𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌿𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌤𑌤𑍋 𑌮𑍂𑌰𑍍𑌧𑍍𑌨𑌾 𑌨𑌿𑌪𑌤𑌿𑌤𑌂 𑌵𑌾𑌨𑌰𑌂 𑌵𑌾𑌨𑌰𑌰𑍍𑌷𑌭𑌃 ।
𑌦𑍃𑌷𑍍𑌟𑍍𑌵𑍈𑌵𑍋𑌦𑍍𑌵𑌿𑌗𑍍𑌨𑌹𑍃𑌦𑌯𑍋 𑌵𑌾𑌕𑍍𑌯𑌮𑍇𑌤𑌦𑍁𑌵𑌾𑌚 𑌹 ॥ 1 ॥
𑌉𑌤𑍍𑌤𑌿𑌷𑍍𑌠𑍋𑌤𑍍𑌤𑌿𑌷𑍍𑌠 𑌕𑌸𑍍𑌮𑌾𑌤𑍍𑌤𑍍𑌵𑌂 𑌪𑌾𑌦𑌯𑍋𑌃 𑌪𑌤𑌿𑌤𑍋 𑌮𑌮 ।
𑌅𑌭𑌯𑌂 𑌤𑍇 𑌭𑌵𑍇𑌦𑍍𑌵𑍀𑌰 𑌸𑌰𑍍𑌵𑌮𑍇𑌵𑌾𑌭𑌿𑌧𑍀𑌯𑌤𑌾𑌮𑍍 ॥ 2 ॥
𑌸 𑌤𑍁 𑌵𑌿𑌶𑍍𑌵𑌾𑌸𑌿𑌤𑌸𑍍𑌤𑍇𑌨 𑌸𑍁𑌗𑍍𑌰𑍀𑌵𑍇𑌣 𑌮𑌹𑌾𑌤𑍍𑌮𑌨𑌾 ।
𑌉𑌤𑍍𑌥𑌾𑌯 𑌸𑍁𑌮𑌹𑌾𑌪𑍍𑌰𑌾𑌜𑍍𑌞𑍋 𑌵𑌾𑌕𑍍𑌯𑌂 𑌦𑌧𑌿𑌮𑍁𑌖𑍋𑌽𑌬𑍍𑌰𑌵𑍀𑌤𑍍 ॥ 3 ॥
𑌨𑍈𑌵𑌰𑍍𑌕𑍍𑌷𑌰𑌜𑌸𑌾 𑌰𑌾𑌜𑌨𑍍𑌨 𑌤𑍍𑌵𑌯𑌾 𑌨𑌾𑌪𑌿 𑌵𑌾𑌲𑌿𑌨𑌾 ।
𑌵𑌨𑌂 𑌨𑌿𑌸𑍃𑌷𑍍𑌟𑌪𑍂𑌰𑍍𑌵𑌂 𑌹𑌿 𑌭𑌕𑍍𑌷𑌿𑌤𑌂 𑌤𑌚𑍍𑌚 𑌵𑌾𑌨𑌰𑍈𑌃 ॥ 4 ॥
𑌏𑌭𑌿𑌃 𑌪𑍍𑌰𑌧𑌰𑍍𑌷𑌿𑌤𑌾𑌶𑍍𑌚𑍈𑌵 𑌵𑌾𑌨𑌰𑌾 𑌵𑌨𑌰𑌕𑍍𑌷𑌿𑌭𑌿𑌃 ।
𑌮𑌧𑍂𑌨𑍍𑌯𑌚𑌿𑌂𑌤𑌯𑌿𑌤𑍍𑌵𑍇𑌮𑌾𑌨𑍍 𑌭𑌕𑍍𑌷𑌯𑌂𑌤𑌿 𑌪𑌿𑌬𑌂𑌤𑌿 𑌚 ॥ 5 ॥
𑌶𑌿𑌷𑍍𑌟𑌮𑌤𑍍𑌰𑌾𑌪𑌵𑌿𑌧𑍍𑌯𑌂𑌤𑌿 𑌭𑌕𑍍𑌷𑌯𑌂𑌤𑌿 𑌤𑌥𑌾𑌪𑌰𑍇 ।
𑌨𑌿𑌵𑌾𑌰𑍍𑌯𑌮𑌾𑌣𑌾𑌸𑍍𑌤𑍇 𑌸𑌰𑍍𑌵𑍇 𑌭𑍍𑌰𑍁𑌵𑍋 𑌵𑍈 𑌦𑌰𑍍𑌶𑌯𑌂𑌤𑌿 𑌹𑌿 ॥ 6 ॥
𑌇𑌮𑍇 𑌹𑌿 𑌸𑌂𑌰𑌬𑍍𑌧𑌤𑌰𑌾𑌸𑍍𑌤𑌥𑌾 𑌤𑍈𑌸𑍍𑌸𑌂𑌪𑍍𑌰𑌧𑌰𑍍𑌷𑌿𑌤𑌾𑌃 ।
𑌵𑌾𑌰𑌯𑌂𑌤𑍋 𑌵𑌨𑌾𑌤𑍍𑌤𑌸𑍍𑌮𑌾𑌤𑍍𑌕𑍍𑌰𑍁𑌦𑍍𑌧𑍈𑌰𑍍𑌵𑌾𑌨𑌰𑌪𑍁𑌂𑌗𑌵𑍈𑌃 ॥ ॥
𑌤𑌤𑌸𑍍𑌤𑍈𑌰𑍍𑌬𑌹𑍁𑌭𑌿𑌰𑍍𑌵𑍀𑌰𑍈𑌰𑍍𑌵𑌾𑌨𑌰𑍈𑌰𑍍𑌵𑌾𑌨𑌰𑌰𑍍𑌷𑌭 ।
𑌸𑌂𑌰𑌕𑍍𑌤𑌨𑌯𑌨𑍈𑌃 𑌕𑍍𑌰𑍋𑌧𑌾𑌦𑍍𑌧𑌰𑌯𑌃 𑌪𑍍𑌰𑌵𑌿𑌚𑌾𑌲𑌿𑌤𑌾𑌃 ॥ ॥
𑌪𑌾𑌣𑌿𑌭𑌿𑌰𑍍𑌨𑌿𑌹𑌤𑌾𑌃 𑌕𑍇𑌚𑌿𑌤𑍍𑌕𑍇𑌚𑌿𑌜𑍍𑌜𑌾𑌨𑍁𑌭𑌿𑌰𑌾𑌹𑌤𑌾𑌃 ।
𑌪𑍍𑌰𑌕𑍃𑌷𑍍𑌟𑌾𑌶𑍍𑌚 𑌯𑌥𑌾𑌕𑌾𑌮𑌂 𑌦𑍇𑌵𑌮𑌾𑌰𑍍𑌗𑌂 𑌚 𑌦𑌰𑍍𑌶𑌿𑌤𑌾𑌃 ॥ ॥
𑌏𑌵𑌮𑍇𑌤𑍇 𑌹𑌤𑌾𑌶𑍍𑌶𑍂𑌰𑌾𑌸𑍍𑌤𑍍𑌵𑌯𑌿 𑌤𑌿𑌷𑍍𑌠𑌤𑌿 𑌭𑌰𑍍𑌤𑌰𑌿 ।
𑌕𑍃𑌤𑍍𑌸𑍍𑌨𑌂 𑌮𑌧𑍁𑌵𑌨𑌂 𑌚𑍈𑌵 𑌪𑍍𑌰𑌕𑌾𑌮𑌂 𑌤𑍈𑌃 𑌪𑍍𑌰𑌭𑌕𑍍𑌷𑍍𑌯𑌤𑍇 ॥ 10 ॥
𑌏𑌵𑌂 𑌵𑌿𑌜𑍍𑌞𑌾𑌪𑍍𑌯𑌮𑌾𑌨𑌂 𑌤𑌂 𑌸𑍁𑌗𑍍𑌰𑍀𑌵𑌂 𑌵𑌾𑌨𑌰𑌰𑍍𑌷𑌭𑌮𑍍 ।
𑌅𑌪𑍃𑌚𑍍𑌛𑌤𑍍𑌤𑌂 𑌮𑌹𑌾𑌪𑍍𑌰𑌾𑌜𑍍𑌞𑍋 𑌲𑌕𑍍𑌷𑍍𑌮𑌣𑌃 𑌪𑌰𑌵𑍀𑌰𑌹𑌾 ॥ 11 ॥
𑌕𑌿𑌮𑌯𑌂 𑌵𑌾𑌨𑌰𑍋 𑌰𑌾𑌜𑌨𑍍 𑌵𑌨𑌪𑌃 𑌪𑍍𑌰𑌤𑍍𑌯𑍁𑌪𑌸𑍍𑌥𑌿𑌤𑌃 ।
𑌕𑌂 𑌚𑌾𑌰𑍍𑌥𑌮𑌭𑌿𑌨𑌿𑌰𑍍𑌦𑌿𑌶𑍍𑌯 𑌦𑍁𑌃𑌖𑌿𑌤𑍋 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 12 ॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌸𑍁𑌗𑍍𑌰𑍀𑌵𑍋 𑌲𑌕𑍍𑌷𑍍𑌮𑌣𑍇𑌨 𑌮𑌹𑌾𑌤𑍍𑌮𑌨𑌾 ।
𑌲𑌕𑍍𑌷𑍍𑌮𑌣𑌂 𑌪𑍍𑌰𑌤𑍍𑌯𑍁𑌵𑌾𑌚𑍇𑌦𑌂 𑌵𑌾𑌕𑍍𑌯𑌂 𑌵𑌾𑌕𑍍𑌯𑌵𑌿𑌶𑌾𑌰𑌦𑌃 ॥ 13 ॥
𑌆𑌰𑍍𑌯 𑌲𑌕𑍍𑌷𑍍𑌮𑌣 𑌸𑌂𑌪𑍍𑌰𑌾𑌹 𑌵𑍀𑌰𑍋 𑌦𑌧𑌿𑌮𑍁𑌖𑌃 𑌕𑌪𑌿𑌃 ।
𑌅𑌂𑌗𑌦𑌪𑍍𑌰𑌮𑍁𑌖𑍈𑌰𑍍𑌵𑍀𑌰𑍈𑌰𑍍𑌭𑌕𑍍𑌷𑌿𑌤𑌂 𑌮𑌧𑍁 𑌵𑌾𑌨𑌰𑍈𑌃 ॥ 14 ॥
𑌵𑌿𑌚𑌿𑌤𑍍𑌯 𑌦𑌕𑍍𑌷𑌿𑌣𑌾𑌮𑌾𑌶𑌾𑌮𑌾𑌗𑌤𑍈𑌰𑍍𑌹𑌰𑌿𑌪𑍁𑌂𑌗𑌵𑍈𑌃 ।
𑌨𑍈𑌷𑌾𑌮𑌕𑍃𑌤𑍍𑌯𑌾𑌨𑌾𑌮𑍀𑌦𑍃𑌶𑌸𑍍𑌸𑍍𑌯𑌾𑌦𑍁𑌪𑌕𑍍𑌰𑌮𑌃 ॥ 15 ॥
𑌆𑌗𑌤𑍈𑌶𑍍𑌚 𑌪𑍍𑌰𑌮𑌥𑌿𑌤𑌂 𑌯𑌥𑌾 𑌮𑌧𑍁𑌵𑌨𑌂 𑌹𑌿 𑌤𑍈𑌃 ।
𑌧𑌰𑍍𑌷𑌿𑌤𑌂 𑌚 𑌵𑌨𑌂 𑌕𑍃𑌤𑍍𑌸𑍍𑌨𑌮𑍁𑌪𑌯𑍁𑌕𑍍𑌤𑌂 𑌚 𑌵𑌾𑌨𑌰𑍈𑌃 ॥ 16 ॥
𑌵𑌨𑌂 𑌯𑌦𑌾𑌽𑌭𑌿𑌪𑌨𑍍𑌨𑌾𑌸𑍍𑌤𑍇 𑌸𑌾𑌧𑌿𑌤𑌂 𑌕𑌰𑍍𑌮 𑌵𑌾𑌨𑌰𑍈𑌃 ।
𑌦𑍃𑌷𑍍𑌟𑌾 𑌦𑍇𑌵𑍀 𑌨 𑌸𑌂𑌦𑍇𑌹𑍋 𑌨 𑌚𑌾𑌨𑍍𑌯𑍇𑌨 𑌹𑌨𑍂𑌮𑌤𑌾 ॥ 1 ॥
𑌨 𑌹𑍍𑌯𑌨𑍍𑌯𑌸𑍍𑌸𑌾𑌧𑌨𑍇 𑌹𑍇𑌤𑍁𑌃 𑌕𑌰𑍍𑌮𑌣𑍋𑌽𑌸𑍍𑌯 𑌹𑌨𑍂𑌮𑌤𑌃 ।
𑌕𑌾𑌰𑍍𑌯𑌸𑌿𑌦𑍍𑌧𑌿𑌰𑍍𑌮𑌤𑌿𑌶𑍍𑌚𑍈𑌵 𑌤𑌸𑍍𑌮𑌿𑌨𑍍𑌵𑌾𑌨𑌰𑌪𑍁𑌂𑌗𑌵𑍇 ॥ 1 ॥
𑌵𑍍𑌯𑌵𑌸𑌾𑌯𑌶𑍍𑌚 𑌵𑍀𑌰𑍍𑌯𑌂 𑌚 𑌶𑍍𑌰𑍁𑌤𑌂 𑌚𑌾𑌪𑌿 𑌪𑍍𑌰𑌤𑌿𑌷𑍍𑌠𑌿𑌤𑌮𑍍 ।
𑌜𑌾𑌂𑌬𑌵𑌾𑌨𑍍𑌯𑌤𑍍𑌰 𑌨𑍇𑌤𑌾 𑌸𑍍𑌯𑌾𑌦𑌂𑌗𑌦𑌶𑍍𑌚 𑌮𑌹𑌾𑌬𑌲𑌃 ॥ 1 ॥
𑌹𑌨𑍁𑌮𑌾𑌂𑌶𑍍𑌚𑌾𑌪𑍍𑌯𑌧𑌿𑌷𑍍𑌠𑌾𑌤𑌾 𑌨 𑌤𑌸𑍍𑌯 𑌗𑌤𑌿𑌰𑌨𑍍𑌯𑌥𑌾 ।
𑌅𑌂𑌗𑌦𑌪𑍍𑌰𑌮𑍁𑌖𑍈𑌰𑍍𑌵𑍀𑌰𑍈𑌰𑍍𑌹𑌤𑌂 𑌮𑌧𑍁𑌵𑌨𑌂 𑌕𑌿𑌲 ॥ 20 ॥
𑌵𑌾𑌰𑌯𑌂𑌤𑌶𑍍𑌚 𑌸𑌹𑌿𑌤𑌾𑌸𑍍𑌤𑌦𑌾 𑌜𑌾𑌨𑍁𑌭𑌿𑌰𑌾𑌹𑌤𑌾𑌃 ।
𑌏𑌤𑌦𑌰𑍍𑌥𑌮𑌯𑌂 𑌪𑍍𑌰𑌾𑌪𑍍𑌤𑍋 𑌵𑌕𑍍𑌤𑍁𑌂 𑌮𑌧𑍁𑌰𑌵𑌾𑌗𑌿𑌹 ॥ 21 ॥
𑌨𑌾𑌮𑍍𑌨𑌾 𑌦𑌧𑌿𑌮𑍁𑌖𑍋 𑌨𑌾𑌮 𑌹𑌰𑌿𑌃 𑌪𑍍𑌰𑌖𑍍𑌯𑌾𑌤𑌵𑌿𑌕𑍍𑌰𑌮𑌃 ।
𑌦𑍃𑌷𑍍𑌟𑌾 𑌸𑍀𑌤𑌾 𑌮𑌹𑌾𑌬𑌾𑌹𑍋 𑌸𑍌𑌮𑌿𑌤𑍍𑌰𑍇 𑌪𑌶𑍍𑌯 𑌤𑌤𑍍𑌤𑍍𑌵𑌤𑌃 ॥ 22 ॥
𑌅𑌭𑌿𑌗𑌮𑍍𑌯 𑌤𑌥𑌾 𑌸𑌰𑍍𑌵𑍇 𑌪𑌿𑌬𑌂𑌤𑌿 𑌮𑌧𑍁 𑌵𑌾𑌨𑌰𑌾𑌃 ।
𑌨 𑌚𑌾𑌪𑍍𑌯𑌦𑍃𑌷𑍍𑌟𑍍𑌵𑌾 𑌵𑍈𑌦𑍇𑌹𑍀𑌂 𑌵𑌿𑌶𑍍𑌰𑍁𑌤𑌾𑌃 𑌪𑍁𑌰𑍁𑌷𑌰𑍍𑌷𑌭 ॥ 23 ॥
𑌵𑌨𑌂 𑌦𑌤𑍍𑌤𑌵𑌰𑌂 𑌦𑌿𑌵𑍍𑌯𑌂 𑌧𑌰𑍍𑌷𑌯𑍇𑌯𑍁𑌰𑍍𑌵𑌨𑍌𑌕𑌸𑌃 ।
𑌤𑌤𑌃 𑌪𑍍𑌰𑌹𑍃𑌷𑍍𑌟𑍋 𑌧𑌰𑍍𑌮𑌾𑌤𑍍𑌮𑌾 𑌲𑌕𑍍𑌷𑍍𑌮𑌣𑌸𑍍𑌸𑌹 𑌰𑌾𑌘𑌵𑌃 ॥ 24 ॥
𑌶𑍍𑌰𑍁𑌤𑍍𑌵𑌾 𑌕𑌰𑍍𑌣𑌸𑍁𑌖𑌾𑌂 𑌵𑌾𑌣𑍀𑌂 𑌸𑍁𑌗𑍍𑌰𑍀𑌵𑌵𑌦𑌨𑌾𑌚𑍍𑌚𑍍𑌯𑍁𑌤𑌾𑌮𑍍 ।
𑌪𑍍𑌰𑌾𑌹𑍃𑌷𑍍𑌯𑌤 𑌭𑍃𑌶𑌂 𑌰𑌾𑌮𑍋 𑌲𑌕𑍍𑌷𑍍𑌮𑌣𑌶𑍍𑌚 𑌮𑌹𑌾𑌬𑌲𑌃 ॥ 25 ॥
𑌶𑍍𑌰𑍁𑌤𑍍𑌵𑌾 𑌦𑌧𑌿𑌮𑍁𑌖𑌸𑍍𑌯𑍇𑌦𑌂 𑌸𑍁𑌗𑍍𑌰𑍀𑌵𑌸𑍍𑌸𑌂𑌪𑍍𑌰𑌹𑍃𑌷𑍍𑌯 𑌚 ।
𑌵𑌨𑌪𑌾𑌲𑌂 𑌪𑍁𑌨𑌰𑍍𑌵𑌾𑌕𑍍𑌯𑌂 𑌸𑍁𑌗𑍍𑌰𑍀𑌵𑌃 𑌪𑍍𑌰𑌤𑍍𑌯𑌭𑌾𑌷𑌤 ॥ 26 ॥
𑌪𑍍𑌰𑍀𑌤𑍋𑌽𑌸𑍍𑌮𑌿 𑌸𑍋𑌽𑌹𑌂 𑌯𑌦𑍍𑌭𑍁𑌕𑍍𑌤𑌂 𑌵𑌨𑌂 𑌤𑍈𑌃 𑌕𑍃𑌤𑌕𑌰𑍍𑌮𑌭𑌿𑌃 ।
𑌮𑌰𑍍𑌷𑌿𑌤𑌂 𑌮𑌰𑍍𑌷𑌣𑍀𑌯𑌂 𑌚 𑌚𑍇𑌷𑍍𑌟𑌿𑌤𑌂 𑌕𑍃𑌤𑌕𑌰𑍍𑌮𑌣𑌾𑌮𑍍 ॥ 2 ॥
𑌇𑌚𑍍𑌛𑌾𑌮𑌿 𑌶𑍀𑌘𑍍𑌰𑌂 𑌹𑌨𑍁𑌮𑌤𑍍𑌪𑍍𑌰𑌧𑌾𑌨𑌾𑌨𑍍 𑌶𑌾𑌖𑌾𑌮𑍃𑌗𑌾𑌂𑌸𑍍𑌤𑌾𑌨𑍍 𑌮𑍃𑌗𑌰𑌾𑌜𑌦𑌰𑍍𑌪𑌾𑌨𑍍 ।
𑌦𑍍𑌰𑌷𑍍𑌟𑍁𑌂 𑌕𑍃𑌤𑌾𑌰𑍍𑌥𑌾𑌨𑍍 𑌸𑌹 𑌰𑌾𑌘𑌵𑌾𑌭𑍍𑌯𑌾𑌂 𑌶𑍍𑌰𑍋𑌤𑍁𑌂 𑌚 𑌸𑍀𑌤𑌾𑌧𑌿𑌗𑌮𑍇 𑌪𑍍𑌰𑌯𑌤𑍍𑌨𑌮𑍍 ॥ 2 ॥
𑌪𑍍𑌰𑍀𑌤𑌿𑌸𑍍𑌫𑍀𑌤𑌾𑌕𑍍𑌷𑍌 𑌸𑌂𑌪𑍍𑌰𑌹𑍃𑌷𑍍𑌟𑍌 𑌕𑍁𑌮𑌾𑌰𑍌 𑌦𑍃𑌷𑍍𑌟𑍍𑌵𑌾 𑌸𑌿𑌦𑍍𑌧𑌾𑌰𑍍𑌥𑍌 𑌵𑌾𑌨𑌰𑌾𑌣𑌾𑌂 𑌚 𑌰𑌾𑌜𑌾 ।
𑌅𑌂𑌗𑍈𑌃 𑌸𑌂𑌹𑍃𑌷𑍍𑌟𑍈𑌃 𑌕𑌰𑍍𑌮𑌸𑌿𑌦𑍍𑌧𑌿𑌂 𑌵𑌿𑌦𑌿𑌤𑍍𑌵𑌾 𑌬𑌾𑌹𑍍𑌵𑍋𑌰𑌾𑌸𑌨𑍍𑌨𑌾𑌂 𑌸𑍋𑌽𑌤𑌿𑌮𑌾𑌤𑍍𑌰𑌂 𑌨𑌨𑌂𑌦 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌤𑍍𑌰𑌿𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
