VR 2.49 Ayodhya Kanda - Sarga 49 - Grantha

Collection of Spiritual and Devotional Literature in Various Indian Languages

View this in:

2.4𑍯 𑌅𑌯𑍋𑌧𑍍𑌯𑌾𑌕𑌾𑌂𑌡 - 𑌏𑌕𑍋𑌨𑌪𑌂𑌚𑌾𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।

𑌰𑌾𑌮𑍋𑌽𑌪𑌿 𑌰𑌾𑌤𑍍𑌰𑌿𑌶𑍇𑌷𑍇𑌣 𑌤𑍇𑌨𑍈𑌵 𑌮𑌹𑌦𑌂𑌤𑌰𑌮𑍍 ।
𑌜𑌗𑌾𑌮 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑌃 𑌪𑌿𑌤𑍁𑌰𑌾𑌜𑍍𑌞𑌾𑌮𑌨𑍁𑌸𑍍𑌮𑌰𑌨𑍍 ॥ 1 ॥

𑌤𑌥𑍈𑌵 𑌗𑌚𑍍𑌛𑌤𑌸𑍍𑌤𑌸𑍍𑌯 𑌵𑍍𑌯𑌪𑌾𑌯𑌾𑌦𑍍𑌰𑌜𑌨𑍀 𑌶𑌿𑌵𑌾 ।
𑌉𑌪𑌾𑌸𑍍𑌯 𑌶𑌿𑌵𑌾𑌂 𑌸𑌂𑌧𑍍𑌯𑌾𑌂 𑌵𑌿𑌷𑌯𑌾𑌂𑌤𑌂 𑌵𑍍𑌯𑌗𑌾𑌹𑌤 ॥ 2 ॥

𑌗𑍍𑌰𑌾𑌮𑌾𑌨𑍍 𑌵𑌿𑌕𑍃𑌷𑍍𑌟𑌸𑍀𑌮𑌾𑌂𑌤𑌾𑌨𑍍 𑌪𑍁𑌷𑍍𑌪𑌿𑌤𑌾𑌨𑌿 𑌵𑌨𑌾𑌨𑌿 𑌚 ।
𑌪𑌶𑍍𑌯𑌨𑍍𑌨𑌤𑌿𑌯𑌯𑍌 𑌶𑍀𑌘𑍍𑌰𑌂 𑌶𑌨𑍈𑌰𑌿𑌵 𑌹𑌯𑍋𑌤𑍍𑌤𑌮𑍈𑌃 ॥ 3 ॥

𑌶𑍃𑌣𑍍𑌵𑌨𑍍 𑌵𑌚𑍋 𑌮𑌨𑍁𑌷𑍍𑌯𑌾𑌣𑌾𑌂 𑌗𑍍𑌰𑌾𑌮𑌸𑌂𑌵𑌾𑌸𑌵𑌾𑌸𑌿𑌨𑌾𑌮𑍍 ।
𑌰𑌾𑌜𑌾𑌨𑌂 𑌧𑌿𑌗𑍍𑌦𑌶𑌰𑌥𑌂 𑌕𑌾𑌮𑌸𑍍𑌯 𑌵𑌶𑌮𑌾𑌗𑌤𑌮𑍍 ॥ 4 ॥

𑌹𑌾 𑌨𑍃𑌶𑌂𑌸𑌾𑌦𑍍𑌯 𑌕𑍈𑌕𑍇𑌯𑍀 𑌪𑌾𑌪𑌾 𑌪𑌾𑌪𑌾𑌨𑍁𑌬𑌂𑌧𑌿𑌨𑍀 ।
𑌤𑍀𑌕𑍍𑌷𑍍𑌣𑌾 𑌸𑌂𑌭𑌿𑌨𑍍𑌨𑌮𑌰𑍍𑌯𑌾𑌦𑌾 𑌤𑍀𑌕𑍍𑌷𑍍𑌣𑌕𑌰𑍍𑌮𑌣𑌿 𑌵𑌰𑍍𑌤𑌤𑍇 ॥ 5 ॥

𑌯𑌾 𑌪𑍁𑌤𑍍𑌰𑌮𑍀𑌦𑍃𑌶𑌂 𑌰𑌾𑌜𑍍𑌞𑌃 𑌪𑍍𑌰𑌵𑌾𑌸𑌯𑌤𑌿 𑌧𑌾𑌰𑍍𑌮𑌿𑌕𑌮𑍍 ।
𑌵𑌨𑌵𑌾𑌸𑍇 𑌮𑌹𑌾𑌪𑍍𑌰𑌾𑌜𑍍𑌞𑌂 𑌸𑌾𑌨𑍁𑌕𑍍𑌰𑍋𑌶𑌂 𑌜𑌿𑌤𑍇𑌂𑌦𑍍𑌰𑌿𑌯𑌮𑍍 ॥ 6 ॥

𑌕𑌥𑌂 𑌨𑌾𑌮 𑌮𑌹𑌾𑌭𑌾𑌗𑌾 𑌸𑍀𑌤𑌾 𑌜𑌨𑌕𑌨𑌂𑌦𑌿𑌨𑍀 ।
𑌸𑌦𑌾 𑌸𑍁𑌖𑍇𑌷𑍍𑌵𑌭𑌿𑌰𑌤𑌾 𑌦𑍁𑌃𑌖𑌾𑌨𑍍𑌯𑌨𑍁𑌭𑌵𑌿𑌷𑍍𑌯𑌤𑌿 ॥ 𑍭 ॥

𑌅𑌹𑍋 𑌦𑌶𑌰𑌥𑍋 𑌰𑌾𑌜𑌾 𑌨𑌿𑌸𑍍𑌨𑍇𑌹𑌃 𑌸𑍍𑌵𑌸𑍁𑌤𑌂 𑌪𑍍𑌰𑌿𑌯𑌮𑍍 ।
𑌪𑍍𑌰𑌜𑌾𑌨𑌾𑌮𑌨𑌘𑌂 𑌰𑌾𑌮𑌂 𑌪𑌰𑌿𑌤𑍍𑌯𑌕𑍍𑌤𑍁𑌮𑌿𑌹𑍇𑌚𑍍𑌛𑌤𑌿 ॥ 𑍮 ॥

𑌏𑌤𑌾 𑌵𑌾𑌚𑍋 𑌮𑌨𑍁𑌷𑍍𑌯𑌾𑌣𑌾𑌂 𑌗𑍍𑌰𑌾𑌮𑌸𑌂𑌵𑌾𑌸𑌵𑌾𑌸𑌿𑌨𑌾𑌮𑍍 ।
𑌶𑍃𑌣𑍍𑌵𑌨𑍍𑌨𑌤𑌿𑌯𑌯𑍌 𑌵𑍀𑌰𑌃 𑌕𑍋𑌸𑌲𑌾𑌨𑍍 𑌕𑍋𑌸𑌲𑍇𑌶𑍍𑌵𑌰𑌃 ॥ 𑍯 ॥

𑌤𑌤𑍋 𑌵𑍇𑌦𑌶𑍍𑌰𑍁𑌤𑌿𑌂 𑌨𑌾𑌮 𑌶𑌿𑌵𑌵𑌾𑌰𑌿𑌵𑌹𑌾𑌂 𑌨𑌦𑍀𑌮𑍍 ।
𑌉𑌤𑍍𑌤𑍀𑌰𑍍𑌯𑌾𑌭𑌿𑌮𑍁𑌖𑌃 𑌪𑍍𑌰𑌾𑌯𑌾𑌦𑌗𑌸𑍍𑌤𑍍𑌯𑌾𑌧𑍍𑌯𑍁𑌷𑌿𑌤𑌾𑌂 𑌦𑌿𑌶𑌮𑍍 ॥ 10 ॥

𑌗𑌤𑍍𑌵𑌾 𑌤𑍁 𑌸𑍁𑌚𑌿𑌰𑌂 𑌕𑌾𑌲𑌂 𑌤𑌤𑌃 𑌶𑍀𑌤𑌜𑌲𑌾𑌂 𑌨𑌦𑍀𑌮𑍍 ।
𑌗𑍋𑌮𑌤𑍀𑌂 𑌗𑍋𑌯𑍁𑌤𑌾𑌨𑍂𑌪𑌾𑌮𑌤𑌰𑌤𑍍𑌸𑌾𑌗𑌰𑌂𑌗𑌮𑌾𑌮𑍍 ॥ 11 ॥

𑌗𑍋𑌮𑌤𑍀𑌂 𑌚𑌾𑌪𑍍𑌯𑌤𑌿𑌕𑍍𑌰𑌮𑍍𑌯 𑌰𑌾𑌘𑌵𑌃 𑌶𑍀𑌘𑍍𑌰𑌗𑍈𑌰𑍍𑌹𑌯𑍈𑌃 ।
𑌮𑌯𑍂𑌰𑌹𑌂𑌸𑌾𑌭𑌿𑌰𑍁𑌤𑌾𑌂 𑌤𑌤𑌾𑌰 𑌸𑍍𑌯𑌂𑌦𑌿𑌕𑌾𑌂 𑌨𑌦𑍀𑌮𑍍 ॥ 12 ॥

𑌸 𑌮𑌹𑍀𑌂 𑌮𑌨𑍁𑌨𑌾 𑌰𑌾𑌜𑍍𑌞𑌾 𑌦𑌤𑍍𑌤𑌾𑌮𑌿𑌕𑍍𑌷𑍍𑌵𑌾𑌕𑌵𑍇 𑌪𑍁𑌰𑌾 ।
𑌸𑍍𑌫𑍀𑌤𑌾𑌂 𑌰𑌾𑌷𑍍𑌟𑍍𑌰𑌾𑌵𑍃𑌤𑌾𑌂 𑌰𑌾𑌮𑍋 𑌵𑍈𑌦𑍇𑌹𑍀𑌮𑌨𑍍𑌵𑌦𑌰𑍍𑌶𑌯𑌤𑍍 ॥ 13 ॥

𑌕𑌦𑌾𑌽𑌹𑌂 𑌪𑍁𑌨𑌰𑌾𑌗𑌮𑍍𑌯 𑌸𑌰𑌯𑍍𑌵𑌾 𑌪𑍁𑌷𑍍𑌪𑌿𑌤𑍇 𑌵𑌨𑍇 ।
𑌮𑍃𑌗𑌯𑌾𑌂 𑌪𑌰𑍍𑌯𑌟𑌿𑌷𑍍𑌯𑌾𑌮𑌿 𑌮𑌾𑌤𑍍𑌰𑌾 𑌪𑌿𑌤𑍍𑌰𑌾 𑌚 𑌸𑌂𑌗𑌤𑌃 ॥ 14 ॥

𑌨𑌾𑌤𑍍𑌯𑌰𑍍𑌥𑌮𑌭𑌿𑌕𑌾𑌂𑌕𑍍𑌷𑌾𑌮𑌿 𑌮𑍃𑌗𑌯𑌾𑌂 𑌸𑌰𑌯𑍂𑌵𑌨𑍇 ।
𑌰𑌤𑌿𑌰𑍍𑌹𑍍𑌯𑍇𑌷𑌾𑌤𑍁𑌲𑌾 𑌲𑍋𑌕𑍇 𑌰𑌾𑌜𑌰𑍍𑌷𑌿𑌗𑌣𑌸𑌮𑍍𑌮𑌤𑌾 ॥ 15 ॥

𑌰𑌾𑌜𑌰𑍍𑌷𑍀𑌣𑌾𑌂 𑌹𑌿 𑌲𑍋𑌕𑍇𑌽𑌸𑍍𑌮𑌿𑌨𑍍 𑌰𑌤𑍍𑌯𑌰𑍍𑌥𑌂 𑌮𑍃𑌗𑌯𑌾 𑌵𑌨𑍇 ।
𑌕𑌾𑌲𑍇 𑌕𑍃𑌤𑌾𑌂 𑌤𑌾𑌂 𑌮𑌨𑍁𑌜𑍈𑌰𑍍𑌘𑌨𑍍𑌵𑌿𑌨𑌾𑌮𑌭𑌿𑌕𑌾𑌂𑌕𑍍𑌷𑌿𑌤𑌾𑌮𑍍 ॥ 16 ॥

𑌸 𑌤𑌮𑌧𑍍𑌵𑌾𑌨𑌮𑍈𑌕𑍍𑌷𑍍𑌵𑌾𑌕𑌸𑍍𑌸𑍂𑌤𑌂 𑌮𑌧𑍁𑌰𑌯𑌾 𑌗𑌿𑌰𑌾 ।
𑌤𑌂 𑌤𑌮𑌰𑍍𑌥𑌮𑌭𑌿𑌪𑍍𑌰𑍇𑌤𑍍𑌯 𑌯𑌯𑍌 𑌵𑌾𑌕𑍍𑌯𑌮𑍁𑌦𑍀𑌰𑌯𑌨𑍍 ॥ 1𑍭 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌏𑌕𑍋𑌨𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥

Browse Related Categories: