𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌿𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌸𑌾 𑌤𑌂 𑌸𑌂𑌪𑍍𑌰𑍇𑌕𑍍𑌷𑍍𑌯 𑌸𑍁𑌶𑍍𑌰𑍋𑌣𑍀 𑌕𑍁𑌸𑍁𑌮𑌾𑌨𑍍𑌯𑌪𑌚𑌿𑌨𑍍𑌵𑌤𑍀 ।
𑌹𑍇𑌮𑌰𑌾𑌜𑌤𑌵𑌰𑍍𑌣𑌾𑌭𑍍𑌯𑌾𑌂 𑌪𑌾𑌰𑍍𑌶𑍍𑌵𑌾𑌭𑍍𑌯𑌾𑌮𑍁𑌪𑌶𑍋𑌭𑌿𑌤𑌮𑍍 ॥ 1 ॥
𑌪𑍍𑌰𑌹𑍃𑌷𑍍𑌟𑌾 𑌚𑌾𑌨𑌵𑌦𑍍𑌯𑌾𑌂𑌗𑍀 𑌮𑍃𑌷𑍍𑌟𑌹𑌾𑌟𑌕𑌵𑌰𑍍𑌣𑌿𑌨𑍀 ।
𑌭𑌰𑍍𑌤𑌾𑌰𑌮𑌪𑌿 𑌚𑌕𑍍𑌰𑌂𑌦 𑌲𑌕𑍍𑌷𑍍𑌮𑌣𑌂 𑌚𑌾𑌪𑌿 𑌸𑌾𑌯𑍁𑌧𑌮𑍍 ॥ 2 ॥
𑌤𑌯𑌾𑌽𑌽𑌹𑍂𑌤𑍌 𑌨𑌰𑌵𑍍𑌯𑌾𑌘𑍍𑌰𑍌 𑌵𑍈𑌦𑍇𑌹𑍍𑌯𑌾 𑌰𑌾𑌮𑌲𑌕𑍍𑌷𑍍𑌮𑌣𑍌 ।
𑌵𑍀𑌕𑍍𑌷𑌮𑌾𑌣𑍌 𑌤𑍁 𑌤𑍌 𑌦𑍇𑌶𑌂 𑌤𑌦𑌾 𑌦𑌦𑍃𑌶𑌤𑍁𑌰𑍍𑌮𑍃𑌗𑌮𑍍 ॥ 3 ॥
𑌶𑌂𑌕𑌮𑌾𑌨𑌸𑍍𑌤𑍁 𑌤𑌂 𑌦𑍃𑌷𑍍𑌟𑍍𑌵𑌾 𑌲𑌕𑍍𑌷𑍍𑌮𑌣𑍋 𑌰𑌾𑌮𑌮𑌬𑍍𑌰𑌵𑍀𑌤𑍍 ।
𑌤𑌮𑍇𑌵𑍈𑌨𑌮𑌹𑌂 𑌮𑌨𑍍𑌯𑍇 𑌮𑌾𑌰𑍀𑌚𑌂 𑌰𑌾𑌕𑍍𑌷𑌸𑌂 𑌮𑍃𑌗𑌮𑍍 ॥ 4 ॥
𑌚𑌰𑌂𑌤𑍋𑌮𑍃𑌗𑌯𑌾𑌂 𑌹𑍃𑌷𑍍𑌟𑌾𑌃 𑌪𑌾𑌪𑍇𑌨𑍋𑌪𑌾𑌧𑌿𑌨𑌾 𑌵𑌨𑍇 ।
𑌅𑌨𑍇𑌨 𑌨𑌿𑌹𑌤𑌾 𑌰𑌾𑌜𑌨𑍍 𑌰𑌾𑌜𑌾𑌨𑌃 𑌕𑌾𑌮𑌰𑍂𑌪𑌿𑌣𑌾 ॥ 5 ॥
𑌅𑌸𑍍𑌯 𑌮𑌾𑌯𑌾𑌵𑌿𑌦𑍋 𑌮𑌾𑌯𑌾𑌮𑍃𑌗𑌰𑍂𑌪𑌮𑌿𑌦𑌂 𑌕𑍃𑌤𑌮𑍍 ।
𑌭𑌾𑌨𑍁𑌮𑌤𑍍𑌪𑍁𑌰𑍁𑌷𑌵𑍍𑌯𑌾𑌘𑍍𑌰 𑌗𑌂𑌧𑌰𑍍𑌵𑌪𑍁𑌰𑌸𑌨𑍍𑌨𑌿𑌭𑌮𑍍 ॥ 6 ॥
𑌮𑍃𑌗𑍋 𑌹𑍍𑌯𑍇𑌵𑌂𑌵𑌿𑌧𑍋 𑌰𑌤𑍍𑌨𑌵𑌿𑌚𑌿𑌤𑍍𑌰𑍋 𑌨𑌾𑌸𑍍𑌤𑌿 𑌰𑌾𑌘𑌵 ।
𑌜𑌗𑌤𑍍𑌯𑌾𑌂 𑌜𑌗𑌤𑍀𑌨𑌾𑌥 𑌮𑌾𑌯𑍈𑌷𑌾 𑌹𑌿 𑌨 𑌸𑌂𑌶𑌯𑌃 ॥ ॥
𑌏𑌵𑌂 𑌬𑍍𑌰𑍁𑌵𑌾𑌣𑌂 𑌕𑌾𑌕𑍁𑌤𑍍𑌸𑍍𑌥𑌂 𑌪𑍍𑌰𑌤𑌿𑌵𑌾𑌰𑍍𑌯 𑌶𑍁𑌚𑌿𑌸𑍍𑌮𑌿𑌤𑌾 ।
𑌉𑌵𑌾𑌚 𑌸𑍀𑌤𑌾 𑌸𑌂𑌹𑍃𑌷𑍍𑌟𑌾 𑌚𑌰𑍍𑌮𑌣𑌾 𑌹𑍃𑌤𑌚𑍇𑌤𑌨𑌾 ॥ ॥
𑌆𑌰𑍍𑌯𑌪𑍁𑌤𑍍𑌰𑌾𑌭𑌿𑌰𑌾𑌮𑍋𑌽𑌸𑍌 𑌮𑍃𑌗𑍋 𑌹𑌰𑌤𑌿 𑌮𑍇 𑌮𑌨𑌃 ।
𑌆𑌨𑌯𑍈𑌨𑌂 𑌮𑌹𑌾𑌬𑌾𑌹𑍋 𑌕𑍍𑌰𑍀𑌡𑌾𑌰𑍍𑌥𑌂 𑌨𑍋 𑌭𑌵𑌿𑌷𑍍𑌯𑌤𑌿 ॥ ॥
𑌇𑌹𑌾𑌶𑍍𑌰𑌮𑌪𑌦𑍇𑌽𑌸𑍍𑌮𑌾𑌕𑌂 𑌬𑌹𑌵𑌃 𑌪𑍁𑌣𑍍𑌯𑌦𑌰𑍍𑌶𑌨𑌾𑌃 ।
𑌮𑍃𑌗𑌾𑌶𑍍𑌚𑌰𑌂𑌤𑌿 𑌸𑌹𑌿𑌤𑌾𑌶𑍍𑌚𑌮𑌰𑌾𑌸𑍍𑌸𑍃𑌮𑌰𑌾𑌸𑍍𑌤𑌥𑌾 ॥ 10 ॥
𑌋𑌕𑍍𑌷𑌾𑌃 𑌪𑍃𑌷𑌤𑌸𑌂𑌘𑌾𑌶𑍍𑌚 𑌵𑌾𑌨𑌰𑌾𑌃 𑌕𑌿𑌨𑍍𑌨𑌰𑌾𑌸𑍍𑌤𑌥𑌾 ।
𑌵𑌿𑌚𑌰𑌂𑌤𑌿 𑌮𑌹𑌾𑌬𑌾𑌹𑍋 𑌰𑍁𑌪𑌶𑍍𑌰𑍇𑌷𑍍𑌠𑌾 𑌮𑌨𑍋𑌹𑌰𑌾𑌃 ॥ 11 ॥
𑌨 𑌚𑌾𑌸𑍍𑌯 𑌸𑌦𑍃𑌶𑍋 𑌰𑌾𑌜𑌂𑌦𑍃𑌷𑍍𑌟𑌪𑍂𑌰𑍍𑌵𑍋 𑌮𑍃𑌗𑍋 𑌮𑌯𑌾 ।
𑌤𑍇𑌜𑌸𑌾 𑌕𑍍𑌷𑌮𑌯𑌾 𑌦𑍀𑌪𑍍𑌤𑍍𑌯𑌾 𑌯𑌥𑌾𑌽𑌯𑌂 𑌮𑍃𑌗𑌸𑌤𑍍𑌤𑌮𑌃 ॥ 12 ॥
𑌨𑌾𑌨𑌾𑌵𑌰𑍍𑌣𑌵𑌿𑌚𑌿𑌤𑍍𑌰𑌾𑌂𑌗𑍋 𑌰𑌤𑍍𑌨𑌬𑌿𑌂𑌦𑍁𑌸𑌮𑌾𑌚𑌿𑌤𑌃 ।
𑌦𑍍𑌯𑍋𑌤𑌯𑌨𑍍𑌵𑌨𑌮𑌵𑍍𑌯𑌗𑍍𑌰𑌂 𑌶𑍋𑌭𑌤𑍇 𑌶𑌶𑌿𑌸𑌨𑍍𑌨𑌿𑌭𑌃 ॥ 13 ॥
𑌅𑌹𑍋 𑌰𑍂𑌪𑌮𑌹𑍋 𑌲𑌕𑍍𑌷𑍍𑌮𑍀𑌸𑍍𑌸𑍍𑌵𑌰𑌸𑌂𑌪𑌚𑍍𑌚 𑌶𑍋𑌭𑌨𑌾 ।
𑌮𑍃𑌗𑍋𑌽𑌦𑍍𑌭𑍁𑌤𑍋 𑌵𑌿𑌚𑌿𑌤𑍍𑌰𑌾𑌂𑌗𑍋 𑌹𑍃𑌦𑌯𑌂 𑌹𑌰𑌤𑍀𑌵 𑌮𑍇 ॥ 14 ॥
𑌯𑌦𑌿 𑌗𑍍𑌰𑌹𑌣𑌮𑌭𑍍𑌯𑍇𑌤𑌿 𑌜𑍀𑌵𑌨𑍍𑌨𑍇𑌵 𑌮𑍃𑌗𑌸𑍍𑌤𑌵 ।
𑌆𑌶𑍍𑌚𑌰𑍍𑌯𑌭𑍂𑌤𑌂 𑌭𑌵𑌤𑌿 𑌵𑌿𑌸𑍍𑌮𑌯𑌂 𑌜𑌨𑌯𑌿𑌷𑍍𑌯𑌤𑌿 ॥ 15 ॥
𑌸𑌮𑌾𑌪𑍍𑌤𑌵𑌨𑌵𑌾𑌸𑌾𑌨𑌾𑌂 𑌰𑌾𑌜𑍍𑌯𑌸𑍍𑌥𑌾𑌨𑌾𑌂 𑌚 𑌨𑌃 𑌪𑍁𑌨𑌃 ।
𑌅𑌂𑌤𑌃𑌪𑍁𑌰𑌵𑌿𑌭𑍂𑌷𑌾𑌰𑍍𑌥𑍋 𑌮𑍃𑌗 𑌏𑌷 𑌭𑌵𑌿𑌷𑍍𑌯𑌤𑌿 ॥ 16 ॥
𑌭𑌰𑌤𑌸𑍍𑌯𑌾𑌰𑍍𑌯𑌪𑍁𑌤𑍍𑌰𑌸𑍍𑌯 𑌶𑍍𑌵𑌶𑍍𑌰𑍂𑌣𑌾𑌂 𑌮𑌮 𑌚 𑌪𑍍𑌰𑌭𑍋 ।
𑌮𑍃𑌗𑌰𑍂𑌪𑌮𑌿𑌦𑌂 𑌵𑍍𑌯𑌕𑍍𑌤𑌂 𑌵𑌿𑌸𑍍𑌮𑌯𑌂 𑌜𑌨𑌯𑌿𑌷𑍍𑌯𑌤𑌿 ॥ 1 ॥
𑌜𑍀𑌵𑌨𑍍𑌨 𑌯𑌦𑌿 𑌤𑍇𑌽𑌭𑍍𑌯𑍇𑌤𑌿 𑌗𑍍𑌰𑌹𑌣𑌂 𑌮𑍃𑌗𑌸𑌤𑍍𑌤𑌮𑌃 ।
𑌅𑌜𑌿𑌨𑌂 𑌨𑌰𑌶𑌾𑌰𑍍𑌦𑍂𑌲 𑌰𑍁𑌚𑌿𑌰𑌂 𑌮𑍇 𑌭𑌵𑌿𑌷𑍍𑌯𑌤𑌿 ॥ 1 ॥
𑌨𑌿𑌹𑌤𑌸𑍍𑌯𑌾𑌸𑍍𑌯 𑌸𑌤𑍍𑌤𑍍𑌵𑌸𑍍𑌯 𑌜𑌾𑌂𑌬𑍂𑌨𑌦𑌮𑌯𑌤𑍍𑌵𑌚𑌿 ।
𑌶𑌷𑍍𑌪𑌬𑍃𑌸𑍍𑌯𑌾𑌂 𑌵𑌿𑌨𑍀𑌤𑌾𑌯𑌾𑌮𑌿𑌚𑍍𑌛𑌾𑌮𑍍𑌯𑌹𑌮𑍁𑌪𑌾𑌸𑌿𑌤𑍁𑌮𑍍 ॥ 1 ॥
𑌕𑌾𑌮𑌵𑍃𑌤𑍍𑌤𑌮𑌿𑌦𑌂 𑌰𑍌𑌦𑍍𑌰𑌂 𑌸𑍍𑌤𑍍𑌰𑍀𑌣𑌾𑌮𑌸𑌦𑍃𑌶𑌂 𑌮𑌤𑌮𑍍 ।
𑌵𑌪𑍁𑌷𑌾 𑌤𑍍𑌵𑌸𑍍𑌯 𑌸𑌤𑍍𑌤𑍍𑌵𑌸𑍍𑌯 𑌵𑌿𑌸𑍍𑌮𑌯𑍋 𑌜𑌨𑌿𑌤𑍋 𑌮𑌮 ॥ 20 ॥
𑌤𑍇𑌨 𑌕𑌾𑌂𑌚𑌨𑌵𑌰𑍍𑌣𑍇𑌨 𑌮𑌣𑌿𑌪𑍍𑌰𑌵𑌰𑌶𑍃𑌂𑌗𑌿𑌣𑌾 ।
𑌤𑌰𑍁𑌣𑌾𑌦𑌿𑌤𑍍𑌯𑌵𑌰𑍍𑌣𑍇𑌨 𑌨𑌕𑍍𑌷𑌤𑍍𑌰𑌪𑌥𑌵𑌰𑍍𑌚𑌸𑌾 ॥ 21 ॥
𑌬𑌭𑍂𑌵 𑌰𑌾𑌘𑌵𑌸𑍍𑌯𑌾𑌪𑌿 𑌮𑌨𑍋 𑌵𑌿𑌸𑍍𑌮𑌯𑌮𑌾𑌗𑌤𑌮𑍍 ।
𑌏𑌵𑌂 𑌸𑍀𑌤𑌾𑌵𑌚𑌃 𑌶𑍍𑌰𑍁𑌤𑍍𑌵𑌾 𑌤𑌂 𑌦𑍃𑌷𑍍𑌟𑍍𑌵𑌾 𑌮𑍃𑌗𑌮𑌦𑍍𑌭𑍁𑌤𑌮𑍍 ॥ 22 ॥
𑌲𑍋𑌭𑌿𑌤𑌸𑍍𑌤𑍇𑌨 𑌰𑍂𑌪𑍇𑌣 𑌸𑍀𑌤𑌯𑌾 𑌚 𑌪𑍍𑌰𑌚𑍋𑌦𑌿𑌤𑌃 ।
𑌉𑌵𑌾𑌚 𑌰𑌾𑌘𑌵𑍋 𑌹𑍃𑌷𑍍𑌟𑍋 𑌭𑍍𑌰𑌾𑌤𑌰𑌂 𑌲𑌕𑍍𑌷𑍍𑌮𑌣𑌂 𑌵𑌚𑌃 ॥ 23 ॥
𑌪𑌶𑍍𑌯 𑌲𑌕𑍍𑌷𑍍𑌮𑌣 𑌵𑍈𑌦𑍇𑌹𑍍𑌯𑌾𑌃 𑌸𑍍𑌪𑍃𑌹𑌾𑌂 𑌮𑍃𑌗𑌗𑌤𑌾𑌮𑌿𑌮𑌾𑌮𑍍 ।
𑌰𑍂𑌪𑌶𑍍𑌰𑍇𑌷𑍍𑌠𑌤𑌯𑌾 𑌹𑍍𑌯𑍇𑌷 𑌮𑍃𑌗𑍋𑌽𑌦𑍍𑌯 𑌨 𑌭𑌵𑌿𑌷𑍍𑌯𑌤𑌿 ॥ 24 ॥
𑌨 𑌵𑌨𑍇 𑌨𑌂𑌦𑌨𑍋𑌦𑍍𑌧𑍇𑌶𑍇 𑌨 𑌚𑍈𑌤𑍍𑌰𑌰𑌥𑌸𑌂𑌶𑍍𑌰𑌯𑍇 ।
𑌕𑍁𑌤𑌃𑌪𑍃𑌥𑌿𑌵𑍍𑌯𑌾𑌂 𑌸𑍌𑌮𑌿𑌤𑍍𑌰𑍇 𑌯𑍋𑌽𑌸𑍍𑌯 𑌕𑌶𑍍𑌚𑌿𑌤𑍍𑌸𑌮𑍋 𑌮𑍃𑌗𑌃 ॥ 25 ॥
𑌪𑍍𑌰𑌤𑌿𑌲𑍋𑌮𑌾𑌨𑍁𑌲𑍋𑌮𑌾𑌶𑍍𑌚 𑌰𑍁𑌚𑌿𑌰𑌾 𑌰𑍋𑌮𑌰𑌾𑌜𑌯𑌃 ।
𑌶𑍋𑌭𑌂𑌤𑍇 𑌮𑍃𑌗𑌮𑌾𑌶𑍍𑌰𑌿𑌤𑍍𑌯 𑌚𑌿𑌤𑍍𑌰𑌾𑌃 𑌕𑌨𑌕𑌬𑌿𑌂𑌦𑌵𑌃 ॥ 26 ॥
𑌪𑌶𑍍𑌯𑌾𑌸𑍍𑌯 𑌜𑍃𑌂𑌭𑌮𑌾𑌣𑌸𑍍𑌯 𑌦𑍀𑌪𑍍𑌤𑌾𑌮𑌗𑍍𑌨𑌿𑌶𑌿𑌖𑍋𑌪𑌮𑌾𑌮𑍍 ।
𑌜𑌿𑌹𑍍𑌵𑌾𑌂 𑌮𑍁𑌖𑌾𑌨𑍍𑌨𑌿𑌸𑍍𑌸𑌰𑌂𑌤𑍀𑌂 𑌮𑍇𑌘𑌾𑌦𑌿𑌵 𑌶𑌤𑌹𑍍𑌰𑌦𑌾𑌮𑍍 ॥ 2 ॥
𑌮𑌸𑌾𑌰𑌗𑌲𑍍𑌲𑌰𑍍𑌕𑌮𑍁𑌖𑌶𑍍𑌶𑌂𑌖𑌮𑍁𑌕𑍍𑌤𑌾𑌨𑌿𑌭𑍋𑌦𑌰𑌃 ।
𑌕𑌸𑍍𑌯 𑌨𑌾𑌮𑌾𑌭𑌿𑌰𑍂𑌪𑍍𑌯𑍋𑌽𑌸𑍌 𑌨 𑌮𑌨𑍋 𑌲𑍋𑌭𑌯𑍇𑌨𑍍𑌮𑍃𑌗𑌃 ॥ 2 ॥
𑌕𑌸𑍍𑌯 𑌰𑍂𑌪𑌮𑌿𑌦𑌂 𑌦𑍃𑌷𑍍𑌟𑍍𑌵𑌾 𑌜𑌾𑌂𑌬𑍂𑌨𑌦 𑌮𑌯𑌪𑍍𑌰𑌭𑌮𑍍 ।
𑌨𑌾𑌨𑌾𑌰𑌤𑍍𑌨𑌮𑌯𑌂 𑌦𑌿𑌵𑍍𑌯𑌂 𑌨 𑌮𑌨𑍋 𑌵𑌿𑌸𑍍𑌮𑌯𑌂 𑌵𑍍𑌰𑌜𑍇𑌤𑍍 ॥ 2 ॥
𑌮𑌾𑌂𑌸𑌹𑍇𑌤𑍋𑌰𑌪𑌿 𑌮𑍃𑌗𑌾𑌨𑍍𑌵𑌿𑌨𑍋𑌦𑌾𑌰𑍍𑌥𑌂 𑌚 𑌧𑌨𑍍𑌵𑌨𑌃 ।
𑌘𑍍𑌨𑌂𑌤𑌿 𑌲𑌕𑍍𑌷𑍍𑌮𑌣 𑌰𑌾𑌜𑌾𑌨𑍋 𑌮𑍃𑌗𑌯𑌾𑌯𑌾𑌂 𑌮𑌹𑌾𑌵𑌨𑍇 ॥ 30 ॥
𑌧𑌨𑌾𑌨𑌿 𑌵𑍍𑌯𑌵𑌸𑌾𑌯𑍇𑌨 𑌵𑌿𑌚𑍀𑌯𑌂𑌤𑍇 𑌮𑌹𑌾𑌵𑌨𑍇 ।
𑌧𑌾𑌤𑌵𑍋 𑌵𑌿𑌵𑌿𑌧𑌾𑌶𑍍𑌚𑌾𑌪𑌿 𑌮𑌣𑌿𑌰𑌤𑍍𑌨𑌸𑍁𑌵𑌰𑍍𑌣𑌿𑌨𑌃 ॥ 31 ॥
𑌤𑌤𑍍𑌸𑌾𑌰𑌮𑌖𑌿𑌲𑌂 𑌨𑍃𑌣𑌾𑌂 𑌧𑌨𑌂 𑌨𑌿𑌚𑌯𑌵𑌰𑍍𑌧𑌨𑌮𑍍 ।
𑌮𑌨𑌸𑌾 𑌚𑌿𑌂𑌤𑌿𑌤𑌂 𑌸𑌰𑍍𑌵𑌂 𑌯𑌥𑌾 𑌶𑍁𑌕𑍍𑌰𑌸𑍍𑌯 𑌲𑌕𑍍𑌷𑍍𑌮𑌣 ॥ 32 ॥
𑌅𑌰𑍍𑌥𑍀 𑌯𑍇𑌨𑌾𑌰𑍍𑌥𑌕𑍃𑌤𑍍𑌯𑍇𑌨 𑌸𑌂𑌵𑍍𑌰𑌜𑌤𑍍𑌯𑌵𑌿𑌚𑌾𑌰𑌯𑌨𑍍 ।
𑌤𑌮𑌰𑍍𑌥𑌮𑌰𑍍𑌥𑌶𑌾𑌸𑍍𑌤𑍍𑌰𑌜𑍍𑌞𑌾𑌃 𑌪𑍍𑌰𑌾𑌹𑍁𑌰𑌰𑍍𑌥𑍍𑌯𑌾𑌶𑍍𑌚 𑌲𑌕𑍍𑌷𑍍𑌮𑌣 ॥ 33 ॥
𑌏𑌤𑌸𑍍𑌯 𑌮𑍃𑌗𑌰𑌤𑍍𑌨𑌸𑍍𑌯 𑌪𑌰𑌾𑌰𑍍𑌧𑍍𑌯𑍇 𑌕𑌾𑌂𑌚𑌨𑌤𑍍𑌵𑌚𑌿 ।
𑌉𑌪𑌵𑍇𑌕𑍍𑌷𑍍𑌯𑌤𑌿 𑌵𑍈𑌦𑍇𑌹𑍀 𑌮𑌯𑌾 𑌸𑌹 𑌸𑍁𑌮𑌧𑍍𑌯𑌮𑌾 ॥ 34 ॥
𑌨 𑌕𑌾𑌦𑌲𑍀 𑌨 𑌪𑍍𑌰𑌿𑌯𑌕𑍀 𑌨 𑌪𑍍𑌰𑌵𑍇𑌣𑍀 𑌨 𑌚𑌾𑌵𑌿𑌕𑍀 ।
𑌭𑌵𑍇𑌦𑍇𑌤𑌸𑍍𑌯 𑌸𑌦𑍃𑌶𑍀 𑌸𑍍𑌪𑌰𑍍𑌶𑌨𑍇𑌨𑍇𑌤𑌿 𑌮𑍇 𑌮𑌤𑌿𑌃 ॥ 35 ॥
𑌏𑌷 𑌚𑍈𑌵 𑌮𑍃𑌗𑌶𑍍𑌶𑍍𑌰𑍀𑌮𑌾𑌨𑍍 𑌯𑌶𑍍𑌚 𑌦𑌿𑌵𑍍𑌯𑍋 𑌨𑌭𑌶𑍍𑌚𑌰𑌃 ।
𑌉𑌭𑌾𑌵𑍇𑌤𑍌 𑌮𑍃𑌗𑍌 𑌦𑌿𑌵𑍍𑌯𑍌 𑌤𑌾𑌰𑌾𑌮𑍃𑌗𑌮𑌹𑍀𑌮𑍃𑌗𑍌 ॥ 36 ॥
𑌯𑌦𑌿 𑌵𑌾𑌽𑌯𑌂 𑌤𑌥𑌾 𑌯𑌨𑍍𑌮𑌾𑌂 𑌭𑌵𑍇𑌦𑍍𑌵𑌦𑌸𑌿 𑌲𑌕𑍍𑌷𑍍𑌮𑌣 ।
𑌮𑌾𑌯𑍈𑌷𑌾 𑌰𑌾𑌕𑍍𑌷𑌸𑌸𑍍𑌯𑍇𑌤𑌿 𑌕𑌰𑍍𑌤𑌵𑍍𑌯𑍋𑌸𑍍𑌯 𑌵𑌧𑍋 𑌮𑌯𑌾 ॥ 3 ॥
𑌏𑌤𑍇𑌨 𑌹𑌿 𑌨𑍃𑌶𑌂𑌸𑍇𑌨 𑌮𑌾𑌰𑍀𑌚𑍇𑌨𑌾𑌕𑍃𑌤𑌾𑌤𑍍𑌮𑌨𑌾 ।
𑌵𑌨𑍇 𑌵𑌿𑌚𑌰𑌤𑌾 𑌪𑍂𑌰𑍍𑌵𑌂 𑌹𑌿𑌂𑌸𑌿𑌤𑌾 𑌮𑍁𑌨𑌿𑌪𑍁𑌂𑌗𑌵𑌾𑌃 ॥ 3 ॥
𑌉𑌤𑍍𑌥𑌾𑌯 𑌬𑌹𑌵𑍋 𑌯𑍇𑌨 𑌮𑍃𑌗𑌯𑌾𑌯𑌾𑌂 𑌜𑌨𑌾𑌧𑌿𑌪𑌾𑌃 ।
𑌨𑌿𑌹𑌤𑌾𑌃 𑌪𑌰𑌮𑍇𑌷𑍍𑌵𑌾𑌸𑌾𑌸𑍍𑌤𑌸𑍍𑌮𑌾𑌦𑍍𑌵𑌧𑍍𑌯𑌸𑍍𑌤𑍍𑌵𑌯𑌂 𑌮𑍃𑌗𑌃 ॥ 3 ॥
𑌪𑍁𑌰𑌸𑍍𑌤𑌾𑌦𑌿𑌹 𑌵𑌾𑌤𑌾𑌪𑌿𑌃 𑌪𑌰𑌿𑌭𑍂𑌯 𑌤𑌪𑌸𑍍𑌵𑌿𑌨𑌃 ।
𑌉𑌦𑌰𑌸𑍍𑌥𑍋 𑌦𑍍𑌵𑌿𑌜𑌾𑌨𑍍𑌹𑌂𑌤𑌿𑌸𑍍𑌵𑌗𑌰𑍍𑌭𑍋𑌽𑌶𑍍𑌵𑌤𑌰𑍀𑌮𑌿𑌵 ॥ 40 ॥
𑌸 𑌕𑌦𑌾𑌚𑌿𑌚𑍍𑌚𑌿𑌰𑌾𑌲𑍍𑌲𑍋𑌭𑌾𑌦𑌾𑌸𑌸𑌾𑌦 𑌮𑌹𑌾𑌮𑍁𑌨𑌿𑌮𑍍 ।
𑌅𑌗𑌸𑍍𑌤𑍍𑌯𑌂 𑌤𑍇𑌜𑌸𑌾 𑌯𑍁𑌕𑍍𑌤𑌂 𑌭𑌕𑍍𑌷𑌸𑍍𑌤𑌸𑍍𑌯 𑌬𑌭𑍂𑌵 𑌹 ॥ 41 ॥
𑌸𑌮𑍁𑌤𑍍𑌥𑌾𑌨𑍇 𑌵 𑌤𑌦𑍍𑌰𑍂𑌪𑌂 𑌕𑌰𑍍𑌤𑍁𑌕𑌾𑌮𑌂 𑌸𑌮𑍀𑌕𑍍𑌷𑍍𑌯 𑌤𑌮𑍍 ।
𑌉𑌤𑍍𑌸𑍍𑌮𑌯𑌿𑌤𑍍𑌵𑌾 𑌤𑍁 𑌭𑌗𑌵𑌾𑌨𑍍𑌵𑌾𑌤𑌾𑌪𑌿𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 42 ॥
𑌤𑍍𑌵𑌯𑌾𑌽𑌵𑌿𑌗𑌣𑍍𑌯 𑌵𑌾𑌤𑌾𑌪𑍇 𑌪𑌰𑌿𑌭𑍂𑌤𑌾𑌸𑍍𑌸𑍍𑌵𑌤𑍇𑌜𑌸𑌾 ।
𑌜𑍀𑌵𑌲𑍋𑌕𑍇 𑌦𑍍𑌵𑌿𑌜𑌶𑍍𑌰𑍇𑌷𑍍𑌠𑌾𑌸𑍍𑌤𑌸𑍍𑌮𑌾𑌦𑌸𑌿 𑌜𑌰𑌾𑌂 𑌗𑌤𑌃 ॥ 43 ॥
𑌤𑌦𑍇𑌵𑌂 𑌨 𑌭𑌵𑍇𑌦𑍍𑌰𑌕𑍍𑌷𑍋𑌵𑌾𑌤𑌾𑌪𑌿𑌰𑌿𑌵 𑌲𑌕𑍍𑌷𑍍𑌮𑌣 ।
𑌮𑌦𑍍𑌵𑌿𑌧𑌂 𑌯𑍋𑌽𑌤𑌿𑌮𑌨𑍍𑌯𑍇𑌤 𑌧𑌰𑍍𑌮𑌨𑌿𑌤𑍍𑌯𑌂 𑌜𑌿𑌤𑍇𑌂𑌦𑍍𑌰𑌿𑌯𑌮𑍍 ॥ 44 ॥
𑌭𑌵𑍇𑌦𑍍𑌧𑌤𑍋𑌽𑌯𑌂 𑌵𑌾𑌤𑌾𑌪𑌿𑌰𑌗𑌸𑍍𑌤𑍍𑌯𑍇𑌨𑍇𑌵 𑌮𑌾𑌂 𑌗𑌤𑌃 ।
𑌇𑌹 𑌤𑍍𑌵𑌂 𑌭𑌵 𑌸𑌨𑍍𑌨𑌦𑍍𑌦𑍋 𑌯𑌂𑌤𑍍𑌰𑌿𑌤𑍋 𑌰𑌕𑍍𑌷 𑌮𑍈𑌥𑌿𑌲𑍀𑌮𑍍 ॥ 45 ॥
𑌅𑌸𑍍𑌯𑌾𑌮𑌾𑌯𑌤𑍍𑌤𑌮𑌸𑍍𑌮𑌾𑌕𑌂 𑌯𑌤𑍍𑌕𑍃𑌤𑍍𑌯𑌂 𑌰𑌘𑍁𑌨𑌂𑌦𑌨 ।
𑌅𑌹𑌮𑍇𑌨𑌂 𑌵𑌧𑌿𑌷𑍍𑌯𑌾𑌮𑌿 𑌗𑍍𑌰𑌹𑍀𑌷𑍍𑌯𑌾𑌮𑍍𑌯𑌪𑌿 𑌵𑌾 𑌮𑍃𑌗𑌮𑍍 ॥ 46 ॥
𑌯𑌾𑌵𑌦𑍍𑌗𑌚𑍍𑌛𑌾𑌮𑌿 𑌸𑍌𑌮𑌿𑌤𑍍𑌰𑍇 𑌮𑍃𑌗𑌮𑌾𑌨𑌯𑌿𑌤𑍁𑌂 𑌦𑍍𑌰𑍁𑌤𑌮𑍍 ।
𑌪𑌶𑍍𑌯 𑌲𑌕𑍍𑌷𑍍𑌮𑌣 𑌵𑍈𑌦𑍇𑌹𑍀𑌂 𑌮𑍃𑌗𑌤𑍍𑌵𑌚𑌿 𑌗𑌤𑌸𑍍𑌪𑍃𑌹𑌾𑌮𑍍 ॥ 4 ॥
𑌤𑍍𑌵𑌚𑌾 𑌪𑍍𑌰𑌧𑌾𑌨𑌯𑌾 𑌹𑍍𑌯𑍇𑌷 𑌮𑍃𑌗𑍋𑌽𑌦𑍍𑌯 𑌨 𑌭𑌵𑌿𑌷𑍍𑌯𑌤𑌿 ।
𑌅𑌪𑍍𑌰𑌮𑌤𑍍𑌤𑍇𑌨 𑌤𑍇 𑌭𑌾𑌵𑍍𑌯𑌮𑌾𑌶𑍍𑌰𑌮𑌸𑍍𑌥𑍇𑌨 𑌸𑍀𑌤𑌯𑌾 ॥ 4 ॥
𑌯𑌾𑌵𑌤𑍍𑌪𑍃𑌷𑌤𑌮𑍇𑌕𑍇𑌨 𑌸𑌾𑌯𑌕𑍇𑌨 𑌨𑌿𑌹𑌨𑍍𑌮𑍍𑌯𑌹𑌮𑍍 ।
𑌹𑌤𑍍𑌵𑍈𑌤𑌚𑍍𑌚𑌰𑍍𑌮 𑌚𑌾𑌦𑌾𑌯 𑌶𑍀𑌘𑍍𑌰𑌮𑍇𑌷𑍍𑌯𑌾𑌮𑌿 𑌲𑌕𑍍𑌷𑍍𑌮𑌣 ॥ 4 ॥
𑌪𑍍𑌰𑌦𑌕𑍍𑌷𑌿𑌣𑍇𑌨𑌾𑌤𑌿𑌬𑌲𑍇𑌨 𑌪𑌕𑍍𑌷𑌿𑌣𑌾 𑌜𑌟𑌾𑌯𑍁𑌷𑌾 𑌬𑍁𑌦𑍍𑌧𑌿𑌮𑌤𑌾 𑌚 𑌲𑌕𑍍𑌷𑍍𑌮𑌣 ।
𑌭𑌵𑌾𑌪𑍍𑌰𑌮𑌤𑍍𑌤𑌃 𑌪𑌰𑌿𑌗𑍃𑌹𑍍𑌯 𑌮𑍈𑌥𑌿𑌲𑍀𑌂 𑌪𑍍𑌰𑌤𑌿𑌕𑍍𑌷𑌣𑌂 𑌸𑌰𑍍𑌵𑌤 𑌏𑌵 𑌶𑌂𑌕𑌿𑌤𑌃 ॥ 50 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌤𑍍𑌰𑌿𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
