Meaning, Multimedia
View this in:
| English | Devanagari | Telugu | Tamil | Kannada | Malayalam | Gujarati | Odia | Bengali  |
| Marathi | Assamese | Punjabi | Hindi | Samskritam | Konkani | Nepali | Sinhala | Grantha  |

4.4 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡 - 𑌚𑌤𑍁𑌰𑍍𑌥 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌰𑍍𑌥𑌸𑍍𑌸𑌰𑍍𑌗𑌃 ।

𑌤𑌤𑌃 𑌪𑍍𑌰𑌹𑍃𑌷𑍍𑌟𑍌 𑌹𑌨𑍁𑌮𑌾𑌨𑍍𑌕𑍃𑌤𑍍𑌯𑌵𑌾𑌨𑌿𑌤𑌿 𑌤𑌦𑍍𑌵𑌚𑌃 ।
𑌶𑍍𑌰𑍁𑌤𑍍𑌵𑌾 𑌮𑌧𑍁𑌰𑌸𑌂𑌭𑌾𑌷𑌂 𑌸𑍁𑌗𑍍𑌰𑍀𑌵𑌂 𑌮𑌨𑌸𑌾 𑌗𑌤𑌃 ॥ 1 ॥

𑌭𑌵𑍍𑌯𑍋 𑌰𑌾𑌜𑍍𑌯𑌾𑌗𑌮𑌸𑍍𑌤𑌸𑍍𑌯 𑌸𑍁𑌗𑍍𑌰𑍀𑌵𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌯𑌦𑌯𑌂 𑌕𑍃𑌤𑍍𑌯𑌵𑌾𑌨𑍍𑌪𑍍𑌰𑌾𑌪𑍍𑌤𑌃 𑌕𑍃𑌤𑍍𑌯𑌂 𑌚𑍈𑌤𑌦𑍁𑌪𑌾𑌗𑌤𑌮𑍍 ॥ 2 ॥

𑌤𑌤𑌃 𑌪𑌰𑌮𑌸𑌂𑌹𑍃𑌷𑍍𑌟𑍋 𑌹𑌨𑍁𑌮𑌾𑌨𑍍 𑌪𑍍𑌲𑌵𑌗𑌰𑍍𑌷𑌭𑌃 ।
𑌪𑍍𑌰𑌤𑍍𑌯𑍁𑌵𑌾𑌚 𑌤𑌤𑍋 𑌵𑌾𑌕𑍍𑌯𑌂 𑌰𑌾𑌮𑌂 𑌵𑌾𑌕𑍍𑌯𑌵𑌿𑌶𑌾𑌰𑌦𑌃 ॥ 3 ॥

𑌕𑌿𑌂 𑌅𑌰𑍍𑌥𑌂 𑌤𑍍𑌵𑌂 𑌵𑌨𑌂 𑌘𑍋𑌰𑌂 𑌪𑌂𑌪𑌾 𑌕𑌾𑌨𑌨 𑌮𑌂𑌡𑌿𑌤𑌮𑍍 ।
𑌆𑌗𑌤𑌃 𑌸𑌾𑌨𑍁𑌜𑍋 𑌦𑍁𑌰𑍍𑌗𑌂 𑌨𑌾𑌨𑌾 𑌵𑍍𑌯𑌾𑌲 𑌮𑍃𑌗 𑌆𑌯𑍁𑌤𑌮𑍍 ॥ 4 ॥

𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌲𑌕𑍍𑌷𑍍𑌮𑌣𑍋 𑌰𑌾𑌮𑌚𑍋𑌦𑌿𑌤𑌃 ।
𑌆𑌚𑌚𑌕𑍍𑌷𑍇 𑌮𑌹𑌾𑌤𑍍𑌮𑌾𑌨𑌂 𑌰𑌾𑌮𑌂 𑌦𑌶𑌰𑌥𑌾𑌤𑍍𑌮𑌜𑌮𑍍 ॥ 5 ॥

𑌰𑌾𑌜𑌾 𑌦𑌶𑌰𑌥𑍋 𑌨𑌾𑌮 𑌦𑍍𑌯𑍁𑌤𑌿𑌮𑌾𑌂𑌧𑌰𑍍𑌮𑌵𑌤𑍍𑌸𑌲𑌃 ।
𑌚𑌾𑌤𑍁𑌰𑍍𑌵𑌰𑍍𑌣𑍍𑌯𑌂 𑌸𑍍𑌵𑌧𑌰𑍍𑌮𑍇𑌣 𑌨𑌿𑌤𑍍𑌯𑌮𑍇𑌵𑌾𑌭𑍍𑌯𑌪𑌾𑌲𑌯𑌤𑍍 ॥ 6 ॥

𑌨 𑌦𑍍𑌵𑍇𑌷𑍍𑌟𑌾 𑌵𑌿𑌦𑍍𑌯𑌤𑍇 𑌤𑌸𑍍𑌯 𑌨 𑌚 𑌸 𑌦𑍍𑌵𑍇𑌷𑍍𑌟𑌿 𑌕𑌂𑌚𑌨 ।
𑌸 𑌚 𑌸𑌰𑍍𑌵𑍇𑌷𑍁 𑌭𑍂𑌤𑍇𑌷𑍁 𑌪𑌿𑌤𑌾𑌮𑌹 𑌇𑌵𑌾𑌪𑌰𑌃 ॥ 𑍭 ॥

𑌅𑌗𑍍𑌨𑌿𑌷𑍍𑌟𑍋𑌮𑌾𑌦𑌿𑌭𑌿𑌰𑍍𑌯𑌜𑍍𑌞𑍈𑌰𑌿𑌷𑍍𑌟𑌵𑌾𑌨𑌾𑌪𑍍𑌤𑌦𑌕𑍍𑌷𑌿𑌣𑍈𑌃 ।
𑌤𑌸𑍍𑌯𑌾𑌯𑌂 𑌪𑍂𑌰𑍍𑌵𑌜𑌃 𑌪𑍁𑌤𑍍𑌰𑍋 𑌰𑌾𑌮𑍋 𑌨𑌾𑌮 𑌜𑌨𑍈𑌃 𑌶𑍍𑌰𑍁𑌤𑌃 ॥ 𑍮 ॥

𑌶𑌰𑌣𑍍𑌯𑌸𑍍𑌸𑌰𑍍𑌵𑌭𑍂𑌤𑌾𑌨𑌾𑌂 𑌪𑌿𑌤𑍁𑌰𑍍𑌨𑌿𑌰𑍍𑌦𑍇𑌶𑌪𑌾𑌰𑌗𑌃 ।
𑌵𑍀𑌰𑍋 𑌦𑌶𑌰𑌥𑌸𑍍𑌯𑌾𑌯𑌂 𑌪𑍁𑌤𑍍𑌰𑌾𑌣𑌾𑌂 𑌗𑍁𑌣𑌵𑌤𑍍𑌤𑌮𑌃 ॥ 𑍯 ॥

𑌰𑌾𑌜𑌲𑌕𑍍𑌷𑌣𑌸𑌂𑌪𑌨𑍍𑌨𑌸𑍍𑌸𑌮𑍍𑌯𑍁𑌕𑍍𑌤𑍋 𑌰𑌾𑌜𑌸𑌂𑌪𑌦𑌾 ।
𑌰𑌾𑌜𑍍𑌯𑌾𑌦𑍍𑌭𑍍𑌰𑌷𑍍𑌟𑍋 𑌵𑌨𑍇 𑌵𑌸𑍍𑌤𑍁𑌂 𑌮𑌯𑌾 𑌸𑌾𑌰𑍍𑌧𑌮𑌿𑌹𑌾𑌗𑌤𑌃 ॥ 10 ॥

𑌭𑌾𑌰𑍍𑌯𑌯𑌾 𑌚 𑌮𑌹𑌾𑌤𑍇𑌜𑌾𑌸𑍍𑌸𑍀𑌤𑌯𑌾𑌽𑌨𑍁𑌗𑌤𑍋 𑌵𑌶𑍀 ।
𑌦𑌿𑌨𑌕𑍍𑌷𑌯𑍇 𑌮𑌹𑌾𑌤𑍇𑌜𑌾𑌃 𑌪𑍍𑌰𑌭𑌯𑍇𑌵 𑌦𑌿𑌵𑌾𑌕𑌰𑌃 ॥ 11 ॥

𑌅𑌹𑌮𑌸𑍍𑌯𑌾𑌵𑌰𑍋 𑌭𑍍𑌰𑌾𑌤𑌾 𑌗𑍁𑌣𑍈𑌰𑍍𑌦𑌾𑌸𑍍𑌯𑌮𑍁𑌪𑌾𑌗𑌤𑌃 ।
𑌕𑍃𑌤𑌜𑍍𑌞𑌸𑍍𑌯 𑌬𑌹𑍁𑌜𑍍𑌞𑌸𑍍𑌯 𑌲𑌕𑍍𑌷𑍍𑌮𑌣𑍋 𑌨𑌾𑌮 𑌨𑌾𑌮𑌤𑌃 ॥ 12 ॥

𑌸𑍁𑌖𑌾𑌰𑍍𑌹𑌸𑍍𑌯 𑌮𑌹𑌾𑌰𑍍𑌹𑌸𑍍𑌯 𑌸𑌰𑍍𑌵𑌭𑍂𑌤𑌹𑌿𑌤𑌾𑌤𑍍𑌮𑌨𑌃 ।
𑌐𑌶𑍍𑌵𑌰𑍍𑌯𑍇𑌣 𑌚 𑌹𑍀𑌨𑌸𑍍𑌯 𑌵𑌨𑌵𑌾𑌸𑌾𑌶𑍍𑌰𑌿𑌤𑌸𑍍𑌯 𑌚 ॥ 13 ॥

𑌰𑌕𑍍𑌷𑌸𑌾𑌽𑌪𑌹𑍃𑌤𑌾 𑌭𑌾𑌰𑍍𑌯𑌾 𑌰𑌹𑌿𑌤𑍇 𑌕𑌾𑌮𑌰𑍂𑌪𑌿𑌣𑌾 ।
𑌤𑌚𑍍𑌚 𑌨 𑌜𑍍𑌞𑌾𑌯𑌤𑍇 𑌰𑌕𑍍𑌷𑌃 𑌪𑌤𑍍𑌨𑍀 𑌯𑍇𑌨𑌾𑌸𑍍𑌯 𑌸𑌾 𑌹𑍃𑌤𑌾 ॥ 14 ॥

𑌦𑌨𑍁𑌰𑍍𑌨𑌾𑌮 𑌦𑌿𑌤𑍇𑌃 𑌪𑍁𑌤𑍍𑌰𑌶𑍍𑌶𑌾𑌪𑌾𑌦𑍍𑌰𑌾𑌕𑍍𑌷𑌸𑌤𑌾𑌂 𑌗𑌤𑌃 ।
𑌆𑌖𑍍𑌯𑌾𑌤𑌸𑍍𑌤𑍇𑌨 𑌸𑍁𑌗𑍍𑌰𑍀𑌵𑌸𑍍𑌸𑌮𑌰𑍍𑌥𑍋 𑌵𑌾𑌨𑌰𑌰𑍍𑌷𑌭𑌃 ॥ 15 ॥

𑌸 𑌜𑍍𑌞𑌾𑌸𑍍𑌯𑌤𑌿 𑌮𑌹𑌾𑌵𑍀𑌰𑍍𑌯𑌸𑍍𑌤𑌵 𑌭𑌾𑌰𑍍𑌯𑌾𑌪𑌹𑌾𑌰𑌿𑌣𑌮𑍍 ।
𑌏𑌵𑌮𑍁𑌕𑍍𑌤𑍍𑌵𑌾 𑌦𑌨𑍁𑌸𑍍𑌸𑍍𑌵𑌰𑍍𑌗𑌂 𑌭𑍍𑌰𑌾𑌜𑌮𑌾𑌨𑍋 𑌗𑌤𑌸𑍍𑌸𑍁𑌖𑌮𑍍 ॥ 16 ॥

𑌏𑌤𑌤𑍍𑌤𑍇 𑌸𑌰𑍍𑌵𑌮𑌾𑌖𑍍𑌯𑌾𑌤𑌂 𑌯𑌥𑌾 𑌤𑌥𑍍𑌯𑍇𑌨 𑌪𑍃𑌚𑍍𑌛𑌤𑌃 ।
𑌅𑌹𑌂 𑌚𑍈𑌵 𑌹𑌿 𑌰𑌾𑌮𑌶𑍍𑌚 𑌸𑍁𑌗𑍍𑌰𑍀𑌵𑌂 𑌶𑌰𑌣𑌂 𑌗𑌤𑍌 ॥ 1𑍭 ॥

𑌏𑌷 𑌦𑌤𑍍𑌤𑍍𑌵𑌾 𑌚 𑌵𑌿𑌤𑍍𑌤𑌾𑌨𑌿 𑌪𑍍𑌰𑌾𑌪𑍍𑌯 𑌚𑌾𑌨𑍁𑌤𑍍𑌤𑌮𑌂 𑌯𑌶𑌃 ।
𑌲𑍋𑌕𑌨𑌾𑌥𑌃 𑌪𑍁𑌰𑌾 𑌭𑍂𑌤𑍍𑌵𑌾 𑌸𑍁𑌗𑍍𑌰𑍀𑌵𑌂 𑌨𑌾𑌥𑌮𑌿𑌚𑍍𑌛𑌤𑌿 ॥ 1𑍮 ॥

𑌪𑌿𑌤𑌾 𑌯𑌸𑍍𑌯 𑌪𑍁𑌰𑌾 𑌹𑍍𑌯𑌾𑌸𑍀𑌚𑍍𑌛𑌰𑌣𑍍𑌯𑍋 𑌧𑌰𑍍𑌮𑌵𑌤𑍍𑌸𑌲𑌃 ।
𑌤𑌸𑍍𑌯 𑌪𑍁𑌤𑍍𑌰𑌶𑍍𑌶𑌰𑌣𑍍𑌯𑌶𑍍𑌚 𑌸𑍁𑌗𑍍𑌰𑍀𑌵𑌂 𑌶𑌰𑌣𑌂 𑌗𑌤𑌃 ॥ 1𑍯 ॥

𑌸𑌰𑍍𑌵𑌲𑍋𑌕𑌸𑍍𑌯 𑌧𑌰𑍍𑌮𑌾𑌤𑍍𑌮𑌾 𑌶𑌰𑌣𑍍𑌯𑌶𑍍𑌶𑌰𑌣𑌂 𑌪𑍁𑌰𑌾 ।
𑌗𑍁𑌰𑍁𑌰𑍍𑌮𑍇 𑌰𑌾𑌘𑌵𑌸𑍍𑌸𑍋𑌽𑌯𑌂 𑌸𑍁𑌗𑍍𑌰𑍀𑌵𑌂 𑌶𑌰𑌣𑌂 𑌗𑌤𑌃 ॥ 20 ॥

𑌯𑌸𑍍𑌯 𑌪𑍍𑌰𑌸𑌾𑌦𑍇 𑌸𑌤𑌤𑌂 𑌪𑍍𑌰𑌸𑍀𑌦𑍇𑌯𑍁𑌰𑌿𑌮𑌾𑌃 𑌪𑍍𑌰𑌜𑌾𑌃 ।
𑌸 𑌰𑌾𑌮𑍋 𑌵𑌾𑌨𑌰𑍇𑌂𑌦𑍍𑌰𑌸𑍍𑌯 𑌪𑍍𑌰𑌸𑌾𑌦𑌮𑌭𑌿𑌕𑌾𑌂𑌕𑍍𑌷𑌤𑍇 ॥ 21 ॥

𑌯𑍇𑌨 𑌸𑌰𑍍𑌵𑌗𑍁𑌣𑍋𑌪𑍇𑌤𑌾𑌃 𑌪𑍃𑌥𑌿𑌵𑍍𑌯𑌾𑌂 𑌸𑌰𑍍𑌵𑌪𑌾𑌰𑍍𑌥𑌿𑌵𑌾𑌃 ।
𑌮𑌾𑌨𑌿𑌤𑌾𑌸𑍍𑌸𑌤𑌤𑌂 𑌰𑌾𑌜𑍍𑌞𑌾 𑌸𑌦𑌾 𑌦𑌶𑌰𑌥𑍇𑌨 𑌵𑍈 ॥ 22 ॥

𑌤𑌸𑍍𑌯𑌾𑌯𑌂 𑌪𑍂𑌰𑍍𑌵𑌜𑌃 𑌪𑍁𑌤𑍍𑌰𑌸𑍍𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌵𑌿𑌶𑍍𑌰𑍁𑌤𑌃 ।
𑌸𑍁𑌗𑍍𑌰𑍀𑌵𑌂 𑌵𑌾𑌨𑌰𑍇𑌂𑌦𑍍𑌰𑌂 𑌤𑍁 𑌰𑌾𑌮𑌶𑍍𑌶𑌰𑌣𑌮𑌾𑌗𑌤𑌃 ॥ 23 ॥

𑌶𑍋𑌕𑌾𑌭𑌿𑌭𑍂𑌤𑍇 𑌰𑌾𑌮𑍇 𑌤𑍁 𑌶𑍋𑌕𑌾𑌰𑍍𑌤𑍇 𑌶𑌰𑌣𑌂 𑌗𑌤𑍇 ।
𑌕𑌰𑍍𑌤𑍁𑌮𑌰𑍍𑌹𑌤𑌿 𑌸𑍁𑌗𑍍𑌰𑍀𑌵𑌃 𑌪𑍍𑌰𑌸𑌾𑌦𑌂 𑌹𑌰𑌿𑌯𑍂𑌧𑌪𑌃 ॥ 24 ॥

𑌏𑌵𑌂 𑌬𑍍𑌰𑍁𑌵𑌾𑌣𑌂 𑌸𑍌𑌮𑌿𑌤𑍍𑌰𑌿𑌂 𑌕𑌰𑍁𑌣𑌂 𑌸𑌾𑌶𑍍𑌰𑍁𑌲𑍋𑌚𑌨𑌮𑍍 ।
𑌹𑌨𑍁𑌮𑌾𑌨𑍍𑌪𑍍𑌰𑌤𑍍𑌯𑍁𑌵𑌾𑌚𑍇𑌦𑌂 𑌵𑌾𑌕𑍍𑌯𑌂 𑌵𑌾𑌕𑍍𑌯𑌵𑌿𑌶𑌾𑌰𑌦𑌃 ॥ 25 ॥

𑌈𑌦𑍃𑌶𑌾 𑌬𑍁𑌦𑍍𑌧𑌿𑌸𑌂𑌪𑌨𑍍𑌨𑌾 𑌜𑌿𑌤𑌕𑍍𑌰𑍋𑌧𑌾 𑌜𑌿𑌤𑍇𑌂𑌦𑍍𑌰𑌿𑌯𑌾𑌃 ।
𑌦𑍍𑌰𑌷𑍍𑌟𑌵𑍍𑌯𑌾 𑌵𑌾𑌨𑌰𑍇𑌂𑌦𑍍𑌰𑍇𑌣 𑌦𑌿𑌷𑍍𑌟𑍍𑌯𑌾 𑌦𑌰𑍍𑌶𑌨𑌮𑌾𑌗𑌤𑌾𑌃 ॥ 26 ॥

𑌸 𑌹𑌿 𑌰𑌾𑌜𑍍𑌯𑌾𑌤𑍍𑌪𑌰𑌿𑌭𑍍𑌰𑌷𑍍𑌟𑌃 𑌕𑍃𑌤𑌵𑍈𑌰𑌶𑍍𑌚 𑌵𑌾𑌲𑌿𑌨𑌾 ।
𑌹𑍃𑌤𑌦𑌾𑌰𑍋 𑌵𑌨𑍇 𑌤𑍍𑌯𑌕𑍍𑌤𑍋 𑌭𑍍𑌰𑌾𑌤𑍍𑌰𑌾 𑌵𑌿𑌨𑌿𑌕𑍃𑌤𑍋 𑌭𑍃𑌶𑌮𑍍 ॥ 2𑍭 ॥

𑌕𑌰𑌿𑌷𑍍𑌯𑌤𑌿 𑌸 𑌸𑌾𑌹𑌾𑌯𑍍𑌯𑌂 𑌯𑍁𑌵𑌯𑍋𑌰𑍍𑌭𑌾𑌸𑍍𑌕𑌰𑌾𑌤𑍍𑌮𑌜𑌃 ।
𑌸𑍁𑌗𑍍𑌰𑍀𑌵𑌸𑍍𑌸𑌹 𑌚𑌾𑌸𑍍𑌮𑌾𑌭𑌿 𑌸𑍍𑌸𑍀𑌤𑌾𑌯𑌾𑌃 𑌪𑌰𑌿𑌮𑌾𑌰𑍍𑌗𑌣𑍇 ॥ 2𑍮 ॥

𑌇𑌤𑍍𑌯𑍇𑌵𑌮𑍁𑌕𑍍𑌤𑍍𑌵𑌾 𑌹𑌨𑍁𑌮𑌾𑌨𑍍 𑌶𑍍𑌲𑌕𑍍𑌷𑍍𑌣𑌂 𑌮𑌧𑍁𑌰𑌯𑌾 𑌗𑌿𑌰𑌾 ।
𑌬𑌭𑌾𑌷𑍇 𑌸𑍋𑌽𑌭𑌿𑌗𑌚𑍍𑌛𑍇𑌮 𑌸𑍁𑌗𑍍𑌰𑍀𑌵𑌮𑌿𑌤𑌿 𑌰𑌾𑌘𑌵𑌮𑍍 ॥ 2𑍯 ॥

𑌏𑌵𑌂 𑌬𑍍𑌰𑍁𑌵𑌾𑌣𑌂 𑌧𑌰𑍍𑌮𑌾𑌤𑍍𑌮𑌾 𑌹𑌨𑍁𑌮𑌂𑌤𑌂 𑌸 𑌲𑌕𑍍𑌷𑍍𑌮𑌣𑌃 ।
𑌪𑍍𑌰𑌤𑌿𑌪𑍂𑌜𑍍𑌯 𑌯𑌥𑌾𑌨𑍍𑌯𑌾𑌯𑌮𑌿𑌦𑌂 𑌪𑍍𑌰𑍋𑌵𑌾𑌚 𑌰𑌾𑌘𑌵𑌮𑍍 ॥ 30 ॥

𑌕𑌪𑌿𑌃 𑌕𑌥𑌯𑌤𑍇 𑌹𑍃𑌷𑍍𑌟𑍋 𑌯𑌥𑌾𑌽𑌯𑌂 𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌕𑍃𑌤𑍍𑌯𑌵𑌾𑌂𑌤𑍍𑌸𑍋𑌽𑌪𑌿 𑌸𑌂𑌪𑍍𑌰𑌾𑌪𑍍𑌤𑌃 𑌕𑍃𑌤𑌕𑍃𑌤𑍍𑌯𑍋𑌽𑌸𑌿 𑌰𑌾𑌘𑌵 ॥ 31 ॥

𑌪𑍍𑌰𑌸𑌨𑍍𑌨𑌮𑍁𑌖𑌵𑌰𑍍𑌣𑌶𑍍𑌚 𑌵𑍍𑌯𑌕𑍍𑌤𑌂 𑌹𑍃𑌷𑍍𑌟𑌶𑍍𑌚 𑌭𑌾𑌷𑌤𑍇 ।
𑌨𑌾𑌨𑍃𑌤𑌂 𑌵𑌕𑍍𑌷𑍍𑌯𑌤𑍇 𑌵𑍀𑌰𑍋 𑌹𑌨𑍁𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ॥ 32 ॥

𑌤𑌤𑌸𑍍𑌸 𑌤𑍁 𑌮𑌹𑌾𑌪𑍍𑌰𑌾𑌜𑍍𑌞𑍋 𑌹𑌨𑍁𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌜𑌗𑌾𑌮𑌾𑌦𑌾𑌯 𑌤𑍌 𑌵𑍀𑌰𑍌 𑌹𑌰𑌿𑌰𑌾𑌜𑌾𑌯 𑌰𑌾𑌘𑌵𑍌 ॥ 33 ॥

𑌭𑌿𑌕𑍍𑌷𑍁𑌰𑍂𑌪𑌂 𑌪𑌰𑌿𑌤𑍍𑌯𑌜𑍍𑌯 𑌵𑌾𑌨𑌰𑌂 𑌰𑍂𑌪𑌮𑌾𑌸𑍍𑌥𑌿𑌤𑌃 ।
𑌪𑍃𑌷𑍍𑌠𑌮𑌾𑌰𑍋𑌪𑍍𑌯 𑌤𑍌 𑌵𑍀𑌰𑍌 𑌜𑌗𑌾𑌮 𑌕𑌪𑌿𑌕𑍁𑌂𑌜𑌰𑌃 ॥ 34 ॥

𑌸 𑌤𑍁 𑌵𑌿𑌪𑍁𑌲𑌯𑌶𑌾𑌃 𑌕𑌪𑌿𑌪𑍍𑌰𑌵𑍀𑌰𑌃 𑌪𑌵𑌨𑌸𑍁𑌤𑌃 𑌕𑍃𑌤𑌕𑍃𑌤𑍍𑌯𑌵𑌤𑍍𑌪𑍍𑌰𑌹𑍃𑌷𑍍𑌟𑌃 ।
𑌗𑌿𑌰𑌿𑌵𑌰𑌮𑍁𑌰𑍁𑌵𑌿𑌕𑍍𑌰𑌮𑌃 𑌪𑍍𑌰𑌯𑌾𑌤 𑌸𑍍𑌸 𑌶𑍁𑌭𑌮𑌤𑌿𑌸𑍍𑌸𑌹 𑌰𑌾𑌮𑌲𑌕𑍍𑌷𑍍𑌮𑌣𑌾𑌭𑍍𑌯𑌾𑌮𑍍 ॥ 35 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌚𑌤𑍁𑌰𑍍𑌥𑌸𑍍𑌸𑌰𑍍𑌗𑌃 ॥


Browse Related Categories: