𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌮𑌸𑍍𑌸𑌰𑍍𑌗𑌃 ।
𑌋𑌶𑍍𑌯𑌮𑍂𑌕𑌾𑌤𑍍𑌤𑍁 𑌹𑌨𑍁𑌮𑌾𑌨𑍍𑌗𑌤𑍍𑌵𑌾 𑌤𑍁 𑌮𑌲𑌯𑌂 𑌗𑌿𑌰𑌿𑌮𑍍 ।
𑌆𑌚𑌚𑌕𑍍𑌷𑍇 𑌤𑌦𑌾 𑌵𑍀𑌰𑍌 𑌕𑌪𑌿𑌰𑌾𑌜𑌾𑌯 𑌰𑌾𑌘𑌵𑍌 ॥ 1 ॥
𑌅𑌯𑌂 𑌰𑌾𑌮𑍋 𑌮𑌹𑌾𑌪𑍍𑌰𑌾𑌜𑍍𑌞 𑌸𑍍𑌸𑌂𑌪𑍍𑌰𑌾𑌪𑍍𑌤𑍋 𑌦𑍃𑌢𑌵𑌿𑌕𑍍𑌰𑌮𑌃 ।
𑌲𑌕𑍍𑌷𑍍𑌮𑌣𑍇𑌨 𑌸𑌹 𑌭𑍍𑌰𑌾𑌤𑍍𑌰𑌾 𑌰𑌾𑌮𑍋𑌽𑌯𑌂 𑌸𑌤𑍍𑌯𑌵𑌿𑌕𑍍𑌰𑌮𑌃 ॥ 2 ॥
𑌇𑌕𑍍𑌷𑍍𑌵𑌾𑌕𑍂𑌣𑌾𑌂 𑌕𑍁𑌲𑍇 𑌜𑌾𑌤𑍋 𑌰𑌾𑌮𑍋 𑌦𑌶𑌰𑌥𑌾𑌤𑍍𑌮𑌜𑌃 ।
𑌧𑌰𑍍𑌮𑍇 𑌨𑌿𑌗𑌦𑌿𑌤𑌶𑍍𑌚𑍈𑌵 𑌪𑌿𑌤𑍁𑌰𑍍𑌨𑌿𑌰𑍍𑌦𑍇𑌶𑌪𑌾𑌰𑌗𑌃 ॥ 3 ॥
𑌤𑌸𑍍𑌯𑌾𑌸𑍍𑌯 𑌵𑌸𑌤𑍋𑌽𑌰𑌣𑍍𑌯𑍇 𑌨𑌿𑌯𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌰𑌾𑌵𑌣𑍇𑌨 𑌹𑍃𑌤𑌾 𑌭𑌾𑌰𑍍𑌯𑌾 𑌸 𑌤𑍍𑌵𑌾𑌂 𑌶𑌰𑌣𑌮𑌾𑌗𑌤𑌃 ॥ 4 ॥
𑌰𑌾𑌜𑌸𑍂𑌯𑌾𑌶𑍍𑌵𑌮𑍇𑌧𑍈𑌶𑍍𑌚 𑌵𑌹𑍍𑌨𑌿𑌰𑍍𑌯𑍇𑌨𑌾𑌭𑌿𑌤𑌰𑍍𑌪𑌿𑌤𑌃 ।
𑌦𑌕𑍍𑌷𑌿𑌣𑌾𑌶𑍍𑌚 𑌤𑌥𑍋𑌤𑍍𑌸𑍃𑌷𑍍𑌟𑌾 𑌗𑌾𑌵𑌶𑍍𑌶𑌤𑌸𑌹𑌸𑍍𑌰𑌶𑌃 ॥ 5 ॥
𑌤𑌪𑌸𑌾 𑌸𑌤𑍍𑌯𑌵𑌾𑌕𑍍𑌯𑍇𑌨 𑌵𑌸𑍁𑌧𑌾 𑌯𑍇𑌨 𑌪𑌾𑌲𑌿𑌤𑌾 ।
𑌸𑍍𑌤𑍍𑌰𑍀 𑌹𑍇𑌤𑍋𑌸𑍍𑌤𑌸𑍍𑌯 𑌪𑍁𑌤𑍍𑌰𑍋𑌽𑌯𑌂 𑌰𑌾𑌮𑌸𑍍𑌤𑍍𑌵𑌾𑌂 𑌶𑌰𑌣𑌂 𑌗𑌤𑌃 ॥ 6 ॥
𑌭𑌵𑌤𑌾 𑌸𑌖𑍍𑌯𑌕𑌾𑌮𑍌 𑌤𑍌 𑌭𑍍𑌰𑌾𑌤𑌰𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ।
𑌪𑍍𑌰𑌤𑌿𑌗𑍃𑌹𑍍𑌯𑌾𑌰𑍍𑌚𑌯𑌸𑍍𑌵𑍈𑌤𑍌 𑌪𑍂𑌜𑌨𑍀𑌯𑌤𑌮𑌾𑌵𑍁𑌭𑍌 ॥ ॥
𑌶𑍍𑌰𑍁𑌤𑍍𑌵𑌾 𑌹𑌨𑍁𑌮𑌤𑍋 𑌵𑌾𑌕𑍍𑌯𑌂 𑌸𑍁𑌗𑍍𑌰𑍀𑌵𑍋 𑌹𑍃𑌷𑍍𑌟𑌮𑌾𑌨𑌸𑌃 ।
𑌭𑌯𑌂 𑌚𑌰𑌾𑌘𑌵𑌾𑌦𑍍𑌘𑍋𑌰𑌂 𑌪𑍍𑌰𑌜𑌹𑍌 𑌵𑌿𑌗𑌤𑌜𑍍𑌵𑌰𑌃 ॥ ॥
𑌸𑌕𑍃𑌤𑍍𑌵𑌾 𑌮𑌾𑌨𑍁𑌷𑌂 𑌰𑍂𑌪𑌂 𑌸𑍁𑌗𑍍𑌰𑍀𑌵𑌃 𑌪𑍍𑌲𑌵𑌗𑌰𑍍𑌷𑌭𑌃 ।
𑌦𑌰𑍍𑌶𑌨𑍀𑌯𑌤𑌮𑍋 𑌭𑍂𑌤𑍍𑌵𑌾 𑌪𑍍𑌰𑍀𑌤𑍍𑌯𑌾 𑌪𑍍𑌰𑍋𑌵𑌾𑌚 𑌰𑌾𑌘𑌵𑌮𑍍 ॥ ॥
𑌭𑌵𑌾𑌂𑌧𑌰𑍍𑌮𑌵𑌿𑌨𑍀𑌤𑌶𑍍𑌚 𑌵𑌿𑌕𑍍𑌰𑌾𑌂𑌤𑌸𑍍𑌸𑌰𑍍𑌵𑌵𑌤𑍍𑌸𑌲𑌃 ।
𑌆𑌖𑍍𑌯𑌾𑌤𑌾 𑌵𑌾𑌯𑍁𑌪𑍁𑌤𑍍𑌰𑍇𑌣 𑌤𑌤𑍍𑌤𑍍𑌵𑌤𑍋 𑌮𑍇 𑌭𑌵𑌦𑍍𑌗𑍁𑌣𑌾𑌃 ॥ 10 ॥
𑌤𑌨𑍍𑌮𑌮𑍈𑌵𑍈𑌷 𑌸𑌤𑍍𑌕𑌾𑌰𑍋 𑌲𑌾𑌭𑌶𑍍𑌚𑍈𑌵𑍋𑌤𑍍𑌤𑌮𑌃 𑌪𑍍𑌰𑌭𑍋 ।
𑌯𑌤𑍍𑌤𑍍𑌵𑌮𑌿𑌚𑍍𑌛𑌸𑌿 𑌸𑍌𑌹𑌾𑌰𑍍𑌦𑌂 𑌵𑌾𑌨𑌰𑍇𑌣 𑌮𑌯𑌾 𑌸𑌹 ॥ 11 ॥
𑌰𑍋𑌚𑌤𑍇 𑌯𑌦𑌿 𑌵𑌾 𑌸𑌖𑍍𑌯𑌂 𑌬𑌾𑌹𑍁𑌰𑍇𑌷 𑌪𑍍𑌰𑌸𑌾𑌰𑌿𑌤𑌃 ।
𑌗𑍃𑌹𑍍𑌯𑌤𑌾𑌂 𑌪𑌾𑌣𑌿𑌨𑌾 𑌪𑌾𑌣𑌿𑌰𑍍𑌮𑌰𑍍𑌯𑌾𑌦𑌾 𑌬𑌧𑍍𑌯𑌤𑌾𑌂 𑌧𑍍𑌰𑍁𑌵𑌾 ॥ 12 ॥
𑌏𑌤𑌤𑍍𑌤𑍁 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌸𑍁𑌗𑍍𑌰𑍀𑌵𑍇𑌣 𑌸𑍁𑌭𑌾𑌷𑌿𑌤𑌮𑍍 ।
𑌸𑌂𑌪𑍍𑌰𑌹𑍃𑌷𑍍𑌟𑌮𑌨𑌾 𑌹𑌸𑍍𑌤𑌂 𑌪𑍀𑌡𑌯𑌾𑌮𑌾𑌸 𑌪𑌾𑌣𑌿𑌨𑌾 ॥ 13 ॥
𑌹𑍃𑌦𑍍𑌯𑌂 𑌸𑍌𑌹𑍃𑌦𑌮𑌾𑌲𑌂𑌬𑍍𑌯𑌪𑌰𑍍𑌯𑌷𑍍𑌵𑌜𑌤 𑌪𑍀𑌡𑌿𑌤𑌮𑍍 ।
𑌤𑌤𑍋 𑌹𑌨𑍂𑌮𑌾𑌨𑍍𑌸𑌂𑌤𑍍𑌯𑌜𑍍𑌯 𑌭𑌿𑌕𑍍𑌷𑍁𑌰𑍂𑌪𑌮𑌰𑌿𑌂𑌦𑌮𑌃 ॥ 14 ॥
𑌕𑌾𑌷𑍍𑌠𑌯𑍋𑌸𑍍𑌸𑍍𑌵𑍇𑌨 𑌰𑍂𑌪𑍇𑌣 𑌜𑌨𑌯𑌾𑌮𑌾𑌸 𑌪𑌾𑌵𑌕𑌮𑍍 ।
𑌦𑍀𑌪𑍍𑌯𑌮𑌾𑌨𑌂 𑌤𑌤𑍋 𑌵𑌹𑍍𑌨𑌿𑌂 𑌹𑍍𑌨𑌿𑌂 𑌪𑍁𑌷𑍍𑌪𑍈𑌰𑌭𑍍𑌯𑌰𑍍𑌚𑍍𑌯 𑌸𑌤𑍍𑌕𑍃𑌤𑌮𑍍 ॥ 15 ॥
𑌤𑌯𑍋𑌰𑍍𑌮𑌧𑍍𑌯𑍇𑌽𑌥 𑌸𑍁𑌪𑍍𑌰𑍀𑌤𑍋 𑌨𑌿𑌦𑌧𑍇 𑌸𑍁𑌸𑌮𑌾𑌹𑌿𑌤𑌃 ।
𑌤𑌤𑍋𑌽𑌗𑍍𑌨𑌿𑌂 𑌦𑍀𑌪𑍍𑌯𑌮𑌾𑌨𑌂 𑌤𑍌 𑌚𑌕𑍍𑌰𑌤𑍁𑌶𑍍𑌚 𑌪𑍍𑌰𑌦𑌕𑍍𑌷𑌿𑌣𑌮𑍍 ॥ 16 ॥
𑌸𑍁𑌗𑍍𑌰𑍀𑌵𑍋 𑌰𑌾𑌘𑌵𑌶𑍍𑌚𑍈𑌵 𑌵𑌯𑌸𑍍𑌯𑌤𑍍𑌵𑌮𑍁𑌪𑌾𑌗𑌤𑍌 ।
𑌤𑌤𑌸𑍍𑌸𑍁𑌪𑍍𑌰𑍀𑌤𑌮𑌨𑌸𑍌 𑌤𑌾𑌵𑍁𑌭𑍌 𑌹𑌰𑌿𑌰𑌾𑌘𑌵𑍌 ॥ 1 ॥
𑌅𑌨𑍍𑌯𑍋𑌨𑍍𑌯𑌮𑌭𑌿𑌵𑍀𑌕𑍍𑌷𑌂𑌤𑍌 𑌨 𑌤𑍃𑌪𑍍𑌤𑌿𑌮𑍁𑌪𑌜𑌗𑍍𑌮𑌤𑍁𑌃 ।
𑌤𑍍𑌵𑌂 𑌵𑌯𑌸𑍍𑌯𑍋𑌽𑌸𑌿 𑌮𑍇 𑌹𑍃𑌦𑍍𑌯𑍋 𑌹𑍍𑌯𑍇𑌕𑌂 𑌦𑍁𑌃𑌖𑌂 𑌸𑍁𑌖𑌂 𑌚 𑌨𑍌 ॥ 1 ॥
𑌸𑍁𑌗𑍍𑌰𑍀𑌵𑍋 𑌰𑌾𑌘𑌵𑌂 𑌵𑌾𑌕𑍍𑌯𑌮𑌿𑌤𑍍𑌯𑍁𑌵𑌾𑌚 𑌪𑍍𑌰𑌹𑍃𑌷𑍍𑌟𑌵𑌤𑍍 ।
𑌤𑌤𑌸𑍍𑌸𑍁𑌪𑌰𑍍𑌣𑌬𑌹𑍁𑌲𑌾𑌂 𑌛𑌿𑌤𑍍𑌵𑌾 𑌶𑌾𑌖𑌾𑌂 𑌸𑍁𑌪𑍁𑌷𑍍𑌪𑌿𑌤𑌾𑌮𑍍 ॥ 1 ॥
𑌸𑌾𑌲𑌸𑍍𑌯𑌾𑌸𑍍𑌤𑍀𑌰𑍍𑌯 𑌸𑍁𑌗𑍍𑌰𑍀𑌵𑍋 𑌨𑌿𑌷𑌸𑌾𑌦 𑌸𑌰𑌾𑌘𑌵𑌃 ।
𑌲𑌕𑍍𑌷𑍍𑌮𑌣𑌾𑌯𑌾𑌥 𑌸𑌂𑌹𑍃𑌷𑍍𑌟𑍋 𑌹𑌨𑍂𑌮𑌾𑌨𑍍 𑌪𑍍𑌲𑌵𑌗𑌰𑍍𑌷𑌭𑌃 ॥ 20 ॥
𑌶𑌾𑌖𑌾𑌂 𑌚𑌂𑌦𑌨𑌵𑍃𑌕𑍍𑌷𑌸𑍍𑌯 𑌦𑌦𑍌 𑌪𑌰𑌮𑌪𑍁𑌷𑍍𑌪𑌿𑌤𑌾𑌮𑍍 ।
𑌤𑌤𑌃 𑌪𑍍𑌰𑌹𑍃𑌷𑍍𑌟𑌸𑍍𑌸𑍁𑌗𑍍𑌰𑍀𑌵𑌃 𑌶𑍍𑌲𑌕𑍍𑌷𑍍𑌣𑌂 𑌮𑌧𑍁𑌰𑌯𑌾 𑌗𑌿𑌰𑌾 ॥ 21 ॥
𑌪𑍍𑌰𑌤𑍍𑌯𑍁𑌵𑌾𑌚 𑌤𑌦𑌾 𑌰𑌾𑌮𑌂 𑌹𑌰𑍍𑌷𑌵𑍍𑌯𑌾𑌕𑍁𑌲𑌲𑍋𑌚𑌨𑌃 ।
𑌅𑌹𑌂 𑌵𑌿𑌨𑌿𑌕𑍃𑌤𑍋 𑌰𑌾𑌮 𑌚𑌰𑌾𑌮𑍀𑌹 𑌭𑌯𑌾𑌰𑍍𑌦𑌿𑌤𑌃 ॥ 22 ॥
𑌹𑍃𑌤𑌭𑌾𑌰𑍍𑌯𑍋 𑌵𑌨𑍇 𑌤𑍍𑌰𑌸𑍍𑌤𑍋 𑌦𑍁𑌰𑍍𑌗𑌮𑍇𑌤𑌦𑍁𑌪𑌾𑌶𑍍𑌰𑌿𑌤𑌃 ।
𑌸𑍋𑌽𑌹𑌂 𑌤𑍍𑌰𑌸𑍍𑌤𑍋 𑌵𑌨𑍇 𑌭𑍀𑌤𑍋 𑌵𑌸𑌾𑌮𑍍𑌯𑍁𑌦𑍍𑌭𑍍𑌰𑌾𑌂𑌤𑌚𑍇𑌤𑌨𑌃 ॥ 23 ॥
𑌵𑌾𑌲𑌿𑌨𑌾 𑌨𑌿𑌕𑍃𑌤𑍋 𑌭𑍍𑌰𑌾𑌤𑍍𑌰𑌾 𑌕𑍃𑌤𑌵𑍈𑌰𑌶𑍍𑌚 𑌰𑌾𑌘𑌵 ।
𑌵𑌾𑌲𑌿𑌨𑍋 𑌮𑍇 𑌮𑌹𑌾𑌭𑌾𑌗 𑌭𑌯𑌾𑌰𑍍𑌤𑌸𑍍𑌯𑌾𑌭𑌯𑌂 𑌕𑍁𑌰𑍁 ॥ 24 ॥
𑌕𑌰𑍍𑌤𑍁𑌮𑌰𑍍𑌹𑌸𑌿 𑌕𑌾𑌕𑍁𑌤𑍍𑌸𑍍𑌥 𑌭𑌯𑌂 𑌮𑍇 𑌨 𑌭𑌵𑍇𑌦𑍍𑌯𑌥𑌾 ।
𑌏𑌵𑌮𑍁𑌕𑍍𑌤𑌸𑍍𑌤𑍁 𑌤𑍇𑌜𑌸𑍍𑌵𑍀 𑌧𑌰𑍍𑌮𑌜𑍍𑌞𑍋 𑌧𑌰𑍍𑌮𑌵𑌤𑍍𑌸𑌲𑌃 ॥ 25 ॥
𑌪𑍍𑌰𑌤𑍍𑌯𑌭𑌾𑌷𑌤 𑌕𑌾𑌕𑍁𑌤𑍍𑌸𑍍𑌥𑌃 𑌸𑍁𑌗𑍍𑌰𑍀𑌵𑌂 𑌪𑍍𑌰𑌹𑌸𑌨𑍍𑌨𑌿𑌵 ।
𑌉𑌪𑌕𑌾𑌰𑌫𑌲𑌂 𑌮𑌿𑌤𑍍𑌰𑌂 𑌵𑌿𑌦𑌿𑌤𑌂 𑌮𑍇 𑌮𑌹𑌾𑌕𑌪𑍇 ॥ 26 ॥
𑌵𑌾𑌲𑌿𑌨𑌂 𑌤𑌂 𑌵𑌧𑌿𑌷𑍍𑌯𑌾𑌮𑌿 𑌤𑌵 𑌭𑌾𑌰𑍍𑌯𑌾𑌪𑌹𑌾𑌰𑌿𑌣𑌮𑍍 ।
𑌅𑌮𑍋𑌘𑌾𑌸𑍍𑌸𑍂𑌰𑍍𑌯𑌸𑌂𑌕𑌾𑌶𑌾 𑌮𑌮𑍈𑌤𑍇 𑌨𑌿𑌶𑌿𑌤𑌾𑌶𑍍𑌶𑌰𑌾𑌃 ॥ 2 ॥
𑌤𑌸𑍍𑌮𑌿𑌨𑍍𑌵𑌾𑌲𑌿𑌨𑌿 𑌦𑍁𑌰𑍍𑌵𑍃𑌤𑍍𑌤𑍇 𑌨𑌿𑌪𑌤𑌿𑌷𑍍𑌯𑌂𑌤𑌿 𑌵𑍇𑌗𑌿𑌤𑌾𑌃 ।
𑌕𑌂𑌕𑌪𑌤𑍍𑌰𑌪𑍍𑌰𑌤𑌿𑌚𑍍𑌛𑌨𑍍𑌨𑌾 𑌮𑌹𑍇𑌂𑌦𑍍𑌰𑌾𑌶𑌨𑌿𑌸𑌨𑍍𑌨𑌿𑌭𑌾𑌃 ॥ 2 ॥
𑌤𑍀𑌕𑍍𑌷𑍍𑌣𑌾𑌗𑍍𑌰𑌾 𑌋𑌜𑍁𑌪𑌰𑍍𑌵𑌾𑌣𑌸𑍍𑌸𑌰𑍋𑌷𑌾 𑌭𑍁𑌜𑌗𑌾 𑌇𑌵 ।
𑌤𑌮𑌦𑍍𑌯 𑌵𑌾𑌲𑌿𑌨𑌂 𑌪𑌶𑍍𑌯 𑌤𑍀𑌕𑍍𑌷𑍍𑌣𑍈𑌰𑌾𑌶𑍀𑌵𑌿𑌷𑍋𑌪𑌮𑍈𑌃 ॥ 2 ॥
𑌶𑌰𑍈𑌰𑍍𑌵𑌿𑌨𑌿𑌹𑌤𑌂 𑌭𑍂𑌮𑍌 𑌵𑌿𑌕𑍀𑌰𑍍𑌣𑌮𑌿𑌵 𑌪𑌰𑍍𑌵𑌤𑌮𑍍 ।
𑌸 𑌤𑍁 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌰𑌾𑌘𑌵𑌸𑍍𑌯𑌾𑌤𑍍𑌮𑌨𑍋 𑌹𑌿𑌤𑌮𑍍 ॥ 30 ॥
𑌸𑍁𑌗𑍍𑌰𑍀𑌵𑌃 𑌪𑌰𑌮𑌪𑍍𑌰𑍀𑌤𑌸𑍍𑌸𑍁𑌮𑌹𑌦𑍍𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।
𑌤𑌵 𑌪𑍍𑌰𑌸𑌾𑌦𑍇𑌨 𑌨𑍃𑌸𑌿𑌂𑌹 𑌰𑌾𑌘𑌵 𑌪𑍍𑌰𑌿𑌯𑌾𑌂 𑌚 𑌰𑌾𑌜𑍍𑌯𑌂 𑌚 𑌸𑌮𑌾𑌪𑍍𑌨𑍁𑌯𑌾𑌮𑌹𑌮𑍍 ।
𑌤𑌥𑌾 𑌕𑍁𑌰𑍁 𑌤𑍍𑌵𑌂 𑌨𑌰𑌦𑍇𑌵 𑌵𑍈𑌰𑌿𑌣𑌂 𑌯𑌥𑌾 𑌨𑌿𑌹𑌂𑌸𑍍𑌯𑌦𑍍𑌯 𑌰𑌿𑌪𑍁𑌂𑌮𑌮𑌾𑌗𑍍𑌰𑌜𑌮𑍍 ॥ 31 ॥
𑌸𑍀𑌤𑌾 𑌕𑌪𑍀𑌂𑌦𑍍𑌰𑌕𑍍𑌷𑌣𑌦𑌾𑌚𑌰𑌾𑌣𑌾𑌂 𑌰𑌾𑌜𑍀𑌵𑌹𑍇𑌮𑌜𑍍𑌵𑌲𑌨𑍋𑌪𑌮𑌾𑌨𑌿 ।
𑌸𑍁𑌗𑍍𑌰𑍀𑌵𑌰𑌾𑌮𑌪𑍍𑌰𑌣𑌯𑌪𑍍𑌰𑌸𑌂𑌗𑍇 𑌵𑌾𑌮𑌾𑌨𑌿 𑌨𑍇𑌤𑍍𑌰𑌾𑌣𑌿 𑌸𑌮𑌂 𑌸𑍍𑌫𑍁𑌰𑌂𑌤𑌿 ॥ 32 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌪𑌂𑌚𑌮𑌸𑍍𑌸𑌰𑍍𑌗𑌃 ॥
