𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌪𑍍𑌰𑌥𑌮𑌸𑍍𑌸𑌰𑍍𑌗𑌃 ।
𑌸 𑌤𑌾𑌂 𑌪𑍁𑌷𑍍𑌕𑌰𑌿𑌣𑍀𑌂 𑌗𑌤𑍍𑌵𑌾 𑌪𑌦𑍍𑌮𑍋𑌤𑍍𑌪𑌲𑌝𑌷𑌾𑌕𑍁𑌲𑌾𑌮𑍍 ।
𑌰𑌾𑌮𑌸𑍍𑌸𑍌𑌮𑌿𑌤𑍍𑌰𑌿 𑌸𑌹𑌿𑌤𑍋 𑌵𑌿𑌲𑌲𑌾𑌪𑌾𑌕𑍁𑌲𑍇𑌂𑌦𑍍𑌰𑌿𑌯𑌃 ॥ 1 ॥
𑌤𑌸𑍍𑌯 𑌦𑍃𑌷𑍍𑌟𑍍𑌵𑍈𑌵 𑌤𑌾𑌂 𑌹𑌰𑍍𑌷𑌾𑌦𑌿𑌂𑌦𑍍𑌰𑌿𑌯𑌾𑌣𑌿 𑌚𑌕𑌂𑌪𑌿𑌰𑍇 ।
𑌸 𑌕𑌾𑌮𑌵𑌶𑌮𑌾𑌪𑌨𑍍𑌨𑌸𑍍𑌸𑍌𑌮𑌿𑌤𑍍𑌰𑌿𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 2 ॥
𑌸𑍌𑌮𑌿𑌤𑍍𑌰𑍇 𑌶𑍋𑌭𑌤𑍇 𑌪𑌂𑌪𑌾 𑌵𑍈𑌦𑍂𑌰𑍍𑌯𑌵𑌿𑌮𑌲𑍋𑌦𑌕𑌾 ।
𑌫𑍁𑌲𑍍𑌲𑌪𑌦𑍍𑌮𑍋𑌤𑍍𑌪𑌲𑌵𑌤𑍀 𑌶𑍋𑌭𑌿𑌤𑌾 𑌵𑌿𑌵𑌿𑌧𑍈𑌰𑍍𑌦𑍍𑌰𑍁𑌮𑍈𑌃 ॥ 3 ॥
𑌸𑍌𑌮𑌿𑌤𑍍𑌰𑍇 𑌪𑌶𑍍𑌯 𑌪𑌂𑌪𑌾𑌯𑌾𑌃 𑌕𑌾𑌨𑌨𑌂 𑌶𑍁𑌭𑌦𑌰𑍍𑌶𑌨𑌮𑍍 ।
𑌯𑌤𑍍𑌰 𑌰𑌾𑌜𑌂𑌤𑌿 𑌶𑍈𑌲𑌾 𑌵𑌾 𑌦𑍍𑌰𑍁𑌮𑌾𑌸𑍍𑌸𑌶𑌿𑌖𑌰𑌾 𑌇𑌵 ॥ 4 ॥
𑌮𑌾𑌂 𑌤𑍁 𑌶𑍋𑌕𑌾𑌭𑌿𑌸𑌂𑌤𑌪𑍍𑌤𑌂 𑌮𑌾𑌧𑌵𑌃 𑌪𑍀𑌡𑌯𑌂𑌤𑌿 𑌵𑍈 ।
𑌭𑌰𑌤𑌸𑍍𑌯 𑌚 𑌦𑍁𑌃𑌖𑍇𑌨 𑌵𑍈𑌦𑍇𑌹𑍍𑌯𑌾 𑌹𑌰𑌣𑍇𑌨 𑌚 ॥ 5 ॥
𑌶𑍋𑌕𑌾𑌰𑍍𑌤𑌸𑍍𑌯𑌾𑌪𑌿 𑌮𑍇 𑌪𑌂𑌪𑌾 𑌶𑍋𑌭𑌤𑍇 𑌚𑌿𑌤𑍍𑌰𑌕𑌾𑌨𑌨𑌾 ।
𑌵𑍍𑌯𑌵𑌕𑍀𑌰𑍍𑌣𑌾 𑌬𑌹𑍁𑌵𑌿𑌧𑍈𑌃 𑌪𑍁𑌷𑍍𑌪𑍈𑌶𑍍𑌶𑍀𑌤𑍋𑌦𑌕𑌾 𑌶𑌿𑌵𑌾 ॥ 6 ॥
𑌨𑌲𑌿𑌨𑍈𑌰𑌪𑌿 𑌸𑌂𑌛𑌨𑍍𑌨𑌾 𑌹𑍍𑌯𑌤𑍍𑌯𑌰𑍍𑌥𑌶𑍁𑌭𑌦𑌰𑍍𑌶𑌨𑌾 ।
𑌸𑌰𑍍𑌪𑌵𑍍𑌯𑌾𑌲𑌾𑌨𑍁𑌚𑌰𑌿𑌤𑌾 𑌮𑍃𑌗𑌦𑍍𑌵𑌿𑌜𑌸𑌮𑌾𑌕𑍁𑌲𑌾 ॥ ॥
𑌅𑌧𑌿𑌕𑌂 𑌪𑍍𑌰𑌵𑌿𑌭𑌾𑌤𑍍𑌯𑍇𑌤𑌨𑍍𑌨𑍀𑌲𑌪𑍀𑌤𑌂 𑌤𑍁 𑌶𑌾𑌦𑍍𑌵𑌲𑌮𑍍 ।
𑌦𑍍𑌰𑍁𑌮𑌾𑌣𑌾𑌂 𑌵𑌿𑌵𑌿𑌧𑍈𑌃 𑌪𑍁𑌷𑍍𑌪𑍈𑌃 𑌪𑌰𑌿𑌸𑍍𑌤𑍋𑌮𑍈𑌰𑌿𑌵𑌾𑌰𑍍𑌪𑌿𑌤𑌮𑍍 ॥ ॥
𑌪𑍁𑌷𑍍𑌪𑌭𑌾𑌰𑌸𑌮𑍃𑌦𑍍𑌧𑌾𑌨𑌿 𑌶𑌿𑌖𑌰𑌾𑌣𑌿 𑌸𑌮𑌂𑌤𑌤𑌃 ।
𑌲𑌤𑌾𑌭𑌿𑌃 𑌪𑍁𑌷𑍍𑌪𑌿𑌤𑌾𑌗𑍍𑌰𑌾𑌭𑌿𑌰𑍁𑌪𑌗𑍂𑌢𑌾𑌨𑌿 𑌸𑌰𑍍𑌵𑌶𑌃 ॥ ॥
𑌸𑍁𑌖𑌾𑌨𑌿𑌲𑍋𑌽𑌯𑌂 𑌸𑍌𑌮𑌿𑌤𑍍𑌰𑍇 𑌕𑌾𑌲𑌃 𑌪𑍍𑌰𑌚𑍁𑌰𑌮𑌨𑍍𑌮𑌥𑌃 ।
𑌗𑌂𑌧𑌵𑌾𑌨𑍍𑌸𑍁𑌰𑌭𑌿𑌰𑍍𑌮𑌾𑌸𑍋 𑌜𑌾𑌤𑌪𑍁𑌷𑍍𑌪𑌫𑌲𑌦𑍍𑌰𑍁𑌮𑌃 ॥ 10 ॥
𑌪𑌶𑍍𑌯 𑌰𑍂𑌪𑌾𑌣𑌿 𑌸𑍌𑌮𑌿𑌤𑍍𑌰𑍇 𑌵𑌨𑌾𑌨𑌾𑌂 𑌪𑍁𑌷𑍍𑌪𑌶𑌾𑌲𑌿𑌨𑌾𑌮𑍍 ।
𑌸𑍃𑌜𑌤𑌾𑌂 𑌪𑍁𑌷𑍍𑌪𑌵𑌰𑍍𑌷𑌾𑌣𑌿 𑌤𑍋𑌯𑌂 𑌤𑍋𑌯𑌮𑍁𑌚𑌾𑌮𑌿𑌵 ॥ 11 ॥
𑌪𑍍𑌰𑌸𑍍𑌤𑌰𑍇𑌷𑍁 𑌚 𑌰𑌮𑍍𑌯𑍇𑌷𑍁 𑌵𑌿𑌵𑌿𑌧𑌾𑌃 𑌕𑌾𑌨𑌨𑌦𑍍𑌰𑍁𑌮𑌾𑌃 ।
𑌵𑌾𑌯𑍁𑌵𑍇𑌗𑌪𑍍𑌰𑌚𑌲𑌿𑌤𑌾𑌃 𑌪𑍁𑌷𑍍𑌪𑍈𑌰𑌵𑌕𑌿𑌰𑌂𑌤𑌿 𑌗𑌾𑌮𑍍 ॥ 12 ॥
𑌪𑌤𑌿𑌤𑍈𑌃 𑌪𑌤𑌮𑌾𑌨𑍈𑌶𑍍𑌚 𑌪𑌾𑌦𑌪𑌸𑍍𑌥𑍈𑌶𑍍𑌚 𑌮𑌾𑌰𑍁𑌤𑌃 ।
𑌕𑍁𑌸𑍁𑌮𑍈𑌃 𑌪𑌶𑍍𑌯 𑌸𑍌𑌮𑌿𑌤𑍍𑌰𑍇 𑌕𑍍𑌰𑍀𑌡𑌨𑍍𑌨𑌿𑌵 𑌸𑌮𑌂𑌤𑌤𑌃 ॥ 13 ॥
𑌵𑌿𑌕𑍍𑌷𑌿𑌪𑌨𑍍𑌵𑌿𑌵𑌿𑌧𑌾𑌶𑍍𑌶𑌾𑌖𑌾 𑌨𑌗𑌾𑌨𑌾𑌂 𑌕𑍁𑌸𑍁𑌮𑍋𑌤𑍍𑌕𑌚𑌾𑌃 ।
𑌮𑌾𑌰𑍁𑌤𑌶𑍍𑌚𑌲𑌿𑌤𑌸𑍍𑌥𑌾𑌨𑍈𑌷𑍍𑌷𑌟𑍍𑌪𑌦𑍈𑌰𑌨𑍁𑌗𑍀𑌯𑌤𑍇 ॥ 14 ॥
𑌮𑌤𑍍𑌤𑌕𑍋𑌕𑌿𑌲𑌸𑌨𑍍𑌨𑌾𑌦𑍈𑌰𑍍𑌨𑌰𑍍𑌤𑌯𑌨𑍍𑌨𑌿𑌵 𑌪𑌾𑌦𑌪𑌾𑌨𑍍 ।
𑌶𑍈𑌲𑌕𑌂𑌦𑌰𑌨𑌿𑌷𑍍𑌕𑍍𑌰𑌾𑌂𑌤𑌃 𑌪𑍍𑌰𑌗𑍀𑌤 𑌇𑌵 𑌚𑌾𑌨𑌿𑌲𑌃 ॥ 15 ॥
𑌤𑍇𑌨 𑌵𑌿𑌕𑍍𑌷𑌿𑌪𑌤𑌾𑌽𑌤𑍍𑌯𑌰𑍍𑌥𑌂 𑌪𑌵𑌨𑍇𑌨 𑌸𑌮𑌂𑌤𑌤𑌃 ।
𑌅𑌮𑍀 𑌸𑌂𑌸𑌕𑍍𑌤𑌶𑌾𑌖𑌾𑌗𑍍𑌰𑌾 𑌗𑍍𑌰𑌥𑌿𑌤𑌾 𑌇𑌵 𑌪𑌾𑌦𑌪𑌾𑌃 ॥ 16 ॥
𑌸 𑌏𑌷 𑌸𑍁𑌖𑌸𑌂𑌸𑍍𑌪𑌰𑍍𑌶𑍋 𑌵𑌾𑌤𑌿 𑌚𑌂𑌦𑌨𑌶𑍀𑌤𑌲𑌃 ।
𑌗𑌂𑌧𑌮𑌭𑍍𑌯𑌵𑌹𑌨𑍍𑌪𑍁𑌣𑍍𑌯𑌂 𑌶𑍍𑌰𑌮𑌾𑌪𑌨𑌯𑌨𑍋𑌽𑌨𑌿𑌲𑌃 ॥ 1 ॥
𑌅𑌮𑍀 𑌪𑌵𑌨𑌵𑌿𑌕𑍍𑌷𑌿𑌪𑍍𑌤𑌾 𑌵𑌿𑌨𑌦𑌂𑌤𑍀𑌵 𑌪𑌾𑌦𑌪𑌾𑌃 ।
𑌷𑌟𑍍𑌪𑌦𑍈𑌰𑌨𑍁𑌕𑍂𑌜𑌂𑌤𑍋 𑌵𑌨𑍇𑌷𑍁 𑌮𑌧𑍁𑌗𑌂𑌧𑌿𑌷𑍁 ॥ 1 ॥
𑌗𑌿𑌰𑌿𑌪𑍍𑌰𑌸𑍍𑌥𑍇𑌷𑍁 𑌰𑌮𑍍𑌯𑍇𑌷𑍁 𑌪𑍁𑌷𑍍𑌪𑌵𑌦𑍍𑌭𑌿𑌰𑍍𑌮𑌨𑍋𑌰𑌮𑍈𑌃 ।
𑌸𑌂𑌸𑌕𑍍𑌤𑌶𑌿𑌖𑌰𑌾𑌶𑍍𑌶𑍈𑌲𑌾 𑌵𑌿𑌰𑌾𑌜𑌂𑌤𑍇 𑌮𑌹𑌾𑌦𑍍𑌰𑍁𑌮𑍈𑌃 ॥ 1 ॥
𑌪𑍁𑌷𑍍𑌪𑌸𑌂𑌛𑌨𑍍𑌨𑌶𑌿𑌖𑌰𑌾 𑌮𑌾𑌰𑍁𑌤𑍋𑌤𑍍𑌕𑍍𑌷𑍇𑌪𑌚𑌂𑌚𑌲𑌾𑌃 ।
𑌅𑌮𑍀 𑌮𑌧𑍁𑌕𑌰𑍋𑌤𑍍𑌤𑌂𑌸𑌾𑌃 𑌪𑍍𑌰𑌗𑍀𑌤𑌾 𑌇𑌵 𑌪𑌾𑌦𑌪𑌾𑌃 ॥ 20 ॥
𑌸𑍁𑌪𑍁𑌷𑍍𑌪𑌿𑌤𑌾𑌂𑌸𑍍𑌤𑍁 𑌪𑌶𑍍𑌯𑍇𑌮𑌾𑌨𑍍𑌕𑌰𑍍𑌣𑌿𑌕𑌾𑌰𑌾𑌂𑌤𑍍𑌸𑌮𑌂𑌤𑌤𑌃 ।
𑌹𑌾𑌟𑌕𑌪𑍍𑌰𑌤𑌿𑌸𑌂𑌛𑌨𑍍𑌨𑌾𑌨𑍍𑌨𑌰𑌾𑌨𑍍𑌪𑍀𑌤𑌾𑌂𑌬𑌰𑌾𑌨𑌿𑌵 ॥ 21 ॥
𑌅𑌯𑌂 𑌵𑌸𑌂𑌤𑌸𑍍𑌸𑍌𑌮𑌿𑌤𑍍𑌰𑍇 𑌨𑌾𑌨𑌾𑌵𑌿𑌹𑌗𑌨𑌾𑌦𑌿𑌤𑌃 ।
𑌸𑍀𑌤𑌯𑌾 𑌵𑌿𑌪𑍍𑌰𑌹𑍀𑌨𑌸𑍍𑌯 𑌶𑍋𑌕𑌸𑌂𑌦𑍀𑌪𑌨𑍋 𑌮𑌮 ॥ 22 ॥
𑌮𑌾𑌂 𑌹𑌿 𑌶𑍋𑌕𑌸𑌮𑌾𑌕𑍍𑌰𑌾𑌂𑌤𑌂 𑌸𑌂𑌤𑌾𑌪𑌯𑌤𑌿 𑌮𑌨𑍍𑌮𑌥𑌃 ।
𑌹𑍃𑌷𑍍𑌟𑌃 𑌪𑍍𑌰𑌵𑌦𑌮𑌾𑌨𑌶𑍍𑌚 𑌮𑌮𑌾𑌹𑍍𑌵𑌯𑌤𑌿 𑌕𑍋𑌕𑌿𑌲𑌃 ॥ 23 ॥
𑌏𑌷 𑌦𑌾𑌤𑍍𑌯𑍂𑌹𑌕𑍋 𑌹𑍃𑌷𑍍𑌟𑍋 𑌰𑌮𑍍𑌯𑍇 𑌮𑌾𑌂 𑌵𑌨𑌨𑌿𑌰𑍍𑌝𑌰𑍇 ।
𑌪𑍍𑌰𑌣𑌦𑌨𑍍𑌮𑌨𑍍𑌮𑌥𑌾𑌵𑌿𑌷𑍍𑌟𑌂 𑌶𑍋𑌚𑌯𑌿𑌷𑍍𑌯𑌤𑌿 𑌲𑌕𑍍𑌷𑍍𑌮𑌣 ॥ 24 ॥
𑌶𑍍𑌰𑍁𑌤𑍍𑌵𑍈𑌤𑌸𑍍𑌯 𑌪𑍁𑌰𑌾 𑌶𑌬𑍍𑌦𑌮𑌾𑌶𑍍𑌰𑌮𑌸𑍍𑌥𑌾 𑌮𑌮 𑌪𑍍𑌰𑌿𑌯𑌾 ।
𑌮𑌾𑌮𑌾𑌹𑍂𑌯 𑌪𑍍𑌰𑌮𑍁𑌦𑌿𑌤𑌾𑌃 𑌪𑌰𑌮𑌂 𑌪𑍍𑌰𑌤𑍍𑌯𑌨𑌂𑌦𑌤 ॥ 25 ॥
𑌏𑌵𑌂 𑌵𑌿𑌚𑌿𑌤𑍍𑌰𑌾𑌃 𑌪𑌤𑌗𑌾 𑌨𑌾𑌨𑌾𑌰𑌾𑌵𑌵𑌿𑌰𑌾𑌵𑌿𑌣𑌃 ।
𑌵𑍃𑌕𑍍𑌷𑌗𑍁𑌲𑍍𑌮𑌲𑌤𑌾𑌃 𑌪𑌶𑍍𑌯 𑌸𑌂𑌪𑌤𑌂𑌤𑌿 𑌸𑌮𑌂𑌤𑌤𑌃 ॥ 26 ॥
𑌵𑌿𑌮𑌿𑌶𑍍𑌰𑌾 𑌵𑌿𑌹𑌗𑌾𑌃 𑌪𑍁𑌂𑌭𑌿𑌰𑌾𑌤𑍍𑌮𑌵𑍍𑌯𑍂𑌹𑌾𑌭𑌿𑌨𑌂𑌦𑌿𑌤𑌾𑌃 ।
𑌭𑍃𑌂𑌗𑌰𑌾𑌜𑌪𑍍𑌰𑌮𑍁𑌦𑌿𑌤𑌾𑌸𑍍𑌸𑍌𑌮𑌿𑌤𑍍𑌰𑍇 𑌮𑌧𑍁𑌰𑌸𑍍𑌵𑌨𑌾𑌃 ॥ 2 ॥
𑌦𑌾𑌤𑍍𑌯𑍂𑌹𑌰𑌤𑌿𑌵𑌿𑌕𑍍𑌰𑌂𑌦𑍈𑌃 𑌪𑍁𑌂𑌸𑍍𑌕𑍋𑌕𑌿𑌲𑌰𑍁𑌤𑍈𑌰𑌪𑌿 ।
𑌸𑍍𑌵𑌨𑌂𑌤𑌿 𑌪𑌾𑌦𑌪𑌾𑌶𑍍𑌚𑍇𑌮𑍇 𑌮𑌮𑌾𑌨𑌂𑌗𑌪𑍍𑌰𑌦𑍀𑌪𑌨𑌾𑌃 ॥ 2 ॥
𑌅𑌶𑍋𑌕𑌸𑍍𑌤𑌬𑌕𑌾𑌂𑌗𑌾𑌰𑌷𑍍𑌷𑌟𑍍𑌪𑌦𑌸𑍍𑌵𑌨𑌨𑌿𑌃𑌸𑍍𑌵𑌨𑌃 ।
𑌮𑌾𑌂 𑌹𑌿 𑌪𑌲𑍍𑌲𑌵𑌤𑌾𑌮𑍍𑌰𑌾𑌰𑍍𑌚𑌿𑌰𑍍𑌵𑌸𑌂𑌤𑌾𑌗𑍍𑌨𑌿𑌃 𑌪𑍍𑌰𑌧𑌕𑍍𑌷𑍍𑌯𑌤𑌿 ॥ 2 ॥
𑌨 𑌹𑌿 𑌤𑌾𑌂 𑌸𑍂𑌕𑍍𑌷𑍍𑌮𑌪𑌕𑍍𑌷𑍍𑌮𑌾𑌕𑍍𑌷𑍀𑌂 𑌸𑍁𑌕𑍇𑌶𑍀𑌂 𑌮𑍃𑌦𑍁𑌭𑌾𑌷𑌿𑌣𑍀𑌮𑍍 ।
𑌅𑌪𑌶𑍍𑌯𑌤𑍋 𑌮𑍇 𑌸𑍌𑌮𑌿𑌤𑍍𑌰𑍇 𑌜𑍀𑌵𑌿𑌤𑍇𑌽𑌸𑍍𑌤𑌿 𑌪𑍍𑌰𑌯𑍋𑌜𑌨𑌮𑍍 ॥ 30 ॥
𑌅𑌯𑌂 𑌹𑌿 𑌦𑌯𑌿𑌤𑌸𑍍𑌤𑌸𑍍𑌯𑌾𑌃 𑌕𑌾𑌲𑍋 𑌰𑍁𑌚𑌿𑌰𑌕𑌾𑌨𑌨𑌃 ।
𑌕𑍋𑌕𑌿𑌲𑌾𑌕𑍁𑌲𑌸𑍀𑌮𑌾𑌂𑌤𑍋 𑌦𑌯𑌿𑌤𑌾𑌯𑌾 𑌮𑌮𑌾𑌨𑌘 ॥ 31 ॥
𑌮𑌨𑍍𑌮𑌥𑌾𑌽𑌯𑌾𑌸𑌸𑌂𑌭𑍂𑌤𑍋 𑌵𑌸𑌂𑌤𑌗𑍁𑌣𑌵𑌰𑍍𑌧𑌿𑌤𑌃 ।
𑌅𑌯𑌂 𑌮𑌾𑌂 𑌧𑌕𑍍𑌷𑍍𑌯𑌤𑌿 𑌕𑍍𑌷𑌿𑌪𑍍𑌰𑌂 𑌶𑍋𑌕𑌾𑌗𑍍𑌨𑌿𑌰𑍍𑌨𑌚𑌿𑌰𑌾𑌦𑌿𑌵 ॥ 32 ॥
𑌅𑌪𑌶𑍍𑌯𑌤𑌸𑍍𑌤𑌾𑌂 𑌦𑌯𑌿𑌤𑌾𑌂 𑌪𑌶𑍍𑌯𑌤𑍋 𑌰𑍁𑌚𑌿𑌰𑌦𑍍𑌰𑍁𑌮𑌾𑌨𑍍 ।
𑌮𑌮𑌾𑌯𑌮𑌾𑌤𑍍𑌮𑌪𑍍𑌰𑌭𑌵𑍋 𑌭𑍂𑌯𑌸𑍍𑌤𑍍𑌵𑌮𑍁𑌪𑌯𑌾𑌸𑍍𑌯𑌤𑌿 ॥ 33 ॥
𑌅𑌦𑍃𑌶𑍍𑌯𑌮𑌾𑌨𑌾 𑌵𑍈𑌦𑍇𑌹𑍀 𑌶𑍋𑌕𑌂 𑌵𑌰𑍍𑌧𑌯𑌤𑍇 𑌮𑌮 ।
𑌦𑍃𑌶𑍍𑌯𑌮𑌾𑌨𑍋 𑌵𑌸𑌂𑌤𑌶𑍍𑌚 𑌸𑍍𑌵𑍇𑌦𑌸𑌂𑌸𑌰𑍍𑌗𑌦𑍂𑌷𑌕𑌃 ॥ 34 ॥
𑌮𑌾𑌂 𑌹𑍍𑌯𑌦𑍍𑌯 𑌮𑍃𑌗𑌶𑌾𑌬𑌾𑌕𑍍𑌷𑍀 𑌚𑌿𑌂𑌤𑌾𑌶𑍋𑌕𑌬𑌲𑌾𑌤𑍍𑌕𑍃𑌤𑌮𑍍 ।
𑌸𑌂𑌤𑌾𑌪𑌯𑌤𑌿 𑌸𑍌𑌮𑌿𑌤𑍍𑌰𑍇 𑌕𑍍𑌰𑍂𑌰𑌶𑍍𑌚𑍈𑌤𑍍𑌰𑌵𑌨𑌾𑌨𑌿𑌲𑌃 ॥ 35 ॥
𑌅𑌮𑍀 𑌮𑌯𑍂𑌰𑌾𑌶𑍍𑌶𑍋𑌭𑌂𑌤𑍇 𑌪𑍍𑌰𑌨𑍃𑌤𑍍𑌯𑌂𑌤𑌸𑍍𑌤𑌤𑌸𑍍𑌤𑌤𑌃 ।
𑌸𑍍𑌵𑍈𑌃 𑌪𑌕𑍍𑌷𑍈𑌃 𑌪𑌵𑌨𑍋𑌦𑍍𑌧𑍂𑌤𑍈𑌰𑍍𑌗𑌵𑌾𑌕𑍍𑌷𑍈𑌃 𑌸𑍍𑌫𑌾𑌟𑌿𑌕𑍈𑌰𑌿𑌵 ॥ 36 ॥
𑌶𑌿𑌖𑌿𑌨𑍀𑌭𑌿𑌃 𑌪𑌰𑌿𑌵𑍃𑌤𑌾𑌸𑍍𑌤𑍇 𑌏𑌤𑍇 𑌮𑌦𑌮𑍂𑌰𑍍𑌛𑌿𑌤𑌾𑌃 ।
𑌮𑌨𑍍𑌮𑌥𑌾𑌭𑌿𑌪𑌰𑍀𑌤𑌸𑍍𑌯 𑌮𑌮 𑌮𑌨𑍍𑌮𑌥𑌵𑌰𑍍𑌧𑌨𑌾𑌃 ॥ 3 ॥
𑌪𑌶𑍍𑌯 𑌲𑌕𑍍𑌷𑍍𑌮𑌣 𑌨𑍃𑌤𑍍𑌯𑌂𑌤𑌂 𑌮𑌯𑍂𑌰𑌮𑍁𑌪𑌨𑍃𑌤𑍍𑌯𑌤𑌿 ।
𑌶𑌿𑌖𑌿𑌨𑍀 𑌮𑌨𑍍𑌮𑌥𑌾𑌰𑍍𑌤𑍈𑌷𑌾 𑌭𑌰𑍍𑌤𑌾𑌰𑌂 𑌗𑌿𑌰𑌿𑌸𑌾𑌨𑍁𑌨𑌿 ॥ 3 ॥
𑌤𑌾𑌮𑍇𑌵 𑌮𑌨𑍍𑌮𑌥𑌾𑌵𑌿𑌷𑍍𑌟𑍋 𑌮𑌯𑍂𑌰𑍋𑌽𑌪𑍍𑌯𑍁𑌪𑌧𑌾𑌵𑌤𑌿 ।
𑌵𑌿𑌤𑌤𑍍𑌯 𑌰𑍁𑌚𑌿𑌰𑍌 𑌪𑌕𑍍𑌷𑍌 𑌰𑍁𑌤𑍈𑌰𑍁𑌪𑌹𑌸𑌨𑍍𑌨𑌿𑌵 ॥ 3 ॥
𑌮𑌯𑍂𑌰𑌸𑍍𑌯 𑌵𑌨𑍇 𑌨𑍂𑌨𑌂 𑌰𑌕𑍍𑌷𑌸𑌾 𑌨 𑌹𑍃𑌤𑌾 𑌪𑍍𑌰𑌿𑌯𑌾 ।
𑌤𑌸𑍍𑌮𑌾𑌨𑍍𑌨𑍃𑌤𑍍𑌯𑌤𑌿 𑌰𑌮𑍍𑌯𑍇𑌷𑍁 𑌵𑌨𑍇𑌷𑍁 𑌸𑌹 𑌕𑌾𑌂𑌤𑌯𑌾 ॥ 40 ॥
𑌮𑌮 𑌤𑍍𑌵𑌯𑌂 𑌵𑌿𑌨𑌾 𑌵𑌾𑌸𑌃 𑌪𑍁𑌷𑍍𑌪𑌮𑌾𑌸𑍇 𑌸𑍁𑌦𑍁𑌸𑍍𑌸𑌹𑌃 ।
𑌪𑌶𑍍𑌯 𑌲𑌕𑍍𑌷𑍍𑌮𑌣 𑌸𑌂𑌰𑌾𑌗𑌃 𑌤𑌿𑌰𑍍𑌯𑌗𑍍𑌯𑍋𑌨𑌿𑌗𑌤𑍇𑌷𑍍𑌵𑌪𑌿 ।
𑌯𑌦𑍇𑌷𑌾 𑌶𑌿𑌖𑌿𑌨𑍀 𑌕𑌾𑌮𑌾𑌦𑍍𑌭𑌰𑍍𑌤𑌾𑌰𑌂 𑌰𑌮𑌤𑍇𑌽𑌂𑌤𑌿𑌕𑍇 ॥ 41 ॥
𑌮𑌾𑌮𑌪𑍍𑌯𑍇𑌵𑌂 𑌵𑌿𑌶𑌾𑌲𑌾𑌕𑍍𑌷𑍀 𑌜𑌾𑌨𑌕𑍀 𑌜𑌾𑌤𑌸𑌂𑌭𑍍𑌰𑌮𑌾 ।
𑌮𑌦𑌨𑍇𑌨𑌾𑌭𑌿𑌵𑌰𑍍𑌤𑍇𑌤 𑌯𑌦𑌿 𑌨𑌾𑌽𑌪𑌹𑍃𑌤𑌾 𑌭𑌵𑍇𑌤𑍍 ॥ 42 ॥
𑌪𑌶𑍍𑌯 𑌲𑌕𑍍𑌷𑍍𑌮𑌣 𑌪𑍁𑌷𑍍𑌪𑌾𑌣𑌿 𑌨𑌿𑌷𑍍𑌫𑌲𑌾𑌨𑌿 𑌭𑌵𑌂𑌤𑌿 𑌮𑍇 ।
𑌪𑍁𑌷𑍍𑌪𑌭𑌾𑌰𑌸𑌮𑍃𑌦𑍍𑌧𑌾𑌨𑌾𑌂 𑌵𑌨𑌾𑌨𑌾𑌂 𑌶𑌿𑌶𑌿𑌰𑌾𑌤𑍍𑌯𑌯𑍇 ॥ 43 ॥
𑌰𑍁𑌚𑌿𑌰𑌾𑌣𑍍𑌯𑌪𑌿 𑌪𑍁𑌷𑍍𑌪𑌾𑌣𑌿 𑌪𑌾𑌦𑌪𑌾𑌨𑌾𑌮𑌤𑌿𑌶𑍍𑌰𑌿𑌯𑌾 ।
𑌨𑌿𑌷𑍍𑌫𑌲𑌾𑌨𑌿 𑌮𑌹𑍀𑌂 𑌯𑌾𑌂𑌤𑌿 𑌸𑌮𑌂 𑌮𑌧𑍁𑌕𑌰𑍋𑌤𑍍𑌕𑌰𑍈𑌃 ॥ 44 ॥
𑌨𑌦𑌂𑌤𑌿 𑌕𑌾𑌮𑌂 𑌶𑌕𑍁𑌨𑌾 𑌮𑍁𑌦𑌿𑌤𑌾𑌸𑍍𑌸𑌂𑌘𑌶𑌃 𑌕𑌲𑌮𑍍 ।
𑌆𑌹𑍍𑌵𑌯𑌂𑌤 𑌇𑌵𑌾𑌨𑍍𑌯𑍋𑌨𑍍𑌯𑌂 𑌕𑌾𑌮𑍋𑌨𑍍𑌮𑌾𑌦𑌕𑌰𑌾 𑌮𑌮 ॥ 45 ॥
𑌵𑌸𑌂𑌤𑍋 𑌯𑌦𑌿 𑌤𑌤𑍍𑌰𑌾𑌪𑌿 𑌯𑌤𑍍𑌰 𑌮𑍇 𑌵𑌸𑌤𑌿 𑌪𑍍𑌰𑌿𑌯𑌾 ।
𑌨𑍂𑌨𑌂 𑌪𑌰𑌵𑌶𑌾 𑌸𑍀𑌤𑌾 𑌸𑌾𑌪𑌿 𑌶𑍋𑌚𑌤𑍍𑌯𑌹𑌂 𑌯𑌥𑌾 ॥ 46 ॥
𑌨𑍂𑌨𑌂 𑌨 𑌤𑍁 𑌵𑌸𑌂𑌤𑍋𑌽𑌤𑌂 𑌦𑍇𑌶𑌂 𑌸𑍍𑌪𑍃𑌶𑌤𑌿 𑌯𑌤𑍍𑌰 𑌸𑌾 ।
𑌕𑌥𑌂 𑌹𑍍𑌯𑌸𑌿𑌤𑌪𑌦𑍍𑌮𑌾𑌕𑍍𑌷𑍀 𑌵𑌰𑍍𑌤𑌯𑍇𑌤𑍍𑌸𑌾 𑌮𑌯𑌾 𑌵𑌿𑌨𑌾 ॥ 4 ॥
𑌅𑌥𑌵𑌾 𑌵𑌰𑍍𑌤𑌤𑍇 𑌤𑌤𑍍𑌰 𑌵𑌸𑌂𑌤𑍋 𑌯𑌤𑍍𑌰 𑌮𑍇 𑌪𑍍𑌰𑌿𑌯𑌾 ।
𑌕𑌿𑌂 𑌕𑌰𑌿𑌷𑍍𑌯𑌤𑌿 𑌸𑍁𑌶𑍍𑌰𑍋𑌣𑍀 𑌸𑌾 𑌤𑍁 𑌨𑌿𑌰𑍍𑌭𑌰𑍍𑌤𑍍𑌸𑌿𑌤𑌾 𑌪𑌰𑍈𑌃 ॥ 4 ॥
𑌶𑍍𑌯𑌾𑌮𑌾 𑌪𑌦𑍍𑌮𑌪𑌲𑌾𑌶𑌾𑌕𑍍𑌷𑍀 𑌮𑍃𑌦𑍁𑌪𑍂𑌰𑍍𑌵𑌾𑌭𑌿𑌭𑌾𑌷𑌿𑌣𑍀 ।
𑌨𑍂𑌨𑌂 𑌵𑌸𑌂𑌤𑌮𑌾𑌸𑌾𑌦𑍍𑌯 𑌪𑌰𑌿𑌤𑍍𑌯𑌕𑍍𑌷𑍍𑌯𑌤𑌿 𑌜𑍀𑌵𑌿𑌤𑌮𑍍 ॥ 4 ॥
𑌦𑍃𑌢𑌂 𑌹𑌿 𑌹𑍃𑌦𑌯𑍇 𑌬𑍁𑌦𑍍𑌧𑌿𑌰𑍍𑌮𑌮 𑌸𑌂𑌪𑌰𑌿𑌵𑌰𑍍𑌤𑌤𑍇 ।
𑌨𑌾𑌲𑌂 𑌵𑌰𑍍𑌤𑌯𑌿𑌤𑍁𑌂 𑌸𑍀𑌤𑌾 𑌸𑌾𑌧𑍍𑌵𑍀 𑌮𑌦𑍍𑌵𑌿𑌰𑌹𑌂 𑌗𑌤𑌾 ॥ 50 ॥
𑌮𑌯𑌿 𑌭𑌾𑌵𑌸𑍍𑌤𑍁 𑌵𑍈𑌦𑍇𑌹𑍍𑌯𑌾𑌸𑍍𑌤𑌤𑍍𑌤𑍍𑌵𑌤𑍋 𑌵𑌿𑌨𑌿𑌵𑍇𑌶𑌿𑌤𑌃 ।
𑌮𑌮𑌾𑌪𑌿 𑌭𑌾𑌵𑌸𑍍𑌸𑍀𑌤𑌾𑌯𑌾𑌂 𑌸𑌰𑍍𑌵𑌥𑌾 𑌵𑌿𑌨𑌿𑌵𑍇𑌶𑌿𑌤𑌃 ॥ 51 ॥
𑌏𑌷 𑌪𑍁𑌷𑍍𑌪𑌵𑌹𑍋 𑌵𑌾𑌯𑍁𑌸𑍍𑌸𑍁𑌖𑌸𑍍𑌪𑌰𑍍𑌶𑍋 𑌹𑌿𑌮𑌾𑌵𑌹𑌃 ।
𑌤𑌾𑌂 𑌵𑌿𑌚𑌿𑌂𑌤𑌯𑌤𑌃 𑌕𑌾𑌂𑌤𑌾𑌂 𑌪𑌾𑌵𑌕𑌪𑍍𑌰𑌤𑌿𑌮𑍋 𑌮𑌮 ॥ 52 ॥
𑌸𑌦𑌾 𑌸𑍁𑌖𑌮𑌹𑌂 𑌮𑌨𑍍𑌯𑍇 𑌯𑌂 𑌪𑍁𑌰𑌾 𑌸𑌹 𑌸𑍀𑌤𑌯𑌾 ।
𑌮𑌾𑌰𑍁𑌤𑌸𑍍𑌸 𑌵𑌿𑌨𑌾 𑌸𑍀𑌤𑌾𑌂 𑌶𑍋𑌕𑌂 𑌵𑌰𑍍𑌧𑌯𑌤𑍇 𑌮𑌮 ॥ 53 ॥
𑌤𑌾𑌂 𑌵𑌿𑌨𑌾 𑌵𑌿𑌹𑌂𑌗𑍋 𑌯𑌃 𑌪𑌕𑍍𑌷𑍀 𑌪𑍍𑌰𑌣𑌦𑌿𑌤𑌸𑍍𑌤𑌦𑌾 ।
𑌵𑌾𑌯𑌸𑌃 𑌪𑌾𑌦𑌪𑌗𑌤𑌃 𑌪𑍍𑌰𑌹𑍃𑌷𑍍𑌟𑌮𑌭𑌿𑌨𑌰𑍍𑌦𑌤𑌿 ॥ 54 ॥
𑌏𑌷 𑌵𑍈 𑌤𑌤𑍍𑌰 𑌵𑍈𑌦𑍇𑌹𑍍𑌯𑌾 𑌵𑌿𑌹𑌗𑌃 𑌪𑍍𑌰𑌤𑌿𑌹𑌾𑌰𑌕𑌃 ।
𑌪𑌕𑍍𑌷𑍀 𑌮𑌾𑌂 𑌤𑍁 𑌵𑌿𑌶𑌾𑌲𑌾𑌕𑍍𑌷𑍍𑌯𑌾𑌸𑍍𑌸𑌮𑍀𑌪𑌮𑍁𑌪𑌨𑍇𑌷𑍍𑌯𑌤𑌿 ॥ 55 ॥
𑌶𑍃𑌣𑍁 𑌲𑌕𑍍𑌷𑍍𑌮𑌣 𑌸𑌨𑍍𑌨𑌾𑌦𑌂 𑌵𑌨𑍇 𑌮𑌦𑍍𑌵𑌿𑌵𑌰𑍍𑌧𑌨𑌮𑍍 ।
𑌪𑍁𑌷𑍍𑌪𑌿𑌤𑌾𑌗𑍍𑌰𑍇𑌷𑍁 𑌵𑍃𑌕𑍍𑌷𑍇𑌷𑍁 𑌦𑍍𑌵𑌿𑌜𑌾𑌨𑌾𑌮𑍁𑌪𑌕𑍂𑌜𑌤𑌾𑌮𑍍 ॥ 56 ॥
𑌵𑌿𑌕𑍍𑌷𑌿𑌪𑍍𑌤𑌾𑌂 𑌪𑌵𑌨𑍇𑌨𑍈𑌤𑌾𑌮𑌸𑍌 𑌤𑌿𑌲𑌕𑌮𑌂𑌜𑌰𑍀𑌮𑍍 ।
𑌷𑌟𑍍𑌪𑌦𑌸𑍍𑌸𑌹𑌸𑌾𑌽𑌭𑍍𑌯𑍇𑌤𑌿 𑌮𑌦𑍋𑌦𑍍𑌧𑍂𑌤𑌾𑌮𑌿𑌵 𑌪𑍍𑌰𑌿𑌯𑌾𑌮𑍍 ॥ 5 ॥
𑌕𑌾𑌮𑌿𑌨𑌾𑌮𑌯𑌮𑌤𑍍𑌯𑌂𑌤𑌮𑌶𑍋𑌕𑌶𑍍𑌶𑍋𑌕𑌵𑌰𑍍𑌧𑌨𑌃 ।
𑌸𑍍𑌤𑌬𑌕𑍈𑌃 𑌪𑌵𑌨𑍋𑌤𑍍𑌕𑍍𑌷𑌿𑌪𑍍𑌤𑍈𑌸𑍍𑌤𑌰𑍍𑌜𑌯𑌨𑍍𑌨𑌿𑌵 𑌮𑌾𑌂 𑌸𑍍𑌥𑌿𑌤𑌃 ॥ 5 ॥
𑌅𑌮𑍀 𑌲𑌕𑍍𑌷𑍍𑌮𑌣 𑌦𑍃𑌶𑍍𑌯𑌂𑌤𑍇 𑌚𑍂𑌤𑌾𑌃 𑌕𑍁𑌸𑍁𑌮𑌶𑌾𑌲𑌿𑌨𑌃 ।
𑌵𑌿𑌭𑍍𑌰𑌮𑍋𑌤𑍍𑌸𑌿𑌕𑍍𑌤𑌮𑌨𑌸𑌃 𑌸𑌾𑌂𑌗𑌰𑌾𑌗𑌾 𑌨𑌰𑌾 𑌇𑌵 ॥ 5 ॥
𑌸𑍌𑌮𑌿𑌤𑍍𑌰𑍇 𑌪𑌶𑍍𑌯 𑌪𑌂𑌪𑌾𑌯𑌾𑌶𑍍𑌚𑌿𑌤𑍍𑌰𑌾𑌸𑍁 𑌵𑌨𑌰𑌾𑌜𑌿𑌷𑍁 ।
𑌕𑌿𑌨𑍍𑌨𑌰𑌾 𑌨𑌰𑌶𑌾𑌰𑍍𑌦𑍂𑌲 𑌵𑌿𑌚𑌰𑌂𑌤𑌿 𑌤𑌤𑌸𑍍𑌤𑌤𑌃 ॥ 60 ॥
𑌇𑌮𑌾𑌨𑌿 𑌶𑍁𑌭𑌗𑌂𑌧𑍀𑌨𑌿 𑌪𑌶𑍍𑌯 𑌲𑌕𑍍𑌷𑍍𑌮𑌣 𑌸𑌰𑍍𑌵𑌶𑌃 ।
𑌨𑌲𑌿𑌨𑌾𑌨𑌿 𑌪𑍍𑌰𑌕𑌾𑌶𑌂𑌤𑍇 𑌜𑌲𑍇 𑌤𑌰𑍁𑌣𑌸𑍂𑌰𑍍𑌯𑌵𑌤𑍍 ॥ 61 ॥
𑌏𑌷𑌾 𑌪𑍍𑌰𑌸𑌨𑍍𑌨𑌸𑌲𑌿𑌲𑌾 𑌪𑌦𑍍𑌮𑌨𑍀𑌲𑍋𑌤𑍍𑌪𑌲𑌾𑌯𑍁𑌤𑌾 ।
𑌹𑌂𑌸𑌕𑌾𑌰𑌂𑌡𑌵𑌾𑌕𑍀𑌰𑍍𑌣𑌾 𑌪𑌂𑌪𑌾 𑌸𑍌𑌗𑌂𑌧𑌿𑌕𑌾𑌨𑍍𑌵𑌿𑌤𑌾 ॥ 62 ॥
𑌜𑌲𑍇 𑌤𑌰𑍁𑌣𑌸𑍂𑌰𑍍𑌯𑌾𑌭𑍈𑌷𑍍𑌷𑌟𑍍𑌪𑌦𑌾𑌹𑌤𑌕𑍇𑌸𑌰𑍈𑌃 ।
𑌪𑌂𑌕𑌜𑍈𑌶𑍍𑌶𑍋𑌭𑌤𑍇 𑌪𑌂𑌪𑌾 𑌸𑌮𑌂𑌤𑌾𑌦𑌭𑌿𑌸𑌂𑌵𑍃𑌤𑌾 ॥ 63 ॥
𑌚𑌕𑍍𑌰𑌵𑌾𑌕𑌯𑍁𑌤𑌾 𑌨𑌿𑌤𑍍𑌯𑌂 𑌚𑌿𑌤𑍍𑌰𑌪𑍍𑌰𑌸𑍍𑌤𑌵𑌨𑌾𑌂𑌤𑌰𑌾 ।
𑌮𑌾𑌤𑌂𑌗𑌮𑍃𑌗𑌯𑍂𑌥𑍈𑌶𑍍𑌚 𑌶𑍋𑌭𑌤𑍇 𑌸𑌲𑌿𑌲𑌾𑌰𑍍𑌥𑌿𑌭𑌿𑌃 ॥ 64 ॥
𑌪𑌵𑌨𑌾𑌹𑌤𑌵𑍇𑌗𑌾𑌭𑌿𑌰𑍂𑌰𑍍𑌮𑌿𑌭𑌿𑌰𑍍𑌵𑌿𑌮𑌲𑍇𑌽𑌂𑌭𑌸𑌿 ।
𑌪𑌂𑌕𑌜𑌾𑌨𑌿 𑌵𑌿𑌰𑌾𑌜𑌂𑌤𑍇 𑌤𑌾𑌡𑍍𑌯𑌮𑌾𑌨𑌾𑌨𑌿 𑌲𑌕𑍍𑌷𑍍𑌮𑌣 ॥ 65 ॥
𑌪𑌦𑍍𑌮𑌪𑌤𑍍𑌰𑌵𑌿𑌶𑌾𑌲𑌾𑌕𑍍𑌷𑍀𑌂 𑌸𑌤𑌤𑌂 𑌪𑌂𑌕𑌜𑌪𑍍𑌰𑌿𑌯𑌾𑌮𑍍 ।
𑌅𑌪𑌶𑍍𑌯𑌤𑍋 𑌮𑍇 𑌵𑍈𑌦𑍇𑌹𑍀𑌂 𑌜𑍀𑌵𑌿𑌤𑌂 𑌨𑌾𑌭𑌿𑌰𑍋𑌚𑌤𑍇 ॥ 66 ॥
𑌅𑌹𑍋 𑌕𑌾𑌮𑌸𑍍𑌯 𑌵𑌾𑌮𑌤𑍍𑌵𑌂 𑌯𑍋 𑌗𑌤𑌾𑌮𑌪𑌿 𑌦𑍁𑌰𑍍𑌲𑌭𑌾𑌮𑍍 ।
𑌸𑍍𑌮𑌾𑌰𑌯𑌿𑌷𑍍𑌯𑌤𑌿 𑌕𑌲𑍍𑌯𑌾𑌣𑍀𑌂 𑌕𑌲𑍍𑌯𑌾𑌣𑌤𑌰𑌵𑌾𑌦𑌿𑌨𑍀𑌮𑍍 ॥ 6 ॥
𑌶𑌕𑍍𑌯𑍋 𑌧𑌾𑌰𑌯𑌿𑌤𑍁𑌂 𑌕𑌾𑌮𑍋 𑌭𑌵𑍇𑌦𑌭𑍍𑌯𑌾𑌗𑌤𑍋 𑌮𑌯𑌾 ।
𑌯𑌦𑌿 𑌭𑍂𑌯𑍋 𑌵𑌸𑌂𑌤𑍋 𑌮𑌾𑌂 𑌨 𑌹𑌨𑍍𑌯𑌾𑌤𑍍𑌪𑍁𑌷𑍍𑌪𑌿𑌤𑌦𑍍𑌰𑍁𑌮𑌃 ॥ 6 ॥
𑌯𑌾𑌨𑌿 𑌸𑍍𑌮 𑌰𑌮𑌣𑍀𑌯𑌾𑌨𑌿 𑌤𑌯𑌾 𑌸𑌹 𑌭𑌵𑌂𑌤𑌿 𑌮𑍇 ।
𑌤𑌾𑌨𑍍𑌯𑍇𑌵𑌾𑌰𑌮𑌣𑍀𑌯𑌾𑌨𑌿 𑌜𑌾𑌯𑌂𑌤𑍇 𑌮𑍇 𑌤𑌯𑌾 𑌵𑌿𑌨𑌾 ॥ 6 ॥
𑌪𑌦𑍍𑌮𑌕𑍋𑌶𑌪𑌲𑌾𑌶𑌾𑌨𑌿 𑌦𑍍𑌰𑌷𑍍𑌟𑍁𑌂 𑌦𑍃𑌷𑍍𑌟𑌿𑌰𑍍𑌹𑌿 𑌮𑌨𑍍𑌯𑌤𑍇 ।
𑌸𑍀𑌤𑌾𑌯𑌾 𑌨𑍇𑌤𑍍𑌰𑌕𑍋𑌶𑌾𑌭𑍍𑌯𑌾𑌂 𑌸𑌦𑍃𑌶𑌾𑌨𑍀𑌤𑌿 𑌲𑌕𑍍𑌷𑍍𑌮𑌣 ॥ 0 ॥
𑌪𑌦𑍍𑌮𑌕𑍇𑌸𑌰𑌸𑌂𑌸𑍃𑌷𑍍𑌟𑍋 𑌵𑍃𑌕𑍍𑌷𑌾𑌂𑌤𑌰𑌵𑌿𑌨𑌿𑌸𑍍𑌸𑍃𑌤𑌃 ।
𑌨𑌿𑌶𑍍𑌶𑍍𑌵𑌾𑌸 𑌇𑌵 𑌸𑍀𑌤𑌾𑌯𑌾 𑌵𑌾𑌤𑌿 𑌵𑌾𑌯𑍁𑌰𑍍𑌮𑌨𑍋𑌹𑌰𑌃 ॥ 1 ॥
𑌸𑍌𑌮𑌿𑌤𑍍𑌰𑍇 𑌪𑌶𑍍𑌯 𑌪𑌂𑌪𑌾𑌯𑌾 𑌦𑌕𑍍𑌷𑌿𑌣𑍇 𑌗𑌿𑌰𑌿𑌸𑌾𑌨𑍁𑌨𑌿 ।
𑌪𑍁𑌷𑍍𑌪𑌿𑌤𑌾𑌂 𑌕𑌰𑍍𑌣𑌿𑌕𑌾𑌰𑌸𑍍𑌯 𑌯𑌷𑍍𑌟𑌿𑌂 𑌪𑌰𑌮𑌶𑍋𑌭𑌨𑌾𑌮𑍍 ॥ 2 ॥
𑌅𑌧𑌿𑌕𑌂 𑌶𑍈𑌲𑌰𑌾𑌜𑍋𑌽𑌯𑌂 𑌧𑌾𑌤𑍁𑌭𑌿𑌃 𑌸𑍁𑌵𑌿𑌭𑍂𑌷𑌿𑌤𑌃 ।
𑌵𑌿𑌚𑌿𑌤𑍍𑌰𑌂 𑌸𑍃𑌜𑌤𑍇 𑌰𑍇𑌣𑍁𑌂 𑌵𑌾𑌯𑍁𑌵𑍇𑌗𑌵𑌿𑌘𑌟𑍍𑌟𑌿𑌤𑌮𑍍 ॥ 3 ॥
𑌗𑌿𑌰𑌿𑌪𑍍𑌰𑌸𑍍𑌥𑌾𑌸𑍍𑌤𑍁 𑌸𑍌𑌮𑌿𑌤𑍍𑌰𑍇 𑌸𑌰𑍍𑌵𑌤𑌸𑍍𑌸𑌂𑌪𑍍𑌰𑌪𑍁𑌷𑍍𑌪𑌿𑌤𑍈𑌃 ।
𑌨𑌿𑌷𑍍𑌪𑌤𑍍𑌰𑍈𑌸𑍍𑌸𑌰𑍍𑌵𑌤𑍋 𑌰𑌮𑍍𑌯𑍈𑌃 𑌪𑍍𑌰𑌦𑍀𑌪𑍍𑌤𑌾 𑌇𑌵 𑌕𑌿𑌂𑌶𑍁𑌕𑍈𑌃 ॥ 4 ॥
𑌪𑌂𑌪𑌾𑌤𑍀𑌰𑌰𑍁𑌹𑌾𑌶𑍍𑌚𑍇𑌮𑍇 𑌸𑌂𑌸𑌕𑍍𑌤𑌾 𑌮𑌧𑍁𑌗𑌂𑌧𑌿𑌨𑌃 ।
𑌮𑌾𑌲𑌤𑍀𑌮𑌲𑍍𑌲𑌿𑌕𑌾𑌷𑌂𑌡𑌾𑌃 𑌕𑌰𑌵𑍀𑌰𑌾𑌶𑍍𑌚 𑌪𑍁𑌷𑍍𑌪𑌿𑌤𑌾𑌃 ॥ 5 ॥
𑌕𑍇𑌤𑌕𑍍𑌯𑌸𑍍𑌸𑌿𑌂𑌦𑍁𑌵𑌾𑌰𑌾𑌶𑍍𑌚 𑌵𑌾𑌸𑌂𑌤𑍍𑌯𑌶𑍍𑌚 𑌸𑍁𑌪𑍁𑌷𑍍𑌪𑌿𑌤𑌾𑌃 ।
𑌮𑌾𑌧𑌵𑍍𑌯𑍋 𑌗𑌂𑌧𑌪𑍂𑌰𑍍𑌣𑌾𑌶𑍍𑌚 𑌕𑍁𑌂𑌦𑌗𑍁𑌲𑍍𑌮𑌾𑌶𑍍𑌚 𑌸𑌰𑍍𑌵𑌶𑌃 ॥ 6 ॥
𑌚𑌿𑌰𑌿𑌬𑌿𑌲𑍍𑌵𑌾 𑌮𑌧𑍂𑌕𑌾𑌶𑍍𑌚 𑌵𑌂𑌜𑍁𑌲𑌾 𑌵𑌕𑍁𑌲𑌾𑌸𑍍𑌤𑌥𑌾 ।
𑌚𑌂𑌪𑌕𑌾𑌸𑍍𑌤𑌿𑌲𑌕𑌾𑌶𑍍𑌚𑍈𑌵 𑌨𑌾𑌗𑌵𑍃𑌕𑍍𑌷𑌾𑌸𑍍𑌸𑍁𑌪𑍁𑌷𑍍𑌪𑌿𑌤𑌾𑌃 ॥ ॥
𑌨𑍀𑌪𑌾𑌶𑍍𑌚 𑌵𑌰𑌣𑌾𑌶𑍍𑌚𑍈𑌵 𑌖𑌰𑍍𑌜𑍂𑌰𑌾𑌶𑍍𑌚 𑌸𑍁𑌪𑍁𑌷𑍍𑌪𑌿𑌤𑌾 ।
𑌪𑌦𑍍𑌮𑌕𑌾𑌶𑍍𑌚𑍈𑌵 𑌶𑍋𑌭𑌂𑌤𑍇 𑌨𑍀𑌲𑌾𑌶𑍋𑌕𑌾𑌶𑍍𑌚 𑌪𑍁𑌷𑍍𑌪𑌿𑌤𑌾𑌃 ।
𑌲𑍋𑌧𑍍𑌰𑌾𑌶𑍍𑌚 𑌗𑌿𑌰𑌿𑌪𑍃𑌷𑍍𑌠𑍇𑌷𑍁 𑌸𑌿𑌂𑌹𑌕𑍇𑌸𑌰𑌪𑌿𑌂𑌜𑌰𑌾𑌃 ॥ ॥
𑌅𑌂𑌕𑍋𑌲𑌾𑌶𑍍𑌚 𑌕𑍁𑌰𑌂𑌟𑌾𑌶𑍍𑌚 𑌚𑍂𑌰𑍍𑌣𑌕𑌾𑌃 𑌪𑌾𑌰𑌿𑌭𑌦𑍍𑌰𑌕𑌾𑌃 ।
𑌚𑍂𑌤𑌾𑌃 𑌪𑌾𑌟𑌲𑌯𑌶𑍍𑌚𑍈𑌵 𑌕𑍋𑌵𑌿𑌦𑌾𑌰𑌾𑌶𑍍𑌚 𑌪𑍁𑌷𑍍𑌪𑌿𑌤𑌾𑌃 ॥ ॥
𑌮𑍁𑌚𑍁𑌕𑍁𑌂𑌦𑌾𑌰𑍍𑌜𑍁𑌨𑌾𑌶𑍍𑌚𑍈𑌵 𑌦𑍃𑌶𑍍𑌯𑌂𑌤𑍇 𑌗𑌿𑌰𑌿𑌸𑌾𑌨𑍁𑌷𑍁 ।
𑌕𑍇𑌤𑌕𑍋𑌦𑍍𑌦𑌾𑌲𑌕𑌾𑌶𑍍𑌚𑍈𑌵 𑌶𑌿𑌰𑍀𑌷𑌾𑌃 𑌶𑌿𑌂𑌶𑍁𑌪𑌾 𑌧𑌵𑌾𑌃 ॥ 0 ॥
𑌶𑌾𑌲𑍍𑌮𑌲𑍍𑌯𑌃 𑌕𑌿𑌂𑌶𑍁𑌕𑌾𑌶𑍍𑌚𑍈𑌵 𑌰𑌕𑍍𑌤𑌾𑌃 𑌕𑍁𑌰𑌵𑌕𑌾𑌸𑍍𑌤𑌥𑌾 ॥ 1 ॥
𑌤𑍍𑌰𑌿𑌨𑌿𑌶𑌾 𑌨𑌕𑍍𑌤𑌮𑌾𑌲𑌾𑌶𑍍𑌚 𑌚𑌂𑌦𑌨𑌾𑌸𑍍𑌸𑍍𑌯𑌂𑌦𑌨𑌾𑌸𑍍𑌤𑌥𑌾 ।
𑌪𑍁𑌷𑍍𑌪𑌿𑌤𑌾𑌨𑍍𑌪𑍁𑌷𑍍𑌪𑌿𑌤𑌾𑌗𑍍𑌰𑌾𑌭𑌿𑌰𑍍𑌲𑌤𑌾𑌭𑌿𑌃 𑌪𑌰𑌿𑌵𑍇𑌷𑍍𑌟𑌿𑌤𑌾𑌨𑍍 ।
𑌦𑍍𑌰𑍁𑌮𑌾𑌨𑍍𑌪𑌶𑍍𑌯𑍇𑌹 𑌸𑍌𑌮𑌿𑌤𑍍𑌰𑍇 𑌪𑌂𑌪𑌾𑌯𑌾 𑌰𑍁𑌚𑌿𑌰𑌾𑌨𑍍𑌬𑌹𑍂𑌨𑍍 ॥ 2 ॥
𑌵𑌾𑌤𑌵𑌿𑌕𑍍𑌷𑌿𑌪𑍍𑌤𑌵𑌿𑌟𑌪𑌾𑌨𑍍𑌯𑌥𑌾𑌽𑌸𑌨𑍍𑌨𑌾𑌂𑌦𑍍𑌰𑍁𑌮𑌾𑌨𑌿𑌮𑌾𑌨𑍍 ।
𑌲𑌤𑌾𑌸𑍍𑌸𑌮𑌨𑍁𑌵𑌰𑍍𑌤𑌂𑌤𑍇 𑌮𑌤𑍍𑌤𑌾 𑌇𑌵 𑌵𑌰𑌸𑍍𑌤𑍍𑌰𑌿𑌯𑌃 ॥ 3 ॥
𑌪𑌾𑌦𑌪𑌾𑌤𑍍𑌪𑌾𑌦𑌪𑌂 𑌗𑌚𑍍𑌛𑌨𑍍 𑌶𑍈𑌲𑌾𑌚𑍍𑌛𑍈𑌲𑌂 𑌵𑌨𑌾𑌦𑍍𑌵𑌨𑌮𑍍 ।
𑌵𑌾𑌤𑌿 𑌨𑍈𑌕𑌰𑌸𑌾𑌸𑍍𑌵𑌾𑌦𑌸𑍍𑌸𑌮𑍍𑌮𑍋𑌦𑌿𑌤 𑌇𑌵𑌾𑌨𑌿𑌲𑌃 ॥ 4 ॥
𑌕𑍇𑌚𑌿𑌤𑍍𑌪𑌰𑍍𑌯𑌾𑌪𑍍𑌤𑌕𑍁𑌸𑍁𑌮𑌾𑌃 𑌪𑌾𑌦𑌪𑌾 𑌮𑌧𑍁𑌗𑌂𑌧𑌿𑌨𑌃 ।
𑌕𑍇𑌚𑌿𑌨𑍍𑌮𑍁𑌕𑍁𑌲𑌸𑌂𑌵𑍀𑌤𑌾𑌃 𑌶𑍍𑌯𑌾𑌮𑌵𑌰𑍍𑌣𑌾 𑌇𑌵𑌾𑌬𑌭𑍁𑌃 ॥ 5 ॥
𑌇𑌦𑌂 𑌮𑍃𑌷𑍍𑌟𑌮𑌿𑌦𑌂 𑌸𑍍𑌵𑌾𑌦𑍁 𑌪𑍍𑌰𑌫𑍁𑌲𑍍𑌲𑌮𑌿𑌦𑌮𑌿𑌤𑍍𑌯𑌪𑌿 ।
𑌰𑌾𑌗𑌯𑍁𑌕𑍍𑌤𑍋 𑌮𑌧𑍁𑌕𑌰𑌃 𑌕𑍁𑌸𑍁𑌮𑍇𑌷𑍍𑌵𑍇𑌵 𑌲𑍀𑌯𑌤𑍇 ॥ 6 ॥
𑌨𑌿𑌲𑍀𑌯 𑌪𑍁𑌨𑌰𑍁𑌤𑍍𑌪𑌤𑍍𑌯 𑌸𑌹𑌸𑌾𑌽𑌨𑍍𑌯𑌤𑍍𑌰 𑌗𑌚𑍍𑌛𑌤𑌿 ।
𑌮𑌧𑍁𑌲𑍁𑌬𑍍𑌧𑍋 𑌮𑌧𑍁𑌕𑌰𑌃 𑌪𑌂𑌪𑌾𑌤𑍀𑌰𑌦𑍍𑌰𑍁𑌮𑍇𑌷𑍍𑌵𑌸𑍌 ॥ ॥
𑌇𑌯𑌂 𑌕𑍁𑌸𑍁𑌮𑌸𑌂𑌘𑌾𑌤𑍈𑌰𑍁𑌪𑌸𑍍𑌤𑍀𑌰𑍍𑌣𑌾 𑌸𑍁𑌖𑌾𑌕𑍃𑌤𑌾 ।
𑌸𑍍𑌵𑌯𑌂 𑌨𑌿𑌪𑌤𑌿𑌤𑍈𑌰𑍍𑌭𑍂𑌮𑌿𑌶𑍍𑌶𑌯𑌨𑌪𑍍𑌰𑌸𑍍𑌤𑌰𑍈𑌰𑌿𑌵 ॥ ॥
𑌵𑌿𑌵𑌿𑌧𑌾 𑌵𑌿𑌵𑌿𑌧𑍈𑌃 𑌪𑍁𑌷𑍍𑌪𑍈𑌸𑍍𑌤𑍈𑌰𑍇𑌵 𑌨𑌗𑌸𑌾𑌨𑍁𑌷𑍁 ।
𑌵𑌿𑌕𑍀𑌰𑍍𑌣𑍈 𑌪𑍀𑌤𑌰𑌕𑍍𑌤𑌾𑌹𑌿 𑌸𑍌𑌮𑌿𑌤𑍍𑌰𑍇 𑌪𑍍𑌰𑌸𑍍𑌤𑌰𑌾𑌃 𑌕𑍃𑌤𑌾𑌃 ॥ ॥
𑌹𑌿𑌮𑌾𑌂𑌤𑍇 𑌪𑌶𑍍𑌯 𑌸𑍌𑌮𑌿𑌤𑍍𑌰𑍇 𑌵𑍃𑌕𑍍𑌷𑌾𑌣𑌾𑌂 𑌪𑍁𑌷𑍍𑌪𑌸𑌂𑌭𑌵𑌮𑍍 ।
𑌪𑍁𑌷𑍍𑌪𑌮𑌾𑌸𑍇 𑌹𑌿 𑌤𑌰𑌵𑌸𑍍𑌸𑌂𑌘𑌰𑍍𑌷𑌾𑌦𑌿𑌵 𑌪𑍁𑌷𑍍𑌪𑌿𑌤𑌾𑌃 ॥ 0 ॥
𑌆𑌹𑍍𑌵𑌯𑌂𑌤 𑌇𑌵𑌾𑌨𑍍𑌯𑍋𑌨𑍍𑌯𑌂 𑌨𑌗𑌾𑌷𑍍𑌷𑌟𑍍𑌪𑌦𑌨𑌾𑌦𑌿𑌤𑌾𑌃 ।
𑌕𑍁𑌸𑍁𑌮𑍋𑌤𑍍𑌤𑌂𑌸𑌵𑌿𑌟𑌪𑌾𑌶𑍍𑌶𑍋𑌭𑌂𑌤𑍇 𑌬𑌹𑍁 𑌲𑌕𑍍𑌷𑍍𑌮𑌣 ॥ 1 ॥
𑌏𑌷 𑌕𑌾𑌰𑌂𑌡𑌵𑌃 𑌪𑌕𑍍𑌷𑍀 𑌵𑌿𑌗𑌾𑌹𑍍𑌯 𑌸𑌲𑌿𑌲𑌂 𑌶𑍁𑌭𑌮𑍍 ।
𑌰𑌮𑌤𑍇 𑌕𑌾𑌂𑌤𑌯𑌾 𑌸𑌾𑌰𑍍𑌧𑌂 𑌕𑌾𑌮𑌮𑍁𑌦𑍍𑌦𑍀𑌪𑌯𑌨𑍍𑌮𑌮 ॥ 2 ॥
𑌮𑌂𑌦𑌾𑌕𑌿𑌨𑍍𑌯𑌾𑌸𑍍𑌤𑍁 𑌯𑌦𑌿𑌦𑌂 𑌰𑍂𑌪𑌮𑍇𑌵𑌂 𑌮𑌨𑍋𑌹𑌰𑌮𑍍 ।
𑌸𑍍𑌥𑌾𑌨𑍇 𑌜𑌗𑌤𑌿 𑌵𑌿𑌖𑍍𑌯𑌾𑌤𑌾 𑌗𑍁𑌣𑌾𑌸𑍍𑌤𑌸𑍍𑌯𑌾 𑌮𑌨𑍋𑌰𑌮𑌾𑌃 ॥ 3 ॥
𑌯𑌦𑌿 𑌦𑍃𑌶𑍍𑌯𑍇𑌤 𑌸𑌾 𑌸𑌾𑌧𑍍𑌵𑍀 𑌯𑌦𑌿 𑌚𑍇𑌹 𑌵𑌸𑍇𑌮𑌹𑌿 ।
𑌸𑍍𑌪𑍃𑌹𑌯𑍇𑌯𑌂 𑌨 𑌶𑌕𑍍𑌰𑌾𑌯 𑌨𑌾𑌯𑍋𑌧𑍍𑌯𑌾𑌯𑍈 𑌰𑌘𑍂𑌤𑍍𑌤𑌮 ॥ 4 ॥
𑌨𑌹𑍍𑌯𑍇𑌵𑌂 𑌰𑌮𑌣𑍀𑌯𑍇𑌷𑍁 𑌶𑌾𑌦𑍍𑌵𑌲𑍇𑌷𑍁 𑌤𑌯𑌾 𑌸𑌹 ।
𑌰𑌮𑌤𑍋 𑌮𑍇 𑌭𑌵𑍇𑌚𑍍𑌚𑌿𑌂𑌤𑌾 𑌨 𑌸𑍍𑌪𑍃𑌹𑌾𑌽𑌨𑍍𑌯𑍇𑌷𑍁 𑌵𑌾 𑌭𑌵𑍇𑌤𑍍 ॥ 5 ॥
𑌅𑌮𑍀 𑌹𑌿 𑌵𑌿𑌵𑌿𑌧𑍈𑌃 𑌪𑍁𑌷𑍍𑌪𑍈𑌸𑍍𑌤𑌰𑌵𑍋 𑌰𑍁𑌚𑌿𑌰𑌚𑍍𑌛𑌦𑌾𑌃 ।
𑌕𑌾𑌨𑌨𑍇𑌽𑌽𑌸𑍍𑌮𑌿𑌨𑍍𑌵𑌿𑌨𑌾 𑌕𑌾𑌂𑌤𑌾𑌂 𑌚𑌿𑌂𑌤𑌾𑌮𑍁𑌤𑍍𑌪𑌾𑌦𑌯𑌂𑌤𑌿 𑌮𑍇 ॥ 6 ॥
𑌪𑌶𑍍𑌯 𑌶𑍀𑌤𑌜𑌲𑌾𑌂 𑌚𑍇𑌮𑌾𑌂 𑌸𑍌𑌮𑌿𑌤𑍍𑌰𑍇 𑌪𑍁𑌷𑍍𑌕𑌰𑌾𑌯𑍁𑌤𑌾𑌮𑍍 ।
𑌚𑌕𑍍𑌰𑌵𑌾𑌕𑌾𑌨𑍁𑌚𑌰𑌿𑌤𑌾𑌂 𑌕𑌾𑌰𑌂𑌡𑌵 𑌨𑌿𑌷𑍇𑌵𑌿𑌤𑌾𑌮𑍍 ॥ ॥
𑌪𑍍𑌲𑌵𑍈𑌃 𑌕𑍍𑌰𑍌𑌂𑌚𑍈𑌶𑍍𑌚 𑌸𑌂𑌪𑍂𑌰𑍍𑌣𑌾𑌂 𑌮𑌹𑌾𑌮𑍃𑌗𑌨𑌿𑌷𑍇𑌵𑌿𑌤𑌾𑌮𑍍 ।
𑌅𑌧𑌿𑌕𑌂 𑌶𑍋𑌭𑌤𑍇 𑌪𑌂𑌪𑌾 𑌵𑌿𑌕𑍂𑌜𑌦𑍍𑌭𑌿𑌃𑌰𑍍𑌵𑌿𑌹𑌂𑌗𑌮𑍈𑌃 ॥ ॥
𑌦𑍀𑌪𑌯𑌂𑌤𑍀𑌵 𑌮𑍇 𑌕𑌾𑌮𑌂 𑌵𑌿𑌵𑌿𑌧𑌾 𑌮𑍁𑌦𑌿𑌤𑌾 𑌦𑍍𑌵𑌿𑌜𑌾𑌃 ।
𑌶𑍍𑌯𑌾𑌮𑌾𑌂 𑌚𑌂𑌦𑍍𑌰𑌮𑍁𑌖𑍀𑌂 𑌸𑍍𑌮𑍃𑌤𑍍𑌵𑌾 𑌪𑍍𑌰𑌿𑌯𑌾𑌂 𑌪𑌦𑍍𑌮𑌨𑌿𑌭𑍇𑌕𑍍𑌷𑌣𑌾𑌮𑍍 ॥ ॥
𑌪𑌶𑍍𑌯 𑌸𑌾𑌨𑍁𑌷𑍁 𑌚𑌿𑌤𑍍𑌰𑍇𑌷𑍁 𑌮𑍃𑌗𑍀𑌭𑌿𑌸𑍍𑌸𑌹𑌿𑌤𑌾𑌨𑍍𑌮𑍃𑌗𑌾𑌨𑍍 ।
𑌮𑌾𑌂 𑌪𑍁𑌨𑌰𑍍𑌮𑍃𑌗𑌶𑌾𑌬𑌾𑌕𑍍𑌷𑍍𑌯𑌾 𑌵𑍈𑌦𑍇𑌹𑍍𑌯𑌾 𑌵𑌿𑌰𑌹𑍀𑌕𑍃𑌤𑌮𑍍 ॥ 100 ॥
𑌵𑍍𑌯𑌥𑌯𑌂𑌤𑍀𑌵 𑌮𑍇 𑌚𑌿𑌤𑍍𑌤𑌂 𑌸𑌂𑌚𑌰𑌂𑌤𑌸𑍍𑌤𑌤𑌸𑍍𑌤𑌤𑌃 ।
𑌅𑌸𑍍𑌮𑌿𑌨𑍍𑌸𑌾𑌨𑍁𑌨𑌿 𑌰𑌮𑍍𑌯𑍇 𑌹𑌿 𑌮𑌤𑍍𑌤𑌦𑍍𑌵𑌿𑌜𑌗𑌣𑌾𑌯𑍁𑌤𑍇 ।
𑌪𑌶𑍍𑌯𑍇𑌯𑌂 𑌯𑌦𑌿 𑌤𑌾𑌂 𑌕𑌾𑌂𑌤𑌾𑌂 𑌤𑌤𑌸𑍍𑌸𑍍𑌵𑌸𑍍𑌤𑌿 𑌭𑌵𑍇𑌨𑍍𑌮𑌮 ॥ 101 ॥
𑌜𑍀𑌵𑍇𑌯𑌂 𑌖𑌲𑍁 𑌸𑍌𑌮𑌿𑌤𑍍𑌰𑍇 𑌮𑌯𑌾 𑌸𑌹 𑌸𑍁𑌮𑌧𑍍𑌯𑌮𑌾 ।
𑌸𑍇𑌵𑌤𑍇 𑌯𑌦𑌿 𑌵𑍈𑌦𑍇𑌹𑍀 𑌪𑌂𑌪𑌾𑌯𑌾𑌃 𑌪𑌵𑌨𑌂 𑌸𑍁𑌖𑌮𑍍 ॥ 102 ॥
𑌪𑌦𑍍𑌮𑌸𑍌𑌗𑌂𑌧𑌿𑌕𑌵𑌹𑌂 𑌶𑌿𑌵𑌂 𑌶𑍋𑌕𑌵𑌿𑌨𑌾𑌶𑌨𑌮𑍍 ।
𑌧𑌨𑍍𑌯𑌾 𑌲𑌕𑍍𑌷𑍍𑌮𑌣 𑌸𑍇𑌵𑌂𑌤𑍇 𑌪𑌂𑌪𑍋𑌪𑌵𑌨𑌮𑌾𑌰𑍁𑌤𑌮𑍍 ॥ 103 ॥
𑌶𑍍𑌯𑌾𑌮𑌾 𑌪𑌦𑍍𑌮𑌪𑌲𑌾𑌶𑌾𑌕𑍍𑌷𑍀 𑌪𑍍𑌰𑌿𑌯𑌾 𑌵𑌿𑌰𑌹𑌿𑌤𑌾 𑌮𑌯𑌾 ।
𑌕𑌥𑌂 𑌧𑌾𑌰𑌯𑌤𑌿 𑌪𑍍𑌰𑌾𑌣𑌾𑌨𑍍𑌵𑌿𑌵𑌶𑌾 𑌜𑌨𑌕𑌾𑌤𑍍𑌮𑌜𑌾 ॥ 104 ॥
𑌕𑌿𑌨𑍍𑌨𑍁 𑌵𑌕𑍍𑌷𑍍𑌯𑌾𑌮𑌿 𑌰𑌾𑌜𑌾𑌨𑌂 𑌧𑌰𑍍𑌮𑌜𑍍𑌞𑌂 𑌸𑌤𑍍𑌯𑌵𑌾𑌦𑌿𑌨𑌮𑍍 ।
𑌸𑍀𑌤𑌾𑌯𑌾 𑌜𑌨𑌕𑌂 𑌪𑍃𑌷𑍍𑌟𑌃 𑌕𑍁𑌶𑌲𑌂 𑌜𑌨𑌸𑌂𑌸𑌦𑌿 ॥ 105 ॥
𑌯𑌾 𑌮𑌾𑌮𑌨𑍁𑌗𑌤𑌾 𑌮𑌂𑌦𑌂 𑌪𑌿𑌤𑍍𑌰𑌾 𑌪𑍍𑌰𑌵𑍍𑌰𑌾𑌜𑌿𑌤𑌂 𑌵𑌨𑌮𑍍 ।
𑌸𑍀𑌤𑌾 𑌸𑌤𑍍𑌪𑌥𑌮𑌾𑌸𑍍𑌥𑌾𑌯 𑌕𑍍𑌵 𑌨𑍁 𑌸𑌾 𑌵𑌰𑍍𑌤𑌤𑍇 𑌪𑍍𑌰𑌿𑌯𑌾 ॥ 106 ॥
𑌤𑌯𑌾 𑌵𑌿𑌹𑍀𑌨𑌃 𑌕𑍃𑌪𑌣𑌃 𑌕𑌥𑌂 𑌲𑌕𑍍𑌷𑍍𑌮𑌣 𑌧𑌾𑌰𑌯𑍇 ।
𑌯𑌾 𑌮𑌾𑌮𑌨𑍁𑌗𑌤𑌾 𑌰𑌾𑌜𑍍𑌯𑌾𑌦𑍍𑌭𑍍𑌰𑌷𑍍𑌟𑌂 𑌵𑌿𑌗𑌤𑌚𑍇𑌤𑌸𑌮𑍍 ॥ 10 ॥
𑌤𑌚𑍍𑌚𑌾𑌰𑍍𑌵𑌂𑌚𑌿𑌤𑌪𑌦𑍍𑌮𑌾𑌕𑍍𑌷𑌂 𑌸𑍁𑌗𑌂𑌧𑌿 𑌶𑍁𑌭𑌮𑌵𑍍𑌰𑌣𑌮𑍍 ।
𑌅𑌪𑌶𑍍𑌯𑌤𑍋 𑌮𑍁𑌖𑌂 𑌤𑌸𑍍𑌯𑌾𑌸𑍍𑌸𑍀𑌦𑌤𑍀𑌵 𑌮𑌨𑍋 𑌮𑌮 ॥ 10 ॥
𑌸𑍍𑌮𑌿𑌤𑌹𑌾𑌸𑍍𑌯𑌾𑌂𑌤𑌰𑌯𑍁𑌤𑌂 𑌗𑍁𑌣𑌵𑌨𑍍𑌮𑌧𑍁𑌰𑌂 𑌹𑌿𑌤𑌮𑍍 ।
𑌵𑍈𑌦𑍇𑌹𑍍𑌯𑌾 𑌵𑌾𑌕𑍍𑌯𑌮𑌤𑍁𑌲𑌂 𑌕𑌦𑌾 𑌶𑍍𑌰𑍋𑌷𑍍𑌯𑌾𑌮𑌿 𑌲𑌕𑍍𑌷𑍍𑌮𑌣 ॥ 10 ॥
𑌪𑍍𑌰𑌾𑌪𑍍𑌯 𑌦𑍁𑌖𑌂 𑌵𑌨𑍇 𑌶𑍍𑌯𑌾𑌮𑌾 𑌮𑌾𑌂 𑌮𑌨𑍍𑌮𑌥𑌵𑌿𑌕𑌰𑍍𑌶𑌿𑌤𑌮𑍍 ।
𑌨𑌷𑍍𑌟𑌦𑍁𑌃𑌖𑍇𑌵 𑌹𑍃𑌷𑍍𑌟𑍇𑌵 𑌸𑌾𑌧𑍍𑌵𑍀 𑌸𑌾𑌧𑍍𑌵𑌭𑍍𑌯𑌭𑌾𑌷𑌤 ॥ 110 ॥
𑌕𑌿𑌂 𑌨𑍁 𑌵𑌕𑍍𑌷𑍍𑌯𑌾𑌮𑌿 𑌕𑍌𑌸𑌲𑍍𑌯𑌾𑌮𑌯𑍋𑌧𑍍𑌯𑌾𑌯𑌾𑌂 𑌨𑍃𑌪𑌾𑌤𑍍𑌮𑌜 ।
𑌕𑍍𑌵 𑌸𑌾 𑌸𑍍𑌨𑍁𑌷𑍇𑌤𑌿 𑌪𑍃𑌚𑍍𑌛𑌂𑌤𑍀𑌂 𑌕𑌥𑌂 𑌚𑌾𑌪𑌿 𑌤𑍁 𑌮𑌨𑌸𑍍𑌵𑌿𑌨𑍀𑌮𑍍 ॥ 111 ॥
𑌗𑌚𑍍𑌛 𑌲𑌕𑍍𑌷𑍍𑌮𑌣 𑌪𑌶𑍍𑌯 𑌤𑍍𑌵𑌂 𑌭𑌰𑌤𑌂 𑌭𑍍𑌰𑌾𑌤𑍃𑌵𑌤𑍍𑌸𑌲𑌮𑍍 ।
𑌨 𑌹𑍍𑌯𑌹𑌂 𑌜𑍀𑌵𑌿𑌤𑍁 𑌶𑌕𑍍𑌤𑌸𑍍𑌤𑌾𑌮𑍃𑌤𑍇 𑌜𑌨𑌕𑌾𑌤𑍍𑌮𑌜𑌾𑌮𑍍 ॥ 112 ॥
𑌇𑌤𑌿 𑌰𑌾𑌮𑌂 𑌮𑌹𑌾𑌤𑍍𑌮𑌾𑌨𑌂 𑌵𑌿𑌲𑌪𑌂𑌤𑌮𑌨𑌾𑌥𑌵𑌤𑍍 ।
𑌉𑌵𑌾𑌚 𑌲𑌕𑍍𑌷𑍍𑌮𑌣𑍋 𑌭𑍍𑌰𑌾𑌤𑌾 𑌵𑌚𑌨𑌂 𑌯𑍁𑌕𑍍𑌤𑌮𑌵𑍍𑌯𑌯𑌮𑍍 ॥ 113 ॥
𑌸𑌂𑌸𑍍𑌤𑌂𑌭 𑌰𑌾𑌮 𑌭𑌦𑍍𑌰𑌂 𑌤𑍇 𑌮𑌾 𑌶𑍁𑌚𑌃 𑌪𑍁𑌰𑍁𑌷𑍋𑌤𑍍𑌤𑌮 ।
𑌨𑍇𑌦𑍃𑌶𑌾𑌨𑌾𑌂 𑌮𑌤𑌿𑌰𑍍𑌮𑌂𑌦𑌾 𑌭𑌵𑌤𑍍𑌯𑌕𑌲𑍁𑌷𑌾𑌤𑍍𑌮𑌨𑌾𑌮𑍍 ॥ 114 ॥
𑌸𑍍𑌮𑍃𑌤𑍍𑌵𑌾 𑌵𑌿𑌯𑍋𑌗𑌜𑌂 𑌦𑍁𑌃𑌖𑌂 𑌤𑍍𑌯𑌜 𑌸𑍍𑌨𑍇𑌹𑌂 𑌪𑍍𑌰𑌿𑌯𑍇 𑌜𑌨𑍇 ।
𑌅𑌤𑌿𑌸𑍍𑌨𑍇𑌹𑌪𑌰𑌿𑌷𑍍𑌵𑌂𑌗𑌾𑌦𑍍𑌵𑌰𑍍𑌤𑌿𑌰𑌾𑌰𑍍𑌦𑍍𑌰𑌾𑌪𑌿 𑌦𑌹𑍍𑌯𑌤𑍇 ॥ 115 ॥
𑌯𑌦𑌿 𑌗𑌚𑍍𑌛𑌤𑌿 𑌪𑌾𑌤𑌾𑌲𑌂 𑌤𑌤𑍋𑌽𑌭𑍍𑌯𑌧𑌿𑌕𑌮𑍇𑌵 𑌵𑌾 ।
𑌸𑌰𑍍𑌵𑌥𑌾 𑌰𑌾𑌵𑌣𑌸𑍍𑌤𑌾𑌵𑌨𑍍𑌨 𑌭𑌵𑌿𑌷𑍍𑌯𑌤𑌿 𑌰𑌾𑌘𑌵 ॥ 116 ॥
𑌪𑍍𑌰𑌵𑍃𑌤𑍍𑌤𑌿𑌰𑍍𑌲𑌭𑍍𑌯𑌤𑌾𑌂 𑌤𑌾𑌵𑌤𑍍𑌤𑌸𑍍𑌯 𑌪𑌾𑌪𑌸𑍍𑌯 𑌰𑌕𑍍𑌷𑌸𑌃 ।
𑌤𑌤𑍋 𑌹𑌾𑌸𑍍𑌯𑌤𑌿 𑌵𑌾 𑌸𑍀𑌤𑌾𑌂 𑌨𑌿𑌧𑌨𑌂 𑌵𑌾 𑌗𑌮𑌿𑌷𑍍𑌯𑌤𑌿 ॥ 11 ॥
𑌯𑌦𑌿 𑌯𑌾𑌤𑌿𑌦𑌿𑌤𑍇𑌰𑍍𑌗𑌰𑍍𑌭𑌂 𑌰𑌾𑌵𑌣𑌸𑍍𑌸𑌹 𑌸𑍀𑌤𑌯𑌾 ।
𑌤𑌤𑍍𑌰𑌾𑌪𑍍𑌯𑍇𑌨𑌂 𑌹𑌨𑌿𑌷𑍍𑌯𑌾𑌮𑌿 𑌨 𑌚𑍇𑌦𑍍𑌦𑌾𑌸𑍍𑌯𑌤𑌿 𑌮𑍈𑌥𑌿𑌲𑍀𑌮𑍍 ॥ 11 ॥
𑌸𑍍𑌵𑌾𑌸𑍍𑌥𑍍𑌯𑌂 𑌭𑌦𑍍𑌰𑌂 𑌭𑌜𑌸𑍍𑌵𑌾𑌰𑍍𑌯 𑌤𑍍𑌯𑌜𑍍𑌯𑌤𑌾𑌂 𑌕𑍃𑌪𑌣𑌾 𑌮𑌤𑌿𑌃 ।
𑌅𑌰𑍍𑌥𑍋 𑌹𑌿 𑌨𑌷𑍍𑌟𑌕𑌾𑌰𑍍𑌯𑌾𑌰𑍍𑌥𑍈𑌰𑍍𑌨𑌾𑌯𑌤𑍍𑌨𑍇𑌨𑌾𑌧𑌿𑌗𑌮𑍍𑌯𑌤𑍇 ॥ 11 ॥
𑌉𑌤𑍍𑌸𑌾𑌹𑍋 𑌬𑌲𑌵𑌾𑌨𑌾𑌰𑍍𑌯 𑌨𑌾𑌸𑍍𑌤𑍍𑌯𑍁𑌤𑍍𑌸𑌾𑌹𑌾𑌤𑍍𑌪𑌰𑌂 𑌬𑌲𑌮𑍍 ।
𑌸𑍋𑌤𑍍𑌸𑌾𑌹𑌸𑍍𑌯𑌾𑌸𑍍𑌤𑌿 𑌲𑍋𑌕𑍇𑌽𑌸𑍍𑌮𑌿𑌨𑍍 𑌨 𑌕𑌿𑌂𑌚𑌿𑌦𑌪𑌿 𑌦𑍁𑌰𑍍𑌲𑌭𑌮𑍍 ॥ 120 ॥
𑌉𑌤𑍍𑌸𑌾𑌹𑌵𑌂𑌤𑌃 𑌪𑍁𑌰𑍁𑌷𑌾 𑌨𑌾𑌵𑌸𑍀𑌦𑌂𑌤𑌿 𑌕𑌰𑍍𑌮𑌸𑍁 ।
𑌉𑌤𑍍𑌸𑌾𑌹𑌮𑌾𑌤𑍍𑌰𑌮𑌾𑌶𑍍𑌰𑌿𑌤𑍍𑌯 𑌸𑍀𑌤𑌾𑌂 𑌪𑍍𑌰𑌤𑌿𑌲𑌭𑍇𑌮𑌹𑌿 ॥ 121 ॥
𑌤𑍍𑌯𑌜𑍍𑌯𑌤𑌾𑌂 𑌕𑌾𑌮𑌵𑍃𑌤𑍍𑌤𑌤𑍍𑌵𑌂 𑌶𑍋𑌕𑌂 𑌸𑌨𑍍𑌨𑍍𑌯𑌸𑍍𑌯 𑌪𑍃𑌷𑍍𑌠𑌤𑌃 ।
𑌮𑌹𑌾𑌤𑍍𑌮𑌾𑌨𑌂 𑌕𑍃𑌤𑌾𑌤𑍍𑌮𑌾𑌨𑌮𑌾𑌤𑍍𑌮𑌾𑌨𑌂 𑌨𑌾𑌵𑌬𑍁𑌧𑍍𑌯𑌸𑍇 ॥ 122 ॥
𑌏𑌵𑌂 𑌸𑌂𑌬𑍋𑌧𑌿𑌤𑌸𑍍𑌤𑌤𑍍𑌰 𑌶𑍋𑌕𑍋𑌪𑌹𑌤𑌚𑍇𑌤𑌨𑌃 ।
𑌤𑍍𑌯𑌜𑍍𑌯 𑌶𑍋𑌕𑌂𑌚 𑌮𑍋𑌹𑌂𑌚 𑌤𑌤𑍋 𑌧𑍈𑌰𑍍𑌯𑌮𑍁𑌪𑌾𑌗𑌮𑌤𑍍 ॥ 123 ॥
𑌸𑍋𑌽𑌭𑍍𑌯𑌤𑌿𑌕𑍍𑌰𑌾𑌮𑌦𑌵𑍍𑌯𑌗𑍍𑌰𑌸𑍍𑌤𑌾𑌮𑌚𑌿𑌂𑌤𑍍𑌯𑌪𑌰𑌾𑌕𑍍𑌰𑌮𑌃 ।
𑌰𑌾𑌮𑌃 𑌪𑌂𑌪𑌾𑌂 𑌸𑍁𑌰𑍁𑌚𑌿𑌰𑌾𑌂 𑌰𑌮𑍍𑌯𑌪𑌾𑌰𑌿𑌪𑍍𑌲𑌵𑌦𑍍𑌰𑍁𑌮𑌾𑌮𑍍 ॥ 124 ॥
𑌨𑌿𑌰𑍀𑌕𑍍𑌷𑌮𑌾𑌣𑌸𑍍𑌸𑌹𑌸𑌾 𑌮𑌹𑌾𑌤𑍍𑌮𑌾 𑌸𑌰𑍍𑌵𑌂 𑌵𑌨𑌂 𑌨𑌿𑌰𑍍𑌝𑌰𑌕𑌂𑌦𑌰𑌾𑌶𑍍𑌚 ।
𑌉𑌦𑍍𑌵𑌿𑌗𑍍𑌨𑌚𑍇𑌤𑌾𑌸𑍍𑌸𑌹 𑌲𑌕𑍍𑌷𑍍𑌮𑌣𑍇𑌨 𑌵𑌿𑌚𑌾𑌰𑍍𑌯 𑌦𑍁𑌃𑌖𑍋𑌪𑌹𑌤𑌃 𑌪𑍍𑌰𑌤𑌸𑍍𑌥𑍇 ॥ 125 ॥
𑌤𑌂 𑌮𑌤𑍍𑌤𑌮𑌾𑌤𑌂𑌗𑌵𑌿𑌲𑌾𑌸𑌗𑌾𑌮𑍀 𑌗𑌚𑍍𑌛𑌂𑌤𑌮𑌵𑍍𑌯𑌗𑍍𑌰𑌮𑌨𑌾 𑌮𑌹𑌾𑌤𑍍𑌮𑌾 ।
𑌸 𑌲𑌕𑍍𑌷𑍍𑌮𑌣𑍋 𑌰𑌾𑌘𑌵𑌮𑌪𑍍𑌰𑌮𑌤𑍍𑌤𑍋 𑌰𑌰𑌕𑍍𑌷 𑌧𑌰𑍍𑌮𑍇𑌣 𑌬𑌲𑍇𑌨 𑌚𑍈𑌵 ॥ 126 ॥
𑌤𑌾𑌵𑍃𑌷𑍍𑌯𑌮𑍂𑌕𑌸𑍍𑌯 𑌸𑌮𑍀𑌪𑌚𑌾𑌰𑍀 𑌚𑌰𑌂𑌦𑌦𑌰𑍍𑌶𑌾𑌦𑍍𑌭𑍁𑌤𑌦𑌰𑍍𑌶𑌨𑍀𑌯𑍌 ।
𑌶𑌾𑌖𑌾𑌮𑍃𑌗𑌾𑌣𑌾𑌮𑌧𑌿𑌪𑌸𑍍𑌤𑌰𑌸𑍍𑌵𑍀 𑌵𑌿𑌤𑌤𑍍𑌰𑌸𑍇 𑌨𑍈𑌵 𑌚𑌿𑌚𑍇𑌷𑍍𑌟 𑌕𑌿𑌂𑌚𑌿𑌤𑍍 ॥ 12 ॥
𑌸 𑌤𑍌 𑌮𑌹𑌾𑌤𑍍𑌮𑌾 𑌗𑌜𑌮𑌂𑌦𑌗𑌾𑌮𑍀 𑌶𑌾𑌖𑌾𑌮𑍃𑌗𑌸𑍍𑌤𑌤𑍍𑌰 𑌚𑌰𑌂𑌚𑌰𑌂𑌤𑍌 ।
𑌦𑍃𑌷𑍍𑌟𑍍𑌵𑌾 𑌵𑌿𑌷𑌾𑌦𑌂 𑌪𑌰𑌮𑌂 𑌜𑌗𑌾𑌮 𑌚𑌿𑌂𑌤𑌾𑌪𑌰𑍀𑌤𑍋 𑌭𑌯𑌭𑌾𑌰𑌮𑌗𑍍𑌨𑌃 ॥ 12 ॥
𑌤𑌮𑌾𑌶𑍍𑌰𑌮𑌂 𑌪𑍁𑌣𑍍𑌯𑌸𑍁𑌖𑌂 𑌶𑌰𑌣𑍍𑌯𑌂 𑌸𑌦𑍈𑌵 𑌶𑌾𑌖𑌾𑌮𑍃𑌗𑌸𑍇𑌵𑌿𑌤𑌾𑌂𑌤𑌮𑍍 ।
𑌤𑍍𑌰𑌸𑍍𑌤𑌾𑌶𑍍𑌚 𑌦𑍃𑌷𑍍𑌟𑍍𑌵𑌾 𑌹𑌰𑌯𑍋𑌽𑌭𑌿𑌜𑌗𑍍𑌮𑍁𑌰𑍍𑌮𑌹𑍌𑌜𑌸𑍌 𑌰𑌾𑌘𑌵𑌲𑌕𑍍𑌷𑍍𑌮𑌣𑍌 𑌤𑍌 ॥ 12 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌪𑍍𑌰𑌥𑌮𑌸𑍍𑌸𑌰𑍍𑌗𑌃 ॥
