𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌦𑌶𑌸𑍍𑌸𑌰𑍍𑌗𑌃 ।
𑌕𑍃𑌤𑌾𑌭𑌿𑌷𑍇𑌕𑍋 𑌰𑌾𑌮𑌸𑍍𑌤𑍁 𑌸𑍀𑌤𑌾 𑌸𑍌𑌮𑌿𑌤𑍍𑌰𑌿𑌰𑍇𑌵 𑌚 ।
𑌤𑌸𑍍𑌮𑌾𑌦𑍍𑌗𑍋𑌦𑌾𑌵𑌰𑍀𑌤𑍀𑌰𑌾𑌤𑍍𑌤𑌤𑍋 𑌜𑌗𑍍𑌮𑍁𑌸𑍍𑌵𑌮𑌾𑌶𑍍𑌰𑌮𑌮𑍍 ॥ 1 ॥
𑌆𑌶𑍍𑌰𑌮𑌂 𑌤𑌮𑍁𑌪𑌾𑌗𑌮𑍍𑌯 𑌰𑌾𑌘𑌵𑌸𑍍𑌸𑌹 𑌲𑌕𑍍𑌷𑍍𑌮𑌣𑌃 ।
𑌕𑍃𑌤𑍍𑌵𑌾 𑌪𑍌𑌰𑍍𑌵𑌾𑌹𑍍𑌣𑌿𑌕𑌂 𑌕𑌰𑍍𑌮 𑌪𑌰𑍍𑌣𑌶𑌾𑌲𑌾𑌮𑍁𑌪𑌾𑌗𑌮𑌤𑍍 ॥ 2 ॥
𑌉𑌵𑌾𑌸 𑌸𑍁𑌖𑌿𑌤𑌸𑍍𑌤𑌤𑍍𑌰 𑌪𑍂𑌜𑍍𑌯𑌮𑌾𑌨𑍋 𑌮𑌹𑌰𑍍𑌷𑌿𑌭𑌿𑌃 ।
𑌲𑌕𑍍𑌷𑍍𑌮𑌣𑍇𑌨 𑌸𑌹 𑌭𑍍𑌰𑌾𑌤𑍍𑌰𑌾 𑌚𑌕𑌾𑌰 𑌵𑌿𑌵𑌿𑌧𑌾𑌃 𑌕𑌥𑌾𑌃 ॥ 3 ॥
𑌸 𑌰𑌾𑌮𑌃 𑌪𑌰𑍍𑌣𑌶𑌾𑌲𑌾𑌯𑌾𑌮𑌾𑌸𑍀𑌨𑌸𑍍𑌸𑌹 𑌸𑍀𑌤𑌯𑌾 ।
𑌵𑌿𑌰𑌰𑌾𑌜 𑌮𑌹𑌾𑌬𑌾𑌹𑍁𑌶𑍍𑌚𑌿𑌤𑍍𑌰𑌯𑌾 𑌚𑌂𑌦𑍍𑌰𑌮𑌾𑌃 𑌇𑌵 ॥ 4 ॥
𑌤𑌦𑌾𑌽𑌽𑌸𑍀𑌨𑌸𑍍𑌯 𑌰𑌾𑌮𑌸𑍍𑌯 𑌕𑌥𑌾𑌸𑌂𑌸𑌕𑍍𑌤𑌚𑍇𑌤𑌸𑌃 ।
𑌤𑌂 𑌦𑍇𑌶𑌂 𑌰𑌾𑌕𑍍𑌷𑌸𑍀 𑌕𑌾𑌚𑌿𑌦𑌾𑌜𑌗𑌾𑌮 𑌯𑌦𑍃𑌚𑍍𑌛𑌯𑌾 ॥ 5 ॥
𑌸𑌾 𑌤𑍁 𑌶𑍂𑌰𑍍𑌪𑌣𑌖𑌾 𑌨𑌾𑌮 𑌦𑌶𑌗𑍍𑌰𑍀𑌵𑌸𑍍𑌯 𑌰𑌾𑌕𑍍𑌷𑌸𑌃 ।
𑌭𑌗𑌿𑌨𑍀 𑌰𑌾𑌮𑌮𑌾𑌸𑌾𑌦𑍍𑌯 𑌦𑌦𑌰𑍍𑌶 𑌤𑍍𑌰𑌿𑌦𑌶𑍋𑌪𑌮𑌮𑍍 ॥ 6 ॥
𑌸𑌿𑌂𑌹𑍋𑌰𑌸𑍍𑌕𑌂 𑌮𑌹𑌾𑌬𑌾𑌹𑍁𑌂 𑌪𑌦𑍍𑌮𑌪𑌤𑍍𑌰𑌨𑌿𑌭𑍇𑌕𑍍𑌷𑌣𑌮𑍍 ।
𑌆𑌜𑌾𑌨𑍁𑌬𑌾𑌹𑍁𑌂 𑌦𑍀𑌪𑍍𑌤𑌾𑌸𑍍𑌯𑌮𑌤𑍀𑌵 𑌪𑍍𑌰𑌿𑌯𑌦𑌰𑍍𑌶𑌨𑌮𑍍 ॥ ॥
𑌗𑌜𑌵𑌿𑌕𑍍𑌰𑌾𑌂𑌤𑌗𑌮𑌨𑌂 𑌜𑌟𑌾𑌮𑌂𑌡𑌲𑌧𑌾𑌰𑌿𑌣𑌮𑍍 ।
𑌸𑍁𑌕𑍁𑌮𑌾𑌰𑌂 𑌮𑌹𑌾𑌸𑌤𑍍𑌤𑍍𑌵𑌂 𑌪𑌾𑌰𑍍𑌥𑌿𑌵𑌵𑍍𑌯𑌂𑌜𑌨𑌾𑌨𑍍𑌵𑌿𑌤𑌮𑍍 ॥ ॥
𑌰𑌾𑌮𑌮𑌿𑌂𑌦𑍀𑌵𑌰𑌶𑍍𑌯𑌾𑌮𑌂 𑌕𑌂𑌦𑌰𑍍𑌪𑌸𑌦𑍃𑌶𑌪𑍍𑌰𑌭𑌮𑍍 ।
𑌬𑌭𑍂𑌵𑍇𑌂𑌦𑍍𑌰𑍋𑌪𑌮𑌂 𑌦𑍃𑌷𑍍𑌟𑍍𑌵𑌾 𑌰𑌾𑌕𑍍𑌷𑌸𑍀 𑌕𑌾𑌮𑌮𑍋𑌹𑌿𑌤𑌾 ॥ ॥
𑌸𑍁𑌮𑍁𑌖𑌂 𑌦𑍁𑌰𑍍𑌮𑍁𑌖𑍀 𑌰𑌾𑌮𑌂 𑌵𑍃𑌤𑍍𑌤𑌮𑌧𑍍𑌯𑌂 𑌮𑌹𑍋𑌦𑌰𑍀 ।
𑌵𑌿𑌶𑌾𑌲𑌾𑌕𑍍𑌷𑌂 𑌵𑌿𑌰𑍂𑌪𑌾𑌕𑍍𑌷𑍀 𑌸𑍁𑌕𑍇𑌶𑌂 𑌤𑌾𑌮𑍍𑌰𑌮𑍂𑌰𑍍𑌧𑌜𑌾 ॥ 10 ॥
𑌪𑍍𑌰𑍀𑌤𑌿𑌰𑍂𑌪𑌂 𑌵𑌿𑌰𑍂𑌪𑌾 𑌸𑌾 𑌸𑍁𑌸𑍍𑌵𑌰𑌂 𑌭𑍈𑌰𑌵𑌸𑍍𑌵𑌰𑌾 ।
𑌤𑌰𑍁𑌣𑌂 𑌦𑌾𑌰𑍁𑌣𑌾 𑌵𑍃𑌦𑍍𑌧𑌾 𑌦𑌕𑍍𑌷𑌿𑌣𑌂 𑌵𑌾𑌮𑌭𑌾𑌷𑌿𑌣𑍀 ॥ 11 ॥
𑌨𑍍𑌯𑌾𑌯𑌵𑍃𑌤𑍍𑌤𑌂 𑌸𑍁𑌦𑍁𑌰𑍍𑌵𑍃𑌤𑍍𑌤𑌾 𑌪𑍍𑌰𑌿𑌯𑌮𑌪𑍍𑌰𑌿𑌯𑌦𑌰𑍍𑌶𑌨𑌾 ।
𑌶𑌰𑍀𑌰𑌜𑌸𑌮𑌾𑌵𑌿𑌷𑍍𑌟𑌾 𑌰𑌾𑌕𑍍𑌷𑌸𑍀 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 12 ॥
𑌜𑌟𑍀 𑌤𑌾𑌪𑌸𑌰𑍂𑌪𑍇𑌣 𑌸𑌭𑌾𑌰𑍍𑌯𑌶𑍍𑌶𑌰𑌚𑌾𑌪𑌧𑍃𑌤𑍍 ।
𑌆𑌗𑌤𑌸𑍍𑌤𑍍𑌵𑌮𑌿𑌮𑌂 𑌦𑍇𑌶𑌂 𑌕𑌥𑌂 𑌰𑌾𑌕𑍍𑌷𑌸𑌸𑍇𑌵𑌿𑌤𑌮𑍍 ॥ 13 ॥
𑌕𑌿𑌮𑌾𑌗𑌮𑌨𑌕𑍃𑌤𑍍𑌯𑌂 𑌤𑍇 𑌤𑌤𑍍𑌤𑍍𑌵𑌮𑌾𑌖𑍍𑌯𑌾𑌤𑍁𑌮𑌰𑍍𑌹𑌸𑌿 ।
𑌏𑌵𑌮𑍁𑌕𑍍𑌤𑌸𑍍𑌤𑍁 𑌰𑌾𑌕𑍍𑌷𑌸𑍍𑌯𑌾 𑌶𑍂𑌰𑍍𑌪𑌣𑌖𑍍𑌯𑌾 𑌪𑌰𑌂𑌤𑌪𑌃 ॥ 14 ॥
𑌋𑌜𑍁𑌬𑍁𑌦𑍍𑌧𑌿𑌤𑌯𑌾 𑌸𑌰𑍍𑌵𑌮𑌾𑌖𑍍𑌯𑌾𑌤𑍁𑌮𑍁𑌪𑌚𑌕𑍍𑌰𑌮𑍇 ।
𑌅𑌨𑍃𑌤𑌂 𑌨 𑌹𑌿 𑌰𑌾𑌮𑌸𑍍𑌯 𑌕𑌦𑌾𑌚𑌿𑌦𑌪𑌿 𑌸𑌮𑍍𑌮𑌤𑌮𑍍 ॥ 15 ॥
𑌵𑌿𑌶𑍇𑌷𑍇𑌣𑌾𑌽𑌶𑍍𑌰𑌮𑌸𑍍𑌥𑌸𑍍𑌯 𑌸𑌮𑍀𑌪𑍇 𑌸𑍍𑌤𑍍𑌰𑍀𑌜𑌨𑌸𑍍𑌯 𑌚 ।
𑌆𑌸𑍀𑌦𑍍𑌧𑌶𑌰𑌥𑍋 𑌨𑌾𑌮 𑌰𑌾𑌜𑌾 𑌤𑍍𑌰𑌿𑌦𑌶𑌵𑌿𑌕𑍍𑌰𑌮𑌃 ॥ 16 ॥
𑌤𑌸𑍍𑌯𑌾𑌹𑌮𑌗𑍍𑌰𑌜𑌃 𑌪𑍁𑌤𑍍𑌰𑍋 𑌰𑌾𑌮𑍋 𑌨𑌾𑌮 𑌜𑌨𑍈𑌶𑍍𑌶𑍍𑌰𑍁𑌤𑌃 ।
𑌭𑍍𑌰𑌾𑌤𑌾𑌽𑌯𑌂 𑌲𑌕𑍍𑌷𑍍𑌮𑌣𑍋 𑌨𑌾𑌮 𑌯𑌵𑍀𑌯𑌾𑌨𑍍𑌮𑌾𑌮𑌨𑍁𑌵𑍍𑌰𑌤𑌃 ॥ 1 ॥
𑌇𑌯𑌂 𑌭𑌾𑌰𑍍𑌯𑌾 𑌚 𑌵𑍈𑌦𑍇𑌹𑍀 𑌮𑌮 𑌸𑍀𑌤𑍇𑌤𑌿 𑌵𑌿𑌶𑍍𑌰𑍁𑌤𑌾 ।
𑌨𑌿𑌯𑍋𑌗𑌾𑌤𑍍 𑌤𑍁 𑌨𑌰𑍇𑌂𑌦𑍍𑌰𑌸𑍍𑌯 𑌪𑌿𑌤𑍁𑌰𑍍𑌮𑌾𑌤𑍁𑌶𑍍𑌚 𑌯𑌂𑌤𑍍𑌰𑌿𑌤𑌃 ॥ 1 ॥
𑌧𑌰𑍍𑌮𑌾𑌰𑍍𑌥𑌂 𑌧𑌰𑍍𑌮𑌕𑌾𑌂𑌕𑍍𑌷𑍀 𑌚 𑌵𑌨𑌂 𑌵𑌸𑍍𑌤𑍁𑌮𑌿𑌹𑌾𑌗𑌤𑌃 ।
𑌤𑍍𑌵𑌾𑌂 𑌤𑍁 𑌵𑍇𑌦𑌿𑌤𑍁𑌮𑌿𑌚𑍍𑌛𑌾𑌮𑌿 𑌕𑌸𑍍𑌯 𑌤𑍍𑌵𑌂 𑌕𑌾𑌸𑌿 𑌕𑌸𑍍𑌯 𑌵𑌾 ॥ 1 ॥
𑌤𑍍𑌵𑌂 𑌹𑌿 𑌤𑌾𑌵𑌨𑍍𑌮𑌨𑍋𑌜𑍍𑌞𑌾𑌂𑌗𑍀 𑌰𑌾𑌕𑍍𑌷𑌸𑍀 𑌪𑍍𑌰𑌤𑌿𑌭𑌾𑌸𑌿 𑌮𑍇 ।
𑌇𑌹 𑌵𑌾 𑌕𑌿𑌂𑌨𑌿𑌮𑌿𑌤𑍍𑌤𑌂 𑌤𑍍𑌵𑌮𑌾𑌗𑌤𑌾 𑌬𑍍𑌰𑍂𑌹𑌿 𑌤𑌤𑍍𑌤𑍍𑌵𑌤𑌃 ॥ 20 ॥
𑌸𑌾𑌬𑍍𑌰𑌵𑍀𑌦𑍍 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌰𑌾𑌕𑍍𑌷𑌸𑍀 𑌮𑌦𑌨𑌾𑌰𑍍𑌦𑌿𑌤𑌾 ।
𑌶𑍍𑌰𑍂𑌯𑌤𑌾𑌂 𑌰𑌾𑌮 𑌵𑌕𑍍𑌷𑍍𑌯𑌾𑌮𑌿 𑌤𑌤𑍍𑌤𑍍𑌵𑌾𑌰𑍍𑌥𑌂 𑌵𑌚𑌨𑌂 𑌮𑌮 ॥ 21 ॥
𑌅𑌹𑌂 𑌶𑍂𑌰𑍍𑌪𑌣𑌖𑌾 𑌨𑌾𑌮 𑌰𑌾𑌕𑍍𑌷𑌸𑍀 𑌕𑌾𑌮𑌰𑍂𑌪𑌿𑌣𑍀 ।
𑌅𑌰𑌣𑍍𑌯𑌂 𑌵𑌿𑌚𑌰𑌾𑌮𑍀𑌦𑌮𑍇𑌕𑌾 𑌸𑌰𑍍𑌵𑌭𑌯𑌂𑌕𑌰𑌾 ॥ 22 ॥
𑌰𑌾𑌵𑌣𑍋 𑌨𑌾𑌮 𑌮𑍇 𑌭𑍍𑌰𑌾𑌤𑌾 𑌬𑌲𑍀𑌯𑌾𑌨𑍍𑌰𑌾𑌕𑍍𑌷𑌸𑍇𑌶𑍍𑌵𑌰𑌃 ।
𑌵𑍀𑌰𑍋 𑌵𑌿𑌶𑍍𑌰𑌵𑌸𑌃 𑌪𑍁𑌤𑍍𑌰𑍋 𑌯𑌦𑌿 𑌤𑍇 𑌶𑍍𑌰𑍋𑌤𑍍𑌰𑌮𑌾𑌗𑌤𑌃 ॥ 23 ॥
𑌪𑍍𑌰𑌵𑍃𑌦𑍍𑌧𑌨𑌿𑌦𑍍𑌰𑌶𑍍𑌚 𑌸𑌦𑌾 𑌕𑍁𑌂𑌭𑌕𑌰𑍍𑌣𑍋 𑌮𑌹𑌾𑌬𑌲𑌃 ।
𑌵𑌿𑌭𑍀𑌷𑌣𑌸𑍍𑌤𑍁 𑌧𑌰𑍍𑌮𑌾𑌤𑍍𑌮𑌾 𑌨 𑌤𑍁 𑌰𑌾𑌕𑍍𑌷𑌸𑌚𑍇𑌷𑍍𑌟𑌿𑌤𑌃 ॥ 24 ॥
𑌪𑍍𑌰𑌖𑍍𑌯𑌾𑌤𑌵𑍀𑌰𑍍𑌯𑍌 𑌚 𑌰𑌣𑍇 𑌭𑍍𑌰𑌾𑌤𑌰𑍌 𑌖𑌰𑌦𑍂𑌷𑌣𑍌 ।
𑌤𑌾𑌨𑌹𑌂 𑌸𑌮𑌤𑌿𑌕𑍍𑌰𑌾𑌂𑌤𑌾 𑌰𑌾𑌮 𑌤𑍍𑌵𑌾 𑌪𑍂𑌰𑍍𑌵𑌦𑌰𑍍𑌶𑌨𑌾𑌤𑍍 ॥ 25 ॥
𑌸𑌮𑍁𑌪𑍇𑌤𑌾𑌸𑍍𑌮𑌿 𑌭𑌾𑌵𑍇𑌨 𑌭𑌰𑍍𑌤𑌾𑌰𑌂 𑌪𑍁𑌰𑍁𑌷𑍋𑌤𑍍𑌤𑌮𑌮𑍍 ।
𑌅𑌹𑌂 𑌪𑍍𑌰𑌭𑌾𑌵𑌸𑌂𑌪𑌨𑍍𑌨𑌾 𑌸𑍍𑌵𑌚𑍍𑌛𑌂𑌦𑌬𑌲𑌗𑌾𑌮𑌿𑌨𑍀 ॥ 26 ॥
𑌚𑌿𑌰𑌾𑌯 𑌭𑌵 𑌮𑍇 𑌭𑌰𑍍𑌤𑌾 𑌸𑍀𑌤𑌯𑌾 𑌕𑌿𑌂 𑌕𑌰𑌿𑌷𑍍𑌯𑌸𑌿 ।
𑌵𑌿𑌕𑍃𑌤𑌾 𑌚 𑌵𑌿𑌰𑍂𑌪𑌾 𑌚 𑌨 𑌚𑍇𑌯𑌂 𑌸𑌦𑍃𑌶𑍀 𑌤𑌵 ॥ 2 ॥
𑌅𑌹𑌮𑍇𑌵𑌾𑌨𑍁𑌰𑍂𑌪𑌾 𑌤𑍇 𑌭𑌾𑌰𑍍𑌯𑌾 𑌰𑍂𑌪𑍇𑌣 𑌪𑌶𑍍𑌯 𑌮𑌾𑌮𑍍 ।
𑌇𑌮𑌾𑌂 𑌵𑌿𑌰𑍂𑌪𑌾𑌮𑌸𑌤𑍀𑌂 𑌕𑌰𑌾𑌲𑌾𑌂 𑌨𑌿𑌰𑍍𑌣𑌤𑍋𑌦𑌰𑍀𑌮𑍍 ॥ 2 ॥
𑌅𑌨𑍇𑌨 𑌤𑍇 𑌸𑌹 𑌭𑍍𑌰𑌾𑌤𑍍𑌰𑌾 𑌭𑌕𑍍𑌷𑌯𑌿𑌷𑍍𑌯𑌾𑌮𑌿 𑌮𑌾𑌨𑍁𑌷𑍀𑌮𑍍 ।
𑌤𑌤𑌃 𑌪𑌰𑍍𑌵𑌤𑌶𑍃𑌂𑌗𑌾𑌣𑌿 𑌵𑌨𑌾𑌨𑌿 𑌵𑌿𑌵𑌿𑌧𑌾𑌨𑌿 𑌚 ॥ 2 ॥
𑌪𑌶𑍍𑌯𑌨𑍍𑌸𑌹 𑌮𑌯𑌾 𑌕𑌾𑌂𑌤 𑌦𑌂𑌡𑌕𑌾𑌨𑍍𑌵𑌿𑌚𑌰𑌿𑌷𑍍𑌯𑌸𑌿 ।
𑌇𑌤𑍍𑌯𑍇𑌵𑌮𑍁𑌕𑍍𑌤𑌃 𑌕𑌾𑌕𑍁𑌤𑍍𑌸𑍍𑌥𑌃 𑌪𑍍𑌰𑌹𑌸𑍍𑌯 𑌮𑌦𑌿𑌰𑍇𑌕𑍍𑌷𑌣𑌾𑌮𑍍 ॥ 30 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌸𑌪𑍍𑌤𑌦𑌶𑌸𑍍𑌸𑌰𑍍𑌗𑌃 ॥
