ 24 ॥

𑌨 𑌤𑍍𑌵𑌾𑌂 𑌕𑍍𑌰𑍋𑌧𑌯𑌿𑌤𑍁𑌂 𑌶𑌕𑍍𑌤𑍋 𑌨 𑌕𑍍𑌰𑍃𑌦𑍍𑌧𑌾𑌂 𑌪𑍍𑌰𑌤𑍍𑌯𑍁𑌦𑍀𑌕𑍍𑌷𑌿𑌤𑍁𑌮𑍍 ।
𑌤𑌵 𑌪𑍍𑌰𑌿𑌯𑌾𑌰𑍍𑌥𑌂 𑌰𑌾𑌜𑌾 𑌹𑌿 𑌪𑍍𑌰𑌾𑌣𑌾𑌨𑌪𑌿 𑌪𑌰𑌿𑌤𑍍𑌯𑌜𑍇𑌤𑍍 ॥ 25 ॥

𑌨 𑌹𑍍𑌯𑌤𑌿𑌕𑍍𑌰𑌮𑌿𑌤𑍁𑌂 𑌶𑌕𑍍𑌤𑌸𑍍𑌤𑌵 𑌵𑌾𑌕𑍍𑌯𑌂 𑌮𑌹𑍀𑌪𑌤𑌿𑌃 ।
𑌮𑌂𑌦𑌸𑍍𑌵𑌭𑌾𑌵𑍇 𑌬𑍁𑌧𑍍𑌯𑌸𑍍𑌵 𑌸𑍌𑌭𑌾𑌗𑍍𑌯𑌬𑌲𑌮𑌾𑌤𑍍𑌮𑌨𑌃 ॥ 26 ॥

𑌮𑌣𑌿𑌮𑍁𑌕𑍍𑌤𑌂 𑌸𑍁𑌵𑌰𑍍𑌣𑌾𑌨𑌿 𑌰𑌤𑍍𑌨𑌾𑌨𑌿 𑌵𑌿𑌵𑌿𑌧𑌾𑌨𑌿 𑌚 ।
𑌦𑌦𑍍𑌯𑌾𑌦𑍍𑌦𑌶𑌰𑌥𑍋 𑌰𑌾𑌜𑌾 𑌮𑌾𑌸𑍍𑌮 𑌤𑍇𑌷𑍁 𑌮𑌨𑌃 𑌕𑍃𑌥𑌾𑌃 ॥ 2𑍭 ॥

𑌯𑍌 𑌤𑍌 𑌦𑍈𑌵𑌾𑌸𑍁𑌰𑍇 𑌯𑍁𑌦𑍍𑌧𑍇 𑌵𑌰𑍌 𑌦𑌶𑌰𑌥𑍋𑌽𑌦𑌦𑌾𑌤𑍍 ।
𑌤𑍌 𑌸𑍍𑌮𑌾𑌰𑌯 𑌮𑌹𑌾𑌭𑌾𑌗𑍇 𑌸𑍋𑌽𑌰𑍍𑌥𑍋 𑌨 𑌤𑍍𑌵𑌾𑌮𑌤𑌿𑌕𑍍𑌰𑌮𑍇𑌤𑍍 ॥ 2𑍮 ॥

𑌯𑌦𑌾𑌤𑍁 𑌤𑍇 𑌵𑌰𑌂 𑌦𑌦𑍍𑌯𑌾𑌤𑍍𑌸𑍍𑌵𑌯𑌮𑍁𑌤𑍍𑌥𑌾𑌪𑍍𑌯 𑌰𑌾𑌘𑌵𑌃 ।
𑌵𑍍𑌯𑌵𑌸𑍍𑌥𑌾𑌪𑍍𑌯 𑌮𑌹𑌾𑌰𑌾𑌜𑌂 𑌤𑍍𑌵𑌮𑌿𑌮𑌂 𑌵𑍃𑌣𑍁𑌯𑌾 𑌵𑌰𑌮𑍍 ॥ 2𑍯 ॥

𑌰𑌾𑌮𑌂 𑌪𑍍𑌰𑌵𑍍𑌰𑌾𑌜𑌯𑌾𑌰𑌣𑍍𑌯𑍇 𑌨𑌵 𑌵𑌰𑍍𑌷𑌾𑌣𑌿 𑌪𑌂𑌚 𑌚 ।
𑌭𑌰𑌤𑌃 𑌕𑍍𑌰𑌿𑌯𑌤𑌾𑌂 𑌰𑌾𑌜𑌾 𑌪𑍃𑌥𑌿𑌵𑍍𑌯𑌾𑌃 𑌪𑌾𑌰𑍍𑌥𑌿𑌵𑌰𑍍𑌷𑌭𑌃 ॥ 30 ॥

𑌚𑌤𑍁𑌰𑍍𑌦𑌶 𑌹𑌿 𑌵𑌰𑍍𑌷𑌾𑌣𑌿 𑌰𑌾𑌮𑍇 𑌪𑍍𑌰𑌵𑍍𑌰𑌾𑌜𑌿𑌤𑍇 𑌵𑌨𑌮𑍍 ।
𑌰𑍂𑌢𑌶𑍍𑌚 𑌕𑍃𑌤𑌮𑍂𑌲𑌶𑍍𑌚 𑌶𑍇𑌷𑌂 𑌸𑍍𑌥𑌾𑌸𑍍𑌯𑌤𑌿 𑌤𑍇 𑌸𑍁𑌤𑌃 ॥ 31 ॥

𑌰𑌾𑌮𑌪𑍍𑌰𑌵𑍍𑌰𑌾𑌜𑌨𑌂 𑌚𑍈𑌵 𑌦𑍇𑌵𑌿 𑌯𑌾𑌚𑌸𑍍𑌵 𑌤𑌂 𑌵𑌰𑌮𑍍 ।
𑌏𑌵𑌂 𑌸𑌿𑌦𑍍𑌧𑍍𑌯𑌂𑌤𑌿 𑌪𑍁𑌤𑍍𑌰𑌸𑍍𑌯 𑌸𑌰𑍍𑌵𑌾𑌰𑍍𑌥𑌾𑌸𑍍𑌤𑌵 𑌭𑌾𑌮𑌿𑌨𑌿 ॥ 32 ॥

𑌏𑌵𑌂 𑌪𑍍𑌰𑌵𑍍𑌰𑌾𑌜𑌿𑌤𑌶𑍍𑌚𑍈𑌵 𑌰𑌾𑌮𑍋𑌽𑌰𑌾𑌮𑍋 𑌭𑌵𑌿𑌷𑍍𑌯𑌤𑌿 ।
𑌭𑌰𑌤𑌶𑍍𑌚 𑌹𑌤𑌾𑌮𑌿𑌤𑍍𑌰𑌸𑍍𑌤𑌵 𑌰𑌾𑌜𑌾 𑌭𑌵𑌿𑌷𑍍𑌯𑌤𑌿 ॥ 33 ॥

𑌯𑍇𑌨 𑌕𑌾𑌲𑍇𑌨 𑌰𑌾𑌮𑌶𑍍𑌚 𑌵𑌨𑌾𑌤𑍍𑌪𑍍𑌰𑌤𑍍𑌯𑌾𑌗𑌮𑌿𑌷𑍍𑌯𑌤𑌿 ।
𑌤𑍇𑌨 𑌕𑌾𑌲𑍇𑌨 𑌪𑍁𑌤𑍍𑌰𑌸𑍍𑌤𑍇 𑌕𑍃𑌤𑌮𑍂𑌲𑍋 𑌭𑌵𑌿𑌷𑍍𑌯𑌤𑌿 ॥ 34 ॥

𑌸𑍁𑌗𑍃𑌹𑍀𑌤𑌮𑌨𑍁𑌷𑍍𑌯𑌶𑍍𑌚 𑌸𑍁𑌹𑍃𑌦𑍍𑌭𑌿𑌸𑍍𑌸𑌾𑌰𑍍𑌧𑌮𑌾𑌤𑍍𑌮𑌵𑌾𑌨𑍍 ।
𑌪𑍍𑌰𑌾𑌪𑍍𑌤𑌕𑌾𑌲𑌂 𑌨𑍁 𑌮𑌨𑍍𑌯𑍇𑌽𑌹𑌂 𑌰𑌾𑌜𑌾𑌨𑌂 𑌵𑍀𑌤𑌸𑌾𑌧𑍍𑌵𑌸𑌾 ॥ 35 ॥

𑌰𑌾𑌮𑌾𑌭𑌿𑌷𑍇𑌕𑌸𑌂𑌕𑌲𑍍𑌪𑌾𑌨𑍍𑌨𑌿𑌗𑍃𑌹𑍍𑌯 𑌵𑌿𑌨𑌿𑌵𑌰𑍍𑌤𑌯 ।
𑌅𑌨𑌰𑍍𑌥𑌮𑌰𑍍𑌥𑌰𑍂𑌪𑍇𑌣 𑌗𑍍𑌰𑌾𑌹𑌿𑌤𑌾 𑌸𑌾 𑌤𑌤𑌸𑍍𑌤𑌯𑌾 ॥ 36 ॥

𑌹𑍃𑌷𑍍𑌟𑌾 𑌪𑍍𑌰𑌤𑍀𑌤𑌾 𑌕𑍈𑌕𑍇𑌯𑍀 𑌮𑌂𑌥𑌰𑌾𑌮𑌿𑌦𑌮𑌬𑍍𑌰𑌵𑍀𑌤𑍍 ।
𑌸𑌾 𑌹𑌿 𑌵𑌾𑌕𑍍𑌯𑍇𑌨 𑌕𑍁𑌬𑍍𑌜𑌾𑌯𑌾𑌃 𑌕𑌿𑌶𑍋𑌰𑍀𑌵𑍋𑌤𑍍𑌪𑌥𑌂 𑌗𑌤𑌾 ॥ 3𑍭 ॥

𑌕𑍈𑌕𑍇𑌯𑍀 𑌵𑌿𑌸𑍍𑌮𑌯𑌂 𑌪𑍍𑌰𑌾𑌪𑍍𑌤𑌾 𑌪𑌰𑌂 𑌪𑌰𑌮𑌦𑌰𑍍𑌶𑌨𑌾 ।
𑌕𑍁𑌬𑍍𑌜𑍇 𑌤𑍍𑌵𑌾𑌂 𑌨𑌾𑌭𑌿𑌜𑌾𑌨𑌾𑌮𑌿 𑌶𑍍𑌰𑍇𑌷𑍍𑌠𑌾𑌂 𑌶𑍍𑌰𑍇𑌷𑍍𑌠𑌾𑌭𑌿𑌥𑌾𑌯𑌿𑌨𑍀𑌮𑍍 ॥ 3𑍮 ॥

𑌪𑍃𑌥𑌿𑌵𑍍𑌯𑌾𑌮𑌸𑌿 𑌕𑍁𑌬𑍍𑌜𑌾𑌨𑌾𑌮𑍁𑌤𑍍𑌤𑌮𑌾 𑌬𑍁𑌦𑍍𑌧𑌿𑌨𑌿𑌶𑍍𑌚𑌯𑍇 ।
𑌤𑍍𑌵𑌮𑍇𑌵 𑌤𑍁 𑌮𑌮𑌾𑌽𑌰𑍍𑌥𑍇𑌷𑍁 𑌨𑌿𑌤𑍍𑌯𑌯𑍁𑌕𑍍𑌤𑌾 𑌹𑌿𑌤𑍈𑌷𑌿𑌣𑍀 ॥ 3𑍯 ॥

𑌨𑌾𑌹𑌂 𑌸𑌮𑌵𑌬𑍁𑌧𑍍𑌯𑍇𑌯𑌂 𑌕𑍁𑌬𑍍𑌜𑍇 𑌰𑌾𑌜𑍍𑌞𑌶𑍍𑌚𑌿𑌕𑍀𑌰𑍍𑌷𑌿𑌤𑌮𑍍 ।
𑌸𑌂𑌤𑌿 𑌦𑍁𑌸𑍍𑌸𑌂𑌸𑍍𑌥𑌿𑌤𑌾𑌃 𑌕𑍁𑌬𑍍𑌜𑌾 𑌵𑌕𑍍𑌰𑌾𑌃 𑌪𑌰𑌮𑌦𑌾𑌰𑍁𑌣𑌾𑌃 ॥ 40 ॥

𑌤𑍍𑌵𑌂 𑌪𑌦𑍍𑌮𑌮𑌿𑌵 𑌵𑌾𑌤𑍇𑌨 𑌸𑌨𑍍𑌨𑌤𑌾 𑌪𑍍𑌰𑌿𑌯𑌦𑌰𑍍𑌶𑌨𑌾 ।
𑌤𑍍𑌵𑌂 𑌪𑌦𑍍𑌮𑌮𑌿𑌵 𑌵𑌾𑌤𑍇𑌨 𑌸𑌨𑍍𑌨𑌤𑌾 𑌪𑍍𑌰𑌿𑌯𑌦𑌰𑍍𑌶𑌨𑌾 ।
𑌉𑌰𑌸𑍍𑌤𑍇𑌽𑌭𑌿𑌨𑌿𑌵𑌿𑌷𑍍𑌟𑌂 𑌵𑍈 𑌯𑌾𑌵𑌤𑍍𑌸𑍍𑌕𑌂𑌧𑌾𑌤𑍍 𑌸𑌮𑍁𑌨𑍍𑌨𑌤𑌮𑍍 ॥ 41 ॥

𑌅𑌧𑌸𑍍𑌤𑌾𑌚𑍍𑌚𑍋𑌦𑌰𑌂 𑌶𑌾𑌤𑌂 𑌸𑍁𑌨𑌾𑌭𑌮𑌿𑌵 𑌲𑌜𑍍𑌜𑌿𑌤𑌮𑍍 ।
𑌪𑌰𑌿𑌪𑍂𑌰𑍍𑌣𑌂 𑌤𑍁 𑌜𑌘𑌨𑌂 𑌸𑍁𑌪𑍀𑌨𑍌 𑌚 𑌪𑌯𑍋𑌧𑌰𑍌 ॥ 42 ॥

𑌵𑌿𑌮𑌲𑍇𑌂𑌦𑍁𑌸𑌮𑌂 𑌵𑌕𑍍𑌤𑍍𑌰𑌮𑌹𑍋𑌰𑌾𑌜𑌸𑌿 𑌮𑌂𑌥𑌰𑍇 ।
𑌜𑌘𑌨𑌂 𑌤𑌵 𑌨𑌿𑌰𑍍𑌘𑍁𑌷𑍍𑌟𑌂 𑌰𑌶𑌨𑌾𑌦𑌾𑌮𑌶𑍋𑌭𑌿𑌤𑌮𑍍 ॥ 43 ॥

𑌜𑌂𑌘𑍇 𑌭𑍃𑌶𑌮𑍁𑌪𑌨𑍍𑌯𑌸𑍍𑌤𑍇 𑌪𑌾𑌦𑍌 𑌚𑌾𑌪𑍍𑌯𑌾𑌯𑌤𑌾𑌵𑍁𑌭𑍌 ।
𑌤𑍍𑌵𑌮𑌾𑌯𑌤𑌾𑌭𑍍𑌯𑌾𑌂 𑌸𑌕𑍍𑌥𑌿𑌭𑍍𑌯𑌾𑌂 𑌮𑌂𑌥𑌰𑍇 𑌕𑍍𑌷𑍌𑌮𑌵𑌾𑌸𑌿𑌨𑍀 ॥ 44 ॥

𑌅𑌗𑍍𑌰𑌤𑍋 𑌮𑌮 𑌗𑌚𑍍𑌛𑌂𑌤𑍀 𑌰𑌾𑌜𑌹𑌂𑌸𑍀𑌵 𑌰𑌾𑌜𑌸𑍇 ।
𑌆𑌸𑌨𑍍𑌯𑌾𑌶𑍍𑌶𑌂𑌬𑌰𑍇 𑌮𑌾𑌯𑌾𑌸𑍍𑌸𑌹𑌸𑍍𑌰𑌮𑌸𑍁𑌰𑌾𑌧𑌿𑌪𑍇 ॥ 45 ॥

𑌸𑌰𑍍𑌵𑌾𑌸𑍍𑌤𑍍𑌵𑌯𑌿 𑌨𑌿𑌵𑌿𑌷𑍍𑌟𑌾𑌸𑍍𑌤𑌾 𑌭𑍂𑌯𑌶𑍍𑌚𑌾𑌨𑍍𑌯𑌾𑌸𑍍𑌸𑌹𑌸𑍍𑌰𑌶𑌃 ।
𑌤𑌵𑍇𑌦𑌂 𑌸𑍍𑌥𑌗𑍁 𑌯𑌦𑍍𑌦𑍀𑌰𑍍𑌘𑌂 𑌰𑌥𑌘𑍋𑌣𑌮𑌿𑌵𑌾𑌯𑌤𑌮𑍍 ॥ 46 ॥

𑌮𑌤𑌯𑌃 𑌕𑍍𑌷𑌤𑍍𑌰𑌵𑌿𑌦𑍍𑌯𑌾𑌶𑍍𑌚 𑌮𑌾𑌯𑌾𑌶𑍍𑌚𑌾𑌤𑍍𑌰 𑌵𑌸𑌂𑌤𑌿 𑌤𑍇 ।
𑌅𑌤𑍍𑌰 𑌤𑍇 𑌪𑍍𑌰𑌤𑌿𑌮𑍋𑌕𑍍𑌷𑍍𑌯𑌾𑌮𑌿 𑌮𑌾𑌲𑌾𑌂 𑌕𑍁𑌬𑍍𑌜𑍇 𑌹𑌿𑌰𑌣𑍍𑌮𑌯𑍀𑌮𑍍 ॥ 4𑍭 ॥

𑌅𑌭𑌿𑌷𑌿𑌕𑍍𑌤𑍇 𑌚 𑌭𑌰𑌤𑍇 𑌰𑌾𑌘𑌵𑍇 𑌚 𑌵𑌨𑌂 𑌗𑌤𑍇 ।
𑌜𑌾𑌤𑍍𑌯𑍇𑌨 𑌚 𑌸𑍁𑌵𑌰𑍍𑌣𑍇𑌨 𑌸𑍁𑌨𑌿𑌷𑍍𑌟𑌪𑍍𑌤𑍇𑌨 𑌮𑌂𑌥𑌰𑍇 ॥ 4𑍮 ॥

𑌲𑌬𑍍𑌧𑌾𑌰𑍍𑌥𑌾 𑌚 𑌪𑍍𑌰𑌤𑍀𑌤𑌾 𑌚 𑌲𑍇𑌪𑌯𑌿𑌷𑍍𑌯𑌾𑌮𑌿 𑌤𑍇 𑌸𑍍𑌥𑌗𑍁 ।
𑌮𑍁𑌖𑍇 𑌚 𑌤𑌿𑌲𑌕𑌂 𑌚𑌿𑌤𑍍𑌰𑌂 𑌜𑌾𑌤𑌰𑍂𑌪𑌮𑌯𑌂 𑌶𑍁𑌭𑌮𑍍 ॥ 4𑍯 ॥

𑌕𑌾𑌰𑌯𑌿𑌷𑍍𑌯𑌾𑌮𑌿 𑌤𑍇 𑌕𑍁𑌬𑍍𑌜𑍇 𑌶𑍁𑌭𑌾𑌨𑍍𑌯𑌾𑌭𑌰𑌣𑌾𑌨𑌿 𑌚 ।
𑌪𑌰𑌿𑌧𑌾𑌯 𑌶𑍁𑌭𑍇 𑌵𑌸𑍍𑌤𑍍𑌰𑍇 𑌦𑍇𑌵𑌤𑍇𑌵 𑌚𑌰𑌿𑌷𑍍𑌯𑌸𑌿 ॥ 50 ॥

𑌚𑌂𑌦𑍍𑌰𑌮𑌾𑌹𑍍𑌵𑌯𑌮𑌾𑌨𑍇𑌨 𑌮𑍁𑌖𑍇𑌨𑌾𑌪𑍍𑌰𑌤𑌿𑌮𑌾𑌨𑌨𑌾 ।
𑌗𑌮𑌿𑌷𑍍𑌯𑌸𑌿 𑌗𑌤𑌿𑌂 𑌮𑍁𑌖𑍍𑌯𑌾𑌂 𑌗𑌰𑍍𑌵𑌯𑌂𑌤𑍀 𑌦𑍍𑌵𑌿𑌷𑌜𑍍𑌜𑌨𑌮𑍍 ॥ 51 ॥

𑌤𑌵𑌾𑌪𑌿 𑌕𑍁𑌬𑍍𑌜𑌾𑌃 𑌕𑍁𑌬𑍍𑌜𑌾𑌯𑌾𑌸𑍍𑌸𑌰𑍍𑌵𑌾𑌭𑌰𑌣𑌭𑍂𑌷𑌿𑌤𑌾𑌃 ।
𑌪𑌾𑌦𑍌 𑌪𑌰𑌿𑌚𑌰𑌿𑌷𑍍𑌯𑌂𑌤𑌿 𑌯𑌥𑍈𑌵 𑌤𑍍𑌵𑌂 𑌸𑌦𑌾 𑌮𑌮 ॥ 52 ॥

𑌇𑌤𑌿 𑌪𑍍𑌰𑌶𑌸𑍍𑌯𑌮𑌾𑌨𑌾 𑌸𑌾 𑌕𑍈𑌕𑍇𑌯𑍀𑌮𑌿𑌦𑌮𑌬𑍍𑌰𑌵𑍀𑌤𑍍 ।
𑌶𑌯𑌾𑌨𑌾𑌂 𑌶𑌯𑌨𑍇 𑌶𑍁𑌭𑍍𑌰𑍇 𑌵𑍇𑌦𑍍𑌯𑌾𑌮𑌗𑍍𑌨𑌿𑌶𑌿𑌖𑌾𑌮𑌿𑌵 ॥ 53 ॥

𑌗𑌤𑍋𑌦𑌕𑍇 𑌸𑍇𑌤𑍁𑌬𑌂𑌧𑍋 𑌨 𑌕𑌲𑍍𑌯𑌾𑌣𑌿 𑌵𑌿𑌧𑍀𑌯𑌤𑍇 ।
𑌉𑌤𑍍𑌤𑌿𑌷𑍍𑌠 𑌕𑍁𑌰𑍁 𑌕𑌲𑍍𑌯𑌾𑌣𑌿 𑌰𑌾𑌜𑌾𑌨𑌮𑌨𑍁𑌦𑌰𑍍𑌶𑌯 ॥ 54 ॥

𑌤𑌥𑌾 𑌪𑍍𑌰𑍋𑌤𑍍𑌸𑌾𑌹𑌿𑌤𑌾 𑌦𑍇𑌵𑍀 𑌗𑌤𑍍𑌵𑌾 𑌮𑌂𑌥𑌰𑌯𑌾 𑌸𑌹 ।
𑌕𑍍𑌰𑍋𑌧𑌾𑌗𑌾𑌰𑌂 𑌵𑌿𑌶𑌾𑌲𑌾𑌕𑍍𑌷𑍀 𑌸𑍌𑌭𑌾𑌗𑍍𑌯𑌮𑌦𑌗𑌰𑍍𑌵𑌿𑌤𑌾 ॥ 55 ॥

𑌅𑌨𑍇𑌕𑌶𑌤𑌸𑌾𑌹𑌸𑍍𑌰𑌂 𑌮𑍁𑌕𑍍𑌤𑌾𑌹𑌾𑌰𑌂 𑌵𑌰𑌾𑌂𑌗𑌨𑌾 ।
𑌅𑌵𑌮𑍁𑌚𑍍𑌯 𑌵𑌰𑌾𑌰𑍍𑌹𑌾𑌣𑌿 𑌶𑍁𑌭𑌾𑌨𑍍𑌯𑌾𑌭𑌰𑌣𑌾𑌨𑌿 𑌚 ॥ 56 ॥

𑌤𑌤𑍋 𑌹𑍇𑌮𑍋𑌪𑌮𑌾 𑌤𑌤𑍍𑌰 𑌕𑍁𑌬𑍍𑌜𑌾𑌵𑌾𑌕𑍍𑌯𑌵𑌶𑌂 𑌗𑌤𑌾 ।
𑌸𑌂𑌵𑌿𑌶𑍍𑌯 𑌭𑍂𑌮𑍌 𑌕𑍈𑌕𑍇𑌯𑍀 𑌮𑌂𑌥𑌰𑌾𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 5𑍭 ॥

𑌇𑌹 𑌵𑌾 𑌮𑌾𑌂 𑌮𑍃𑌤𑌾𑌂 𑌕𑍁𑌬𑍍𑌜𑍇 𑌨𑍃𑌪𑌾𑌯𑌾𑌵𑍇𑌦𑌯𑌿𑌷𑍍𑌯𑌸𑌿 ।
𑌵𑌨𑌂 𑌤𑍁 𑌰𑌾𑌘𑌵𑍇 𑌪𑍍𑌰𑌾𑌪𑍍𑌤𑍇 𑌭𑌰𑌤𑌃 𑌪𑍍𑌰𑌾𑌪𑍍𑌸𑍍𑌯𑌤𑌿 𑌕𑍍𑌷𑌿𑌤𑌿𑌮𑍍 ॥ 5𑍮 ॥

𑌨 𑌸𑍁𑌵𑌰𑍍𑌣𑍇𑌨 𑌮𑍇 𑌹𑍍𑌯𑌰𑍍𑌥𑍋 𑌨 𑌰𑌤𑍍𑌨𑍈𑌰𑍍𑌨 𑌚 𑌭𑍂𑌷𑌣𑍈𑌃 ।
𑌏𑌷 𑌮𑍇 𑌜𑍀𑌵𑌿𑌤𑌸𑍍𑌯𑌾𑌂𑌤𑍋 𑌰𑌾𑌮𑍋 𑌯𑌦𑍍𑌯𑌭𑌿𑌷𑌿𑌚𑍍𑌯𑌤𑍇 ॥ 5𑍯 ॥

𑌅𑌥𑍋 𑌪𑍁𑌨𑌸𑍍𑌤𑌾𑌂 𑌮𑌹𑌿𑌷𑍀𑌂 𑌮𑌹𑍀𑌕𑍍𑌷𑌿𑌤𑍋 𑌵𑌚𑍋𑌭𑌿𑌰𑌤𑍍𑌯𑌰𑍍𑌥𑌮𑌹𑌾𑌪𑌰𑌾𑌕𑍍𑌰𑌮𑍈𑌃 ।
𑌉𑌵𑌾𑌚 𑌕𑍁𑌬𑍍𑌜𑌾 𑌭𑌰𑌤𑌸𑍍𑌯 𑌮𑌾𑌤𑌰𑌂 𑌹𑌿𑌤𑌂 𑌵𑌚𑍋 𑌰𑌾𑌮𑌮𑍁𑌪𑍇𑌤𑍍𑌯 𑌚𑌾𑌹𑌿𑌤𑌮𑍍 ॥ 60 ॥

𑌪𑍍𑌰𑌪𑌤𑍍𑌸𑍍𑌯𑌤𑍇 𑌰𑌾𑌜𑍍𑌯𑌮𑌿𑌦𑌂 𑌹𑌿 𑌰𑌾𑌘𑌵𑍋 𑌯𑌦𑌿 𑌧𑍍𑌰𑍁𑌵𑌂 𑌤𑍍𑌵𑌂 𑌸𑌸𑍁𑌤𑌾 𑌚 𑌤𑌪𑍍𑌸𑍍𑌯𑌸𑍇 ।
𑌅𑌤𑍋 𑌹𑌿 𑌕𑌲𑍍𑌯𑌾𑌣𑌿 𑌯𑌤𑌸𑍍𑌵 𑌤𑌤𑍍𑌤𑌥𑌾 𑌯𑌥𑌾 𑌸𑍁𑌤𑌸𑍍𑌤𑍇 𑌭𑌰𑌤𑍋𑌽𑌭𑌿𑌷𑍇𑌕𑍍𑌷𑍍𑌯𑌤𑍇 ॥ 61 ॥

𑌤𑌥𑌾𑌽𑌤𑌿𑌵𑌿𑌦𑍍𑌧𑌾 𑌮𑌹𑌿𑌷𑍀 𑌤𑍁 𑌕𑍁𑌬𑍍𑌜𑌯𑌾 𑌸𑌮𑌾𑌹𑌤𑌾 𑌵𑌾𑌗𑌿𑌷𑍁𑌭𑌿𑌰𑍍𑌮𑍁𑌹𑍁𑌰𑍍𑌮𑍁𑌹𑍁𑌃 ।
𑌨𑌿𑌧𑌾𑌯𑌹𑌸𑍍𑌤𑍌 𑌹𑍃𑌦𑌯𑍇𑌽𑌤𑌿𑌵𑌿𑌸𑍍𑌮𑌿𑌤𑌾 𑌶𑌶𑌂𑌸 𑌕𑍁𑌬𑍍𑌜𑌾𑌂 𑌕𑍁𑌪𑌿𑌤𑌾 𑌪𑍁𑌨𑌃 𑌪𑍁𑌨𑌃 ॥ 62 ॥

𑌯𑌮𑌸𑍍𑌯 𑌵𑌾 𑌮𑌾𑌂 𑌵𑌿𑌷𑌯𑌂 𑌗𑌤𑌾𑌮𑌿𑌤𑍋 𑌨𑌿𑌶𑌾𑌮𑍍𑌯 𑌕𑍁𑌬𑍍𑌜𑍇 𑌪𑍍𑌰𑌤𑌿𑌵𑍇𑌦𑌯𑌿𑌷𑍍𑌯𑌸𑌿 ।
𑌵𑌨𑌂 𑌗𑌤𑍇 𑌵𑌾 𑌸𑍁𑌚𑌿𑌰𑌾𑌯 𑌰𑌾𑌘𑌵𑍇 𑌸𑌮𑍃𑌦𑍍𑌧𑌕𑌾𑌮𑍋 𑌭𑌰𑌤𑍋 𑌭𑌵𑌿𑌷𑍍𑌯𑌤𑌿 ॥ 63 ॥

𑌅𑌹𑌂 𑌹𑌿 𑌨𑍈𑌵𑌾𑌸𑍍𑌤𑌰𑌣𑌾𑌨𑌿 𑌨 𑌸𑍍𑌰𑌜𑍋 𑌨 𑌚𑌂𑌦𑌨𑌂 𑌨𑌾𑌂𑌜𑌨𑌪𑌾𑌨𑌭𑍋𑌜𑌨𑌮𑍍 ।
𑌨 𑌕𑌿𑌂𑌚𑌿𑌦𑌿𑌚𑍍𑌛𑌾𑌮𑌿 𑌨 𑌚𑍇𑌹 𑌜𑍀𑌵𑌿𑌤𑌂 𑌨 𑌚𑍇𑌦𑌿𑌤𑍋 𑌗𑌚𑍍𑌛𑌤𑌿 𑌰𑌾𑌘𑌵𑍋 𑌵𑌨𑌮𑍍 ॥ 64 ॥

𑌅𑌥𑍈𑌤𑌦𑍁𑌕𑍍𑌤𑍍𑌵𑌾 𑌵𑌚𑌨𑌂 𑌸𑍁𑌦𑌾𑌰𑍁𑌣𑌂 𑌨𑌿𑌧𑌾𑌯 𑌸𑌰𑍍𑌵𑌾𑌭𑌰𑌣𑌾𑌨𑌿 𑌭𑌾𑌮𑌿𑌨𑍀 ।
𑌅𑌸𑌂𑌵𑍃𑌤𑌾𑌮𑌾𑌸𑍍𑌤𑌰𑌣𑍇𑌨 𑌮𑍇𑌦𑌿𑌨𑍀𑌂 𑌤𑌦𑌾𑌽𑌧𑌿𑌶𑌿𑌶𑍍𑌯𑍇 𑌪𑌤𑌿𑌤𑍇𑌵 𑌕𑌿𑌨𑍍𑌨𑌰𑍀 ॥ 65 ॥

𑌉𑌦𑍀𑌰𑍍𑌣𑌸𑌂𑌰𑌂𑌭𑌤𑌮𑍋𑌵𑍃𑌤𑌾𑌨𑌨𑌾 𑌤𑌥𑌾𑌽𑌵𑌮𑍁𑌕𑍍𑌤𑍋𑌤𑍍𑌤𑌮𑌮𑌾𑌲𑍍𑌯𑌭𑍂𑌷𑌣𑌾 ।
𑌨𑌰𑍇𑌂𑌦𑍍𑌰𑌪𑌤𑍍𑌨𑍀 𑌵𑌿𑌮𑌨𑌾 𑌬𑌭𑍂𑌵 𑌸𑌾 𑌤𑌮𑍋𑌵𑍃𑌤𑌾 𑌦𑍍𑌯𑍌𑌰𑌿𑌵 𑌮𑌗𑍍𑌨𑌤𑌾𑌰𑌕𑌾 ॥ 66 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌨𑌵𑌮𑌸𑍍𑌸𑌰𑍍𑌗𑌃 ॥

Browse Related Categories: