𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌰𑌾𑌘𑌵 𑌸𑍍𑌸𑌹𑌲𑌕𑍍𑌷𑍍𑌮𑌣𑌃 ।
𑌵𑌿𑌸𑍍𑌮𑌯𑌂 𑌪𑌰𑌮𑌂 𑌗𑌤𑍍𑌵𑌾 𑌵𑌿𑌶𑍍𑌵𑌾𑌮𑌿𑌤𑍍𑌰𑌮𑌥𑌾𑌬𑍍𑌰𑌵𑍀𑌤𑍍 ॥ 1 ॥
𑌅𑌤𑍍𑌯𑌦𑍍𑌭𑍁𑌤𑌮𑌿𑌦𑌂 𑌬𑍍𑌰𑌹𑍍𑌮𑌨𑍍 𑌕𑌥𑌿𑌤𑌂 𑌪𑌰𑌮𑌂 𑌤𑍍𑌵𑌯𑌾 ।
𑌗𑌂𑌗𑌾𑌵𑌤𑌰𑌣𑌂 𑌪𑍁𑌣𑍍𑌯𑌂 𑌸𑌾𑌗𑌰𑌸𑍍𑌯𑌾𑌪𑌿 𑌪𑍂𑌰𑌣𑌮𑍍 ॥ 2 ॥
𑌤𑌸𑍍𑌯 𑌸𑌾 𑌶𑌰𑍍𑌵𑌰𑍀 𑌸𑌰𑍍𑌵𑌾 𑌸𑌹 𑌸𑍌𑌮𑌿𑌤𑍍𑌰𑌿𑌣𑌾 𑌤𑌦𑌾 ।
𑌜𑌗𑌾𑌮 𑌚𑌿𑌂𑌤𑌯𑌾𑌨𑌸𑍍𑌯 𑌵𑌿𑌶𑍍𑌵𑌾𑌮𑌿𑌤𑍍𑌰𑌕𑌥𑌾𑌂 𑌶𑍁𑌭𑌾𑌮𑍍 ॥ 3 ॥
𑌤𑌤𑌃 𑌪𑍍𑌰𑌭𑌾𑌤𑍇 𑌵𑌿𑌮𑌲𑍇 𑌵𑌿𑌶𑍍𑌵𑌾𑌮𑌿𑌤𑍍𑌰𑌂 𑌮𑌹𑌾𑌮𑍁𑌨𑌿𑌮𑍍 ।
𑌉𑌵𑌾𑌚 𑌰𑌾𑌘𑌵𑍋 𑌵𑌾𑌕𑍍𑌯𑌂 𑌕𑍃𑌤𑌾𑌹𑍍𑌨𑌿𑌕𑌮𑌰𑌿𑌂𑌦𑌮𑌃 ॥ 4 ॥
𑌗𑌤𑌾 𑌭𑌗𑌵𑌤𑍀 𑌰𑌾𑌤𑍍𑌰𑌿𑌶𑍍𑌶𑍍𑌰𑍋𑌤𑌵𑍍𑌯𑌂 𑌪𑌰𑌮𑌂 𑌶𑍍𑌰𑍁𑌤𑌮𑍍 ।
𑌕𑍍𑌷𑌣𑌭𑍂𑌤𑍇𑌵 𑌨𑍌 𑌰𑌾𑌤𑍍𑌰𑌿 𑌸𑍍𑌸𑌮𑍍𑌵𑍃𑌤𑍍𑌤𑍇𑌯𑌂 𑌮𑌹𑌾𑌤𑌪𑌃 ॥ 5 ॥
𑌇𑌮𑌾𑌂 𑌚𑌿𑌂𑌤𑌯𑌤𑌸𑍍𑌸𑌰𑍍𑌵𑌾𑌂 𑌨𑌿𑌖𑌿𑌲𑍇𑌨 𑌕𑌥𑌾𑌂 𑌤𑌵 ।
𑌤𑌰𑌾𑌮 𑌸𑌰𑌿𑌤𑌾𑌂 𑌶𑍍𑌰𑍇𑌷𑍍𑌠𑌾𑌂 𑌪𑍁𑌣𑍍𑌯𑌾𑌂 𑌤𑍍𑌰𑌿𑌪𑌥𑌗𑌾𑌂 𑌨𑌦𑍀𑌮𑍍 ॥ 6 ॥
𑌨𑍌𑌰𑍇𑌷𑌾 𑌹𑌿 𑌸𑍁𑌖𑌾𑌸𑍍𑌤𑍀𑌰𑍍𑌣𑌾 𑌋𑌷𑍀𑌣𑌾𑌂 𑌪𑍁𑌣𑍍𑌯𑌕𑌰𑍍𑌮𑌣𑌾𑌮𑍍 ।
𑌭𑌗𑌵𑌂𑌤𑌮𑌿𑌹 𑌪𑍍𑌰𑌾𑌪𑍍𑌤𑌂 𑌜𑍍𑌞𑌾𑌤𑍍𑌵𑌾 𑌤𑍍𑌵𑌰𑌿𑌤𑌮𑌾𑌗𑌤𑌾 ॥ ॥
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌰𑌾𑌘𑌵𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌸𑌂𑌤𑌾𑌰𑌂 𑌕𑌾𑌰𑌯𑌾𑌮𑌾𑌸 𑌸𑌰𑍍𑌷𑌿𑌸𑌂𑌘 𑌸𑍍𑌸𑌰𑌾𑌘𑌵𑌃 ॥ ॥
𑌉𑌤𑍍𑌤𑌰𑌂 𑌤𑍀𑌰𑌮𑌾𑌸𑌾𑌦𑍍𑌯 𑌸𑌂𑌪𑍂𑌜𑍍𑌯𑌰𑍍𑌷𑌿𑌗𑌣𑌂 𑌤𑌦𑌾 ।
𑌗𑌂𑌗𑌾𑌕𑍂𑌲𑍇 𑌨𑌿𑌵𑌿𑌷𑍍𑌟𑌾𑌸𑍍𑌤𑍇 𑌵𑌿𑌶𑌾𑌲𑌾𑌂 𑌦𑌦𑍃𑌶𑍁𑌃 𑌪𑍁𑌰𑍀𑌮𑍍 ॥ ॥
𑌤𑌤𑍋 𑌮𑍁𑌨𑌿𑌵𑌰𑌸𑍍𑌤𑍂𑌰𑍍𑌣𑌂 𑌜𑌗𑌾𑌮 𑌸𑌹 𑌰𑌾𑌘𑌵𑌃 ।
𑌵𑌿𑌶𑌾𑌲𑌾𑌂 𑌨𑌗𑌰𑍀𑌂 𑌰𑌮𑍍𑌯𑌾𑌂 𑌦𑌿𑌵𑍍𑌯𑌾𑌂 𑌸𑍍𑌵𑌰𑍍𑌗𑍋𑌪𑌮𑌾𑌂 𑌤𑌦𑌾 ॥ 10 ॥
𑌅𑌥 𑌰𑌾𑌮𑍋 𑌮𑌹𑌾𑌪𑍍𑌰𑌾𑌜𑍍𑌞𑍋 𑌵𑌿𑌶𑍍𑌵𑌾𑌮𑌿𑌤𑍍𑌰𑌂 𑌮𑌹𑌾𑌮𑍁𑌨𑌿𑌮𑍍 ।
𑌪𑌪𑍍𑌰𑌚𑍍𑌛 𑌪𑍍𑌰𑌾𑌂𑌜𑌲𑌿𑌰𑍍𑌭𑍂𑌤𑍍𑌵𑌾 𑌵𑌿𑌶𑌾𑌲𑌾𑌮𑍁𑌤𑍍𑌤𑌮𑌾𑌂 𑌪𑍁𑌰𑍀𑌮𑍍 ॥ 11 ॥
𑌕𑌤𑌰𑍋 𑌰𑌾𑌜𑌵𑌂𑌶𑍋𑌽𑌯𑌂 𑌵𑌿𑌶𑌾𑌲𑌾𑌯𑌾𑌂 𑌮𑌹𑌾𑌮𑍁𑌨𑍇 ।
𑌶𑍍𑌰𑍋𑌤𑍁𑌮𑌿𑌚𑍍𑌛𑌾𑌮𑌿 𑌭𑌦𑍍𑌰𑌂 𑌤𑍇 𑌪𑌰𑌂 𑌕𑍌𑌤𑍂𑌹𑌲𑌂 𑌹𑌿 𑌮𑍇 ॥ 12 ॥
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌰𑌾𑌮𑌸𑍍𑌯 𑌮𑍁𑌨𑌿𑌪𑍁𑌂𑌗𑌵𑌃 ।
𑌆𑌖𑍍𑌯𑌾𑌤𑍁𑌂 𑌤𑌤𑍍𑌸𑌮𑌾𑌰𑍇𑌭𑍇 𑌵𑌿𑌶𑌾𑌲𑌸𑍍𑌯 𑌪𑍁𑌰𑌾𑌤𑌨𑌮𑍍 ॥ 13 ॥
𑌶𑍍𑌰𑍂𑌯𑌤𑌾𑌂 𑌰𑌾𑌮 𑌶𑌕𑍍𑌰𑌸𑍍𑌯 𑌕𑌥𑌾𑌂 𑌕𑌥𑌯𑌤𑌶𑍍𑌶𑍁𑌭𑌾𑌮𑍍 ।
𑌅𑌸𑍍𑌮𑌿𑌨𑍍 𑌦𑍇𑌶𑍇 𑌤𑍁 𑌯𑌦𑍍𑌵𑍃𑌤𑍍𑌤𑌂 𑌤𑌦𑌪𑌿 𑌶𑍃𑌣𑍁 𑌰𑌾𑌘𑌵 ॥ 14 ॥
𑌪𑍂𑌰𑍍𑌵𑌂 𑌕𑍃𑌤𑌯𑍁𑌗𑍇 𑌰𑌾𑌮 𑌦𑌿𑌤𑍇𑌃 𑌪𑍁𑌤𑍍𑌰𑌾 𑌮𑌹𑌾𑌬𑌲𑌾𑌃 ।
𑌅𑌦𑌿𑌤𑍇𑌶𑍍𑌚 𑌮𑌹𑌾𑌭𑌾𑌗 𑌵𑍀𑌰𑍍𑌯𑌵𑌂𑌤𑌸𑍍𑌸𑍁𑌧𑌾𑌰𑍍𑌮𑌿𑌕𑌾𑌃 ॥ 15 ॥
𑌤𑌤𑌸𑍍𑌤𑍇𑌷𑌾𑌂 𑌨𑌰𑌶𑍍𑌰𑍇𑌷𑍍𑌠 𑌬𑍁𑌦𑍍𑌧𑌿𑌰𑌾𑌸𑍀𑌨𑍍𑌮𑌹𑌾𑌤𑍍𑌮𑌨𑌾𑌮𑍍 ।
𑌅𑌮𑌰𑌾 𑌅𑌜𑌰𑌾𑌶𑍍𑌚𑍈𑌵 𑌕𑌥𑌂 𑌸𑍍𑌯𑌾𑌮 𑌨𑌿𑌰𑌾𑌮𑌯𑌾𑌃 ॥ 16 ॥
𑌤𑍇𑌷𑌾𑌂 𑌚𑌿𑌂𑌤𑌯𑌤𑌾𑌂 𑌰𑌾𑌮 𑌬𑍁𑌦𑍍𑌧𑌿𑌰𑌾𑌸𑍀𑌨𑍍𑌮𑌹𑌾𑌤𑍍𑌮𑌨𑌾𑌮𑍍 ।
𑌕𑍍𑌷𑍀𑌰𑍋𑌦𑌮𑌥𑌨𑌂 𑌕𑍃𑌤𑍍𑌵𑌾 𑌰𑌸𑌂 𑌪𑍍𑌰𑌾𑌪𑍍𑌸𑍍𑌯𑌾𑌮 𑌤𑌤𑍍𑌰 𑌵𑍈 ॥ 1 ॥
𑌤𑌤𑍋 𑌨𑌿𑌶𑍍𑌚𑌿𑌤𑍍𑌯 𑌮𑌥𑌨𑌂 𑌯𑍋𑌕𑍍𑌤𑍍𑌰𑌂 𑌕𑍃𑌤𑍍𑌵𑌾 𑌚 𑌵𑌾𑌸𑍁𑌕𑌿𑌮𑍍 ।
𑌮𑌂𑌥𑌾𑌨𑌂 𑌮𑌂𑌦𑌰𑌂 𑌕𑍃𑌤𑍍𑌵𑌾 𑌮𑌮𑌂𑌥𑍁𑌰𑌮𑌿𑌤𑍌𑌜𑌸𑌃 ॥ 1 ॥
𑌅𑌥 𑌵𑌰𑍍𑌷𑌸𑌹𑌸𑍍𑌰𑍇𑌣 𑌯𑍋𑌕𑍍𑌤𑍍𑌰𑌸𑌰𑍍𑌪𑌶𑌿𑌰𑌾𑌂𑌸𑌿 𑌚 ।
𑌵𑌮𑌂𑌤𑍍𑌯𑌤𑌿 𑌵𑌿𑌷𑌂 𑌤𑌤𑍍𑌰 𑌦𑌦𑌂𑌶𑍁𑌰𑍍𑌦𑌶𑌨𑍈𑌶𑍍𑌶𑌿𑌲𑌾𑌃 ॥ 1 ॥
𑌉𑌤𑍍𑌪𑌪𑌾𑌤𑌾𑌗𑍍𑌨𑌿𑌸𑌂𑌕𑌾𑌶𑌂 𑌹𑌾𑌲𑌾𑌹𑌲𑌮𑌹𑌾𑌵𑌿𑌷𑌮𑍍 ।
𑌤𑍇𑌨 𑌦𑌗𑍍𑌧𑌂 𑌜𑌗𑌤𑍍𑌸𑌰𑍍𑌵𑌂 𑌸𑌦𑍇𑌵𑌾𑌸𑍁𑌰𑌮𑌾𑌨𑍁𑌷𑌮𑍍 ॥ 20 ॥
𑌅𑌥 𑌦𑍇𑌵𑌾 𑌮𑌹𑌾𑌦𑍇𑌵𑌂 𑌶𑌂𑌕𑌰𑌂 𑌶𑌰𑌣𑌾𑌰𑍍𑌥𑌿𑌨𑌃 ।
𑌜𑌗𑍍𑌮𑍁𑌃 𑌪𑌶𑍁𑌪𑌤𑌿𑌂 𑌰𑍁𑌦𑍍𑌰𑌂 𑌤𑍍𑌰𑌾𑌹𑌿 𑌤𑍍𑌰𑌾𑌹𑍀𑌤𑌿 𑌤𑍁𑌷𑍍𑌟𑍁𑌵𑍁𑌃 ॥ 21 ॥
𑌏𑌵𑌮𑍁𑌕𑍍𑌤𑌸𑍍𑌤𑌤𑍋 𑌦𑍇𑌵𑍈𑌰𑍍𑌦𑍇𑌵𑌦𑍇𑌵𑍇𑌶𑍍𑌵𑌰𑌃 𑌪𑍍𑌰𑌭𑍁𑌃 ।
𑌪𑍍𑌰𑌾𑌦𑍁𑌰𑌾𑌸𑍀𑌤𑍍𑌤𑌤𑍋𑌽𑌤𑍍𑌰𑍈𑌵 𑌶𑌂𑌖𑌚𑌕𑍍𑌰𑌧𑌰𑍋 𑌹𑌰𑌿𑌃 ॥ 22 ॥
𑌉𑌵𑌾𑌚𑍈𑌨𑌂 𑌸𑍍𑌮𑌿𑌤𑌂 𑌕𑍃𑌤𑍍𑌵𑌾 𑌰𑍁𑌦𑍍𑌰𑌂 𑌶𑍂𑌲𑌭𑍃𑌤𑌂 𑌹𑌰𑌿𑌃 ।
𑌦𑍈𑌵𑌤𑍈𑌰𑍍𑌮𑌥𑍍𑌯𑌮𑌾𑌨𑍇 𑌤𑍁 𑌯𑌤𑍍𑌪𑍂𑌰𑍍𑌵𑌂 𑌸𑌮𑍁𑌪𑌸𑍍𑌥𑌿𑌤𑌮𑍍 ॥ 23 ॥
𑌤𑍍𑌵𑌦𑍀𑌯𑌂𑌹𑌿 𑌸𑍁𑌰𑌶𑍍𑌰𑍇𑌷𑍍𑌠 𑌸𑍁𑌰𑌾𑌣𑌾𑌮𑌗𑍍𑌰𑌜𑍋𑌽𑌸𑌿 𑌯𑌤𑍍 ।
𑌅𑌗𑍍𑌰𑌪𑍂𑌜𑌾𑌮𑌿𑌮𑌾𑌂 𑌮𑌤𑍍𑌵𑌾 𑌗𑍃𑌹𑌾𑌣𑍇𑌦𑌂 𑌵𑌿𑌷𑌂 𑌪𑍍𑌰𑌭𑍋 ॥ 24 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌚 𑌸𑍁𑌰𑌶𑍍𑌰𑍇𑌷𑍍𑌠𑌸𑍍𑌤𑌤𑍍𑌰𑍈𑌵𑌾𑌂𑌤𑌰𑌧𑍀𑌯𑌤 ।
𑌦𑍇𑌵𑌤𑌾𑌨𑌾𑌂 𑌭𑌯𑌂 𑌦𑍃𑌷𑍍𑌟𑌵𑌾𑌶𑍍𑌰𑍁𑌤𑍍𑌵𑌾 𑌵𑌾𑌕𑍍𑌯𑌂 𑌤𑍁 𑌶𑌾𑌰𑌂𑌗𑌿𑌣𑌃 ।
𑌹𑌾𑌲𑌾𑌹𑌲𑌵𑌿𑌷𑌂 𑌘𑍋𑌰𑌂 𑌸 𑌜𑌗𑍍𑌰𑌾𑌹𑌾𑌮𑍃𑌤𑍋𑌪𑌮𑌮𑍍 ॥ 25 ॥
𑌦𑍇𑌵𑌾𑌨𑍍𑌵𑌿𑌸𑍃𑌜𑍍𑌯 𑌦𑍇𑌵𑍇𑌶𑍋 𑌜𑌗𑌾𑌮 𑌭𑌗𑌵𑌾𑌨𑍍 𑌹𑌰𑌃 ।
𑌤𑌤𑍋 𑌦𑍇𑌵𑌾𑌸𑍁𑌰𑌾𑌸𑍍𑌸𑌰𑍍𑌵𑍇 𑌮𑌮𑌂𑌥𑍂 𑌰𑌘𑍁𑌨𑌂𑌦𑌨 ॥ 26 ॥
𑌪𑍍𑌰𑌵𑌿𑌵𑍇𑌶𑌾𑌥 𑌪𑌾𑌤𑌾𑌲𑌂 𑌮𑌂𑌥𑌾𑌨𑌃 𑌪𑌰𑍍𑌵𑌤𑍋𑌽𑌨𑌘 ।
𑌤𑌤𑍋 𑌦𑍇𑌵𑌾𑌸𑍍𑌸𑌗𑌂𑌧𑌰𑍍𑌵𑌾𑌸𑍍𑌤𑍁𑌷𑍍𑌟𑍁𑌵𑍁𑌰𑍍𑌮𑌧𑍁𑌸𑍂𑌦𑌨𑌮𑍍 ॥ 2 ॥
𑌤𑍍𑌵𑌂 𑌗𑌤𑌿𑌃 𑌸𑌰𑍍𑌵𑌭𑍂𑌤𑌾𑌨𑌾𑌂 𑌵𑌿𑌶𑍇𑌷𑍇𑌣 𑌦𑌿𑌵𑍌𑌕𑌸𑌾𑌮𑍍 ।
𑌪𑌾𑌲𑌯𑌾𑌸𑍍𑌮𑌾𑌨𑍍𑌮𑌹𑌾𑌬𑌾𑌹𑍋 𑌗𑌿𑌰𑌿𑌮𑍁𑌦𑍍𑌧𑌰𑍍𑌤𑍁𑌮𑌰𑍍𑌹𑌸𑌿 ॥ 2 ॥
𑌇𑌤𑌿 𑌶𑍍𑌰𑍁𑌤𑍍𑌵𑌾 𑌹𑍃𑌷𑍀𑌕𑍇𑌶𑌃 𑌕𑌾𑌮𑌠𑌂 𑌰𑍂𑌪𑌮𑌾𑌸𑍍𑌥𑌿𑌤𑌃 ।
𑌪𑌰𑍍𑌵𑌤𑌂 𑌪𑍃𑌷𑍍𑌠𑌤𑌃 𑌕𑍃𑌤𑍍𑌵𑌾 𑌶𑌿𑌶𑍍𑌯𑍇 𑌤𑌤𑍍𑌰𑍋𑌦𑌧𑍌 𑌹𑌰𑌿𑌃 ॥ 2 ॥
𑌪𑌰𑍍𑌵𑌤𑌾𑌗𑍍𑌰𑍇 𑌤𑍁 𑌲𑍋𑌕𑌾𑌤𑍍𑌮𑌾 𑌹𑌸𑍍𑌤𑍇𑌨𑌾𑌕𑍍𑌰𑌮𑍍𑌯 𑌕𑍇𑌶𑌵𑌃 ।
𑌦𑍇𑌵𑌾𑌨𑌾𑌂 𑌮𑌧𑍍𑌯𑌤𑌃 𑌸𑍍𑌥𑌿𑌤𑍍𑌵𑌾 𑌮𑌮𑌂𑌥 𑌪𑍁𑌰𑍁𑌷𑍋𑌤𑍍𑌤𑌮𑌃 ॥ 30 ॥
𑌅𑌥 𑌵𑌰𑍍𑌷𑌸𑌹𑌸𑍍𑌰𑍇𑌣 𑌸𑌦𑌂𑌡𑌸𑍍𑌸𑌕𑌮𑌂𑌡𑌲𑍁𑌃 ।
𑌪𑍂𑌰𑍍𑌵𑌂 𑌧𑌨𑍍𑌵𑌂𑌤𑌰𑌿𑌰𑍍𑌨𑌾𑌮 𑌅𑌪𑍍𑌸𑌰𑌾𑌶𑍍𑌚 𑌸𑍁𑌵𑌰𑍍𑌚𑌸𑌃 ॥ 31 ॥
𑌅𑌪𑍍𑌸𑍁 𑌨𑌿𑌰𑍍𑌮𑌥𑌨𑌾𑌦𑍇𑌵 𑌰𑌸𑌾𑌸𑍍𑌤𑌸𑍍𑌮𑌾𑌦𑍍𑌵𑌰𑌸𑍍𑌤𑍍𑌰𑌿𑌯𑌃 ।
𑌉𑌤𑍍𑌪𑍇𑌤𑍁𑌰𑍍𑌮𑌨𑍁𑌜𑌶𑍍𑌰𑍇𑌷𑍍𑌠 𑌤𑌸𑍍𑌮𑌾𑌦𑌪𑍍𑌸𑌰𑌸𑍋𑌽𑌭𑌵𑌨𑍍 ॥ 32 ॥
𑌷𑌷𑍍𑌟𑌿𑌃 𑌕𑍋𑌟𑍍𑌯𑍋𑌽𑌭𑌵𑌂𑌸𑍍𑌤𑌾𑌸𑌾𑌂 𑌅𑌪𑍍𑌸𑌰𑌾𑌣𑌾𑌂 𑌸𑍁𑌵𑌰𑍍𑌚𑌸𑌾𑌮𑍍 ।
𑌅𑌸𑌂𑌖𑍍𑌯𑍇𑌯𑌾𑌸𑍍𑌤𑍁 𑌕𑌾𑌕𑍁𑌤𑍍𑌸𑍍𑌥 𑌯𑌾𑌸𑍍𑌤𑌾𑌸𑌾𑌂 𑌪𑌰𑌿𑌚𑌾𑌰𑌿𑌕𑌾𑌃 ॥ 33 ॥
𑌨 𑌤𑌾𑌸𑍍𑌸𑍍𑌮 𑌪𑌰𑌿𑌗𑍃𑌹𑍍𑌣𑌂𑌤𑌿 𑌸𑌰𑍍𑌵𑍇 𑌤𑍇 𑌦𑍇𑌵𑌦𑌾𑌨𑌵𑌾𑌃 ।
𑌅𑌪𑍍𑌰𑌤𑌿𑌗𑍍𑌰𑌹𑌣𑌾𑌤𑍍𑌤𑌾𑌶𑍍𑌚 𑌸𑌰𑍍𑌵𑌾𑌸𑍍𑌸𑌾𑌧𑌾𑌰𑌣𑌾𑌸𑍍𑌸𑍍𑌮𑍃𑌤𑌾𑌃 ॥ 34 ॥
𑌵𑌰𑍁𑌣𑌸𑍍𑌯 𑌤𑌤𑌃 𑌕𑌨𑍍𑌯𑌾 𑌵𑌾𑌰𑍁𑌣𑍀 𑌰𑌘𑍁𑌨𑌂𑌦𑌨 ।
𑌉𑌤𑍍𑌪𑌪𑌾𑌤 𑌮𑌹𑌾𑌭𑌾𑌗𑌾 𑌮𑌾𑌰𑍍𑌗𑌮𑌾𑌣𑌾 𑌪𑌰𑌿𑌗𑍍𑌰𑌹𑌮𑍍 ॥ 35 ॥
𑌦𑌿𑌤𑍇𑌃 𑌪𑍁𑌤𑍍𑌰𑌾 𑌨 𑌤𑌾𑌂 𑌰𑌾𑌮 𑌜𑌗𑍃𑌹𑍁𑌰𑍍𑌵𑌰𑍁𑌣𑌾𑌤𑍍𑌮𑌜𑌾𑌮𑍍 ।
𑌅𑌦𑌿𑌤𑍇𑌸𑍍𑌤𑍁 𑌸𑍁𑌤𑌾 𑌵𑍀𑌰 𑌜𑌗𑍃𑌹𑍁𑌸𑍍𑌤𑌾𑌮𑌨𑌿𑌂𑌦𑌿𑌤𑌾𑌮𑍍 ॥ 36 ॥
𑌅𑌸𑍁𑌰𑌾𑌸𑍍𑌤𑍇𑌨 𑌦𑍈𑌤𑍇𑌯𑌾𑌸𑍍𑌸𑍁𑌰𑌾𑌸𑍍𑌤𑍇𑌨𑌾𑌦𑌿𑌤𑍇𑌸𑍍𑌸𑍁𑌤𑌾𑌃 ।
𑌹𑍃𑌷𑍍𑌟𑌾𑌃 𑌪𑍍𑌰𑌮𑍁𑌦𑌿𑌤𑌾𑌶𑍍𑌚𑌾𑌸𑌨𑍍 𑌵𑌾𑌰𑍁𑌣𑍀𑌗𑍍𑌰𑌹𑌣𑌾𑌤𑍍𑌸𑍁𑌰𑌾𑌃 ॥ 3 ॥
𑌉𑌚𑍍𑌚𑍈𑌶𑍍𑌶𑍍𑌰𑌵𑌾 𑌹𑌯𑌶𑍍𑌰𑍇𑌷𑍍𑌠𑍋 𑌮𑌣𑌿𑌰𑌤𑍍𑌨𑌂 𑌚 𑌕𑍌𑌸𑍍𑌤𑍁𑌭𑌮𑍍 ।
𑌉𑌦𑌤𑌿𑌷𑍍𑌠𑌨𑍍𑌨𑌰𑌶𑍍𑌰𑍇𑌷𑍍𑌠 𑌤𑌥𑍈𑌵𑌾𑌮𑍃𑌤𑌮𑍁𑌤𑍍𑌤𑌮𑌮𑍍 ॥ 3 ॥
𑌅𑌥 𑌤𑌸𑍍𑌯 𑌕𑍃𑌤𑍇 𑌰𑌾𑌮 𑌮𑌹𑌾𑌨𑌾𑌸𑍀𑌤𑍍𑌕𑍁𑌲𑌕𑍍𑌷𑌯𑌃 ।
𑌅𑌦𑌿𑌤𑍇𑌸𑍍𑌤𑍁 𑌤𑌤𑌃 𑌪𑍁𑌤𑍍𑌰𑌾 𑌦𑌿𑌤𑍇𑌃 𑌪𑍁𑌤𑍍𑌰𑌾𑌨𑌸𑍂𑌦𑌯𑌨𑍍 ॥ 3 ॥
𑌏𑌕𑌤𑍋𑌽𑌭𑍍𑌯𑌾𑌗𑌮𑌨𑍍 𑌸𑌰𑍍𑌵𑍇 𑌹𑍍𑌯𑌸𑍁𑌰𑌾 𑌰𑌾𑌕𑍍𑌷𑌸𑍈𑌸𑍍𑌸𑌹 ।
𑌯𑍁𑌦𑍍𑌧𑌮𑌾𑌸𑍀𑌨𑍍𑌮𑌹𑌾𑌘𑍋𑌰𑌂 𑌵𑍀𑌰 𑌤𑍍𑌰𑍈𑌲𑍋𑌕𑍍𑌯𑌮𑍋𑌹𑌨𑌮𑍍 ॥ 40 ॥
𑌯𑌦𑌾 𑌕𑍍𑌷𑌯𑌂 𑌗𑌤𑌂 𑌸𑌰𑍍𑌵𑌂 𑌤𑌦𑌾 𑌵𑌿𑌷𑍍𑌣𑍁𑌰𑍍𑌮𑌹𑌾𑌬𑌲𑌃 ।
𑌅𑌮𑍃𑌤𑌂 𑌸𑍋𑌽𑌹𑌰𑌤𑍍𑌤𑍍𑌤𑍂𑌰𑍍𑌣𑌂 𑌮𑌾𑌯𑌾𑌮𑌾𑌸𑍍𑌥𑌾𑌯 𑌮𑍋𑌹𑌿𑌨𑍀𑌮𑍍 ॥ 41 ॥
𑌯𑍇 𑌗𑌤𑌾𑌽𑌭𑌿𑌮𑍁𑌖𑌂 𑌵𑌿𑌷𑍍𑌣𑍁𑌮𑌕𑍍𑌷𑌯𑌂 𑌪𑍁𑌰𑍁𑌷𑍋𑌤𑍍𑌤𑌮𑌮𑍍 ।
𑌸𑌂𑌪𑌿𑌷𑍍𑌟𑌾𑌸𑍍𑌤𑍇 𑌤𑌦𑌾 𑌯𑍁𑌦𑍍𑌧𑍇 𑌵𑌿𑌷𑍍𑌣𑍁𑌨𑌾 𑌪𑍍𑌰𑌭𑌵𑌿𑌷𑍍𑌣𑍁𑌨𑌾 ॥ 42 ॥
𑌅𑌦𑌿𑌤𑍇𑌰𑌾𑌤𑍍𑌮𑌜𑌾 𑌵𑍀𑌰𑌾 𑌦𑌿𑌤𑍇𑌃 𑌪𑍁𑌤𑍍𑌰𑌾𑌨𑍍𑌨𑌿𑌜𑌘𑍍𑌨𑌿𑌰𑍇 ।
𑌤𑌸𑍍𑌮𑌿𑌨𑍍 𑌘𑍋𑌰𑍇 𑌮𑌹𑌾𑌯𑍁𑌦𑍍𑌧𑍇 𑌦𑍈𑌤𑍇𑌯𑌾𑌦𑌿𑌤𑍍𑌯𑌯𑍋𑌰𑍍𑌭𑍃𑌶𑌮𑍍 ॥ 43 ॥
𑌨𑌿𑌹𑌤𑍍𑌯 𑌦𑌿𑌤𑌿𑌪𑍁𑌤𑍍𑌰𑌾𑌂𑌶𑍍𑌚 𑌰𑌾𑌜𑍍𑌯𑌂 𑌪𑍍𑌰𑌾𑌪𑍍𑌯 𑌪𑍁𑌰𑌂𑌦𑌰𑌃 ।
𑌶𑌶𑌾𑌸 𑌮𑍁𑌦𑌿𑌤𑍋 𑌲𑍋𑌕𑌾𑌨𑍍 𑌸𑌰𑍍𑌷𑌿𑌸𑌂𑌘𑌾𑌨𑍍 𑌸𑌚𑌾𑌰𑌣𑌾𑌨𑍍 ॥ 44 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌪𑌂𑌚𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
