𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌦𑍀𑌰𑍍𑌘𑌕𑌾𑌲𑌾𑌤𑍍𑌸𑌮𑍁𑌤𑍍𑌥𑌾𑌯 𑌸𑌂𑌜𑍍𑌞𑌾𑌂 𑌲𑌬𑍍𑌧𑍍𑌵𑌾 𑌚 𑌵𑍀𑌰𑍍𑌯𑌵𑌾𑌨𑍍 ।
𑌨𑍇𑌤𑍍𑌰𑌾𑌭𑍍𑌯𑌾𑌮𑌶𑍍𑌰𑍁𑌪𑍂𑌰𑍍𑌣𑌾𑌭𑍍𑌯𑌾𑌂 𑌦𑍀𑌨𑌾𑌮𑍁𑌦𑍍𑌵𑍀𑌕𑍍𑌷𑍍𑌯 𑌮𑌾𑌤𑌰𑌮𑍍 ॥ 1 ॥
𑌸𑍋𑌽𑌮𑌾𑌤𑍍𑌯𑌮𑌧𑍍𑌯𑍇 𑌭𑌰𑌤𑍋 𑌜𑌨𑌨𑍀𑌮𑌭𑍍𑌯𑌕𑍁𑌤𑍍𑌸𑌯𑌤𑍍 ।
𑌰𑌾𑌜𑍍𑌯𑌂 𑌨 𑌕𑌾𑌮𑌯𑍇 𑌜𑌾𑌤𑍁 𑌮𑌂𑌤𑍍𑌰𑌯𑍇 𑌨𑌾𑌪𑌿 𑌮𑌾𑌤𑌰𑌮𑍍 ॥ 2 ॥
𑌅𑌭𑌿𑌷𑍇𑌕𑌂 𑌨 𑌜𑌾𑌨𑌾𑌮𑌿 𑌯𑍋𑌽𑌭𑍂𑌦𑍍𑌰𑌾𑌜𑍍𑌞𑌾 𑌸𑌮𑍀𑌕𑍍𑌷𑌿𑌤𑌃 ।
𑌵𑌿𑌪𑍍𑌰𑌕𑍃𑌷𑍍𑌟𑍇𑌹𑍍𑌯𑌹𑌂 𑌦𑍇𑌶𑍇 𑌶𑌤𑍍𑌰𑍁𑌘𑍍𑌨𑌸𑌹𑌿𑌤𑍋𑌽𑌵𑌸𑌮𑍍 ॥ 3 ॥
𑌵𑌨𑌵𑌾𑌸𑌂 𑌨 𑌜𑌾𑌨𑌾𑌮𑌿 𑌰𑌾𑌮𑌸𑍍𑌯𑌾𑌹𑌂 𑌮𑌹𑌾𑌤𑍍𑌮𑌨𑌃 ।
𑌵𑌿𑌵𑌾𑌸𑌨𑌂 𑌵𑌾 𑌸𑍌𑌮𑌿𑌤𑍍𑌰𑍇 𑌸𑍍𑌸𑍀𑌤𑌾𑌯𑌾𑌶𑍍𑌚 𑌯𑌥𑌾𑌽𑌭𑌵𑌤𑍍 ॥ 4 ॥
𑌤𑌥𑍈𑌵 𑌕𑍍𑌰𑍋𑌶𑌤𑌸𑍍𑌤𑌸𑍍𑌯 𑌭𑌰𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌕𑍌𑌸𑌲𑍍𑌯𑌾 𑌶𑌬𑍍𑌦𑌮𑌾𑌜𑍍𑌞𑌾𑌯 𑌸𑍁𑌮𑌿𑌤𑍍𑌰𑌾𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 5 ॥
𑌆𑌗𑌤𑌃 𑌕𑍍𑌰𑍂𑌰𑌕𑌾𑌰𑍍𑌯𑌾𑌯𑌾𑌃 𑌕𑍈𑌕𑍇𑌯𑍍𑌯𑌾 𑌭𑌰𑌤𑌸𑍍𑌸𑍁𑌤𑌃 ।
𑌤𑌮𑌹𑌂 𑌦𑍍𑌰𑌷𑍍𑌟𑍁𑌮𑌿𑌚𑍍𑌛𑌾𑌮𑌿 𑌭𑌰𑌤𑌂 𑌦𑍀𑌰𑍍𑌘𑌦𑌰𑍍𑌶𑌿𑌨𑌮𑍍 ॥ 6 ॥
𑌏𑌵𑌮𑍁𑌕𑍍𑌤𑍍𑌵𑌾 𑌸𑍁𑌮𑌿𑌤𑍍𑌰𑌾𑌂 𑌸𑌾 𑌵𑌿𑌵𑌰𑍍𑌣𑌾 𑌮𑌲𑌿𑌨𑌾 𑌕𑍃𑌶𑌾 ।
𑌪𑍍𑌰𑌤𑌸𑍍𑌥𑍇 𑌭𑌰𑌤𑍋 𑌯𑌤𑍍𑌰 𑌵𑍇𑌪𑌮𑌾𑌨𑌾 𑌵𑌿𑌚𑍇𑌤𑌨𑌾 ॥ ॥
𑌸 𑌤𑍁 𑌰𑌾𑌮𑌾𑌨𑍁𑌜𑌶𑍍𑌚𑌾𑌪𑌿 𑌶𑌤𑍍𑌰𑍁𑌘𑍍𑌨𑌸𑌹𑌿𑌤𑌸𑍍𑌤𑌦𑌾 ।
𑌪𑍍𑌰𑌤𑌸𑍍𑌥𑍇 𑌭𑌰𑌤𑍋 𑌯𑌤𑍍𑌰 𑌕𑍌𑌸𑌲𑍍𑌯𑌾𑌯𑌾 𑌨𑌿𑌵𑍇𑌶𑌨𑌮𑍍 ॥ ॥
𑌤𑌤 𑌶𑍍𑌶𑌤𑍍𑌰𑍁𑌘𑍍𑌨𑌭𑌰𑌤𑍌 𑌕𑍌𑌸𑌲𑍍𑌯𑌾𑌂 𑌪𑍍𑌰𑍇𑌕𑍍𑌷𑍍𑌯 𑌦𑍁𑌃𑌖𑌿𑌤𑍌 ।
𑌪𑌰𑍍𑌯𑌷𑍍𑌵𑌜𑍇𑌤𑌾𑌂 𑌦𑍁𑌃𑌖𑌾𑌰𑍍𑌤𑌾𑌂 𑌪𑌤𑌿𑌤𑌾𑌂 𑌨𑌷𑍍𑌟𑌚𑍇𑌤𑌸𑌾𑌮𑍍 ॥ ॥
𑌰𑍁𑌦𑌂𑌤𑍌 𑌰𑍁𑌦𑌤𑍀𑌂 𑌦𑍁𑌃𑌖𑌾𑌤𑍍𑌸𑌮𑍇𑌤𑍍𑌯𑌾𑌰𑍍𑌯𑌾𑌂 𑌮𑌨𑌸𑍍𑌸𑍍𑌵𑌿𑌨𑍀𑌮𑍍 ।
𑌭𑌰𑌤𑌂 𑌪𑍍𑌰𑌤𑍍𑌯𑍁𑌵𑌾𑌚𑍇𑌦𑌂 𑌕𑍌𑌸𑌲𑍍𑌯𑌾 𑌭𑍃𑌶𑌦𑍁𑌃𑌖𑌿𑌤𑌾 ॥ 10 ॥
𑌇𑌦𑌂 𑌤𑍇 𑌰𑌾𑌜𑍍𑌯𑌕𑌾𑌮𑌸𑍍𑌯 𑌰𑌾𑌜𑍍𑌯𑌂 𑌪𑍍𑌰𑌾𑌪𑍍𑌤𑌮𑌕𑌂𑌟𑌕𑌮𑍍 ।
𑌸𑌂𑌪𑍍𑌰𑌾𑌪𑍍𑌤𑌂 𑌬𑌤 𑌕𑍈𑌕𑍇𑌯𑍍𑌯𑌾 𑌶𑌶𑍀𑌘𑍍𑌰𑌂 𑌕𑍍𑌰𑍂𑌰𑍇𑌣 𑌕𑌰𑍍𑌮𑌣𑌾 ॥ 11 ॥
𑌪𑍍𑌰𑌸𑍍𑌥𑌾𑌪𑍍𑌯 𑌚𑍀𑌰𑌵𑌸𑌨𑌂 𑌪𑍁𑌤𑍍𑌰𑌂 𑌮𑍇 𑌵𑌨𑌵𑌾𑌸𑌿𑌨𑌮𑍍 ।
𑌕𑍈𑌕𑍇𑌯𑍀 𑌕𑌂 𑌗𑍁𑌣𑌂 𑌤𑌤𑍍𑌰 𑌪𑌶𑍍𑌯𑌤𑌿 𑌕𑍍𑌰𑍂𑌰𑌦𑌰𑍍𑌶𑌿𑌨𑍀 ॥ 12 ॥
𑌕𑍍𑌷𑌿𑌪𑍍𑌰𑌂 𑌮𑌾𑌮𑌪𑌿 𑌕𑍈𑌕𑍇𑌯𑍀 𑌪𑍍𑌰𑌸𑍍𑌥𑌾𑌪𑌯𑌿𑌤𑍁𑌮𑌰𑍍𑌹𑌤𑌿 ।
𑌹𑌿𑌰𑌣𑍍𑌯𑌨𑌾𑌭𑍋 𑌯𑌤𑍍𑌰𑌾𑌸𑍍𑌤𑍇 𑌸𑍁𑌤𑍋 𑌮𑍇 𑌸𑍁𑌮𑌹𑌾𑌯𑌶𑌾𑌃 ॥ 13 ॥
𑌅𑌥𑌵𑌾 𑌸𑍍𑌵𑌯𑌮𑍇𑌵𑌾𑌹𑌂 𑌸𑍁𑌮𑌿𑌤𑍍𑌰𑌾𑌨𑍁𑌚𑌰𑌾 𑌸𑍁𑌖𑌮𑍍 ।
𑌅𑌗𑍍𑌨𑌿𑌹𑍋𑌤𑍍𑌰𑌂 𑌪𑍁𑌰𑌸𑍍𑌕𑍃𑌤𑍍𑌯 𑌪𑍍𑌰𑌸𑍍𑌥𑌾𑌸𑍍𑌯𑍇 𑌯𑌤𑍍𑌰 𑌰𑌾𑌘𑌵𑌃 ॥ 14 ॥
𑌕𑌾𑌮𑌂 𑌵𑌾 𑌸𑍍𑌵𑌯𑌮𑍇𑌵𑌾𑌦𑍍𑌯 𑌤𑌤𑍍𑌰 𑌮𑌾𑌂 𑌨𑍇𑌤𑍁𑌮𑌰𑍍𑌹𑌸𑌿 ।
𑌯𑌤𑍍𑌰𑌾𑌸𑍌 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑌃 𑌪𑍁𑌤𑍍𑌰𑍋 𑌮𑍇 𑌤𑌪𑍍𑌯𑌤𑍇 𑌤𑌪𑌃 ॥ 15 ॥
𑌇𑌦𑌂 𑌹𑌿 𑌤𑌵 𑌵𑌿𑌸𑍍𑌤𑍀𑌰𑍍𑌣𑌂 𑌧𑌨𑌧𑌾𑌨𑍍𑌯𑌸𑌮𑌾𑌚𑌿𑌤𑌮𑍍 ।
𑌹𑌸𑍍𑌤𑍍𑌵𑌶𑍍𑌵𑌰𑌥𑌸𑌂𑌪𑍂𑌰𑍍𑌣𑌂 𑌰𑌾𑌜𑍍𑌯𑌂 𑌨𑌿𑌰𑍍𑌯𑌾𑌤𑌿𑌤𑌂 𑌤𑌯𑌾 ॥ 16 ॥
𑌇𑌤𑍍𑌯𑌾𑌦𑌿𑌬𑌹𑍁𑌭𑌿𑌰𑍍𑌵𑌾𑌕𑍍𑌯𑍈𑌃 𑌕𑍍𑌰𑍂𑌰𑍈𑌃 𑌸𑌂𑌭𑌰𑍍𑌤𑍍𑌸𑌿𑌤𑍋𑌽𑌨𑌘𑌃 ।
𑌵𑌿𑌵𑍍𑌯𑌥𑍇 𑌭𑌰𑌤𑌸𑍍𑌤𑍀𑌵𑍍𑌰𑌂 𑌵𑍍𑌰𑌣𑍇 𑌤𑍁𑌦𑍍𑌯𑍇𑌵 𑌸𑍂𑌚𑌿𑌨𑌾 ॥ 1 ॥
𑌪𑌪𑌾𑌤 𑌚𑌰𑌣𑍌 𑌤𑌸𑍍𑌯𑌾𑌸𑍍𑌤𑌦𑌾 𑌸𑌂𑌭𑍍𑌰𑌾𑌂𑌤𑌚𑍇𑌤𑌨𑌃 ।
𑌵𑌿𑌲𑌪𑍍𑌯 𑌬𑌹𑍁𑌧𑌾𑌽𑌸𑌂𑌜𑍍𑌞𑍋 𑌲𑌬𑍍𑌧𑌸𑌂𑌜𑍍𑌞𑌸𑍍𑌤𑌤𑌃 𑌸𑍍𑌥𑌿𑌤𑌃 ॥ 1 ॥
𑌏𑌵𑌂 𑌵𑌿𑌲𑌪𑌮𑌾𑌨𑌾𑌂 𑌤𑌾𑌂 𑌭𑌰𑌤𑌃 𑌪𑍍𑌰𑌾𑌂𑌜𑌲𑌿𑌸𑍍𑌤𑌦𑌾 ।
𑌕𑍌𑌸𑌲𑍍𑌯𑌾𑌂 𑌪𑍍𑌰𑌤𑍍𑌯𑍁𑌵𑌾𑌚𑍇𑌦𑌂 𑌶𑍋𑌕𑍈𑌰𑍍𑌬𑌹𑍁𑌭𑌿𑌰𑌾𑌵𑍃𑌤𑌾𑌮𑍍 ॥ 1 ॥
𑌆𑌰𑍍𑌯𑍇 𑌕𑌸𑍍𑌮𑌾𑌦𑌜𑌾𑌨𑌂𑌤𑌂 𑌗𑌰𑍍𑌹𑌸𑍇 𑌮𑌾𑌮𑌕𑌿𑌲𑍍𑌬𑌿𑌷𑌮𑍍 ।
𑌵𑌿𑌪𑍁𑌲𑌾𑌂 𑌚 𑌮𑌮 𑌪𑍍𑌰𑍀𑌤𑌿𑌂 𑌸𑍍𑌥𑌿𑌰𑌾𑌂 𑌜𑌾𑌨𑌾𑌸𑌿 𑌰𑌾𑌘𑌵𑍇 ॥ 20 ॥
𑌕𑍃𑌤𑌾 𑌶𑌾𑌸𑍍𑌤𑍍𑌰𑌾𑌨𑍁𑌗𑌾 𑌬𑍁𑌦𑍍𑌧𑌿𑌰𑍍𑌮𑌾𑌭𑍂𑌤𑍍𑌤𑌸𑍍𑌯 𑌕𑌦𑌾𑌚𑌨 ।
𑌸𑌤𑍍𑌯𑌸𑌂𑌧 𑌸𑍍𑌸𑌤𑌾𑌂 𑌶𑍍𑌰𑍇𑌷𑍍𑌠𑍋 𑌯𑌸𑍍𑌯𑌾𑌽𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 21 ॥
𑌪𑍍𑌰𑍇𑌷𑍍𑌯𑌂 𑌪𑌾𑌪𑍀𑌯𑌸𑌾𑌂 𑌯𑌾𑌤𑍁 𑌸𑍂𑌰𑍍𑌯𑌂𑌚 𑌪𑍍𑌰𑌤𑌿𑌮𑍇𑌹𑌤𑍁 ।
𑌹𑌂𑌤𑍁 𑌪𑌾𑌦𑍇𑌨 𑌗𑌾𑌂 𑌸𑍁𑌪𑍍𑌤𑌾𑌂 𑌯𑌸𑍍𑌯𑌾𑌽𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 22 ॥
𑌕𑌾𑌰𑌯𑌿𑌤𑍍𑌵𑌾 𑌮𑌹𑌤𑍍𑌕𑌰𑍍𑌮 𑌭𑌰𑍍𑌤𑌾 𑌭𑍃𑌤𑍍𑌯𑌮𑌨𑌰𑍍𑌥𑌕𑌮𑍍 ।
𑌅𑌧𑌰𑍍𑌮𑍋 𑌯𑍋𑌽𑌸𑍍𑌯 𑌸𑍋𑌽𑌸𑍍𑌯𑌾𑌸𑍍𑌤𑍁 𑌯𑌸𑍍𑌯𑌾𑌽𑌰𑍍𑌯𑍋𑌽𑌨𑍁𑌮𑌤𑍇𑌗𑌤𑌃 ॥ 23 ॥
𑌪𑌰𑌿𑌪𑌾𑌲𑌯𑌮𑌾𑌨𑌸𑍍𑌯 𑌰𑌾𑌜𑍍𑌞𑍋 𑌭𑍂𑌤𑌾𑌨𑌿 𑌪𑍁𑌯𑌤𑍍𑌰𑌵𑌤𑍍 ।
𑌤𑌤𑌸𑍍𑌨𑍁 𑌦𑍁𑌹𑍍𑌯𑌤𑌾𑌂 𑌪𑌾𑌪𑌂 𑌯𑌸𑍍𑌯𑌾𑌽𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 24 ॥
𑌬𑌲𑌿𑌷𑌡𑍍𑌭𑌾𑌗𑌮𑍁𑌦𑍍𑌧𑍃𑌤𑍍𑌯 𑌨𑍃𑌪𑌸𑍍𑌯𑌾𑌰𑌕𑍍𑌷𑌤𑌃 𑌪𑍍𑌰𑌜𑌾𑌃 ।
𑌅𑌧𑌰𑍍𑌮𑍋 𑌯𑍋𑌽𑌸𑍍𑌯 𑌸𑍋𑌽𑌸𑍍𑌯𑌾𑌸𑍍𑌤𑍁 𑌯𑌸𑍍𑌯𑌾𑌰𑍍𑌥𑍋𑌽𑌨𑍁𑌮𑌤𑍇 𑌗𑌤𑌃 ॥ 25 ॥
𑌸𑌂𑌶𑍍𑌰𑍁𑌤𑍍𑌯 𑌚 𑌤𑌪𑌸𑍍𑌵𑌿𑌭𑍍𑌯𑌸𑍍𑌸𑌤𑍍𑌰𑍇 𑌵𑍈 𑌯𑌜𑍍𑌞𑌦𑌕𑍍𑌷𑌿𑌣𑌾𑌮𑍍 ।
𑌤𑌾𑌂 𑌵𑌿𑌪𑍍𑌰𑌲𑌪𑌤𑌾𑌂 𑌪𑌾𑌪𑌂 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 26 ॥
𑌹𑌸𑍍𑌤𑍍𑌯𑌶𑍍𑌵𑌰𑌥𑌸𑌂𑌬𑌾𑌧𑍇 𑌯𑍁𑌦𑍍𑌧𑍇 𑌶𑌸𑍍𑌤𑍍𑌰𑌸𑌮𑌾𑌕𑍁𑌲𑍇 ।
𑌮𑌾 𑌸𑍍𑌮 𑌕𑌾𑌰𑍍𑌷𑍀𑌤𑍍𑌸𑌤𑌾𑌂 𑌧𑌰𑍍𑌮𑌂 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 2 ॥
𑌉𑌪𑌦𑌿𑌷𑍍𑌟𑌂 𑌸𑍁𑌸𑍂𑌕𑍍𑌷𑍍𑌮𑌾𑌰𑍍𑌥𑌂 𑌶𑌾𑌸𑍍𑌤𑍍𑌰𑌂 𑌯𑌤𑍍𑌨𑍇𑌨 𑌧𑍀𑌮𑌤𑌾 ।
𑌸 𑌨𑌾𑌶𑌯𑌤𑍁 𑌦𑍁𑌷𑍍𑌟𑌾𑌤𑍍𑌮𑌾 𑌯𑌸𑍍𑌯𑌾𑌽𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 2 ॥
𑌮𑌾 𑌚 𑌤𑌂 𑌵𑍍𑌯𑍂𑌢𑌬𑌾𑌹𑍍𑌵𑌂𑌸𑌂 𑌚𑌂𑌦𑍍𑌰𑌾𑌰𑍍𑌕𑌸𑌮𑌤𑍇𑌜𑌸𑌮𑍍 ।
𑌦𑍍𑌰𑌾𑌕𑍍𑌷𑍀𑌦𑍍𑌰𑌾𑌜𑍍𑌯𑌸𑍍𑌥𑌮𑌾𑌸𑍀𑌨𑌂 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇𑌗𑌤𑌃 ॥ 2 ॥
𑌪𑌾𑌯𑌸𑌂 𑌕𑍃𑌸𑌰𑌂 𑌛𑌾𑌗𑌂 𑌵𑍃𑌥𑌾 𑌸𑍋𑌽𑌶𑍍𑌨𑌾𑌤𑍁 𑌨𑌿𑌰𑍍𑌘𑍃𑌣𑌃 ।
𑌗𑍁𑌰𑍂𑌂𑌶𑍍𑌚𑌾𑌪𑍍𑌯𑌵𑌜𑌾𑌨𑌾𑌤𑍁 𑌯𑌸𑍍𑌯𑌾𑌽𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 30 ॥
𑌗𑌾𑌶𑍍𑌚 𑌸𑍍𑌪𑍃𑌶𑌤𑍁 𑌪𑌾𑌦𑍇𑌨 𑌗𑍁𑌰𑍂𑌨𑍍𑌪𑌰𑌿𑌵𑌦𑍇𑌤𑍍𑌸𑍍𑌵𑌯𑌮𑍍 ।
𑌮𑌿𑌤𑍍𑌰𑍇 𑌦𑍍𑌰𑍁𑌹𑍍𑌯𑍇𑌤 𑌸𑍋𑌽𑌤𑍍𑌯𑌂𑌤𑌂 𑌯𑌸𑍍𑌯𑌾𑌽𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 31 ॥
𑌵𑌿𑌶𑍍𑌵𑌾𑌸𑌾𑌤𑍍𑌕𑌥𑌿𑌤𑌂 𑌕𑌿𑌂𑌚𑌿𑌤𑍍𑌪𑌰𑌿𑌵𑌾𑌦𑌂 𑌮𑌿𑌥𑌃 𑌕𑍍𑌵𑌚𑌿𑌤𑍍 ।
𑌵𑌿𑌵𑍃𑌣𑍋𑌤𑍁 𑌸 𑌦𑍁𑌷𑍍𑌟𑌾𑌤𑍍𑌮𑌾 𑌯𑌸𑍍𑌯𑌾𑌽𑌰𑍍𑌯𑍋𑌽𑌮𑌤𑍇 𑌗𑌤𑌃 ॥ 32 ॥
𑌅𑌕𑌰𑍍𑌤𑌾 𑌹𑍍𑌯𑌕𑍃𑌤𑌜𑍍𑌞𑌶𑍍𑌚 𑌤𑍍𑌯𑌕𑍍𑌤𑌾𑌚𑌾𑌽𑌤𑍍𑌮𑌾 𑌨𑌿𑌰𑌪𑌤𑍍𑌰𑌪𑌃 ।
𑌲𑍋𑌕𑍇 𑌭𑌵𑌤𑍁 𑌵𑌿𑌦𑍍𑌵𑌿𑌷𑍍𑌟𑍋 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 33 ॥
𑌪𑍁𑌤𑍍𑌰𑍈𑌰𑍍𑌦𑌾𑌰𑍈𑌶𑍍𑌚 𑌭𑍃𑌤𑍍𑌯𑍈𑌶𑍍𑌚 𑌸𑍍𑌵𑌗𑍃𑌹𑍇 𑌪𑌰𑌿𑌵𑌾𑌰𑌿𑌤𑌃 ।
𑌸 𑌏𑌕𑍋 𑌮𑍃𑌷𑍍𑌟𑌮𑌶𑍍𑌨𑌾𑌤𑍁 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 34 ॥
𑌅𑌪𑍍𑌰𑌾𑌪𑍍𑌯 𑌸𑌦𑍃𑌶𑌾𑌨𑍍 𑌦𑌾𑌰𑌾𑌨𑌨𑌪𑌤𑍍𑌯𑌃 𑌪𑍍𑌰𑌮𑍀𑌯𑌤𑌾𑌮𑍍 ।
𑌅𑌨𑌵𑌾𑌪𑍍𑌯 𑌕𑍍𑌰𑌿𑌯𑌾𑌂 𑌧𑌰𑍍𑌮𑍍𑌯𑌾𑌂 𑌯𑌸𑍍𑌯𑌾𑌽𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 35 ॥
𑌮𑌾𑌽𑌤𑍍𑌮𑌨𑌸𑍍𑌸𑌂𑌤𑌤𑌿𑌂 𑌦𑍍𑌰𑌾𑌕𑍍𑌷𑍀𑌤𑍍𑌸𑍍𑌵𑍇𑌷𑍁 𑌦𑌾𑌰𑍇𑌷𑍁 𑌦𑍁𑌃𑌖𑌿𑌤𑌃 ।
𑌆𑌯𑍁𑌸𑍍𑌸𑌮𑌗𑍍𑌰𑌮𑌪𑍍𑌰𑌾𑌪𑍍𑌯 𑌯𑌽𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 36 ॥
𑌰𑌾𑌜𑌸𑍍𑌤𑍍𑌰𑍀𑌬𑌾𑌲𑌵𑍃𑌦𑍍𑌧𑌾𑌨𑌾𑌂 𑌵𑌧𑍇 𑌯𑌤𑍍𑌪𑌾𑌪𑌮𑍁𑌚𑍍𑌯𑌤𑍇 ।
𑌭𑍃𑌤𑍍𑌯𑌤𑍍𑌯𑌾𑌗𑍇 𑌚 𑌯𑌤𑍍𑌪𑌾𑌪𑌂 𑌤𑌤𑍍𑌪𑌾𑌪𑌂 𑌪𑍍𑌰𑌤𑌿𑌪𑌦𑍍𑌯𑌤𑌾𑌮𑍍 ॥ 3 ॥
𑌲𑌾𑌕𑍍𑌷𑌯𑌾 𑌮𑌧𑍁𑌮𑌾𑌂𑌸𑍇𑌨 𑌲𑍋𑌹𑍇𑌨 𑌚 𑌵𑌿𑌷𑍇𑌣 𑌚 ।
𑌸𑌦𑍈𑌵 𑌬𑌿𑌭𑍃𑌯𑌾𑌦𑍍𑌭𑍃𑌤𑍍𑌯𑌾𑌨𑍍𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 3 ॥
𑌸𑌂𑌗𑍍𑌰𑌮𑍇 𑌸𑌮𑍁𑌪𑍋𑌢𑍇 𑌸𑍍𑌮 𑌶𑌤𑍍𑌰𑍁𑌪𑌕𑍍𑌷𑌭𑌯𑌂𑌕𑌰𑍇 ।
𑌪𑌲𑌾𑌯𑌾𑌮𑌾𑌨𑍋 𑌵𑌧𑍍𑌯𑍇𑌤 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 3 ॥
𑌕𑌪𑌾𑌲𑌪𑌾𑌣𑌿𑌃 𑌪𑍃𑌥𑌿𑌵𑍀𑌮𑌟𑌤𑌾𑌂 𑌚𑍀𑌰𑌸𑌂𑌵𑍃𑌤𑌃 ।
𑌭𑌿𑌕𑍍𑌷𑌮𑌾𑌣𑍋 𑌯𑌥𑍋𑌨𑍍𑌮𑌤𑍍𑌤𑍋 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 40 ॥
𑌮𑌦𑍍𑌯𑍇 𑌪𑍍𑌰𑌸𑌕𑍍𑌤𑍋 𑌭𑌵𑌤𑍁 𑌸𑍍𑌤𑍍𑌰𑍀𑌷𑍍𑌵𑌕𑍍𑌷𑍇𑌷𑍁 𑌚 𑌨𑌿𑌤𑍍𑌯𑌶𑌃 ।
𑌕𑌾𑌮𑌕𑍍𑌰𑍋𑌧𑌾𑌭𑌿𑌭𑍂𑌤𑌸𑍍𑌤𑍁 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 41 ॥
𑌮𑌾𑌸𑍍𑌮 𑌧𑌰𑍍𑌮𑍇 𑌮𑌨𑍋 𑌭𑍂𑌯𑌾𑌦𑌧𑌰𑍍𑌮𑌂 𑌸 𑌨𑌿𑌷𑍇𑌵𑌤𑌾𑌮𑍍 ।
𑌅𑌪𑌾𑌤𑍍𑌰𑌵𑌰𑍍𑌷𑍀 𑌭𑌵𑌤𑍁 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 42 ॥
𑌸𑌂𑌚𑌿𑌤𑌾𑌨𑍍𑌯𑌸𑍍𑌯 𑌵𑌿𑌤𑍍𑌤𑌨𑌿 𑌵𑌿𑌵𑌿𑌧𑌾𑌨𑌿 𑌸𑌹𑌸𑍍𑌰𑌶𑌃 ।
𑌦𑌸𑍍𑌯𑍁𑌭𑌿𑌰𑍍𑌵𑌿𑌪𑍍𑌰𑌲𑍁𑌪𑍍𑌯𑌂𑌤𑌾𑌂 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 43 ॥
𑌉𑌭𑍇 𑌸𑌂𑌧𑍍𑌯𑍇 𑌶𑌯𑌾𑌨𑌸𑍍𑌯 𑌯𑌤𑍍𑌪𑌾𑌪𑌂 𑌪𑌰𑌿𑌕𑌲𑍍𑌪𑍍𑌯𑌤𑍇 ।
𑌤𑌚𑍍𑌚𑌪𑌾𑌪𑌂 𑌭𑌵𑍇𑌤𑍍𑌤𑌸𑍍𑌯 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 44 ॥
𑌯𑌦𑌗𑍍𑌨𑌿𑌦𑌾𑌯𑌕𑍇 𑌪𑌾𑌪𑌂 𑌯𑌤𑍍𑌪𑌾𑌪𑌂 𑌗𑍁𑌰𑌤𑌲𑍍𑌪𑌗𑍇 ।
𑌮𑌿𑌤𑍍𑌰𑌦𑍍𑌰𑍋𑌹𑍇 𑌚 𑌯𑌤𑍍𑌪𑌾𑌪𑌂 𑌤𑌤𑍍𑌪𑌾𑌪𑌂 𑌪𑍍𑌰𑌤𑌿𑌪𑌦𑍍𑌯𑌤𑌾𑌮𑍍 ॥ 45 ॥
𑌦𑍇𑌵𑌤𑌾𑌨𑌾𑌂 𑌪𑌿𑌤𑍍𑌰𑍂𑌣𑌾𑌂 𑌚 𑌮𑌾𑌤𑌾𑌪𑌿𑌤𑍍𑌰𑍋𑌸𑍍𑌤𑌥𑍈𑌵 𑌚 ।
𑌮𑌾 𑌸𑍍𑌮 𑌕𑌾𑌰𑍍𑌷𑍀𑌤𑍍𑌸 𑌶𑍁𑌶𑍍𑌰𑍂𑌷𑌾𑌂 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 46 ॥
𑌸𑌤𑌾𑌂 𑌲𑍋𑌕𑌾𑌤𑍍𑌸𑌤𑌾𑌂 𑌕𑍀𑌰𑍍𑌤𑍍𑌯𑌾 𑌸𑍍𑌸𑌂𑌜𑍁𑌷𑍍𑌟𑌾𑌤𑍍𑌕𑌰𑍍𑌮𑌣𑌸𑍍𑌤𑌥𑌾 ।
𑌭𑍍𑌰𑌶𑍍𑌯𑌤𑍁 𑌕𑍍𑌷𑌿𑌪𑍍𑌰𑌮𑌦𑍍𑌯𑍈𑌵 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 4 ॥
𑌅𑌪𑌾𑌸𑍍𑌯 𑌮𑌾𑌤𑍃𑌶𑍁𑌶𑍍𑌰𑍂𑌷𑌾𑌮𑌨𑌰𑍍𑌥𑍇 𑌸𑍋𑌽𑌵𑌤𑌿𑌷𑍍𑌠𑌤𑌾𑌮𑍍 ।
𑌦𑍀𑌰𑍍𑌘𑌬𑌾𑌹𑍁𑌰𑍍𑌮𑌹𑌾𑌵𑌕𑍍𑌷𑌾𑌃 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 4 ॥
𑌬𑌹𑍁𑌪𑍁𑌤𑍍𑌰𑍋 𑌦𑌰𑌿𑌦𑍍𑌰𑌶𑍍𑌚 𑌜𑍍𑌵𑌰𑌰𑍋𑌗𑌸𑌮𑌨𑍍𑌵𑌿𑌤𑌃 ।
𑌸 𑌭𑍂𑌯𑌾𑌤𑍍𑌸𑌤𑌤 𑌕𑍍𑌲𑍇𑌶𑍀 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 4 ॥
𑌆𑌶𑌾𑌮𑌾𑌶𑌂𑌸𑌮𑌾𑌨𑌾𑌨𑌾𑌂 𑌦𑍀𑌨𑌾𑌨𑌾𑌮𑍂𑌰𑍍𑌧𑍍𑌵𑌚𑌕𑍍𑌷𑍁𑌷𑌾𑌮𑍍 ।
𑌅𑌰𑍍𑌥𑌿𑌨𑌾𑌂 𑌵𑌿𑌤𑌥𑌾𑌂 𑌕𑍁𑌰𑍍𑌯𑌾𑌦𑍍𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 50 ॥
𑌮𑌾𑌯𑌯𑌾 𑌰𑌮𑌤𑌾𑌂 𑌨𑌿𑌤𑍍𑌯𑌂 𑌪𑌰𑍁𑌷𑌃 𑌪𑌿𑌶𑍁𑌨𑍋𑌽𑌶𑍁𑌚𑌿𑌃 ।
𑌰𑌾𑌜𑍍𑌞𑍋 𑌭𑍀𑌤𑌸𑍍𑌤𑍍𑌵𑌧𑌰𑍍𑌮𑌾𑌤𑍍𑌮𑌾 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 51 ॥
𑌋𑌤𑍁𑌸𑍍𑌨𑌾𑌤𑌾𑌂 𑌸𑌤𑍀𑌂 𑌭𑌾𑌰𑍍𑌯𑌾𑌮𑍃𑌤𑍁𑌕𑌾𑌲𑌾𑌨𑍁𑌰𑍋𑌧𑌿𑌨𑍀𑌮𑍍 ।
𑌅𑌤𑌿𑌵𑌰𑍍𑌤𑍇𑌤 𑌦𑍁𑌷𑍍𑌟𑌾𑌤𑍍𑌮𑌾 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 52 ॥
𑌸𑌧𑌰𑍍𑌮𑌦𑌾𑌰𑌾𑌨𑍍𑌪𑌰𑌿𑌤𑍍𑌯𑌜𑍍𑌯 𑌪𑌰𑌦𑌾𑌰𑌾𑌨𑍍𑌨𑌿𑌷𑍇𑌵𑌤𑌾𑌮𑍍 ।
𑌤𑍍𑌯𑌕𑍍𑌤𑌧𑌰𑍍𑌮𑌰𑌤𑌿𑌰𑍍𑌮𑍂𑌢𑍋 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 53 ॥
𑌵𑌿𑌪𑍍𑌰𑌲𑍁𑌪𑍍𑌤𑌪𑍍𑌰𑌜𑌾𑌤𑌸𑍍𑌯 𑌦𑍁𑌷𑍍𑌕𑍃𑌤𑌂 𑌬𑍍𑌰𑌾𑌹𑍍𑌮𑌣𑌸𑍍𑌯 𑌯𑌤𑍍 ।
𑌤𑌦𑍇𑌵 𑌪𑍍𑌰𑌤𑌿𑌪𑌦𑍍𑌯𑍇𑌤 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 54 ॥
𑌪𑌾𑌨𑍀𑌯𑌦𑍂𑌷𑌕𑍇 𑌪𑌾𑌪𑌂 𑌤𑌥𑍈𑌵 𑌵𑌿𑌷𑌦𑌾𑌯𑌕𑍇 ।
𑌯𑌤𑍍𑌤𑌦𑍇𑌕𑌸𑍍𑌸 𑌲𑌭𑌤𑌾𑌂 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 55 ॥
𑌬𑍍𑌰𑌾𑌹𑍍𑌮𑌣𑌾𑌯𑍋𑌦𑍍𑌯𑌤𑌾𑌂 𑌪𑍂𑌜𑌾𑌂 𑌵𑌿𑌹𑌂𑌤𑍁 𑌕𑌲𑍁𑌷𑍇𑌂𑌦𑍍𑌰𑌿𑌯𑌃 ।
𑌬𑌾𑌲𑌵𑌤𑍍𑌸𑌾𑌂 𑌚 𑌗𑌾𑌂 𑌦𑍋𑌗𑍍𑌧𑍁 𑌯𑌸𑍍𑌯𑌾𑌰𑍍𑌯𑍋 𑌽𑌨𑍁𑌮𑌤𑍇 𑌗𑌤𑌃 ॥ 56 ॥
𑌤𑍁𑌰𑍍𑌷𑍍𑌣𑌾𑌰𑍍𑌤𑌂 𑌸𑌤𑌿 𑌪𑌾𑌨𑍀𑌯𑍇 𑌵𑌿𑌪𑍍𑌰𑌲𑌂𑌭𑍇𑌨 𑌯𑍋𑌜𑌯𑍇𑌤𑍍 ।
𑌲𑌭𑍇𑌤 𑌤𑌸𑍍𑌯 𑌯𑌤𑍍𑌪𑌾𑌪𑌂 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 5 ॥
𑌭𑌕𑍍𑌤𑍍𑌯𑌾 𑌵𑌿𑌵𑌦𑌮𑌾𑌨𑍇𑌷𑍁 𑌮𑌾𑌰𑍍𑌗𑌮𑌾𑌶𑍍𑌰𑌿𑌤𑍍𑌯 𑌪𑌶𑍍𑌯𑌤𑌃 ।
𑌤𑌸𑍍𑌯 𑌪𑌾𑌪𑍇𑌨 𑌯𑍁𑌜𑍍𑌯𑍇𑌤 𑌯𑌸𑍍𑌯𑌾𑌰𑍍𑌯𑍋𑌽𑌨𑍁𑌮𑌤𑍇 𑌗𑌤𑌃 ॥ 5 ॥
𑌵𑌿𑌹𑍀𑌨𑌾𑌂 𑌪𑌤𑌿𑌪𑍁𑌤𑍍𑌰𑌾𑌭𑍍𑌯𑌾𑌂 𑌕𑍌𑌸𑌲𑍍𑌯𑌾𑌂 𑌪𑌾𑌰𑍍𑌥𑌿𑌵𑌾𑌤𑍍𑌮𑌜𑌃 ।
𑌏𑌵𑌮𑌾𑌶𑍍𑌵𑌾𑌸𑌯𑌨𑍍𑌨𑍇𑌵 𑌦𑍁𑌃𑌖𑌾𑌰𑍍𑌤𑍋 𑌨𑌿𑌪𑌪𑌾𑌤 𑌹 ॥ 5 ॥
𑌤𑌥𑌾 𑌤𑍁 𑌶𑌪𑌥𑍈𑌃 𑌕𑌷𑍍𑌟𑍈 𑌶𑍍𑌶𑌪𑌮𑌾𑌨𑌮𑌚𑍇𑌤𑌨𑌮𑍍 ।
𑌭𑌰𑌤𑌂 𑌶𑍋𑌕𑌸𑌂𑌤𑌪𑍍𑌤𑌂 𑌕𑍌𑌸𑌲𑍍𑌯𑌾 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 60 ॥
𑌮𑌮 𑌦𑍁𑌃𑌖𑌮𑌿𑌦𑌂 𑌪𑍁𑌤𑍍𑌰 𑌭𑍂𑌯𑌸𑍍𑌸𑌮𑍁𑌪𑌜𑌾𑌯𑌤𑍇 ।
𑌶𑌪𑌥𑍈 𑌶𑍍𑌶𑌪𑌮𑌾𑌨𑍋 𑌹𑌿 𑌪𑍍𑌰𑌾𑌣𑌾𑌨𑍁𑌪𑌰𑍁𑌣𑌤𑍍𑌸𑌿 𑌮𑍇 ॥ 61 ॥
𑌦𑌿𑌷𑍍𑌟𑍍𑌯𑌾 𑌨 𑌚𑌲𑌿𑌤𑍋 𑌧𑌰𑍍𑌮𑌾𑌦𑌾𑌤𑍍𑌮𑌾 𑌤𑍇 𑌸𑌹𑌲𑌕𑍍𑌷𑍍𑌮𑌣𑌃 ।
𑌵𑌤𑍍𑌸 𑌸𑌤𑍍𑌯𑌪𑍍𑌰𑌤𑌿𑌜𑍍𑌞𑍋 𑌤𑍇 𑌸𑌤𑌾𑌂 𑌲𑍋𑌕𑌮𑌵𑌾𑌪𑍍𑌸𑍍𑌯𑌸𑌿 ॥ 62 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌚𑌾𑌂𑌕𑌮𑌾𑌨𑍀𑌯 𑌭𑌰𑌤𑌂 𑌭𑍍𑌰𑌾𑌤𑍃𑌵𑌤𑍍𑌸𑌲𑌮𑍍 ।
𑌪𑌰𑌿𑌷𑍍𑌵𑌜𑍍𑌯 𑌮𑌹𑌾𑌬𑌾𑌹𑍁𑌂 𑌰𑍁𑌰𑍋𑌦 𑌭𑍃𑌶𑌦𑍁𑌃𑌖𑌿𑌤𑌾 ॥ 63 ॥
𑌏𑌵𑌂 𑌵𑌿𑌲𑌪𑌮𑌾𑌨𑌸𑍍𑌯 𑌦𑍁𑌃𑌖𑌾𑌰𑍍𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌮𑍋𑌹𑌾𑌚𑍍𑌚 𑌶𑍋𑌕𑌸𑌮𑍍𑌰𑍋𑌧𑌾𑌦𑍍𑌬𑌭𑍂𑌵 𑌲𑍁𑌲𑌿𑌤𑌂 𑌮𑌨𑌃 ॥ 64 ॥
𑌲𑌾𑌲𑌪𑍍𑌯𑌮𑌾𑌨𑌸𑍍𑌯 𑌵𑌿𑌚𑍇𑌤𑌨𑌸𑍍𑌯 𑌪𑍍𑌰𑌣𑌷𑍍𑌟𑌬𑍁𑌦𑍍𑌧𑍇𑌃 𑌪𑌤𑌿𑌤𑌸𑍍𑌯 𑌭𑍂𑌮𑍌 ।
𑌮𑍁𑌹𑍁𑌰𑍍𑌮𑍁𑌹𑍁𑌰𑍍𑌨𑌿𑌶𑍍𑌶𑍍𑌵𑌸𑌤𑌶𑍍𑌚 𑌘𑌰𑍍𑌮𑌂 𑌸𑌾 𑌤𑌸𑍍𑌯 𑌶𑍋𑌕𑍇𑌨 𑌜𑌗𑌾𑌮 𑌰𑌾𑌤𑍍𑌰𑌿𑌃 ॥ 65 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌪𑌂𑌚𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ॥
