ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ഷട്ത്രിംശസ്സര്ഗഃ ।
ഇത്യുക്തസ്താരയാ വാക്യം പ്രശ്രിതം ധര്മസംഹിതമ് ।
മൃദുസ്വഭാവസ്സൌമിത്രിഃ പ്രതിജഗ്രാഹ തദ്വചഃ ॥ 1 ॥
തസ്മിന്പ്രതിഗൃഹീതേ തു വാക്യേ ഹരിഗണേശ്വരഃ ।
ലക്ഷ്മണാത്സുമഹത്ത്രാസം വസ്ത്രം ക്ലിന്നമിവാത്യജത് ॥ 2 ॥
തതഃ കംഠഗതം മാല്യം ചിത്രം ബഹുഗുണം മഹത് ।
ചിച്ഛേദ വിമദശ്ചാസീത്സുഗ്രീവോ വാനരേശ്വരഃ ॥ 3 ॥
സ ലക്ഷ്മണം ഭീമബലം സർവവാനരസത്തമഃ ।
അബ്രവീത്പ്രശ്രിതം വാക്യം സുഗ്രീവ സ്സംപ്രഹര്ഷയന് ॥ 4 ॥
പ്രണഷ്ടാ ശ്രീശ്ച കീര്തിശ്ച കപിരാജ്യം ച ശാശ്വതമ് ।
രാമപ്രസാദാത്സൌമിത്രേ പുനഃ പ്രാപ്തമിദം മയാ ॥ 5 ॥
കശ്ശക്തസ്തസ്യ ദേവസ്യ ഖ്യാതസ്യ സ്വേന കര്മണാ ।
താദൃശം വിക്രമം വീര പ്രതികര്തുമരിംദമ ॥ 6 ॥
സീതാം പ്രാപ്സ്യതി ധര്മാത്മാ വധിഷ്യതി ച രാവണമ് ।
സഹായമാത്രേണ മയാ രാഘവ സ്സ്വേന തേജസാ ॥ 7 ॥
സഹായകൃത്യം കിം തസ്യ യേന സപ്ത മഹാദ്രുമാഃ ।
ശൈലശ്ച വസുധാ ചൈവ ബാണേനൈകേന ദാരിതാഃ ॥ 8 ॥
ധനുർവിഷ്ഫാരയാനസ്യ യസ്യ ശബ്ദേന ലക്ഷ്മണ ।
സശൈലാ കംപിതാ ഭൂമിസ്സഹായൈഃ കിന്നു തസ്യ വൈ ॥ 9 ॥
അനുയാത്രാം നരേംദ്രസ്യ കരിഷ്യേഽഹം നരര്ഷഭ ।
ഗച്ഛതോ രാവണം ഹംതും വൈരിണം സപുരസ്സരമ് ॥ 10 ॥
യദി കിംചിദതിക്രാംതം വിശ്വാസാത്പ്രണയേന വാ ।
പ്രേഷ്യസ്യ ക്ഷമിതവ്യം മേ ന കശ്ചിന്നാപരാധ്യതി ॥ 11 ॥
തി തസ്യ ബ്രുവാണസ്യ സുഗ്രീവസ്യ മഹാത്മനഃ ।
അഭവല്ലക്ഷ്മണഃ പ്രീതഃ പ്രേമ്ണാ ചൈവമുവാച ഹ ॥ 12 ॥
സർവഥാ ഹി മമ ഭ്രാതാ സനാഥോ വാനരേശ്വര ।
ത്വയാ നാഥേന സുഗ്രീവ പ്രശ്രിതേന വിശേഷതഃ ॥ 13 ॥
യസ്തേ പ്രഭാവ സ്സുഗ്രീവ യച്ച തേ ശൌചമാര്ജവമ് ।
അര്ഹസ്ത്വം കപിരാജ്യസ്യ ശ്രിയം ഭോക്തുമനുത്തമാമ് ॥ 14 ॥
സഹായേന തു സുഗ്രീവ ത്വയാ രാമഃ പ്രതാപവാന് ।
വധിഷ്യതി രണേ ശത്രൂനചിരാന്നാത്ര സംശയഃ ॥ 15 ॥
ധര്മജ്ഞസ്യ കൃതജ്ഞസ്യ സംഗ്രാമേഷ്വനിവര്തിനഃ ।
ഉപപന്നം ച യുക്തം ച സുഗ്രീവ തവ ഭാഷിതമ് ॥ 16 ॥
ദോഷജ്ഞസ്സതി സാമര്ഥ്യേ കോഽന്യോ ഭാഷിതുമര്ഹതി ।
വര്ജയിത്വാ മമ ജ്യേഷ്ഠം ത്വാം ച വാനരസത്തമ ॥ 17 ॥
സദൃശശ്ചാസി രാമസ്യ വിക്രമേണ ബലേന ച ।
സഹായോ ദൈവതൈര്ദത്തശ്ചിരായ ഹരിപുംഗവ ॥ 18 ॥
കിം തു ശീഘ്രമിതോ വീര നിഷ്ക്രമ ത്വം മയാ സഹ ।
സാംത്വയസ്വ വയസ്യം ച ത്വം ഭാര്യാഹരണകര്ശിതമ് ॥ 19 ॥
യച്ച ശോകാഭിഭൂതസ്യ ശ്രുത്വാ രാമസ്യ ഭാഷിതമ് ।
മയാ ത്വം പരുഷാണ്യുക്തസ്തച്ചത്വം ക്ഷംതു മര്ഹസി ॥ 20 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ഷട്ത്രിംശസ്സര്ഗഃ ॥
