𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌿𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌸𑌾 𑌤𑍁 𑌤𑌾𑌰𑌾𑌧𑌿𑌪𑌮𑍁𑌖𑍀 𑌰𑌾𑌵𑌣𑍇𑌨 𑌸𑌮𑍀𑌕𑍍𑌷𑍍𑌯 𑌤𑌮𑍍 ।
𑌗𑍃𑌧𑍍𑌰𑌰𑌾𑌜𑌂 𑌵𑌿𑌨𑌿𑌹𑌤𑌂 𑌵𑌿𑌲𑌲𑌾𑌪 𑌸𑍁𑌦𑍁𑌃𑌖𑌿𑌤𑌾 ॥ 1 ॥
𑌨𑌿𑌮𑌿𑌤𑍍𑌤𑌂 𑌲𑌕𑍍𑌷𑌣𑌜𑍍𑌞𑌾𑌨𑌂 𑌶𑌕𑍁𑌨𑌿𑌸𑍍𑌵𑌰𑌦𑌰𑍍𑌶𑌨𑌮𑍍 ।
𑌅𑌵𑌶𑍍𑌯𑌂 𑌸𑍁𑌖𑌦𑍁𑌃𑌖𑍇𑌷𑍁 𑌨𑌰𑌾𑌣𑌾𑌂 𑌪𑍍𑌰𑌤𑌿𑌦𑍃𑌶𑍍𑌯𑌤𑍇 ॥ 2 ॥
𑌨𑍂𑌨𑌂 𑌰𑌾𑌮 𑌨 𑌜𑌾𑌨𑌾𑌸𑌿 𑌮𑌹𑌦𑍍𑌵𑍍𑌯𑌸𑌨𑌮𑌾𑌤𑍍𑌮𑌨𑌃 ।
𑌧𑌾𑌵𑌂𑌤𑌿 𑌨𑍂𑌨𑌂 𑌕𑌾𑌕𑍁𑌤𑍍𑌸𑍍𑌥𑌂 𑌮𑌦𑌰𑍍𑌥𑌂 𑌮𑍃𑌗𑌪𑌕𑍍𑌷𑌿𑌣𑌃 ॥ 3 ॥
𑌅𑌯𑌂 𑌹𑌿 𑌪𑌾𑌪𑌚𑌾𑌰𑍇𑌣 𑌮𑌾𑌂 𑌤𑍍𑌰𑌾𑌤𑍁𑌮𑌭𑌿𑌸𑌂𑌗𑌤𑌃 ।
𑌶𑍇𑌤𑍇 𑌵𑌿𑌨𑌿𑌹𑌤𑍋 𑌭𑍂𑌮𑍌 𑌮𑌮𑌾𑌭𑌾𑌗𑍍𑌯𑌾𑌦𑍍𑌵𑌿𑌹𑌂𑌗𑌮𑌃 ॥ 4 ॥
𑌤𑍍𑌰𑌾𑌹𑌿 𑌮𑌾𑌮𑌦𑍍𑌯 𑌕𑌾𑌕𑍁𑌤𑍍𑌸𑍍𑌥 𑌲𑌕𑍍𑌷𑍍𑌮𑌣𑍇𑌤𑌿 𑌵𑌰𑌾𑌂𑌗𑌨𑌾 ।
𑌸𑍁𑌸𑌂𑌤𑍍𑌰𑌸𑍍𑌤𑌾 𑌸𑌮𑌾𑌕𑍍𑌰𑌂𑌦𑌚𑍍𑌛𑍃𑌣𑍍𑌵𑌤𑌾𑌂 𑌤𑍁 𑌯𑌥𑌾𑌂𑌤𑌿𑌕𑍇 ॥ 5 ॥
𑌤𑌾𑌂 𑌕𑍍𑌲𑌿𑌷𑍍𑌟𑌮𑌾𑌲𑍍𑌯𑌾𑌭𑌰𑌣𑌾𑌂 𑌵𑌿𑌲𑌪𑌂𑌤𑍀𑌮𑌨𑌾𑌥𑌵𑌤𑍍 ।
𑌅𑌭𑍍𑌯𑌧𑌾𑌵𑌤𑍍 𑌵𑍈𑌦𑍇𑌹𑍀𑌂 𑌰𑌾𑌵𑌣𑍋 𑌰𑌾𑌕𑍍𑌷𑌸𑌾𑌧𑌿𑌪𑌃 ॥ 6 ॥
𑌤𑌾𑌂 𑌲𑌤𑌾𑌮𑌿𑌵 𑌵𑍇𑌷𑍍𑌟𑌂𑌤𑍀𑌮𑌾𑌲𑌿𑌂𑌗𑌂𑌤𑍀𑌂 𑌮𑌹𑌾𑌦𑍍𑌰𑍁𑌮𑌾𑌨𑍍 ।
𑌮𑍁𑌂𑌚 𑌮𑍁𑌂𑌚𑍇𑌤𑌿 𑌬𑌹𑍁𑌶𑌃 𑌪𑍍𑌰𑌵𑌦𑌨𑍍𑌰𑌾𑌕𑍍𑌷𑌸𑌾𑌧𑌿𑌪𑌃 ॥ ॥
𑌕𑍍𑌰𑍋𑌶𑌂𑌤𑍀𑌂 𑌰𑌾𑌮 𑌰𑌾𑌮𑍇𑌤𑌿 𑌰𑌾𑌮𑍇𑌣 𑌰𑌹𑌿𑌤𑌾𑌂 𑌵𑌨𑍇 ।
𑌜𑍀𑌵𑌿𑌤𑌾𑌂𑌤𑌾𑌯 𑌕𑍇𑌶𑍇𑌷𑍁 𑌜𑌗𑍍𑌰𑌾𑌹𑌾𑌂𑌤𑌕𑌸𑌨𑍍𑌨𑌿𑌭𑌃 ॥ ॥
𑌪𑍍𑌰𑌧𑌰𑍍𑌷𑌿𑌤𑌾𑌯𑌾𑌂 𑌸𑍀𑌤𑌾𑌯𑌾𑌂 𑌬𑌭𑍂𑌵 𑌸𑌚𑌰𑌾𑌚𑌰𑌮𑍍 ।
𑌜𑌗𑌤𑍍𑌸𑌰𑍍𑌵𑌮𑌮𑌰𑍍𑌯𑌾𑌦𑌂 𑌤𑌮𑌸𑌾𑌂𑌧𑍇𑌨 𑌸𑌂𑌵𑍃𑌤𑌮𑍍 ॥ ॥
𑌨 𑌵𑌾𑌤𑌿 𑌮𑌾𑌰𑍁𑌤𑌸𑍍𑌤𑌤𑍍𑌰 𑌨𑌿𑌷𑍍𑌪𑍍𑌰𑌭𑍋𑌽𑌭𑍂𑌦𑍍𑌦𑌿𑌵𑌾𑌕𑌰𑌃 ।
𑌦𑍃𑌷𑍍𑌟𑍍𑌵𑌾 𑌸𑍀𑌤𑌾𑌂 𑌪𑌰𑌾𑌮𑍃𑌷𑍍𑌟𑌾𑌂 𑌦𑍀𑌨𑌾𑌂 𑌦𑌿𑌵𑍍𑌯𑍇𑌨 𑌚𑌕𑍍𑌷𑍁𑌷𑌾 ॥ 10 ॥
𑌕𑍃𑌤𑌂 𑌕𑌾𑌰𑍍𑌯𑌮𑌿𑌤𑌿 𑌶𑍍𑌰𑍀𑌮𑌾𑌨𑍍𑌵𑍍𑌯𑌾𑌜𑌹𑌾𑌰 𑌪𑌿𑌤𑌾𑌮𑌹𑌃 ।
𑌪𑍍𑌰𑌹𑍃𑌷𑍍𑌟𑌾 𑌵𑍍𑌯𑌥𑌿𑌤𑌾𑌶𑍍𑌚𑌾𑌸𑌨𑍍𑌸𑌰𑍍𑌵𑍇 𑌤𑍇 𑌪𑌰𑌮𑌰𑍍𑌷𑌯𑌃 ॥ 11 ॥
𑌦𑍃𑌷𑍍𑌟𑍍𑌵𑌾 𑌸𑍀𑌤𑌾𑌂 𑌪𑌰𑌾𑌮𑍃𑌷𑍍𑌟𑌾𑌂 𑌦𑌂𑌡𑌕𑌾𑌰𑌣𑍍𑌯𑌵𑌾𑌸𑌿𑌨𑌃 ।
𑌰𑌾𑌵𑌣𑌸𑍍𑌯 𑌵𑌿𑌨𑌾𑌶𑌂 𑌚 𑌪𑍍𑌰𑌾𑌪𑍍𑌤𑌂 𑌬𑍁𑌦𑍍𑌧𑍍𑌵𑌾 𑌯𑌦𑍃𑌚𑍍𑌛𑌯𑌾 ॥ 12 ॥
𑌸 𑌤𑍁 𑌤𑌾𑌂 𑌰𑌾𑌮 𑌰𑌾𑌮𑍇𑌤𑌿 𑌰𑍁𑌦𑌂𑌤𑍀𑌂 𑌲𑌕𑍍𑌷𑍍𑌮𑌣𑍇𑌤𑌿 𑌚 ।
𑌜𑌗𑌾𑌮𑌾𑌦𑌾𑌯 𑌚𑌾𑌕𑌾𑌶𑌂 𑌰𑌾𑌵𑌣𑍋 𑌰𑌾𑌕𑍍𑌷𑌸𑌾𑌧𑌿𑌪𑌃 ॥ 13 ॥
𑌤𑌪𑍍𑌤𑌾𑌭𑌰𑌣𑌜𑍁𑌷𑍍𑌟𑌾𑌂𑌗𑍀 𑌪𑍀𑌤𑌕𑍌𑌶𑍇𑌯𑌵𑌾𑌸𑌿𑌨𑍀 ।
𑌰𑌰𑌾𑌜𑌰𑌾𑌜𑌪𑍁𑌤𑍍𑌰𑍀 𑌤𑍁𑌵𑌿𑌦𑍍𑌯𑍁𑌤𑍍𑌸𑍌𑌦𑌾𑌮𑌿𑌨𑍀 𑌯𑌥𑌾 ॥ 14 ॥
𑌉𑌦𑍍𑌧𑍂𑌤𑍇𑌨 𑌚 𑌵𑌸𑍍𑌤𑍍𑌰𑍇𑌣 𑌤𑌸𑍍𑌯𑌾𑌃 𑌪𑍀𑌤𑍇𑌨 𑌰𑌾𑌵𑌣𑌃 ।
𑌅𑌧𑌿𑌕𑌂 𑌪𑌰𑌿𑌬𑌭𑍍𑌰𑌾𑌜 𑌗𑌿𑌰𑌿𑌰𑍍𑌦𑍀𑌪𑍍𑌤 𑌇𑌵𑌾𑌗𑍍𑌨𑌿𑌨𑌾 ॥ 15 ॥
𑌤𑌸𑍍𑌯𑌾𑌃 𑌪𑌰𑌮𑌕𑌲𑍍𑌯𑌾𑌣𑍍𑌯𑌾𑌸𑍍𑌤𑌾𑌮𑍍𑌰𑌾𑌣𑌿 𑌸𑍁𑌰𑌭𑍀𑌣𑌿 𑌚 ।
𑌪𑌦𑍍𑌮𑌪𑌤𑍍𑌰𑌾𑌣𑌿 𑌵𑍈𑌦𑍇𑌹𑍍𑌯𑌾 𑌅𑌭𑍍𑌯𑌕𑍀𑌰𑍍𑌯𑌂𑌤 𑌰𑌾𑌵𑌣𑌮𑍍 ॥ 16 ॥
𑌤𑌸𑍍𑌯𑌾𑌃 𑌕𑍌𑌶𑍇𑌯𑌮𑍁𑌦𑍍𑌧𑍂𑌤𑌮𑌾𑌕𑌾𑌶𑍇 𑌕𑌨𑌕𑌪𑍍𑌰𑌭𑌮𑍍 ।
𑌬𑌭𑍌 𑌚𑌾𑌦𑌿𑌤𑍍𑌯𑌰𑌾𑌗𑍇𑌣 𑌤𑌾𑌮𑍍𑌰𑌮𑌭𑍍𑌰𑌮𑌿𑌵𑌾𑌤𑌪𑍇 ॥ 1 ॥
𑌤𑌸𑍍𑌯𑌾𑌸𑍍𑌤𑌤𑍍𑌸𑍁𑌨𑌸𑌂 𑌵𑌕𑍍𑌤𑍍𑌰𑌮𑌾𑌕𑌾𑌶𑍇 𑌰𑌾𑌵𑌣𑌾𑌂𑌕𑌗𑌮𑍍 ।
𑌨 𑌰𑌰𑌾𑌜 𑌵𑌿𑌨𑌾 𑌰𑌾𑌮𑌂 𑌵𑌿𑌨𑌾𑌲𑌮𑌿𑌵 𑌪𑌂𑌕𑌜𑌮𑍍 ॥ 1 ॥
𑌬𑌭𑍂𑌵 𑌜𑌲𑌦𑌂 𑌨𑍀𑌲𑌂 𑌭𑌿𑌤𑍍𑌤𑍍𑌵𑌾 𑌚𑌂𑌦𑍍𑌰 𑌇𑌵𑍋𑌦𑌿𑌤𑌃 ।
𑌸𑍁𑌲𑌲𑌾𑌟𑌂 𑌸𑍁𑌕𑍇𑌶𑌾𑌂𑌤𑌂 𑌪𑌦𑍍𑌮𑌗𑌰𑍍𑌭𑌾𑌭𑌮𑌵𑍍𑌰𑌣𑌮𑍍 ॥ 1 ॥
𑌶𑍁𑌕𑍍𑌲𑍈𑌸𑍍𑌸𑍁𑌵𑌿𑌮𑌲𑍈𑌰𑍍𑌦𑌂𑌤𑍈 𑌪𑍍𑌰𑌭𑌾𑌵𑌦𑍍𑌭𑌿𑌰𑌲𑌂𑌕𑍃𑌤𑌮𑍍 ।
𑌤𑌸𑍍𑌯𑌾𑌸𑍍𑌤𑌦𑍍𑌵𑌿𑌮𑌲𑌂 𑌵𑌕𑍍𑌤𑍍𑌰𑌮𑌾𑌕𑌾𑌶𑍇 𑌰𑌾𑌵𑌣𑌾𑌂𑌕𑌗𑌮𑍍 ॥ 20 ॥
𑌰𑍁𑌦𑌿𑌤𑌂 𑌵𑍍𑌯𑌪𑌮𑍃𑌷𑍍𑌟𑌾𑌸𑍍𑌰𑌂 𑌚𑌂𑌦𑍍𑌰𑌵𑌤𑍍𑌪𑍍𑌰𑌿𑌯𑌦𑌰𑍍𑌶𑌨𑌮𑍍 ।
𑌸𑍁𑌨𑌾𑌸𑌂 𑌚𑌾𑌰𑍁𑌤𑌾𑌮𑍍𑌰𑍋𑌷𑍍𑌠𑌮𑌾𑌕𑌾𑌶𑍇 𑌹𑌾𑌟𑌕𑌪𑍍𑌰𑌭𑌮𑍍 ॥ 21 ॥
𑌰𑌾𑌕𑍍𑌷𑌸𑍇𑌨 𑌸𑌮𑌾𑌧𑍂𑌤𑌂 𑌤𑌸𑍍𑌯𑌾𑌸𑍍𑌤𑌦𑍍𑌵𑌦𑌨𑌂 𑌶𑍁𑌭𑌮𑍍 ।
𑌶𑍁𑌶𑍁𑌭𑍇 𑌨 𑌵𑌿𑌨𑌾 𑌰𑌾𑌮𑌂𑌦𑌿𑌵𑌾 𑌚𑌂𑌦𑍍𑌰 𑌇𑌵𑍋𑌦𑌿𑌤𑌃 ॥ 22 ॥
𑌸𑌾 𑌹𑍇𑌮𑌵𑌰𑍍𑌣𑌾 𑌨𑍀𑌲𑌾𑌂𑌗𑌂 𑌮𑍈𑌥𑌿𑌲𑍀 𑌰𑌾𑌕𑍍𑌷𑌸𑌾𑌧𑌿𑌪𑌮𑍍 ।
𑌶𑍁𑌶𑍁𑌭𑍇 𑌕𑌾𑌂𑌚𑌨𑍀 𑌕𑌾𑌂𑌚𑍀 𑌨𑍀𑌲𑌂 𑌮𑌣𑌿𑌮𑌿𑌵𑌾𑌶𑍍𑌰𑌿𑌤𑌾 ॥ 23 ॥
𑌸𑌾 𑌪𑌦𑍍𑌮𑌗𑍌𑌰𑍀 𑌹𑍇𑌮𑌾𑌭𑌾 𑌰𑌾𑌵𑌣𑌂 𑌜𑌨𑌕𑌾𑌤𑍍𑌮𑌜𑌾 ।
𑌵𑌿𑌦𑍍𑌯𑍁𑌦𑍍𑌘𑌨𑌮𑌿𑌵𑌾𑌵𑌿𑌶𑍍𑌯 𑌶𑍁𑌶𑍁𑌭𑍇 𑌤𑌪𑍍𑌤𑌭𑍂𑌷𑌣𑌾 ॥ 24 ॥
𑌤𑌸𑍍𑌯𑌾 𑌭𑍂𑌷𑌣𑌘𑍋𑌷𑍇𑌣 𑌵𑍈𑌦𑍇𑌹𑍍𑌯𑌾 𑌰𑌾𑌕𑍍𑌷𑌸𑌾𑌧𑌿𑌪𑌃 ।
𑌬𑌭𑍌 𑌸𑌚𑌪𑌲𑍋 𑌨𑍀𑌲𑌸𑍍𑌸𑌘𑍋𑌷 𑌇𑌵 𑌤𑍋𑌯𑌦𑌃 ॥ 25 ॥
𑌉𑌤𑍍𑌤𑌮𑌾𑌂𑌗𑌾𑌚𑍍𑌚𑍍𑌯𑍁𑌤𑌾 𑌤𑌸𑍍𑌯𑌾𑌃 𑌪𑍁𑌷𑍍𑌪𑌵𑍃𑌷𑍍𑌟𑌿𑌸𑍍𑌸𑌮𑌂𑌤𑌤𑌃 ।
𑌸𑍀𑌤𑌾𑌯𑌾 𑌹𑍍𑌰𑌿𑌮𑌮𑌾𑌣𑌾𑌯𑌾𑌃 𑌪𑌪𑌾𑌤 𑌧𑌰𑌣𑍀𑌤𑌲𑍇 ॥ 26 ॥
𑌸𑌾 𑌤𑍁 𑌰𑌾𑌵𑌣𑌵𑍇𑌗𑍇𑌨 𑌪𑍁𑌷𑍍𑌪𑌵𑍃𑌷𑍍𑌟𑌿𑌃 𑌸𑌮𑌂𑌤𑌤𑌃 ।
𑌸𑌮𑌾𑌧𑍂𑌤𑌾 𑌦𑌶𑌗𑍍𑌰𑍀𑌵𑌂 𑌪𑍁𑌨𑌰𑍇𑌵𑌾𑌭𑍍𑌯𑌵𑌰𑍍𑌤𑌤 ॥ 2 ॥
𑌅𑌭𑍍𑌯𑌵𑌰𑍍𑌤𑌤 𑌪𑍁𑌷𑍍𑌪𑌾𑌣𑌾𑌂 𑌧𑌾𑌰𑌾 𑌵𑍈𑌶𑍍𑌰𑌵𑌣𑌾𑌨𑍁𑌜𑌮𑍍 ।
𑌨𑌕𑍍𑌷𑌤𑍍𑌰𑌮𑌾𑌲𑌾 𑌵𑌿𑌮𑌲𑌾 𑌮𑍇𑌰𑍁𑌂 𑌨𑌗𑌮𑌿𑌵𑍋𑌨𑍍𑌨𑌤𑌮𑍍 ॥ 2 ॥
𑌚𑌰𑌣𑌾𑌨𑍍𑌨𑍂𑌪𑍁𑌰𑌂 𑌭𑍍𑌰𑌷𑍍𑌟𑌂 𑌵𑍈𑌦𑍇𑌹𑍍𑌯𑌾 𑌰𑌤𑍍𑌨𑌭𑍂𑌷𑌿𑌤𑌮𑍍 ।
𑌵𑌿𑌦𑍍𑌯𑍁𑌨𑍍𑌮𑌂𑌡𑌲𑌸𑌂𑌕𑌾𑌶𑌂 𑌪𑌪𑌾𑌤 𑌮𑌧𑍁𑌰𑌸𑍍𑌵𑌨𑌮𑍍 ॥ 2 ॥
𑌤𑌰𑍁𑌪𑍍𑌰𑌵𑌾𑌲𑌰𑌕𑍍𑌤𑌾 𑌸𑌾 𑌨𑍀𑌲𑌾𑌂𑌗𑌂 𑌰𑌾𑌕𑍍𑌷𑌸𑍇𑌶𑍍𑌵𑌰𑌮𑍍 ।
𑌪𑍍𑌰𑌾𑌶𑍋𑌭𑌯𑌤 𑌵𑍈𑌦𑍇𑌹𑍀 𑌗𑌜𑌂 𑌕𑌕𑍍𑌷𑍍𑌯𑍇𑌵 𑌕𑌾𑌂𑌚𑌨𑍀 ॥ 30 ॥
𑌤𑌾𑌂 𑌮𑌹𑍋𑌲𑍍𑌕𑌾𑌮𑌿𑌵𑌾𑌕𑌾𑌶𑍇 𑌦𑍀𑌪𑍍𑌯𑌮𑌾𑌨𑌾𑌂 𑌸𑍍𑌵𑌤𑍇𑌜𑌸𑌾 ।
𑌜𑌹𑌾𑌰𑌾𑌽𑌕𑌾𑌶𑌮𑌾𑌵𑌿𑌸𑍍𑌯 𑌸𑍀𑌤𑌾𑌂 𑌵𑍈𑌶𑍍𑌰𑌵𑌣𑌾𑌨𑍁𑌜𑌃 ॥ 31 ॥
𑌤𑌸𑍍𑌯𑌾𑌸𑍍𑌤𑌾𑌨𑍍𑌯𑌗𑍍𑌨𑌿𑌵𑌰𑍍𑌣𑌾𑌨𑌿 𑌭𑍂𑌷𑌣𑌾𑌨𑌿 𑌮𑌹𑍀𑌤𑌲𑍇 ।
𑌸𑌘𑍋𑌷𑌾𑌣𑍍𑌯𑌵𑌕𑍀𑌰𑍍𑌯𑌂𑌤 𑌕𑍍𑌷𑍀𑌣𑌾𑌸𑍍𑌤𑌾𑌰𑌾 𑌇𑌵𑌾𑌂𑌬𑌰𑌾𑌤𑍍 ॥ 32 ॥
𑌤𑌸𑍍𑌯𑌾𑌸𑍍𑌸𑍍𑌤𑌨𑌾𑌂𑌤𑌰𑌾𑌦𑍍𑌭𑍍𑌰𑌷𑍍𑌟𑍋 𑌹𑌾𑌰𑌸𑍍𑌤𑌾𑌰𑌾𑌧𑌿𑌪𑌦𑍍𑌯𑍁𑌤𑌿𑌃 ।
𑌵𑍈𑌦𑍇𑌹𑍍𑌯𑌾 𑌨𑌿𑌪𑌤𑌨𑍍𑌭𑌾𑌤𑌿 𑌗𑌂𑌗𑍇𑌵 𑌗𑌗𑌨𑌾𑌚𑍍𑌚𑍍𑌯𑍁𑌤𑌾 ॥ 33 ॥
𑌉𑌤𑍍𑌪𑌾𑌤𑌵𑌾𑌤𑌾𑌭𑌿𑌹𑌤𑌾 𑌨𑌾𑌨𑌾𑌦𑍍𑌵𑌿𑌜𑌗𑌣𑌾𑌯𑍁𑌤𑌾𑌃 ।
𑌮𑌾𑌭𑍈𑌰𑌿𑌤𑌿 𑌵𑌿𑌧𑍂𑌤𑌾𑌗𑍍𑌰𑌾 𑌵𑍍𑌯𑌾𑌜𑌹𑍍𑌰𑍁𑌰𑌿𑌵 𑌪𑌾𑌦𑌪𑌾𑌃 ॥ 34 ॥
𑌨𑌲𑌿𑌨𑍍𑌯𑍋 𑌧𑍍𑌵𑌸𑍍𑌤𑌕𑌮𑌲𑌾𑌸𑍍𑌤𑍍𑌰𑌸𑍍𑌤𑌮𑍀𑌨𑌜𑌲𑍇𑌚𑌰𑌾𑌃 ।
𑌸𑌖𑍀𑌮𑌿𑌵 𑌗𑌤𑍋𑌚𑍍𑌛𑍍𑌵𑌾𑌸𑌾𑌮𑌨𑍍𑌵𑌶𑍋𑌚𑌂𑌤 𑌮𑍈𑌥𑌿𑌲𑍀𑌮𑍍 ॥ 35 ॥
𑌸𑌮𑌂𑌤𑌾𑌦𑌭𑌿𑌸𑌂𑌪𑌤𑍍𑌯 𑌸𑌿𑌂𑌹𑌵𑍍𑌯𑌾𑌘𑍍𑌰𑌮𑍃𑌗𑌦𑍍𑌵𑌿𑌜𑌾𑌃 ।
𑌅𑌨𑍍𑌵𑌧𑌾𑌵𑌂𑌸𑍍𑌤𑌦𑌾 𑌰𑍋𑌷𑌾𑌤𑍍𑌸𑍀𑌤𑌾𑌂 𑌛𑌾𑌯𑌾𑌨𑍁𑌗𑌾𑌮𑌿𑌨𑌃 ॥ 36 ॥
𑌜𑌲𑌪𑍍𑌰𑌪𑌾𑌤𑌾𑌸𑍍𑌰𑌮𑍁𑌖𑌾𑌶𑍍𑌶𑍃𑌂𑌗𑍈𑌰𑍁𑌚𑍍𑌛𑍍𑌰𑌿𑌤𑌬𑌾𑌹𑍁𑌭𑌿𑌃 ।
𑌸𑍀𑌤𑌾𑌯𑌾𑌂 𑌹𑍍𑌰𑌿𑌯𑌮𑌾𑌣𑌾𑌯𑌾𑌂 𑌵𑌿𑌕𑍍𑌰𑍋𑌶𑌂𑌤𑍀𑌵 𑌪𑌰𑍍𑌵𑌤𑌾𑌃 ॥ 3 ॥
𑌹𑍍𑌰𑌿𑌯𑌮𑌾𑌣𑌾𑌂 𑌤𑍁 𑌵𑍈𑌦𑍇𑌹𑍀𑌂 𑌦𑍃𑌷𑍍𑌟𑍍𑌵𑌾 𑌦𑍀𑌨𑍋 𑌦𑌿𑌵𑌾𑌕𑌰𑌃 ।
𑌪𑍍𑌰𑌤𑌿𑌧𑍍𑌵𑌸𑍍𑌤𑌪𑍍𑌰𑌭𑌶𑍍𑌶𑍍𑌰𑍀𑌮𑌾𑌨𑌾𑌸𑍀𑌤𑍍𑌪𑌾𑌂𑌡𑌰𑌮𑌂𑌡𑌲𑌃 ॥ 3 ॥
𑌨𑌾𑌸𑍍𑌤𑌿 𑌧𑌰𑍍𑌮𑌃 𑌕𑍁𑌤𑌸𑍍𑌸𑌤𑍍𑌯𑌂 𑌨𑌾𑌰𑍍𑌜𑌵𑌂 𑌨𑌾𑌨𑍃𑌶𑌂𑌸𑌤𑌾 ।
𑌯𑌤𑍍𑌰 𑌰𑌾𑌮𑌸𑍍𑌯 𑌵𑍈𑌦𑍇𑌹𑍀𑌂 𑌭𑌾𑌰𑍍𑌯𑌾𑌂 𑌹𑌰𑌤𑌿 𑌰𑌾𑌵𑌣𑌃 ॥ 3 ॥
𑌇𑌤𑌿 𑌸𑌰𑍍𑌵𑌾𑌣𑌿 𑌭𑍂𑌤𑌾𑌨𑌿 𑌗𑌣𑌶𑌃 𑌪𑌰𑍍𑌯𑌦𑍇𑌵𑌯𑌨𑍍 ।
𑌵𑌿𑌤𑍍𑌰𑌸𑍍𑌤𑌕𑌾 𑌦𑍀𑌨𑌮𑍁𑌖𑌾 𑌰𑍁𑌰𑍁𑌦𑍁𑌰𑍍𑌮𑍃𑌗𑌪𑍋𑌤𑌕𑌾𑌃 ॥ 40 ॥
𑌉𑌦𑍍𑌵𑍀𑌕𑍍𑌷𑍍𑌯𑍋𑌦𑍍𑌵𑍀𑌕𑍍𑌷𑍍𑌯 𑌨𑌯𑌨𑍈𑌰𑌸𑍍𑌰𑌪𑌾𑌤𑌾𑌵𑌿𑌲𑍇𑌕𑍍𑌷𑌣𑌾𑌃 ।
𑌸𑍁𑌪𑍍𑌰𑌵𑍇𑌪𑌿𑌤𑌗𑌾𑌤𑍍𑌰𑌾𑌶𑍍𑌚 𑌬𑌭𑍂𑌵𑍁𑌰𑍍𑌵𑌨𑌦𑍇𑌵𑌤𑌾𑌃 ॥ 41 ॥
𑌵𑌿𑌕𑍍𑌰𑍋𑌶𑌂𑌤𑍀𑌂 𑌦𑍃𑌢𑌂 𑌸𑍀𑌤𑌾𑌂 𑌦𑍃𑌷𑍍𑌟𑍍𑌵𑌾 𑌦𑍁𑌃𑌖𑌂 𑌤𑌥𑌾 𑌗𑌤𑌾𑌮𑍍 ।
𑌤𑌾𑌂 𑌤𑍁 𑌲𑌕𑍍𑌷𑍍𑌮𑌣 𑌰𑌾𑌮𑍇𑌤𑌿 𑌕𑍍𑌰𑍋𑌶𑌂𑌤𑍀𑌂 𑌮𑌧𑍁𑌰𑌸𑍍𑌵𑌰𑌮𑍍 ॥ 42 ॥
𑌅𑌵𑍇𑌕𑍍𑌷𑌮𑌾𑌣𑌾𑌂 𑌬𑌹𑍁𑌶𑍋 𑌵𑍈𑌦𑍇𑌹𑍀𑌂 𑌧𑌰𑌣𑍀𑌤𑌲𑌮𑍍 ।
𑌸 𑌤𑌾𑌮𑌾𑌕𑍁𑌲𑌕𑍇𑌶𑌾𑌂𑌤𑌾𑌂 𑌵𑌿𑌪𑍍𑌰𑌮𑍃𑌷𑍍𑌟𑌵𑌿𑌶𑍇𑌷𑌕𑌾𑌮𑍍 ॥ 43 ॥
𑌜𑌹𑌾𑌰𑌾𑌤𑍍𑌮 𑌵𑌿𑌨𑌾𑌶𑌾𑌯 𑌦𑌶𑌗𑍍𑌰𑍀𑌵𑍋 𑌮𑌨𑌸𑍍𑌸𑍍𑌵𑌿𑌨𑍀𑌮𑍍 ।
𑌤𑌤𑌸𑍍𑌤𑍁 𑌸𑌾 𑌚𑌾𑌰𑍁𑌦𑌤𑍀 𑌶𑍁𑌚𑌿𑌸𑍍𑌮𑌿𑌤𑌾 𑌵𑌿𑌨𑌾𑌕𑍃𑌤𑌾 𑌬𑌂𑌧𑍁𑌜𑌨𑍇𑌨 𑌮𑍈𑌥𑌿𑌲𑍀 ।
𑌅𑌪𑌶𑍍𑌯𑌤𑍀 𑌰𑌾𑌘𑌵𑌲𑌕𑍍𑌷𑍍𑌮𑌣𑌾𑌵𑍁𑌭𑍌 𑌵𑌿𑌵𑌰𑍍𑌣𑌵𑌕𑍍𑌤𑍍𑌰𑌾𑌭𑌯𑌭𑌾𑌰𑌪𑍀𑌡𑌿𑌤𑌾 ॥ 44 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌦𑍍𑌵𑌿𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
