Meaning, Multimedia
View this in:
| English | Devanagari | Telugu | Tamil | Kannada | Malayalam | Gujarati | Odia | Bengali  |
| Marathi | Assamese | Punjabi | Hindi | Samskritam | Konkani | Nepali | Sinhala | Grantha  |

2.1𑍮 𑌅𑌯𑍋𑌧𑍍𑌯𑌾𑌕𑌾𑌂𑌡 - 𑌅𑌷𑍍𑌟𑌾𑌦𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌾𑌦𑌶𑌸𑍍𑌸𑌰𑍍𑌗𑌃 ।

𑌸 𑌦𑌦𑌰𑍍𑌶𑌾𑌸𑌨𑍇 𑌰𑌾𑌮𑍋 𑌨𑌿𑌷𑌣𑍍𑌣𑌂 𑌪𑌿𑌤𑌰𑌂 𑌶𑍁𑌭𑍇 ।
𑌕𑍈𑌕𑍇𑌯𑍀𑌸𑌹𑌿𑌤𑌂 𑌦𑍀𑌨𑌂 𑌮𑍁𑌖𑍇𑌨 𑌪𑌰𑌿𑌶𑍁𑌷𑍍𑌯𑌤𑌾 ॥ 1 ॥

𑌸 𑌪𑌿𑌤𑍁𑌶𑍍𑌚𑌰𑌣𑍌 𑌪𑍂𑌰𑍍𑌵𑌮𑌭𑌿𑌵𑌾𑌦𑍍𑌯 𑌵𑌿𑌨𑍀𑌤𑌵𑌤𑍍 ।
𑌤𑌤𑍋 𑌵𑌵𑌂𑌦𑍇 𑌚𑌰𑌣𑍌 𑌕𑍈𑌕𑍇𑌯𑍍𑌯𑌾 𑌸𑍍𑌸𑍁𑌸𑌮𑌾𑌹𑌿𑌤𑌃 ॥ 2 ॥

𑌰𑌾𑌮𑍇𑌤𑍍𑌯𑍁𑌕𑍍𑌤𑍍𑌵𑌾 𑌤𑍁 𑌵𑌚𑌨𑌂 𑌬𑌾𑌷𑍍𑌪𑌪𑌰𑍍𑌯𑌾𑌕𑍁𑌲𑍇𑌕𑍍𑌷𑌣𑌃 ।
𑌶𑌶𑌾𑌕 𑌨𑍃𑌪𑌤𑌿𑌰𑍍𑌦𑍀𑌨𑍋 𑌨𑍇𑌕𑍍𑌷𑌿𑌤𑍁𑌂 𑌨𑌾𑌭𑌿𑌭𑌾𑌷𑌿𑌤𑍁𑌮𑍍 ॥ 3 ॥

𑌤𑌦𑌪𑍂𑌰𑍍𑌵𑌂 𑌨𑌰𑌪𑌤𑍇𑌰𑍍𑌦𑍃𑌷𑍍𑌟𑍍𑌵𑌾 𑌰𑍂𑌪𑌂 𑌭𑌯𑌾𑌵𑌹𑌮𑍍 ।
𑌰𑌾𑌮𑍋𑌽𑌪𑌿 𑌭𑌯𑌮𑌾𑌪𑌨𑍍𑌨𑌃 𑌪𑌦𑌾 𑌸𑍍𑌪𑍃𑌷𑍍𑌟𑍍𑌵𑍇𑌵 𑌪𑌨𑍍𑌨𑌗𑌮𑍍 ॥ 4 ॥

𑌇𑌂𑌦𑍍𑌰𑌿𑌯𑍈𑌰𑌪𑍍𑌰𑌹𑍃𑌷𑍍𑌟𑍈𑌸𑍍𑌤𑌂 𑌶𑍋𑌕𑌸𑌂𑌤𑌾𑌪𑌕𑌰𑍍𑌶𑌿𑌤𑌮𑍍 ।
𑌨𑌿𑌶𑍍𑌶𑍍𑌵𑌸𑌂𑌤𑌂 𑌮𑌹𑌾𑌰𑌾𑌜𑌂 𑌵𑍍𑌯𑌥𑌿𑌤𑌾𑌕𑍁𑌲𑌚𑍇𑌤𑌸𑌮𑍍 ॥ 5 ॥

𑌊𑌰𑍍𑌮𑌿𑌮𑌾𑌲𑌿𑌨𑌮𑌕𑍍𑌷𑍋𑌭𑍍𑌯𑌂 𑌕𑍍𑌷𑍁𑌭𑍍𑌯𑌂𑌤𑌮𑌿𑌵 𑌸𑌾𑌗𑌰𑌮𑍍 ।
𑌉𑌪𑌪𑍍𑌲𑍁𑌤𑌮𑌿𑌵𑌾𑌦𑌿𑌤𑍍𑌯𑌮𑍁𑌕𑍍𑌤𑌾𑌨𑍃𑌤𑌮𑍃𑌷𑌿𑌂 𑌯𑌥𑌾 ॥ 6 ॥

𑌅𑌚𑌿𑌂𑌤𑍍𑌯𑌕𑌲𑍍𑌪𑌂 𑌹𑌿 𑌪𑌿𑌤𑍁𑌸𑍍𑌤𑌂 𑌶𑍋𑌕𑌮𑍁𑌪𑌧𑌾𑌰𑌯𑌨𑍍 ।
𑌬𑌭𑍂𑌵 𑌸𑌂𑌰𑌬𑍍𑌧𑌤𑌰 𑌸𑍍𑌸𑌮𑍁𑌦𑍍𑌰 𑌇𑌵 𑌪𑌰𑍍𑌵𑌣𑌿 ॥ 𑍭 ॥

𑌚𑌿𑌂𑌤𑌯𑌾𑌮𑌾𑌸 𑌚 𑌤𑌦𑌾 𑌰𑌾𑌮𑌃 𑌪𑌿𑌤𑍃𑌹𑌿𑌤𑍇 𑌰𑌤𑌃 ।
𑌕𑌿𑌂 𑌸𑍍𑌵𑌿𑌦𑌦𑍍𑌯𑍈𑌵 𑌨𑍃𑌪𑌤𑌿𑌰𑍍𑌨 𑌮𑌾𑌂 𑌪𑍍𑌰𑌤𑍍𑌯𑌭𑌿𑌨𑌂𑌦𑌤𑌿 ॥ 𑍮 ॥

𑌅𑌨𑍍𑌯𑌦𑌾 𑌮𑌾𑌂 𑌪𑌿𑌤𑌾 𑌦𑍃𑌷𑍍𑌟𑍍𑌵𑌾 𑌕𑍁𑌪𑌿𑌤𑍋𑌽𑌪𑌿 𑌪𑍍𑌰𑌸𑍀𑌦𑌤𑌿 ।
𑌤𑌸𑍍𑌯 𑌮𑌾𑌮𑌦𑍍𑌯 𑌸𑌂𑌪𑍍𑌰𑍇𑌕𑍍𑌷𑍍𑌯 𑌕𑌿𑌮𑌾𑌯𑌾𑌸𑌃 𑌪𑍍𑌰𑌵𑌰𑍍𑌤𑌤𑍇 ॥ 𑍯 ॥

𑌸 𑌦𑍀𑌨 𑌇𑌵 𑌶𑍋𑌕𑌾𑌰𑍍𑌤𑍋 𑌵𑌿𑌷𑌣𑍍𑌣𑌵𑌦𑌨𑌦𑍍𑌯𑍁𑌤𑌿𑌃 ।
𑌕𑍈𑌕𑍇𑌯𑍀𑌮𑌭𑌿𑌵𑌾𑌦𑍍𑌯𑍈𑌵 𑌰𑌾𑌮𑍋 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 10 ॥

𑌕𑌚𑍍𑌚𑌿𑌨𑍍𑌮𑌯𑌾 𑌨𑌾𑌪𑌰𑌾𑌦𑍍𑌧𑌮𑌜𑍍𑌞𑌾𑌨𑌾𑌦𑍍𑌯𑍇𑌨 𑌮𑍇 𑌪𑌿𑌤𑌾 ।
𑌕𑍁𑌪𑌿𑌤𑌸𑍍𑌤𑌨𑍍𑌮𑌮𑌾𑌚𑌕𑍍𑌷𑍍𑌵 𑌤𑍍𑌵𑌂 𑌚𑍈𑌵𑍈𑌨𑌂 𑌪𑍍𑌰𑌸𑌾𑌦𑌯 ॥ 11 ॥

𑌅𑌪𑍍𑌰𑌸𑌨𑍍𑌨𑌮𑌨𑌾𑌃 𑌕𑌿𑌨𑍍𑌨𑍁 𑌸𑌦𑌾 𑌮𑌾𑌂 𑌪𑍍𑌰𑌤𑌿 𑌵𑌤𑍍𑌸𑌲𑌃 ।
𑌵𑌿𑌵𑌰𑍍𑌣𑌵𑌦𑌨𑍋 𑌦𑍀𑌨𑍋 𑌨 𑌹𑌿 𑌮𑌾𑌮𑌭𑌿𑌭𑌾𑌷𑌤𑍇 ॥ 12 ॥

𑌶𑌰𑍀𑌰𑍋 𑌮𑌾𑌨𑌸𑍋 𑌵𑌾𑌪𑌿 𑌕𑌚𑍍𑌚𑌿𑌦𑍇𑌨𑌂 𑌨 𑌬𑌾𑌧𑌤𑍇 ।
𑌸𑌂𑌤𑌾𑌪𑍋𑌵𑌾𑌽𑌭𑌿𑌤𑌾𑌪𑍋 𑌵𑌾 𑌦𑍁𑌰𑍍𑌲𑌭𑌂 𑌹𑌿 𑌸𑌦𑌾 𑌸𑍁𑌖𑌮𑍍 ॥ 13 ॥

𑌕𑌚𑍍𑌚𑌿𑌨𑍍𑌨 𑌕𑌿𑌂𑌚𑌿𑌦𑍍𑌭𑌰𑌤𑍇 𑌕𑍁𑌮𑌾𑌰𑍇 𑌪𑍍𑌰𑌿𑌯𑌦𑌰𑍍𑌶𑌨𑍇 ।
𑌶𑌤𑍍𑌰𑍁𑌘𑍍𑌨𑍇 𑌵𑌾 𑌮𑌹𑌾𑌸𑌤𑍍𑌤𑍍𑌵𑍇 𑌮𑌾𑌤𑍍𑌰𑍂𑌣𑌾𑌂 𑌵𑌾 𑌮𑌮𑌾𑌶𑍁𑌭𑌮𑍍 ॥ 14 ॥

𑌅𑌤𑍋𑌷𑌯𑌨𑍍𑌮𑌹𑌾𑌰𑌾𑌜𑌮𑌕𑍁𑌰𑍍𑌵𑌨𑍍𑌵𑌾 𑌪𑌿𑌤𑍁𑌰𑍍𑌵𑌚𑌃 ।
𑌮𑍁𑌹𑍂𑌰𑍍𑌤𑌮𑌪𑌿 𑌨𑍇𑌚𑍍𑌛𑍇𑌯𑌂 𑌜𑍀𑌵𑌿𑌤𑍁𑌂 𑌕𑍁𑌪𑌿𑌤𑍇 𑌨𑍃𑌪𑍇 ॥ 15 ॥

𑌯𑌤𑍋𑌮𑍂𑌲𑌂 𑌨𑌰𑌃 𑌪𑌶𑍍𑌯𑍇𑌤𑍍𑌪𑍍𑌰𑌾𑌦𑍁𑌰𑍍𑌭𑌾𑌵𑌮𑌿𑌹𑌾𑌤𑍍𑌮𑌨𑌃 ।
𑌕𑌥𑌂 𑌤𑌸𑍍𑌮𑌿𑌨𑍍𑌨𑌵𑌰𑍍𑌤𑍇𑌤 𑌪𑍍𑌰𑌤𑍍𑌯𑌕𑍍𑌷𑍇 𑌸𑌤𑌿 𑌦𑍈𑌵𑌤𑍇 ॥ 16 ॥

𑌕𑌚𑍍𑌚𑌿𑌤𑍍𑌤𑍇 𑌪𑌰𑍁𑌷𑌂 𑌕𑌿𑌂𑌚𑌿𑌦𑌭𑌿𑌮𑌾𑌨𑌾𑌤𑍍𑌪𑌤𑌿𑌤𑌾 𑌮𑌮 ।
𑌉𑌕𑍍𑌤𑍋 𑌭𑌵𑌤𑍍𑌯𑌾 𑌕𑍋𑌪𑍇𑌨 𑌯𑌤𑍍𑌰𑌾𑌸𑍍𑌯 𑌲𑍁𑌲𑌿𑌤𑌂 𑌮𑌨𑌃 ॥ 1𑍭 ॥

𑌏𑌤𑌦𑌾𑌚𑌕𑍍𑌷𑍍𑌵 𑌮𑍇 𑌦𑍇𑌵𑌿 𑌤𑌤𑍍𑌤𑍍𑌵𑍇𑌨 𑌪𑌰𑌿𑌪𑍃𑌚𑍍𑌛𑌤𑌃 ।
𑌕𑌿𑌂 𑌨𑌿𑌮𑌿𑌤𑍍𑌤𑌮𑌪𑍂𑌰𑍍𑌵𑍋𑌯𑌂 𑌵𑌿𑌕𑌾𑌰𑍋 𑌮𑌨𑍁𑌜𑌾𑌧𑌿𑌪𑍇 ॥ 1𑍮 ॥

𑌏𑌵𑌮𑍁𑌕𑍍𑌤𑌾 𑌤𑍁 𑌕𑍈𑌕𑍇𑌯𑍀 𑌰𑌾𑌘𑌵𑍇𑌣 𑌮𑌹𑌾𑌤𑍍𑌮𑌨𑌾 ।
𑌉𑌵𑌾𑌚𑍇𑌦𑌂 𑌸𑍁𑌨𑌿𑌰𑍍𑌲𑌜𑍍𑌜𑌾 𑌧𑍃𑌷𑍍𑌟𑌮𑌾𑌤𑍍𑌮𑌹𑌿𑌤𑌂 𑌵𑌚𑌃 ॥ 1𑍯 ॥

𑌨 𑌰𑌾𑌜𑌾 𑌕𑍁𑌪𑌿𑌤𑍋 𑌰𑌾𑌮 𑌵𑍍𑌯𑌸𑌨𑌂 𑌨𑌾𑌸𑍍𑌯 𑌕𑌿𑌂𑌚𑌨 ।
𑌕𑌿𑌂𑌚𑌿𑌨𑍍𑌮𑌨𑍋𑌗𑌤𑌂𑌤𑍍𑌵𑌸𑍍𑌯 𑌤𑍍𑌵𑌦𑍍𑌭𑌯𑌾𑌨𑍍𑌨𑌾𑌭𑌿𑌭𑌾𑌷𑌤𑍇 ॥ 20 ॥

𑌪𑍍𑌰𑌿𑌯𑌂 𑌤𑍍𑌵𑌾𑌮𑌪𑍍𑌰𑌿𑌯𑌂 𑌵𑌕𑍍𑌤𑍁𑌂 𑌵𑌾𑌣𑍀 𑌨𑌾𑌸𑍍𑌯𑍋𑌪𑌵𑌰𑍍𑌤𑌤𑍇 ।
𑌤𑌦𑌵𑌶𑍍𑌯𑌂 𑌤𑍍𑌵𑌯𑌾 𑌕𑌾𑌰𑍍𑌯𑌂 𑌯𑌦𑌨𑍇𑌨𑌾𑌶𑍍𑌰𑍁𑌤𑌂 𑌮𑌮 ॥ 21 ॥

𑌏𑌷 𑌮𑌹𑍍𑌯𑌂 𑌵𑌰𑌂 𑌦𑌤𑍍𑌤𑍍𑌵𑌾 𑌪𑍁𑌰𑌾 𑌮𑌾𑌮𑌭𑌿𑌪𑍂𑌜𑍍𑌯 𑌚 ।
𑌸 𑌪𑌶𑍍𑌚𑌾𑌤𑍍𑌤𑌪𑍍𑌯𑌤𑍇 𑌰𑌾𑌜𑌾 𑌯𑌥𑌾𑌽𑌨𑍍𑌯𑌃 𑌪𑍍𑌰𑌾𑌕𑍃𑌤𑌸𑍍𑌤𑌥𑌾 ॥ 22 ॥

𑌅𑌤𑌿𑌸𑍃𑌜𑍍𑌯 𑌦𑌦𑌾𑌨𑍀𑌤𑌿 𑌵𑌰𑌂 𑌮𑌮 𑌵𑌿𑌶𑌾𑌂𑌪𑌤𑌿𑌃 ।
𑌸 𑌨𑌿𑌰𑌰𑍍𑌥𑌂 𑌗𑌤𑌜𑌲𑍇 𑌸𑍇𑌤𑍁𑌂 𑌬𑌂𑌧𑌿𑌤𑍁𑌮𑌿𑌚𑍍𑌛𑌤𑌿 ॥ 23 ॥

𑌧𑌰𑍍𑌮𑌮𑍂𑌲𑌮𑌿𑌦𑌂 𑌰𑌾𑌮 𑌵𑌿𑌦𑌿𑌤𑌂 𑌚 𑌸𑌤𑌾𑌮𑌪𑌿 ।
𑌤𑌤𑍍𑌸𑌤𑍍𑌯𑌂 𑌨 𑌤𑍍𑌯𑌜𑍇𑌦𑍍𑌰𑌾𑌜𑌾 𑌕𑍁𑌪𑌿𑌤𑌸𑍍𑌤𑍍𑌵𑌤𑍍𑌕𑍃𑌤𑍇 𑌯𑌥𑌾 ॥ 24 ॥

𑌯𑌦𑌿 𑌤𑌦𑍍𑌵𑌕𑍍𑌷𑍍𑌯𑌤𑍇 𑌰𑌾𑌜𑌾 𑌶𑍁𑌭𑌂 𑌵𑌾 𑌯𑌦𑌿 𑌵𑌾𑌽𑌶𑍁𑌭𑌮𑍍 ।
𑌕𑌰𑌿𑌷𑍍𑌯𑌸𑌿 𑌤𑌤𑌸𑍍𑌸𑌰𑍍𑌵𑌮𑌾𑌖𑍍𑌯𑌾𑌸𑍍𑌯𑌾𑌮𑌿 𑌪𑍁𑌨𑌸𑍍𑌤𑍍𑌵𑌹𑌮𑍍 ॥ 25 ॥

𑌯𑌦𑌿 𑌤𑍍𑌵𑌭𑌿𑌹𑌿𑌤𑌂 𑌰𑌾𑌜𑍍𑌞𑌾 𑌤𑍍𑌵𑌯𑌿 𑌤𑌨𑍍𑌨 𑌵𑌿𑌪𑌤𑍍𑌸𑍍𑌯𑌤𑍇 ।
𑌤𑌤𑍋𑌽𑌹𑌮𑌭𑌿𑌧𑌾𑌸𑍍𑌯𑌾𑌮𑌿 𑌨 𑌹𑍍𑌯𑍇𑌷 𑌤𑍍𑌵𑌯𑌿 𑌵𑌕𑍍𑌷𑍍𑌯𑌤𑌿 ॥ 26 ॥

𑌏𑌤𑌤𑍍𑌤𑍁 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌕𑍈𑌕𑍇𑌯𑍍𑌯𑌾 𑌸𑌮𑍁𑌦𑌾𑌹𑍃𑌤𑌮𑍍 ।
𑌉𑌵𑌾𑌚 𑌵𑍍𑌯𑌥𑌿𑌤𑍋 𑌰𑌾𑌮𑌸𑍍𑌤𑌾𑌂 𑌦𑍇𑌵𑍀𑌂 𑌨𑍃𑌪𑌸𑌨𑍍𑌨𑌿𑌧𑍌 ॥ 2𑍭 ॥

𑌅𑌹𑍋 𑌧𑌿𑌙𑍍𑌨𑌾𑌰𑍍𑌹𑌸𑍇 𑌦𑍇𑌵𑌿 𑌵𑌕𑍍𑌤𑍁𑌂 𑌮𑌾𑌮𑍀𑌦𑍃𑌶𑌂 𑌵𑌚𑌃 ।
𑌅𑌹𑌂 𑌹𑌿 𑌵𑌚𑌨𑌾𑌦𑍍𑌰𑌾𑌜𑍍𑌞𑌃 𑌪𑌤𑍇𑌯𑌮𑌪𑌿 𑌪𑌾𑌵𑌕𑍇 ॥ 2𑍮 ॥

𑌭𑌕𑍍𑌷𑌯𑍇𑌯𑌂 𑌵𑌿𑌷𑌂 𑌤𑍀𑌕𑍍𑌷𑍍𑌣𑌂 𑌮𑌜𑍍𑌜𑍇𑌯𑌮𑌪𑌿 𑌚𑌾𑌰𑍍𑌣𑌵𑍇 ।
𑌨𑌿𑌯𑍁𑌕𑍍𑌤𑍋 𑌗𑍁𑌰𑍁𑌣𑌾 𑌪𑌿𑌤𑍍𑌰𑌾 𑌨𑍃𑌪𑍇𑌣 𑌚 𑌹𑌿𑌤𑍇𑌨 𑌚 ॥ 2𑍯 ॥

𑌤𑌦𑍍𑌬𑍍𑌰𑍂𑌹𑌿 𑌵𑌚𑌨𑌂 𑌦𑍇𑌵𑌿 𑌰𑌾𑌜𑍍𑌞𑍋 𑌯𑌦𑌭𑌿𑌕𑌾𑌂𑌕𑍍𑌷𑌿𑌤𑌮𑍍 ।
𑌕𑌰𑌿𑌷𑍍𑌯𑍇 𑌪𑍍𑌰𑌤𑌿𑌜𑌾𑌨𑍇 𑌚 𑌰𑌾𑌮𑍋 𑌦𑍍𑌵𑌿𑌰𑍍𑌨𑌾𑌭𑌿𑌭𑌾𑌷𑌤𑍇 ॥ 30 ॥

𑌤𑌮𑌾𑌰𑍍𑌜𑌵𑌸𑌮𑌾𑌯𑍁𑌕𑍍𑌤𑌮𑌨𑌾𑌰𑍍𑌯𑌾 𑌸𑌤𑍍𑌯𑌵𑌾𑌦𑌿𑌨𑌮𑍍 ।
𑌉𑌵𑌾𑌚 𑌰𑌾𑌮𑌂 𑌕𑍈𑌕𑍇𑌯𑍀 𑌵𑌚𑌨𑌂 𑌭𑍃𑌶𑌦𑌾𑌰𑍁𑌣𑌮𑍍 ॥ 31 ॥

𑌪𑍁𑌰𑌾 𑌦𑍈𑌵𑌾𑌸𑍁𑌰𑍇 𑌯𑍁𑌦𑍍𑌧𑍇 𑌪𑌿𑌤𑍍𑌰𑌾 𑌤𑍇 𑌮𑌮 𑌰𑌾𑌘𑌵 ।
𑌰𑌕𑍍𑌷𑌿𑌤𑍇𑌨 𑌵𑌰𑍌 𑌦𑌤𑍍𑌤𑍌 𑌸𑌶𑌲𑍍𑌯𑍇𑌨 𑌮𑌹𑌾𑌰𑌣𑍇 ॥ 32 ॥

𑌤𑌤𑍍𑌰 𑌮𑍇 𑌯𑌾𑌚𑌿𑌤𑍋 𑌰𑌾𑌜𑌾 𑌭𑌰𑌤𑌸𑍍𑌯𑌾𑌭𑌿𑌷𑍇𑌚𑌨𑌮𑍍 ।
𑌗𑌮𑌨𑌂 𑌦𑌂𑌡𑌕𑌾𑌰𑌣𑍍𑌯𑍇 𑌤𑌵 𑌚𑌾𑌦𑍍𑌯𑍈𑌵 𑌰𑌾𑌘𑌵 ॥ 33 ॥

𑌯𑌦𑌿 𑌸𑌤𑍍𑌯𑌪𑍍𑌰𑌤𑌿𑌜𑍍𑌞𑌂 𑌤𑍍𑌵𑌂 𑌪𑌿𑌤𑌰𑌂 𑌕𑌰𑍍𑌤𑍁𑌮𑌿𑌚𑍍𑌛𑌸𑌿 ।
𑌆𑌤𑍍𑌮𑌾𑌨𑌂 𑌚 𑌨𑌰𑌶𑍍𑌰𑍇𑌷𑍍𑌠 𑌮𑌮 𑌵𑌾𑌕𑍍𑌯𑌮𑌿𑌦𑌂 𑌶𑍃𑌣𑍁 ॥ 34 ॥

𑌸𑌨𑍍𑌨𑌿𑌦𑍇𑌶𑍇 𑌪𑌿𑌤𑍁𑌸𑍍𑌤𑌿𑌷𑍍𑌠 𑌯𑌥𑌾 𑌤𑍇𑌨 𑌪𑍍𑌰𑌤𑌿𑌶𑍍𑌰𑍁𑌤𑌮𑍍 ।
𑌤𑍍𑌵𑌯𑌾𑌽𑌰𑌣𑍍𑌯𑌂 𑌪𑍍𑌰𑌵𑍇𑌷𑍍𑌟𑌵𑍍𑌯𑌂 𑌨𑌵 𑌵𑌰𑍍𑌷𑌾𑌣𑌿 𑌪𑌂𑌚 𑌚 ॥ 35 ॥

𑌭𑌰𑌤𑌸𑍍𑌤𑍍𑌵𑌭𑌿𑌷𑌿𑌚𑍍𑌯𑍇𑌤 𑌯𑌦𑍇𑌤𑌦𑌭𑌿𑌷𑍇𑌚𑌨𑌮𑍍 ।
𑌤𑍍𑌵𑌦𑌰𑍍𑌥𑍇 𑌵𑌿𑌹𑌿𑌤𑌂 𑌰𑌾𑌜𑍍𑌞𑌾 𑌤𑍇𑌨 𑌸𑌰𑍍𑌵𑍇𑌣 𑌰𑌾𑌘𑌵 ॥ 36 ॥

𑌸𑌪𑍍𑌤 𑌸𑌪𑍍𑌤 𑌚 𑌵𑌰𑍍𑌷𑌾𑌣𑌿 𑌦𑌂𑌡𑌕𑌾𑌰𑌣𑍍𑌯𑌮𑌾𑌶𑍍𑌰𑌿𑌤𑌃 ।
𑌅𑌭𑌿𑌷𑍇𑌕𑌮𑌿𑌮𑌂 𑌤𑍍𑌯𑌕𑍍𑌤𑍍𑌵𑌾 𑌜𑌟𑌾𑌜𑌿𑌨𑌧𑌰𑍋 𑌵𑌸 ॥ 3𑍭 ॥

𑌭𑌰𑌤𑌃 𑌕𑍋𑌸𑌲𑌪𑍁𑌰𑍇 𑌪𑍍𑌰𑌶𑌾𑌸𑍍𑌤𑍁 𑌵𑌸𑍁𑌧𑌾𑌮𑌿𑌮𑌾𑌮𑍍 ।
𑌨𑌾𑌨𑌾𑌰𑌤𑍍𑌨 𑌸𑌮𑌾𑌕𑍀𑌰𑍍𑌣𑌾𑌂 𑌸𑌵𑌾𑌜𑌿𑌰𑌥𑌕𑍁𑌂𑌜𑌰𑌾𑌮𑍍 ॥ 3𑍮 ॥

𑌏𑌤𑍇𑌨 𑌤𑍍𑌵𑌾𑌂 𑌨𑌰𑍇𑌂𑌦𑍍𑌰𑍋𑌽𑌯𑌂 𑌕𑌾𑌰𑍁𑌣𑍍𑌯𑍇𑌨 𑌸𑌮𑌾𑌪𑍍𑌲𑍁𑌤𑌃 ।
𑌶𑍋𑌕𑌸𑌂𑌕𑍍𑌲𑌿𑌷𑍍𑌟 𑌵𑌦𑌨𑍋 𑌨 𑌶𑌕𑍍𑌨𑍋𑌤𑌿 𑌨𑌿𑌰𑍀𑌕𑍍𑌷𑌿𑌤𑍁𑌮𑍍 ॥ 3𑍯 ॥

𑌏𑌤𑌤𑍍𑌕𑍁𑌰𑍁 𑌨𑌰𑍇𑌂𑌦𑍍𑌰𑌸𑍍𑌯 𑌵𑌚𑌨𑌂 𑌰𑌘𑍁𑌨𑌂𑌦𑌨 ।
𑌸𑌤𑍍𑌯𑍇𑌨 𑌮𑌹𑌤𑌾 𑌰𑌾𑌮 𑌤𑌾𑌰𑌯𑌸𑍍𑌵 𑌨𑌰𑍇𑌶𑍍𑌵𑌰𑌮𑍍 ॥ 40 ॥

𑌇𑌤𑍀𑌵 𑌤𑌸𑍍𑌯𑌾𑌂 𑌪𑌰𑍁𑌷𑌂 𑌵𑌦𑌂𑌤𑍍𑌯𑌾𑌂 𑌨 𑌚𑍈𑌵 𑌰𑌾𑌮𑌃 𑌪𑍍𑌰𑌵𑌿𑌵𑍇𑌶 𑌶𑍋𑌕𑌮𑍍 ।
𑌪𑍍𑌰𑌵𑌿𑌵𑍍𑌯𑌥𑍇 𑌚𑌾𑌪𑌿 𑌮𑌹𑌾𑌨𑍁𑌭𑌾𑌵𑍋 𑌰𑌾𑌜𑌾 𑌤𑍁 𑌪𑍁𑌤𑍍𑌰𑌵𑍍𑌯𑌸𑌨𑌾𑌭𑌿𑌤𑌪𑍍𑌤𑌃 ॥ 41 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌅𑌷𑍍𑌟𑌾𑌦𑌶𑌸𑍍𑌸𑌰𑍍𑌗𑌃 ॥


Browse Related Categories: