Meaning, Multimedia
View this in:
| English | Devanagari | Telugu | Tamil | Kannada | Malayalam | Gujarati | Odia | Bengali  |
| Marathi | Assamese | Punjabi | Hindi | Samskritam | Konkani | Nepali | Sinhala | Grantha  |

2.6 𑌅𑌯𑍋𑌧𑍍𑌯𑌾𑌕𑌾𑌂𑌡 - 𑌷𑌷𑍍𑌠 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌷𑌷𑍍𑌠𑌸𑍍𑌸𑌰𑍍𑌗𑌃 ।

𑌗𑌤𑍇 𑌪𑍁𑌰𑍋𑌹𑌿𑌤𑍇 𑌰𑌾𑌮𑌃 𑌸𑍍𑌨𑌾𑌤𑍋 𑌨𑌿𑌯𑌤𑌮𑌾𑌨𑌸𑌃 ।
𑌸𑌹 𑌪𑌤𑍍𑌨𑍍𑌯𑌾 𑌵𑌿𑌶𑌾𑌲𑌾𑌕𑍍𑌷𑍍𑌯𑌾 𑌨𑌾𑌰𑌾𑌯𑌣𑌮𑍁𑌪𑌾𑌗𑌮𑌤𑍍 ॥ 1 ॥

𑌪𑍍𑌰𑌗𑍃𑌹𑍍𑌯 𑌶𑌿𑌰𑌸𑌾 𑌪𑌾𑌤𑍍𑌰𑍀𑌂 𑌹𑌵𑌿𑌷𑍋 𑌵𑌿𑌧𑌿𑌵𑌤𑍍𑌤𑌦𑌾 ।
𑌮𑌹𑌤𑍇 𑌦𑍈𑌵𑌤𑌾𑌯𑌾𑌜𑍍𑌯𑌂 𑌜𑍁𑌹𑌾𑌵 𑌜𑍍𑌵𑌲𑌿𑌤𑍇𑌽𑌨𑌲𑍇 ॥ 2 ॥

𑌶𑍇𑌷𑌂 𑌚 𑌹𑌵𑌿𑌷𑌸𑍍𑌤𑌸𑍍𑌯 𑌪𑍍𑌰𑌾𑌶𑍍𑌯𑌾𑌶𑌾𑌸𑍍𑌯𑌾𑌤𑍍𑌮𑌨𑌃 𑌪𑍍𑌰𑌿𑌯𑌮𑍍 ।
𑌧𑍍𑌯𑌾𑌯𑌨𑍍𑌨𑌾𑌰𑌾𑌯𑌣𑌂 𑌦𑍇𑌵𑌂 𑌸𑍍𑌵𑌾𑌸𑍍𑌤𑍀𑌰𑍍𑌣𑍇 𑌕𑍁𑌶𑌸𑌂𑌸𑍍𑌤𑌰𑍇 ॥ 3 ॥

𑌵𑌾𑌗𑍍𑌯𑌤 𑌸𑍍𑌸𑌹 𑌵𑍈𑌦𑍇𑌹𑍍𑌯𑌾 𑌭𑍂𑌤𑍍𑌵𑌾 𑌨𑌿𑌯𑌤𑌮𑌾𑌨𑌸𑌃 ।
𑌶𑍍𑌰𑍀𑌮𑌤𑍍𑌯𑌾𑌯𑌤𑌨𑍇 𑌵𑌿𑌷𑍍𑌣𑍋 𑌶𑍍𑌶𑌿𑌶𑍍𑌯𑍇 𑌨𑌰𑌵𑌰𑌾𑌤𑍍𑌮𑌜𑌃 ॥ 4 ॥

𑌏𑌕𑌯𑌾𑌮𑌾𑌵𑌶𑌿𑌷𑍍𑌟𑌾𑌯𑌾𑌂 𑌰𑌾𑌤𑍍𑌰𑍍𑌯𑌾𑌂 𑌪𑍍𑌰𑌤𑌿𑌵𑌿𑌬𑍁𑌦𑍍𑌧𑍍𑌯 𑌸𑌃 ।
𑌅𑌲𑌂𑌕𑌾𑌰𑌵𑌿𑌧𑌿𑌂 𑌕𑍃𑌤𑍍𑌸𑍍𑌨𑌂 𑌕𑌾𑌰𑌯𑌾𑌮𑌾𑌸 𑌵𑍇𑌶𑍍𑌮𑌨𑌃 ॥ 5 ॥

𑌤𑌤𑍍𑌰 𑌶𑍍𑌰𑍃𑌣𑍍𑌵𑌨𑍍𑌸𑍁𑌖𑌾 𑌵𑌾𑌚 𑌸𑍍𑌸𑍂𑌤𑌮𑌾𑌗𑌧𑌵𑌂𑌦𑌿𑌨𑌾𑌮𑍍 ।
𑌪𑍂𑌰𑍍𑌵𑌾𑌂 𑌸𑌧𑍍𑌯𑌾𑌮𑍁𑌪𑌾𑌸𑍀𑌨𑍋 𑌜𑌜𑌾𑌪 𑌯𑌤𑌮𑌾𑌨𑌸𑌃 ॥ 6 ॥

𑌤𑍁𑌷𑍍𑌟𑌾𑌵 𑌪𑍍𑌰𑌣𑌤𑌶𑍍𑌚𑍈𑌵 𑌶𑌿𑌰𑌸𑌾 𑌮𑌧𑍁𑌸𑍂𑌦𑌨𑌮𑍍 ।
𑌵𑌿𑌮𑌲𑌕𑍍𑌷𑍌𑌮𑌸𑌂𑌵𑍀𑌤𑍋 𑌵𑌾𑌚𑌯𑌾𑌮𑌾𑌸 𑌸 𑌦𑍍𑌵𑌿𑌜𑌾𑌨𑍍 ॥ 𑍭 ॥

𑌤𑍇𑌷𑌾𑌂 𑌪𑍁𑌣𑍍𑌯𑌾𑌹𑌘𑍋𑌷𑍋𑌽𑌥 𑌗𑌂𑌭𑍀𑌰𑌮𑌧𑍁𑌰𑌸𑍍𑌤𑌦𑌾 ।
𑌅𑌯𑍋𑌧𑍍𑌯𑌾𑌂 𑌪𑍂𑌰𑌯𑌾𑌮𑌾𑌸 𑌤𑍂𑌰𑍍𑌯𑌘𑍋𑌷𑌾𑌨𑍁𑌨𑌾𑌦𑌿𑌤𑌃 ॥ 𑍮 ॥

𑌕𑍃𑌤𑍋𑌪𑌵𑌾𑌸𑌂 𑌤𑍁 𑌤𑌦𑌾 𑌵𑍈𑌦𑍇𑌹𑍍𑌯𑌾 𑌸𑌹 𑌰𑌾𑌘𑌵𑌮𑍍 ।
𑌅𑌯𑍋𑌧𑍍𑌯𑌾𑌨𑌿𑌲𑌯𑌶𑍍𑌶𑍍𑌰𑍁𑌤𑍍𑌵𑌾 𑌸𑌰𑍍𑌵𑌃 𑌪𑍍𑌰𑌮𑍁𑌦𑌿𑌤𑍋 𑌜𑌨𑌃 ॥ 𑍯 ॥

𑌤𑌤𑌃 𑌪𑍌𑌰𑌜𑌨𑌸𑍍𑌸𑌰𑍍𑌵𑌶𑍍𑌶𑍍𑌰𑍁𑌤𑍍𑌵𑌾 𑌰𑌾𑌮𑌾𑌭𑌿𑌷𑍇𑌚𑌨𑌮𑍍 ।
𑌪𑍍𑌰𑌭𑌾𑌤𑌾𑌂 𑌰𑌜𑌨𑍀𑌂 𑌦𑍃𑌷𑍍𑌟𑍍𑌵𑌾 𑌚𑌕𑍍𑌰𑍇 𑌶𑍋𑌭𑌯𑌿𑌤𑍁𑌂 𑌪𑍁𑌰𑍀𑌮𑍍 ॥ 10 ॥

𑌸𑌿𑌤𑌾𑌭𑍍𑌰𑌶𑌿𑌖𑌰𑌾𑌭𑍇𑌷𑍁 𑌦𑍇𑌵𑌤𑌾𑌯𑌤𑌨𑍇𑌷𑍁 𑌚 ।
𑌚𑌤𑍁𑌷𑍍𑌪𑌥𑍇𑌷𑍁 𑌰𑌥𑍍𑌯𑌾𑌸𑍁 𑌚𑍈𑌤𑍍𑌯𑍇𑌷𑍍𑌵𑌟𑍍𑌟𑌾𑌲𑌕𑍇𑌷𑍁 𑌚 ॥ 11 ॥

𑌨𑌾𑌨𑌾𑌪𑌣𑍍𑌯𑌸𑌮𑍃𑌦𑍍𑌧𑍇𑌷𑍁 𑌵𑌣𑌿𑌜𑌾𑌮𑌾𑌪𑌣𑍇𑌷𑍁 𑌚 ।
𑌕𑍁𑌟𑍁𑌂𑌬𑌿𑌨𑌾𑌂 𑌸𑌮𑍃𑌦𑍍𑌧𑍇𑌷𑍁 𑌶𑍍𑌰𑍀𑌮𑌤𑍍𑌸𑍁 𑌭𑌵𑌨𑍇𑌷𑍁 𑌚 ॥ 12 ॥

𑌸𑌭𑌾𑌸𑍁 𑌚𑍈𑌵 𑌸𑌰𑍍𑌵𑌾𑌸𑍁 𑌵𑍃𑌕𑍍𑌷𑍇𑌷𑍍𑌵𑌾𑌲𑌕𑍍𑌷𑌿𑌤𑍇𑌷𑍁 𑌚 ।
𑌧𑍍𑌵𑌜𑌾 𑌸𑍍𑌸𑌮𑍁𑌚𑍍𑌛𑍍𑌰𑌿𑌤𑌾𑌶𑍍𑌚𑌿𑌤𑍍𑌰𑌾𑌃 𑌪𑌤𑌾𑌕𑌾𑌶𑍍𑌚𑌾𑌭𑌵𑌂𑌸𑍍𑌤𑌦𑌾 ॥ 13 ॥

𑌨𑌟𑌨𑌰𑍍𑌤𑌕𑌸𑌂𑌘𑌾𑌨𑌾𑌂 𑌗𑌾𑌯𑌕𑌾𑌨𑌾𑌂 𑌚 𑌗𑌾𑌯𑌤𑌾𑌮𑍍 ।
𑌮𑌨𑌃 𑌕𑌰𑍍𑌣𑌸𑍁𑌖𑌾 𑌵𑌾𑌚 𑌶𑍍𑌶𑍁𑌶𑍃𑌵𑍁𑌶𑍍𑌚 𑌤𑌤𑌸𑍍𑌤𑌤𑌃 ॥ 14 ॥

𑌰𑌾𑌮𑌾𑌭𑌿𑌷𑍇𑌕𑌯𑍁𑌕𑍍𑌤𑌾𑌶𑍍𑌚 𑌕𑌥𑌾𑌶𑍍𑌚𑌕𑍍𑌰𑍁𑌰𑍍𑌮𑌿𑌥𑍋 𑌜𑌨𑌾𑌃 ।
𑌰𑌾𑌮𑌾𑌭𑌿𑌷𑍇𑌕𑍇 𑌸𑌂𑌪𑍍𑌰𑌾𑌪𑍍𑌤𑍇 𑌚𑌤𑍍𑌵𑌰𑍇𑌷𑍁 𑌗𑍃𑌹𑍇𑌷𑍁 𑌚 ॥ 15 ॥

𑌬𑌾𑌲𑌾 𑌅𑌪𑌿 𑌕𑍍𑌰𑍀𑌡𑌮𑌾𑌨𑌾 𑌗𑍃𑌹𑌦𑍍𑌵𑌾𑌰𑍇𑌷𑍁 𑌸𑌂𑌘𑌶𑌃 ।
𑌰𑌾𑌮𑌾𑌭𑌿𑌷𑌵𑌸𑌂𑌯𑍁𑌕𑍍𑌤𑌾𑌶𑍍𑌚𑌕𑍍𑌰𑍁𑌰𑍇𑌵𑌂 𑌮𑌿𑌥𑌃 𑌕𑌥𑌾𑌃 ॥ 16 ॥

𑌕𑍃𑌤𑌪𑍁𑌷𑍍𑌪𑍋𑌪𑌹𑌾𑌰𑌶𑍍𑌚 𑌧𑍂𑌪𑌗𑌂𑌧𑌾𑌧𑌿𑌵𑌾𑌸𑌿𑌤𑌃 ।
𑌰𑌾𑌜𑌮𑌾𑌰𑍍𑌗𑌃 𑌕𑍃𑌤𑌃 𑌶𑍍𑌰𑍀𑌮𑌾𑌨𑍍𑌪𑍌𑌰𑍈 𑌰𑌾𑌮𑌾𑌭𑌿𑌷𑍇𑌚𑌨𑍇 ॥ 1𑍭 ॥

𑌪𑍍𑌰𑌕𑌾𑌶𑌕𑌰𑌣𑌾𑌰𑍍𑌥𑌂 𑌚 𑌨𑌿𑌶𑌾𑌗𑌮𑌨𑌶𑌂𑌕𑌯𑌾 ।
𑌦𑍀𑌪𑌵𑍃𑌕𑍍𑌷𑌾𑌂 𑌸𑍍𑌤𑌥𑌾 𑌚𑌕𑍍𑌰𑍁𑌰𑌨𑍁 𑌰𑌥𑍍𑌯𑌾𑌸𑍁 𑌸𑌰𑍍𑌵𑌶𑌃 ॥ 1𑍮 ॥

𑌅𑌲𑌂𑌕𑌾𑌰𑌂 𑌪𑍁𑌰𑌸𑍍𑌯𑍈𑌵𑌂 𑌕𑍃𑌤𑍍𑌵𑌾 𑌤𑌤𑍍𑌪𑍁𑌰𑌵𑌾𑌸𑌿𑌨𑌃 ।
𑌆𑌕𑌾𑌂𑌕𑍍𑌷𑌮𑌾𑌣𑌾 𑌰𑌾𑌮𑌸𑍍𑌯 𑌯𑍌𑌵𑌰𑌾𑌜𑍍𑌯𑌾𑌭𑌿𑌷𑍇𑌚𑌨𑌮𑍍 ॥ 1𑍯 ॥

𑌸𑌮𑍇𑌤𑍍𑌯 𑌸𑌂𑌘𑌶𑌸𑍍𑌸𑌰𑍍𑌵𑍇 𑌚𑌤𑍍𑌵𑌰𑍇𑌷𑍁 𑌸𑌭𑌾𑌸𑍁 𑌚 ।
𑌕𑌥𑌯𑌂𑌤𑍋 𑌮𑌿𑌥𑌸𑍍𑌤𑌤𑍍𑌰 𑌪𑍍𑌰𑌶𑌶𑌂𑌸𑍁𑌰𑍍𑌜𑌨𑌾𑌧𑌿𑌪𑌮𑍍 ॥ 20 ॥

𑌅𑌹𑍋 𑌮𑌹𑌾𑌤𑍍𑌮𑌾 𑌰𑌾𑌜𑌾𑌽𑌯𑌮𑌿𑌕𑍍𑌷𑍍𑌵𑌾𑌕𑍁𑌕𑍁𑌲𑌨𑌂𑌦𑌨𑌃 ।
𑌜𑍍𑌞𑌾𑌤𑍍𑌵𑌾 𑌯𑍋 𑌵𑍃𑌦𑍍𑌧𑌮𑌾𑌤𑍍𑌮𑌾𑌨𑌂 𑌰𑌾𑌮𑌂 𑌰𑌾𑌜𑍍𑌯𑍇𑌽𑌭𑌿𑌷𑍇𑌕𑍍𑌷𑍍𑌯𑌤𑌿 ॥ 21 ॥

𑌸𑌰𑍍𑌵𑍇𑌪𑍍𑌯𑌨𑍁𑌗𑍃𑌹𑍀𑌤𑌾 𑌸𑍍𑌮𑍋 𑌯𑌨𑍍𑌨𑍋 𑌰𑌾𑌮𑍋 𑌮𑌹𑍀𑌪𑌤𑌿𑌃 ।
𑌚𑌿𑌰𑌾𑌯 𑌭𑌵𑌿𑌤𑌾 𑌗𑍋𑌪𑍍𑌤𑌾 𑌦𑍃𑌷𑍍𑌟𑌲𑍋𑌕𑌪𑌰𑌾𑌵𑌰𑌃 ॥ 22 ॥

𑌅𑌨𑍁𑌦𑍍𑌧𑌤𑌮𑌨𑌾𑌃 𑌵𑌿𑌦𑍍𑌵𑌾𑌂𑌧𑌰𑍍𑌮𑌾𑌤𑍍𑌮𑌾 𑌭𑍍𑌰𑌾𑌤𑍃𑌵𑌤𑍍𑌸𑌲𑌃 ।
𑌯𑌥𑌾 𑌚 𑌭𑍍𑌰𑌾𑌤𑍃𑌷𑍁 𑌸𑍍𑌨𑌿𑌗𑍍𑌧𑌸𑍍𑌤𑌥𑌾𑌽𑌸𑍍𑌮𑌾𑌸𑍍𑌵𑌪𑌿 𑌰𑌾𑌘𑌵𑌃 ॥ 23 ॥

𑌚𑌿𑌰𑌂 𑌜𑍀𑌵𑌤𑍁 𑌧𑌰𑍍𑌮𑌾𑌤𑍍𑌮𑌾 𑌰𑌾𑌜𑌾 𑌦𑌶𑌰𑌥𑍋𑌽𑌨𑌘𑌃 ।
𑌯𑌤𑍍𑌪𑍍𑌰𑌸𑌾𑌦𑍋𑌨𑌭𑌿𑌷𑌿𑌕𑍍𑌤𑌂 𑌤𑍁 𑌰𑌾𑌮𑌂 𑌦𑍍𑌰𑌕𑍍𑌷𑍍𑌯𑌾𑌮𑌹𑍇 𑌵𑌯𑌮𑍍 ॥ 24 ॥

𑌏𑌵𑌂𑌵𑌿𑌧𑌂 𑌕𑌥𑌯𑌤𑌾𑌂 𑌪𑍌𑌰𑌾𑌣𑌾𑌂 𑌶𑍁𑌶𑍍𑌰𑍁𑌵𑍁 𑌸𑍍𑌤𑌦𑌾 ।
𑌦𑌿𑌗𑍍𑌭𑍍𑌯𑍋𑌪𑌿 𑌶𑍍𑌰𑍁𑌤𑌵𑍃𑌤𑍍𑌤𑌾𑌂𑌤𑌾𑌃 𑌪𑍍𑌰𑌾𑌪𑍍𑌤𑌾 𑌜𑌾𑌨𑌪𑌦𑌾 𑌜𑌨𑌾𑌃 ॥ 25 ॥

𑌤𑍇 𑌤𑍁 𑌦𑌿𑌗𑍍𑌭𑍍𑌯𑌃 𑌪𑍁𑌰𑍀𑌂 𑌪𑍍𑌰𑌾𑌪𑍍𑌤𑌾 𑌦𑍍𑌰𑌷𑍍𑌟𑍁𑌂 𑌰𑌾𑌮𑌾𑌭𑌿𑌷𑍇𑌚𑌨𑌮𑍍 ।
𑌰𑌾𑌮𑌸𑍍𑌯 𑌪𑍂𑌰𑌯𑌾𑌮𑌾𑌸𑍁𑌃 𑌪𑍁𑌰𑍀𑌂 𑌜𑌾𑌨𑌪𑌦𑌾 𑌜𑌨𑌾𑌃 ॥ 26 ॥

𑌜𑌨𑍌𑌘𑍈𑌸𑍍𑌤𑍈𑌰𑍍𑌵𑌿𑌸𑌰𑍍𑌪𑌦𑍍𑌭𑌿𑌃 𑌶𑍁𑌶𑍍𑌰𑍁𑌵𑍇 𑌤𑌤𑍍𑌰 𑌨𑌿𑌸𑍍𑌵𑌨𑌃 ।
𑌪𑌰𑍍𑌵𑌸𑍂𑌦𑍀𑌰𑍍𑌣𑌵𑍇𑌗𑌸𑍍𑌯 𑌸𑌾𑌗𑌰𑌸𑍍𑌯𑍇𑌵 𑌨𑌿𑌸𑍍𑌵𑌨𑌃 ॥ 2𑍭 ॥

𑌤𑌤𑌸𑍍𑌤𑌦𑌿𑌂𑌦𑍍𑌰𑌕𑍍𑌷𑌯𑌸𑌨𑍍𑌨𑌿𑌭𑌂 𑌪𑍁𑌰𑌂 𑌦𑌿𑌦𑍃𑌕𑍍𑌷𑍁𑌭𑌿𑌰𑍍𑌜𑌾𑌨𑌪𑌦𑍈𑌰𑍁𑌪𑌾𑌗𑌤𑍈𑌃 ।
𑌸𑌮𑌂𑌤𑌤 𑌸𑍍𑌸𑌸𑍍𑌵𑌨𑌮𑌾𑌕𑍁𑌲𑌂 𑌬𑌭𑍌 𑌸𑌮𑍁𑌦𑍍𑌰𑌯𑌾𑌦𑍋𑌭𑌿𑌰𑌿𑌵𑌾𑌰𑍍𑌣𑌵𑍋𑌦𑌕𑌮𑍍 ॥ 2𑍮 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌷𑌷𑍍𑌠𑌸𑍍𑌸𑌰𑍍𑌗𑌃 ॥


Browse Related Categories: