𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌿𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌸 𑌤𑌂 𑌵𑍃𑌕𑍍𑌷𑌂 𑌸𑌮𑌾𑌸𑌾𑌦𑍍𑌯 𑌸𑌂𑌧𑍍𑌯𑌾𑌮𑌨𑍍𑌵𑌾𑌸𑍍𑌯𑌪𑌶𑍍𑌚𑌿𑌮𑌾𑌮𑍍 ।
𑌰𑌾𑌮𑍋 𑌰𑌮𑌯𑌤𑌾𑌂 𑌶𑍍𑌰𑍇𑌷𑍍𑌠 𑌇𑌤𑌿 𑌹𑍋𑌵𑌾𑌚 𑌲𑌕𑍍𑌷𑍍𑌮𑌣𑌮𑍍 ॥ 1 ॥
𑌅𑌦𑍍𑌯𑍇𑌯𑌂 𑌪𑍍𑌰𑌥𑌮𑌾 𑌰𑌾𑌤𑍍𑌰𑌿𑌰𑍍𑌯𑌾𑌤𑌾 𑌜𑌨𑌪𑌦𑌾𑌦𑍍𑌬𑌹𑌿𑌃 ।
𑌯𑌾 𑌸𑍁𑌮𑌂𑌤𑍍𑌰𑍇𑌣 𑌰𑌹𑌿𑌤𑌾 𑌤𑌾𑌂 𑌨𑍋𑌤𑍍𑌕𑌂𑌠𑌿𑌤𑍁𑌮𑌰𑍍𑌹𑌸𑌿 ॥ 2 ॥
𑌜𑌾𑌗𑌰𑍍𑌤𑌵𑍍𑌯𑌮𑌤𑌂𑌦𑍍𑌰𑌿𑌭𑍍𑌯𑌾𑌮𑌦𑍍𑌯𑌪𑍍𑌰𑌭𑍃𑌤𑌿 𑌰𑌾𑌤𑍍𑌰𑌿𑌷𑍁 ।
𑌯𑍋𑌗𑌕𑍍𑌷𑍇𑌮𑍌 𑌹𑌿 𑌸𑍀𑌤𑌾𑌯𑌾 𑌵𑌰𑍍𑌤𑍇𑌤𑍇 𑌲𑌕𑍍𑌷𑍍𑌮𑌣𑌾𑌵𑌯𑍋𑌃 ॥ 3 ॥
𑌰𑌾𑌤𑍍𑌰𑌿𑌂 𑌕𑌥𑌂𑌚𑌿𑌦𑍇𑌵𑍇𑌮𑌾𑌂 𑌸𑍌𑌮𑌿𑌤𑍍𑌰𑍇 𑌵𑌰𑍍𑌤𑌯𑌾𑌮𑌹𑍇 ।
𑌅𑌪𑌾𑌵𑌰𑍍𑌤𑌾𑌮𑌹𑍇 𑌭𑍂𑌮𑌾𑌵𑌾𑌸𑍍𑌤𑍀𑌰𑍍𑌯 𑌸𑍍𑌵𑌯𑌮𑌾𑌰𑍍𑌜𑌿𑌤𑍈𑌃 ॥ 4 ॥
𑌸 𑌤𑍁 𑌸𑌂𑌵𑌿𑌶𑍍𑌯 𑌮𑍇𑌦𑌿𑌨𑍍𑌯𑌾𑌂 𑌮𑌹𑌾𑌰𑍍𑌹𑌶𑌯𑌨𑍋𑌚𑌿𑌤𑌃 ।
𑌇𑌮𑌾𑌃 𑌸𑍌𑌮𑌿𑌤𑍍𑌰𑌯𑍇 𑌰𑌾𑌮𑍋 𑌵𑍍𑌯𑌾𑌜𑌹𑌾𑌰 𑌕𑌥𑌾𑌃 𑌶𑍁𑌭𑌾𑌃 ॥ 5 ॥
𑌧𑍍𑌰𑍁𑌵𑌮𑌦𑍍𑌯 𑌮𑌹𑌾𑌰𑌾𑌜𑍋 𑌦𑍁𑌃𑌖𑌂 𑌸𑍍𑌵𑌪𑌿𑌤𑌿 𑌲𑌕𑍍𑌷𑍍𑌮𑌣 ।
𑌕𑍃𑌤𑌕𑌾𑌮𑌾 𑌤𑍁 𑌕𑍈𑌕𑍇𑌯𑍀 𑌤𑍁𑌷𑍍𑌟𑌾 𑌭𑌵𑌿𑌤𑍁𑌮𑌰𑍍𑌹𑌤𑌿 ॥ 6 ॥
𑌸𑌾 𑌹𑌿 𑌦𑍇𑌵𑍀 𑌮𑌹𑌾𑌰𑌾𑌜𑌂 𑌕𑍈𑌕𑍇𑌯𑍀 𑌰𑌾𑌜𑍍𑌯𑌕𑌾𑌰𑌣𑌾𑌤𑍍 ।
𑌅𑌪𑌿 𑌨 𑌚𑍍𑌯𑌾𑌵𑌯𑍇𑌤𑍍𑌪𑍍𑌰𑌾𑌣𑌾𑌨𑍍 𑌦𑍃𑌷𑍍𑌟𑍍𑌵𑌾 𑌭𑌰𑌤𑌮𑌾𑌗𑌤𑌮𑍍 ॥ ॥
𑌅𑌨𑌾𑌥𑌶𑍍𑌚 𑌹𑌿 𑌵𑍃𑌦𑍍𑌧𑌶𑍍𑌚 𑌮𑌯𑌾 𑌚𑍈𑌵 𑌵𑌿𑌨𑌾𑌕𑍃𑌤𑌃 ।
𑌕𑌿𑌂 𑌕𑌰𑌿𑌷𑍍𑌯𑌤𑌿 𑌕𑌾𑌮𑌾𑌤𑍍𑌮𑌾 𑌕𑍈𑌕𑍇𑌯𑍀 𑌵𑌶𑌮𑌾𑌗𑌤𑌃 ॥ ॥
𑌇𑌦𑌂 𑌵𑍍𑌯𑌸𑌨𑌮𑌾𑌲𑍋𑌕𑍍𑌯 𑌰𑌾𑌜𑍍𑌞𑌶𑍍𑌚 𑌮𑌤𑌿𑌵𑌿𑌭𑍍𑌰𑌮𑌮𑍍 ।
𑌕𑌾𑌮 𑌏𑌵𑌾𑌰𑍍𑌥𑌧𑌰𑍍𑌮𑌾𑌭𑍍𑌯𑌾𑌂 𑌗𑌰𑍀𑌯𑌾𑌨𑌿𑌤𑌿 𑌮𑍇 𑌮𑌤𑌿𑌃 ॥ ॥
𑌕𑍋 𑌹𑍍𑌯𑌵𑌿𑌦𑍍𑌵𑌾𑌨𑌪𑌿 𑌪𑍁𑌮𑌾𑌨𑍍 𑌪𑍍𑌰𑌮𑌦𑌾𑌯𑌾𑌃 𑌕𑍃𑌤𑍇 𑌤𑍍𑌯𑌜𑍇𑌤𑍍 ।
𑌛𑌂𑌦𑌾𑌨𑍁𑌵𑌰𑍍𑌤𑌿𑌨𑌂 𑌪𑍁𑌤𑍍𑌰𑌂 𑌤𑌾𑌤𑍋 𑌮𑌾𑌮𑌿𑌵 𑌲𑌕𑍍𑌷𑍍𑌮𑌣 ॥ 10 ॥
𑌸𑍁𑌖𑍀 𑌬𑌤 𑌸𑌭𑌾𑌰𑍍𑌯𑌶𑍍𑌚 𑌭𑌰𑌤𑌃 𑌕𑍇𑌕𑌯𑍀𑌸𑍁𑌤𑌃 ।
𑌮𑍁𑌦𑌿𑌤𑌾𑌨𑍍 𑌕𑍋𑌸𑌲𑌾𑌨𑍇𑌕𑍋 𑌯𑍋 𑌭𑍋𑌕𑍍𑌷𑍍𑌯𑌤𑍍𑌯𑌧𑌿𑌰𑌾𑌜𑌵𑌤𑍍 ॥ 11 ॥
𑌸 𑌹𑌿 𑌸𑌰𑍍𑌵𑌸𑍍𑌯 𑌰𑌾𑌜𑍍𑌯𑌸𑍍𑌯 𑌮𑍁𑌖𑌮𑍇𑌕𑌂 𑌭𑌵𑌿𑌷𑍍𑌯𑌤𑌿 ।
𑌤𑌾𑌤𑍇 𑌚 𑌵𑌯𑌸𑌾𑌽𑌤𑍀𑌤𑍇 𑌮𑌯𑌿 𑌚𑌾𑌰𑌣𑍍𑌯𑌮𑌾𑌸𑍍𑌥𑌿𑌤𑍇 ॥ 12 ॥
𑌅𑌰𑍍𑌥𑌧𑌰𑍍𑌮𑍌 𑌪𑌰𑌿𑌤𑍍𑌯𑌜𑍍𑌯 𑌯 𑌕𑌾𑌮𑌮𑌨𑍁𑌵𑌰𑍍𑌤𑌤𑍇 ।
𑌏𑌵𑌮𑌾𑌪𑌦𑍍𑌯𑌤𑍇 𑌕𑍍𑌷𑌿𑌪𑍍𑌰𑌂 𑌰𑌾𑌜𑌾 𑌦𑌶𑌰𑌥𑍋 𑌯𑌥𑌾 ॥ 13 ॥
𑌮𑌨𑍍𑌯𑍇 𑌦𑌶𑌰𑌥𑌾𑌂𑌤𑌾𑌯 𑌮𑌮 𑌪𑍍𑌰𑌵𑍍𑌰𑌾𑌜𑌨𑌾𑌯 𑌚 ।
𑌕𑍈𑌕𑍇𑌯𑍀 𑌸𑍌𑌮𑍍𑌯 𑌸𑌂𑌪𑍍𑌰𑌾𑌪𑍍𑌤𑌾 𑌰𑌾𑌜𑍍𑌯𑌾𑌯 𑌭𑌰𑌤𑌸𑍍𑌯 𑌚 ॥ 14 ॥
𑌅𑌪𑍀𑌦𑌾𑌨𑍀𑌂 𑌤𑍁 𑌕𑍈𑌕𑍇𑌯𑍀 𑌸𑍌𑌭𑌾𑌗𑍍𑌯𑌮𑌦𑌮𑍋𑌹𑌿𑌤𑌾 ।
𑌕𑍌𑌸𑌲𑍍𑌯𑌾𑌂 𑌚 𑌸𑍁𑌮𑌿𑌤𑍍𑌰𑌾𑌂 𑌚 𑌸𑌂𑌪𑍍𑌰𑌬𑌾𑌧𑍇𑌤 𑌮𑌤𑍍𑌕𑍃𑌤𑍇 ॥ 15 ॥
𑌮𑌾 𑌸𑍍𑌮 𑌮𑌤𑍍𑌕𑌾𑌰𑌣𑌾𑌦𑍍𑌦𑍇𑌵𑍀 𑌸𑍁𑌮𑌿𑌤𑍍𑌰𑌾 𑌦𑍁𑌃𑌖𑌮𑌾𑌵𑌸𑍇𑌤𑍍 ।
𑌅𑌯𑍋𑌧𑍍𑌯𑌾𑌮𑌿𑌤 𑌏𑌵 𑌤𑍍𑌵𑌂 𑌕𑌾𑌲𑍍𑌯𑍇 𑌪𑍍𑌰𑌵𑌿𑌶 𑌲𑌕𑍍𑌷𑍍𑌮𑌣 ॥ 16 ॥
𑌅𑌹𑌮𑍇𑌕𑍋 𑌗𑌮𑌿𑌷𑍍𑌯𑌾𑌮𑌿 𑌸𑍀𑌤𑌯𑌾 𑌸𑌹 𑌦𑌂𑌡𑌕𑌾𑌨𑍍 ।
𑌅𑌨𑌾𑌥𑌾𑌯𑌾 𑌹𑌿 𑌨𑌾𑌥𑌸𑍍𑌤𑍍𑌵𑌂 𑌕𑍌𑌶𑌲𑍍𑌯𑌾𑌯𑌾 𑌭𑌵𑌿𑌷𑍍𑌯𑌸𑌿 ॥ 1 ॥
𑌕𑍍𑌷𑍁𑌦𑍍𑌰𑌕𑌰𑍍𑌮𑌾 𑌹𑌿 𑌕𑍈𑌕𑍇𑌯𑍀 𑌦𑍍𑌵𑍇𑌷𑍍𑌯𑌮𑌨𑍍𑌯𑌾𑌯𑍍𑌯𑌮𑌾𑌚𑌰𑍇𑌤𑍍 ।
𑌪𑌰𑌿𑌦𑌦𑍍𑌯𑌾𑌹𑌿 𑌧𑌰𑍍𑌮𑌜𑍍𑌞𑍇 𑌭𑌰𑌤𑍇 𑌮𑌮 𑌮𑌾𑌤𑌰𑌮𑍍 ॥ 1 ॥
𑌨𑍂𑌨𑌂 𑌜𑌾𑌤𑍍𑌯𑌂𑌤𑌰𑍇 𑌕𑌸𑍍𑌮𑌿𑌨𑍍 𑌸𑍍𑌤𑍍𑌰𑌿𑌯𑌃 𑌪𑍁𑌤𑍍𑌰𑍈𑌰𑍍𑌵𑌿𑌯𑍋𑌜𑌿𑌤𑌾𑌃 ।
𑌜𑌨𑌨𑍍𑌯𑌾 𑌮𑌮 𑌸𑍌𑌮𑌿𑌤𑍍𑌰𑍇 𑌤𑌸𑍍𑌮𑌾𑌦𑍇𑌤𑌦𑍁𑌪𑌸𑍍𑌥𑌿𑌤𑌮𑍍 ॥ 1 ॥
𑌮𑌯𑌾 𑌹𑌿 𑌚𑌿𑌰𑌪𑍁𑌷𑍍𑌟𑍇𑌨 𑌦𑍁𑌖𑌸𑌂𑌵𑌰𑍍𑌧𑌿𑌤𑍇𑌨 𑌚 ।
𑌵𑌿𑌪𑍍𑌰𑌯𑍁𑌜𑍍𑌯𑌤 𑌕𑍌𑌶𑌲𑍍𑌯𑌾 𑌫𑌲𑌕𑌾𑌲𑍇 𑌧𑌿𑌗𑌸𑍍𑌤𑍁 𑌮𑌾𑌮𑍍 ॥ 20 ॥
𑌮𑌾 𑌸𑍍𑌮 𑌸𑍀𑌮𑌂𑌤𑌿𑌨𑍀 𑌕𑌾𑌚𑌿𑌜𑍍𑌜𑌨𑌯𑍇𑌤𑍍𑌪𑍁𑌤𑍍𑌰𑌮𑍀𑌦𑍃𑌶𑌮𑍍 ।
𑌸𑍌𑌮𑌿𑌤𑍍𑌰𑍇 𑌯𑍋𑌽𑌹𑌮𑌂𑌬𑌾𑌯𑌾 𑌦𑌦𑍍𑌮𑌿 𑌶𑍋𑌕𑌮𑌨𑌂𑌤𑌕𑌮𑍍 ॥ 21 ॥
𑌮𑌨𑍍𑌯𑍇 𑌪𑍍𑌰𑍀𑌤𑌿𑌵𑌿𑌶𑌿𑌷𑍍𑌟𑌾 𑌸𑌾 𑌮𑌤𑍍𑌤𑍋 𑌲𑌕𑍍𑌷𑍍𑌮𑌣 𑌶𑌾𑌰𑌿𑌕𑌾 ।
𑌯𑌸𑍍𑌯𑌾𑌸𑍍𑌤𑌚𑍍𑌛𑍍𑌰𑍂𑌯𑌤𑍇 𑌵𑌾𑌕𑍍𑌯𑌂 𑌶𑍁𑌕 𑌪𑌾𑌦𑌮𑌰𑍇𑌰𑍍𑌦𑌶 ॥ 22 ॥
𑌶𑍋𑌚𑌂𑌤𑍍𑌯𑌾 𑌅𑌲𑍍𑌪𑌭𑌾𑌗𑍍𑌯𑌾𑌯𑌾 𑌨 𑌕𑌿𑌂𑌚𑌿𑌦𑍁𑌪𑌕𑍁𑌰𑍍𑌵𑌤𑌾 ।
𑌪𑍁𑌤𑍍𑌰𑍇𑌣 𑌕𑌿𑌮𑌪𑍁𑌤𑍍𑌰𑌾𑌯𑌾 𑌮𑌯𑌾 𑌕𑌾𑌰𑍍𑌯𑌮𑌰𑌿𑌂𑌦𑌮 ॥ 23 ॥
𑌅𑌲𑍍𑌪𑌭𑌾𑌗𑍍𑌯𑌾 𑌹𑌿 𑌮𑍇 𑌮𑌾𑌤𑌾 𑌕𑍌𑌶𑌲𑍍𑌯𑌾 𑌰𑌹𑌿𑌤𑌾 𑌮𑌯𑌾 ।
𑌶𑍇𑌤𑍇 𑌪𑌰𑌮𑌦𑍁𑌃𑌖𑌾𑌰𑍍𑌤𑌾 𑌪𑌤𑌿𑌤𑌾 𑌶𑍋𑌕𑌸𑌾𑌗𑌰𑍇 ॥ 24 ॥
𑌏𑌕𑍋 𑌹𑍍𑌯𑌹𑌮𑌯𑍋𑌧𑍍𑌯𑌾𑌂 𑌚 𑌪𑍃𑌥𑌿𑌵𑍀𑌂 𑌚𑌾𑌪𑌿 𑌲𑌕𑍍𑌷𑍍𑌮𑌣 ।
𑌤𑌰𑍇𑌯𑌮𑌿𑌷𑍁𑌭𑌿𑌃 𑌕𑍍𑌰𑍁𑌦𑍍𑌧𑍋 𑌨𑌨𑍁 𑌵𑍀𑌰𑍍𑌯𑌮𑌕𑌾𑌰𑌣𑌮𑍍 ॥ 25 ॥
𑌅𑌧𑌰𑍍𑌮𑌭𑌯𑌭𑍀𑌤𑌶𑍍𑌚 𑌪𑌰𑌲𑍋𑌕𑌸𑍍𑌯 𑌚𑌾𑌨𑌘 ।
𑌤𑍇𑌨 𑌲𑌕𑍍𑌷𑍍𑌮𑌣 𑌨𑌾𑌦𑍍𑌯𑌾𑌹 𑌮𑌾𑌤𑍍𑌮𑌾𑌨𑌮𑌭𑌿𑌷𑍇𑌚𑌯𑍇 ॥ 26 ॥
𑌏𑌤𑌦𑌨𑍍𑌯𑌶𑍍𑌚 𑌕𑌰𑍁𑌣𑌂 𑌵𑌿𑌲𑌪𑍍𑌯 𑌵𑌿𑌜𑌨𑍇 𑌵𑌨𑍇 ।
𑌅𑌶𑍍𑌰𑍁𑌪𑍂𑌰𑍍𑌣𑌮𑍁𑌖𑍋 𑌰𑌾𑌮𑍋 𑌨𑌿𑌶𑌿 𑌤𑍂𑌷𑍍𑌣𑍀𑌮𑍁𑌪𑌾𑌵𑌿𑌶𑌤𑍍 ॥ 2 ॥
𑌵𑌿𑌲𑌪𑍍𑌯𑍋𑌪𑌰𑌤𑌂 𑌰𑌾𑌮𑌂 𑌗𑌤𑌾𑌰𑍍𑌚𑌿𑌷𑌮𑌿𑌵𑌾𑌨𑌲𑌮𑍍 ।
𑌸𑌮𑍁𑌦𑍍𑌰𑌮𑌿𑌵 𑌨𑌿𑌰𑍍𑌵𑍇𑌗𑌮𑌾𑌶𑍍𑌵𑌾𑌸𑌯𑌤 𑌲𑌕𑍍𑌷𑍍𑌮𑌣𑌃 ॥ 2 ॥
𑌧𑍍𑌰𑍁𑌵𑌮𑌦𑍍𑌯 𑌪𑍁𑌰𑍀 𑌰𑌾𑌜𑌨𑍍𑌨𑌯𑍋𑌧𑍍𑌯𑌾𑌯𑍁𑌧𑌿𑌨𑌾𑌂 𑌵𑌰 ।
𑌨𑌿𑌷𑍍𑌪𑍍𑌰𑌭𑌾 𑌤𑍍𑌵𑌯𑌿 𑌨𑌿𑌷𑍍𑌕𑍍𑌰𑌾𑌂𑌤𑍇 𑌗𑌤𑌚𑌂𑌦𑍍𑌰𑍇𑌵 𑌶𑌰𑍍𑌵𑌰𑍀 ॥ 2 ॥
𑌨𑍈𑌤𑌦𑍌𑌪𑌯𑌿𑌕𑌂 𑌰𑌾𑌮 𑌯𑌦𑌿𑌦𑌂 𑌪𑌰𑌿𑌤𑌪𑍍𑌯𑌤𑍇 ।
𑌵𑌿𑌷𑌾𑌦𑌯𑌸𑌿 𑌸𑍀𑌤𑌾𑌂 𑌚 𑌮𑌾𑌂 𑌚𑍈𑌵 𑌪𑍁𑌰𑍁𑌷𑌰𑍍𑌷𑌭 ॥ 30 ॥
𑌨 𑌚 𑌸𑍀𑌤𑌾 𑌤𑍍𑌵𑌯𑌾 𑌹𑍀𑌨𑌾 𑌨 𑌚𑌾𑌹𑌮𑌪𑌿 𑌰𑌾𑌘𑌵 ।
𑌮𑍁𑌹𑍂𑌰𑍍𑌤𑌮𑌪𑌿 𑌜𑍀𑌵𑌾𑌵𑍋 𑌜𑌲𑌾𑌨𑍍𑌮𑌤𑍍𑌸𑍍𑌯𑌾𑌵𑌿𑌨𑍋𑌦𑍍𑌧𑍃𑌤𑍌 ॥ 31 ॥
𑌨𑌹𑌿 𑌤𑌾𑌤𑌂 𑌨 𑌶𑌤𑍍𑌰𑍁𑌘𑍍𑌨𑌂 𑌨 𑌸𑍁𑌮𑌿𑌤𑍍𑌰𑌾𑌂 𑌪𑌰𑌂𑌤𑌪 ।
𑌦𑍍𑌰𑌷𑍍𑌟𑍁𑌮𑌿𑌚𑍍𑌛𑍇𑌯𑌮𑌦𑍍𑌯𑌾𑌹𑌂 𑌸𑍍𑌵𑌰𑍍𑌗𑌂 𑌚𑌾𑌪𑌿 𑌤𑍍𑌵𑌯𑌾 𑌵𑌿𑌨𑌾 ॥ 32 ॥
𑌤𑌤𑌸𑍍𑌤𑌤𑍍𑌰 𑌸𑍁𑌖𑌾𑌸𑍀𑌨𑍌 𑌨𑌾𑌤𑌿𑌦𑍂𑌰𑍇 𑌨𑌿𑌰𑍀𑌕𑍍𑌷𑍍𑌯 𑌤𑌾𑌮𑍍 ।
𑌨𑍍𑌯𑌗𑍍𑌰𑍋𑌧𑍇 𑌸𑍁𑌕𑍃𑌤𑌾𑌂 𑌶𑌯𑍍𑌯𑌾𑌂 𑌭𑍇𑌜𑌾𑌤𑍇 𑌧𑌰𑍍𑌮𑌵𑌤𑍍𑌸𑌲𑍌 ॥ 33 ॥
𑌸 𑌲𑌕𑍍𑌷𑍍𑌮𑌣𑌸𑍍𑌯𑍋𑌤𑍍𑌤𑌮𑌪𑍁𑌷𑍍𑌕𑌲𑌂 𑌵𑌚𑍋 𑌨𑌿𑌶𑌮𑍍𑌯 𑌚𑍈𑌵𑌂 𑌵𑌨𑌵𑌾𑌸𑌮𑌾𑌦𑌰𑌾𑌤𑍍 ।
𑌸𑌮𑌾𑌃 𑌸𑌮𑌸𑍍𑌤𑌾 𑌵𑌿𑌦𑌧𑍇 𑌪𑌰𑌂𑌤𑌪𑌃 𑌪𑍍𑌰𑌪𑌦𑍍𑌯 𑌧𑌰𑍍𑌮𑌂 𑌸𑍁𑌚𑌿𑌰𑌾𑌯 𑌰𑌾𑌘𑌵𑌃 ॥ 34 ॥
𑌤𑌤𑌸𑍍𑌤𑍁 𑌤𑌸𑍍𑌮𑌿𑌨𑍍 𑌵𑌿𑌜𑌨𑍇 𑌵𑌨𑍇 𑌤𑌦𑌾 𑌮𑌹𑌾𑌬𑌲𑍌 𑌰𑌾𑌘𑌵𑌵𑌂𑌶𑌵𑌰𑍍𑌧𑌨𑍌 ।
𑌨 𑌤𑍌 𑌭𑌯𑌂 𑌸𑌂𑌭𑍍𑌰𑌮𑌮𑌭𑍍𑌯𑍁𑌪𑍇𑌯𑌤𑍁 𑌰𑍍𑌯𑌥𑍈𑌵 𑌸𑌿𑌂𑌹𑍌 𑌗𑌿𑌰𑌿𑌸𑌾𑌨𑍁𑌗𑍋𑌚𑌰𑍌 ॥ 35 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌤𑍍𑌰𑌿𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
