𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌸𑌮𑍀𑌕𑍍𑌷𑍍𑌯 𑌵𑌿𑌮𑌲𑌂 𑌵𑍍𑌯𑍋𑌮 𑌗𑌤𑌵𑌿𑌦𑍍𑌯𑍁𑌦𑍍𑌵𑌲𑌾𑌹𑌕𑌮𑍍 ।
𑌸𑌾𑌰𑌸𑌾𑌕𑍁𑌲𑌸𑌂𑌘𑍁𑌷𑍍𑌟𑌂 𑌰𑌮𑍍𑌯𑌜𑍍𑌯𑍋𑌤𑍍𑌸𑍍𑌨𑌾𑌨𑍁𑌲𑍇𑌪𑌨𑌮𑍍 ॥ 1 ॥
𑌸𑌮𑍃𑌦𑍍𑌧𑌾𑌰𑍍𑌥𑌂 𑌚 𑌸𑍁𑌗𑍍𑌰𑍀𑌵𑌂 𑌮𑌂𑌦𑌧𑌰𑍍𑌮𑌾𑌰𑍍𑌥𑌸𑌂𑌗𑍍𑌰𑌹𑌮𑍍 ।
𑌅𑌤𑍍𑌯𑌰𑍍𑌥𑌮𑌸𑌤𑌾𑌂 𑌮𑌾𑌰𑍍𑌗𑌮𑍇𑌕𑌾𑌂𑌤𑌗𑌤𑌮𑌾𑌨𑌸𑌮𑍍 ॥ 2 ॥
𑌨𑌿𑌰𑍍𑌵𑍃𑌤𑍍𑌤𑌕𑌾𑌰𑍍𑌯𑌂 𑌸𑌿𑌦𑍍𑌧𑌾𑌰𑍍𑌥𑌂 𑌪𑍍𑌰𑌮𑌦𑌾𑌭𑌿𑌰𑌤𑌂 𑌸𑌦𑌾 ।
𑌪𑍍𑌰𑌾𑌪𑍍𑌤𑌵𑌂𑌤𑌮𑌭𑌿𑌪𑍍𑌰𑍇𑌤𑌾𑌨𑍍𑌸𑌰𑍍𑌵𑌾𑌨𑍇𑌵 𑌮𑌨𑍋𑌰𑌥𑌾𑌨𑍍 ॥ 3 ॥
𑌸𑍍𑌵𑌾𑌂 𑌚 𑌪𑌤𑍍𑌨𑍀𑌮𑌭𑌿𑌪𑍍𑌰𑍇𑌤𑌾𑌂 𑌤𑌾𑌰𑌾𑌂 𑌚𑌾𑌪𑌿 𑌸𑌮𑍀𑌪𑍍𑌸𑌿𑌤𑌾𑌮𑍍 ।
𑌵𑌿𑌹𑌰𑌂𑌤𑌮𑌹𑍋𑌰𑌾𑌤𑍍𑌰𑌂 𑌕𑍃𑌤𑌾𑌰𑍍𑌥𑌂 𑌵𑌿𑌗𑌤𑌜𑍍𑌵𑌰𑌮𑍍 ॥ 4 ॥
𑌕𑍍𑌰𑍀𑌡𑌂𑌤𑌮𑌿𑌵 𑌦𑍇𑌵𑍇𑌶𑌂 𑌨𑌂𑌦𑌨𑍇𑌽𑌪𑍍𑌸𑌰𑌸𑌾𑌂 𑌗𑌣𑍈𑌃 ।
𑌮𑌂𑌤𑍍𑌰𑌿𑌷𑍁 𑌨𑍍𑌯𑌸𑍍𑌤𑌕𑌾𑌰𑍍𑌯𑌂 𑌚 𑌮𑌂𑌤𑍍𑌰𑌿𑌣𑌾𑌮𑌨𑌵𑍇𑌕𑍍𑌷𑌕𑌮𑍍 ॥ 5 ॥
𑌉𑌤𑍍𑌸𑌨𑍍𑌨𑌰𑌾𑌜𑍍𑌯𑌸𑌂𑌦𑍇𑌶𑌂 𑌕𑌾𑌮𑌵𑍃𑌤𑍍𑌤𑌮𑌵𑌸𑍍𑌥𑌿𑌤𑌮𑍍 ।
𑌨𑌿𑌶𑍍𑌚𑌿𑌤𑌾𑌰𑍍𑌥𑍋𑌽𑌰𑍍𑌥𑌤𑌤𑍍𑌤𑍍𑌵𑌜𑍍𑌞𑌃 𑌕𑌾𑌲𑌧𑌰𑍍𑌮𑌵𑌿𑌶𑍇𑌷𑌵𑌿𑌤𑍍 ॥ 6 ॥
𑌪𑍍𑌰𑌸𑌾𑌦𑍍𑌯 𑌵𑌾𑌕𑍍𑌯𑍈𑌰𑍍𑌮𑌧𑍁𑌰𑍈𑌰𑍍𑌹𑍇𑌤𑍁𑌮𑌦𑍍𑌭𑌿𑌰𑍍𑌮𑌨𑍋𑌰𑌮𑍈𑌃 ।
𑌵𑌾𑌕𑍍𑌯𑌵𑌿𑌦𑍍𑌵𑌾𑌕𑍍𑌯 𑌤𑌤𑍍𑌤𑍍𑌵𑌜𑍍𑌞𑌂 𑌹𑌰𑍀𑌶𑌂 𑌮𑌾𑌰𑍁𑌤𑌾𑌤𑍍𑌮𑌜𑌃 ॥ ॥
𑌹𑌿𑌤𑌂 𑌤𑌤𑍍𑌤𑍍𑌵𑌂 𑌚 𑌪𑌥𑍍𑌯𑌂 𑌚 𑌸𑌾𑌮𑌧𑌰𑍍𑌮𑌾𑌰𑍍𑌥𑌨𑍀𑌤𑌿𑌮𑌤𑍍 ।
𑌪𑍍𑌰𑌣𑌯𑌪𑍍𑌰𑍀𑌤𑌿𑌸𑌂𑌯𑍁𑌕𑍍𑌤𑌂 𑌵𑌿𑌶𑍍𑌵𑌾𑌸𑌕𑍃𑌤𑌨𑌿𑌶𑍍𑌚𑌯𑌮𑍍 ।
𑌹𑌰𑍀𑌶𑍍𑌵𑌰𑌮𑍁𑌪𑌾𑌗𑌮𑍍𑌯 𑌹𑌨𑍂𑌮𑌾𑌨𑍍𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ ॥
𑌰𑌾𑌜𑍍𑌯𑌂 𑌪𑍍𑌰𑌾𑌪𑍍𑌤𑌂 𑌯𑌶𑌶𑍍𑌚𑍈𑌵 𑌕𑍌𑌲𑍀 𑌶𑍍𑌰𑍀𑌰𑌭𑌿𑌵𑌰𑍍𑌧𑌿𑌤𑌾 ।
𑌮𑌿𑌤𑍍𑌰𑌾𑌣𑌾𑌂 𑌸𑌂𑌗𑍍𑌰𑌹𑌶𑍍𑌶𑍇𑌷𑌸𑍍𑌤𑌂 𑌭𑌵𑌾𑌨𑍍𑌕𑌰𑍍𑌤𑍁𑌮𑌰𑍍𑌹𑌤𑌿 ॥ ॥
𑌯𑍋 𑌹𑌿 𑌮𑌿𑌤𑍍𑌰𑍇𑌷𑍁 𑌕𑌾𑌲𑌜𑍍𑌞𑌸𑍍𑌸𑌤𑌤𑌂 𑌸𑌾𑌧𑍁 𑌵𑌰𑍍𑌤𑌤𑍇 ॥ 10 ॥
𑌤𑌸𑍍𑌯 𑌰𑌾𑌜𑍍𑌯𑌂 𑌚 𑌕𑍀𑌰𑍍𑌤𑌿𑌶𑍍𑌚 𑌪𑍍𑌰𑌤𑌾𑌪𑌶𑍍𑌚𑌾𑌭𑌿 𑌵𑌰𑍍𑌧𑌤𑍇 ।
𑌯𑌸𑍍𑌯 𑌕𑍋𑌶𑌶𑍍𑌚 𑌦𑌂𑌡𑌶𑍍𑌚 𑌮𑌿𑌤𑍍𑌰𑌾𑌣𑍍𑌯𑌾𑌤𑍍𑌮𑌾 𑌚 𑌭𑍂𑌮𑌿𑌪 ॥ 11 ॥
𑌸𑌮𑌵𑍇𑌤𑌾𑌨𑌿 𑌸𑌰𑍍𑌵𑌾𑌣𑌿 𑌸 𑌰𑌾𑌜𑍍𑌯𑌂 𑌮𑌹𑌦𑌶𑍍𑌨𑍁𑌤𑍇 ।
𑌤𑌦𑍍𑌭𑌵𑌾𑌨𑍍𑌵𑍃𑌤𑍍𑌤𑌸𑌂𑌪𑌨𑍍𑌨𑌃 𑌸𑍍𑌥𑌿𑌤𑌃 𑌪𑌥𑌿 𑌨𑌿𑌰𑌤𑍍𑌯𑌯𑍇 ॥ 12 ॥
𑌮𑌿𑌤𑍍𑌰𑌾𑌰𑍍𑌥𑌮𑌭𑌿𑌨𑍀𑌤𑌾𑌰𑍍𑌥𑌂 𑌯𑌥𑌾𑌵𑌤𑍍𑌕𑌰𑍍𑌤𑍁𑌮𑌰𑍍𑌹𑌤𑌿 ।
𑌸𑌂𑌤𑍍𑌯𑌜𑍍𑌯 𑌸𑌰𑍍𑌵𑌕𑌰𑍍𑌮𑌾𑌣𑌿 𑌮𑌿𑌤𑍍𑌰𑌾𑌰𑍍𑌥𑍇 𑌯𑍋𑌽𑌨𑍁𑌵𑌰𑍍𑌤𑌤𑍇 ॥ 13 ॥
𑌸𑌂𑌭𑍍𑌰𑌮𑌾𑌦𑍍𑌧𑌿 𑌕𑍃𑌤𑍋𑌤𑍍𑌸𑌾𑌹𑌸𑍍𑌸𑍋𑌽𑌨𑌰𑍍𑌥𑍈𑌰𑍍𑌨𑌾𑌵𑌰𑍁𑌧𑍍𑌯𑌤𑍇 ।
𑌯𑌸𑍍𑌤𑍁 𑌕𑌾𑌲𑌵𑍍𑌯𑌤𑍀𑌤𑍇𑌷𑍁 𑌮𑌿𑌤𑍍𑌰𑌕𑌾𑌰𑍍𑌯𑍇𑌷𑍁 𑌵𑌰𑍍𑌤𑌤𑍇 ॥ 14 ॥
𑌸 𑌕𑍃𑌤𑍍𑌵𑌾 𑌮𑌹𑌤𑍋𑌽𑌪𑍍𑌯𑌰𑍍𑌥𑌾𑌨𑍍𑌨 𑌮𑌿𑌤𑍍𑌰𑌾𑌰𑍍𑌥𑍇𑌨 𑌯𑍁𑌜𑍍𑌯𑌤𑍇 ।
𑌯𑌦𑌿𑌦𑌂 𑌮𑌿𑌤𑍍𑌰𑌕𑌾𑌰𑍍𑌯𑌂 𑌵𑍀𑌰 𑌨𑍋𑌮𑌿𑌤𑍍𑌰𑌕𑌾𑌰𑍍𑌯𑌮𑌰𑌿𑌂𑌦𑌮 ॥ 15 ॥
𑌕𑍍𑌰𑌿𑌯𑌤𑌾𑌂 𑌰𑌾𑌘𑌵𑌸𑍍𑌯𑍈𑌤𑌦𑍍𑌵𑍈𑌦𑍇𑌹𑍍𑌯𑌾𑌃 𑌪𑌰𑌿𑌮𑌾𑌰𑍍𑌗𑌣𑌮𑍍 ।
𑌤𑌦𑌿𑌦𑌂 𑌵𑍀𑌰 𑌕𑌾𑌰𑍍𑌯𑌂 𑌤𑍇 𑌕𑌾𑌲𑌾𑌤𑍀𑌤𑌮𑌰𑌿𑌂𑌦𑌮 ॥ 16 ॥
𑌨 𑌚 𑌕𑌾𑌲𑌮𑌤𑍀𑌤𑌂 𑌤𑍇 𑌨𑌿𑌵𑍇𑌦𑌯𑌤𑌿 𑌕𑌾𑌲𑌵𑌿𑌤𑍍 ।
𑌤𑍍𑌵𑌰𑌮𑌾𑌣𑍋𑌽𑌪𑌿 𑌸𑌨𑍍𑌪𑍍𑌰𑌾𑌜𑍍𑌞𑌸𑍍𑌤𑌵 𑌰𑌾𑌜𑌨𑍍𑌵𑌶𑌾𑌨𑍁𑌗𑌃 ॥ 1 ॥
𑌕𑍁𑌲𑌸𑍍𑌯 𑌹𑍇𑌤𑍁𑌃 𑌸𑍍𑌫𑍀𑌤𑌸𑍍𑌯 𑌦𑍀𑌰𑍍𑌘𑌬𑌂𑌧𑍁𑌶𑍍𑌚 𑌰𑌾𑌘𑌵𑌃 ।
𑌅𑌪𑍍𑌰𑌮𑍇𑌯𑌪𑍍𑌰𑌭𑌾𑌵𑌶𑍍𑌚 𑌸𑍍𑌵𑌯𑌂 𑌚𑌾𑌪𑍍𑌰𑌤𑌿𑌮𑍋 𑌗𑍁𑌣𑍈𑌃 ॥ 1 ॥
𑌤𑌸𑍍𑌯 𑌤𑍍𑌵𑌂 𑌕𑍁𑌰𑍁 𑌵𑍈 𑌕𑌾𑌰𑍍𑌯𑌂 𑌪𑍂𑌰𑍍𑌵𑌂 𑌤𑍇𑌨 𑌕𑍃𑌤𑌂 𑌤𑌵 ।
𑌹𑌰𑍀𑌶𑍍𑌵𑌰 𑌕𑌪𑌿𑌶𑍍𑌰𑍇𑌷𑍍𑌠𑌾𑌨𑌾𑌜𑍍𑌞𑌾𑌪𑌯𑌿𑌤𑍁𑌮𑌰𑍍𑌹𑌸𑌿 ॥ 1 ॥
𑌨 𑌹𑌿 𑌤𑌾𑌵𑌦𑍍𑌭𑌵𑍇𑌤𑍍𑌕𑌾𑌲𑍋 𑌵𑍍𑌯𑌤𑍀𑌤𑌶𑍍𑌚𑍋𑌦𑌨𑌾𑌦𑍃𑌤𑍇 ।
𑌚𑍋𑌦𑌿𑌤𑌸𑍍𑌯 𑌹𑌿 𑌕𑌾𑌰𑍍𑌯𑌸𑍍𑌯 𑌭𑌵𑍇𑌤𑍍𑌕𑌾𑌲𑌵𑍍𑌯𑌤𑌿𑌕𑍍𑌰𑌮𑌃 ॥ 20 ॥
𑌅𑌕𑌰𑍍𑌤𑍁𑌰𑌪𑌿 𑌕𑌾𑌰𑍍𑌯𑌸𑍍𑌯 𑌭𑌵𑌾𑌨𑍍𑌕𑌰𑍍𑌤𑌾 𑌹𑌰𑍀𑌶𑍍𑌵𑌰 𑌕𑌿𑌂 𑌪𑍁𑌨𑌃 𑌪𑍍𑌰𑌤𑌿𑌕𑌰𑍍𑌤𑍁𑌸𑍍𑌤𑍇 𑌰𑌾𑌜𑍍𑌯𑍇𑌨 𑌚 𑌧𑌨𑍇𑌨 𑌚 ॥ 21 ॥
𑌶𑌕𑍍𑌤𑌿𑌮𑌾𑌨𑌪𑌿𑌵𑌿𑌕𑍍𑌰𑌾𑌂𑌤𑍋 𑌵𑌾𑌨𑌰𑌰𑍍𑌕𑍍𑌷𑌗𑌣𑍇𑌶𑍍𑌵𑌰 ।
𑌕𑌰𑍍𑌤𑍁𑌂 𑌦𑌾𑌶𑌰𑌥𑍇𑌃 𑌪𑍍𑌰𑍀𑌤𑌿𑌮𑌾𑌜𑍍𑌞𑌾𑌯𑌾𑌂 𑌕𑌿𑌨𑍍𑌨 𑌸𑌜𑍍𑌜𑌸𑍇 ॥ 22 ॥
𑌕𑌾𑌮𑌂 𑌖𑌲𑍁 𑌶𑌰𑍈𑌶𑍍𑌶𑌕𑍍𑌤𑌸𑍍𑌸𑍁𑌰𑌾𑌸𑍁𑌰𑌮𑌹𑍋𑌰𑌗𑌾𑌨𑍍 ।
𑌵𑌶𑍇 𑌦𑌾𑌶𑌰𑌥𑌿𑌃 𑌕𑌰𑍍𑌤𑍁𑌂 𑌤𑍍𑌵𑌤𑍍𑌪𑍍𑌰𑌤𑌿𑌜𑍍𑌞𑌾𑌂 𑌹𑌿 𑌕𑌾𑌂𑌕𑍍𑌷𑌤𑍇 ॥ 23 ॥
𑌪𑍍𑌰𑌾𑌣𑌤𑍍𑌯𑌾𑌗𑌾𑌵𑌿𑌶𑌂𑌕𑍇𑌨 𑌕𑍃𑌤𑌂 𑌤𑍇𑌨 𑌤𑌵𑌪𑍍𑌰𑌿𑌯𑌮𑍍 ।
𑌤𑌸𑍍𑌯 𑌮𑌾𑌰𑍍𑌗𑌾𑌮 𑌵𑍈𑌦𑍇𑌹𑍀𑌂 𑌪𑍃𑌥𑌿𑌵𑍍𑌯𑌾𑌮𑌪𑌿 𑌚𑌾𑌂𑌬𑌰𑍇 ॥ 24 ॥
𑌦𑍇𑌵𑌦𑌾𑌨𑌵 𑌗𑌂𑌧𑌰𑍍𑌵𑌾 𑌨𑌸𑍁𑌰𑌾𑌸𑍍𑌸𑌮𑌰𑍁𑌦𑍍𑌗𑌣𑌾𑌃 ।
𑌨 𑌚 𑌯𑌕𑍍𑌷𑌾 𑌭𑌯𑌂 𑌤𑌸𑍍𑌯 𑌕𑍁𑌰𑍍𑌯𑍁𑌃 𑌕𑌿𑌮𑍁𑌤 𑌰𑌾𑌕𑍍𑌷𑌸𑌾𑌃 ॥ 25 ॥
𑌤𑌦𑍇𑌵𑌂 𑌶𑌕𑍍𑌤𑌿𑌯𑍁𑌕𑍍𑌤𑌸𑍍𑌯 𑌪𑍂𑌰𑍍𑌵𑌂 𑌪𑍍𑌰𑌿𑌯𑌕𑍃𑌤𑌸𑍍𑌤𑌵 ।
𑌰𑌾𑌮𑌸𑍍𑌯𑌾𑌰𑍍𑌹𑌸𑌿 𑌪𑌿𑌂𑌗𑍇𑌶 𑌕𑌰𑍍𑌤𑍁𑌂 𑌸𑌰𑍍𑌵𑌾𑌤𑍍𑌮𑌨𑌾 𑌪𑍍𑌰𑌿𑌯𑌮𑍍 ॥ 26 ॥
𑌨𑌾𑌧𑌸𑍍𑌤𑌾𑌦𑌵𑌨𑍌 𑌨𑌾𑌪𑍍𑌸𑍁 𑌗𑌤𑌿𑌰𑍍𑌨𑍋𑌪𑌰𑌿 𑌚𑌾𑌂𑌬𑌰𑍇 ।
𑌕𑌸𑍍𑌯𑌚𑌿𑌤𑍍𑌸𑌜𑍍𑌜𑌤𑍇𑌽𑌸𑍍𑌮𑌾𑌕𑌂 𑌕𑌪𑍀𑌶𑍍𑌵𑌰 𑌤𑌵𑌾𑌜𑍍𑌞𑌯𑌾 ॥ 2 ॥
𑌤𑌦𑌾𑌜𑍍𑌞𑌾𑌪𑌯 𑌕𑌃 𑌕𑌿𑌂 𑌤𑍇 𑌕𑍁𑌤𑍋 𑌵𑌾𑌪𑌿 𑌵𑍍𑌯𑌵𑌸𑍍𑌯𑌤𑍁 ।
𑌹𑌰𑌯𑍋𑌽𑌹𑍍𑌯𑌪𑍍𑌰𑌧𑍃𑌷𑍍𑌯𑌾𑌸𑍍𑌤𑍇 𑌸𑌂𑌤𑌿 𑌕𑍋𑌟𑍍𑌯𑌗𑍍𑌰𑌤𑍋𑌽𑌨𑌘 ॥ 2 ॥
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌕𑌾𑌲𑍇 𑌸𑌾𑌧𑍁 𑌨𑌿𑌵𑍇𑌦𑌨𑌮𑍍 ।
𑌸𑍁𑌗𑍍𑌰𑍀𑌵𑌸𑍍𑌸𑌤𑍍𑌤𑍍𑌵𑌸𑌂𑌪𑌨𑍍𑌨𑌶𑍍𑌚𑌕𑌾𑌰 𑌮𑌤𑌿𑌮𑍁𑌤𑍍𑌤𑌮𑌾𑌮𑍍 ॥ 2 ॥
𑌸 𑌸𑌂𑌦𑌿𑌦𑍇𑌶𑌾𑌭𑌿𑌮𑌤𑌂 𑌨𑍀𑌲𑌂 𑌨𑌿𑌤𑍍𑌯𑌕𑍃𑌤𑍋𑌦𑍍𑌯𑌮𑌮𑍍 ।
𑌦𑌿𑌕𑍍𑌷𑍁 𑌸𑌰𑍍𑌵𑌾𑌸𑍁 𑌸𑌰𑍍𑌵𑍇𑌷𑌾𑌂 𑌸𑍈𑌨𑍍𑌯𑌾𑌨𑌾𑌮𑍁𑌪𑌸𑌂𑌗𑍍𑌰𑌹𑍇 ॥ 30 ॥
𑌯𑌥𑌾 𑌸𑍇𑌨𑌾 𑌸𑌮𑌗𑍍𑌰𑌾 𑌮𑍇 𑌯𑍂𑌥𑌪𑌾𑌲𑌾𑌶𑍍𑌚 𑌸𑌰𑍍𑌵𑌶𑌃 ।
𑌸𑌮𑌾𑌗𑌚𑍍𑌛𑌂𑌤𑍍𑌯𑌸𑌂𑌗𑍇𑌨 𑌸𑍇𑌨𑌾𑌗𑍍𑌰𑌾𑌣𑌿 𑌤𑌥𑌾 𑌕𑍁𑌰𑍁 ॥ 31 ॥
𑌯𑍇 𑌤𑍍𑌵𑌂𑌤𑌪𑌾𑌲𑌾𑌃 𑌪𑍍𑌲𑌵𑌗𑌾𑌶𑍍𑌶𑍀𑌘𑍍𑌰𑌗𑌾 𑌵𑍍𑌯𑌵𑌸𑌾𑌯𑌿𑌨𑌃 ।
𑌸𑌮𑌾𑌨𑌯𑌂𑌤𑍁 𑌤𑍇 𑌸𑍈𑌨𑍍𑌯𑌂 𑌤𑍍𑌵𑌰𑌿𑌤𑌾𑌶𑍍𑌶𑌾𑌸𑌨𑌾𑌨𑍍𑌮𑌮 ॥ 32 ॥
𑌸𑍍𑌵𑌯𑌂 𑌚𑌾𑌨𑌂𑌤𑌰𑌂 𑌸𑍈𑌨𑍍𑌯𑌂 𑌭𑌵𑌾𑌨𑍇𑌵𑌾𑌨𑍁𑌪𑌶𑍍𑌯𑌤𑍁 ।
𑌤𑍍𑌰𑌿𑌪𑌂𑌚𑌰𑌾𑌤𑍍𑌰𑌾𑌦𑍂𑌰𑍍𑌧𑍍𑌵𑌂 𑌯𑌃 𑌪𑍍𑌰𑌾𑌪𑍍𑌨𑍁𑌯𑌾𑌨𑍍𑌨𑍇𑌹 𑌵𑌾𑌨𑌰𑌃 ।
𑌤𑌸𑍍𑌯 𑌪𑍍𑌰𑌾𑌣𑌾𑌂𑌤𑌿𑌕𑍋 𑌦𑌂𑌡𑍋 𑌨𑌾𑌤𑍍𑌰 𑌕𑌾𑌰𑍍𑌯𑌾 𑌵𑌿𑌚𑌾𑌰𑌣𑌾 ॥ 33 ॥
𑌹𑌰𑍀𑌂𑌶𑍍𑌚 𑌵𑍃𑌦𑍍𑌧𑌾𑌨𑍁𑌪𑌯𑌾𑌤𑍁 𑌸𑌾𑌂𑌗𑌦𑍋 𑌭𑌵𑌾𑌨𑍍𑌮𑌮𑌾𑌜𑍍𑌞𑌾𑌮𑌧𑌿𑌕𑍃𑌤𑍍𑌯 𑌨𑌿𑌶𑍍𑌚𑌿𑌤𑌾𑌮𑍍 ।
𑌇𑌤𑌿 𑌵𑍍𑌯𑌵𑌸𑍍𑌥𑌾𑌂 𑌹𑌰𑌿𑌪𑍁𑌂𑌗𑌵𑍇𑌶𑍍𑌵𑌰𑍋 𑌵𑌿𑌧𑌾𑌯 𑌵𑍇𑌶𑍍𑌮 𑌪𑍍𑌰𑌵𑌿𑌵𑍇𑌶 𑌵𑍀𑌰𑍍𑌯𑌵𑌾𑌨𑍍 ॥ 34 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌏𑌕𑍋𑌨𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
