VR 1.49 Bala Kanda - Sarga 49 - Grantha

Collection of Spiritual and Devotional Literature in Various Indian Languages

View this in:

1.4𑍯 𑌬𑌾𑌲𑌕𑌾𑌂𑌡 - 𑌏𑌕𑍋𑌨𑌪𑌂𑌚𑌾𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।

𑌅𑌫𑌲𑌸𑍍𑌤𑍁 𑌤𑌤𑌶𑍍𑌶𑌕𑍍𑌰𑍋 𑌦𑍇𑌵𑌾𑌨𑌗𑍍𑌨𑌿𑌪𑍁𑌰𑍋𑌗𑌮𑌾𑌨𑍍 ।
𑌅𑌬𑍍𑌰𑌵𑍀𑌤𑍍𑌤𑍍𑌰𑌸𑍍𑌤𑌵𑌦𑌨𑌸𑍍𑌸𑌰𑍍𑌷𑌿𑌸𑍍𑌸𑌂𑌘𑌾𑌨𑍍 𑌸𑌚𑌾𑌰𑌣𑌾𑌨𑍍 ॥ 1 ॥

𑌕𑍁𑌰𑍍𑌵𑌤𑌾 𑌤𑌪𑌸𑍋 𑌵𑌿𑌘𑍍𑌨𑌂 𑌗𑍌𑌤𑌮𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌕𑍍𑌰𑍋𑌧𑌮𑍁𑌤𑍍𑌪𑌾𑌦𑍍𑌯 𑌹𑌿 𑌮𑌯𑌾 𑌸𑍁𑌰𑌕𑌾𑌰𑍍𑌯𑌮𑌿𑌦𑌂 𑌕𑍃𑌤𑌮𑍍 ॥ 2 ॥

𑌅𑌫𑌲𑍋𑌽𑌸𑍍𑌮𑌿 𑌕𑍃𑌤𑌸𑍍𑌤𑍇𑌨 𑌕𑍍𑌰𑍋𑌧𑌾𑌤𑍍𑌸𑌾 𑌚 𑌨𑌿𑌰𑌾𑌕𑍃𑌤𑌾 ।
𑌶𑌾𑌪𑌮𑍋𑌕𑍍𑌷𑍇𑌣 𑌮𑌹𑌤𑌾 𑌤𑌪𑍋𑌽𑌸𑍍𑌯𑌾𑌪𑌹𑍃𑌤𑌂 𑌮𑌯𑌾 ॥ 3 ॥

𑌤𑌸𑍍𑌮𑌾𑌤𑍍𑌸𑍁𑌰𑌵𑌰𑌾𑌸𑍍𑌸𑌰𑍍𑌵𑍇 𑌸𑌰𑍍𑌷𑌿𑌸𑍍𑌸𑌂𑌘𑌾𑌸𑍍𑌸𑌚𑌾𑌰𑌣𑌾𑌃 ।
𑌸𑍁𑌰𑌸𑌾𑌹𑍍𑌯𑌕𑌰𑌂 𑌸𑌰𑍍𑌵𑍇 𑌸𑌫𑌲𑌂 𑌕𑌰𑍍𑌤𑍁𑌮𑌰𑍍𑌹𑌥 ॥ 4 ॥

𑌶𑌤𑌕𑍍𑌰𑌤𑍋𑌰𑍍𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌦𑍇𑌵𑌾𑌸𑍍𑌸𑌾𑌗𑍍𑌨𑌿𑌪𑍁𑌰𑍋𑌗𑌮𑌾𑌃 ।
𑌪𑌿𑌤𑍃𑌦𑍇𑌵𑌾𑌨𑍁𑌪𑍇𑌤𑍍𑌯𑌾𑌹𑍁 𑌸𑍍𑌸𑌹 𑌸𑌰𑍍𑌵𑍈𑌰𑍍𑌮𑌰𑍁𑌦𑍍𑌗𑌣𑍈𑌃 ॥ 5 ॥

𑌅𑌯𑌂 𑌮𑍇𑌷𑌸𑍍𑌸𑌵𑍃𑌷𑌣𑌶𑍍𑌶𑌕𑍍𑌰𑍋 𑌹𑍍𑌯𑌵𑍃𑌷𑌣𑌃 𑌕𑍃𑌤𑌃 ।
𑌮𑍇𑌷𑌸𑍍𑌯 𑌵𑍃𑌷𑌣𑍌 𑌗𑍃𑌹𑍍𑌯 𑌶𑌕𑍍𑌰𑌾𑌯𑌾𑌽𑌶𑍁 𑌪𑍍𑌰𑌯𑌚𑍍𑌛𑌥 ॥ 6 ॥

𑌅𑌫𑌲𑌸𑍍𑌤𑍁 𑌕𑍃𑌤𑍋 𑌮𑍇𑌷𑌃 𑌪𑌰𑌾𑌂 𑌤𑍁𑌷𑍍𑌟𑌿𑌂 𑌪𑍍𑌰𑌦𑌾𑌸𑍍𑌯𑌤𑌿 ।
𑌭𑌵𑌤𑌾𑌂 𑌹𑌰𑍍𑌷𑌣𑌾𑌰𑍍𑌥𑌾𑌯 𑌯𑍇 𑌚 𑌦𑌾𑌸𑍍𑌯𑌂𑌤𑌿 𑌮𑌾𑌨𑌵𑌾𑌃 ॥ 𑍭 ॥

𑌅𑌗𑍍𑌨𑍇𑌸𑍍𑌤𑍁 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌪𑌿𑌤𑍃𑌦𑍇𑌵𑌾𑌸𑍍𑌸𑌮𑌾𑌗𑌤𑌾𑌃 ।
𑌉𑌤𑍍𑌪𑌾𑌟𑍍𑌯 𑌮𑍇𑌷𑌵𑍃𑌷𑌣𑍌 𑌸𑌹𑌸𑍍𑌰𑌾𑌕𑍍𑌷𑍇 𑌨𑍍𑌯𑌵𑍇𑌶𑌯𑌨𑍍 ॥ 𑍮 ॥

𑌤𑌦𑌾 𑌪𑍍𑌰𑌭𑍃𑌤𑌿 𑌕𑌾𑌕𑍁𑌤𑍍𑌸𑍍𑌥 𑌪𑌿𑌤𑍃𑌦𑍇𑌵𑌾𑌸𑍍𑌸𑌮𑌾𑌗𑌤𑌾𑌃 ।
𑌅𑌫𑌲𑌾𑌨𑍍 𑌭𑍁𑌂𑌜𑌤𑍇 𑌮𑍇𑌷𑌾𑌨𑍍 𑌫𑌲𑍈𑌸𑍍𑌤𑍇𑌷𑌾𑌮𑌯𑍋𑌜𑌯𑌨𑍍 ॥ 𑍯 ॥

𑌇𑌂𑌦𑍍𑌰𑌸𑍍𑌤𑍁 𑌮𑍇𑌷𑌵𑍃𑌷𑌣𑌸𑍍𑌤𑌦𑌾𑌪𑍍𑌰𑌭𑍃𑌤𑌿 𑌰𑌾𑌘𑌵 ।
𑌗𑍌𑌤𑌮𑌸𑍍𑌯 𑌪𑍍𑌰𑌭𑌾𑌵𑍇𑌨 𑌤𑌪𑌸𑌶𑍍𑌚 𑌮𑌹𑌾𑌤𑍍𑌮𑌨𑌃 ॥ 10 ॥

𑌤𑌦𑌾𑌗𑌚𑍍𑌛 𑌮𑌹𑌾𑌤𑍇𑌜 𑌆𑌶𑍍𑌰𑌮𑌂 𑌪𑍁𑌣𑍍𑌯𑌕𑌰𑍍𑌮𑌣𑌃 ।
𑌤𑌾𑌰𑌯𑍈𑌨𑌾𑌂 𑌮𑌹𑌾𑌭𑌾𑌗𑌾𑌮𑌹𑌲𑍍𑌯𑌾𑌂 𑌦𑍇𑌵𑌰𑍂𑌪𑌿𑌣𑍀𑌮𑍍 ॥ 11 ॥

𑌵𑌿𑌶𑍍𑌵𑌾𑌮𑌿𑌤𑍍𑌰𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌰𑌾𑌘𑌵𑌸𑍍𑌸𑌹𑌲𑌕𑍍𑌷𑍍𑌮𑌣𑌃 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌂 𑌪𑍁𑌰𑌸𑍍𑌕𑍃𑌤𑍍𑌯 𑌤𑌮𑌾𑌶𑍍𑌰𑌮𑌮𑌥𑌾𑌵𑌿𑌶𑌤𑍍 ॥ 12 ॥

𑌦𑌦𑌰𑍍𑌶 𑌚 𑌮𑌹𑌾𑌭𑌾𑌗𑌾𑌂 𑌤𑌪𑌸𑌾 𑌦𑍍𑌯𑍋𑌤𑌿𑌤𑌪𑍍𑌰𑌭𑌾𑌮𑍍 ।
𑌲𑍋𑌕𑍈𑌰𑌪𑌿 𑌸𑌮𑌾𑌗𑌮𑍍𑌯 𑌦𑍁𑌰𑍍𑌨𑌿𑌰𑍀𑌕𑍍𑌷𑍍𑌯𑌾𑌂 𑌸𑍁𑌰𑌾𑌸𑍁𑌰𑍈𑌃 ॥ 13 ॥

𑌪𑍍𑌰𑌯𑌤𑍍𑌨𑌾𑌨𑍍𑌨𑌿𑌰𑍍𑌮𑌿𑌤𑌾𑌂 𑌧𑌾𑌤𑍍𑌰𑌾 𑌦𑌿𑌵𑍍𑌯𑌾𑌂 𑌮𑌾𑌯𑌾𑌮𑌯𑍀𑌮𑌿𑌵 ।
𑌸 𑌤𑍁𑌷𑌾𑌰𑌾𑌵𑍃𑌤𑌾𑌂 𑌸𑌾𑌭𑍍𑌰𑌾𑌂 𑌪𑍂𑌰𑍍𑌣𑌚𑌂𑌦𑍍𑌰𑌪𑍍𑌰𑌭𑌾𑌮𑌿𑌵 ॥ 14 ॥

𑌮𑌧𑍍𑌯𑍇𑌂𑌽𑌭𑌸𑍋 𑌦𑍁𑌰𑌾𑌧𑌰𑍍𑌷𑌾𑌂 𑌦𑍀𑌪𑍍𑌤𑌾𑌂 𑌸𑍂𑌰𑍍𑌯𑌪𑍍𑌰𑌭𑌾𑌮𑌿𑌵 ।
𑌸𑌾 𑌹𑌿 𑌗𑍌𑌤𑌮𑌵𑌾𑌕𑍍𑌯𑍇𑌨 𑌦𑍁𑌰𑍍𑌨𑌿𑌰𑍀𑌕𑍍𑌷𑍍𑌯𑌾 𑌬𑌭𑍂𑌵 𑌹 ॥ 15 ॥

𑌤𑍍𑌰𑌯𑌾𑌣𑌾𑌮𑌪𑌿 𑌲𑍋𑌕𑌾𑌨𑌾𑌂 𑌯𑌾𑌵𑌦𑍍𑌰𑌾𑌮𑌸𑍍𑌯 𑌦𑌰𑍍𑌶𑌨𑌮𑍍 ।
𑌶𑌾𑌪𑌸𑍍𑌯𑌾𑌂𑌤𑌮𑍁𑌪𑌾𑌗𑌮𑍍𑌯 𑌤𑍇𑌷𑌾𑌂 𑌦𑌰𑍍𑌶𑌨𑌮𑌾𑌗𑌤𑌾 ॥ 16 ॥

𑌰𑌾𑌘𑌵𑍌 𑌤𑍁 𑌤𑌤𑌸𑍍𑌤𑌸𑍍𑌯𑌾𑌃 𑌪𑌾𑌦𑍌 𑌜𑌗𑍃𑌹𑌤𑍁𑌸𑍍𑌤𑌦𑌾 ।
𑌸𑍍𑌮𑌰𑌂𑌤𑍀 𑌗𑍌𑌤𑌮𑌵𑌚𑌃 𑌪𑍍𑌰𑌤𑌿𑌜𑌗𑍍𑌰𑌾𑌹 𑌸𑌾 𑌚 𑌤𑍌 ॥ 1𑍭 ॥

𑌪𑌾𑌦𑍍𑌯𑌮𑌰𑍍𑌘𑍍𑌯𑌂 𑌤𑌥𑌾𑌽𑌽𑌤𑌿𑌥𑍍𑌯𑌂 𑌚𑌕𑌾𑌰 𑌸𑍁𑌸𑌮𑌾𑌹𑌿𑌤𑌾 ।
𑌪𑍍𑌰𑌤𑌿𑌜𑌗𑍍𑌰𑌾𑌹 𑌕𑌾𑌕𑍁𑌤𑍍𑌸𑍍𑌥𑍋 𑌵𑌿𑌧𑌿𑌦𑍃𑌷𑍍𑌟𑍇𑌨 𑌕𑌰𑍍𑌮𑌣𑌾 ॥ 1𑍮 ॥

𑌪𑍁𑌷𑍍𑌪𑌵𑍃𑌷𑍍𑌟𑌿𑌰𑍍𑌮𑌹𑌤𑍍𑌯𑌾𑌸𑍀𑌦𑍍𑌦𑍇𑌵𑌦𑍁𑌂𑌦𑍁𑌭𑌿𑌨𑌿𑌸𑍍𑌵𑌨𑍈𑌃 ।
𑌗𑌂𑌧𑌰𑍍𑌵𑌾𑌪𑍍𑌸𑌰𑌸𑌾𑌂 𑌚𑍈𑌵 𑌮𑌹𑌾𑌨𑌾𑌸𑍀𑌤𑍍𑌸𑌮𑌾𑌗𑌮𑌃 ॥ 1𑍯 ॥

𑌸𑌾𑌧𑍁 𑌸𑌾𑌧𑍍𑌵𑌿𑌤𑌿 𑌦𑍇𑌵𑌾𑌸𑍍𑌤𑌾𑌮𑌹𑌲𑍍𑌯𑌾𑌂 𑌸𑌮𑌪𑍂𑌜𑌯𑌨𑍍 ।
𑌤𑌪𑍋𑌬𑌲𑌵𑌿𑌶𑍁𑌦𑍍𑌧𑌾𑌂𑌗𑍀 𑌗𑍌𑌤𑌮𑌸𑍍𑌯 𑌵𑌶𑌾𑌨𑍁𑌗𑌾𑌮𑍍 ॥ 20 ॥

𑌗𑍌𑌤𑌮𑍋𑌽𑌪𑌿 𑌮𑌹𑌾𑌤𑍇𑌜𑌾 𑌅𑌹𑌲𑍍𑌯𑌾𑌸𑌹𑌿𑌤𑌸𑍍𑌸𑍁𑌖𑍀 ।
𑌰𑌾𑌮𑌂 𑌸𑌂𑌪𑍂𑌜𑍍𑌯 𑌵𑌿𑌧𑌿𑌵𑌤𑍍𑌤𑌪𑌸𑍍𑌤𑍇𑌪𑍇 𑌮𑌹𑌾𑌤𑌪𑌾𑌃 ॥ 21 ॥

𑌰𑌾𑌮𑍋𑌽𑌪𑌿 𑌪𑌰𑌮𑌾𑌂 𑌪𑍂𑌜𑌾𑌂 𑌗𑍌𑌤𑌮𑌸𑍍𑌯 𑌮𑌹𑌾𑌮𑍁𑌨𑍇𑌃 ।
𑌸𑌕𑌾𑌶𑌾𑌦𑍍𑌵𑌿𑌧𑌿𑌵𑌤𑍍𑌪𑍍𑌰𑌾𑌪𑍍𑌯 𑌜𑌗𑌾𑌮 𑌮𑌿𑌥𑌿𑌲𑌾𑌂 𑌤𑌤𑌃 ॥ 22 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌏𑌕𑍋𑌨𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥

Browse Related Categories: