𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌃𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌆𑌖𑍍𑌯𑌾𑌤𑌾 𑌗𑍃𑌧𑍍𑌰𑌰𑌾𑌜𑍇𑌨 𑌸𑌮𑍁𑌤𑍍𑌪𑍍𑌲𑍁𑌤𑍍𑌯 𑌪𑍍𑌲𑌵𑌂𑌗𑌮𑌾𑌃 ।
𑌸𑌂𑌗𑌤𑌾𑌃 𑌪𑍍𑌰𑍀𑌤𑌿𑌸𑌂𑌯𑍁𑌕𑍍𑌤𑌾 𑌵𑌿𑌨𑍇𑌦𑍁𑌰𑍍𑌭𑍀𑌮𑌵𑌿𑌕𑍍𑌰𑌮𑌾𑌃 ॥ 1 ॥
𑌸𑌂𑌪𑌾𑌤𑍇𑌰𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌹𑌰𑌯𑍋 𑌰𑌾𑌵𑌣𑌕𑍍𑌷𑌯𑌮𑍍 ।
𑌹𑍃𑌷𑍍𑌟𑌾𑌸𑍍𑌸𑌾𑌗𑌰𑌮𑌾𑌜𑌗𑍍𑌮𑍁𑌸𑍍𑌸𑍀𑌤𑌾𑌦𑌰𑍍𑌶𑌨𑌕𑌾𑌂𑌕𑍍𑌷𑌿𑌣𑌃 ॥ 2 ॥
𑌅𑌭𑌿𑌕𑍍𑌰𑌮𑍍𑌯 𑌤𑍁 𑌤𑌂 𑌦𑍇𑌶𑌂 𑌦𑌦𑍃𑌶𑍁𑌰𑍍𑌭𑍀𑌮𑌵𑌿𑌕𑍍𑌰𑌮𑌾𑌃 ।
𑌕𑍃𑌤𑍍𑌸𑍍𑌨𑌂 𑌲𑍋𑌕𑌸𑍍𑌯 𑌮𑌹𑌤𑌃 𑌪𑍍𑌰𑌤𑌿𑌬𑌿𑌂𑌬𑌮𑌿𑌵 𑌸𑍍𑌥𑌿𑌤𑌮𑍍 ॥ 3 ॥
𑌦𑌕𑍍𑌷𑌿𑌣𑌸𑍍𑌯 𑌸𑌮𑍁𑌦𑍍𑌰𑌸𑍍𑌯 𑌸𑌮𑌾𑌸𑌾𑌦𑍍𑌯𑍋𑌤𑍍𑌤𑌰𑌾𑌂 𑌦𑌿𑌶𑌮𑍍 ।
𑌸𑌨𑍍𑌨𑌿𑌵𑍇𑌶𑌂 𑌤𑌤𑌶𑍍𑌚𑌕𑍍𑌰𑍁𑌰𑍍𑌹𑌰𑌿𑌵𑍀𑌰𑌾 𑌮𑌹𑌾𑌬𑌲𑌾𑌃 ॥ 4 ॥
𑌸𑌤𑍍𑌤𑍍𑌵𑍈𑌰𑍍𑌮𑌹𑌦𑍍𑌭𑌿𑌰𑍍𑌵𑌿𑌕𑍃𑌤𑍈𑌃 𑌕𑍍𑌰𑍀𑌡𑌦𑍍𑌭𑌿𑌰𑍍𑌵𑌿𑌵𑌿𑌧𑍈𑌰𑍍𑌜𑌲𑍇 ।
𑌵𑍍𑌯𑌾𑌤𑍍𑌤𑌾𑌸𑍍𑌯𑍈𑌸𑍍𑌸𑍁𑌮𑌹𑌾𑌕𑌾𑌯𑍈𑌰𑍂𑌰𑍍𑌮𑌿𑌭𑌿𑌶𑍍𑌚 𑌸𑌮𑌾𑌕𑍁𑌲𑌮𑍍 ॥ 5 ॥
𑌪𑍍𑌰𑌸𑍁𑌪𑍍𑌤𑌮𑌿𑌵 𑌚𑌾𑌨𑍍𑌯𑌤𑍍𑌰 𑌕𑍍𑌰𑍀𑌡𑌂𑌤𑌮𑌿𑌵 𑌚𑌾𑌨𑍍𑌯𑌤𑌃 ।
𑌕𑍍𑌵𑌚𑌿𑌤𑍍𑌪𑌰𑍍𑌵𑌤𑌮𑌾𑌤𑍍𑌰𑍈𑌶𑍍𑌚 𑌜𑌲𑌰𑌾𑌶𑌿𑌭𑌿𑌰𑌾𑌵𑍃𑌤𑌮𑍍 ॥ 6 ॥
𑌸𑌂𑌕𑍁𑌲𑌂 𑌦𑌾𑌨𑌵𑍇𑌂𑌦𑍍𑌰𑍈𑌶𑍍𑌚 𑌪𑌾𑌤𑌾𑌲𑌤𑌲𑌵𑌾𑌸𑌿𑌭𑌿𑌃 ।
𑌰𑍋𑌮𑌹𑌰𑍍𑌷𑌕𑌰𑌂 𑌦𑍃𑌷𑍍𑌟𑍍𑌵𑌾 𑌵𑌿𑌷𑍇𑌦𑍁𑌃 𑌕𑌪𑌿𑌕𑍁𑌂𑌜𑌰𑌾𑌃 ॥ ॥
𑌆𑌕𑌾𑌶𑌮𑌿𑌵 𑌦𑍁𑌷𑍍𑌪𑌾𑌰𑌂 𑌸𑌾𑌗𑌰𑌂 𑌪𑍍𑌰𑍇𑌕𑍍𑌷𑌯 𑌵𑌾𑌨𑌰𑌾𑌃 ।
𑌵𑌿𑌷𑍇𑌦𑍁 𑌸𑍍𑌸𑌹𑌸𑌾𑌸𑌰𑍍𑌵𑍇 𑌕𑌥𑌂 𑌕𑌾𑌰𑍍𑌯𑌮𑌿𑌤𑌿 𑌬𑍍𑌰𑍁𑌵𑌨𑍍 ॥ ॥
𑌵𑌿𑌷𑌣𑍍𑌣𑌾𑌂 𑌵𑌾𑌹𑌿𑌨𑍀𑌂 𑌦𑍃𑌷𑍍𑌟𑍍𑌵𑌾 𑌸𑌾𑌗𑌰𑌸𑍍𑌯 𑌨𑌿𑌰𑍀𑌕𑍍𑌷𑌣𑌾𑌤𑍍 ।
𑌆𑌶𑍍𑌵𑌾𑌸𑌯𑌾𑌮𑌾𑌸 𑌹𑌰𑍀𑌨𑍍𑌭𑌯𑌾𑌰𑍍𑌤𑌾𑌨𑍍 𑌹𑌰𑌿𑌸𑌤𑍍𑌤𑌮𑌃 ॥ ॥
𑌤𑌾𑌨𑍍𑌵𑌿𑌷𑌾𑌦𑍇𑌨 𑌮𑌹𑌤𑌾 𑌵𑌿𑌷𑌣𑍍𑌣𑌾𑌨𑍍𑌵𑌾𑌨𑌰𑌰𑍍𑌷𑌭𑌾𑌨𑍍 ।
𑌉𑌵𑌾𑌚 𑌮𑌤𑌿𑌮𑌾𑌨𑍍𑌕𑌾𑌲𑍇 𑌵𑌾𑌲𑌿𑌸𑍂𑌨𑍁𑌰𑍍𑌮𑌹𑌾𑌬𑌲𑌃 ॥ 10 ॥
𑌨 𑌵𑌿𑌷𑌾𑌦𑍇 𑌮𑌨𑌃 𑌕𑌾𑌰𑍍𑌯𑌂 𑌵𑌿𑌷𑌾𑌦𑍋 𑌦𑍋𑌷𑌵𑌤𑍍𑌤𑌮𑌃 ।
𑌵𑌿𑌷𑌾𑌦𑍋 𑌹𑌂𑌤𑌿 𑌪𑍁𑌰𑍁𑌷𑌂 𑌬𑌾𑌲𑌂 𑌕𑍍𑌰𑍁𑌦𑍍𑌧 𑌇𑌵𑍋𑌰𑌗𑌃 ॥ 11 ॥
𑌯𑍋 𑌵𑌿𑌷𑌾𑌦𑌂 𑌪𑍍𑌰𑌸𑌹𑌤𑍇 𑌵𑌿𑌕𑍍𑌰𑌮𑍇 𑌪𑌰𑍍𑌯𑍁𑌪𑌸𑍍𑌥𑌿𑌤𑍇 ।
𑌤𑍇𑌜𑌸𑌾 𑌤𑌸𑍍𑌯 𑌹𑍀𑌨𑌸𑍍𑌯 𑌪𑍁𑌰𑍁𑌷𑌾𑌰𑍍𑌥𑍋 𑌨 𑌸𑌿𑌧𑍍𑌯𑌤𑌿 ॥ 12 ॥
𑌤𑌸𑍍𑌯𑌾𑌂 𑌰𑌾𑌤𑍍𑌰𑍍𑌯𑌾𑌂 𑌵𑍍𑌯𑌤𑍀𑌤𑌾𑌯𑌾𑌮𑌂𑌗𑌦𑍋 𑌵𑌾𑌨𑌰𑍈𑌸𑍍𑌸𑌹 ।
𑌹𑌰𑌿𑌵𑍃𑌦𑍍𑌧𑍈𑌸𑍍𑌸𑌮𑌾𑌗𑌮𑍍𑌯 𑌪𑍁𑌨𑌰𑍍𑌮𑌂𑌤𑍍𑌰𑌮𑌮𑌂𑌤𑍍𑌰𑌯𑌤𑍍 ॥ 13 ॥
𑌸𑌾 𑌵𑌾𑌨𑌰𑌾𑌣𑌾𑌂 𑌧𑍍𑌵𑌜𑌿𑌨𑍀 𑌪𑌰𑌿𑌵𑌾𑌰𑍍𑌯𑌾𑌂𑌗𑌦𑌂 𑌬𑌭𑍌 ।
𑌵𑌾𑌸𑌵𑌂 𑌪𑌰𑌿𑌵𑌾𑌰𑍍𑌯𑍇𑌵 𑌮𑌰𑍁𑌤𑌾𑌂 𑌵𑌾𑌹𑌿𑌨𑍀 𑌸𑍍𑌥𑌿𑌤𑌾 ॥ 14 ॥
𑌕𑍋𑌽𑌨𑍍𑌯𑌸𑍍𑌤𑌾𑌂 𑌵𑌾𑌨𑌰𑍀𑌂 𑌸𑍇𑌨𑌾𑌂 𑌶𑌕𑍍𑌤𑌃𑌸𑍍𑌤𑌂𑌭𑌯𑌿𑌤𑍁𑌂 𑌭𑌵𑍇𑌤𑍍 ।
𑌅𑌨𑍍𑌯𑌤𑍍𑌰 𑌵𑌾𑌲𑌿𑌤𑌨𑌯𑌾𑌦𑌨𑍍𑌯𑌤𑍍𑌰 𑌚 𑌹𑌨𑍂𑌮𑌤𑌃 ॥ 15 ॥
𑌤𑌤𑌸𑍍𑌤𑌾𑌨𑍍𑌹𑌰𑌿𑌵𑍃𑌦𑍍𑌧𑌾𑌂𑌶𑍍𑌚 𑌤𑌚𑍍𑌚 𑌸𑍈𑌨𑍍𑌯𑌮𑌰𑌿𑌂𑌦𑌮𑌃 ।
𑌅𑌨𑍁𑌮𑌾𑌨𑍍𑌯𑌾𑌂𑌗𑌦𑌶𑍍𑌶𑍍𑌰𑍀𑌮𑌾𑌨𑍍𑌵𑌾𑌕𑍍𑌯𑌮𑌰𑍍𑌥𑌵𑌦𑌬𑍍𑌰𑌵𑍀𑌤𑍍 ॥ 16 ॥
𑌕 𑌇𑌦𑌾𑌨𑍀𑌂 𑌮𑌹𑌾𑌤𑍇𑌜𑌾 𑌲𑌂𑌘𑌯𑌿𑌷𑍍𑌯𑌤𑌿 𑌸𑌾𑌗𑌰𑌮𑍍 ।
𑌕𑌃 𑌕𑌰𑌿𑌷𑍍𑌯𑌤𑌿 𑌸𑍁𑌗𑍍𑌰𑍀𑌵𑌂 𑌸𑌤𑍍𑌯𑌸𑌂𑌧𑌮𑌰𑌿𑌂𑌦𑌮𑌮𑍍 ॥ 1 ॥
𑌕𑍋 𑌵𑍀𑌰𑍋 𑌯𑍋𑌜𑌨𑌶𑌤𑌂 𑌲𑌂𑌘𑌯𑍇𑌤 𑌪𑍍𑌲𑌵𑌂𑌗𑌮𑌾𑌃 ।
𑌇𑌮𑌾𑌂𑌶𑍍𑌚 𑌯𑍂𑌥𑌪𑌾𑌨𑍍 𑌸𑌰𑍍𑌵𑌾𑌨𑍍𑌮𑍋𑌕𑍍𑌷𑌯𑍇𑌤𑍍𑌕𑍋 𑌮𑌹𑌾𑌭𑌯𑌾𑌤𑍍 ॥ 1 ॥
𑌕𑌸𑍍𑌯 𑌪𑍍𑌰𑌭𑌾𑌵𑌾𑌦𑍍𑌧𑌾𑌰𑌾𑌂𑌶𑍍𑌚 𑌪𑍁𑌤𑍍𑌰𑌾𑌂𑌶𑍍𑌚𑍈𑌵 𑌗𑍃𑌹𑌾𑌣𑌿 𑌚 ।
𑌇𑌤𑍋 𑌨𑌿𑌵𑍃𑌤𑍍𑌤𑌾𑌃 𑌪𑌶𑍍𑌯𑍇𑌮 𑌸𑌿𑌦𑍍𑌧𑌾𑌰𑍍𑌥𑌾𑌸𑍍𑌸𑍁𑌖𑌿𑌨𑍋 𑌵𑌯𑌮𑍍 ॥ 1 ॥
𑌕𑌸𑍍𑌯 𑌪𑍍𑌰𑌸𑌾𑌦𑌾𑌦𑍍𑌰𑌾𑌮𑌂 𑌚 𑌲𑌕𑍍𑌷𑍍𑌮𑌣𑌂 𑌚 𑌮𑌹𑌾𑌬𑌲𑌮𑍍 ।
𑌅𑌭𑌿𑌗𑌚𑍍𑌛𑍇𑌮 𑌸𑌂𑌹𑍃𑌷𑍍𑌟𑌾𑌸𑍍𑌸𑍁𑌗𑍍𑌰𑍀𑌵𑌂 𑌚 𑌵𑌨𑍌𑌕𑌸𑌮𑍍 ॥ 20 ॥
𑌯𑌦𑌿 𑌕𑌶𑍍𑌚𑌿𑌤𑍍𑌸𑌮𑌰𑍍𑌥𑍋 𑌵𑌸𑍍𑌸𑌾𑌗𑌰𑌪𑍍𑌲𑌵𑌨𑍇 𑌹𑌰𑌿𑌃 ।
𑌸 𑌦𑌦𑌾 𑌤𑍍𑌵𑌿𑌹 𑌨 𑌶𑌶𑍀𑌘𑍍𑌰𑌂 𑌪𑍁𑌣𑍍𑌯𑌾𑌮𑌭𑌯𑌦𑌕𑍍𑌷𑌿𑌣𑌾𑌮𑍍 ॥ 21 ॥
𑌅𑌂𑌗𑌦𑌸𑍍𑌯 𑌵𑌚 𑌶𑍍𑌶𑍃𑌤𑍍𑌵𑌾 𑌨 𑌕𑌶𑍍𑌚𑌿𑌤𑍍 𑌕𑌿𑌂𑌚𑌿𑌦𑌬𑍍𑌰𑌵𑍀𑌤𑍍 ।
𑌸𑍍𑌤𑌿𑌮𑌿𑌤𑍇 𑌵𑌾 𑌭𑌵𑌤𑍍𑌸𑌰𑍍𑌵𑌾 𑌸𑌾 𑌤𑌤𑍍𑌰 𑌹𑌰𑌿𑌵𑌾𑌹𑌿𑌨𑍀 ॥ 22 ॥
𑌪𑍁𑌨𑌰𑍇𑌵𑌾𑌂𑌗𑌦𑌃 𑌪𑍍𑌰𑌾𑌹 𑌤𑌾𑌨𑍍𑌹𑌰𑍀𑌨𑍍𑌹𑌰𑌿𑌸𑌤𑍍𑌤𑌮𑌃 ।
𑌸𑌰𑍍𑌵𑍇 𑌬𑌲𑌵𑌤𑌾𑌂 𑌶𑍍𑌰𑍇𑌷𑍍𑌠𑌾 𑌭𑌵𑌂𑌤𑍋 𑌦𑍃𑌢𑌵𑌿𑌕𑍍𑌰𑌮𑌾𑌃 ॥ 23 ॥
𑌵𑍍𑌯𑌪𑌦𑍇𑌶𑍍𑌯 𑌕𑍁𑌲𑍇 𑌜𑌾𑌤𑌾𑌃 𑌪𑍂𑌜𑌿𑌤𑌾𑌶𑍍𑌚𑌾𑌪𑍍𑌯𑌭𑍀𑌕𑍍𑌷𑍍𑌣𑌶𑌃 ।
𑌨 𑌹𑌿 𑌵𑍋 𑌗𑌮𑌨𑍇 𑌸𑌂𑌗𑌃 𑌕𑌦𑌾𑌚𑌿𑌤𑍍𑌕𑌸𑍍𑌯𑌚𑌿𑌤𑍍𑌕𑍍𑌵𑌚𑌿𑌤𑍍 ।
𑌬𑍍𑌰𑍁𑌵𑌧𑍍𑌵𑌂 𑌯𑌸𑍍𑌯 𑌯𑌾 𑌶𑌕𑍍𑌤𑌿𑌃 𑌪𑍍𑌲𑌵𑌨𑍇 𑌪𑍍𑌲𑌵𑌗𑌰𑍍𑌷𑌭𑌾𑌃 ॥ 24 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌚𑌤𑍁𑌃𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
