𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌪𑍂𑌰𑍍𑌵𑌜𑍋𑌽𑌪𑍍𑌯𑍁𑌕𑍍𑌤𑌮𑌾𑌤𑍍𑌰𑌸𑍍𑌤𑍁 𑌲𑌕𑍍𑌷𑍍𑌮𑌣𑍇𑌨 𑌸𑍁𑌭𑌾𑌷𑌿𑌤𑌮𑍍 ।
𑌸𑌾𑌰𑌗𑍍𑌰𑌾𑌹𑍀 𑌮𑌹𑌾𑌸𑌾𑌰𑌂 𑌪𑍍𑌰𑌤𑌿𑌜𑌗𑍍𑌰𑌾𑌹 𑌰𑌾𑌘𑌵𑌃 ॥ 1 ॥
𑌸𑌨𑍍𑌨𑌿𑌗𑍃𑌹𑍍𑌯 𑌮𑌹𑌾𑌬𑌾𑌹𑍁𑌃 𑌪𑍍𑌰𑌵𑍃𑌤𑍍𑌤𑌂 𑌕𑍋𑌪𑌮𑌾𑌤𑍍𑌮𑌨𑌃 ।
𑌅𑌵𑌷𑍍𑌟𑌭𑍍𑌯 𑌧𑌨𑍁𑌶𑍍𑌚𑌿𑌤𑍍𑌰𑌂 𑌰𑌾𑌮𑍋 𑌲𑌕𑍍𑌷𑍍𑌮𑌣𑌮𑌬𑍍𑌰𑌵𑍀𑌤𑍍 ॥ 2 ॥
𑌕𑌿𑌂 𑌕𑌰𑌿𑌷𑍍𑌯𑌾𑌵𑌹𑍇 𑌵𑌤𑍍𑌸 𑌕𑍍𑌵 𑌵𑌾 𑌗𑌚𑍍𑌛𑌾𑌵 𑌲𑌕𑍍𑌷𑍍𑌮𑌣 ।
𑌕𑍇𑌨𑍋𑌪𑌾𑌯𑍇𑌨 𑌗𑌚𑍍𑌛𑍇𑌯𑌂 𑌸𑍀𑌤𑌾𑌮𑌿𑌤𑌿 𑌵𑌿𑌚𑌿𑌂𑌤𑌯 ॥ 3 ॥
𑌤𑌂 𑌤𑌥𑌾 𑌪𑌰𑌿𑌤𑌾𑌪𑌾𑌰𑍍𑌤𑌂 𑌲𑌕𑍍𑌷𑍍𑌮𑌣𑍋 𑌰𑌾𑌮𑌮𑌬𑍍𑌰𑌵𑍀𑌤𑍍 ।
𑌇𑌦𑌮𑍇𑌵 𑌜𑌨𑌸𑍍𑌥𑌾𑌨𑌂 𑌤𑍍𑌵𑌮𑌨𑍍𑌵𑍇𑌷𑌿𑌤𑍁𑌮𑌰𑍍𑌹𑌸𑌿 ॥ 4 ॥
𑌰𑌾𑌕𑍍𑌷𑌸𑍈𑌰𑍍𑌬𑌹𑍁𑌭𑌿𑌃 𑌕𑍀𑌰𑍍𑌣𑌂 𑌨𑌾𑌨𑌾𑌦𑍍𑌰𑍁𑌮𑌲𑌤𑌾𑌯𑍁𑌤𑌮𑍍 ।
𑌸𑌂𑌤𑍀𑌹 𑌗𑌿𑌰𑌿𑌦𑍁𑌰𑍍𑌗𑌾𑌣𑌿 𑌨𑌿𑌰𑍍𑌦𑌰𑌾𑌃 𑌕𑌂𑌦𑌰𑌾𑌣𑌿 𑌚 ॥ 5 ॥
𑌗𑍁𑌹𑌾𑌶𑍍𑌚 𑌵𑌿𑌵𑌿𑌧𑌾 𑌘𑍋𑌰𑌾 𑌨𑌾𑌨𑌾𑌮𑍃𑌗𑌗𑌣𑌾𑌕𑍁𑌲𑌾𑌃 ।
𑌆𑌵𑌾𑌸𑌾𑌃 𑌕𑌿𑌨𑍍𑌨𑌰𑌾𑌣𑌾𑌂 𑌚 𑌗𑌂𑌧𑌰𑍍𑌵𑌭𑌵𑌨𑌾𑌨𑌿 𑌚 ॥ 6 ॥
𑌤𑌾𑌨𑌿 𑌯𑍁𑌕𑍍𑌤𑍋 𑌮𑌯𑌾 𑌸𑌾𑌰𑍍𑌧𑌂 𑌤𑍍𑌵𑌮𑌨𑍍𑌵𑍇𑌷𑌿𑌤𑍁𑌮𑌰𑍍𑌹𑌸𑌿 ।
𑌤𑍍𑌵𑌦𑍍𑌵𑌿𑌧𑌾 𑌬𑍁𑌦𑍍𑌧𑌿𑌸𑌂𑌪𑌨𑍍𑌨𑌾 𑌮𑌹𑌾𑌤𑍍𑌮𑌾𑌨𑍋 𑌨𑌰𑌰𑍍𑌷𑌭 ॥ ॥
𑌆𑌪𑌤𑍍𑌸𑍁 𑌨 𑌪𑍍𑌰𑌕𑌂𑌪𑌂𑌤𑍇 𑌵𑌾𑌯𑍁𑌵𑍇𑌗𑍈𑌰𑌿𑌵𑌾𑌚𑌲𑌾𑌃 ।
𑌇𑌤𑍍𑌯𑍁𑌕𑍍𑌤𑌸𑍍𑌤𑌦𑍍𑌵𑌨𑌂 𑌸𑌰𑍍𑌵𑌂 𑌵𑌿𑌚𑌚𑌾𑌰 𑌸𑌲𑌕𑍍𑌷𑍍𑌮𑌣𑌃 ॥ ॥
𑌕𑍍𑌰𑍁𑌦𑍍𑌧𑍋 𑌰𑌾𑌮𑌶𑍍𑌶𑌰𑌂 𑌘𑍋𑌰𑌂 𑌸𑌂𑌧𑌾𑌯 𑌧𑌨𑍁𑌷𑌿 𑌕𑍍𑌷𑍁𑌰𑌮𑍍 ।
𑌤𑌤𑌃 𑌪𑌰𑍍𑌵𑌤𑌕𑍂𑌟𑌾𑌭𑌂 𑌮𑌹𑌾𑌭𑌾𑌗𑌂 𑌦𑍍𑌵𑌿𑌜𑍋𑌤𑍍𑌤𑌮𑌮𑍍 ॥ ॥
𑌦𑌦𑌰𑍍𑌶 𑌪𑌤𑌿𑌤𑌂 𑌭𑍂𑌮𑍌 𑌕𑍍𑌷𑌤𑌜𑌾𑌰𑍍𑌦𑍍𑌰𑌂 𑌜𑌟𑌾𑌯𑍁𑌷𑌮𑍍 ।
𑌤𑌂 𑌦𑍃𑌷𑍍𑌟𑍍𑌵𑌾 𑌗𑌿𑌰𑌿𑌶𑍃𑌂𑌗𑌾𑌭𑌂 𑌰𑌾𑌮𑍋 𑌲𑌕𑍍𑌷𑍍𑌮𑌣𑌮𑌬𑍍𑌰𑌵𑍀𑌤𑍍 ॥ 10 ॥
𑌅𑌨𑍇𑌨 𑌸𑍀𑌤𑌾 𑌵𑍈𑌦𑍇𑌹𑍀 𑌭𑌕𑍍𑌷𑌿𑌤𑌾 𑌨𑌾𑌤𑍍𑌰 𑌸𑌂𑌶𑌯𑌃 ।
𑌗𑍃𑌧𑍍𑌰𑌰𑍂𑌪𑌮𑌿𑌦𑌂 𑌰𑌕𑍍𑌷𑍋 𑌵𑍍𑌯𑌕𑍍𑌤𑌂 𑌭𑌵𑌤𑌿 𑌕𑌾𑌨𑌨𑍇 ॥ 11 ॥
𑌭𑌕𑍍𑌷𑌯𑌿𑌤𑍍𑌵𑌾 𑌵𑌿𑌶𑌾𑌲𑌾𑌕𑍍𑌷𑍀𑌮𑌾𑌸𑍍𑌤𑍇 𑌸𑍀𑌤𑌾𑌂 𑌯𑌥𑌾𑌸𑍁𑌖𑌮𑍍 ।
𑌏𑌨𑌂 𑌵𑌧𑌿𑌷𑍍𑌯𑍇 𑌦𑍀𑌪𑍍𑌤𑌾𑌸𑍍𑌯𑍈𑌰𑍍𑌘𑍋𑌰𑍈𑌰𑍍𑌬𑌾𑌣𑍈𑌰𑌜𑌿𑌹𑍍𑌮𑌗𑍈𑌃 ॥ 12 ॥
𑌇𑌤𑍍𑌯𑍁𑌕𑍍𑌤𑍍𑌵𑌾𑌭𑍍𑌯𑌪𑌤𑌦𑍍𑌗𑍃𑌧𑍍𑌰𑌂 𑌸𑌂𑌧𑌾𑌯 𑌧𑌨𑍁𑌷𑌿 𑌕𑍍𑌷𑍁𑌰𑌮𑍍 ।
𑌕𑍍𑌰𑍁𑌦𑍍𑌧𑍋 𑌰𑌾𑌮𑌸𑍍𑌸𑌮𑍁𑌦𑍍𑌰𑌾𑌂𑌤𑌾𑌂 𑌕𑌂𑌪𑌯𑌨𑍍𑌨𑌿𑌵 𑌮𑍇𑌦𑌿𑌨𑍀𑌮𑍍 ॥ 13 ॥
𑌤𑌂 𑌦𑍀𑌨𑌂 𑌦𑍀𑌨𑌯𑌾 𑌵𑌾𑌚𑌾 𑌸𑌫𑍇𑌨𑌂 𑌰𑍁𑌧𑌿𑌰𑌂 𑌵𑌮𑌨𑍍 ।
𑌅𑌭𑍍𑌯𑌭𑌾𑌷𑌤 𑌪𑌕𑍍𑌷𑍀 𑌤𑍁 𑌰𑌾𑌮𑌂 𑌦𑌶𑌰𑌥𑌾𑌤𑍍𑌮𑌜𑌮𑍍 ॥ 14 ॥
𑌯𑌾𑌮𑍋𑌷𑌧𑌿𑌮𑌿𑌵𑌾𑌯𑍁𑌷𑍍𑌮𑌨𑍍𑌨𑌨𑍍𑌵𑍇𑌷𑌸𑌿 𑌮𑌹𑌾𑌵𑌨𑍇 ।
𑌸𑌾 𑌦𑍇𑌵𑍀 𑌮𑌮 𑌚 𑌪𑍍𑌰𑌾𑌣𑌾 𑌰𑌾𑌵𑌣𑍇𑌨𑍋𑌭𑌯𑌂 𑌹𑍃𑌤𑌮𑍍 ॥ 15 ॥
𑌤𑍍𑌵𑌯𑌾 𑌵𑌿𑌰𑌹𑌿𑌤𑌾 𑌦𑍇𑌵𑍀 𑌲𑌕𑍍𑌷𑍍𑌮𑌣𑍇𑌨 𑌚 𑌰𑌾𑌘𑌵 ।
𑌹𑍍𑌰𑌿𑌯𑌮𑌾𑌣𑌾 𑌮𑌯𑌾 𑌦𑍃𑌷𑍍𑌟𑌾 𑌰𑌾𑌵𑌣𑍇𑌨 𑌬𑌲𑍀𑌯𑌸𑌾 ॥ 16 ॥
𑌸𑍀𑌤𑌾𑌮𑌭𑍍𑌯𑌵𑌪𑌨𑍍𑌨𑍋𑌽𑌹𑌂 𑌰𑌾𑌵𑌣𑌶𑍍𑌚 𑌰𑌣𑍇 𑌮𑌯𑌾 ।
𑌵𑌿𑌧𑍍𑌵𑌂𑌸𑌿𑌤𑌰𑌥𑌶𑍍𑌚𑌾𑌤𑍍𑌰 𑌪𑌾𑌤𑌿𑌤𑍋 𑌧𑌰𑌣𑍀𑌤𑌲𑍇 ॥ 1 ॥
𑌏𑌤𑌦𑌸𑍍𑌯 𑌧𑌨𑍁𑌰𑍍𑌭𑌗𑍍𑌨𑌮𑍇𑌤𑌦𑌸𑍍𑌯 𑌶𑌰𑌾𑌵𑌰𑌮𑍍 ।
𑌅𑌯𑌮𑌸𑍍𑌯 𑌰𑌥𑍋 𑌰𑌾𑌮 𑌭𑌗𑍍𑌨𑌸𑌾𑌂𑌗𑍍𑌰𑌾𑌮𑌿𑌕𑍋 𑌮𑌯𑌾 ॥ 1 ॥
𑌅𑌯𑌂 𑌤𑍁 𑌸𑌾𑌰𑌥𑌿𑌸𑍍𑌤𑌸𑍍𑌯 𑌮𑌤𑍍𑌪𑌕𑍍𑌷𑌨𑌿𑌹𑌤𑍋 𑌯𑍁𑌧𑌿 ।
𑌪𑌰𑌿𑌶𑍍𑌰𑌾𑌂𑌤𑌸𑍍𑌯 𑌮𑍇 𑌪𑌕𑍍𑌷𑍌 𑌛𑌿𑌤𑍍𑌤𑍍𑌵𑌾 𑌖𑌡𑍍𑌗𑍇𑌨 𑌰𑌾𑌵𑌣𑌃 ॥ 1 ॥
𑌸𑍀𑌤𑌾𑌮𑌾𑌦𑌾𑌯 𑌵𑍈𑌦𑍇𑌹𑍀𑌮𑍁𑌤𑍍𑌪𑌪𑌾𑌤 𑌵𑌿𑌹𑌾𑌯𑌸𑌮𑍍 ।
𑌰𑌕𑍍𑌷𑌸𑌾 𑌨𑌿𑌹𑌤𑌂 𑌪𑍂𑌰𑍍𑌵𑌂 𑌨 𑌮𑌾𑌂 𑌹𑌂𑌤𑍁𑌂 𑌤𑍍𑌵𑌮𑌰𑍍𑌹𑌸𑌿 ॥ 20 ॥
𑌰𑌾𑌮𑌸𑍍𑌤𑌸𑍍𑌯 𑌤𑍁 𑌵𑌿𑌜𑍍𑌞𑌾𑌯 𑌬𑌾𑌷𑍍𑌪𑌪𑍂𑌰𑍍𑌣𑌮𑍁𑌖𑌸𑍍𑌤𑌦𑌾 ।
𑌦𑍍𑌵𑌿𑌗𑍁𑌣𑍀𑌕𑍃𑌤𑌤𑌾𑌪𑌾𑌰𑍍𑌤𑌸𑍍𑌸𑍀𑌤𑌾𑌸𑌕𑍍𑌤𑌾𑌂 𑌪𑍍𑌰𑌿𑌯𑌾𑌂 𑌕𑌥𑌾𑌮𑍍 ॥ 21 ॥
𑌗𑍃𑌧𑍍𑌰𑌰𑌾𑌜𑌂 𑌪𑌰𑌿𑌷𑍍𑌵𑌜𑍍𑌯 𑌪𑌰𑌿𑌤𑍍𑌯𑌜𑍍𑌯 𑌮𑌹𑌦𑍍𑌧𑌨𑍁𑌃 ।
𑌨𑌿𑌪𑌪𑌾𑌤𑌾𑌵𑌶𑍋 𑌭𑍂𑌮𑍌 𑌰𑍁𑌰𑍋𑌦 𑌸𑌹𑌲𑌕𑍍𑌷𑍍𑌮𑌣𑌃 ॥ 22 ॥
𑌏𑌕𑌮𑍇𑌕𑌾𑌯𑌨𑍇 𑌦𑍁𑌰𑍍𑌗𑍇 𑌨𑌿𑌶𑍍𑌶𑍍𑌵𑌸𑌂𑌤𑌂 𑌕𑌥𑌂𑌚𑌨 ।
𑌸𑌮𑍀𑌕𑍍𑌷𑍍𑌯 𑌦𑍁𑌃𑌖𑌿𑌤𑌤𑌰𑍋 𑌰𑌾𑌮𑌸𑍍𑌸𑍌𑌮𑌿𑌤𑍍𑌰𑌿𑌮𑌬𑍍𑌰𑌵𑍀𑌤𑍍 ॥ 23 ॥
𑌰𑌾𑌜𑍍𑌯𑌂 𑌭𑍍𑌰𑌷𑍍𑌟𑌂 𑌵𑌨𑍇 𑌵𑌾𑌸𑌸𑍍𑌸𑍀𑌤𑌾 𑌨𑌷𑍍𑌟𑌾 𑌹𑌤𑍋 𑌦𑍍𑌵𑌿𑌜𑌃 ।
𑌈𑌦𑍃𑌶𑍀𑌯𑌂 𑌮𑌮𑌾𑌲𑌕𑍍𑌷𑍍𑌮𑍀𑌰𑍍𑌨𑌿𑌰𑍍𑌦𑌹𑍇𑌦𑌪𑌿 𑌪𑌾𑌵𑌕𑌮𑍍 ॥ 24 ॥
𑌸𑌂𑌪𑍂𑌰𑍍𑌣𑌮𑌪𑌿 𑌚𑍇𑌦𑌦𑍍𑌯 𑌪𑍍𑌰𑌵𑌿𑌶𑍇𑌯𑌂 𑌮𑌹𑍋𑌦𑌧𑌿𑌮𑍍 ।
𑌸𑍋𑌽𑌪𑌿 𑌨𑍂𑌨𑌂 𑌮𑌮𑌾𑌲𑌕𑍍𑌷𑍍𑌮𑍍𑌯𑌾 𑌵𑌿𑌶𑍁𑌷𑍍𑌯𑍇𑌤𑍍𑌸𑌰𑌿𑌤𑌾𑌂𑌪𑌤𑌿𑌃 ॥ 25 ॥
𑌨𑌾𑌸𑍍𑌤𑍍𑌯𑌭𑌾𑌗𑍍𑌯𑌤𑌰𑍋 𑌲𑍋𑌕𑍇 𑌮𑌤𑍍𑌤𑍋𑌽𑌸𑍍𑌮𑌿𑌨𑍍𑌸𑌚𑌰𑌾𑌚𑌰𑍇 ।
𑌯𑍇𑌨𑍇𑌯𑌂 𑌮𑌹𑌤𑍀 𑌪𑍍𑌰𑌾𑌪𑍍𑌤𑌾 𑌮𑌯𑌾 𑌵𑍍𑌯𑌸𑌨𑌵𑌾𑌗𑍁𑌰𑌾 ॥ 26 ॥
𑌅𑌯𑌂 𑌪𑌿𑌤𑍃𑌵𑌯𑌸𑍍𑌯𑍋 𑌮𑍇 𑌗𑍃𑌧𑍍𑌰𑌰𑌾𑌜𑍋 𑌜𑌰𑌾𑌨𑍍𑌵𑌿𑌤𑌃 ।
𑌶𑍇𑌤𑍇 𑌵𑌿𑌨𑌿𑌹𑌤𑍋 𑌭𑍂𑌮𑍌 𑌮𑌮 𑌭𑌾𑌗𑍍𑌯𑌵𑌿𑌪𑌰𑍍𑌯𑌯𑌾𑌤𑍍 ॥ 2 ॥
𑌇𑌤𑍍𑌯𑍇𑌵𑌮𑍁𑌕𑍍𑌤𑍍𑌵𑌾 𑌬𑌹𑍁𑌶𑍋 𑌰𑌾𑌘𑌵𑌸𑍍𑌸𑌹𑌲𑌕𑍍𑌷𑍍𑌮𑌣𑌃 ।
𑌜𑌟𑌾𑌯𑍁𑌷𑌂 𑌚 𑌪𑌸𑍍𑌪𑌰𑍍𑌶 𑌪𑌿𑌤𑍃𑌸𑍍𑌨𑍇𑌹𑌂 𑌵𑌿𑌦𑌰𑍍𑌶𑌯𑌨𑍍 ॥ 2 ॥
𑌨𑌿𑌕𑍃𑌤𑍍𑌤𑌪𑌕𑍍𑌷𑌂 𑌰𑍁𑌧𑌿𑌰𑌾𑌵𑌸𑌿𑌕𑍍𑌤𑌂 𑌸 𑌗𑍃𑌧𑍍𑌰𑌰𑌾𑌜𑌂 𑌪𑌰𑌿𑌰𑌭𑍍𑌯 𑌰𑌾𑌮𑌃 ।
𑌕𑍍𑌵 𑌮𑍈𑌥𑌿𑌲𑍀 𑌪𑍍𑌰𑌾𑌣𑌸𑌮𑌾 𑌮𑌮𑍇𑌤𑌿 𑌵𑌿𑌮𑍁𑌚𑍍𑌯 𑌵𑌾𑌚𑌂 𑌨𑌿𑌪𑌪𑌾𑌤 𑌭𑍂𑌮𑍌 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌸𑌪𑍍𑌤𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
