𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌯𑍋𑌦𑌶𑌸𑍍𑌸𑌰𑍍𑌗𑌃 ।
𑌵𑌿𑌮𑌾𑌨𑌾𑌤𑍍𑌤𑍁 𑌸𑍁𑌸𑌮𑍍𑌕𑍍𑌰𑌮𑍍𑌯 𑌪𑍍𑌰𑌾𑌕𑌾𑌰𑌂 𑌹𑌰𑌿𑌯𑍂𑌥𑌪𑌃 ।
𑌹𑌨𑍁𑌮𑌾𑌨𑍍𑌵𑍇𑌗𑌵𑌾𑌨𑌾𑌸𑍀𑌦𑍍𑌯𑌥𑌾 𑌵𑌿𑌦𑍍𑌯𑍁𑌦𑍍𑌘𑌨𑌾𑌂𑌤𑌰𑍇 ॥ 1 ॥
𑌸𑌂𑌪𑌰𑌿𑌕𑍍𑌰𑌮𑍍𑌯 𑌹𑌨𑍁𑌮𑌾𑌨𑍍𑌰𑌾𑌵𑌣𑌸𑍍𑌯 𑌨𑌿𑌵𑍇𑌶𑌨𑌾𑌤𑍍 ।
𑌅𑌦𑍃𑌷𑍍𑌟𑍍𑌵𑌾 𑌜𑌾𑌨𑌕𑍀𑌂 𑌸𑍀𑌤𑌾𑌮𑌬𑍍𑌰𑌵𑍀𑌦𑍍𑌵𑌚𑌨𑌂 𑌕𑌪𑌿𑌃 ॥ 2 ॥
𑌭𑍂𑌯𑌿𑌷𑍍𑌠𑌂 𑌲𑍋𑌲𑌿𑌤𑌾 𑌲𑌂𑌕𑌾 𑌰𑌾𑌮𑌸𑍍𑌯 𑌚𑌰𑌤𑌾 𑌪𑍍𑌰𑌿𑌯𑌮𑍍 ।
𑌨 𑌹𑌿 𑌪𑌶𑍍𑌯𑌾𑌮𑌿 𑌵𑍈𑌦𑍇𑌹𑍀𑌂 𑌸𑍀𑌤𑌾𑌂 𑌸𑌰𑍍𑌵𑌾𑌂𑌗𑌶𑍋𑌭𑌨𑌾𑌮𑍍 ॥ 3 ॥
𑌪𑌲𑍍𑌵𑌲𑌾𑌨𑌿 𑌤𑌟𑌾𑌕𑌾𑌨𑌿 𑌸𑌰𑌾𑌂𑌸𑌿 𑌸𑌰𑌿𑌤𑌸𑍍𑌤𑌥𑌾 ।
𑌨𑌦𑍍𑌯𑍋𑌽𑌨𑍂𑌪𑌵𑌨𑌾𑌂𑌤𑌾𑌶𑍍𑌚 𑌦𑍁𑌰𑍍𑌗𑌾𑌶𑍍𑌚 𑌧𑌰𑌣𑍀𑌧𑌰𑌾𑌃 ॥ 4 ॥
𑌲𑍋𑌲𑌿𑌤𑌾 𑌵𑌸𑍁𑌧𑌾 𑌸𑌰𑍍𑌵𑌾 𑌨 𑌤𑍁 𑌪𑌶𑍍𑌯𑌾𑌮𑌿 𑌜𑌾𑌨𑌕𑍀𑌮𑍍 ।
𑌇𑌹 𑌸𑌂𑌪𑌾𑌤𑌿𑌨𑌾 𑌸𑍀𑌤𑌾 𑌰𑌾𑌵𑌣𑌸𑍍𑌯 𑌨𑌿𑌵𑍇𑌶𑌨𑍇 ॥ 5 ॥
𑌆𑌖𑍍𑌯𑌾𑌤𑌾 𑌗𑍃𑌧𑍍𑌰𑌰𑌾𑌜𑍇𑌨 𑌨 𑌚 𑌪𑌶𑍍𑌯𑌾𑌮𑌿 𑌤𑌾𑌮𑌹𑌮𑍍 ।
𑌕𑌿𑌂 𑌨𑍁 𑌸𑍀𑌤𑌾𑌽𑌥 𑌵𑍈𑌦𑍇𑌹𑍀 𑌮𑍈𑌥𑌿𑌲𑍀 𑌜𑌨𑌕𑌾𑌤𑍍𑌮𑌜𑌾 ॥ 6 ॥
𑌉𑌪𑌤𑌿𑌷𑍍𑌠𑍇𑌤 𑌵𑌿𑌵𑌶𑌾 𑌰𑌾𑌵𑌣𑌂 𑌦𑍁𑌷𑍍𑌟𑌚𑌾𑌰𑌿𑌣𑌮𑍍 ।
𑌕𑍍𑌷𑌿𑌪𑍍𑌰𑌮𑍁𑌤𑍍𑌪𑌤𑌤𑍋 𑌮𑌨𑍍𑌯𑍇 𑌸𑍀𑌤𑌾𑌮𑌾𑌦𑌾𑌯 𑌰𑌕𑍍𑌷𑌸𑌃 ॥ ॥
𑌬𑌿𑌭𑍍𑌯𑌤𑍋 𑌰𑌾𑌮𑌬𑌾𑌣𑌾𑌨𑌾𑌮𑌂𑌤𑌰𑌾 𑌪𑌤𑌿𑌤𑌾 𑌭𑌵𑍇𑌤𑍍 ।
𑌅𑌥𑌵𑌾 𑌹𑍍𑌰𑌿𑌯𑌮𑌾𑌣𑌾𑌯𑌾𑌃 𑌪𑌥𑌿 𑌸𑌿𑌦𑍍𑌧𑌨𑌿𑌷𑍇𑌵𑌿𑌤𑍇 ॥ ॥
𑌮𑌨𑍍𑌯𑍇 𑌪𑌤𑌿𑌤𑌮𑌾𑌰𑍍𑌯𑌾𑌯𑌾 𑌹𑍃𑌦𑌯𑌂 𑌪𑍍𑌰𑍇𑌕𑍍𑌷𑍍𑌯 𑌸𑌾𑌗𑌰𑌮𑍍 ।
𑌰𑌾𑌵𑌣𑌸𑍍𑌯𑍋𑌰𑍁𑌵𑍇𑌗𑍇𑌨 𑌭𑍁𑌜𑌾𑌭𑍍𑌯𑌾𑌂 𑌪𑍀𑌡𑌿𑌤𑍇𑌨 𑌚 ॥ ॥
𑌤𑌯𑌾 𑌮𑌨𑍍𑌯𑍇 𑌵𑌿𑌶𑌾𑌲𑌾𑌕𑍍𑌷𑍍𑌯𑌾 𑌤𑍍𑌯𑌕𑍍𑌤𑌂 𑌜𑍀𑌵𑌿𑌤𑌮𑌾𑌰𑍍𑌯𑌯𑌾 ।
𑌉𑌪𑌰𑍍𑌯𑍁𑌪𑌰𑌿 𑌵𑌾 𑌨𑍂𑌨𑌂 𑌸𑌾𑌗𑌰𑌂 𑌕𑍍𑌰𑌮𑌤𑌸𑍍𑌤𑌦𑌾 ॥ 10 ॥
𑌵𑌿𑌵𑍇𑌷𑍍𑌟𑌮𑌾𑌨𑌾 𑌪𑌤𑌿𑌤𑌾 𑌸𑌾𑌗𑌰𑍇 𑌜𑌨𑌕𑌾𑌤𑍍𑌮𑌜𑌾 ।
𑌅𑌹𑍋 𑌕𑍍𑌷𑍁𑌦𑍍𑌰𑍇𑌣 𑌵𑌾𑌽𑌨𑍇𑌨 𑌰𑌕𑍍𑌷𑌂𑌤𑍀 𑌶𑍀𑌲𑌮𑌾𑌤𑍍𑌮𑌨𑌃 ॥ 11 ॥
𑌅𑌬𑌂𑌧𑍁𑌰𑍍𑌭𑌕𑍍𑌷𑌿𑌤𑌾 𑌸𑍀𑌤𑌾 𑌰𑌾𑌵𑌣𑍇𑌨 𑌤𑌪𑌸𑍍𑌵𑌿𑌨𑍀 ।
𑌅𑌥𑌵𑌾 𑌰𑌾𑌕𑍍𑌷𑌸𑍇𑌂𑌦𑍍𑌰𑌸𑍍𑌯 𑌪𑌤𑍍𑌨𑍀𑌭𑌿𑌰𑌸𑌿𑌤𑍇𑌕𑍍𑌷𑌣𑌾 ॥ 12 ॥
𑌅𑌦𑍁𑌷𑍍𑌟𑌾 𑌦𑍁𑌷𑍍𑌟𑌭𑌾𑌵𑌾𑌭𑌿𑌰𑍍𑌭𑌕𑍍𑌷𑌿𑌤𑌾 𑌸𑌾 𑌭𑌵𑌿𑌷𑍍𑌯𑌤𑌿 ।
𑌸𑌂𑌪𑍂𑌰𑍍𑌣𑌚𑌂𑌦𑍍𑌰𑌪𑍍𑌰𑌤𑌿𑌮𑌂 𑌪𑌦𑍍𑌮𑌪𑌤𑍍𑌰𑌨𑌿𑌭𑍇𑌕𑍍𑌷𑌣𑌮𑍍 ॥ 13 ॥
𑌰𑌾𑌮𑌸𑍍𑌯 𑌧𑍍𑌯𑌾𑌯𑌤𑍀 𑌵𑌕𑍍𑌤𑍍𑌰𑌂 𑌪𑌂𑌚𑌤𑍍𑌵𑌂 𑌕𑍃𑌪𑌣𑌾 𑌗𑌤𑌾 ।
𑌹𑌾 𑌰𑌾𑌮 𑌲𑌕𑍍𑌷𑍍𑌮𑌣𑍇𑌤𑍍𑌯𑍇𑌵𑌂 𑌹𑌾𑌽𑌯𑍋𑌧𑍍𑌯𑍇 𑌚𑍇𑌤𑌿 𑌮𑍈𑌥𑌿𑌲𑍀 ॥ 14 ॥
𑌵𑌿𑌲𑌪𑍍𑌯 𑌬𑌹𑍁 𑌵𑍈𑌦𑍇𑌹𑍀 𑌨𑍍𑌯𑌸𑍍𑌤𑌦𑍇𑌹𑌾 𑌭𑌵𑌿𑌷𑍍𑌯𑌤𑌿 ।
𑌅𑌥𑌵𑌾 𑌨𑌿𑌹𑌿𑌤𑌾 𑌮𑌨𑍍𑌯𑍇 𑌰𑌾𑌵𑌣𑌸𑍍𑌯 𑌨𑌿𑌵𑍇𑌶𑌨𑍇 ॥ 15 ॥
𑌨𑍂𑌨𑌂 𑌲𑌾𑌲𑌪𑍍𑌯𑌤𑍇 𑌸𑍀𑌤𑌾 𑌪𑌂𑌜𑌰𑌸𑍍𑌥𑍇𑌵 𑌶𑌾𑌰𑌿𑌕𑌾 ।
𑌜𑌨𑌕𑌸𑍍𑌯 𑌸𑍁𑌤𑌾 𑌸𑍀𑌤𑌾 𑌰𑌾𑌮𑌪𑌤𑍍𑌨𑍀 𑌸𑍁𑌮𑌧𑍍𑌯𑌮𑌾 ॥ 16 ॥
𑌕𑌥𑌮𑍁𑌤𑍍𑌪𑌲𑌪𑌤𑍍𑌰𑌾𑌕𑍍𑌷𑍀 𑌰𑌾𑌵𑌣𑌸𑍍𑌯 𑌵𑌶𑌂 𑌵𑍍𑌰𑌜𑍇𑌤𑍍 ।
𑌵𑌿𑌨𑌷𑍍𑌟𑌾 𑌵𑌾 𑌪𑍍𑌰𑌣𑌷𑍍𑌟𑌾 𑌵𑌾 𑌮𑍃𑌤𑌾 𑌵𑌾 𑌜𑌨𑌕𑌾𑌤𑍍𑌮𑌜𑌾 ॥ 1 ॥
𑌰𑌾𑌮𑌸𑍍𑌯 𑌪𑍍𑌰𑌿𑌯𑌭𑌾𑌰𑍍𑌯𑌸𑍍𑌯 𑌨 𑌨𑌿𑌵𑍇𑌦𑌯𑌿𑌤𑍁𑌂 𑌕𑍍𑌷𑌮𑌮𑍍 ।
𑌨𑌿𑌵𑍇𑌦𑍍𑌯𑌮𑌾𑌨𑍇 𑌦𑍋𑌷𑌸𑍍𑌸𑍍𑌯𑌾𑌦𑍍𑌦𑍋𑌷𑌸𑍍𑌸𑍍𑌯𑌾𑌦𑌨𑌿𑌵𑍇𑌦𑌨𑍇 ॥ 1 ॥
𑌕𑌥𑌂 𑌨𑍁 𑌖𑌲𑍁 𑌕𑌰𑍍𑌤𑌵𑍍𑌯𑌂 𑌵𑌿𑌷𑌮𑌂 𑌪𑍍𑌰𑌤𑌿𑌭𑌾𑌤𑌿 𑌮𑍇 ।
𑌅𑌸𑍍𑌮𑌿𑌨𑍍𑌨𑍇𑌵𑌂𑌗𑌤𑍇 𑌕𑌾𑌰𑍍𑌯𑍇 𑌪𑍍𑌰𑌾𑌪𑍍𑌤𑌕𑌾𑌲𑌂 𑌕𑍍𑌷𑌮𑌂 𑌚 𑌕𑌿𑌮𑍍 ॥ 1 ॥
𑌭𑌵𑍇𑌦𑌿𑌤𑌿 𑌮𑌤𑌂 𑌭𑍂𑌯𑍋 𑌹𑌨𑍁𑌮𑌾𑌨𑍍𑌪𑍍𑌰𑌵𑌿𑌚𑌾𑌰𑌯𑌤𑍍 ।
𑌯𑌦𑌿 𑌸𑍀𑌤𑌾𑌮𑌦𑍃𑌷𑍍𑌟𑍍𑌵𑌾𑌽𑌹𑌂 𑌵𑌾𑌨𑌰𑍇𑌂𑌦𑍍𑌰𑌪𑍁𑌰𑍀𑌮𑌿𑌤𑌃 ॥ 20 ॥
𑌗𑌮𑌿𑌷𑍍𑌯𑌾𑌮𑌿 𑌤𑌤𑌃 𑌕𑍋 𑌮𑍇 𑌪𑍁𑌰𑍁𑌷𑌾𑌰𑍍𑌥𑍋 𑌭𑌵𑌿𑌷𑍍𑌯𑌤𑌿 ।
𑌮𑌮𑍇𑌦𑌂 𑌲𑌂𑌘𑌨𑌂 𑌵𑍍𑌯𑌰𑍍𑌥𑌂 𑌸𑌾𑌗𑌰𑌸𑍍𑌯 𑌭𑌵𑌿𑌷𑍍𑌯𑌤𑌿 ॥ 21 ॥
𑌪𑍍𑌰𑌵𑍇𑌶𑌶𑍍𑌚𑍈𑌵 𑌲𑌂𑌕𑌾𑌯𑌾𑌃 𑌰𑌾𑌕𑍍𑌷𑌸𑌾𑌨𑌾𑌂 𑌚 𑌦𑌰𑍍𑌶𑌨𑌮𑍍 ।
𑌕𑌿𑌂 𑌮𑌾𑌂 𑌵𑌕𑍍𑌷𑍍𑌯𑌤𑌿 𑌸𑍁𑌗𑍍𑌰𑍀𑌵𑍋 𑌹𑌰𑌯𑍋 𑌵𑌾 𑌸𑌮𑌾𑌗𑌤𑌾𑌃 ॥ 22 ॥
𑌕𑌿𑌷𑍍𑌕𑌿𑌂𑌧𑌾𑌂 𑌸𑌮𑌨𑍁𑌪𑍍𑌰𑌾𑌪𑍍𑌤𑌂 𑌤𑍌 𑌵𑌾 𑌦𑌶𑌰𑌥𑌾𑌤𑍍𑌮𑌜𑍌 ।
𑌗𑌤𑍍𑌵𑌾 𑌤𑍁 𑌯𑌦𑌿 𑌕𑌾𑌕𑍁𑌤𑍍𑌸𑍍𑌥𑌂 𑌵𑌕𑍍𑌷𑍍𑌯𑌾𑌮𑌿 𑌪𑌰𑌮𑌪𑍍𑌰𑌿𑌯𑌮𑍍 ॥ 23 ॥
𑌨 𑌦𑍃𑌷𑍍𑌟𑍇𑌤𑌿 𑌮𑌯𑌾 𑌸𑍀𑌤𑌾 𑌤𑌤𑌸𑍍𑌤𑌕𑍍𑌷𑍍𑌯𑌤𑌿 𑌜𑍀𑌵𑌿𑌤𑌮𑍍 ।
𑌪𑌰𑍁𑌷𑌂 𑌦𑌾𑌰𑍁𑌣𑌂 𑌕𑍍𑌰𑍂𑌰𑌂 𑌤𑍀𑌕𑍍𑌷𑍍𑌣𑌮𑌿𑌂𑌦𑍍𑌰𑌿𑌯𑌤𑌾𑌪𑌨𑌮𑍍 ॥ 24 ॥
𑌸𑍀𑌤𑌾𑌨𑌿𑌮𑌿𑌤𑍍𑌤𑌂 𑌦𑍁𑌰𑍍𑌵𑌾𑌕𑍍𑌯𑌂 𑌶𑍍𑌰𑍁𑌤𑍍𑌵𑌾 𑌸 𑌨 𑌭𑌵𑌿𑌷𑍍𑌯𑌤𑌿 ।
𑌤𑌂 𑌤𑍁 𑌕𑍃𑌚𑍍𑌛𑍍𑌰𑌗𑌤𑌂 𑌦𑍃𑌷𑍍𑌟𑍍𑌵𑌾 𑌪𑌂𑌚𑌤𑍍𑌵𑌗𑌤𑌮𑌾𑌨𑌸𑌮𑍍 ॥ 25 ॥
𑌭𑍃𑌶𑌾𑌨𑍁𑌰𑌕𑍍𑌤𑍋 𑌮𑍇𑌧𑌾𑌵𑍀 𑌨 𑌭𑌵𑌿𑌷𑍍𑌯𑌤𑌿 𑌲𑌕𑍍𑌷𑍍𑌮𑌣𑌃 ।
𑌵𑌿𑌨𑌷𑍍𑌟𑍌 𑌭𑍍𑌰𑌾𑌤𑌰𑍌 𑌶𑍍𑌰𑍁𑌤𑍍𑌵𑌾 𑌭𑌰𑌤𑍋𑌽𑌪𑌿 𑌮𑌰𑌿𑌷𑍍𑌯𑌤𑌿 ॥ 26 ॥
𑌭𑌰𑌤𑌂 𑌚 𑌮𑍃𑌤𑌂 𑌦𑍃𑌷𑍍𑌟𑍍𑌵𑌾 𑌶𑌤𑍍𑌰𑍁𑌘𑍍𑌨𑍋 𑌨 𑌭𑌵𑌿𑌷𑍍𑌯𑌤𑌿 ।
𑌪𑍁𑌤𑍍𑌰𑌾𑌨𑍍𑌮𑍃𑌤𑌾𑌨𑍍𑌸𑌮𑍀𑌕𑍍𑌷𑍍𑌯𑌾𑌥 𑌨 𑌭𑌵𑌿𑌷𑍍𑌯𑌂𑌤𑌿 𑌮𑌾𑌤𑌰𑌃 ॥ 2 ॥
𑌕𑍌𑌸𑌲𑍍𑌯𑌾 𑌚 𑌸𑍁𑌮𑌿𑌤𑍍𑌰𑌾 𑌚 𑌕𑍈𑌕𑍇𑌯𑍀 𑌚 𑌨 𑌸𑌂𑌶𑌯𑌃 ।
𑌕𑍃𑌤𑌜𑍍𑌞𑌸𑍍𑌸𑌤𑍍𑌯𑌸𑌂𑌧𑌶𑍍𑌚 𑌸𑍁𑌗𑍍𑌰𑍀𑌵𑌃 𑌪𑍍𑌲𑌵𑌗𑌾𑌧𑌿𑌪𑌃 ॥ 2 ॥
𑌰𑌾𑌮𑌂 𑌤𑌥𑌾 𑌗𑌤𑌂 𑌦𑍃𑌷𑍍𑌟𑍍𑌵𑌾 𑌤𑌤𑌸𑍍𑌤𑍍𑌯𑌕𑍍𑌷𑍍𑌯𑌤𑌿 𑌜𑍀𑌵𑌿𑌤𑌮𑍍 ।
𑌦𑍁𑌰𑍍𑌮𑌨𑌾 𑌵𑍍𑌯𑌥𑌿𑌤𑌾 𑌦𑍀𑌨𑌾 𑌨𑌿𑌰𑌾𑌨𑌂𑌦𑌾 𑌤𑌪𑌸𑍍𑌵𑌿𑌨𑍀 ॥ 2 ॥
𑌪𑍀𑌡𑌿𑌤𑌾 𑌭𑌰𑍍𑌤𑍃𑌶𑍋𑌕𑍇𑌨 𑌰𑍁𑌮𑌾 𑌤𑍍𑌯𑌕𑍍𑌷𑍍𑌯𑌤𑌿 𑌜𑍀𑌵𑌿𑌤𑌮𑍍 ।
𑌵𑌾𑌲𑌿𑌜𑍇𑌨 𑌤𑍁 𑌦𑍁𑌃𑌖𑍇𑌨 𑌪𑍀𑌡𑌿𑌤𑌾 𑌶𑍋𑌕𑌕𑌰𑍍𑌶𑌿𑌤𑌾 ॥ 30 ॥
𑌪𑌂𑌚𑌤𑍍𑌵𑌂 𑌚 𑌗𑌤𑍇 𑌰𑌾𑌜𑍍𑌞𑌿 𑌤𑌾𑌰𑌾𑌽𑌪𑌿 𑌨 𑌭𑌵𑌿𑌷𑍍𑌯𑌤𑌿 ।
𑌮𑌾𑌤𑌾𑌪𑌿𑌤𑍍𑌰𑍋𑌰𑍍𑌵𑌿𑌨𑌾𑌶𑍇𑌨 𑌸𑍁𑌗𑍍𑌰𑍀𑌵𑌵𑍍𑌯𑌸𑌨𑍇𑌨 𑌚 ॥ 31 ॥
𑌕𑍁𑌮𑌾𑌰𑍋𑌽𑌪𑍍𑌯𑌂𑌗𑌦𑌃 𑌕𑌸𑍍𑌮𑌾𑌦𑍍𑌧𑌾𑌰𑌯𑌿𑌷𑍍𑌯𑌤𑌿 𑌜𑍀𑌵𑌿𑌤𑌮𑍍 ।
𑌭𑌰𑍍𑌤𑍃𑌜𑍇𑌨 𑌤𑍁 𑌦𑍁𑌃𑌖𑍇𑌨 𑌹𑍍𑌯𑌭𑌿𑌭𑍂𑌤𑌾 𑌵𑌨𑍌𑌕𑌸𑌃 ॥ 32 ॥
𑌶𑌿𑌰𑌾𑌂𑌸𑍍𑌯𑌭𑌿𑌹𑌨𑌿𑌷𑍍𑌯𑌂𑌤𑌿 𑌤𑌲𑍈𑌰𑍍𑌮𑍁𑌷𑍍𑌟𑌿𑌭𑌿𑌰𑍇𑌵 𑌚 ।
𑌸𑌾𑌂𑌤𑍍𑌵𑍇𑌨𑌾𑌨𑍁𑌪𑍍𑌰𑌦𑌾𑌨𑍇𑌨 𑌮𑌾𑌨𑍇𑌨 𑌚 𑌯𑌶𑌸𑍍𑌵𑌿𑌨𑌾 ॥ 33 ॥
𑌲𑌾𑌲𑌿𑌤𑌾𑌃 𑌕𑌪𑌿𑌰𑌾𑌜𑍇𑌨 𑌪𑍍𑌰𑌾𑌣𑌾𑌂𑌸𑍍𑌤𑍍𑌯𑌕𑍍𑌷𑍍𑌯𑌂𑌤𑌿 𑌵𑌾𑌨𑌰𑌾𑌃 ।
𑌨 𑌵𑌨𑍇𑌷𑍁 𑌨 𑌶𑍈𑌲𑍇𑌷𑍁 𑌨 𑌨𑌿𑌰𑍋𑌧𑍇𑌷𑍁 𑌵𑌾 𑌪𑍁𑌨𑌃 ॥ 34 ॥
𑌕𑍍𑌰𑍀𑌡𑌾𑌮𑌨𑍁𑌭𑌵𑌿𑌷𑍍𑌯𑌂𑌤𑌿 𑌸𑌮𑍇𑌤𑍍𑌯 𑌕𑌪𑌿𑌕𑍁𑌂𑌜𑌰𑌾𑌃 ।
𑌸𑌪𑍁𑌤𑍍𑌰𑌦𑌾𑌰𑌾𑌸𑍍𑌸𑌾𑌮𑌾𑌤𑍍𑌯𑌾 𑌭𑌰𑍍𑌤𑍃𑌵𑍍𑌯𑌸𑌨𑌪𑍀𑌡𑌿𑌤𑌾𑌃 ॥ 35 ॥
𑌶𑍈𑌲𑌾𑌗𑍍𑌰𑍇𑌭𑍍𑌯𑌃 𑌪𑌤𑌿𑌷𑍍𑌯𑌂𑌤𑌿 𑌸𑌮𑍇𑌷𑍁 𑌵𑌿𑌷𑌮𑍇𑌷𑍁 𑌚 ।
𑌵𑌿𑌷𑌮𑍁𑌦𑍍𑌬𑌂𑌧𑌨𑌂 𑌵𑌾𑌪𑌿 𑌪𑍍𑌰𑌵𑍇𑌶𑌂 𑌜𑍍𑌵𑌲𑌨𑌸𑍍𑌯 𑌵𑌾 ॥ 36 ॥
𑌉𑌪𑌵𑌾𑌸𑌮𑌥𑍋 𑌶𑌸𑍍𑌤𑍍𑌰𑌂 𑌪𑍍𑌰𑌚𑌰𑌿𑌷𑍍𑌯𑌂𑌤𑌿 𑌵𑌾𑌨𑌰𑌾𑌃 ।
𑌘𑍋𑌰𑌮𑌾𑌰𑍋𑌦𑌨𑌂 𑌮𑌨𑍍𑌯𑍇 𑌗𑌤𑍇 𑌮𑌯𑌿 𑌭𑌵𑌿𑌷𑍍𑌯𑌤𑌿 ॥ 3 ॥
𑌇𑌕𑍍𑌷𑍍𑌵𑌾𑌕𑍁𑌕𑍁𑌲𑌨𑌾𑌶𑌶𑍍𑌚 𑌨𑌾𑌶𑌶𑍍𑌚𑍈𑌵 𑌵𑌨𑍌𑌕𑌸𑌾𑌮𑍍 ।
𑌸𑍋𑌽𑌹𑌂 𑌨𑍈𑌵 𑌗𑌮𑌿𑌷𑍍𑌯𑌾𑌮𑌿 𑌕𑌿𑌷𑍍𑌕𑌿𑌂𑌧𑌾𑌂 𑌨𑌗𑌰𑍀𑌮𑌿𑌤𑌃 ॥ 3 ॥
𑌨 𑌚 𑌶𑌕𑍍𑌷𑍍𑌯𑌾𑌮𑍍𑌯𑌹𑌂 𑌦𑍍𑌰𑌷𑍍𑌟𑍁𑌂 𑌸𑍁𑌗𑍍𑌰𑍀𑌵𑌂 𑌮𑍈𑌥𑌿𑌲𑍀𑌂 𑌵𑌿𑌨𑌾 ।
𑌮𑌯𑍍𑌯𑌗𑌚𑍍𑌛𑌤𑌿 𑌚𑍇𑌹𑌸𑍍𑌥𑍇 𑌧𑌰𑍍𑌮𑌾𑌤𑍍𑌮𑌾𑌨𑍌 𑌮𑌹𑌾𑌰𑌥𑍌 ॥ 3 ॥
𑌆𑌶𑌯𑌾 𑌤𑍌 𑌧𑌰𑌿𑌷𑍍𑌯𑍇𑌤𑍇 𑌵𑌾𑌨𑌰𑌾𑌶𑍍𑌚 𑌮𑌨𑌸𑍍𑌵𑌿𑌨𑌃 ।
𑌹𑌸𑍍𑌤𑌾𑌦𑌾𑌨𑍋 𑌮𑍁𑌖𑌾𑌦𑌾𑌨𑍋 𑌨𑌿𑌯𑌤𑍋 𑌵𑍃𑌕𑍍𑌷𑌮𑍂𑌲𑌿𑌕𑌃 ॥ 40 ॥
𑌵𑌾𑌨𑌪𑍍𑌰𑌸𑍍𑌥𑍋 𑌭𑌵𑌿𑌷𑍍𑌯𑌾𑌮𑌿 𑌹𑍍𑌯𑌦𑍃𑌷𑍍𑌟𑍍𑌵𑌾 𑌜𑌨𑌕𑌾𑌤𑍍𑌮𑌜𑌾𑌮𑍍 ।
𑌸𑌾𑌗𑌰𑌾𑌨𑍂𑌪𑌜𑍇 𑌦𑍇𑌶𑍇 𑌬𑌹𑍁𑌮𑍂𑌲𑌫𑌲𑍋𑌦𑌕𑍇 ॥ 41 ॥
𑌚𑌿𑌤𑌾𑌂 𑌕𑍃𑌤𑍍𑌵𑌾 𑌪𑍍𑌰𑌵𑍇𑌕𑍍𑌷𑍍𑌯𑌾𑌮𑌿 𑌸𑌮𑌿𑌦𑍍𑌧𑌮𑌰𑌣𑍀𑌸𑍁𑌤𑌮𑍍 ।
𑌉𑌪𑌵𑌿𑌷𑍍𑌟𑌸𑍍𑌯 𑌵𑌾 𑌸𑌮𑍍𑌯𑌗𑍍𑌲𑌿𑌂𑌗𑌿𑌨𑍀𑌂 𑌸𑌾𑌧𑌯𑌿𑌷𑍍𑌯𑌤𑌃 ॥ 42 ॥
𑌶𑌰𑍀𑌰𑌂 𑌭𑌕𑍍𑌷𑌯𑌿𑌷𑍍𑌯𑌂𑌤𑌿 𑌵𑌾𑌯𑌸𑌾𑌃 𑌶𑍍𑌵𑌾𑌪𑌦𑌾𑌨𑌿 𑌚 ।
𑌇𑌦𑌂 𑌮𑌹𑌰𑍍𑌷𑌿𑌭𑌿𑌰𑍍𑌦𑍃𑌷𑍍𑌟𑌂 𑌨𑌿𑌰𑍍𑌯𑌾𑌣𑌮𑌿𑌤𑌿 𑌮𑍇 𑌮𑌤𑌿𑌃 ॥ 43 ॥
𑌸𑌮𑍍𑌯𑌗𑌾𑌪𑌃 𑌪𑍍𑌰𑌵𑍇𑌕𑍍𑌷𑍍𑌯𑌾𑌮𑌿 𑌨 𑌚𑍇𑌤𑍍𑌪𑌶𑍍𑌯𑌾𑌮𑌿 𑌜𑌾𑌨𑌕𑍀𑌮𑍍 ।
𑌸𑍁𑌜𑌾𑌤𑌮𑍂𑌲𑌾 𑌸𑍁𑌭𑌗𑌾 𑌕𑍀𑌰𑍍𑌤𑌿𑌮𑌾𑌲𑌾 𑌯𑌶𑌸𑍍𑌵𑌿𑌨𑍀 ॥ 44 ॥
𑌪𑍍𑌰𑌭𑌗𑍍𑌨𑌾 𑌚𑌿𑌰𑌰𑌾𑌤𑍍𑌰𑍀𑌯𑌂 𑌮𑌮 𑌸𑍀𑌤𑌾𑌮𑌪𑌶𑍍𑌯𑌤𑌃 ।
𑌤𑌾𑌪𑌸𑍋 𑌵𑌾 𑌭𑌵𑌿𑌷𑍍𑌯𑌾𑌮𑌿 𑌨𑌿𑌯𑌤𑍋 𑌵𑍃𑌕𑍍𑌷𑌮𑍂𑌲𑌿𑌕𑌃 ॥ 45 ॥
𑌨𑍇𑌤𑌃 𑌪𑍍𑌰𑌤𑌿𑌗𑌮𑌿𑌷𑍍𑌯𑌾𑌮𑌿 𑌤𑌾𑌮𑌦𑍃𑌷𑍍𑌟𑍍𑌵𑌾𑌸𑌿𑌤𑍇𑌕𑍍𑌷𑌣𑌾𑌮𑍍 ।
𑌯𑌦𑍀𑌤𑌃 𑌪𑍍𑌰𑌤𑌿𑌗𑌚𑍍𑌛𑌾𑌮𑌿 𑌸𑍀𑌤𑌾𑌮𑌨𑌧𑌿𑌗𑌮𑍍𑌯 𑌤𑌾𑌮𑍍 ॥ 46 ॥
𑌅𑌂𑌗𑌦𑌸𑍍𑌸𑌹 𑌤𑍈𑌸𑍍𑌸𑌰𑍍𑌵𑍈𑌰𑍍𑌵𑌾𑌨𑌰𑍈𑌰𑍍𑌨 𑌭𑌵𑌿𑌷𑍍𑌯𑌤𑌿 ।
𑌵𑌿𑌨𑌾𑌶𑍇 𑌬𑌹𑌵𑍋 𑌦𑍋𑌷𑌾 𑌜𑍀𑌵𑌨𑍍 𑌭𑌦𑍍𑌰𑌾𑌣𑌿 𑌪𑌶𑍍𑌯𑌤𑌿 ॥ 4 ॥
𑌤𑌸𑍍𑌮𑌾𑌤𑍍𑌪𑍍𑌰𑌾𑌣𑌾𑌨𑍍 𑌧𑌰𑌿𑌷𑍍𑌯𑌾𑌮𑌿 𑌧𑍍𑌰𑍁𑌵𑍋 𑌜𑍀𑌵𑌿𑌤𑌸𑌂𑌗𑌮𑌃 ।
𑌏𑌵𑌂 𑌬𑌹𑍁𑌵𑌿𑌧𑌂 𑌦𑍁𑌃𑌖𑌂 𑌮𑌨𑌸𑌾 𑌧𑌰𑌾𑌯𑌨𑍍𑌮𑍁𑌹𑍁𑌃 ॥ 4 ॥
𑌨𑌾𑌧𑍍𑌯𑌗𑌚𑍍𑌛𑌤𑍍𑌤𑌦𑌾 𑌪𑌾𑌰𑌂 𑌶𑍋𑌕𑌸𑍍𑌯 𑌕𑌪𑌿𑌕𑍁𑌂𑌚𑌰𑌃 ।
𑌰𑌾𑌵𑌣𑌂 𑌵𑌾 𑌵𑌧𑌿𑌷𑍍𑌯𑌾𑌮𑌿 𑌦𑌶𑌗𑍍𑌰𑍀𑌵𑌂 𑌮𑌹𑌾𑌬𑌲𑌮𑍍 ॥ 4 ॥
𑌕𑌾𑌮𑌮𑌸𑍍𑌤𑍁 𑌹𑍃𑌤𑌾 𑌸𑍀𑌤𑌾 𑌪𑍍𑌰𑌤𑍍𑌯𑌾𑌚𑍀𑌰𑍍𑌣𑌂 𑌭𑌵𑌿𑌷𑍍𑌯𑌤𑌿 ।
𑌅𑌥𑌵𑍈𑌨𑌂 𑌸𑌮𑍁𑌤𑍍𑌕𑍍𑌷𑌿𑌪𑍍𑌯 𑌉𑌪𑌰𑍍𑌯𑍁𑌪𑌰𑌿 𑌸𑌾𑌗𑌰𑌮𑍍 ॥ 50 ॥
𑌰𑌾𑌮𑌾𑌯𑍋𑌪𑌹𑌰𑌿𑌷𑍍𑌯𑌾𑌮𑌿 𑌪𑌶𑍁𑌂 𑌪𑌶𑍁𑌪𑌤𑍇𑌰𑌿𑌵 ।
𑌇𑌤𑌿 𑌚𑌿𑌂𑌤𑌾𑌂 𑌸𑌮𑌾𑌪𑌨𑍍𑌨𑌃 𑌸𑍀𑌤𑌾𑌮𑌨𑌧𑌿𑌗𑌮𑍍𑌯 𑌤𑌾𑌮𑍍 ॥ 51 ॥
𑌧𑍍𑌯𑌾𑌨𑌶𑍋𑌕𑌪𑌰𑍀𑌤𑌾𑌤𑍍𑌮𑌾 𑌚𑌿𑌂𑌤𑌯𑌾𑌮𑌾𑌸 𑌵𑌾𑌨𑌰𑌃 ।
𑌯𑌾𑌵𑌤𑍍𑌸𑍀𑌤𑌾𑌂 𑌹𑌿 𑌪𑌶𑍍𑌯𑌾𑌮𑌿 𑌰𑌾𑌮𑌪𑌤𑍍𑌨𑍀𑌂 𑌯𑌶𑌸𑍍𑌵𑌿𑌨𑍀𑌮𑍍 ॥ 52 ॥
𑌤𑌾𑌵𑌦𑍇𑌤𑌾𑌂 𑌪𑍁𑌰𑍀𑌂 𑌲𑌂𑌕𑌾𑌂 𑌵𑌿𑌚𑌿𑌨𑍋𑌮𑌿 𑌪𑍁𑌨𑌃 𑌪𑍁𑌨𑌃 ।
𑌸𑌂𑌪𑌾𑌤𑌿𑌵𑌚𑌨𑌾𑌚𑍍𑌚𑌾𑌪𑌿 𑌰𑌾𑌮𑌂 𑌯𑌦𑍍𑌯𑌾𑌨𑌯𑌾𑌮𑍍𑌯𑌹𑌮𑍍 ॥ 53 ॥
𑌅𑌪𑌶𑍍𑌯𑌨𑍍 𑌰𑌾𑌘𑌵𑍋 𑌭𑌾𑌰𑍍𑌯𑌾𑌂 𑌨𑌿𑌰𑍍𑌧𑌹𑍇𑌤𑍍𑌸𑌰𑍍𑌵𑌵𑌾𑌨𑌰𑌾𑌨𑍍 ।
𑌇𑌹𑍈𑌵 𑌨𑌿𑌯𑌤𑌾𑌹𑌾𑌰𑍋 𑌵𑌤𑍍𑌸𑍍𑌯𑌾𑌮𑌿 𑌨𑌿𑌯𑌤𑍇𑌂𑌦𑍍𑌰𑌿𑌯𑌃 ॥ 54 ॥
𑌨 𑌮𑌤𑍍𑌕𑍃𑌤𑍇 𑌵𑌿𑌨𑌶𑍍𑌯𑍇𑌯𑍁𑌃 𑌸𑌰𑍍𑌵𑍇 𑌤𑍇 𑌨𑌰𑌵𑌾𑌨𑌰𑌾𑌃 ।
𑌅𑌶𑍋𑌕𑌵𑌨𑌿𑌕𑌾 𑌚𑍇𑌯𑌂 𑌦𑍃𑌶𑍍𑌯𑌤𑍇 𑌯𑌾 𑌮𑌹𑌾𑌦𑍍𑌰𑍁𑌮𑌾 ॥ 55 ॥
𑌇𑌮𑌾𑌮𑌧𑌿𑌗𑌮𑌿𑌷𑍍𑌯𑌾𑌮𑌿 𑌨 𑌹𑍀𑌯𑌂 𑌵𑌿𑌚𑌿𑌤𑌾 𑌮𑌯𑌾 ।
𑌵𑌸𑍂𑌨𑍍𑌰𑍁𑌦𑍍𑌰𑌾𑌂𑌸𑍍𑌤𑌥𑌾𑌽𑌦𑌿𑌤𑍍𑌯𑌾𑌨𑌶𑍍𑌵𑌿𑌨𑍌 𑌮𑌰𑍁𑌤𑍋𑌽𑌪𑌿 𑌚 ॥ 56 ॥
𑌨𑌮𑌸𑍍𑌕𑍃𑌤𑍍𑌵𑌾 𑌗𑌮𑌿𑌷𑍍𑌯𑌾𑌮𑌿 𑌰𑌕𑍍𑌷𑌸𑌾𑌂 𑌶𑍋𑌕𑌵𑌰𑍍𑌧𑌨𑌃 ।
𑌜𑌿𑌤𑍍𑌵𑌾 𑌤𑍁 𑌰𑌾𑌕𑍍𑌷𑌸𑌾𑌨𑍍 𑌸𑌰𑍍𑌵𑌾𑌨𑌿𑌕𑍍𑌷𑍍𑌵𑌾𑌕𑍁𑌕𑍁𑌲𑌨𑌂𑌦𑌿𑌨𑍀𑌮𑍍 ॥ 5 ॥
𑌸𑌂𑌪𑍍𑌰𑌦𑌾𑌸𑍍𑌯𑌾𑌮𑌿 𑌰𑌾𑌮𑌾𑌯 𑌯𑌥𑌾 𑌸𑌿𑌦𑍍𑌧𑌿𑌂 𑌤𑌪𑌸𑍍𑌵𑌿𑌨𑍇 ।
𑌸𑌃 𑌮𑍁𑌹𑍂𑌰𑍍𑌤𑌮𑌿𑌵 𑌧𑍍𑌯𑌾𑌤𑍍𑌵𑌾 𑌚𑌿𑌂𑌤𑌾𑌵𑌗𑍍𑌰𑌥𑌿𑌤𑍇𑌂𑌦𑍍𑌰𑌿𑌯𑌃 ॥ 5 ॥
𑌉𑌦𑌤𑌿𑌷𑍍𑌠𑌨𑍍𑌮𑌹𑌾𑌤𑍇𑌜𑌾 𑌹𑌨𑍁𑌮𑌾𑌨𑍍 𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌨𑌮𑍋𑌽𑌸𑍍𑌤𑍁 𑌰𑌾𑌮𑌾𑌯 𑌸𑌲𑌕𑍍𑌷𑍍𑌮𑌣𑌾𑌯 𑌦𑍇𑌵𑍍𑌯𑍈 𑌚 𑌤𑌸𑍍𑌯𑍈 𑌜𑌨𑌕𑌾𑌤𑍍𑌮𑌜𑌾𑌯𑍈 ।
𑌨𑌮𑍋𑌽𑌸𑍍𑌤𑍁 𑌰𑍁𑌦𑍍𑌰𑍇𑌂𑌦𑍍𑌰𑌯𑌮𑌾𑌨𑌿𑌲𑍇𑌭𑍍𑌯𑍋 𑌨𑌮𑍋𑌽𑌸𑍍𑌤𑍁 𑌚𑌂𑌦𑍍𑌰𑌾𑌰𑍍𑌕𑌮𑌰𑍁𑌦𑍍𑌗𑌣𑍇𑌭𑍍𑌯𑌃 ॥ 5 ॥
𑌸 𑌤𑍇𑌭𑍍𑌯𑌸𑍍𑌤𑍁 𑌨𑌮𑌸𑍍𑌕𑍃𑌤𑍍𑌯 𑌸𑍁𑌗𑍍𑌰𑍀𑌵𑌾𑌯 𑌚 𑌮𑌾𑌰𑍁𑌤𑌿𑌃 ।
𑌦𑌿𑌶𑌸𑍍𑌸𑌰𑍍𑌵𑌾𑌸𑍍𑌸𑌮𑌾𑌲𑍋𑌕𑍍𑌯 𑌹𑍍𑌯𑌶𑍋𑌕𑌵𑌨𑌿𑌕𑌾𑌂 𑌪𑍍𑌰𑌤𑌿 ॥ 60 ॥
𑌸 𑌗𑌤𑍍𑌵𑌾 𑌮𑌨𑌸𑌾 𑌪𑍂𑌰𑍍𑌵𑌮𑌶𑍋𑌕𑌵𑌨𑌿𑌕𑌾𑌂 𑌶𑍁𑌭𑌾𑌮𑍍 ।
𑌉𑌤𑍍𑌤𑌰𑌂 𑌚𑌿𑌂𑌤𑌯𑌾𑌮𑌾𑌸 𑌵𑌾𑌨𑌰𑍋 𑌮𑌾𑌰𑍁𑌤𑌾𑌤𑍍𑌮𑌜𑌃 ॥ 61 ॥
𑌧𑍍𑌰𑍁𑌵𑌂 𑌤𑍁 𑌰𑌕𑍍𑌷𑍋𑌬𑌹𑍁𑌲𑌾 𑌭𑌵𑌿𑌷𑍍𑌯𑌤𑌿 𑌵𑌨𑌾𑌕𑍁𑌲𑌾 ।
𑌅𑌶𑍋𑌕𑌵𑌨𑌿𑌕𑌾 𑌪𑍁𑌣𑍍𑌯𑌾 𑌸𑌰𑍍𑌵𑌸𑌂𑌸𑍍𑌕𑌾𑌰𑌸𑌂𑌸𑍍𑌕𑍃𑌤𑌾 ॥ 62 ॥
𑌰𑌕𑍍𑌷𑌿𑌣𑌶𑍍𑌚𑌾𑌤𑍍𑌰 𑌵𑌿𑌹𑌿𑌤𑌾 𑌨𑍂𑌨𑌂 𑌰𑌕𑍍𑌷𑌂𑌤𑌿 𑌪𑌾𑌦𑌪𑌾𑌨𑍍 ।
𑌭𑌗𑌵𑌾𑌨𑌪𑌿 𑌸𑌰𑍍𑌵𑌾𑌤𑍍𑌮𑌾 𑌨𑌾𑌤𑌿𑌕𑍍𑌷𑍋𑌭𑌂 𑌪𑍍𑌰𑌵𑌾𑌤𑌿 𑌵𑍈 ॥ 63 ॥
𑌸𑌂𑌕𑍍𑌷𑌿𑌪𑍍𑌤𑍋𑌽𑌯𑌂 𑌮𑌯𑌾𑌽𑌤𑍍𑌮𑌾 𑌚 𑌰𑌾𑌮𑌾𑌰𑍍𑌥𑍇 𑌰𑌾𑌵𑌣𑌸𑍍𑌯 𑌚 ।
𑌸𑌿𑌦𑍍𑌧𑌿𑌂 𑌮𑍇 𑌸𑌂𑌵𑌿𑌧𑌾𑌸𑍍𑌯𑌂𑌤𑌿 𑌦𑍇𑌵𑌾𑌃 𑌸𑌰𑍍𑌷𑌿𑌗𑌣𑌾𑌸𑍍𑌤𑍍𑌵𑌿𑌹 ॥ 64 ॥
𑌬𑍍𑌰𑌹𑍍𑌮𑌾 𑌸𑍍𑌵𑌯𑌂𑌭𑍂𑌰𑍍𑌭𑌗𑌵𑌾𑌨𑍍 𑌦𑍇𑌵𑌾𑌶𑍍𑌚𑍈𑌵 𑌦𑌿𑌶𑌂𑌤𑍁 𑌮𑍇 ।
𑌸𑌿𑌦𑍍𑌧𑌿𑌮𑌗𑍍𑌨𑌿𑌶𑍍𑌚 𑌵𑌾𑌯𑍁𑌶𑍍𑌚 𑌪𑍁𑌰𑍁𑌹𑍂𑌤𑌶𑍍𑌚 𑌵𑌜𑍍𑌰𑌭𑍃𑌤𑍍 ॥ 65 ॥
𑌵𑌰𑍁𑌣𑌃 𑌪𑌾𑌶𑌹𑌸𑍍𑌤𑌶𑍍𑌚 𑌸𑍋𑌮𑌾𑌦𑌿𑌤𑍍𑌯𑍌 𑌤𑌥𑍈𑌵 𑌚 ।
𑌅𑌶𑍍𑌵𑌿𑌨𑍌 𑌚 𑌮𑌹𑌾𑌤𑍍𑌮𑌾𑌨𑍌 𑌮𑌰𑍁𑌤𑌃 𑌶𑌰𑍍𑌵 𑌏𑌵 𑌚 ॥ 66 ॥
𑌸𑌿𑌦𑍍𑌧𑌿𑌂 𑌸𑌰𑍍𑌵𑌾𑌣𑌿 𑌭𑍂𑌤𑌾𑌨𑌿 𑌭𑍂𑌤𑌾𑌨𑌾𑌂 𑌚𑍈𑌵 𑌯𑌃 𑌪𑍍𑌰𑌭𑍁𑌃 ।
𑌦𑌾𑌸𑍍𑌯𑌂𑌤𑌿 𑌮𑌮 𑌯𑍇 𑌚𑌾𑌨𑍍𑌯𑍇 𑌹𑍍𑌯𑌦𑍃𑌷𑍍𑌟𑌾𑌃 𑌪𑌥𑌿 𑌗𑍋𑌚𑌰𑌾𑌃 ॥ 6 ॥
𑌤𑌦𑍁𑌨𑍍𑌨𑌸𑌂 𑌪𑌾𑌂𑌡𑍁𑌰𑌦𑌂𑌤𑌮𑌵𑍍𑌰𑌣𑌂 𑌶𑍁𑌚𑌿𑌸𑍍𑌮𑌿𑌤𑌂 𑌪𑌦𑍍𑌮𑌪𑌲𑌾𑌶𑌲𑍋𑌚𑌨𑌮𑍍 ।
𑌦𑍍𑌰𑌕𑍍𑌷𑍍𑌯𑍇 𑌤𑌦𑌾𑌰𑍍𑌯𑌾𑌵𑌦𑌨𑌂 𑌕𑌦𑌾𑌨𑍍𑌵𑌹𑌂 𑌪𑍍𑌰𑌸𑌨𑍍𑌨𑌤𑌾𑌰𑌾𑌧𑌿𑌪𑌤𑍁𑌲𑍍𑌯𑌦𑌰𑍍𑌶𑌨𑌮𑍍 ॥ 6 ॥
𑌕𑍍𑌷𑍁𑌦𑍍𑌰𑍇𑌣 𑌪𑌾𑌪𑍇𑌨 𑌨𑍃𑌶𑌂𑌸𑌕𑌰𑍍𑌮𑌣𑌾 𑌸𑍁𑌦𑌾𑌰𑍁𑌣𑌾𑌲𑌂𑌕𑍃𑌤𑌵𑍇𑌷𑌧𑌾𑌰𑌿𑌣𑌾 ।
𑌬𑌲𑌾𑌭𑌿𑌭𑍂𑌤𑌾 𑌹𑍍𑌯𑌬𑌲𑌾 𑌤𑌪𑌸𑍍𑌵𑌿𑌨𑍀 𑌕𑌥𑌂 𑌨𑍁 𑌮𑍇 𑌦𑍃𑌷𑍍𑌟𑌿𑌪𑌥𑍇𑌽𑌦𑍍𑌯 𑌸𑌾 𑌭𑌵𑍇𑌤𑍍 ॥ 6 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌤𑍍𑌰𑌯𑍋𑌦𑌶𑌸𑍍𑌸𑌰𑍍𑌗𑌃 ॥
