𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌾𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌸𑍀𑌤𑌾𑌯𑌾 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌪𑌰𑍁𑌷𑌂 𑌰𑌾𑌕𑍍𑌷𑌸𑌾𑌧𑌿𑌪𑌃 ।
𑌪𑍍𑌰𑌤𑍍𑌯𑍁𑌵𑌾𑌚 𑌤𑌤𑌃 𑌸𑍀𑌤𑌾𑌂 𑌵𑌿𑌪𑍍𑌰𑌿𑌯𑌂 𑌪𑍍𑌰𑌿𑌯𑌦𑌰𑍍𑌶𑌨𑌾𑌮𑍍 ॥ 1 ॥
𑌯𑌥𑌾 𑌯𑌥𑌾 𑌸𑌾𑌂𑌤𑍍𑌵𑌯𑌿𑌤𑌾 𑌵𑌶𑍍𑌯𑌃 𑌸𑍍𑌤𑍍𑌰𑍀𑌣𑌾𑌂 𑌤𑌥𑌾 𑌤𑌥𑌾 ।
𑌯𑌥𑌾 𑌯𑌥𑌾 𑌪𑍍𑌰𑌿𑌯𑌂 𑌵𑌕𑍍𑌤𑌾 𑌪𑌰𑌿𑌭𑍂𑌤𑌸𑍍𑌤𑌥𑌾 𑌤𑌥𑌾 ॥ 2 ॥
𑌸𑌨𑍍𑌨𑌿𑌯𑌚𑍍𑌛𑌤𑌿 𑌮𑍇 𑌕𑍍𑌰𑍋𑌧𑌂 𑌤𑍍𑌵𑌯𑌿 𑌕𑌾𑌮𑌃 𑌸𑌮𑍁𑌤𑍍𑌥𑌿𑌤𑌃 ।
𑌦𑍍𑌰𑌵𑌤𑍋𑌽𑌮𑌾𑌰𑍍𑌗𑌮𑌾𑌸𑌾𑌦𑍍𑌯 𑌹𑌯𑌾𑌨𑌿𑌵 𑌸𑍁𑌸𑌾𑌰𑌥𑌿𑌃 ॥ 3 ॥
𑌵𑌾𑌮𑌃 𑌕𑌾𑌮𑍋 𑌮𑌨𑍁𑌷𑍍𑌯𑌾𑌣𑌾𑌂 𑌯𑌸𑍍𑌮𑌿𑌨𑍍 𑌕𑌿𑌲 𑌨𑌿𑌬𑌧𑍍𑌯𑌤𑍇 ।
𑌜𑌨𑍇 𑌤𑌸𑍍𑌮𑌿𑌂𑌸𑍍𑌤𑍍𑌵𑌨𑍁𑌕𑍍𑌰𑍋𑌶𑌃 𑌸𑍍𑌨𑍇𑌹𑌶𑍍𑌚 𑌕𑌿𑌲 𑌜𑌾𑌯𑌤𑍇 ॥ 4 ॥
𑌏𑌤𑌸𑍍𑌮𑌾𑌤𑍍𑌕𑌾𑌰𑌣𑌾𑌨𑍍𑌨 𑌤𑍍𑌵𑌾𑌂 𑌘𑌾𑌤𑌯𑌾𑌮𑌿 𑌵𑌰𑌾𑌨𑌨𑍇 ।
𑌵𑌧𑌾𑌰𑍍𑌹𑌾𑌮𑌵𑌮𑌾𑌨𑌾𑌰𑍍𑌹𑌾𑌂 𑌮𑌿𑌥𑍍𑌯𑌾𑌪𑍍𑌰𑌵𑍍𑌰𑌜𑌿𑌤𑍇 𑌰𑌤𑌾𑌮𑍍 ॥ 5 ॥
𑌪𑌰𑍁𑌷𑌾𑌣𑍀𑌹 𑌵𑌾𑌕𑍍𑌯𑌾𑌨𑌿 𑌯𑌾𑌨𑌿 𑌯𑌾𑌨𑌿 𑌬𑍍𑌰𑌵𑍀𑌷𑌿 𑌮𑌾𑌮𑍍 ।
𑌤𑍇𑌷𑍁 𑌤𑍇𑌷𑍁 𑌵𑌧𑍋 𑌯𑍁𑌕𑍍𑌤𑌸𑍍𑌤𑌵 𑌮𑍈𑌥𑌿𑌲𑌿 𑌦𑌾𑌰𑍁𑌣𑌃 ॥ 6 ॥
𑌏𑌵𑌮𑍁𑌕𑍍𑌤𑍍𑌵𑌾 𑌤𑍁 𑌵𑍈𑌦𑍇𑌹𑍀𑌂 𑌰𑌾𑌵𑌣𑍋 𑌰𑌾𑌕𑍍𑌷𑌸𑌾𑌧𑌿𑌪𑌃 ।
𑌕𑍍𑌰𑍋𑌧𑌸𑌂𑌰𑌂𑌭𑌸𑌂𑌯𑍁𑌕𑍍𑌤𑌃 𑌸𑍀𑌤𑌾𑌮𑍁𑌤𑍍𑌤𑌰𑌮𑌬𑍍𑌰𑌵𑍀𑌤𑍍 ॥ ॥
𑌦𑍍𑌵𑍌 𑌮𑌾𑌸𑍌 𑌰𑌕𑍍𑌷𑌿𑌤𑌵𑍍𑌯𑍌 𑌮𑍇 𑌯𑍋𑌽𑌵𑌧𑌿𑌸𑍍𑌤𑍇 𑌮𑌯𑌾 𑌕𑍃𑌤𑌃 ।
𑌤𑌤𑌃 𑌶𑌯𑌨𑌮𑌾𑌰𑍋𑌹 𑌮𑌮 𑌤𑍍𑌵𑌂 𑌵𑌰𑌵𑌰𑍍𑌣𑌿𑌨𑌿 ॥ ॥
𑌊𑌰𑍍𑌧𑍍𑌵𑌂 𑌦𑍍𑌵𑌾𑌭𑍍𑌯𑌾𑌂 𑌤𑍁 𑌮𑌾𑌸𑌾𑌭𑍍𑌯𑌾𑌂 𑌭𑌰𑍍𑌤𑌾𑌰𑌂 𑌮𑌾𑌮𑌨𑌿𑌚𑍍𑌛𑌤𑍀𑌮𑍍 ।
𑌮𑌮 𑌤𑍍𑌵𑌾𑌂 𑌪𑍍𑌰𑌾𑌤𑌰𑌾𑌶𑌾𑌰𑍍𑌥𑌮𑌾𑌲𑌭𑌂𑌤𑍇 𑌮𑌹𑌾𑌨𑌸𑍇 ॥ ॥
𑌤𑌾𑌂 𑌤𑌰𑍍𑌜𑍍𑌯𑌮𑌾𑌨𑌾𑌂 𑌸𑌂𑌪𑍍𑌰𑍇𑌕𑍍𑌷𑍍𑌯 𑌰𑌾𑌕𑍍𑌷𑌸𑍇𑌂𑌦𑍍𑌰𑍇𑌣 𑌜𑌾𑌨𑌕𑍀𑌮𑍍 ।
𑌦𑍇𑌵𑌗𑌂𑌧𑌰𑍍𑌵𑌕𑌨𑍍𑌯𑌾𑌸𑍍𑌤𑌾 𑌵𑌿𑌷𑍇𑌦𑍁𑌰𑍍𑌵𑌿𑌕𑍃𑌤𑍇𑌕𑍍𑌷𑌣𑌾𑌃 ॥ 10 ॥
𑌓𑌷𑍍𑌠𑌪𑍍𑌰𑌕𑌾𑌰𑍈𑌰𑌪𑌰𑌾 𑌵𑌕𑍍𑌤𑍍𑌰𑌨𑍇𑌤𑍍𑌰𑍈𑌸𑍍𑌤𑌥𑌾𑌪𑌰𑌾𑌃 ।
𑌸𑍀𑌤𑌾𑌮𑌾𑌶𑍍𑌵𑌾𑌸𑌯𑌾𑌮𑌾𑌸𑍁𑌸𑍍𑌤𑌰𑍍𑌜𑌿𑌤𑌾𑌂 𑌤𑍇𑌨 𑌰𑌕𑍍𑌷𑌸𑌾 ॥ 11 ॥
𑌤𑌾𑌭𑌿𑌰𑌾𑌶𑍍𑌵𑌾𑌸𑌿𑌤𑌾 𑌸𑍀𑌤𑌾 𑌰𑌾𑌵𑌣𑌂 𑌰𑌾𑌕𑍍𑌷𑌸𑌾𑌧𑌿𑌪𑌮𑍍 ।
𑌉𑌵𑌾𑌚𑌾𑌤𑍍𑌮𑌹𑌿𑌤𑌂 𑌵𑌾𑌕𑍍𑌯𑌂 𑌵𑍃𑌤𑍍𑌤𑌶𑍌𑌂𑌡𑍀𑌰𑍍𑌯𑌗𑌰𑍍𑌵𑌿𑌤𑌮𑍍 ॥ 12 ॥
𑌨𑍂𑌨𑌂 𑌨 𑌤𑍇 𑌜𑌨𑌃 𑌕𑌶𑍍𑌚𑌿𑌦𑌸𑍍𑌤𑌿 𑌨𑌿𑌃𑌶𑍍𑌰𑍇𑌯𑌸𑍇 𑌸𑍍𑌥𑌿𑌤𑌃 ।
𑌨𑌿𑌵𑌾𑌰𑌯𑌤𑌿 𑌯𑍋 𑌨 𑌤𑍍𑌵𑌾𑌂 𑌕𑌰𑍍𑌮𑌣𑍋𑌽𑌸𑍍𑌮𑌾𑌦𑍍𑌵𑌿𑌗𑌰𑍍𑌹𑌿𑌤𑌾𑌤𑍍 ॥ 13 ॥
𑌮𑌾𑌂 𑌹𑌿 𑌧𑌰𑍍𑌮𑌾𑌤𑍍𑌮𑌨𑌃 𑌪𑌤𑍍𑌨𑍀𑌂 𑌶𑌚𑍀𑌮𑌿𑌵 𑌶𑌚𑍀𑌪𑌤𑍇𑌃 ।
𑌤𑍍𑌵𑌦𑌨𑍍𑌯𑌸𑍍𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌪𑍍𑌰𑌾𑌰𑍍𑌥𑌯𑍇𑌨𑍍𑌮𑌨𑌸𑌾𑌪𑌿 𑌕𑌃 ॥ 14 ॥
𑌰𑌾𑌕𑍍𑌷𑌸𑌾𑌧𑌮 𑌰𑌾𑌮𑌸𑍍𑌯 𑌭𑌾𑌰𑍍𑌯𑌾𑌮𑌮𑌿𑌤𑌤𑍇𑌜𑌸𑌃 ।
𑌉𑌕𑍍𑌤𑌵𑌾𑌨𑌸𑌿 𑌯𑌤𑍍𑌪𑌾𑌪𑌂 𑌕𑍍𑌵 𑌗𑌤𑌸𑍍𑌤𑌸𑍍𑌯 𑌮𑍋𑌕𑍍𑌷𑍍𑌯𑌸𑍇 ॥ 15 ॥
𑌯𑌥𑌾 𑌦𑍃𑌪𑍍𑌤𑌶𑍍𑌚 𑌮𑌾𑌤𑌂𑌗𑌃 𑌶𑌶𑌶𑍍𑌚 𑌸𑌦𑍍𑌦𑍃𑌶𑍋 𑌯𑍁𑌧𑌿 ।
𑌤𑌥𑌾 𑌮𑌾𑌤𑌂𑌗𑌵𑌦𑍍𑌰𑌾𑌮𑌸𑍍𑌤𑍍𑌵𑌂 𑌨𑍀𑌚𑌃 𑌶𑌶𑌵𑌤𑍍 𑌸𑍍𑌮𑍃𑌤𑌃 ॥ 16 ॥
𑌸 𑌤𑍍𑌵𑌮𑌿𑌕𑍍𑌷𑍍𑌵𑌾𑌕𑍁𑌨𑌾𑌥𑌂 𑌵𑍈 𑌕𑍍𑌷𑌿𑌪𑌨𑍍𑌨𑌿𑌹 𑌨 𑌲𑌜𑍍𑌜𑌸𑍇 ।
𑌚𑌕𑍍𑌷𑍁𑌷𑍋𑌰𑍍𑌵𑌿𑌷𑌯𑌂 𑌤𑌸𑍍𑌯 𑌨 𑌤𑌾𑌵𑌦𑍁𑌪𑌗𑌚𑍍𑌛𑌸𑌿 ॥ 1 ॥
𑌇𑌮𑍇 𑌤𑍇 𑌨𑌯𑌨𑍇 𑌕𑍍𑌰𑍂𑌰𑍇 𑌵𑌿𑌰𑍂𑌪𑍇 𑌕𑍃𑌷𑍍𑌣𑌪𑌿𑌂𑌗𑌲𑍇 ।
𑌕𑍍𑌷𑌿𑌤𑍌 𑌨 𑌪𑌤𑌿𑌤𑍇 𑌕𑌸𑍍𑌮𑌾𑌨𑍍𑌮𑌾𑌮𑌨𑌾𑌰𑍍𑌯 𑌨𑌿𑌰𑍀𑌕𑍍𑌷𑌿𑌤𑌃 ॥ 1 ॥
𑌤𑌸𑍍𑌯 𑌧𑌰𑍍𑌮𑌾𑌤𑍍𑌮𑌨𑌃 𑌪𑌤𑍍𑌨𑍀𑌂 𑌸𑍍𑌨𑍁𑌷𑌾𑌂 𑌦𑌶𑌰𑌥𑌸𑍍𑌯 𑌚 ।
𑌕𑌥𑌂 𑌵𑍍𑌯𑌾𑌹𑌰𑌤𑍋 𑌮𑌾𑌂 𑌤𑍇 𑌨 𑌜𑌿𑌹𑍍𑌵𑌾 𑌵𑍍𑌯𑌵𑌶𑍀𑌰𑍍𑌯𑌤𑍇 ॥ 1 ॥
𑌅𑌸𑌂𑌦𑍇𑌶𑌾𑌤𑍍𑌤𑍁 𑌰𑌾𑌮𑌸𑍍𑌯 𑌤𑌪𑌸𑌶𑍍𑌚𑌾𑌨𑍁𑌪𑌾𑌲𑌨𑌾𑌤𑍍 ।
𑌨 𑌤𑍍𑌵𑌾𑌂 𑌕𑍁𑌰𑍍𑌮𑌿 𑌦𑌶𑌗𑍍𑌰𑍀𑌵 𑌭𑌸𑍍𑌮 𑌭𑌰𑍍𑌮𑌾𑌰𑍍𑌹 𑌤𑍇𑌜𑌸𑌾 ॥ 20 ॥
𑌨𑌾𑌪𑌹𑌰𑍍𑌤𑍁𑌮𑌹𑌂 𑌶𑌕𑍍𑌯𑌾 𑌤𑍍𑌵𑌯𑌾 𑌰𑌾𑌮𑌸𑍍𑌯 𑌧𑍀𑌮𑌤𑌃 ।
𑌵𑌿𑌧𑌿𑌸𑍍𑌤𑌵 𑌵𑌧𑌾𑌰𑍍𑌥𑌾𑌯 𑌵𑌿𑌹𑌿𑌤𑍋 𑌨𑌾𑌤𑍍𑌰 𑌸𑌂𑌶𑌯𑌃 ॥ 21 ॥
𑌶𑍂𑌰𑍇𑌣 𑌧𑌨𑌦𑌭𑍍𑌰𑌾𑌤𑍍𑌰𑌾 𑌬𑌲𑍈𑌃 𑌸𑌮𑍁𑌦𑌿𑌤𑍇𑌨 𑌚 ।
𑌅𑌪𑍋𑌹𑍍𑌯 𑌰𑌾𑌮𑌂 𑌕𑌸𑍍𑌮𑌾𑌦𑍍𑌧𑌿 𑌦𑌾𑌰𑌚𑍌𑌰𑍍𑌯𑌂 𑌤𑍍𑌵𑌯𑌾 𑌕𑍃𑌤𑌮𑍍 ॥ 22 ॥
𑌸𑍀𑌤𑌾𑌯𑌾 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌰𑌾𑌵𑌣𑍋 𑌰𑌾𑌕𑍍𑌷𑌸𑌾𑌧𑌿𑌪𑌃 ।
𑌵𑌿𑌵𑍃𑌤𑍍𑌯 𑌨𑌯𑌨𑍇 𑌕𑍍𑌰𑍂𑌰𑍇 𑌜𑌾𑌨𑌕𑍀𑌮𑌨𑍍𑌵𑌵𑍈𑌕𑍍𑌷𑌤 ॥ 23 ॥
𑌨𑍀𑌲𑌜𑍀𑌮𑍂𑌤𑌸𑌂𑌕𑌾𑌶𑍋 𑌮𑌹𑌾𑌭𑍁𑌜𑌶𑌿𑌰𑍋𑌧𑌰𑌃 ।
𑌸𑌿𑌂𑌹𑌸𑌤𑍍𑌤𑍍𑌵𑌗𑌤𑌿𑌃 𑌶𑍍𑌰𑍀𑌮𑌾𑌨𑍍 𑌦𑍀𑌪𑍍𑌤 𑌜𑌿𑌹𑍍𑌵𑌾𑌗𑍍𑌰𑌲𑍋𑌚𑌨𑌃 ॥ 24 ॥
𑌚𑌲𑌾𑌗𑍍𑌰𑌮𑌕𑍁𑌟𑌪𑍍𑌰𑌾𑌂𑌶𑍁𑌶𑍍𑌚𑌿𑌤𑍍𑌰𑌮𑌾𑌲𑍍𑌯𑌾𑌨𑍁𑌲𑍇𑌪𑌨𑌃 ।
𑌰𑌕𑍍𑌤𑌮𑌾𑌲𑍍𑌯𑌾𑌂𑌬𑌰𑌧𑌰 𑌤𑌤𑍍𑌸𑌂𑌗𑌦𑌵𑌿𑌭𑍂𑌷𑌣𑌃 ॥ 25 ॥
𑌶𑍍𑌰𑍋𑌣𑌿𑌸𑍂𑌤𑍍𑌰𑍇𑌣 𑌮𑌹𑌤𑌾 𑌮𑍇𑌚𑌕𑍇𑌨 𑌸𑍁𑌸𑌂𑌵𑍃𑌤𑌃 ।
𑌅𑌮𑍃𑌤𑍋𑌤𑍍𑌪𑌾𑌦𑌨𑌦𑍍𑌧𑍇𑌨 𑌭𑍁𑌜𑌗𑍇𑌨𑍇𑌵 𑌮𑌂𑌦𑌰𑌃 ॥ 26 ॥
𑌤𑌾𑌭𑍍𑌯𑌾𑌂 𑌸 𑌪𑌰𑌿𑌪𑍂𑌰𑍍𑌣𑌾𑌭𑍍𑌯𑌾𑌂 𑌭𑍁𑌜𑌾𑌭𑍍𑌯𑌾𑌂 𑌰𑌾𑌕𑍍𑌷𑌸𑍇𑌶𑍍𑌵𑌰𑌃 ।
𑌶𑍁𑌶𑍁𑌭𑍇𑌽𑌚𑌲𑌸𑌂𑌕𑌾𑌶𑌃 𑌶𑍃𑌂𑌗𑌾𑌭𑍍𑌯𑌾𑌮𑌿𑌵 𑌮𑌂𑌦𑌰𑌃 ॥ 2 ॥
𑌤𑌰𑍁𑌣𑌾𑌦𑌿𑌤𑍍𑌯𑌵𑌰𑍍𑌣𑌾𑌭𑍍𑌯𑌾𑌂 𑌕𑍁𑌂𑌡𑌲𑌾𑌭𑍍𑌯𑌾𑌂 𑌵𑌿𑌭𑍂𑌷𑌿𑌤𑌃 ।
𑌰𑌕𑍍𑌤𑌪𑌲𑍍𑌲𑌵𑌪𑍁𑌷𑍍𑌪𑌾𑌭𑍍𑌯𑌾𑌮𑌶𑍋𑌕𑌾𑌭𑍍𑌯𑌾𑌮𑌿𑌵𑌾𑌚𑌲𑌃 ॥ 2 ॥
𑌸 𑌕𑌲𑍍𑌪𑌵𑍃𑌕𑍍𑌷𑌪𑍍𑌰𑌤𑌿𑌮𑍋 𑌵𑌸𑌂𑌤 𑌇𑌵 𑌮𑍂𑌰𑍍𑌤𑌿𑌮𑌾𑌨𑍍 ।
𑌶𑍍𑌮𑌶𑌾𑌨𑌚𑍈𑌤𑍍𑌯𑌪𑍍𑌰𑌤𑌿𑌮𑍋 𑌭𑍂𑌷𑌿𑌤𑍋𑌽𑌪𑌿 𑌭𑌯𑌂𑌕𑌰𑌃 ॥ 2 ॥
𑌅𑌵𑍇𑌕𑍍𑌷𑌮𑌾𑌣𑍋 𑌵𑍈𑌦𑍇𑌹𑍀𑌂 𑌕𑍋𑌪𑌸𑌂𑌰𑌕𑍍𑌤𑌲𑍋𑌚𑌨𑌃 ।
𑌉𑌵𑌾𑌚 𑌰𑌾𑌵𑌣𑌃 𑌸𑍀𑌤𑌾𑌂 𑌭𑍁𑌜𑌂𑌗 𑌇𑌵 𑌨𑌿𑌃𑌶𑍍𑌵𑌸𑌨𑍍 ॥ 30 ॥
𑌅𑌨𑌯𑍇𑌨𑌾𑌭𑌿𑌸𑌂𑌪𑌨𑍍𑌨𑌮𑌰𑍍𑌥𑌹𑍀𑌨𑌮𑌨𑍁𑌵𑍍𑌰𑌤𑍇 ।
𑌨𑌾𑌶𑌯𑌾𑌮𑍍𑌯𑌹𑌮𑌦𑍍𑌯 𑌤𑍍𑌵𑌾𑌂 𑌸𑍂𑌰𑍍𑌯𑌃 𑌸𑌂𑌧𑍍𑌯𑌾𑌮𑌿𑌵𑍌𑌜𑌸𑌾 ॥ 31 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌮𑍈𑌥𑌿𑌲𑍀𑌂 𑌰𑌾𑌜𑌾 𑌰𑌾𑌵𑌣𑌃 𑌶𑌤𑍍𑌰𑍁𑌰𑌾𑌵𑌣𑌃 ।
𑌸𑌂𑌦𑌿𑌦𑍇𑌶 𑌤𑌤𑌃 𑌸𑌰𑍍𑌵𑌾 𑌰𑌾𑌕𑍍𑌷𑌸𑍀𑌰𑍍𑌘𑍋𑌰𑌦𑌰𑍍𑌶𑌨𑌾𑌃 ॥ 32 ॥
𑌏𑌕𑌾𑌕𑍍𑌷𑍀𑌮𑍇𑌕𑌕𑌰𑍍𑌣𑌾𑌂 𑌚 𑌕𑌰𑍍𑌣𑌪𑍍𑌰𑌾𑌵𑌰𑌣𑌾𑌂 𑌤𑌥𑌾 ।
𑌗𑍋𑌕𑌰𑍍𑌣𑍀𑌂 𑌹𑌸𑍍𑌤𑌿𑌕𑌰𑍍𑌣𑍀𑌂 𑌚 𑌲𑌂𑌬𑌕𑌰𑍍𑌣𑍀𑌮𑌕𑌰𑍍𑌣𑌿𑌕𑌾𑌮𑍍 ॥ 33 ॥
𑌹𑌸𑍍𑌤𑌿𑌪𑌾𑌦𑍍𑌯𑌶𑍍𑌵𑌪𑌾𑌦𑍍𑌯𑍌 𑌚 𑌗𑍋𑌪𑌾𑌦𑍀𑌂 𑌪𑌾𑌦𑌚𑍂𑌲𑌿𑌕𑌾𑌮𑍍 ।
𑌏𑌕𑌾𑌕𑍍𑌷𑍀𑌮𑍇𑌕𑌪𑌾𑌦𑍀𑌂 𑌚 𑌪𑍃𑌥𑍁𑌪𑌾𑌦𑍀𑌮𑌪𑌾𑌦𑌿𑌕𑌾𑌮𑍍 ॥ 34 ॥
𑌅𑌤𑌿𑌮𑌾𑌤𑍍𑌰𑌶𑌿𑌰𑍋𑌗𑍍𑌰𑍀𑌵𑌾𑌮𑌤𑌿𑌮𑌾𑌤𑍍𑌰𑌕𑍁𑌚𑍋𑌦𑌰𑍀𑌮𑍍 ।
𑌅𑌤𑌿𑌮𑌾𑌤𑍍𑌰𑌾𑌸𑍍𑌯𑌨𑍇𑌤𑍍𑌰𑌾𑌂 𑌚 𑌦𑍀𑌰𑍍𑌘𑌜𑌿𑌹𑍍𑌵𑌾𑌮𑌜𑌿𑌹𑍍𑌵𑌿𑌕𑌾𑌮𑍍 ॥ 35 ॥
𑌅𑌨𑌾𑌸𑌿𑌕𑌾𑌂 𑌸𑌿𑌂𑌹𑌮𑍁𑌖𑍀𑌂 𑌗𑍋𑌮𑍁𑌖𑍀𑌂 𑌸𑍂𑌕𑌰𑍀𑌮𑍁𑌖𑍀𑌮𑍍 ।
𑌯𑌥𑌾 𑌮𑌦𑍍𑌵𑌶𑌗𑌾 𑌸𑍀𑌤𑌾 𑌕𑍍𑌷𑌿𑌪𑍍𑌰𑌂 𑌭𑌵𑌤𑌿 𑌜𑌾𑌨𑌕𑍀 ॥ 36 ॥
𑌤𑌥𑌾 𑌕𑍁𑌰𑍁𑌤 𑌰𑌾𑌕𑍍𑌷𑌸𑍍𑌯𑌃 𑌸𑌰𑍍𑌵𑌾𑌃 𑌕𑍍𑌷𑌿𑌪𑍍𑌰𑌂 𑌸𑌮𑍇𑌤𑍍𑌯 𑌚 ।
𑌪𑍍𑌰𑌤𑌿𑌲𑍋𑌮𑌾𑌨𑍁𑌲𑍋𑌮𑍈𑌶𑍍𑌚 𑌸𑌾𑌮𑌦𑌾𑌨𑌾𑌦𑌿𑌭𑍇𑌦𑌨𑍈𑌃 ॥ 3 ॥
𑌆𑌵𑌰𑍍𑌜𑌯𑌤 𑌵𑍈𑌦𑍇𑌹𑍀𑌂 𑌦𑌂𑌡𑌸𑍍𑌯𑍋𑌦𑍍𑌯𑌮𑌨𑍇𑌨 𑌚 ।
𑌇𑌤𑌿 𑌪𑍍𑌰𑌤𑌿𑌸𑌮𑌾𑌦𑌿𑌶𑍍𑌯 𑌰𑌾𑌕𑍍𑌷𑌸𑍇𑌂𑌦𑍍𑌰𑌃 𑌪𑍁𑌨𑌃 𑌪𑍁𑌨𑌃 ॥ 3 ॥
𑌕𑌾𑌮𑌮𑌨𑍍𑌯𑍁𑌪𑌰𑍀𑌤𑌾𑌤𑍍𑌮𑌾 𑌜𑌾𑌨𑌕𑍀𑌂 𑌪𑌰𑍍𑌯𑌤𑌰𑍍𑌜𑌯𑌤𑍍 ।
𑌉𑌪𑌗𑌮𑍍𑌯 𑌤𑌤𑌃 𑌶𑍀𑌘𑍍𑌰𑌂 𑌰𑌾𑌕𑍍𑌷𑌸𑍀 𑌧𑌾𑌨𑍍𑌯𑌮𑌾𑌲𑌿𑌨𑍀 ॥ 3 ॥
𑌪𑌰𑌿𑌷𑍍𑌵𑌜𑍍𑌯 𑌦𑌶𑌗𑍍𑌰𑍀𑌵𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ।
𑌮𑌯𑌾 𑌕𑍍𑌰𑍀𑌡 𑌮𑌹𑌾𑌰𑌾𑌜 𑌸𑍀𑌤𑌯𑌾 𑌕𑌿𑌂 𑌤𑌵𑌾𑌨𑌯𑌾 ॥ 40 ॥
𑌵𑌿𑌵𑌰𑍍𑌣𑌯𑌾 𑌕𑍃𑌪𑌣𑌯𑌾 𑌮𑌾𑌨𑍁𑌷𑍍𑌯𑌾 𑌰𑌾𑌕𑍍𑌷𑌸𑍇𑌶𑍍𑌵𑌰 ।
𑌨𑍂𑌨𑌮𑌸𑍍𑌯𑌾 𑌮𑌹𑌾𑌰𑌾𑌜 𑌨 𑌦𑌿𑌵𑍍𑌯𑌾𑌨𑍍 𑌭𑍋𑌗𑌸𑌤𑍍𑌤𑌮𑌾𑌨𑍍 ॥ 41 ॥
𑌵𑌿𑌦𑌧𑌾𑌤𑍍𑌯𑌮𑌰𑌶𑍍𑌰𑍇𑌷𑍍𑌠𑌸𑍍𑌤𑌵 𑌬𑌾𑌹𑍁𑌬𑌲𑌾𑌰𑍍𑌜𑌿𑌤𑌾𑌨𑍍 ।
𑌅𑌕𑌾𑌮𑌾𑌂 𑌕𑌾𑌮𑌯𑌾𑌨𑌸𑍍𑌯 𑌶𑌰𑍀𑌰𑌮𑍁𑌪𑌤𑌪𑍍𑌯𑌤𑍇 ॥ 42 ॥
𑌇𑌚𑍍𑌛𑌂𑌤𑍀𑌂 𑌕𑌾𑌮𑌯𑌾𑌨𑌸𑍍𑌯 𑌪𑍍𑌰𑍀𑌤𑌿𑌰𑍍𑌭𑌵𑌤𑌿 𑌶𑍋𑌭𑌨𑌾 ।
𑌏𑌵𑌮𑍁𑌕𑍍𑌤𑌸𑍍𑌤𑍁 𑌰𑌾𑌕𑍍𑌷𑌸𑍍𑌯𑌾 𑌸𑌮𑍁𑌤𑍍𑌕𑍍𑌷𑌿𑌪𑍍𑌤𑌸𑍍𑌤𑌤𑍋 𑌬𑌲𑍀 ॥ 43 ॥
𑌪𑍍𑌰𑌹𑌸𑌨𑍍𑌮𑍇𑌘𑌸𑌂𑌕𑌾𑌶𑍋 𑌰𑌾𑌕𑍍𑌷𑌸𑌃 𑌸 𑌨𑍍𑌯𑌵𑌰𑍍𑌤𑌤 ।
𑌪𑍍𑌰𑌸𑍍𑌥𑌿𑌤𑌃 𑌸 𑌦𑌶𑌗𑍍𑌰𑍀𑌵𑌃 𑌕𑌂𑌪𑌯𑌨𑍍𑌨𑌿𑌵 𑌮𑍇𑌦𑌿𑌨𑍀𑌮𑍍 ॥ 44 ॥
𑌜𑍍𑌵𑌲𑌦𑍍𑌭𑌾𑌸𑍍𑌕𑌰𑌵𑌰𑍍𑌣𑌾𑌭𑌂 𑌪𑍍𑌰𑌵𑌿𑌵𑍇𑌶 𑌨𑌿𑌵𑍇𑌶𑌨𑌮𑍍 ।
𑌦𑍇𑌵𑌗𑌂𑌧𑌰𑍍𑌵𑌕𑌨𑍍𑌯𑌾𑌶𑍍𑌚 𑌨𑌾𑌗𑌕𑌨𑍍𑌯𑌾𑌶𑍍𑌚 𑌸𑌰𑍍𑌵𑌤𑌃 ॥ 45 ॥
𑌪𑌰𑌿𑌵𑌾𑌰𑍍𑌯 𑌦𑌶𑌗𑍍𑌰𑍀𑌵𑌂 𑌵𑌿𑌵𑌿𑌶𑍁𑌸𑍍𑌤𑌂 𑌗𑍃𑌹𑍋𑌤𑍍𑌤𑌮𑌮𑍍 ।
𑌸 𑌮𑍈𑌥𑌿𑌲𑍀𑌂 𑌧𑌰𑍍𑌮𑌪𑌰𑌾𑌮𑌵𑌸𑍍𑌥𑌿𑌤𑌾𑌂 𑌪𑍍𑌰𑌪𑍇𑌪𑌮𑌾𑌨𑌾𑌂 𑌪𑌰𑌿𑌭𑌰𑍍𑌤𑍍𑌸𑍍𑌯 𑌰𑌾𑌵𑌣𑌃 ।
𑌵𑌿𑌹𑌾𑌯 𑌸𑍀𑌤𑌾𑌂 𑌮𑌦𑌨𑍇𑌨 𑌮𑍋𑌹𑌿𑌤𑌃 𑌸𑍍𑌵𑌮𑍇𑌵 𑌵𑍇𑌶𑍍𑌮 𑌪𑍍𑌰𑌵𑌿𑌵𑍇𑌶 𑌭𑌾𑌸𑍍𑌵𑌰𑌮𑍍 ॥ 46 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌦𑍍𑌵𑌾𑌵𑌿𑌂𑌶𑌸𑍍𑌸𑌰𑍍𑌗𑌃 ॥
