𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌷𑌟𑍍𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌅𑌨𑍇𑌕𑌶𑌤𑌸𑌾𑌹𑌸𑍍𑌰𑍀𑌂 𑌵𑌿𑌷𑌣𑍍𑌣𑌾𑌂 𑌹𑌰𑌿𑌵𑌾𑌹𑌿𑌨𑍀𑌮𑍍 ।
𑌜𑌾𑌂𑌬𑌵𑌾𑌨𑍍𑌸𑌮𑍁𑌦𑍀𑌕𑍍𑌷𑍍𑌯𑍈𑌵𑌂 𑌹𑌨𑍂𑌮𑌂𑌤𑌮𑌥𑌾𑌬𑍍𑌰𑌵𑍀𑌤𑍍 ॥ 1 ॥
𑌵𑍀𑌰 𑌵𑌾𑌨𑌰𑌲𑍋𑌕𑌸𑍍𑌯 𑌸𑌰𑍍𑌵𑌶𑌾𑌸𑍍𑌤𑍍𑌰𑌵𑌿𑌦𑌾𑌂 𑌵𑌰 ।
𑌤𑍂𑌷𑍍𑌣𑍀𑌮𑍇𑌕𑌾𑌂𑌤𑌮𑌾𑌶𑍍𑌰𑌿𑌤𑍍𑌯 𑌹𑌨𑍂𑌮𑌨𑍍𑌕𑌿𑌂 𑌨 𑌜𑌲𑍍𑌪𑌸𑌿 ॥ 2 ॥
𑌹𑌨𑍂𑌮𑌨𑍍𑌹𑌰𑌿𑌰𑌾𑌜𑌸𑍍𑌯 𑌸𑍁𑌗𑍍𑌰𑍀𑌵𑌸𑍍𑌯 𑌸𑌮𑍋 𑌹𑍍𑌯𑌸𑌿 ।
𑌰𑌾𑌮𑌲𑌕𑍍𑌷𑍍𑌮𑌣𑌯𑍋𑌶𑍍𑌚𑌾𑌪𑌿 𑌤𑍇𑌜𑌸𑌾 𑌚 𑌬𑌲𑍇𑌨 𑌚 ॥ 3 ॥
𑌅𑌰𑌿𑌷𑍍𑌟𑌨𑍇𑌮𑌿𑌨𑌃 𑌪𑍁𑌤𑍍𑌰𑍋 𑌵𑍈𑌨𑌤𑍇𑌯𑍋 𑌮𑌹𑌾𑌬𑌲𑌃 ।
𑌗𑌰𑍁𑌤𑍍𑌮𑌾𑌨𑌿𑌤𑌿 𑌵𑌿𑌖𑍍𑌯𑌾𑌤 𑌉𑌤𑍍𑌤𑌮𑌸𑍍𑌸𑌰𑍍𑌵𑌪𑌕𑍍𑌷𑌿𑌣𑌾𑌮𑍍 ॥ 4 ॥
𑌬𑌹𑍁𑌶𑍋 𑌹𑌿 𑌮𑌯𑌾 𑌦𑍃𑌷𑍍𑌟𑌃 𑌸𑌾𑌗𑌰𑍇 𑌸 𑌮𑌹𑌾𑌬𑌲𑌃 ।
𑌭𑍁𑌜𑌂𑌗𑌾𑌨𑍁𑌦𑍍𑌧𑌰𑌨𑍍𑌪𑌕𑍍𑌷𑍀 𑌮𑌹𑌾𑌵𑍇𑌗𑍋 𑌮𑌹𑌾𑌯𑌶𑌾𑌃 ॥ 5 ॥
𑌪𑌕𑍍𑌷𑌯𑍋𑌰𑍍𑌯𑌦𑍍𑌬𑌲𑌂 𑌤𑌸𑍍𑌯 𑌤𑌾𑌵𑌦𑍍𑌭𑍁𑌜𑌬𑌲𑌂 𑌤𑌵 ।
𑌵𑌿𑌕𑍍𑌰𑌮𑌶𑍍𑌚𑌾𑌪𑌿 𑌵𑍇𑌗𑌶𑍍𑌚 𑌨 𑌤𑍇 𑌤𑍇𑌨𑌾𑌵𑌹𑍀𑌯𑌤𑍇 ॥ 6 ॥
𑌬𑌲𑌂 𑌬𑍁𑌦𑍍𑌧𑌿𑌶𑍍𑌚 𑌤𑍇𑌜𑌶𑍍𑌚 𑌸𑌤𑍍𑌤𑍍𑌵𑌂 𑌚 𑌹𑌰𑌿𑌪𑍁𑌂𑌗𑌵 ।
𑌵𑌿𑌶𑌿𑌷𑍍𑌟𑌂 𑌸𑌰𑍍𑌵𑌭𑍂𑌤𑍇𑌷𑍁 𑌕𑌿𑌮𑌾𑌤𑍍𑌮𑌾𑌨𑌂 𑌨 𑌬𑍁𑌧𑍍𑌯𑌸𑍇 ॥ ॥
𑌅𑌪𑍍𑌸𑌰𑌾𑌪𑍍𑌸𑌰𑌸𑌾𑌂 𑌶𑍍𑌰𑍇𑌷𑍍𑌠𑌾 𑌵𑌿𑌖𑍍𑌯𑌾𑌤𑌾 𑌪𑍁𑌂𑌜𑌿𑌕𑌸𑍍𑌥𑌲𑌾 ।
𑌅𑌂𑌜𑌨𑍇𑌤𑌿 𑌪𑌰𑌿𑌖𑍍𑌯𑌾𑌤𑌾 𑌪𑌤𑍍𑌨𑍀 𑌕𑍇𑌸𑌰𑌿𑌣𑍋 𑌹𑌰𑍇𑌃 ॥ ॥
𑌵𑌿𑌖𑍍𑌯𑌾𑌤𑌾 𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌰𑍂𑌪𑍇𑌣𑌾𑌪𑍍𑌰𑌤𑌿𑌮𑌾 𑌭𑍁𑌵𑌿 ।
𑌅𑌭𑌿𑌶𑌾𑌪𑌾𑌦𑌭𑍂𑌤𑍍𑌤𑌾𑌤 𑌵𑌾𑌨𑌰𑍀 𑌕𑌾𑌮𑌰𑍂𑌪𑌿𑌣𑍀 ॥ ॥
𑌦𑍁𑌹𑌿𑌤𑌾 𑌵𑌾𑌨𑌰𑍇𑌂𑌦𑍍𑌰𑌸𑍍𑌯 𑌕𑍁𑌂𑌜𑌰𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌮𑌾𑌨𑍁𑌷𑌂 𑌵𑌿𑌗𑍍𑌰𑌹𑌂 𑌕𑍃𑌤𑍍𑌵𑌾 𑌰𑍂𑌪𑌯𑍌𑌵𑌨𑌶𑌾𑌲𑌿𑌨𑍀 ॥ 10 ॥
𑌵𑌿𑌚𑌿𑌤𑍍𑌰𑌮𑌾𑌲𑍍𑌯𑌾𑌭𑌰𑌣𑌾 𑌮𑌹𑌾𑌰𑍍𑌹𑌕𑍍𑌷𑍌𑌮𑌵𑌾𑌸𑌿𑌨𑍀 ।
𑌅𑌚𑌰𑌤𑍍𑌪𑌰𑍍𑌵𑌤𑌸𑍍𑌯𑌾𑌗𑍍𑌰𑍇 𑌪𑍍𑌰𑌾𑌵𑍃𑌡𑌂𑌬𑍁𑌦𑌸𑌨𑍍𑌨𑌿𑌭𑍇 ॥ 11 ॥
𑌤𑌸𑍍𑌯𑌾 𑌵𑌸𑍍𑌤𑍍𑌰𑌂 𑌵𑌿𑌶𑌾𑌲𑌾𑌕𑍍𑌷𑍍𑌯𑌾𑌃 𑌪𑍀𑌤𑌂 𑌰𑌕𑍍𑌤𑌦𑌶𑌂 𑌶𑍁𑌭𑌮𑍍 ।
𑌸𑍍𑌥𑌿𑌤𑌾𑌯𑌾𑌃 𑌪𑌰𑍍𑌵𑌤𑌸𑍍𑌯𑌾𑌗𑍍𑌰𑍇 𑌮𑌾𑌰𑍁𑌤𑍋𑌽𑌪𑌹𑌰𑌚𑍍𑌛𑌨𑍈𑌃 ॥ 12 ॥
𑌸 𑌦𑌦𑌰𑍍𑌶 𑌤𑌤𑌸𑍍𑌤𑌸𑍍𑌯𑌾 𑌵𑍃𑌤𑍍𑌤𑌾𑌵𑍂𑌰𑍂 𑌸𑍁𑌸𑌂𑌹𑌤𑍌 ।
𑌸𑍍𑌤𑌨𑍌 𑌚 𑌪𑍀𑌨𑍌 𑌸𑌹𑌿𑌤𑍌 𑌸𑍁𑌜𑌾𑌤𑌂 𑌚𑌾𑌰𑍁 𑌚𑌾𑌨𑌨𑌮𑍍 ॥ 13 ॥
𑌤𑌾𑌂 𑌵𑌿𑌶𑌾𑌲𑌾𑌯𑌤𑌶𑍍𑌰𑍋𑌣𑍀𑌂 𑌤𑌨𑍁𑌮𑌧𑍍𑌯𑌾𑌂 𑌯𑌶𑌸𑍍𑌵𑌿𑌨𑍀𑌮𑍍 ।
𑌦𑍃𑌷𑍍𑌟𑌵𑍈𑌵 𑌶𑍁𑌭𑌸𑌰𑍍𑌵𑌾𑌂𑌗𑍀𑌂 𑌪𑌵𑌨𑌃 𑌕𑌾𑌮𑌮𑍋𑌹𑌿𑌤𑌃 ॥ 14 ॥
𑌸 𑌤𑌾𑌂 𑌭𑍁𑌜𑌾𑌭𑍍𑌯𑌾𑌂 𑌦𑍀𑌰𑍍𑌘𑌾𑌭𑍍𑌯𑌾𑌂 𑌪𑌰𑍍𑌯𑌷𑍍𑌵𑌜𑌤 𑌮𑌾𑌰𑍁𑌤𑌃 ।
𑌮𑌨𑍍𑌮𑌥𑌾𑌵𑌿𑌷𑍍𑌟𑌸𑌰𑍍𑌵𑌾𑌂𑌗𑍋 𑌗𑌤𑌾𑌤𑍍𑌮𑌾 𑌤𑌾𑌮𑌨𑌿𑌂𑌦𑌿𑌤𑌾𑌮𑍍 ॥ 15 ॥
𑌸𑌾 𑌤𑍁 𑌤𑌤𑍍𑌰𑍈𑌵 𑌸𑌂𑌭𑍍𑌰𑌾𑌂𑌤𑌾 𑌸𑍁𑌵𑍍𑌰𑌤𑌾 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।
𑌏𑌕𑌪𑌤𑍍𑌨𑍀𑌵𑍍𑌰𑌤𑌮𑌿𑌦𑌂 𑌕𑍋 𑌨𑌾𑌶𑌯𑌿𑌤𑍁𑌮𑌿𑌚𑍍𑌛𑌤𑌿 ॥ 16 ॥
𑌅𑌂𑌜𑌨𑌾𑌯𑌾 𑌵𑌚𑍍𑌶𑍁𑌤𑍍𑌵𑌾 𑌮𑌾𑌰𑍁𑌤𑌃 𑌪𑍍𑌰𑌤𑍍𑌯𑌭𑌾𑌷𑌤 ।
𑌨 𑌤𑍍𑌵𑌾𑌂 𑌹𑌿𑌂𑌸𑌾𑌮𑌿 𑌸𑍁𑌶𑍍𑌰𑍋𑌣𑌿 𑌮𑌾 𑌭𑍂𑌤𑍍𑌤𑍇 𑌸𑍁𑌭𑌗𑍇 𑌭𑌯𑌮𑍍 ॥ 1 ॥
𑌮𑌨𑌸𑌾𑌽𑌸𑍍𑌮𑌿 𑌗𑌤𑍋 𑌯𑌤𑍍𑌤𑍍𑌵𑌾𑌂 𑌪𑌰𑌿𑌷𑍍𑌵𑌜𑍍𑌯 𑌯𑌶𑌸𑍍𑌵𑌿𑌨𑍀𑌮𑍍 ।
𑌵𑍀𑌰𑍍𑌯𑌵𑌾𑌨𑍍𑌬𑍁𑌦𑍍𑌧𑌿𑌸𑌂𑌪𑌨𑍍𑌨𑌃 𑌪𑍁𑌤𑍍𑌰𑌸𑍍𑌤𑌵 𑌭𑌵𑌿𑌷𑍍𑌯𑌤𑌿 ॥ 1 ॥
𑌮𑌹𑌾𑌸𑌤𑍍𑌤𑍍𑌵𑍋 𑌮𑌹𑌾𑌤𑍇𑌜𑌾 𑌮𑌹𑌾𑌬𑌲𑌪𑌰𑌾𑌕𑍍𑌰𑌮𑌃 ।
𑌲𑌂𑌘𑌨𑍇 𑌪𑍍𑌲𑌵𑌨𑍇 𑌚𑍈𑌵 𑌭𑌵𑌿𑌷𑍍𑌯𑌤𑌿 𑌹𑌿 𑌮𑌤𑍍𑌸𑌮𑌃 ॥ 1 ॥
𑌏𑌵𑌮𑍁𑌕𑍍𑌤𑌾 𑌤𑌤𑌸𑍍𑌤𑍁𑌷𑍍𑌟𑌾 𑌜𑌨𑌨𑍀 𑌤𑍇 𑌮𑌹𑌾𑌕𑌪𑍇 ।
𑌗𑍁𑌹𑌾𑌯𑌾𑌂 𑌤𑍍𑌵𑌾𑌂 𑌮𑌹𑌾𑌬𑌾𑌹𑍋 𑌪𑍍𑌰𑌜𑌜𑍍𑌞𑍇 𑌪𑍍𑌲𑌵𑌗𑌰𑍍𑌷𑌭𑌮𑍍 ॥ 20 ॥
𑌅𑌭𑍍𑌯𑍁𑌤𑍍𑌥𑌿𑌤𑌂 𑌤𑌤𑌸𑍍𑌸𑍂𑌰𑍍𑌯𑌂 𑌬𑌾𑌲𑍋 𑌦𑍃𑌷𑍍𑌟𑍍𑌵𑌾 𑌮𑌹𑌾𑌵𑌨𑍇 ।
𑌫𑌲𑌂 𑌚𑍇𑌤𑌿 𑌜𑌿𑌘𑍃𑌕𑍍𑌷𑍁𑌸𑍍𑌤𑍍𑌵𑌮𑍁𑌤𑍍𑌪𑍍𑌲𑍁𑌤𑍍𑌯𑌾𑌭𑍍𑌯𑍁𑌦𑍍𑌗𑌤𑍋 𑌦𑌿𑌵𑌮𑍍 ॥ 21 ॥
𑌶𑌤𑌾𑌨𑌿 𑌤𑍍𑌰𑍀𑌣𑌿 𑌗𑌤𑍍𑌵𑌾𑌽𑌥 𑌯𑍋𑌜𑌨𑌾𑌨𑌾𑌂 𑌮𑌹𑌾𑌕𑌪𑍇 ।
𑌤𑍇𑌜𑌸𑌾 𑌤𑌸𑍍𑌯 𑌨𑌿𑌰𑍍𑌧𑍂𑌤𑍋 𑌨 𑌵𑌿𑌷𑌾𑌦𑌂 𑌤𑌤𑍋𑌗𑌤𑌃 ॥ 22 ॥
𑌤𑌾𑌵𑌦𑌾𑌪𑌪𑌤 𑌸𑍍𑌤𑍂𑌰𑍍𑌣𑌮𑌂𑌤𑌰𑌿𑌕𑍍𑌷𑌂 𑌮𑌹𑌾𑌕𑌪𑍇 ।
𑌕𑍍𑌷𑌿𑌪𑍍𑌤𑌮𑌿𑌂𑌦𑍍𑌰𑍇𑌣 𑌤𑍇 𑌵𑌜𑍍𑌰𑌂 𑌕𑍋𑌪𑌾𑌵𑌿𑌷𑍍𑌟𑍇𑌨 𑌧𑍀𑌮𑌤𑌾 ॥ 23 ॥
𑌤𑌦𑌾 𑌶𑍈𑌲𑌾𑌗𑍍𑌰𑌶𑌿𑌖𑌰𑍇 𑌵𑌾𑌮𑍋 𑌹𑌨𑍁𑌰𑌭𑌜𑍍𑌯𑌤 ।
𑌤𑌤𑍋 𑌹𑌿 𑌨𑌾𑌮𑌧𑍇𑌯𑌂 𑌤𑍇 𑌹𑌨𑍁𑌮𑌾𑌨𑌿𑌤𑌿 𑌕𑍀𑌰𑍍𑌤𑍍𑌯𑌤𑍇 ॥ 24 ॥
𑌤𑌸𑍍𑌤𑍍𑌵𑌾𑌵𑌿 𑌨𑌿𑌹𑌤𑌂 𑌦𑍃𑌷𑍍𑌟𑍍𑌵𑌾 𑌵𑌾𑌯𑍁𑌰𑍍𑌗𑌂𑌧𑌵𑌹𑌸𑍍𑌸𑍍𑌵𑌯𑌮𑍍 ।
𑌤𑍍𑌰𑍈𑌲𑍋𑌕𑍍𑌯𑍇 𑌭𑍃𑌶𑌸𑌂𑌕𑍃𑌦𑍍𑌧𑍋 𑌨 𑌵𑌵𑍌 𑌵𑍈 𑌪𑍍𑌰𑌭𑌂𑌜𑌨𑌃 ॥ 25 ॥
𑌸𑌂𑌭𑍍𑌰𑌾𑌂𑌤𑌾𑌶𑍍𑌚 𑌸𑍂𑌰𑌾𑌸𑍍𑌸𑌰𑍍𑌵𑍇 𑌤𑍍𑌰𑍈𑌲𑍋𑌕𑍍𑌯𑍇 𑌕𑍍𑌷𑍁𑌭𑌿𑌤𑍇 𑌸𑌤𑌿 ।
𑌪𑍍𑌰𑌸𑌾𑌦𑌯𑌂𑌤𑌿 𑌸𑌂𑌕𑍍𑌰𑍁𑌦𑍍𑌧𑌂 𑌮𑌾𑌰𑍁𑌤𑌂 𑌭𑍁𑌵𑌨𑍇𑌶𑍍𑌵𑌰𑌾𑌃 ॥ 26 ॥
𑌪𑍍𑌰𑌸𑌾𑌦𑌿𑌤𑍇 𑌚 𑌪𑌵𑌨𑍇 𑌬𑍍𑌰𑌹𑍍𑌮𑌾 𑌤𑍁𑌭𑍍𑌯𑌂 𑌵𑌰𑌂 𑌦𑌦𑍌 ।
𑌅𑌶𑌸𑍍𑌤𑍍𑌰𑌵𑌧𑍍𑌯𑌤𑌾𑌂 𑌤𑌾𑌤 𑌸𑌮𑌰𑍇 𑌸𑌤𑍍𑌯𑌵𑌿𑌕𑍍𑌰𑌮 ॥ 2 ॥
𑌵𑌜𑍍𑌰𑌸𑍍𑌯 𑌚 𑌨𑌿𑌪𑌾𑌤𑍇𑌨 𑌵𑌿𑌰𑍁𑌜𑌂 𑌤𑍍𑌵𑌾𑌂 𑌸𑌮𑍀𑌕𑍍𑌷𑍍𑌯 𑌚 ।
𑌸𑌹𑌸𑍍𑌰𑌨𑍇𑌤𑍍𑌰𑌃 𑌪𑍍𑌰𑍀𑌤𑌾𑌤𑍍𑌮𑌾 𑌦𑌦𑍌 𑌤𑍇 𑌵𑌰𑌮𑍁𑌤𑍍𑌤𑌮𑌮𑍍 ॥ 2 ॥
𑌸𑍍𑌵𑌚𑍍𑌛𑌂𑌦𑌤𑌶𑍍𑌚 𑌮𑌰𑌣𑌂 𑌤𑍇𑌭𑍂𑌯𑌾𑌦𑌿𑌤𑌿 𑌵𑍈 𑌪𑍍𑌰𑌭𑍋 ।
𑌸 𑌤𑍍𑌵𑌂 𑌕𑍇𑌸𑌰𑌿𑌣𑌃 𑌪𑍁𑌤𑍍𑌰𑌃 𑌕𑍍𑌷𑍇𑌤𑍍𑌰𑌜𑍋 𑌭𑍀𑌮𑌵𑌿𑌕𑍍𑌰𑌮𑌃 ॥ 2 ॥
𑌮𑌾𑌰𑍁𑌤𑌸𑍍𑌯𑍌𑌰𑌸𑌃 𑌪𑍁𑌤𑍍𑌰𑌸𑍍𑌤𑍇𑌜𑌸𑌾 𑌚𑌾𑌪𑌿 𑌤𑌤𑍍𑌸𑌮𑌃 ।
𑌤𑍍𑌵𑌂 𑌹𑌿 𑌵𑌾𑌯𑍁𑌸𑍁𑌤𑍋 𑌵𑌤𑍍𑌸 𑌪𑍍𑌲𑌵𑌨𑍇 𑌚𑌾𑌪𑌿 𑌤𑌤𑍍𑌸𑌮𑌃 ॥ 30 ॥
𑌵𑌯𑌮𑌦𑍍𑌯 𑌗𑌤𑌪𑍍𑌰𑌾𑌣𑌾 𑌭𑌵𑌾𑌨𑍍𑌨𑌸𑍍𑌤𑍍𑌰𑌾𑌤𑍁 𑌸𑌾𑌂𑌪𑍍𑌰𑌤𑌮𑍍 ।
𑌦𑌾𑌕𑍍𑌷𑍍𑌯𑌵𑌿𑌕𑍍𑌰𑌮𑌸𑌂𑌪𑌨𑍍𑌨𑌃 𑌕𑌪𑌿𑌰𑌾𑌜 𑌇𑌵𑌾𑌪𑌰𑌃 ॥ 31 ॥
𑌤𑍍𑌰𑌿𑌵𑌿𑌕𑍍𑌰𑌮𑍇 𑌮𑌯𑌾 𑌤𑌾𑌤 𑌸𑌶𑍈𑌲𑌵𑌨𑌕𑌾𑌨𑌨𑌾 ।
𑌤𑍍𑌰𑌿𑌸𑍍𑌸𑌪𑍍𑌤𑌕𑍃𑌤𑍍𑌵𑌃 𑌪𑍃𑌥𑌿𑌵𑍀 𑌪𑌰𑌿𑌕𑍍𑌰𑌾𑌂𑌤𑌾 𑌪𑍍𑌰𑌦𑌕𑍍𑌷𑌿𑌣𑌮𑍍 ॥ 32 ॥
𑌤𑌥𑌾 𑌚𑍌𑌷𑌧𑌯𑍋𑌽𑌸𑍍𑌮𑌾𑌭𑌿𑌸𑍍𑌸𑌂𑌚𑌿𑌤𑌾 𑌦𑍇𑌵𑌶𑌾𑌸𑌨𑌾𑌤𑍍 ।
𑌨𑌿𑌷𑍍𑌪𑌨𑍍𑌨𑌮𑌮𑍃𑌤𑌂 𑌯𑌾𑌭𑌿𑌸𑍍𑌤𑌦𑌾𑌸𑍀𑌨𑍍𑌨𑍋 𑌮𑌹𑌦𑍍𑌬𑌲𑌮𑍍 ॥ 33 ॥
𑌸 𑌇𑌦𑌾𑌨𑍀𑌮𑌹𑌂 𑌵𑍃𑌦𑍍𑌧𑌃 𑌪𑌰𑌿𑌹𑍀𑌨𑌪𑌰𑌾𑌕𑍍𑌰𑌮𑌃 ।
𑌸𑌾𑌂𑌪𑍍𑌰𑌤𑌂 𑌕𑌾𑌲𑌮𑌸𑍍𑌮𑌾𑌕𑌂 𑌭𑌵𑌾𑌨𑍍𑌸𑌰𑍍𑌵𑌗𑍁𑌣𑌾𑌨𑍍𑌵𑌿𑌤𑌃 ॥ 34 ॥
𑌤𑌦𑍍𑌵𑌿𑌜𑍃𑌂𑌭𑌸𑍍𑌵 𑌵𑌿𑌕𑍍𑌰𑌾𑌂𑌤𑌃 𑌪𑍍𑌲𑌵𑌤𑌾𑌮𑍁𑌤𑍍𑌤𑌮𑍋 𑌹𑍍𑌯𑌸𑌿 ।
𑌤𑍍𑌵𑌦𑍍𑌵𑍀𑌰𑍍𑌯𑌂 𑌦𑍍𑌰𑌷𑍍𑌟𑍁𑌕𑌾𑌮𑌾 𑌹𑌿 𑌸𑌰𑍍𑌵𑌾 𑌵𑌾𑌨𑌰𑌵𑌾𑌹𑌿𑌨𑍀 ॥ 35 ॥
𑌉𑌤𑍍𑌤𑌿𑌷𑍍𑌠 𑌹𑌰𑌿𑌶𑌾𑌰𑍍𑌦𑍂𑌲 𑌲𑌂𑌘𑌯𑌸𑍍𑌵 𑌮𑌹𑌾𑌰𑍍𑌣𑌵𑌮𑍍 ।
𑌪𑌰𑌾 𑌹𑌿 𑌸𑌰𑍍𑌵𑌭𑍂𑌤𑌾𑌨𑌾𑌂 𑌹𑌨𑍁𑌮𑌨𑍍𑌯𑌾 𑌗𑌤𑌿𑌸𑍍𑌤𑌵 ॥ 36 ॥
𑌵𑌿𑌷𑌣𑍍𑌣𑌾 𑌹𑌰𑌯𑌸𑍍𑌸𑌰𑍍𑌵𑍇 𑌹𑌨𑍁𑌮𑌨𑍍𑌕𑌿𑌮𑍁𑌪𑍇𑌕𑍍𑌷𑌸𑍇 ।
𑌵𑌿𑌕𑍍𑌰𑌮𑌸𑍍𑌵 𑌮𑌹𑌾𑌵𑍇𑌗𑍋 𑌵𑌿𑌷𑍍𑌣𑍁𑌸𑍍𑌤𑍍𑌰𑍀𑌨𑍍𑌵𑌿𑌕𑍍𑌰𑌮𑌾𑌨𑌿𑌵 ॥ 3 ॥
𑌤𑌤𑌸𑍍𑌤𑍁 𑌵𑍈 𑌜𑌾𑌂𑌬𑌵𑌤𑌾 𑌪𑍍𑌰𑌚𑍋𑌦𑌿𑌤𑌃 𑌪𑍍𑌰𑌤𑍀𑌤𑌵𑍇𑌗𑌃 𑌪𑌵𑌨𑌾𑌤𑍍𑌮𑌜𑌃 𑌕𑌪𑌿𑌃 ।
𑌪𑍍𑌰𑌹𑌰𑍍𑌷𑌯𑌂𑌸𑍍𑌤𑌾𑌂 𑌹𑌰𑌿𑌵𑍀𑌰𑌵𑌾𑌹𑌿𑌨𑍀𑌂 𑌚𑌕𑌾𑌰 𑌰𑍂𑌪𑌂 𑌮𑌹𑌦𑌾𑌤𑍍𑌮𑌨𑌸𑍍𑌤𑌦𑌾 ॥ 3 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌷𑌟𑍍𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
