𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌿𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌏𑌵𑌮𑍁𑌕𑍍𑌤𑌾 𑌵𑌸𑌿𑌷𑍍𑌠𑍇𑌨 𑌶𑌬𑌲𑌾 𑌶𑌤𑍍𑌰𑍁𑌸𑍂𑌦𑌨 ।
𑌵𑌿𑌦𑌧𑍇 𑌕𑌾𑌮𑌧𑍁𑌕𑍍𑌕𑌾𑌮𑌾𑌨𑍍𑌯𑌸𑍍𑌯 𑌯𑌸𑍍𑌯 𑌯𑌥𑍇𑌪𑍍𑌸𑌿𑌤𑌮𑍍 ॥ 1 ॥
𑌇𑌕𑍍𑌷𑍂𑌨𑍍𑌮𑌧𑍂𑌂 𑌸𑍍𑌤𑌥𑌾 𑌲𑌾𑌜𑌾𑌨𑍍𑌮𑍈𑌰𑍇𑌯𑌾𑌂𑌶𑍍𑌚 𑌵𑌰𑌾𑌸𑌨𑌾𑌨𑍍 ।
𑌪𑌾𑌨𑌾𑌨𑌿 𑌚 𑌮𑌹𑌾𑌰𑍍𑌹𑌾𑌣𑌿 𑌭𑌕𑍍𑌷𑍍𑌯𑌾𑌂𑌶𑍍𑌚𑍋𑌚𑍍𑌚𑌾𑌵𑌚𑌾𑌂 𑌸𑍍𑌤𑌥𑌾 ॥ 2 ॥
𑌉𑌷𑍍𑌣𑌾𑌢𑍍𑌯𑌸𑍍𑌯𑍋𑌦𑌨𑌸𑍍𑌯𑌾𑌤𑍍𑌰 𑌰𑌾𑌶𑌯𑌃 𑌪𑌰𑍍𑌵𑌤𑍋𑌪𑌮𑌾𑌃 ।
𑌮𑍃𑌷𑍍𑌟𑌾𑌨𑍍𑌨𑌾𑌨𑌿 𑌚 𑌸𑍂𑌪𑌾𑌶𑍍𑌚 𑌦𑌧𑌿𑌕𑍁𑌲𑍍𑌯𑌾𑌸𑍍𑌤𑌥𑍈𑌵 𑌚 ॥ 3 ॥
𑌨𑌾𑌨𑌾𑌸𑍍𑌵𑌾𑌦𑍁𑌰𑌸𑌾𑌨𑌾𑌂 𑌚 𑌷𑌾𑌡𑌬𑌾𑌨𑌾𑌂 𑌤𑌥𑍈𑌵 𑌚 ।
𑌭𑌾𑌜𑌨𑌾𑌨𑌿 𑌸𑍁𑌪𑍂𑌰𑍍𑌣𑌾𑌨𑌿 𑌗𑍌𑌡𑌾𑌨𑌿 𑌚 𑌸𑌹𑌸𑍍𑌰𑌶𑌃 ॥ 4 ॥
𑌸𑌰𑍍𑌵𑌮𑌾𑌸𑍀𑌤𑍍𑌸𑍁𑌸𑌂𑌤𑍁𑌷𑍍𑌠𑌂 𑌹𑍃𑌷𑍍𑌟𑌪𑍁𑌷𑍍𑌟𑌜𑌨𑌾𑌯𑍁𑌤𑌮𑍍 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌬𑌲𑌂 𑌰𑌾𑌮 𑌵𑌸𑌿𑌷𑍍𑌠𑍇𑌨𑌾𑌭𑌿𑌤𑌰𑍍𑌪𑌿𑌤𑌮𑍍 ॥ 5 ॥
𑌵𑌿𑌶𑍍𑌵𑌾𑌮𑌿𑌤𑍍𑌰𑍋𑌽𑌪𑌿 𑌰𑌾𑌜𑌰𑍍𑌷𑌿𑌰𑍍𑌹𑍃𑌷𑍍𑌟𑌃 𑌪𑍁𑌷𑍍𑌟𑌸𑍍𑌤𑌦𑌾𑌭𑌵𑌤𑍍 ।
𑌸𑌾𑌂𑌤𑌃𑌪𑍁𑌰𑌵𑌰𑍋 𑌰𑌾𑌜𑌾 𑌸𑌬𑍍𑌰𑌾𑌹𑍍𑌮𑌣𑌪𑍁𑌰𑍋𑌹𑌿𑌤𑌃 ॥ 6 ॥
𑌸𑌾𑌮𑌾𑌤𑍍𑌯𑍋 𑌮𑌂𑌤𑍍𑌰𑌿𑌸𑌹𑌿𑌤𑌸𑍍𑌸𑌭𑍃𑌤𑍍𑌯𑌃 𑌪𑍂𑌜𑌿𑌤𑌸𑍍𑌤𑌦𑌾 ।
𑌯𑍁𑌕𑍍𑌤𑌃 𑌪𑌰𑌮𑌹𑌰𑍍𑌷𑍇𑌣 𑌵𑌸𑌿𑌷𑍍𑌠𑌮𑌿𑌦𑌮𑌬𑍍𑌰𑌵𑍀𑌤𑍍 ॥ ॥
𑌪𑍂𑌜𑌿𑌤𑍋𑌽𑌹𑌂 𑌤𑍍𑌵𑌯𑌾 𑌬𑍍𑌰𑌹𑍍𑌮𑌨𑍍 𑌪𑍂𑌜𑌾𑌰𑍍𑌹𑍇𑌣 𑌸𑍁𑌸𑌤𑍍𑌕𑍃𑌤𑌃 ।
𑌶𑍍𑌰𑍂𑌯𑌤𑌾𑌮𑌭𑌿𑌧𑌾𑌸𑍍𑌯𑌾𑌮𑌿 𑌵𑌾𑌕𑍍𑌯𑌂 𑌵𑌾𑌕𑍍𑌯𑌵𑌿𑌶𑌾𑌰𑌦 ॥ ॥
𑌗𑌵𑌾𑌂 𑌶𑌤𑌸𑌹𑌸𑍍𑌰𑍇𑌣 𑌦𑍀𑌯𑌤𑌾𑌂 𑌶𑌬𑌲𑌾 𑌮𑌮 ।
𑌰𑌤𑍍𑌨𑌂 𑌹𑌿 𑌭𑌗𑌵𑌨𑍍𑌨𑍇𑌤𑌦𑍍𑌰𑌤𑍍𑌨𑌹𑌾𑌰𑍀 𑌚 𑌪𑍍𑌰𑌾𑌰𑍍𑌥𑌿𑌵𑌃 ॥ ॥
𑌤𑌸𑍍𑌮𑌾𑌨𑍍𑌮𑍇 𑌶𑌬𑌲𑌾𑌂 𑌦𑍇𑌹𑌿 𑌮𑌮𑍈𑌷𑌾 𑌧𑌰𑍍𑌮𑌤𑍋 𑌦𑍍𑌵𑌿𑌜 ।
𑌏𑌵𑌮𑍁𑌕𑍍𑌤𑌸𑍍𑌤𑍁 𑌭𑌗𑌵𑌾𑌨𑍍𑌵𑌸𑌿𑌷𑍍𑌠𑍋 𑌮𑍁𑌨𑌿𑌸𑌤𑍍𑌤𑌮𑌃 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑍇𑌣 𑌧𑌰𑍍𑌮𑌾𑌤𑍍𑌮𑌾 𑌪𑍍𑌰𑌤𑍍𑌯𑍁𑌵𑌾𑌚 𑌮𑌹𑍀𑌪𑌤𑌿𑌮𑍍 ॥ 10 ॥
𑌨𑌾𑌹𑌂 𑌶𑌤𑌸𑌹𑌸𑍍𑌰𑍇𑌣 𑌨𑌾𑌪𑌿 𑌕𑍋𑌟𑌿𑌶𑌤𑍈𑌰𑍍𑌗𑌵𑌾𑌮𑍍 ।
𑌰𑌾𑌜𑌨𑍍 𑌦𑌾𑌸𑍍𑌯𑌾𑌮𑌿 𑌶𑌬𑌲𑌾𑌂 𑌰𑌾𑌶𑌿𑌭𑍀 𑌰𑌜𑌤𑌸𑍍𑌯 𑌚 ॥ 11 ॥
𑌨 𑌪𑌰𑌿𑌤𑍍𑌯𑌾𑌗𑌮𑌰𑍍𑌹𑍇𑌯𑌂 𑌮𑌤𑍍𑌸𑌕𑌾𑌶𑌾𑌦𑌰𑌿𑌂𑌦𑌮 ।
𑌶𑌾𑌶𑍍𑌵𑌤𑍀 𑌶𑌬𑌲𑌾 𑌮𑌹𑍍𑌯𑌂 𑌕𑍀𑌰𑍍𑌤𑌿𑌰𑌾𑌤𑍍𑌮𑌵𑌤𑍋 𑌯𑌥𑌾 ॥ 12 ॥
𑌅𑌸𑍍𑌯𑌾𑌂 𑌹𑌵𑍍𑌯𑌂 𑌚 𑌕𑌵𑍍𑌯𑌂 𑌚 𑌪𑍍𑌰𑌾𑌣𑌯𑌾𑌤𑍍𑌰𑌾 𑌤𑌥𑍈𑌵 𑌚 ।
𑌆𑌯𑌤𑍍𑌤𑌮𑌗𑍍𑌨𑌿𑌹𑍋𑌤𑍍𑌰𑌂 𑌚 𑌬𑌲𑌿𑌰𑍍𑌹𑍋𑌮𑌸𑍍𑌤𑌥𑍈𑌵 𑌚 ॥ 13 ॥
𑌸𑍍𑌵𑌾𑌹𑌾𑌕𑌾𑌰𑌵𑌷𑌟𑍍𑌕𑌾𑌰𑍌 𑌵𑌿𑌦𑍍𑌯𑌾𑌶𑍍𑌚 𑌵𑌿𑌵𑌿𑌧𑌾 𑌸𑍍𑌤𑌥𑌾 ।
𑌆𑌯𑌤𑍍𑌤𑌮𑌤𑍍𑌰 𑌰𑌾𑌜𑌰𑍍𑌷𑍇 𑌸𑌰𑍍𑌵𑌮𑍇𑌤𑌨𑍍𑌨 𑌸𑌂𑌶𑌯𑌃 ॥ 14 ॥
𑌸𑌰𑍍𑌵𑌸𑍍𑌵𑌮𑍇𑌤𑌤𑍍𑌸𑌤𑍍𑌯𑍇𑌨 𑌮𑌮 𑌤𑍁𑌷𑍍𑌟𑌿𑌕𑌰𑍀 𑌸𑌦𑌾 ।
𑌕𑌾𑌰𑌣𑍈𑌰𑍍𑌬𑌹𑍁𑌭𑍀 𑌰𑌾𑌜𑌨𑍍𑌨 𑌦𑌾𑌸𑍍𑌯𑍇 𑌶𑌬𑌲𑌾𑌂 𑌤𑌵 ॥ 15 ॥
𑌵𑌸𑌿𑌷𑍍𑌠𑍇𑌨𑍈𑌵𑌮𑍁𑌕𑍍𑌤𑌸𑍍𑌤𑍁 𑌵𑌿𑌶𑍍𑌵𑌾𑌮𑌿𑌤𑍍𑌰𑍋𑌽𑌬𑍍𑌰𑌵𑍀𑌤𑍍𑌤𑌤𑌃 ।
𑌸𑌂𑌰𑌬𑍍𑌧𑌤𑌰𑌮𑌤𑍍𑌯𑌰𑍍𑌥𑌂 𑌵𑌾𑌕𑍍𑌯𑌂 𑌵𑌾𑌕𑍍𑌯𑌵𑌿𑌶𑌾𑌰𑌦𑌃 ॥ 16 ॥
𑌹𑍈𑌰𑌣𑍍𑌯𑌕𑌕𑍍𑌷𑍍𑌯𑌾𑌗𑍍𑌰𑍈𑌵𑍇𑌯𑌾𑌨𑍍 𑌸𑍁𑌵𑌰𑍍𑌣𑌾𑌂𑌕𑍁𑌶𑌭𑍂𑌷𑌿𑌤𑌾𑌨𑍍 ।
𑌦𑌦𑌾𑌮𑌿 𑌕𑍁𑌂𑌜𑌰𑌾𑌂𑌸𑍍𑌤𑍇𑌷𑌾𑌂 𑌸𑌹𑌸𑍍𑌰𑌾𑌣𑌿 𑌚𑌤𑍁𑌰𑍍𑌦𑌶 ॥ 1 ॥
𑌹𑍈𑌰𑌣𑍍𑌯𑌾𑌨𑌾𑌂 𑌰𑌥𑌾𑌨𑌾𑌂 𑌚 𑌶𑍍𑌵𑍇𑌤𑌾𑌶𑍍𑌵𑌾𑌨𑌾𑌂 𑌚𑌤𑍁𑌰𑍍𑌯𑍁𑌜𑌾𑌮𑍍 ।
𑌦𑌦𑌾𑌮𑌿 𑌤𑍇 𑌶𑌤𑌾𑌨𑍍𑌯𑌷𑍍𑌟𑍌 𑌕𑌿𑌂𑌕𑌿𑌣𑍀𑌕𑌵𑌿𑌭𑍂𑌷𑌿𑌤𑌾𑌨𑍍 ॥ 1 ॥
𑌹𑌯𑌾𑌨𑌾𑌂 𑌦𑍇𑌶𑌜𑌾𑌤𑌾𑌨𑌾𑌂 𑌕𑍁𑌲𑌜𑌾𑌨𑌾𑌂 𑌮𑌹𑍌𑌜𑌸𑌾𑌮𑍍 ।
𑌸𑌹𑌸𑍍𑌰𑌮𑍇𑌕𑌂 𑌦𑌶 𑌚 𑌦𑌦𑌾𑌮𑌿 𑌤𑌵 𑌸𑍁𑌵𑍍𑌰𑌤 ॥ 1 ॥
𑌨𑌾𑌨𑌾𑌵𑌰𑍍𑌣𑌵𑌿𑌭𑌕𑍍𑌤𑌾𑌨𑌾𑌂 𑌵𑌯𑌸𑍍𑌸𑍍𑌥𑌾𑌨𑌾𑌂 𑌤𑌥𑍈𑌵 𑌚 ।
𑌦𑌦𑌾𑌮𑍍𑌯𑍇𑌕𑌾𑌂 𑌗𑌵𑌾𑌂 𑌕𑍋𑌟𑌿𑌂 𑌶𑌬𑌲𑌾 𑌦𑍀𑌯𑌤𑌾𑌂 𑌮𑌮 ॥ 20 ॥
𑌯𑌾𑌵𑌦𑌿𑌚𑍍𑌛𑌸𑌿 𑌰𑌤𑍍𑌨𑌂 𑌵𑌾 𑌹𑌿𑌰𑌣𑍍𑌯𑌂 𑌵𑌾 𑌦𑍍𑌵𑌿𑌜𑍋𑌤𑍍𑌤𑌮 ।
𑌤𑌾𑌵𑌦𑍍𑌦𑌦𑌾𑌮𑌿 𑌤𑌤𑍍𑌸𑌰𑍍𑌵𑌂 𑌶𑌬𑌲𑌾 𑌦𑍀𑌯𑌤𑌾𑌂 𑌮𑌮 ॥ 21 ॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌭𑌗𑌵𑌾𑌨𑍍 𑌵𑌿𑌶𑍍𑌵𑌾𑌮𑌿𑌤𑍍𑌰𑍇𑌣 𑌧𑍀𑌮𑌤𑌾 ।
𑌨 𑌦𑌾𑌸𑍍𑌯𑌾𑌮𑍀𑌤𑌿 𑌶𑌬𑌲𑌾𑌂 𑌪𑍍𑌰𑌾𑌹 𑌰𑌾𑌜𑌨𑍍 𑌕𑌥𑌂𑌚𑌨 ॥ 22 ॥
𑌏𑌤𑌦𑍇𑌵 𑌹𑌿 𑌮𑍇 𑌰𑌤𑍍𑌨𑌮𑍇𑌤𑌦𑍇𑌵 𑌹𑌿 𑌮𑍇 𑌧𑌨𑌮𑍍 ।
𑌏𑌤𑌦𑍇𑌵 𑌹𑌿 𑌸𑌰𑍍𑌵𑌸𑍍𑌵𑌮𑍇𑌤𑌦𑍇𑌵 𑌹𑌿 𑌜𑍀𑌵𑌿𑌤𑌮𑍍 ॥ 23 ॥
𑌦𑌰𑍍𑌶𑌶𑍍𑌚 𑌪𑍂𑌰𑍍𑌣𑌮𑌾𑌸𑌶𑍍𑌚 𑌯𑌜𑍍𑌞𑌾𑌶𑍍𑌚𑍈𑌵𑌾𑌪𑍍𑌤𑌦𑌕𑍍𑌷𑌿𑌣𑌾𑌃 ।
𑌏𑌤𑌦𑍇𑌵 𑌹𑌿 𑌮𑍇 𑌰𑌾𑌜𑌨𑍍 𑌵𑌿𑌵𑌿𑌧𑌾𑌶𑍍𑌚 𑌕𑍍𑌰𑌿𑌯𑌾𑌸𑍍𑌤𑌥𑌾 ॥ 24 ॥
𑌅𑌦𑍋𑌮𑍂𑌲𑌾𑌃 𑌕𑍍𑌰𑌿𑌯𑌾𑌸𑍍𑌸𑌰𑍍𑌵𑌾 𑌮𑌮 𑌰𑌾𑌜𑌨𑍍𑌨 𑌸𑌂𑌶𑌯𑌃 ।
𑌬𑌹𑍁𑌨𑌾 𑌕𑌿𑌂 𑌪𑍍𑌰𑌲𑌾𑌪𑍇𑌨 𑌨 𑌦𑌾𑌸𑍍𑌯𑍇 𑌕𑌾𑌮𑌦𑍋𑌹𑌿𑌨𑍀𑌮𑍍 ॥ 25 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌤𑍍𑌰𑌿𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
