𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
. 𑌜𑌨𑌕𑌸𑍍𑌯 𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌮𑍁𑌨𑌿𑌃 ।
𑌧𑌨𑍁𑌰𑍍𑌦𑌰𑍍𑌶𑌯 𑌰𑌾𑌮𑌾𑌯 𑌇𑌤𑌿 𑌹𑍋𑌵𑌾𑌚 𑌪𑌾𑌰𑍍𑌥𑌿𑌵𑌮𑍍 ॥ 1 ॥
𑌤𑌤𑌸𑍍𑌸 𑌰𑌾𑌜𑌾 𑌜𑌨𑌕𑌃 𑌸𑌾𑌮𑌂𑌤𑌾𑌨𑍍𑌵𑍍𑌯𑌾𑌦𑌿𑌦𑍇𑌶 𑌹 ।
𑌧𑌨𑍁𑌰𑌾𑌨𑍀𑌯𑌤𑌾𑌂 𑌦𑌿𑌵𑍍𑌯𑌂 𑌗𑌂𑌧𑌮𑌾𑌲𑍍𑌯𑌵𑌿𑌭𑍂𑌷𑌿𑌤𑌮𑍍 ॥ 2 ॥
𑌜𑌨𑌕𑍇𑌨 𑌸𑌮𑌾𑌦𑌿𑌷𑍍𑌟𑌾𑌃 𑌸𑌚𑌿𑌵𑌾 𑌪𑍍𑌰𑌾𑌵𑌿𑌶𑌨𑍍 𑌪𑍁𑌰𑍀𑌮𑍍 ।
𑌤𑌦𑍍𑌧𑌨𑍁𑌃 𑌪𑍁𑌰𑌤𑌃 𑌕𑍃𑌤𑍍𑌵𑌾 𑌨𑌿𑌰𑍍𑌜𑌗𑍍𑌮𑍁𑌃 𑌪𑌾𑌰𑍍𑌥𑌿𑌵𑌾𑌜𑍍𑌞𑌯𑌾 ॥ 3 ॥
𑌨𑍃𑌣𑌾𑌂 𑌶𑌤𑌾𑌨𑌿 𑌪𑌂𑌚𑌾𑌶𑌦𑍍𑌵𑍍𑌯𑌾𑌯𑌤𑌾𑌨𑌾𑌂 𑌮𑌹𑌾𑌤𑍍𑌮𑌨𑌾𑌮𑍍 ।
𑌮𑌂𑌜𑍂𑌷𑌾𑌮𑌷𑍍𑌟𑌚𑌕𑍍𑌰𑌾𑌂 𑌤𑌾𑌂 𑌸𑌮𑍂𑌹𑍁𑌸𑍍𑌤𑍇 𑌕𑌥𑌂𑌚𑌨 ॥ 4 ॥
𑌤𑌾𑌮𑌾𑌦𑌾𑌯 𑌤𑍁 𑌮𑌂𑌜𑍂𑌷𑌾𑌮𑌾𑌯𑌸𑍀𑌂 𑌯𑌤𑍍𑌰 𑌤𑌦𑍍𑌧𑌨𑍁𑌃 ।
𑌸𑍁𑌰𑍋𑌪𑌮𑌂 𑌤𑍇 𑌜𑌨𑌕𑌮𑍂𑌚𑍁𑌰𑍍𑌨𑍃𑌪𑌤𑌿𑌮𑌂𑌤𑍍𑌰𑌿𑌣𑌃 ॥ 5 ॥
𑌇𑌦𑌂 𑌧𑌨𑍁𑌰𑍍𑌵𑌰𑌂 𑌰𑌾𑌜𑌨𑍍 𑌪𑍂𑌜𑌿𑌤𑌂 𑌸𑌰𑍍𑌵𑌰𑌾𑌜𑌭𑌿𑌃 ।
𑌮𑌿𑌥𑌿𑌲𑌾𑌧𑌿𑌪 𑌰𑌾𑌜𑍇𑌂𑌦𑍍𑌰 𑌦𑌰𑍍𑌶𑌨𑍀𑌯𑌂 𑌯𑌦𑌿𑌚𑍍𑌛𑌸𑌿 ॥ 6 ॥
𑌤𑍇𑌷𑌾𑌂 𑌨𑍃𑌪𑍋 𑌵𑌚𑌃 𑌶𑍍𑌰𑍁𑌤𑍍𑌵𑌾 𑌕𑍃𑌤𑌾𑌂𑌜𑌲𑌿𑌰𑌭𑌾𑌷𑌤 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌂 𑌮𑌹𑌾𑌤𑍍𑌮𑌾𑌨𑌂 𑌤𑍌 𑌚𑍋𑌭𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ ॥
𑌇𑌦𑌂 𑌧𑌨𑍁𑌰𑍍𑌵𑌰𑌂 𑌬𑍍𑌰𑌹𑍍𑌮𑌨𑍍 𑌜𑌨𑌕𑍈𑌰𑌭𑌿𑌪𑍂𑌜𑌿𑌤𑌮𑍍 ।
𑌰𑌾𑌜𑌭𑌿𑌶𑍍𑌚 𑌮𑌹𑌾𑌵𑍀𑌰𑍍𑌯𑍈𑌃 𑌅𑌶𑌕𑍍𑌤𑍈𑌃 𑌪𑍂𑌰𑌿𑌤𑍁𑌂 𑌪𑍁𑌰𑌾 ॥ ॥
𑌨𑍈𑌤𑌤𑍍𑌸𑍁𑌰𑌗𑌣𑌾𑌸𑍍𑌸𑌰𑍍𑌵𑍇 𑌨𑌾𑌸𑍁𑌰𑌾 𑌨 𑌚 𑌰𑌾𑌕𑍍𑌷𑌸𑌾𑌃 ।
𑌗𑌂𑌧𑌰𑍍𑌵𑌯𑌕𑍍𑌷𑌪𑍍𑌰𑌵𑌰𑌾𑌃 𑌸𑌕𑌿𑌨𑍍𑌨𑌰𑌮𑌹𑍋𑌰𑌗𑌾𑌃 ॥ ॥
𑌕𑍍𑌵 𑌗𑌤𑌿𑌰𑍍𑌮𑌾𑌨𑍁𑌷𑌾𑌣𑌾𑌂 𑌚 𑌧𑌨𑍁𑌷𑍋𑌽𑌸𑍍𑌯 𑌪𑍍𑌰𑌪𑍂𑌰𑌣𑍇 ।
𑌆𑌰𑍋𑌪𑌣𑍇 𑌸𑌮𑌾𑌯𑍋𑌗𑍇 𑌵𑍇𑌪𑌨𑍇 𑌤𑍋𑌲𑌨𑍇𑌽𑌪𑌿 𑌵𑌾 ॥ 10 ॥
𑌤𑌦𑍇𑌤𑌦𑍍𑌧𑌨𑍁𑌷𑌾𑌂 𑌶𑍍𑌰𑍇𑌷𑍍𑌠𑌮𑌾𑌨𑍀𑌤𑌂 𑌮𑍁𑌨𑌿𑌪𑍁𑌂𑌗𑌵 ।
𑌦𑌰𑍍𑌶𑌯𑍈𑌤𑌨𑍍𑌮𑌹𑌾𑌭𑌾𑌗 𑌅𑌨𑌯𑍋𑌃 𑌰𑌾𑌜𑌪𑍁𑌤𑍍𑌰𑌯𑍋𑌃 ॥ 11 ॥
𑌵𑌿𑌶𑍍𑌵𑌾𑌮𑌿𑌤𑍍𑌰𑌸𑍍𑌤𑍁 𑌧𑌰𑍍𑌮𑌾𑌤𑍍𑌮𑌾 𑌶𑍍𑌰𑍁𑌤𑍍𑌵𑌾 𑌜𑌨𑌕𑌭𑌾𑌷𑌿𑌤𑌮𑍍 ।
𑌵𑌤𑍍𑌸 𑌰𑌾𑌮 𑌧𑌨𑍁𑌃 𑌪𑌶𑍍𑌯 𑌇𑌤𑌿 𑌰𑌾𑌘𑌵𑌮𑌬𑍍𑌰𑌵𑍀𑌤𑍍 ॥ 12 ॥
𑌬𑍍𑌰𑌹𑍍𑌮𑌰𑍍𑌷𑍇𑌰𑍍𑌵𑌚𑌨𑌾𑌦𑍍𑌰𑌾𑌮𑍋 𑌯𑌤𑍍𑌰 𑌤𑌿𑌷𑍍𑌠𑌤𑌿 𑌤𑌦𑍍𑌧𑌨𑍁𑌃 ।
𑌮𑌂𑌜𑍂𑌷𑌾𑌂 𑌤𑌾𑌮𑌪𑌾𑌵𑍃𑌤𑍍𑌯 𑌦𑍃𑌷𑍍𑌟𑍍𑌵𑌾 𑌧𑌨𑍁𑌰𑌥𑌾𑌬𑍍𑌰𑌵𑍀𑌤𑍍 ॥ 13 ॥
𑌇𑌦𑌂 𑌧𑌨𑍁𑌰𑍍𑌵𑌰𑌂 𑌬𑍍𑌰𑌹𑍍𑌮𑌨𑍍 𑌸𑌂𑌸𑍍𑌪𑍃𑌶𑌾𑌮𑍀𑌹 𑌪𑌾𑌣𑌿𑌨𑌾 ।
𑌯𑌤𑍍𑌨𑌵𑌾𑌂𑌶𑍍𑌚 𑌭𑌵𑌿𑌷𑍍𑌯𑌾𑌮𑌿 𑌤𑍋𑌲𑌨𑍇 𑌪𑍂𑌰𑌣𑍇𑌽𑌪𑌿 𑌵𑌾 ॥ 14 ॥
𑌬𑌾𑌢𑌮𑌿𑌤𑍍𑌯𑍇𑌵 𑌤𑌂 𑌰𑌾𑌜𑌾 𑌮𑍁𑌨𑌿𑌶𑍍𑌚 𑌸𑌮𑌭𑌾𑌷𑌤 ।
𑌲𑍀𑌲𑌯𑌾 𑌸 𑌧𑌨𑍁𑌰𑍍𑌮𑌧𑍍𑌯𑍇 𑌜𑌗𑍍𑌰𑌾𑌹 𑌵𑌚𑌨𑌾𑌨𑍍𑌮𑍁𑌨𑍇𑌃 ॥ 15 ॥
𑌪𑌶𑍍𑌯𑌤𑌾𑌂 𑌨𑍃𑌪𑌸𑌹𑌸𑍍𑌰𑌾𑌣𑌾𑌂 𑌬𑌹𑍂𑌨𑌾𑌂 𑌰𑌘𑍁𑌨𑌂𑌦𑌨𑌃 ।
𑌆𑌰𑍋𑌪𑌯𑌤𑍍𑌸 𑌧𑌰𑍍𑌮𑌾𑌤𑍍𑌮𑌾 𑌸𑌲𑍀𑌲𑌮𑌿𑌵 𑌤𑌦𑍍𑌧𑌨𑍁𑌃 ॥ 16 ॥
𑌆𑌰𑍋𑌪𑌯𑌿𑌤𑍍𑌵𑌾 𑌧𑌰𑍍𑌮𑌾𑌤𑍍𑌮𑌾 𑌪𑍂𑌰𑌯𑌾𑌮𑌾𑌸 𑌤𑌦𑍍𑌧𑌨𑍁𑌃 ।
𑌤𑌦𑍍𑌬𑌭𑌂𑌜 𑌧𑌨𑍁𑌰𑍍𑌮𑌧𑍍𑌯𑍇 𑌨𑌰𑌶𑍍𑌰𑍇𑌷𑍍𑌠𑍋 𑌮𑌹𑌾𑌯𑌶𑌾𑌃 ॥ 1 ॥
𑌤𑌸𑍍𑌯 𑌶𑌬𑍍𑌦𑍋 𑌮𑌹𑌾𑌨𑌾𑌸𑍀𑌤𑍍 𑌨𑌿𑌰𑍍𑌘𑌾𑌤𑌸𑌮𑌨𑌿𑌸𑍍𑌵𑌨𑌃 ।
𑌭𑍂𑌮𑌿𑌕𑌂𑌪𑌶𑍍𑌚 𑌸𑍁𑌮𑌹𑌾𑌨𑍍 𑌪𑌰𑍍𑌵𑌤𑌸𑍍𑌯𑍇𑌵 𑌦𑍀𑌰𑍍𑌯𑌤𑌃 ॥ 1 ॥
𑌨𑌿𑌪𑍇𑌤𑍁𑌶𑍍𑌚 𑌨𑌰𑌾 𑌸𑍍𑌸𑌰𑍍𑌵𑍇 𑌤𑍇𑌨 𑌶𑌬𑍍𑌦𑍇𑌨 𑌮𑍋𑌹𑌿𑌤𑌾𑌃 ।
𑌵𑌰𑍍𑌜𑌯𑌿𑌤𑍍𑌵𑌾 𑌮𑍁𑌨𑌿𑌵𑌰𑌂 𑌰𑌾𑌜𑌾𑌨𑌂 𑌤𑍌 𑌚 𑌰𑌾𑌘𑌵𑍌 ॥ 1 ॥
𑌪𑍍𑌰𑌤𑍍𑌯𑌾𑌶𑍍𑌵𑌸𑍍𑌤𑍇 𑌜𑌨𑍇 𑌤𑌸𑍍𑌮𑌿𑌨𑍍𑌰𑌾𑌜𑌾 𑌵𑌿𑌗𑌤𑌸𑌾𑌧𑍍𑌵𑌸𑌃 ।
𑌉𑌵𑌾𑌚 𑌪𑍍𑌰𑌾𑌂𑌜𑌲𑌿𑌰𑍍𑌵𑌾𑌕𑍍𑌯𑌂 𑌵𑌾𑌕𑍍𑌯𑌜𑍍𑌞𑍋 𑌮𑍁𑌨𑌿𑌪𑍁𑌂𑌗𑌵𑌮𑍍 ॥ 20 ॥
𑌭𑌗𑌵𑌨𑍍 𑌦𑍃𑌷𑍍𑌟𑌵𑍀𑌰𑍍𑌯𑍋 𑌮𑍇 𑌰𑌾𑌮𑍋 𑌦𑌶𑌰𑌥𑌾𑌤𑍍𑌮𑌜𑌃 ।
𑌅𑌤𑍍𑌯𑌦𑍍𑌭𑍁𑌤𑌮𑌚𑌿𑌂𑌤𑍍𑌯𑌂 𑌚 𑌨 𑌤𑌰𑍍𑌕𑌿𑌤𑌮𑌿𑌦𑌂 𑌮𑌯𑌾 ॥ 21 ॥
𑌜𑌨𑌕𑌾𑌨𑌾𑌂 𑌕𑍁𑌲𑍇 𑌕𑍀𑌰𑍍𑌤𑌿𑌮𑌾𑌹𑌰𑌿𑌷𑍍𑌯𑌤𑌿 𑌮𑍇 𑌸𑍁𑌤𑌾 ।
𑌸𑍀𑌤𑌾 𑌭𑌰𑍍𑌤𑌾𑌰𑌮𑌾𑌸𑌾𑌦𑍍𑌯 𑌰𑌾𑌮𑌂 𑌦𑌶𑌰𑌥𑌾𑌤𑍍𑌮𑌜𑌮𑍍 ॥ 22 ॥
𑌮𑌮 𑌸𑌤𑍍𑌯𑌾 𑌪𑍍𑌰𑌤𑌿𑌜𑍍𑌞𑌾 𑌚 𑌵𑍀𑌰𑍍𑌯𑌶𑍁𑌲𑍍𑌕𑍇𑌤𑌿 𑌕𑍌𑌶𑌿𑌕 ।
𑌸𑍀𑌤𑌾 𑌪𑍍𑌰𑌾𑌣𑍈𑌰𑍍𑌬𑌹𑍁𑌮𑌤𑌾 𑌦𑍇𑌯𑌾 𑌰𑌾𑌮𑌾𑌯 𑌮𑍇 𑌸𑍁𑌤𑌾 ॥ 23 ॥
𑌭𑌵𑌤𑍋𑌽𑌨𑍁𑌮𑌤𑍇 𑌬𑍍𑌰𑌹𑍍𑌮𑌨𑍍 𑌶𑍀𑌘𑍍𑌰𑌂 𑌗𑌚𑍍𑌛𑌂𑌤𑍁 𑌮𑌂𑌤𑍍𑌰𑌿𑌣𑌃 ।
𑌮𑌮 𑌕𑍌𑌶𑌿𑌕 𑌭𑌦𑍍𑌰𑌂 𑌤𑍇 𑌅𑌯𑍋𑌧𑍍𑌯𑌾𑌂 𑌤𑍍𑌵𑌰𑌿𑌤𑌾 𑌰𑌥𑍈𑌃 ॥ 24 ॥
𑌰𑌾𑌜𑌾𑌨𑌂 𑌪𑍍𑌰𑌶𑍍𑌰𑌿𑌤𑍈𑌰𑍍𑌵𑌾𑌕𑍍𑌯𑍈𑌰𑌾𑌨𑌯𑌂𑌤𑍁 𑌪𑍁𑌰𑌂 𑌮𑌮 ।
𑌪𑍍𑌰𑌦𑌾𑌨𑌂 𑌵𑍀𑌰𑍍𑌯𑌶𑍁𑌲𑍍𑌕𑌾𑌯𑌾𑌃 𑌕𑌥𑌯𑌂𑌤𑍁 𑌚 𑌸𑌰𑍍𑌵𑌶𑌃 ॥ 25 ॥
𑌮𑍁𑌨𑌿𑌗𑍁𑌪𑍍𑌤𑍌 𑌚 𑌕𑌾𑌕𑍁𑌤𑍍𑌸𑍍𑌥𑍌 𑌕𑌥𑌯𑌂𑌤𑍁 𑌨𑍃𑌪𑌾𑌯 𑌵𑍈 ।
𑌪𑍍𑌰𑍀𑌯𑌮𑌾𑌣𑌂 𑌤𑍁 𑌰𑌾𑌜𑌾𑌨𑌮𑌾𑌨𑌯𑌂𑌤𑍁 𑌸𑍁𑌶𑍀𑌘𑍍𑌰𑌗𑌾𑌃 ॥ 26 ॥
𑌕𑍌𑌶𑌿𑌕𑌶𑍍𑌚 𑌤𑌥𑍇𑌤𑍍𑌯𑌾𑌹 𑌰𑌾𑌜𑌾 𑌚𑌾𑌭𑌾𑌷𑍍𑌯 𑌮𑌂𑌤𑍍𑌰𑌿𑌣𑌃 ॥ 2 ॥
𑌅𑌯𑍋𑌧𑍍𑌯𑌾𑌂 𑌪𑍍𑌰𑍇𑌷𑌯𑌾𑌮𑌾𑌸 𑌧𑌰𑍍𑌮𑌾𑌤𑍍𑌮𑌾 𑌕𑍃𑌤𑌶𑌾𑌸𑌨𑌾𑌨𑍍 ।
𑌯𑌥𑌾𑌵𑍃𑌤𑍍𑌤𑌂 𑌸𑌮𑌾𑌖𑍍𑌯𑌾𑌤𑍁𑌮𑌾𑌨𑍇𑌤𑍁𑌂 𑌚 𑌨𑍃𑌪𑌂 𑌤𑌦𑌾 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌸𑌪𑍍𑌤𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
