𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌷𑍋𑌡𑌶𑌸𑍍𑌸𑌰𑍍𑌗𑌃 ।
𑌪𑍍𑌰𑌶𑌸𑍍𑌯 𑌤𑍁 𑌪𑍍𑌰𑌶𑌸𑍍𑌤𑌵𑍍𑌯𑌾𑌂 𑌸𑍀𑌤𑌾𑌂 𑌤𑌾𑌂 𑌹𑌰𑌿𑌪𑍁𑌂𑌗𑌵𑌃 ।
𑌗𑍁𑌣𑌾𑌭𑌿𑌰𑌾𑌮𑌂 𑌰𑌾𑌮𑌂 𑌚 𑌪𑍁𑌨𑌶𑍍𑌚𑌿𑌂𑌤𑌾𑌪𑌰𑍋𑌽𑌭𑌵𑌤𑍍 ॥ 1 ॥
𑌸 𑌮𑍁𑌹𑍂𑌰𑍍𑌤𑌮𑌿𑌵 𑌧𑍍𑌯𑌾𑌤𑍍𑌵𑌾 𑌬𑌾𑌷𑍍𑌪𑌪𑌰𑍍𑌯𑌾𑌕𑍁𑌲𑍇𑌕𑍍𑌷𑌣𑌃 ।
𑌸𑍀𑌤𑌾𑌮𑌾𑌶𑍍𑌰𑌿𑌤𑍍𑌯 𑌤𑍇𑌜𑌸𑍍𑌵𑍀 𑌹𑌨𑍂𑌮𑌾𑌨𑍍𑌵𑌿𑌲𑌲𑌾𑌪 𑌹 ॥ 2 ॥
𑌮𑌾𑌨𑍍𑌯𑌾 𑌗𑍁𑌰𑍁𑌵𑌿𑌨𑍀𑌤𑌸𑍍𑌯 𑌲𑌕𑍍𑌷𑍍𑌮𑌣𑌸𑍍𑌯 𑌗𑍁𑌰𑍁𑌪𑍍𑌰𑌿𑌯𑌾 ।
𑌯𑌦𑌿 𑌸𑍀𑌤𑌾𑌽𑌽𑌪𑌿 𑌦𑍁𑌃𑌖𑌾𑌰𑍍𑌤𑌾 𑌕𑌾𑌲𑍋 𑌹𑌿 𑌦𑍁𑌰𑌤𑌿𑌕𑍍𑌰𑌮𑌃 ॥ 3 ॥
𑌰𑌾𑌮𑌸𑍍𑌯 𑌵𑍍𑌯𑌵𑌸𑌾𑌯𑌜𑍍𑌞𑌾 𑌲𑌕𑍍𑌷𑍍𑌮𑌣𑌸𑍍𑌯 𑌚 𑌧𑍀𑌮𑌤𑌃 ।
𑌨𑌾𑌤𑍍𑌯𑌰𑍍𑌥𑌂 𑌕𑍍𑌷𑍁𑌭𑍍𑌯𑌤𑍇 𑌦𑍇𑌵𑍀 𑌗𑌂𑌗𑍇𑌵 𑌜𑌲𑌦𑌾𑌗𑌮𑍇 ॥ 4 ॥
𑌤𑍁𑌲𑍍𑌯𑌶𑍀𑌲𑌵𑌯𑍋𑌵𑍃𑌤𑍍𑌤𑌾𑌂 𑌤𑍁𑌲𑍍𑌯𑌾𑌭𑌿𑌜𑌨𑌲𑌕𑍍𑌷𑌣𑌾𑌮𑍍 ।
𑌰𑌾𑌘𑌵𑍋𑌽𑌽𑌰𑍍𑌹𑌤𑌿 𑌵𑍈𑌦𑍇𑌹𑍀𑌂 𑌤𑌂 𑌚𑍇𑌯𑌮𑌸𑌿𑌤𑍇𑌕𑍍𑌷𑌣𑌾 ॥ 5 ॥
𑌤𑌾𑌂 𑌦𑍃𑌷𑍍𑌟𑍍𑌵𑌾 𑌨𑌵𑌹𑍇𑌮𑌾𑌭𑌾𑌂 𑌲𑍋𑌕𑌕𑌾𑌂𑌤𑌾𑌮𑌿𑌵 𑌶𑍍𑌰𑌿𑌯𑌮𑍍 ।
𑌜𑌗𑌾𑌮 𑌮𑌨𑌸𑌾 𑌰𑌾𑌮𑌂 𑌵𑌚𑌨𑌂 𑌚𑍇𑌦𑌮𑌬𑍍𑌰𑌵𑍀𑌤𑍍 ॥ 6 ॥
𑌅𑌸𑍍𑌯𑌾 𑌹𑍇𑌤𑍋𑌰𑍍𑌵𑌿𑌶𑌾𑌲𑌾𑌕𑍍𑌷𑍍𑌯𑌾 𑌹𑌤𑍋 𑌵𑌾𑌲𑍀 𑌮𑌹𑌾𑌬𑌲𑌃 ।
𑌰𑌾𑌵𑌣𑌪𑍍𑌰𑌤𑌿𑌮𑍋 𑌵𑍀𑌰𑍍𑌯𑍇 𑌕𑌬𑌂𑌧𑌶𑍍𑌚 𑌨𑌿𑌪𑌾𑌤𑌿𑌤𑌃 ॥ ॥
𑌵𑌿𑌰𑌾𑌧𑌶𑍍𑌚 𑌹𑌤𑌃 𑌸𑌂𑌖𑍍𑌯𑍇 𑌰𑌾𑌕𑍍𑌷𑌸𑍋 𑌭𑍀𑌮𑌵𑌿𑌕𑍍𑌰𑌮𑌃 ।
𑌵𑌨𑍇 𑌰𑌾𑌮𑍇𑌣 𑌵𑌿𑌕𑍍𑌰𑌮𑍍𑌯 𑌮𑌹𑍇𑌂𑌦𑍍𑌰𑍇𑌣𑍇𑌵 𑌶𑌂𑌬𑌰𑌃 ॥ ॥
𑌚𑌤𑍁𑌰𑍍𑌦𑌶 𑌸𑌹𑌸𑍍𑌰𑌾𑌣𑌿 𑌰𑌕𑍍𑌷𑌸𑌾𑌂 𑌭𑍀𑌮𑌕𑌰𑍍𑌮𑌣𑌾𑌮𑍍 ।
𑌨𑌿𑌹𑌤𑌾𑌨𑌿 𑌜𑌨𑌸𑍍𑌥𑌾𑌨𑍇 𑌶𑌰𑍈𑌰𑌗𑍍𑌨𑌿𑌶𑌿𑌖𑍋𑌪𑌮𑍈𑌃 ॥ ॥
𑌖𑌰𑌶𑍍𑌚 𑌨𑌿𑌹𑌤𑌸𑌂𑌖𑍍𑌯𑍇 𑌤𑍍𑌰𑌿𑌶𑌿𑌰𑌾𑌶𑍍𑌚 𑌨𑌿𑌪𑌾𑌤𑌿𑌤𑌃 ।
𑌦𑍂𑌷𑌣𑌶𑍍𑌚 𑌮𑌹𑌾𑌤𑍇𑌜𑌾 𑌰𑌾𑌮𑍇𑌣 𑌵𑌿𑌦𑌿𑌤𑌾𑌤𑍍𑌮𑌨𑌾 ॥ 10 ॥
𑌐𑌶𑍍𑌵𑌰𑍍𑌯𑌂 𑌵𑌾𑌨𑌰𑌾𑌣𑌾𑌂 𑌚 𑌦𑍁𑌰𑍍𑌲𑌭𑌂 𑌵𑌾𑌲𑌿𑌪𑌾𑌲𑌿𑌤𑌮𑍍 ।
𑌅𑌸𑍍𑌯𑌾 𑌨𑌿𑌮𑌿𑌤𑍍𑌤𑍇 𑌸𑍁𑌗𑍍𑌰𑍀𑌵𑌃 𑌪𑍍𑌰𑌾𑌪𑍍𑌤𑌵𑌾𑌨𑍍 𑌲𑍋𑌕𑌸𑌤𑍍𑌕𑍃𑌤𑌮𑍍 ॥ 11 ॥
𑌸𑌾𑌗𑌰𑌶𑍍𑌚 𑌮𑌯𑌾 𑌕𑍍𑌰𑌾𑌂𑌤𑌶𑍍𑌶𑍍𑌰𑍀𑌮𑌾𑌨𑍍𑌨𑌦𑌨𑌦𑍀𑌪𑌤𑌿𑌃 ।
𑌅𑌸𑍍𑌯𑌾 𑌹𑍇𑌤𑍋𑌰𑍍𑌵𑌿𑌶𑌾𑌲𑌾𑌕𑍍𑌷𑍍𑌯𑌾𑌃 𑌪𑍁𑌰𑍀 𑌚𑍇𑌯𑌮𑌵𑍇𑌕𑍍𑌷𑌿𑌤𑌾 ॥ 12 ॥
𑌯𑌦𑌿 𑌰𑌾𑌮𑌃 𑌸𑌮𑍁𑌦𑍍𑌰𑌾𑌂𑌤𑌾𑌂 𑌮𑍇𑌦𑌿𑌨𑍀𑌂 𑌪𑌰𑌿𑌵𑌰𑍍𑌤𑌯𑍇𑌤𑍍 ।
𑌅𑌸𑍍𑌯𑌾𑌃 𑌕𑍃𑌤𑍇 𑌜𑌗𑌚𑍍𑌚𑌾𑌪𑌿 𑌯𑍁𑌕𑍍𑌤𑌮𑌿𑌤𑍍𑌯𑍇𑌵 𑌮𑍇 𑌮𑌤𑌿𑌃 ॥ 13 ॥
𑌰𑌾𑌜𑍍𑌯𑌂 𑌵𑌾 𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌸𑍀𑌤𑌾 𑌵𑌾 𑌜𑌨𑌕𑌾𑌤𑍍𑌮𑌜𑌾 ।
𑌤𑍍𑌰𑍈𑌲𑍋𑌕𑍍𑌯𑌰𑌾𑌜𑍍𑌯𑌂 𑌸𑌕𑌲𑌂 𑌸𑍀𑌤𑌾𑌯𑌾 𑌨𑌾𑌪𑍍𑌨𑍁𑌯𑌾𑌤𑍍𑌕𑌲𑌾𑌮𑍍 ॥ 14 ॥
𑌇𑌯𑌂 𑌸𑌾 𑌧𑌰𑍍𑌮𑌶𑍀𑌲𑌸𑍍𑌯 𑌮𑍈𑌥𑌿𑌲𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌸𑍁𑌤𑌾 𑌜𑌨𑌕𑌰𑌾𑌜𑌸𑍍𑌯 𑌸𑍀𑌤𑌾 𑌭𑌰𑍍𑌤𑍃𑌦𑍃𑌢𑌵𑍍𑌰𑌤𑌾 ॥ 15 ॥
𑌉𑌤𑍍𑌥𑌿𑌤𑌾 𑌮𑍇𑌦𑌿𑌨𑍀𑌂 𑌭𑌿𑌤𑍍𑌤𑍍𑌵𑌾 𑌕𑍍𑌷𑍇𑌤𑍍𑌰𑍇 𑌹𑌲𑌮𑍁𑌖𑌕𑍍𑌷𑌤𑍇 ।
𑌪𑌦𑍍𑌮𑌰𑍇𑌣𑍁𑌨𑌿𑌭𑍈𑌃 𑌕𑍀𑌰𑍍𑌣𑌾 𑌶𑍁𑌭𑍈𑌃 𑌕𑍇𑌦𑌾𑌰𑌪𑌾𑌮𑍍𑌸𑍁𑌭𑌿𑌃 ॥ 16 ॥
𑌵𑌿𑌕𑍍𑌰𑌾𑌂𑌤𑌸𑍍𑌯𑌾𑌰𑍍𑌯𑌶𑍀𑌲𑌸𑍍𑌯 𑌸𑌂𑌯𑍁𑌗𑍇𑌷𑍍𑌨𑍍𑌵𑌿𑌵𑌰𑍍𑌤𑌿𑌨𑌃 ।
𑌸𑍍𑌨𑍁𑌷𑌾 𑌦𑌶𑌰𑌥𑌸𑍍𑌯𑍈𑌷𑌾 𑌜𑍍𑌯𑍇𑌷𑍍𑌠𑌾 𑌰𑌾𑌜𑍍𑌞𑍋 𑌯𑌶𑌸𑍍𑌵𑌿𑌨𑍀 ॥ 1 ॥
𑌧𑌰𑍍𑌮𑌜𑍍𑌞𑌸𑍍𑌯 𑌕𑍃𑌤𑌜𑍍𑌞𑌸𑍍𑌯 𑌰𑌾𑌮𑌸𑍍𑌯 𑌵𑌿𑌦𑌿𑌤𑌾𑌤𑍍𑌮𑌨𑌃 ।
𑌇𑌯𑌂 𑌸𑌾 𑌦𑌯𑌿𑌤𑌾 𑌭𑌾𑌰𑍍𑌯𑌾 𑌰𑌾𑌕𑍍𑌷𑌸𑍀𑌵𑌶𑌮𑌾𑌗𑌤𑌾 ॥ 1 ॥
𑌸𑌰𑍍𑌵𑌾𑌨𑍍 𑌭𑍋𑌗𑌾𑌨𑍍𑌪𑌰𑌿𑌤𑍍𑌯𑌜𑍍𑌯 𑌭𑌰𑍍𑌤𑍃𑌸𑍍𑌨𑍇𑌹𑌬𑌲𑌾𑌤𑍍𑌕𑍃𑌤𑌾 ।
𑌅𑌚𑌿𑌂𑌤𑌯𑌿𑌤𑍍𑌵𑌾 𑌦𑍁𑌃𑌖𑌾𑌨𑌿 𑌪𑍍𑌰𑌵𑌿𑌷𑍍𑌟𑌾 𑌨𑌿𑌰𑍍𑌜𑌨𑌂 𑌵𑌨𑌮𑍍 ॥ 1 ॥
𑌸𑌂𑌤𑍁𑌷𑍍𑌟𑌾 𑌫𑌲𑌮𑍂𑌲𑍇𑌨 𑌭𑌰𑍍𑌤𑍃𑌶𑍁𑌶𑍍𑌰𑍂𑌷𑌣𑍇 𑌰𑌤𑌾 ।
𑌯𑌾 𑌪𑌰𑌾𑌂 𑌭𑌜𑌤𑍇 𑌪𑍍𑌰𑍀𑌤𑌿𑌂 𑌵𑌨𑍇𑌽𑌽𑌪𑌿 𑌭𑌵𑌨𑍇 𑌯𑌥𑌾 ॥ 20 ॥
𑌸𑍇𑌯𑌂 𑌕𑌨𑌕𑌵𑌰𑍍𑌣𑌾𑌂𑌗𑍀 𑌨𑌿𑌤𑍍𑌯𑌂 𑌸𑍁𑌸𑍍𑌮𑌿𑌤𑌭𑌾𑌷𑌿𑌣𑍀 ।
𑌸𑌹𑌤𑍇 𑌯𑌾𑌤𑌨𑌾𑌮𑍇𑌤𑌾𑌮𑌨𑌰𑍍𑌥𑌾𑌨𑌾𑌮𑌭𑌾𑌗𑌿𑌨𑍀 ॥ 21 ॥
𑌇𑌮𑌾𑌂 𑌤𑍁 𑌶𑍀𑌲𑌸𑌂𑌪𑌨𑍍𑌨𑌾𑌂 𑌦𑍍𑌰𑌷𑍍𑌟𑍁𑌮𑌰𑍍𑌹𑌤𑌿 𑌰𑌾𑌘𑌵𑌃 ।
𑌰𑌾𑌵𑌣𑍇𑌨 𑌪𑍍𑌰𑌮𑌥𑌿𑌤𑌾𑌂 𑌪𑍍𑌰𑌪𑌾𑌮𑌿𑌵 𑌪𑌿𑌪𑌾𑌸𑌿𑌤𑌃 ॥ 22 ॥
𑌅𑌸𑍍𑌯𑌾 𑌨𑍂𑌨𑌂 𑌪𑍁𑌨𑌰𑍍𑌲𑌾𑌭𑌾𑌦𑍍𑌰𑌾𑌘𑌵𑌃 𑌪𑍍𑌰𑍀𑌤𑌿𑌮𑍇𑌷𑍍𑌯𑌤𑌿 ।
𑌰𑌾𑌜𑌾 𑌰𑌾𑌜𑍍𑌯𑌪𑌰𑌿𑌭𑍍𑌰𑌷𑍍𑌟𑌃 𑌪𑍁𑌨𑌃 𑌪𑍍𑌰𑌾𑌪𑍍𑌯𑍇𑌵 𑌮𑍇𑌦𑌿𑌨𑍀𑌮𑍍 ॥ 23 ॥
𑌕𑌾𑌮𑌭𑍋𑌗𑍈𑌃 𑌪𑌰𑌿𑌤𑍍𑌯𑌕𑍍𑌤𑌾 𑌹𑍀𑌨𑌾 𑌬𑌂𑌧𑍁𑌜𑌨𑍇𑌨 𑌚 ।
𑌧𑌾𑌰𑌯𑌤𑍍𑌯𑌾𑌤𑍍𑌮𑌨𑍋 𑌦𑍇𑌹𑌂 𑌤𑌤𑍍𑌸𑌮𑌾𑌗𑌮𑌕𑌾𑌂𑌕𑍍𑌷𑌿𑌣𑍀 ॥ 24 ॥
𑌨𑍈𑌷𑌾 𑌪𑌶𑍍𑌯𑌤𑌿 𑌰𑌾𑌕𑍍𑌷𑌸𑍍𑌯𑍋 𑌨𑍇𑌮𑌾𑌨𑍍𑌪𑍁𑌷𑍍𑌪𑌫𑌲𑌦𑍍𑌰𑍁𑌮𑌾𑌨𑍍 ।
𑌏𑌕𑌸𑍍𑌥𑌹𑍃𑌦𑌯𑌾 𑌨𑍂𑌨𑌂 𑌰𑌾𑌮𑌮𑍇𑌵𑌾𑌨𑍁𑌪𑌶𑍍𑌯𑌤𑌿 ॥ 25 ॥
𑌭𑌰𑍍𑌤𑌾 𑌨𑌾𑌮 𑌪𑌰𑌂 𑌨𑌾𑌰𑍍𑌯𑌾 𑌭𑍂𑌷𑌣𑌂 𑌭𑍂𑌷𑌣𑌾𑌦𑌪𑌿 ।
𑌏𑌷𑌾 𑌤𑍁 𑌰𑌹𑌿𑌤𑌾 𑌤𑍇𑌨 𑌭𑍂𑌷𑌣𑌾𑌰𑍍𑌹𑌾 𑌨 𑌶𑍋𑌭𑌤𑍇 ॥ 26 ॥
𑌦𑍁𑌷𑍍𑌕𑌰𑌂 𑌕𑍁𑌰𑍁𑌤𑍇 𑌰𑌾𑌮𑍋 𑌹𑍀𑌨𑍋 𑌯𑌦𑌨𑌯𑌾 𑌪𑍍𑌰𑌭𑍁𑌃 ।
𑌧𑌾𑌰𑌯𑌤𑍍𑌯𑌾𑌤𑍍𑌮𑌨𑍋 𑌦𑍇𑌹𑌂 𑌨 𑌦𑍁𑌃𑌖𑍇𑌨𑌾𑌵𑌸𑍀𑌦𑌤𑌿 ॥ 2 ॥
𑌇𑌮𑌾𑌮𑌸𑌿𑌤𑌕𑍇𑌶𑌾𑌂𑌤𑌾𑌂 𑌶𑌤𑌪𑌤𑍍𑌰𑌨𑌿𑌭𑍇𑌕𑍍𑌷𑌣𑌾𑌮𑍍 ।
𑌸𑍁𑌖𑌾𑌰𑍍𑌹𑌾𑌂 𑌦𑍁𑌃𑌖𑌿𑌤𑌾𑌂 𑌦𑍃𑌷𑍍𑌟𑍍𑌵𑌾 𑌮𑌮𑌾𑌪𑌿 𑌵𑍍𑌯𑌥𑌿𑌤𑌂 𑌮𑌨𑌃 ॥ 2 ॥
𑌕𑍍𑌷𑌤𑌿𑌕𑍍𑌷𑌮𑌾 𑌪𑍁𑌷𑍍𑌕𑌰𑌸𑌨𑍍𑌨𑌿𑌭𑌾𑌕𑍍𑌷𑍀 𑌯𑌾 𑌰𑌕𑍍𑌷𑌿𑌤𑌾 𑌰𑌾𑌘𑌵𑌲𑌕𑍍𑌷𑍍𑌮𑌣𑌾𑌭𑍍𑌯𑌾𑌮𑍍 ।
𑌸𑌾 𑌰𑌾𑌕𑍍𑌷𑌸𑍀𑌭𑌿𑌰𑍍𑌵𑌿𑌕𑍃𑌤𑍇𑌕𑍍𑌷𑌣𑌾𑌭𑌿𑌃 𑌸𑌂𑌰𑌕𑍍𑌷𑍍𑌯𑌤𑍇 𑌸𑌂𑌪𑍍𑌰𑌤𑌿 𑌵𑍃𑌕𑍍𑌷𑌮𑍂𑌲𑍇 ॥ 2 ॥
𑌹𑌿𑌮𑌹𑌤𑌨𑌲𑌿𑌨𑍀𑌵 𑌨𑌷𑍍𑌟𑌶𑍋𑌭𑌾 𑌵𑍍𑌯𑌸𑌨𑌪𑌰𑌂𑌪𑌰𑌯𑌾 𑌨𑌿𑌪𑍀𑌡𑍍𑌯𑌮𑌾𑌨𑌾 ।
𑌸𑌹𑌚𑌰𑌰𑌹𑌿𑌤𑍇𑌵 𑌚𑌕𑍍𑌰𑌵𑌾𑌕𑍀 𑌜𑌨𑌕𑌸𑍁𑌤𑌾 𑌕𑍃𑌪𑌣𑌾𑌂 𑌦𑌶𑌾𑌂 𑌪𑍍𑌰𑌪𑌨𑍍𑌨𑌾 ॥ 30 ॥
𑌅𑌸𑍍𑌯𑌾 𑌹𑌿 𑌪𑍁𑌷𑍍𑌪𑌾𑌵𑌨𑌤𑌾𑌗𑍍𑌰𑌶𑌾𑌖𑌾𑌃 𑌶𑍋𑌕𑌂 𑌦𑍃𑌢𑌂 𑌵𑍈 𑌜𑌨𑌯𑌂𑌤𑍍𑌯𑌶𑍋𑌕𑌾𑌃 ।
𑌹𑌿𑌮𑌵𑍍𑌯𑌪𑌾𑌯𑍇𑌨 𑌚 𑌶𑍀𑌤𑌰𑌶𑍍𑌮𑌿 𑌰𑌭𑍍𑌯𑍁𑌤𑍍𑌥𑌿𑌤𑍋 𑌨𑍈𑌕𑌸𑌹𑌸𑍍𑌰𑌰𑌶𑍍𑌮𑌿𑌃 ॥ 31 ॥
𑌇𑌤𑍍𑌯𑍇𑌵𑌮𑌰𑍍𑌥𑌂 𑌕𑌪𑌿𑌰𑌨𑍍𑌵𑌵𑍇𑌕𑍍𑌷𑍍𑌯 𑌸𑍀𑌤𑍇𑌯𑌮𑌿𑌤𑍍𑌯𑍇𑌵 𑌨𑌿𑌵𑌿𑌷𑍍𑌟𑌬𑍁𑌦𑍍𑌧𑌿𑌃 ।
𑌸𑌂𑌶𑍍𑌰𑌿𑌤𑍍𑌯 𑌤𑌸𑍍𑌮𑌿𑌨𑍍𑌨𑌿𑌷𑌸𑌾𑌦 𑌵𑍃𑌕𑍍𑌷𑍇 𑌬𑌲𑍀 𑌹𑌰𑍀𑌣𑌾𑌮𑍃𑌷𑌭𑌸𑍍𑌤𑌰𑌸𑍍𑌵𑍀 ॥ 32 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌷𑍋𑌡𑌶𑌸𑍍𑌸𑌰𑍍𑌗𑌃 ॥
