ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଷଟ୍ତ୍ରିଂଶସ୍ସର୍ଗଃ ।
ଇତ୍ୟୁକ୍ତସ୍ତାରୟା ଵାକ୍ୟଂ ପ୍ରଶ୍ରିତଂ ଧର୍ମସଂହିତମ୍ ।
ମୃଦୁସ୍ଵଭାଵସ୍ସୌମିତ୍ରିଃ ପ୍ରତିଜଗ୍ରାହ ତଦ୍ଵଚଃ ॥ 1 ॥
ତସ୍ମିନ୍ପ୍ରତିଗୃହୀତେ ତୁ ଵାକ୍ୟେ ହରିଗଣେଶ୍ଵରଃ ।
ଲକ୍ଷ୍ମଣାତ୍ସୁମହତ୍ତ୍ରାସଂ ଵସ୍ତ୍ରଂ କ୍ଲିନ୍ନମିଵାତ୍ୟଜତ୍ ॥ 2 ॥
ତତଃ କଂଠଗତଂ ମାଲ୍ୟଂ ଚିତ୍ରଂ ବହୁଗୁଣଂ ମହତ୍ ।
ଚିଚ୍ଛେଦ ଵିମଦଶ୍ଚାସୀତ୍ସୁଗ୍ରୀଵୋ ଵାନରେଶ୍ଵରଃ ॥ 3 ॥
ସ ଲକ୍ଷ୍ମଣଂ ଭୀମବଲଂ ସର୍ଵଵାନରସତ୍ତମଃ ।
ଅବ୍ରଵୀତ୍ପ୍ରଶ୍ରିତଂ ଵାକ୍ୟଂ ସୁଗ୍ରୀଵ ସ୍ସଂପ୍ରହର୍ଷୟନ୍ ॥ 4 ॥
ପ୍ରଣଷ୍ଟା ଶ୍ରୀଶ୍ଚ କୀର୍ତିଶ୍ଚ କପିରାଜ୍ୟଂ ଚ ଶାଶ୍ଵତମ୍ ।
ରାମପ୍ରସାଦାତ୍ସୌମିତ୍ରେ ପୁନଃ ପ୍ରାପ୍ତମିଦଂ ମୟା ॥ 5 ॥
କଶ୍ଶକ୍ତସ୍ତସ୍ୟ ଦେଵସ୍ୟ ଖ୍ୟାତସ୍ୟ ସ୍ଵେନ କର୍ମଣା ।
ତାଦୃଶଂ ଵିକ୍ରମଂ ଵୀର ପ୍ରତିକର୍ତୁମରିଂଦମ ॥ 6 ॥
ସୀତାଂ ପ୍ରାପ୍ସ୍ୟତି ଧର୍ମାତ୍ମା ଵଧିଷ୍ୟତି ଚ ରାଵଣମ୍ ।
ସହାୟମାତ୍ରେଣ ମୟା ରାଘଵ ସ୍ସ୍ଵେନ ତେଜସା ॥ 7 ॥
ସହାୟକୃତ୍ୟଂ କିଂ ତସ୍ୟ ୟେନ ସପ୍ତ ମହାଦ୍ରୁମାଃ ।
ଶୈଲଶ୍ଚ ଵସୁଧା ଚୈଵ ବାଣେନୈକେନ ଦାରିତାଃ ॥ 8 ॥
ଧନୁର୍ଵିଷ୍ଫାରୟାନସ୍ୟ ୟସ୍ୟ ଶବ୍ଦେନ ଲକ୍ଷ୍ମଣ ।
ସଶୈଲା କଂପିତା ଭୂମିସ୍ସହାୟୈଃ କିନ୍ନୁ ତସ୍ୟ ଵୈ ॥ 9 ॥
ଅନୁୟାତ୍ରାଂ ନରେଂଦ୍ରସ୍ୟ କରିଷ୍ୟେଽହଂ ନରର୍ଷଭ ।
ଗଚ୍ଛତୋ ରାଵଣଂ ହଂତୁଂ ଵୈରିଣଂ ସପୁରସ୍ସରମ୍ ॥ 10 ॥
ୟଦି କିଂଚିଦତିକ୍ରାଂତଂ ଵିଶ୍ଵାସାତ୍ପ୍ରଣୟେନ ଵା ।
ପ୍ରେଷ୍ୟସ୍ୟ କ୍ଷମିତଵ୍ୟଂ ମେ ନ କଶ୍ଚିନ୍ନାପରାଧ୍ୟତି ॥ 11 ॥
ତି ତସ୍ୟ ବ୍ରୁଵାଣସ୍ୟ ସୁଗ୍ରୀଵସ୍ୟ ମହାତ୍ମନଃ ।
ଅଭଵଲ୍ଲକ୍ଷ୍ମଣଃ ପ୍ରୀତଃ ପ୍ରେମ୍ଣା ଚୈଵମୁଵାଚ ହ ॥ 12 ॥
ସର୍ଵଥା ହି ମମ ଭ୍ରାତା ସନାଥୋ ଵାନରେଶ୍ଵର ।
ତ୍ଵୟା ନାଥେନ ସୁଗ୍ରୀଵ ପ୍ରଶ୍ରିତେନ ଵିଶେଷତଃ ॥ 13 ॥
ୟସ୍ତେ ପ୍ରଭାଵ ସ୍ସୁଗ୍ରୀଵ ୟଚ୍ଚ ତେ ଶୌଚମାର୍ଜଵମ୍ ।
ଅର୍ହସ୍ତ୍ଵଂ କପିରାଜ୍ୟସ୍ୟ ଶ୍ରିୟଂ ଭୋକ୍ତୁମନୁତ୍ତମାମ୍ ॥ 14 ॥
ସହାୟେନ ତୁ ସୁଗ୍ରୀଵ ତ୍ଵୟା ରାମଃ ପ୍ରତାପଵାନ୍ ।
ଵଧିଷ୍ୟତି ରଣେ ଶତ୍ରୂନଚିରାନ୍ନାତ୍ର ସଂଶୟଃ ॥ 15 ॥
ଧର୍ମଜ୍ଞସ୍ୟ କୃତଜ୍ଞସ୍ୟ ସଂଗ୍ରାମେଷ୍ଵନିଵର୍ତିନଃ ।
ଉପପନ୍ନଂ ଚ ୟୁକ୍ତଂ ଚ ସୁଗ୍ରୀଵ ତଵ ଭାଷିତମ୍ ॥ 16 ॥
ଦୋଷଜ୍ଞସ୍ସତି ସାମର୍ଥ୍ୟେ କୋଽନ୍ୟୋ ଭାଷିତୁମର୍ହତି ।
ଵର୍ଜୟିତ୍ଵା ମମ ଜ୍ୟେଷ୍ଠଂ ତ୍ଵାଂ ଚ ଵାନରସତ୍ତମ ॥ 17 ॥
ସଦୃଶଶ୍ଚାସି ରାମସ୍ୟ ଵିକ୍ରମେଣ ବଲେନ ଚ ।
ସହାୟୋ ଦୈଵତୈର୍ଦତ୍ତଶ୍ଚିରାୟ ହରିପୁଂଗଵ ॥ 18 ॥
କିଂ ତୁ ଶୀଘ୍ରମିତୋ ଵୀର ନିଷ୍କ୍ରମ ତ୍ଵଂ ମୟା ସହ ।
ସାଂତ୍ଵୟସ୍ଵ ଵୟସ୍ୟଂ ଚ ତ୍ଵଂ ଭାର୍ୟାହରଣକର୍ଶିତମ୍ ॥ 19 ॥
ୟଚ୍ଚ ଶୋକାଭିଭୂତସ୍ୟ ଶ୍ରୁତ୍ଵା ରାମସ୍ୟ ଭାଷିତମ୍ ।
ମୟା ତ୍ଵଂ ପରୁଷାଣ୍ୟୁକ୍ତସ୍ତଚ୍ଚତ୍ଵଂ କ୍ଷଂତୁ ମର୍ହସି ॥ 20 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଷଟ୍ତ୍ରିଂଶସ୍ସର୍ଗଃ ॥
