VR 2.85 Ayodhya Kanda - Sarga 85 - Grantha

Collection of Spiritual and Devotional Literature in Various Indian Languages

View this in:

2.𑍮5 𑌅𑌯𑍋𑌧𑍍𑌯𑌾𑌕𑌾𑌂𑌡 - 𑌪𑌂𑌚𑌾𑌶𑍀𑌤𑌿𑌤𑌮 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌾𑌶𑍀𑌤𑌿𑌤𑌮𑌸𑍍𑌸𑌰𑍍𑌗𑌃 ।

𑌏𑌵𑌮𑍁𑌕𑍍𑌤𑌸𑍍𑌤𑍁 𑌭𑌰𑌤𑍋 𑌨𑌿𑌷𑌾𑌦𑌾𑌧𑌿𑌪𑌤𑌿𑌂 𑌗𑍁𑌹𑌮𑍍 ।
𑌪𑍍𑌰𑌤𑍍𑌯𑍁𑌵𑌾𑌚 𑌮𑌹𑌾𑌪𑍍𑌰𑌾𑌜𑍍𑌞𑍋 𑌵𑌾𑌕𑍍𑌯𑌂 𑌹𑍇𑌤𑍍𑌵𑌰𑍍𑌥𑌸𑌂𑌹𑌿𑌤𑌮𑍍 ॥ 1 ॥

𑌊𑌰𑍍𑌜𑌿𑌤𑌃 𑌖𑌲𑍁 𑌤𑍇 𑌕𑌾𑌮𑌃 𑌕𑍃𑌤𑍋 𑌮𑌮 𑌗𑍁𑌰𑍋𑌸𑍍𑌸𑌖𑍇 ।
𑌯𑍋 𑌮𑍇 𑌤𑍍𑌵𑌮𑍀𑌦𑍃𑌶𑍀𑌂 𑌸𑍇𑌨𑌾𑌮𑍇𑌕𑍋𑌽𑌭𑍍𑌯𑌰𑍍𑌚𑌿𑌤𑍁𑌮𑌿𑌚𑍍𑌛𑌸𑌿 ॥ 2 ॥

𑌇𑌤𑍍𑌯𑍁𑌕𑍍𑌤𑍍𑌵𑌾 𑌤𑍁 𑌮𑌹𑌾𑌤𑍇𑌜𑌾 𑌗𑍁𑌹𑌂 𑌵𑌚𑌨𑌮𑍁𑌤𑍍𑌤𑌮𑌮𑍍 ।
𑌅𑌬𑍍𑌰𑌵𑍀𑌦𑍍𑌭𑌰𑌤 𑌶𑍍𑌶𑍍𑌰𑍀𑌮𑌾𑌨𑌨𑌿𑌷𑌾𑌦𑌾𑌧𑌿𑌪𑌤𑌿𑌂 𑌪𑍁𑌨𑌃 ॥ 3 ॥

𑌕𑌤𑌰𑍇𑌣 𑌗𑌮𑌿𑌷𑍍𑌯𑌾𑌮𑌿 𑌭𑌰𑌦𑍍𑌵𑌾𑌜𑌾𑌶𑍍𑌰𑌮𑌂 𑌗𑍁𑌹 ।
𑌗𑌹𑌨𑍋𑌽𑌯𑌂 𑌭𑍃𑌶𑌂 𑌦𑍇𑌶𑍋 𑌗𑌂𑌗𑌾𑌽𑌨𑍂𑌪𑍋 𑌦𑍁𑌰𑌤𑍍𑌯𑌯𑌃 ॥ 4 ॥

𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌰𑌾𑌜𑌪𑍁𑌤𑍍𑌰𑌸𑍍𑌯 𑌧𑍀𑌮𑌤𑌃 ।
𑌅𑌬𑍍𑌰𑌵𑍀𑌤𑍍𑌪𑍍𑌰𑌾𑌂𑌜𑌲𑌿𑌰𑍍𑌵𑌾𑌕𑍍𑌯𑌂 𑌗𑍁𑌹𑍋 𑌗𑌹𑌨𑌗𑍋𑌚𑌰𑌃 ॥ 5 ॥

𑌦𑌾𑌶𑌾𑌸𑍍𑌤𑍍𑌵𑌾𑌽𑌨𑍁𑌽𑌗𑌮𑌿𑌷𑍍𑌯𑌂𑌤𑌿 𑌧𑌨𑍍𑌵𑌿𑌨𑌸𑍍𑌸𑍁𑌸𑌮𑌾𑌹𑌿𑌤𑌾𑌃 ।
𑌅𑌹𑌂 𑌤𑍍𑌵𑌾𑌨𑍁𑌗𑌮𑌿𑌷𑍍𑌯𑌾𑌮𑌿 𑌰𑌾𑌜𑌪𑍁𑌤𑍍𑌰 𑌮𑌹𑌾𑌯𑌶𑌃 ॥ 6 ॥

𑌕𑌚𑍍𑌛𑌿𑌨𑍍𑌨𑌦𑍁𑌷𑍍𑌟𑍋 𑌵𑍍𑌰𑌜𑌸𑌿 𑌰𑌾𑌮𑌸𑍍𑌯𑌾𑌕𑍍𑌲𑌿𑌷𑍍𑌟𑌕𑌰𑍍𑌮𑌣𑌃 ।
𑌇𑌯𑌂 𑌤𑍇 𑌮𑌹𑌤𑍀 𑌸𑍇𑌨𑌾 𑌶𑌂𑌕𑌾𑌂 𑌜𑌨𑌯𑌤𑍀𑌵 𑌮𑍇 ॥ 𑍭 ॥

𑌤𑌮𑍇𑌵𑌮𑌭𑌿𑌭𑌾𑌷𑌂𑌤𑌮𑌾𑌕𑌾𑌶 𑌇𑌵 𑌨𑌿𑌰𑍍𑌮𑌲𑌃 ।
𑌭𑌰𑌤𑌶𑍍𑌶𑍍𑌲𑌕𑍍𑌷𑍍𑌣𑌯𑌾 𑌵𑌾𑌚𑌾 𑌗𑍁𑌹𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 𑍮 ॥

𑌮𑌾𑌭𑍂𑌤𑍍𑌸 𑌕𑌾𑌲𑍋 𑌯𑌤𑍍𑌕𑌷𑍍𑌟𑌂 𑌨 𑌮𑌾𑌂 𑌶𑌂𑌕𑌿𑌤𑍁𑌮𑌰𑍍𑌹𑌸𑌿 ।
𑌰𑌾𑌘𑌵 𑌸𑍍𑌸𑌹𑌿 𑌮𑍇 𑌭𑍍𑌰𑌾𑌤𑌾 𑌜𑍍𑌯𑍇𑌷𑍍𑌠𑌃 𑌪𑌿𑌤𑍁𑌸𑌮𑍋 𑌮𑌤𑌃 ॥ 𑍯 ॥

𑌤𑌂 𑌨𑌿𑌵𑌰𑍍𑌤𑌯𑌿𑌤𑍁𑌂 𑌯𑌾𑌮𑌿 𑌕𑌾𑌕𑍁𑌤𑍍𑌸𑍍𑌥𑌂 𑌵𑌨𑌵𑌾𑌸𑌿𑌨𑌮𑍍 ।
𑌬𑍁𑌦𑍍𑌧𑌿𑌰𑌨𑍍𑌯𑌾 𑌨 𑌤𑍇 𑌕𑌾𑌰𑍍𑌯𑌾 𑌗𑍁𑌹 𑌸𑌤𑍍𑌯𑌂 𑌬𑍍𑌰𑌵𑍀𑌮𑌿 𑌤𑍇 ॥ 10 ॥

𑌸 𑌤𑍁 𑌸𑌂𑌹𑍃𑌷𑍍𑌟𑌵𑌦𑌨 𑌶𑍍𑌶𑍍𑌰𑍁𑌤𑍍𑌵𑌾 𑌭𑌰𑌤𑌭𑌾𑌷𑌿𑌤𑌮𑍍 ।
𑌪𑍁𑌨𑌰𑍇𑌵𑌾𑌬𑍍𑌰𑌵𑍀𑌦𑍍𑌵𑌾𑌕𑍍𑌯𑌂 𑌭𑌰𑌤𑌂 𑌪𑍍𑌰𑌤𑌿 𑌹𑌰𑍍𑌷𑌿𑌤𑌃 ॥ 11 ॥

𑌧𑌨𑍍𑌯𑌸𑍍𑌤𑍍𑌵𑌂 𑌨 𑌤𑍍𑌵𑌯𑌾 𑌤𑍁𑌲𑍍𑌯𑌂 𑌪𑌶𑍍𑌯𑌾𑌮𑌿 𑌜𑌗𑌤𑍀𑌤𑌲𑍇 ।
𑌅𑌯𑌤𑍍𑌨𑌾𑌦𑌾𑌗𑌤𑌂 𑌰𑌾𑌜𑍍𑌯𑌂 𑌯𑌸𑍍𑌤𑍍𑌵𑌂 𑌤𑍍𑌯𑌕𑍍𑌤𑍁𑌮𑌿𑌹𑍇𑌚𑍍𑌛𑌸𑌿 ॥ 12 ॥

𑌶𑌾𑌶𑍍𑌵𑌤𑍀 𑌖𑌲𑍁 𑌤𑍇 𑌕𑍀𑌰𑍍𑌤𑌿𑌰𑍍𑌲𑍋𑌕𑌾𑌨𑌨𑍁𑌚𑌰𑌿𑌷𑍍𑌯𑌤𑌿 ।
𑌯𑌸𑍍𑌤𑍍𑌵𑌂 𑌕𑍃𑌚𑍍𑌛𑍍𑌰𑌗𑌤𑌂 𑌰𑌾𑌮𑌂 𑌪𑍍𑌰𑌤𑍍𑌯𑌾𑌨𑌯𑌿𑌤𑍁𑌮𑌿𑌚𑍍𑌛𑌸𑌿 ॥ 13 ॥

𑌏𑌵𑌂 𑌸𑌂𑌭𑌾𑌷𑌮𑌾𑌣𑌸𑍍𑌯 𑌗𑍁𑌹𑌸𑍍𑌯 𑌭𑌰𑌤𑌂 𑌤𑌦𑌾 ।
𑌬𑌭𑍌 𑌨𑌷𑍍𑌟𑌪𑍍𑌰𑌭𑌸𑍍𑌸𑍂𑌰𑍍𑌯𑍋 𑌰𑌜𑌨𑍀 𑌚𑌾𑌭𑍍𑌯𑌵𑌰𑍍𑌤𑌤 ॥ 14 ॥

𑌸𑌨𑍍𑌨𑌿𑌵𑍇𑌶𑍍𑌯 𑌸 𑌤𑌾𑌂 𑌸𑍇𑌨𑌾𑌂 𑌗𑍁𑌹𑍇𑌨 𑌪𑌰𑌿𑌤𑍋𑌷𑌿𑌤𑌃 ।
𑌶𑌤𑍍𑌰𑍁𑌘𑍍𑌨𑍇𑌨 𑌸𑌹 𑌶𑍍𑌰𑍀𑌮𑌾𑌂𑌛𑌯𑌨𑌂 𑌸𑌮𑍁𑌪𑌾𑌗𑌮𑌤𑍍 ॥ 15 ॥

𑌰𑌾𑌮𑌚𑌿𑌂𑌤𑌾𑌮𑌯 𑌶𑍍𑌶𑍋𑌕𑍋 𑌭𑌰𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌉𑌪𑌸𑍍𑌥𑌿𑌤𑍋 𑌹𑍍𑌯𑌨𑌰𑍍𑌹𑌸𑍍𑌯 𑌧𑌰𑍍𑌮𑌪𑍍𑌰𑍇𑌕𑍍𑌷𑌸𑍍𑌯 𑌤𑌾𑌦𑍃𑌶𑌃 ॥ 16 ॥

𑌅𑌂𑌤𑌰𑍍𑌦𑌾𑌹𑍇𑌨 𑌦𑌹𑌨𑌸𑍍𑌸𑌂𑌤𑌾𑌪𑌯𑌤𑌿 𑌰𑌾𑌘𑌵𑌮𑍍 ।
𑌵𑌨𑌦𑌾𑌹𑌾𑌭𑌿𑌸𑌂𑌤𑌪𑍍𑌤𑌂 𑌗𑍂𑌢𑍋𑌽𑌗𑍍𑌨𑌿𑌰𑌿𑌵 𑌪𑌾𑌦𑌪𑌮𑍍 ॥ 1𑍭 ॥

𑌪𑍍𑌰𑌸𑍃𑌤𑌸𑍍𑌸𑌰𑍍𑌵𑌗𑌾𑌤𑍍𑌰𑍇𑌭𑍍𑌯𑌸𑍍𑌸𑍍𑌵𑍇𑌦𑌂 𑌶𑍋𑌕𑌾𑌗𑍍𑌨𑌿𑌸𑌂𑌭𑌵𑌮𑍍 ।
𑌯𑌥𑌾 𑌸𑍂𑌰𑍍𑌯𑌾𑌂𑌶𑍁𑌸𑌂𑌤𑌪𑍍𑌤𑍋 𑌹𑌿𑌮𑌵𑌾𑌨𑍍 𑌪𑍍𑌰𑌸𑍃𑌤𑍋𑌹𑌿𑌮𑌮𑍍 ॥ 1𑍮 ॥

𑌧𑍍𑌯𑌾𑌨𑌨𑌿𑌰𑍍𑌧𑌰𑌶𑍈𑌲𑍇𑌨 𑌵𑌿𑌨𑌿𑌶𑍍𑌶𑍍𑌵𑌸𑌿𑌤𑌧𑌾𑌤𑍁𑌨𑌾 ।
𑌦𑍈𑌨𑍍𑌯𑌪𑌾𑌦𑌪𑌸𑌂𑌘𑍇𑌨 𑌶𑍋𑌕𑌾𑌯𑌾𑌸𑌾𑌧𑌿𑌶𑍃𑌂𑌗𑌿𑌣𑌾 ॥ 1𑍯 ॥

𑌪𑍍𑌰𑌮𑍋𑌹𑌾𑌨𑌂𑌤𑌸𑌤𑍍𑌤𑍍𑌵𑍇𑌨 𑌸𑌂𑌤𑌾𑌪𑍌𑌷𑌧𑌿𑌵𑍇𑌣𑍁𑌨𑌾 ।
𑌆𑌕𑍍𑌰𑌾𑌂𑌤𑍋 𑌦𑍁𑌃𑌖𑌶𑍈𑌲𑍇𑌨 𑌮𑌹𑌤𑌾 𑌕𑍈𑌕𑌯𑍀𑌸𑍁𑌤𑌃 ॥ 20 ॥

𑌵𑌿𑌨𑌿𑌶𑍍𑌶𑍍𑌵𑌸𑌨𑍍𑌵𑍈 𑌭𑍃𑌶𑌦𑍁𑌰𑍍𑌮𑌨𑌾𑌸𑍍𑌤𑌤𑌃 𑌪𑍍𑌰𑌮𑍂𑌢𑌸𑌂𑌜𑍍𑌞𑌃 𑌪𑌰𑌮𑌾𑌪𑌦𑌂 𑌗𑌤𑌃 ।
𑌶𑌮𑌂 𑌨 𑌲𑍇𑌭𑍇 𑌹𑍃𑌦𑌯𑌜𑍍𑌵𑌰𑌾𑌰𑍍𑌦𑌿𑌤𑍋 𑌨𑌰𑌰𑍍𑌷𑌭𑍋 𑌯𑍂𑌥𑌹𑌤𑍋 𑌯𑌥𑌰𑍍𑌷𑌭𑌃 ॥ 21 ॥

𑌗𑍁𑌹𑍇𑌨 𑌸𑌾𑌰𑍍𑌧𑌂 𑌭𑌰𑌤𑌸𑍍𑌸𑌮𑌾𑌗𑌤𑍋 𑌮𑌹𑌾𑌨𑍁𑌭𑌾𑌵𑌸𑍍𑌸𑌜𑌨𑌸𑍍𑌸𑌮𑌾𑌹𑌿𑌤𑌃 ।
𑌸𑍁𑌦𑍁𑌰𑍍𑌮𑌨𑌾𑌸𑍍𑌤𑌂 𑌭𑌰𑌤𑌂 𑌤𑌦𑌾 𑌪𑍁𑌨𑌰𑍍𑌗𑍁𑌹 𑌸𑍍𑌸𑌮𑌾𑌶𑍍𑌵𑌾𑌸𑌯𑌦𑌗𑍍𑌰𑌜𑌂 𑌪𑍍𑌰𑌤𑌿 ॥ 22 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌪𑌂𑌚𑌾𑌶𑍀𑌤𑌿𑌤𑌮𑌸𑍍𑌸𑌰𑍍𑌗𑌃 ॥

Browse Related Categories: