𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌿𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌯𑌾𑌵𑌤𑍍𑌤𑍁 𑌨𑌿𑌰𑍍𑌯𑌤𑌸𑍍𑌤𑌸𑍍𑌯 𑌰𑌜𑍋𑌰𑍂𑌪𑌮𑌦𑍃𑌶𑍍𑌯𑌤 ।
𑌨𑍈𑌵𑍇𑌕𑍍𑌷𑍍𑌵𑌾𑌕𑍁𑌵𑌰𑌸𑍍𑌤𑌾𑌵𑌤𑍍𑌸𑌂𑌜𑌹𑌾𑌰𑌾𑌤𑍍𑌮𑌚𑌕𑍍𑌷𑍁𑌷𑍀 ॥ 1 ॥
𑌯𑌾𑌵𑌦𑍍𑌰𑌾𑌜𑌾 𑌪𑍍𑌰𑌿𑌯𑌂 𑌪𑍁𑌤𑍍𑌰𑌂 𑌪𑌶𑍍𑌯𑌤𑍍𑌯𑌤𑍍𑌯𑌂𑌤𑌧𑌾𑌰𑍍𑌮𑌿𑌕𑌮𑍍 ।
𑌤𑌾𑌵𑌦𑍍𑌵𑍍𑌯𑌵𑌰𑍍𑌧𑌤𑍇 𑌵𑌾𑌸𑍍𑌯 𑌧𑌰𑌣𑍍𑌯𑌾𑌂 𑌪𑍁𑌤𑍍𑌰𑌦𑌰𑍍𑌶𑌨𑍇 ॥ 2 ॥
𑌨 𑌪𑌶𑍍𑌯𑌤𑌿 𑌰𑌜𑍋𑌽𑌪𑍍𑌯𑌸𑍍𑌯 𑌯𑌦𑌾 𑌰𑌾𑌮𑌸𑍍𑌯 𑌭𑍂𑌮𑌿𑌪𑌃 ।
𑌤𑌦𑌾𑌽𑌽𑌰𑍍𑌤𑌶𑍍𑌚 𑌵𑌿𑌷𑌣𑍍𑌣𑌶𑍍𑌚 𑌪𑌪𑌾𑌤 𑌧𑌰𑌣𑍀𑌤𑌲𑍇 ॥ 3 ॥
𑌤𑌸𑍍𑌯 𑌦𑌕𑍍𑌷𑌿𑌣𑌮𑌨𑍍𑌵𑌾𑌗𑌾𑌤𑍍𑌕𑍌𑌸𑌲𑍍𑌯𑌾 𑌬𑌾𑌹𑍁𑌮𑌂𑌗𑌨𑌾 ।
𑌵𑌾𑌮𑌂 𑌚𑌾𑌸𑍍𑌯𑌾𑌨𑍍𑌵𑌗𑌾𑌤𑍍𑌪𑌾𑌰𑍍𑌶𑍍𑌵𑌂 𑌕𑍈𑌕𑍇𑌯𑍀 𑌭𑌰𑌤𑌪𑍍𑌰𑌿𑌯𑌾 ॥ 4 ॥
𑌤𑌾𑌂 𑌨𑌯𑍇𑌨 𑌚 𑌸𑌂𑌪𑌨𑍍𑌨𑍋 𑌧𑌰𑍍𑌮𑍇𑌣 𑌵𑌿𑌨𑌯𑍇𑌨 𑌚 ।
𑌉𑌵𑌾𑌚 𑌰𑌾𑌜𑌾 𑌕𑍈𑌕𑍇𑌯𑍀𑌂 𑌸𑌮𑍀𑌕𑍍𑌷𑍍𑌯 𑌵𑍍𑌯𑌥𑌿𑌤𑍇𑌂𑌦𑍍𑌰𑌿𑌯𑌃 ॥ 5 ॥
𑌕𑍈𑌕𑍇𑌯𑌿 𑌮𑌾 𑌮𑌮𑌾𑌂𑌗𑌾𑌨𑌿 𑌸𑍍𑌪𑍍𑌰𑌾𑌕𑍍𑌷𑍀𑌸𑍍𑌤𑍍𑌵𑌂 𑌦𑍁𑌷𑍍𑌟𑌚𑌾𑌰𑌿𑌣𑍀 ।
𑌨 𑌹𑌿 𑌤𑍍𑌵𑌾𑌂 𑌦𑍍𑌰𑌷𑍍𑌟𑍁𑌮𑌿𑌚𑍍𑌛𑌾𑌮𑌿 𑌨 𑌭𑌾𑌰𑍍𑌯𑌾 𑌨 𑌚 𑌬𑌾𑌂𑌧𑌵𑍀 ॥ 6 ॥
𑌯𑍇 𑌚 𑌤𑍍𑌵𑌾𑌮𑌨𑍁𑌜𑍀𑌵𑌂𑌤𑌿 𑌨𑌾𑌹𑌂 𑌤𑍇𑌷𑌾𑌂 𑌨 𑌤𑍇 𑌮𑌮 ।
𑌕𑍇𑌵𑌲𑌾𑌰𑍍𑌥𑌪𑌰𑌾𑌂 𑌹𑌿 𑌤𑍍𑌵𑌾𑌂 𑌤𑍍𑌯𑌕𑍍𑌤𑌧𑌰𑍍𑌮𑌾𑌂 𑌤𑍍𑌯𑌜𑌾𑌮𑍍𑌯𑌹𑌮𑍍 ॥ ॥
𑌅𑌗𑍃𑌹𑍍𑌣𑌾𑌂 𑌯𑌚𑍍𑌚 𑌤𑍇 𑌪𑌾𑌣𑌿𑌮𑌗𑍍𑌨𑌿𑌂 𑌪𑌰𑍍𑌯𑌣𑌯𑌂 𑌚 𑌯𑌤𑍍 ।
𑌅𑌨𑍁𑌜𑌾𑌨𑌾𑌮𑌿 𑌤𑌤𑍍𑌸𑌰𑍍𑌵𑌮𑌸𑍍𑌮𑌿𑌨𑍍 𑌲𑍋𑌕𑍇 𑌪𑌰𑌤𑍍𑌰 𑌚 ॥ ॥
𑌭𑌰𑌤𑌶𑍍𑌚𑍇𑌤𑍍𑌪𑍍𑌰𑌤𑍀𑌤𑌃 𑌸𑍍𑌯𑌾𑌦𑍍𑌰𑌾𑌜𑍍𑌯𑌂 𑌪𑍍𑌰𑌾𑌪𑍍𑌯𑍇𑌦𑌮𑌵𑍍𑌯𑌯𑌮𑍍 ।
𑌯𑌨𑍍𑌮𑍇 𑌸 𑌦𑌦𑍍𑌯𑌾𑌤𑍍𑌪𑌿𑌤𑍍𑌰𑌰𑍍𑌥𑌂 𑌮𑌾𑌮𑌾𑌂 𑌤𑌦𑍍𑌦𑌤𑍍𑌤𑌮𑌾𑌗𑌮𑌤𑍍 ॥ ॥
𑌅𑌥 𑌰𑍇𑌣𑍁𑌸𑌮𑍁𑌧𑍍𑌵𑌸𑍍𑌤𑌂 𑌸𑌮𑍁𑌤𑍍𑌥𑌾𑌪𑍍𑌯 𑌨𑌰𑌾𑌧𑌿𑌪𑌮𑍍 ।
𑌨𑍍𑌯𑌵𑌰𑍍𑌤𑌤 𑌤𑌦𑌾 𑌦𑍇𑌵𑍀 𑌕𑍌𑌶𑌲𑍍𑌯𑌾 𑌶𑍋𑌕𑌕𑌰𑍍𑌶𑌿𑌤𑌾 ॥ 10 ॥
𑌹𑌤𑍍𑌵𑍇𑌵 𑌬𑍍𑌰𑌾𑌹𑍍𑌮𑌣𑌂 𑌕𑌾𑌮𑌾𑌤𑍍 𑌸𑍍𑌪𑍃𑌷𑍍𑌟𑍍𑌵𑌾𑌗𑍍𑌨𑌿𑌮𑌿𑌵 𑌪𑌾𑌣𑌿𑌨𑌾 ।
𑌅𑌨𑍍𑌵𑌤𑌪𑍍𑌯𑌤 𑌧𑌰𑍍𑌮𑌾𑌤𑍍𑌮𑌾 𑌪𑍁𑌤𑍍𑌰𑌂 𑌸𑌂𑌚𑌿𑌂𑌤𑍍𑌯 𑌤𑌾𑌪𑌸𑌮𑍍 ॥ 11 ॥
𑌨𑌿𑌵𑍃𑌤𑍍𑌤𑍍𑌯𑍈𑌵 𑌨𑌿𑌵𑍃𑌤𑍍𑌤𑍍𑌯𑍈𑌵 𑌸𑍀𑌦𑌤𑍋 𑌰𑌥𑌵𑌰𑍍𑌤𑍍𑌮𑌸𑍁 ।
𑌰𑌾𑌜𑍍𑌞𑍋 𑌨𑌾𑌤𑌿𑌬𑌭𑍌 𑌰𑍂𑌪𑌂 𑌗𑍍𑌰𑌸𑍍𑌤𑌸𑍍𑌯𑌾𑌂𑌶𑍁𑌮𑌤𑍋 𑌯𑌥𑌾 ॥ 12 ॥
𑌵𑌿𑌲𑌲𑌾𑌪 𑌚 𑌦𑍁𑌃𑌖𑌾𑌰𑍍𑌤𑌃 𑌪𑍍𑌰𑌿𑌯𑌂 𑌪𑍁𑌤𑍍𑌰𑌮𑌨𑍁𑌸𑍍𑌮𑌰𑌨𑍍 ।
𑌨𑌗𑌰𑌾𑌂𑌤𑌮𑌨𑍁𑌪𑍍𑌰𑌾𑌪𑍍𑌤𑌂 𑌬𑍁𑌧𑍍𑌵𑌾 𑌪𑍁𑌤𑍍𑌰𑌮𑌥𑌾𑌬𑍍𑌰𑌵𑍀𑌤𑍍 ॥ 13 ॥
𑌵𑌾𑌹𑌨𑌨𑌾𑌂 𑌚 𑌮𑍁𑌖𑍍𑌯𑌾𑌨𑌾𑌂 𑌵𑌹𑌤𑌾𑌂 𑌤𑌂 𑌮𑌮𑌾𑌤𑍍𑌮𑌜𑌮𑍍 ।
𑌪𑌦𑌾𑌨𑌿 𑌪𑌥𑌿 𑌦𑍃𑌶𑍍𑌯𑌂𑌤𑍇 𑌸 𑌮𑌹𑌾𑌤𑍍𑌮𑌾 𑌨 𑌦𑍃𑌶𑍍𑌯𑌤𑍇 ॥ 14 ॥
𑌯𑌃 𑌸𑍁𑌖𑍇𑌷𑍂𑌪𑌧𑌾𑌨𑍇𑌷𑍁 𑌶𑍇𑌤𑍇 𑌚𑌂𑌦𑌨𑌰𑍂𑌷𑌿𑌤𑌃 ।
𑌵𑍀𑌜𑍍𑌯𑌮𑌾𑌨𑍋 𑌮𑌹𑌾𑌰𑍍𑌹𑌾𑌭𑌿𑌃 𑌸𑍍𑌤𑍍𑌰𑍀𑌭𑌿𑌰𑍍𑌮𑌮 𑌸𑍁𑌤𑍋𑌤𑍍𑌤𑌮𑌃 ॥ 15 ॥
𑌸 𑌨𑍂𑌨𑌂 𑌕𑍍𑌵𑌚𑌿𑌦𑍇𑌵𑌾𑌦𑍍𑌯 𑌵𑍃𑌕𑍍𑌷𑌮𑍂𑌲𑌮𑍁𑌪𑌾𑌶𑍍𑌰𑌿𑌤𑌃 ।
𑌕𑌾𑌷𑍍𑌠𑌂 𑌵𑌾 𑌯𑌦𑌿 𑌵𑌾𑌶𑍍𑌮𑌾𑌨𑌮𑍁𑌪𑌧𑌾𑌯 𑌶𑌯𑌿𑌷𑍍𑌯𑌤𑍇 ॥ 16 ॥
𑌉𑌤𑍍𑌥𑌾𑌸𑍍𑌯𑌤𑌿 𑌚 𑌮𑍇𑌦𑌿𑌨𑍍𑌯𑌾𑌃 𑌕𑍃𑌪𑌣𑌃 𑌪𑌾𑌂𑌸𑍁𑌕𑍁𑌂𑌠𑌿𑌤𑌃 ।
𑌵𑌿𑌨𑌿𑌶𑍍𑌶𑍍𑌵𑌸𑌨𑍍 𑌪𑍍𑌰𑌸𑍍𑌰𑌵𑌣𑌾𑌤𑍍𑌕𑌰𑍇𑌣𑍂𑌨𑌾𑌮𑌿𑌵𑌰𑍍𑌷𑌭𑌃 ॥ 1 ॥
𑌦𑍍𑌰𑌕𑍍𑌷𑍍𑌯𑌂𑌤𑌿 𑌨𑍂𑌨𑌂 𑌪𑍁𑌰𑍁𑌷𑌾 𑌦𑍀𑌰𑍍𑌘𑌬𑌾𑌹𑍁𑌂 𑌵𑌨𑍇𑌚𑌰𑌾𑌃 ।
𑌰𑌾𑌮𑌮𑍁𑌤𑍍𑌥𑌾𑌯 𑌗𑌚𑍍𑌛𑌂𑌤𑌂 𑌲𑍋𑌕𑌨𑌾𑌥𑌮𑌨𑌾𑌥𑌵𑌤𑍍 ॥ 1 ॥
𑌸𑌾 𑌨𑍂𑌨𑌂 𑌜𑌨𑌕𑌸𑍍𑌯𑍇𑌷𑍍𑌟𑌾 𑌸𑍁𑌤𑌾 𑌸𑍁𑌖𑌸𑌦𑍋𑌚𑌿𑌤𑌾 ।
𑌕𑌂𑌟𑌕𑌾𑌕𑍍𑌰𑌮𑌣𑌾𑌕𑍍𑌲𑌾𑌂𑌤𑌾 𑌵𑌨𑌮𑌦𑍍𑌯 𑌗𑌮𑌿𑌷𑍍𑌯𑌤𑌿 ॥ 1 ॥
𑌅𑌨𑌭𑌿𑌜𑍍𑌞𑌾 𑌵𑌨𑌾𑌨𑌾𑌂 𑌸𑌾 𑌨𑍂𑌨𑌂 𑌭𑌯𑌮𑍁𑌪𑍈𑌷𑍍𑌯𑌤𑌿 ।
𑌶𑍍𑌵𑌾𑌪𑌦𑌾𑌨𑌰𑍍𑌦𑌿𑌤𑌂 𑌶𑍍𑌰𑍁𑌤𑍍𑌵𑌾 𑌗𑌂𑌭𑍀𑌰𑌂 𑌰𑍋𑌮𑌹𑌰𑍍𑌷𑌣𑌮𑍍 ॥ 20 ॥
𑌸𑌕𑌾𑌮𑌾 𑌭𑌵 𑌕𑍈𑌕𑍇𑌯𑌿 𑌵𑌿𑌧𑌵𑌾 𑌰𑌾𑌜𑍍𑌯𑌮𑌾𑌵𑌸 ।
𑌨 𑌹𑌿 𑌤𑌂 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑌂 𑌵𑌿𑌨𑌾 𑌜𑍀𑌵𑌿𑌤𑍁𑌮𑍁𑌤𑍍𑌸𑌹𑍇 ॥ 21 ॥
𑌇𑌤𑍍𑌯𑍇𑌵𑌂 𑌵𑌿𑌲𑌪𑌨𑍍 𑌰𑌾𑌜𑌾 𑌜𑌨𑍌𑌘𑍇𑌨𑌾𑌭𑌿𑌸𑌂𑌵𑍃𑌤𑌃 ।
𑌅𑌪𑌸𑍍𑌨𑌾𑌤 𑌇𑌵𑌾𑌰𑌿𑌷𑍍𑌟𑌂 𑌪𑍍𑌰𑌵𑌿𑌵𑍇𑌶 𑌪𑍁𑌰𑍋𑌤𑍍𑌤𑌮𑌮𑍍 ॥ 22 ॥
𑌶𑍂𑌨𑍍𑌯𑌚𑌤𑍍𑌵𑌰𑌵𑍇𑌶𑍍𑌮𑌾𑌂𑌤𑌾𑌂 𑌸𑌂𑌵𑍃𑌤𑌾𑌪𑌣𑌦𑍇𑌵𑌤𑌾𑌮𑍍 ।
𑌕𑍍𑌲𑌾𑌂𑌤𑌦𑍁𑌰𑍍𑌬𑌲𑌦𑍁𑌃𑌖𑌾𑌰𑍍𑌤𑌾𑌂 𑌨𑌾𑌤𑍍𑌯𑌾𑌕𑍀𑌰𑍍𑌣𑌮𑌹𑌾𑌪𑌥𑌾𑌮𑍍 ॥ 23 ॥
𑌤𑌾𑌮𑌵𑍇𑌕𑍍𑌷𑍍𑌯 𑌪𑍁𑌰𑍀𑌂 𑌸𑌰𑍍𑌵𑌾𑌂 𑌰𑌾𑌮𑌮𑍇𑌵𑌾𑌨𑍁𑌚𑌿𑌂𑌤𑌯𑌨𑍍 ।
𑌵𑌿𑌲𑌪𑌨𑍍 𑌪𑍍𑌰𑌾𑌵𑌿𑌶𑌦𑍍𑌰𑌾𑌜𑌾 𑌗𑍃𑌹𑌂 𑌸𑍂𑌰𑍍𑌯 𑌇𑌵𑌾𑌂𑌬𑍁𑌦𑌮𑍍 ॥ 24 ॥
𑌮𑌹𑌾𑌹𑍍𑌰𑌦𑌮𑌿𑌵𑌾𑌕𑍍𑌷𑍋𑌭𑍍𑌯𑌂 𑌸𑍁𑌪𑌰𑍍𑌣𑍇𑌨 𑌹𑍃𑌤𑍋𑌰𑌗𑌮𑍍 ।
𑌰𑌾𑌮𑍇𑌣 𑌰𑌹𑌿𑌤𑌂 𑌵𑍇𑌶𑍍𑌮 𑌵𑍈𑌦𑍇𑌹𑍍𑌯𑌾 𑌲𑌕𑍍𑌷𑍍𑌮𑌣𑍇𑌨 𑌚 ॥ 25 ॥
𑌅𑌥 𑌗𑌦𑍍𑌗𑌦𑌶𑌬𑍍𑌦𑌸𑍍𑌤𑍁 𑌵𑌿𑌲𑌪𑌨𑍍𑌮𑌨𑍁𑌜𑌾𑌧𑌿𑌪𑌃 ।
𑌉𑌵𑌾𑌚 𑌮𑍃𑌦𑍁𑌮𑌂𑌦𑌾𑌰𑍍𑌥𑌂 𑌵𑌚𑌨𑌂 𑌦𑍀𑌨𑌮𑌸𑍍𑌵𑌰𑌮𑍍 ॥ 26 ॥
𑌕𑍌𑌶𑌲𑍍𑌯𑌾𑌯𑌾𑌂 𑌗𑍃𑌹𑌂 𑌶𑍀𑌘𑍍𑌰𑌂 𑌰𑌾𑌮𑌮𑌾𑌤𑍁𑌰𑍍𑌨𑌯𑌂𑌤𑍁 𑌮𑌾𑌮𑍍 ।
𑌨 𑌹𑍍𑌯𑌨𑍍𑌯𑌤𑍍𑌰 𑌮𑌮𑌾𑌶𑍍𑌵𑌾𑌸𑍋 𑌹𑍃𑌦𑌯𑌸𑍍𑌯 𑌭𑌵𑌿𑌷𑍍𑌯𑌤𑌿 ॥ 2 ॥
𑌇𑌤𑌿 𑌬𑍍𑌰𑍁𑌵𑌂𑌤𑌂 𑌰𑌾𑌜𑌾𑌨𑌮𑌨𑌯𑌨𑍍 𑌦𑍍𑌵𑌾𑌰𑌦𑌰𑍍𑌶𑌿𑌨𑌃 ।
𑌕𑍌𑌶𑌲𑍍𑌯𑌾𑌯𑌾 𑌗𑍃𑌹𑌂 𑌤𑌤𑍍𑌰 𑌨𑍍𑌯𑌵𑍇𑌶𑍍𑌯𑌤 𑌵𑌿𑌨𑍀𑌤𑌵𑌤𑍍 ॥ 2 ॥
𑌤𑌤𑌸𑍍𑌤𑌸𑍍𑌯 𑌪𑍍𑌰𑌵𑌿𑌷𑍍𑌟𑌸𑍍𑌯 𑌕𑍌𑌶𑌲𑍍𑌯𑌾𑌯𑌾 𑌨𑌿𑌵𑍇𑌶𑌨𑌮𑍍 ।
𑌅𑌧𑌿𑌰𑍁𑌹𑍍𑌯𑌾𑌪𑌿 𑌶𑌯𑌨𑌂 𑌬𑌭𑍂𑌵 𑌲𑍁𑌲𑌿𑌤𑌂 𑌮𑌨𑌃 ॥ 2 ॥
𑌪𑍁𑌤𑍍𑌰𑌦𑍍𑌵𑌯𑌵𑌿𑌹𑍀𑌨𑌂 𑌚 𑌸𑍍𑌨𑍁𑌷𑌯𑌾𑌪𑌿 𑌵𑌿𑌵𑌰𑍍𑌜𑌿𑌤𑌮𑍍 ।
𑌅𑌪𑌶𑍍𑌯𑌦𑍍𑌭𑌵𑌨𑌂 𑌰𑌾𑌜𑌾 𑌨𑌷𑍍𑌟𑌚𑌂𑌦𑍍𑌰𑌮𑌿𑌵𑌾𑌂𑌬𑌰𑌮𑍍 ॥ 30 ॥
𑌤𑌚𑍍𑌚 𑌦𑍃𑌷𑍍𑌟𑍍𑌵𑌾 𑌮𑌹𑌾𑌰𑌾𑌜𑍋 𑌭𑍁𑌜𑌮𑍁𑌦𑍍𑌯𑌮𑍍𑌯 𑌵𑍀𑌰𑍍𑌯𑌵𑌾𑌨𑍍 ।
𑌉𑌚𑍍𑌚𑍈𑌸𑍍𑌸𑍍𑌵𑌰𑍇𑌣 𑌚𑍁𑌕𑍍𑌰𑍋𑌶 𑌹𑌾 𑌰𑌾𑌘𑌵 𑌜𑌹𑌾𑌸𑌿 𑌮𑌾𑌮𑍍 ॥ 31 ॥
𑌸𑍁𑌖𑌿𑌤𑌾 𑌬𑌤 𑌤𑌂 𑌕𑌾𑌲𑌂 𑌜𑍀𑌵𑌿𑌷𑍍𑌯𑌂𑌤𑌿 𑌨𑌰𑍋𑌤𑍍𑌤𑌮𑌾𑌃 ।
𑌪𑌰𑌿𑌷𑍍𑌵𑌜𑌂𑌤𑍋 𑌯𑍇 𑌰𑌾𑌮𑌂 𑌦𑍍𑌰𑌕𑍍𑌷𑍍𑌯𑌂𑌤𑌿 𑌪𑍁𑌨𑌰𑌾𑌗𑌤𑌮𑍍 ॥ 32 ॥
𑌅𑌥 𑌰𑌾𑌤𑍍𑌰𑍍𑌯𑌾𑌂 𑌪𑍍𑌰𑌪𑌨𑍍𑌨𑌾𑌯𑌾𑌂 𑌕𑌾𑌲𑌰𑌾𑌤𑍍𑌰𑍍𑌯𑌾𑌮𑌿𑌵𑌾𑌤𑍍𑌮𑌨𑌃 ।
𑌅𑌰𑍍𑌧𑌰𑌾𑌤𑍍𑌰𑍇 𑌦𑌶𑌰𑌥𑌃 𑌕𑍌𑌶𑌲𑍍𑌯𑌾𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 33 ॥
𑌰𑌾𑌮𑌂 𑌮𑍇𑌽𑌨𑍁𑌗𑌤𑌾 𑌦𑍃𑌷𑍍𑌟𑌿𑌰𑌦𑍍𑌯𑌾𑌪𑌿 𑌨 𑌨𑌿𑌵𑌰𑍍𑌤𑌤𑍇 ।
𑌨 𑌤𑍍𑌵𑌾 𑌪𑌶𑍍𑌯𑌾𑌮𑌿 𑌕𑍌𑌸𑌲𑍍𑌯𑍇 𑌸𑌾𑌧𑍁 𑌮𑌾𑌂 𑌪𑌾𑌣𑌿𑌨𑌾 𑌸𑍍𑌪𑍃𑌶 ॥ 34 ॥
𑌤𑌂 𑌰𑌾𑌮𑌮𑍇𑌵𑌾𑌨𑍁𑌵𑌿𑌚𑌿𑌂𑌤𑌯𑌂𑌤𑌂 𑌸𑌮𑍀𑌕𑍍𑌷𑍍𑌯 𑌦𑍇𑌵𑍀 𑌶𑌯𑌨𑍇 𑌨𑌰𑍇𑌂𑌦𑍍𑌰𑌮𑍍 ।
𑌉𑌪𑍋𑌪𑌵𑌿𑌶𑍍𑌯𑌾𑌧𑌿𑌕𑌮𑌾𑌰𑍍𑌤𑌰𑍂𑌪𑌾 𑌵𑌿𑌨𑌿𑌶𑍍𑌵𑌸𑌂𑌤𑍀 𑌵𑌿𑌲𑌲𑌾𑌪 𑌕𑍃𑌚𑍍𑌛𑍍𑌰𑌮𑍍 ॥ 35 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌦𑍍𑌵𑌿𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
