𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌰𑍍𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌤𑌃 𑌸𑍀𑌤𑌾𑌮𑍁𑌪𑌾𑌗𑌮𑍍𑌯 𑌰𑌾𑌕𑍍𑌷𑌸𑍍𑌯𑍋 𑌵𑌿𑌕𑍃𑌤𑌾𑌨𑌨𑌾𑌃 ।
𑌪𑌰𑍁𑌷𑌂 𑌪𑌰𑍁𑌷𑌾 𑌨𑌾𑌰𑍍𑌯 𑌊𑌚𑍁𑌸𑍍𑌤𑌾𑌂 𑌵𑌾𑌕𑍍𑌯𑌮𑌪𑍍𑌰𑌿𑌯𑌮𑍍 ॥ 1 ॥
𑌕𑌿𑌂 𑌤𑍍𑌵𑌮𑌂𑌤𑌃𑌪𑍁𑌰𑍇 𑌸𑍀𑌤𑍇 𑌸𑌰𑍍𑌵𑌭𑍂𑌤𑌮𑌨𑍋𑌹𑌰𑍇 ।
𑌮𑌹𑌾𑌰𑍍𑌹𑌶𑌯𑌨𑍋𑌪𑍇𑌤𑍇 𑌨 𑌵𑌾𑌸𑌮𑌨𑍁𑌮𑌨𑍍𑌯𑌸𑍇 ॥ 2 ॥
𑌮𑌾𑌨𑍁𑌷𑍀 𑌮𑌾𑌨𑍁𑌷𑌸𑍍𑌯𑍈𑌵 𑌭𑌾𑌰𑍍𑌯𑌾𑌤𑍍𑌵𑌂 𑌬𑌹𑍁𑌮𑌨𑍍𑌯𑌸𑍇 ।
𑌪𑍍𑌰𑌤𑍍𑌯𑌾𑌹𑌰 𑌮𑌨𑍋 𑌰𑌾𑌮𑌾𑌨𑍍𑌨 𑌤𑍍𑌵𑌂 𑌜𑌾𑌤𑍁 𑌭𑌵𑌿𑌷𑍍𑌯𑌸𑌿 ॥ 3 ॥
𑌤𑍍𑌰𑍈𑌲𑍋𑌕𑍍𑌯𑌵𑌸𑍁𑌭𑍋𑌕𑍍𑌤𑌾𑌰𑌂 𑌰𑌾𑌵𑌣𑌂 𑌰𑌾𑌕𑍍𑌷𑌸𑍇𑌶𑍍𑌵𑌰𑌮𑍍 ।
𑌭𑌰𑍍𑌤𑌾𑌰𑌮𑍁𑌪𑌸𑌂𑌗𑌮𑍍𑌯 𑌵𑌿𑌹𑌰𑌸𑍍𑌵 𑌯𑌥𑌾𑌸𑍁𑌖𑌮𑍍 ॥ 4 ॥
𑌮𑌾𑌨𑍁𑌷𑍀 𑌮𑌾𑌨𑍁𑌷𑌂 𑌤𑌂 𑌤𑍁 𑌰𑌾𑌮𑌮𑌿𑌚𑍍𑌛𑌸𑌿 𑌶𑍋𑌭𑌨𑍇 ।
𑌰𑌾𑌜𑍍𑌯𑌾𑌦𑍍𑌭𑍍𑌰𑍍𑌰𑌷𑍍𑌟𑌮𑌸𑌿𑌦𑍍𑌧𑌾𑌰𑍍𑌥𑌂 𑌵𑌿𑌕𑍍𑌲𑌬𑌂 𑌤𑍍𑌵𑌮𑌨𑌿𑌂𑌦𑌿𑌤𑍇 ॥ 5 ॥
𑌰𑌾𑌕𑍍𑌷𑌸𑍀𑌨𑌾𑌂 𑌵𑌚𑌃 𑌶𑍍𑌰𑍁𑌤𑍍𑌵𑌾 𑌸𑍀𑌤𑌾 𑌪𑌦𑍍𑌮𑌨𑌿𑌭𑍇𑌕𑍍𑌷𑌣𑌾 ।
𑌨𑍇𑌤𑍍𑌰𑌾𑌭𑍍𑌯𑌾𑌮𑌶𑍍𑌰𑍁𑌪𑍂𑌰𑍍𑌣𑌾𑌭𑍍𑌯𑌾𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 6 ॥
𑌯𑌦𑌿𑌦𑌂 𑌲𑍋𑌕𑌵𑌿𑌦𑍍𑌵𑌿𑌷𑍍𑌟𑌮𑍁𑌦𑌾𑌹𑌰𑌥 𑌸𑌂𑌗𑌤𑌾𑌃 ।
𑌨𑍈𑌤𑌨𑍍𑌮𑌨𑌸𑌿 𑌵𑌾𑌕𑍍𑌯𑌂 𑌮𑍇 𑌕𑌿𑌲𑍍𑌬𑌿𑌷𑌂 𑌪𑍍𑌰𑌤𑌿𑌭𑌾𑌤𑌿 𑌵𑌃 ॥ ॥
𑌨 𑌮𑌾𑌨𑍁𑌷𑍀 𑌰𑌾𑌕𑍍𑌷𑌸𑌸𑍍𑌯 𑌭𑌾𑌰𑍍𑌯𑌾 𑌭𑌵𑌿𑌤𑍁𑌮𑌰𑍍𑌹𑌤𑌿 ।
𑌕𑌾𑌮𑌂 𑌖𑌾𑌦𑌤 𑌮𑌾𑌂 𑌸𑌰𑍍𑌵𑌾 𑌨 𑌕𑌰𑌿𑌷𑍍𑌯𑌾𑌮𑌿 𑌵𑍋 𑌵𑌚𑌃 ॥ ॥
𑌦𑍀𑌨𑍋 𑌵𑌾 𑌰𑌾𑌜𑍍𑌯𑌹𑍀𑌨𑍋 𑌵𑌾 𑌯𑍋 𑌮𑍇 𑌭𑌰𑍍𑌤𑌾 𑌸 𑌮𑍇 𑌗𑍁𑌰𑍁𑌃 ।
𑌤𑌂 𑌨𑌿𑌤𑍍𑌯𑌮𑌨𑍁𑌰𑌕𑍍𑌤𑌾𑌸𑍍𑌮𑌿 𑌯𑌥𑌾 𑌸𑍂𑌰𑍍𑌯𑌂 𑌸𑍁𑌵𑌰𑍍𑌚𑌲𑌾 ॥ ॥
𑌯𑌥𑌾 𑌶𑌚𑍀 𑌮𑌹𑌾𑌭𑌾𑌗𑌾 𑌶𑌕𑍍𑌰𑌂 𑌸𑌮𑍁𑌪𑌤𑌿𑌷𑍍𑌠𑌤𑌿 ।
𑌅𑌰𑍁𑌂𑌧𑌤𑍀 𑌵𑌸𑌿𑌷𑍍𑌠𑌂 𑌚 𑌰𑍋𑌹𑌿𑌣𑍀 𑌶𑌶𑌿𑌨𑌂 𑌯𑌥𑌾 ॥ 10 ॥
𑌲𑍋𑌪𑌾𑌮𑍁𑌦𑍍𑌰𑌾 𑌯𑌥𑌾𑌗𑌸𑍍𑌤𑍍𑌯𑌂 𑌸𑍁𑌕𑌨𑍍𑌯𑌾 𑌚𑍍𑌯𑌵𑌨𑌂 𑌯𑌥𑌾 ।
𑌸𑌾𑌵𑌿𑌤𑍍𑌰𑍀 𑌸𑌤𑍍𑌯𑌵𑌂𑌤𑌂 𑌚 𑌕𑌪𑌿𑌲𑌂 𑌶𑍍𑌰𑍀𑌮𑌤𑍀 𑌯𑌥𑌾 ॥ 11 ॥
𑌸𑍌𑌦𑌾𑌸𑌂 𑌮𑌦𑌯𑌂𑌤𑍀𑌵 𑌕𑍇𑌶𑌿𑌨𑍀 𑌸𑌗𑌰𑌂 𑌯𑌥𑌾 ।
𑌨𑍈𑌷𑌧𑌂 𑌦𑌮𑌯𑌂𑌤𑍀𑌵 𑌭𑍈𑌮𑍀 𑌪𑌤𑌿𑌮𑌨𑍁𑌵𑍍𑌰𑌤𑌾 ॥ 12 ॥
𑌤𑌥𑌾𑌽𑌹𑌮𑌿𑌕𑍍𑌷𑍍𑌵𑌾𑌕𑍁𑌵𑌰𑌂 𑌰𑌾𑌮𑌂 𑌪𑌤𑌿𑌮𑌨𑍁𑌵𑍍𑌰𑌤𑌾 ।
𑌸𑍀𑌤𑌾𑌯𑌾 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌰𑌾𑌕𑍍𑌷𑌸𑍍𑌯𑌃 𑌕𑍍𑌰𑍋𑌧𑌮𑍂𑌰𑍍𑌛𑌿𑌤𑌾𑌃 ॥ 13 ॥
𑌭𑌰𑍍𑌤𑍍𑌸𑌯𑌂𑌤𑌿 𑌸𑍍𑌮 𑌪𑌰𑍁𑌷𑍈𑌰𑍍𑌵𑌾𑌕𑍍𑌯𑍈 𑌰𑌾𑌵𑌣𑌚𑍋𑌦𑌿𑌤𑌾𑌃 ।
𑌅𑌵𑌲𑍀𑌨𑌃 𑌸 𑌨𑌿𑌰𑍍𑌵𑌾𑌕𑍍𑌯𑍋 𑌹𑌨𑍂𑌮𑌾𑌨𑍍 𑌶𑌿𑌂𑌶𑍁𑌪𑌾𑌦𑍍𑌰𑍁𑌮𑍇 ॥ 14 ॥
𑌯𑌸𑍀𑌤𑌾𑌂 𑌸𑌂𑌤𑌰𑍍𑌜𑌯𑌂𑌤𑍀𑌸𑍍𑌤𑌾 𑌰𑌾𑌕𑍍𑌷𑌸𑍀𑌰𑌶𑍃𑌣𑍋𑌤𑍍 𑌕𑌪𑌿𑌃 ।
𑌤𑌾𑌮𑌭𑌿𑌕𑍍𑌰𑌮𑍍𑌯 𑌸𑌂𑌕𑍃𑌦𑍍𑌧𑌾 𑌵𑍇𑌪𑌮𑌾𑌨𑌾𑌂 𑌸𑌮𑌂𑌤𑌤𑌃 ॥ 15 ॥
𑌭𑍃𑌶𑌂 𑌸𑌂𑌲𑌿𑌲𑌿𑌹𑍁𑌰𑍍𑌦𑍀𑌪𑍍𑌤𑌾𑌨𑍍 𑌪𑍍𑌰𑌲𑌂𑌬𑌾𑌨𑍍 𑌦𑌶𑌨𑌚𑍍𑌛𑌦𑌾𑌨𑍍 ।
𑌊𑌚𑍁𑌶𑍍𑌚 𑌪𑌰𑌮𑌕𑍍𑌰𑍁𑌦𑍍𑌧𑌾𑌃 𑌪𑍍𑌰𑌗𑍃𑌹𑍍𑌯𑌾𑌶𑍁 𑌪𑌰𑌶𑍍𑌵𑌧𑌾𑌨𑍍 ॥ 16 ॥
𑌨𑍇𑌯𑌮𑌰𑍍𑌹𑌤𑌿 𑌭𑌰𑍍𑌤𑌾𑌰𑌂 𑌰𑌾𑌵𑌣𑌂 𑌰𑌾𑌕𑍍𑌷𑌸𑌾𑌧𑌿𑌪𑌮𑍍 ।
𑌸𑌾 𑌭𑌰𑍍𑌤𑍍𑌸𑍍𑌯𑌮𑌾𑌨𑌾 𑌭𑍀𑌮𑌾𑌭𑍀 𑌰𑌾𑌕𑍍𑌷𑌸𑍀𑌭𑌿𑌰𑍍𑌵𑌰𑌾𑌨𑌨𑌾 ॥ 1 ॥
𑌸𑌬𑌾𑌷𑍍𑌪𑌮𑌪 𑌸𑌰𑍍𑌪𑌂𑌤𑍀 𑌶𑌿𑌂𑌶𑍁𑌪𑌾𑌂 𑌤𑌾𑌮𑍁𑌪𑌾𑌗𑌮𑌤𑍍 ।
𑌤𑌤𑌸𑍍𑌤𑌾𑌂 𑌶𑌿𑌂𑌶𑍁𑌪𑌾𑌂 𑌸𑍀𑌤𑌾 𑌰𑌾𑌕𑍍𑌷𑌸𑍀𑌭𑌿𑌃 𑌸𑌮𑌾𑌵𑍃𑌤𑌾 ॥ 1 ॥
𑌅𑌭𑌿𑌗𑌮𑍍𑌯 𑌵𑌿𑌶𑌾𑌲𑌾𑌕𑍍𑌷𑍀 𑌤𑌸𑍍𑌥𑍌 𑌶𑍋𑌕𑌪𑌰𑌿𑌪𑍍𑌲𑍁𑌤𑌾 ।
𑌤𑌾𑌂 𑌕𑍃𑌶𑌾𑌂 𑌦𑍀𑌨𑌵𑌦𑌨𑌾𑌂 𑌮𑌲𑌿𑌨𑌾𑌂𑌬𑌰𑌧𑌾𑌰𑌿𑌣𑍀𑌮𑍍 ॥ 1 ॥
𑌭𑌰𑍍𑌤𑍍𑌸𑌯𑌾𑌂𑌚𑌕𑍍𑌰𑌿𑌰𑍇 𑌸𑍀𑌤𑌾𑌂 𑌰𑌾𑌕𑍍𑌷𑌸𑍍𑌯𑌸𑍍𑌤𑌾𑌂 𑌸𑌮𑌂𑌤𑌤𑌃 ।
𑌤𑌤𑌸𑍍𑌤𑌾𑌂 𑌵𑌿𑌨𑌤𑌾 𑌨𑌾𑌮 𑌰𑌾𑌕𑍍𑌷𑌸𑍀 𑌭𑍀𑌮𑌦𑌰𑍍𑌶𑌨𑌾 ॥ 20 ॥
𑌅𑌬𑍍𑌰𑌵𑍀𑌤𑍍𑌕𑍁𑌪𑌿𑌤𑌾𑌕𑌾𑌰𑌾 𑌕𑌰𑌾𑌲𑌾 𑌨𑌿𑌰𑍍𑌣𑌤𑍋𑌦𑌰𑍀 ।
𑌸𑍀𑌤𑍇 𑌪𑌰𑍍𑌯𑌾𑌪𑍍𑌤𑌮𑍇𑌤𑌾𑌵𑌦𑍍𑌭𑌰𑍍𑌤𑍁𑌃 𑌸𑍍𑌨𑍇𑌹𑍋 𑌨𑌿𑌦𑌰𑍍𑌶𑌿𑌤𑌃 ॥ 21 ॥
𑌸𑌰𑍍𑌵𑌾𑌤𑍍𑌰𑌾𑌤𑌿𑌕𑍃𑌤𑌂 𑌭𑌦𑍍𑌰𑍇 𑌵𑍍𑌯𑌸𑌨𑌾𑌯𑍋𑌪𑌕𑌲𑍍𑌪𑌤𑍇 𑌪𑌰𑌿𑌤𑍁𑌷𑍍𑌟𑌾𑌸𑍍𑌮𑌿 𑌭𑌦𑍍𑌰𑌂 𑌤𑍇 𑌮𑌾𑌨𑍁𑌷𑌸𑍍𑌤𑍇 𑌕𑍃𑌤𑍋 𑌵𑌿𑌧𑌿𑌃 ॥ 22 ॥
𑌮𑌮𑌾𑌪𑌿 𑌤𑍁 𑌵𑌚𑌃 𑌪𑌥𑍍𑌯𑌂 𑌬𑍍𑌰𑍁𑌵𑌂𑌤𑍍𑌯𑌾𑌃 𑌕𑍁𑌰𑍁 𑌮𑍈𑌥𑌿𑌲𑌿 ।
𑌰𑌾𑌵𑌣𑌂 𑌭𑌜 𑌭𑌰𑍍𑌤𑌾𑌰𑌂 𑌭𑌰𑍍𑌤𑌾𑌰𑌂 𑌸𑌰𑍍𑌵𑌰𑌕𑍍𑌷𑌸𑌾𑌮𑍍 ॥ 23 ॥
𑌵𑌿𑌕𑍍𑌰𑌾𑌂𑌤𑌂 𑌰𑍂𑌪𑌵𑌂𑌤𑌂 𑌚 𑌸𑍁𑌰𑍇𑌶𑌮𑌿𑌵 𑌵𑌾𑌸𑌵𑌮𑍍 ।
𑌦𑌕𑍍𑌷𑌿𑌣𑌂 𑌤𑍍𑌯𑌾𑌗𑌶𑍀𑌲𑌂 𑌚 𑌸𑌰𑍍𑌵𑌸𑍍𑌯 𑌪𑍍𑌰𑌿𑌯𑌦𑌰𑍍𑌶𑌨𑌮𑍍 ॥ 24 ॥
𑌮𑌾𑌨𑍁𑌷𑌂 𑌕𑍃𑌪𑌣𑌂 𑌰𑌾𑌮𑌂 𑌤𑍍𑌯𑌕𑍍𑌤𑍍𑌵𑌾, 𑌰𑌾𑌵𑌣𑌮𑌾𑌶𑍍𑌰𑌯 ।
𑌦𑌿𑌵𑍍𑌯𑌾𑌂𑌗𑌰𑌾𑌗𑌾 𑌵𑍈𑌦𑍇𑌹𑌿 𑌦𑌿𑌵𑍍𑌯𑌾𑌭𑌰𑌣𑌭𑍂𑌷𑌿𑌤𑌾 ॥ 25 ॥
𑌅𑌦𑍍𑌯𑌪𑍍𑌰𑌭𑍃𑌤𑌿 𑌸𑌰𑍍𑌵𑍇𑌷𑌾𑌂 𑌲𑍋𑌕𑌾𑌨𑌾𑌮𑍀𑌶𑍍𑌵𑌰𑍀 𑌭𑌵 ।
𑌅𑌗𑍍𑌨𑍇𑌃 𑌸𑍍𑌵𑌾𑌹𑌾 𑌯𑌥𑌾 𑌦𑍇𑌵𑍀 𑌶𑌚𑍀 𑌵𑍇𑌂𑌦𑍍𑌰𑌸𑍍𑌯 𑌶𑍋𑌭𑌨𑍇 ॥ 26 ॥
𑌕𑌿𑌂 𑌤𑍇 𑌰𑌾𑌮𑍇𑌣 𑌵𑍈𑌦𑍇𑌹𑌿 𑌕𑍃𑌪𑌣𑍇𑌨 𑌗𑌤𑌾𑌯𑍁𑌷𑌾 ।
𑌏𑌤𑌦𑍁𑌕𑍍𑌤𑌂 𑌚 𑌮𑍇 𑌵𑌾𑌕𑍍𑌯𑌂 𑌯𑌦𑌿 𑌤𑍍𑌵𑌂 𑌨 𑌕𑌰𑌿𑌷𑍍𑌯𑌸𑌿 ॥ 2 ॥
𑌅𑌸𑍍𑌮𑌿𑌨𑍍𑌮𑍁𑌹𑍂𑌰𑍍𑌤𑍇 𑌸𑌰𑍍𑌵𑌾𑌸𑍍𑌤𑍍𑌵𑌾𑌂 𑌭𑌕𑍍𑌷𑌯𑌿𑌷𑍍𑌯𑌾𑌮𑌹𑍇 𑌵𑌯𑌮𑍍 ।
𑌅𑌨𑍍𑌯𑌾 𑌤𑍁 𑌵𑌿𑌕𑌟𑌾 𑌨𑌾𑌮 𑌲𑌂𑌬𑌮𑌾𑌨𑌪𑌯𑍋𑌧𑌰𑌾 ॥ 2 ॥
𑌅𑌬𑍍𑌰𑌵𑍀𑌤𑍍𑌕𑍁𑌪𑌿𑌤𑌾 𑌸𑍀𑌤𑌾𑌂 𑌮𑍁𑌷𑍍𑌟𑌿𑌮𑍁𑌦𑍍𑌯𑌮𑍍𑌯 𑌗𑌰𑍍𑌜𑌤𑍀 ।
𑌬𑌹𑍂𑌨𑍍𑌯𑌪𑍍𑌰𑌿𑌯𑌰𑍂𑌪𑌾𑌣𑌿 𑌵𑌚𑌨𑌾𑌨𑌿 𑌸𑍁𑌦𑍁𑌰𑍍𑌮𑌤𑍇 ॥ 2 ॥
𑌅𑌨𑍁𑌕𑍍𑌰𑍋𑌶𑌾𑌨𑍍𑌮𑍃𑌦𑍁𑌤𑍍𑌵𑌾𑌚𑍍𑌚 𑌸𑍋𑌢𑌾𑌨𑌿 𑌤𑌵 𑌮𑍈𑌥𑌿𑌲𑌿 ।
𑌨 𑌚 𑌨𑌃 𑌕𑍁𑌰𑍁𑌷𑍇 𑌵𑌾𑌕𑍍𑌯𑌂 𑌹𑌿𑌤𑌂 𑌕𑌾𑌲𑌪𑍁𑌰𑌸𑍍𑌕𑍃𑌤𑌮𑍍 ॥ 30 ॥
𑌆𑌨𑍀𑌤𑌾𑌸𑌿 𑌸𑌮𑍁𑌦𑍍𑌰𑌸𑍍𑌯 𑌪𑌾𑌰𑌮𑌨𑍍𑌯𑍈𑌰𑍍𑌦𑍁𑌰𑌾𑌸𑌦𑌮𑍍 ।
𑌰𑌾𑌵𑌣𑌾𑌂𑌤𑌃𑌪𑍁𑌰𑌂 𑌘𑍋𑌰𑌂 𑌪𑍍𑌰𑌵𑌿𑌷𑍍𑌟𑌾 𑌚𑌾𑌸𑌿 𑌮𑍈𑌥𑌿𑌲𑌿 ॥ 31 ॥
𑌰𑌾𑌵𑌣𑌸𑍍𑌯 𑌗𑍃𑌹𑍇 𑌰𑍁𑌦𑍍𑌧𑌾𑌮𑌸𑍍𑌮𑌾𑌭𑌿𑌸𑍍𑌤𑍁 𑌸𑍁𑌰𑌕𑍍𑌷𑌿𑌤𑌾𑌮𑍍 ।
𑌨 𑌤𑍍𑌵𑌾𑌂 𑌶𑌕𑍍𑌤𑌃 𑌪𑌰𑌿𑌤𑍍𑌰𑌾𑌤𑍁𑌮𑌪𑌿 𑌸𑌾𑌕𑍍𑌷𑌾𑌤𑍍𑌪𑍁𑌰𑌂𑌦𑌰𑌃 ॥ 32 ॥
𑌕𑍁𑌰𑍁𑌷𑍍𑌵 𑌹𑌿𑌤𑌵𑌾𑌦𑌿𑌨𑍍𑌯𑌾 𑌵𑌚𑌨𑌂 𑌮𑌮 𑌮𑍈𑌥𑌿𑌲𑌿 ।
𑌅𑌲𑌮𑌶𑍍𑌰𑍁𑌪𑍍𑌰𑌪𑌾𑌤𑍇𑌨 𑌤𑍍𑌯𑌜 𑌶𑍋𑌕𑌮𑌨𑌰𑍍𑌥𑌕𑌮𑍍 ॥ 33 ॥
𑌭𑌜 𑌪𑍍𑌰𑍀𑌤𑌿𑌂 𑌚 𑌹𑌰𑍍𑌷𑌂 𑌚 𑌤𑍍𑌯𑌜𑍈𑌤𑌾𑌂 𑌨𑌿𑌤𑍍𑌯𑌦𑍈𑌨𑍍𑌯𑌤𑌾𑌮𑍍 ।
𑌸𑍀𑌤𑍇 𑌰𑌾𑌕𑍍𑌷𑌸𑌰𑌾𑌜𑍇𑌨 𑌸𑌹 𑌕𑍍𑌰𑍀𑌡 𑌯𑌥𑌾𑌸𑍁𑌖𑌮𑍍 ॥ 34 ॥
𑌜𑌾𑌨𑌾𑌸𑌿 𑌹𑌿 𑌯𑌥𑌾 𑌭𑍀𑌰𑍁 𑌸𑍍𑌤𑍍𑌰𑍀𑌣𑌾𑌂 𑌯𑍌𑌵𑌨𑌮𑌧𑍍𑌰𑍁𑌵𑌮𑍍 ।
𑌯𑌾𑌵𑌨𑍍𑌨 𑌤𑍇 𑌵𑍍𑌯𑌤𑌿𑌕𑍍𑌰𑌾𑌮𑍇𑌤𑍍𑌤𑌾𑌵𑌤𑍍𑌸𑍁𑌖𑌮𑌵𑌾𑌪𑍍𑌨𑍁𑌹𑌿 ॥ 35 ॥
𑌉𑌦𑍍𑌯𑌾𑌨𑌾𑌨𑌿 𑌚 𑌰𑌮𑍍𑌯𑌾𑌣𑌿 𑌪𑌰𑍍𑌵𑌤𑍋𑌪𑌵𑌨𑌾𑌨𑌿 𑌚 ।
𑌸𑌹 𑌰𑌾𑌕𑍍𑌷𑌸𑌰𑌾𑌜𑍇𑌨 𑌚𑌰 𑌤𑍍𑌵𑌂 𑌮𑌦𑌿𑌰𑍇𑌕𑍍𑌷𑌣𑍇 ॥ 36 ॥
𑌸𑍍𑌤𑍍𑌰𑍀 𑌸𑌹𑌸𑍍𑌰𑌾𑌣𑌿 𑌤𑍇 𑌸𑌪𑍍𑌤 𑌵𑌶𑍇 𑌸𑍍𑌥𑌾𑌸𑍍𑌯𑌂𑌤𑌿 𑌸𑍁𑌂𑌦𑌰𑌿 ।
𑌰𑌾𑌵𑌣𑌂 𑌭𑌜 𑌭𑌰𑍍𑌤𑌾𑌰𑌂 𑌭𑌰𑍍𑌤𑌾𑌰𑌂 𑌸𑌰𑍍𑌵𑌰𑌕𑍍𑌷𑌸𑌾𑌮𑍍 ॥ 3 ॥
𑌉𑌤𑍍𑌪𑌾𑌟𑍍𑌯 𑌵𑌾 𑌤𑍇 𑌹𑍃𑌦𑌯𑌂 𑌭𑌕𑍍𑌷𑌯𑌿𑌷𑍍𑌯𑌾𑌮𑌿 𑌮𑍈𑌥𑌿𑌲𑌿 ।
𑌯𑌦𑌿 𑌮𑍇 𑌵𑍍𑌯𑌾𑌹𑍃𑌤𑌂 𑌵𑌾𑌕𑍍𑌯𑌂 𑌨 𑌯𑌥𑌾𑌵𑌤𑍍𑌕𑌰𑌿𑌷𑍍𑌯𑌸𑌿 ॥ 3 ॥
𑌤𑌤𑌶𑍍𑌚𑌂𑌡𑍋𑌦𑌰𑍀 𑌨𑌾𑌮 𑌰𑌾𑌕𑍍𑌷𑌸𑍀 𑌕𑍍𑌰𑍋𑌧𑌮𑍂𑌰𑍍𑌛𑌿𑌤𑌾 ।
𑌭𑍍𑌰𑌾𑌮𑌯𑌂𑌤𑍀 𑌮𑌹𑌚𑍍𑌛𑍂𑌲𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 3 ॥
𑌇𑌮𑌾𑌂 𑌹𑌰𑌿𑌣𑌲𑍋𑌲𑌾𑌕𑍍𑌷𑍀𑌂 𑌤𑍍𑌰𑌾𑌸𑍋𑌤𑍍𑌕𑌂𑌪𑌿𑌪𑌯𑍋𑌧𑌰𑌾𑌮𑍍 ।
𑌰𑌾𑌵𑌣𑍇𑌨 𑌹𑍃𑌤𑌾𑌂 𑌦𑍃𑌷𑍍𑌟𑌵𑌾 𑌦𑍌𑌹𑍃𑌦𑍋 𑌮𑍇 𑌮𑌹𑌾𑌨𑌭𑍂𑌤𑍍 ॥ 40 ॥
𑌯𑌕𑍃𑌤𑍍𑌪𑍍𑌲𑍀𑌹𑌮𑌥𑍋𑌤𑍍𑌪𑍀𑌡𑌂 𑌹𑍃𑌦𑌯𑌂 𑌚 𑌸𑌬𑌂𑌧𑌨𑌮𑍍 ।
𑌆𑌂𑌤𑍍𑌰𑌾𑌣𑍍𑌯𑌪𑌿 𑌤𑌥𑌾 𑌶𑍀𑌰𑍍𑌷𑌂 𑌖𑌾𑌦𑍇𑌯𑌮𑌿𑌤𑌿 𑌮𑍇 𑌮𑌤𑌿𑌃 ॥ 41 ॥
𑌤𑌤𑌸𑍍𑌤𑍁 𑌪𑍍𑌰𑌘𑌸𑌾 𑌨𑌾𑌮 𑌰𑌾𑌕𑍍𑌷𑌸𑍀 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।
𑌕𑌂𑌠𑌮𑌸𑍍𑌯𑌾 𑌨𑍃𑌶𑌂𑌸𑌾𑌯𑌾𑌃 𑌪𑍀𑌡𑌯𑌾𑌮 𑌕𑌿𑌮𑌾𑌸𑍍𑌯𑌤𑍇 ॥ 42 ॥
𑌨𑌿𑌵𑍇𑌦𑍍𑌯𑌤𑌾𑌂 𑌤𑌤𑍋 𑌰𑌾𑌜𑍍𑌞𑍇 𑌮𑌾𑌨𑍁𑌷𑍀 𑌸𑌾 𑌮𑍃𑌤𑍇𑌤𑌿 𑌹 ।
𑌨𑌾𑌤𑍍𑌰 𑌕𑌶𑍍𑌚𑌨 𑌸𑌂𑌦𑍇𑌹𑌃 𑌖𑌾𑌦𑌤𑍇𑌤𑌿 𑌸 𑌵𑌕𑍍𑌷𑍍𑌯𑌤𑌿 ॥ 43 ॥
𑌤𑌤𑌸𑍍𑌤𑍍𑌵𑌜𑌾𑌮𑍁𑌖𑍀 𑌨𑌾𑌮 𑌰𑌾𑌕𑍍𑌷𑌸𑍀 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।
𑌵𑌿𑌶𑌸𑍍𑌯𑍇𑌮𑌾𑌂 𑌤𑌤𑌃 𑌸𑌰𑍍𑌵𑌾𑌃 𑌸𑌮𑌾𑌨𑍍 𑌕𑍁𑌰𑍁𑌤 𑌪𑌿𑌂𑌡𑌕𑌾𑌨𑍍 ॥ 44 ॥
𑌵𑌿𑌭𑌜𑌾𑌮 𑌤𑌤𑌃 𑌸𑌰𑍍𑌵𑌾 𑌵𑌿𑌵𑌾𑌦𑍋 𑌮𑍇 𑌨 𑌰𑍋𑌚𑌤𑍇 ।
𑌪𑍇𑌯𑌮𑌾𑌨𑍀𑌯𑌤𑌾𑌂 𑌕𑍍𑌷𑌿𑌪𑍍𑌰𑌂 𑌲𑍇𑌹𑍍𑌯𑌮𑍁𑌚𑍍𑌚𑌾𑌵𑌚𑌂 𑌬𑌹𑍁 ॥ 45 ॥
𑌤𑌤𑌃 𑌶𑍂𑌰𑍍𑌪𑌣𑌖𑌾 𑌨𑌾𑌮 𑌰𑌾𑌕𑍍𑌷𑌸𑍀 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।
𑌅𑌜𑌾𑌮𑍁𑌖𑍍𑌯𑌾 𑌯𑌦𑍁𑌕𑍍𑌤𑌂 𑌹𑌿 𑌤𑌦𑍇𑌵 𑌮𑌮 𑌰𑍋𑌚𑌤𑍇 ॥ 46 ॥
𑌸𑍁𑌰𑌾 𑌚𑌾𑌨𑍀𑌯𑌤𑌾𑌂 𑌕𑍍𑌷𑌿𑌪𑍍𑌰𑌂 𑌸𑌰𑍍𑌵𑌶𑍋𑌕𑌵𑌿𑌨𑌾𑌶𑌿𑌨𑍀 ।
𑌮𑌾𑌨𑍁𑌷𑌂 𑌮𑌾𑌂𑌸𑌮𑌾𑌸𑍍𑌵𑌾𑌦𑍍𑌯 𑌨𑍃𑌤𑍍𑌯𑌾𑌮𑍋𑌽𑌥 𑌨𑌿𑌕𑍁𑌂𑌭𑌿𑌲𑌾𑌮𑍍 ॥ 4 ॥
𑌏𑌵𑌂 𑌸𑌂𑌭𑌰𑍍𑌤𑍍𑌸𑍍𑌯𑌮𑌾𑌨𑌾 𑌸𑌾 𑌸𑍀𑌤𑌾 𑌸𑍁𑌰𑌸𑍁𑌤𑍋𑌪𑌮𑌾 ।
𑌰𑌾𑌕𑍍𑌷𑌸𑍀𑌭𑌿𑌃 𑌸𑍁𑌘𑍋𑌰𑌾𑌭𑌿𑌰𑍍𑌦𑍈𑌰𑍍𑌯𑌮𑍁𑌤𑍍𑌸𑍃𑌜𑍍𑌯 𑌰𑍋𑌦𑌿𑌤𑌿 ॥ 4 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌚𑌤𑍁𑌰𑍍𑌵𑌿𑌂𑌶𑌸𑍍𑌸𑌰𑍍𑌗𑌃 ॥
