𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌸𑌾𑌽𑌵𑌨𑍀𑌯 𑌤𑌮𑌾𑌯𑌾𑌸𑌮𑍁𑌪𑌸𑍍𑌪𑍃𑌶𑍍𑌯 𑌜𑌲𑌂 𑌶𑍁𑌚𑌿𑌃 ।
𑌚𑌕𑌾𑌰 𑌮𑌾𑌤𑌾 𑌰𑌾𑌮𑌸𑍍𑌯 𑌮𑌂𑌗𑌲𑌾𑌨𑌿 𑌮𑌨𑌸𑍍𑌵𑌿𑌨𑍀 ॥ 1 ॥
𑌨 𑌶𑌕𑍍𑌯𑌸𑍇 𑌵𑌾𑌰𑌯𑌿𑌤𑍁𑌂 𑌗𑌚𑍍𑌛𑍇𑌦𑌾𑌨𑍀𑌂 𑌰𑌘𑍂𑌤𑍍𑌤𑌮 ।
𑌶𑍀𑌘𑍍𑌰𑌂 𑌚 𑌵𑌿𑌨𑌿𑌵𑌰𑍍𑌤𑌸𑍍𑌵 𑌵𑌰𑍍𑌤𑌸𑍍𑌵 𑌚 𑌸𑌤𑌾𑌂 𑌕𑍍𑌰𑌮𑍇 ॥ 2 ॥
𑌯𑌂 𑌪𑌾𑌲𑌯𑌸𑌿 𑌧𑌰𑍍𑌮𑌂 𑌤𑍍𑌵𑌂 𑌧𑍃𑌤𑍍𑌯𑌾 𑌚 𑌨𑌿𑌯𑌮𑍇𑌨 𑌚 ।
𑌸 𑌵𑍈 𑌰𑌾𑌘𑌵𑌶𑌾𑌰𑍍𑌦𑍂𑌲 𑌧𑌰𑍍𑌮𑌸𑍍𑌤𑍍𑌵𑌾𑌮𑌭𑌿𑌰𑌕𑍍𑌷𑌤𑍁 ॥ 3 ॥
𑌯𑍇𑌭𑍍𑌯𑌃 𑌪𑍍𑌰𑌣𑌮𑌸𑍇 𑌪𑍁𑌤𑍍𑌰 𑌚𑍈𑌤𑍍𑌯𑍇𑌷𑍍𑌵𑌾𑌯𑌤𑌨𑍇𑌷𑍁 𑌚 ।
𑌤𑍇 𑌚 𑌤𑍍𑌵𑌾𑌮𑌭𑌿𑌰𑌕𑍍𑌷𑌂𑌤𑍁 𑌵𑌨𑍇 𑌸𑌹 𑌮𑌹𑌰𑍍𑌷𑌿𑌭𑌿𑌃 ॥ 4 ॥
𑌯𑌾𑌨𑌿 𑌦𑌤𑍍𑌤𑌾𑌨𑌿 𑌤𑍇𑌽𑌸𑍍𑌤𑍍𑌰𑌾𑌣𑌿 𑌵𑌿𑌶𑍍𑌵𑌾𑌮𑌿𑌤𑍍𑌰𑍇𑌣 𑌧𑍀𑌮𑌤𑌾 ।
𑌤𑌾𑌨𑌿 𑌤𑍍𑌵𑌾𑌮𑌭𑌿𑌰𑌕𑍍𑌷𑌂𑌤𑍁 𑌗𑍁𑌣𑍈𑌸𑍍𑌸𑌮𑍁𑌦𑌿𑌤𑌂 𑌸𑌦𑌾 ॥ 5 ॥
𑌪𑌿𑌤𑍃𑌶𑍁𑌶𑍍𑌰𑍂𑌷𑌯𑌾 𑌪𑍁𑌤𑍍𑌰 𑌮𑌾𑌤𑍃𑌶𑍁𑌶𑍍𑌰𑍂𑌷𑌯𑌾 𑌤𑌥𑌾 ।
𑌸𑌤𑍍𑌯𑍇𑌨 𑌚 𑌮𑌹𑌾𑌬𑌾𑌹𑍋 𑌚𑌿𑌰𑌂 𑌜𑍀𑌵𑌾𑌭𑌿𑌰𑌕𑍍𑌷𑌿𑌤𑌃 ॥ 6 ॥
𑌸𑌮𑌿𑌤𑍍𑌕𑍁𑌶 𑌪𑌵𑌿𑌤𑍍𑌰𑌾𑌣𑌿 𑌵𑍇𑌦𑍍𑌯𑌶𑍍𑌚𑌾𑌯𑌤𑌨𑌾𑌨𑌿 𑌚 ।
𑌸𑍍𑌥𑌂𑌡𑌿𑌲𑌾𑌨𑌿 𑌵𑌿𑌚𑌿𑌤𑍍𑌰𑌾𑌣𑌿 𑌶𑍈𑌲𑌾 𑌵𑍃𑌕𑍍𑌷𑌾𑌃 𑌕𑍍𑌷𑍁𑌪𑌾 𑌹𑍍𑌰𑌦𑌾𑌃 ॥ ॥
𑌪𑌤𑌂𑌗𑌾𑌃 𑌪𑌨𑍍𑌨𑌗𑌾𑌸𑍍𑌸𑌿𑌂𑌹𑌾𑌸𑍍𑌤𑍍𑌵𑌾𑌂 𑌰𑌕𑍍𑌷𑌂𑌤𑍁 𑌨𑌰𑍋𑌤𑍍𑌤𑌮 ।
𑌸𑍍𑌵𑌸𑍍𑌤𑌿𑌸𑌾𑌧𑍍𑌯𑌾𑌶𑍍𑌚 𑌵𑌿𑌶𑍍𑌵𑍇 𑌚 𑌮𑌰𑍁𑌤𑌶𑍍𑌚 𑌮𑌹𑌰𑍍𑌷𑌯𑌃 ।
𑌸𑍍𑌵𑌸𑍍𑌤𑌿 𑌧𑌾𑌤𑌾 𑌵𑌿𑌧𑌾𑌤𑌾 𑌚 𑌸𑍍𑌵𑌸𑍍𑌤𑌿 𑌪𑍂𑌷𑌾 𑌭𑌗𑍋𑌽𑌰𑍍𑌯𑌮𑌾 ॥ ॥
𑌲𑍋𑌕𑌪𑌾𑌲𑌾𑌶𑍍𑌚 𑌤𑍇 𑌸𑌰𑍍𑌵𑍇 𑌵𑌾𑌸𑌵𑌪𑍍𑌰𑌮𑍁𑌖𑌾𑌸𑍍𑌤𑌥𑌾 ।
𑌋𑌤𑌵𑌶𑍍𑌚𑍈𑌵 𑌪𑌕𑍍𑌷𑌾𑌶𑍍𑌚 𑌮𑌾𑌸𑌾 𑌸𑍍𑌸𑌂𑌵𑌤𑍍𑌸𑌰𑌾𑌃 𑌕𑍍𑌷𑌪𑌾𑌃 ॥ ॥
𑌦𑌿𑌨𑌾𑌨𑌿 𑌚 𑌮𑍁𑌹𑍂𑌰𑍍𑌤𑌾𑌶𑍍𑌚 𑌸𑍍𑌵𑌸𑍍𑌤𑌿 𑌕𑍁𑌰𑍍𑌵𑌂𑌤𑍁 𑌤𑍇 𑌸𑌦𑌾 ।
𑌸𑍍𑌮𑍃𑌤𑌿𑌰𑍍𑌧𑍃𑌤𑌿𑌶𑍍𑌚 𑌧𑌰𑍍𑌮𑌶𑍍𑌚 𑌪𑌾𑌤𑍁 𑌤𑍍𑌵𑌾𑌂 𑌪𑍁𑌤𑍍𑌰 𑌸𑌰𑍍𑌵𑌤𑌃 ॥ 10 ॥
𑌸𑍍𑌕𑌂𑌦𑌶𑍍𑌚 𑌭𑌗𑌵𑌾𑌂𑌦𑍇𑌵 𑌸𑍍𑌸𑍋𑌮𑌶𑍍𑌚 𑌸 𑌬𑍃𑌹𑌸𑍍𑌪𑌤𑌿𑌃 ।
𑌸𑌪𑍍𑌤𑌰𑍍𑌷𑌯𑍋 𑌨𑌾𑌰𑌦𑌶𑍍𑌚 𑌤𑍇 𑌤𑍍𑌵𑌾𑌂 𑌰𑌕𑍍𑌷𑌂𑌤𑍁 𑌸𑌰𑍍𑌵𑌤𑌃 ॥ 11 ॥
𑌯𑌾𑌶𑍍𑌚𑌾𑌪𑌿 𑌸𑌰𑍍𑌵𑌤𑌸𑍍𑌸𑌿𑌧𑍍𑌦𑌾 𑌦𑌿𑌶𑌶𑍍𑌚 𑌸𑌦𑌿𑌗𑍀𑌶𑍍𑌵𑌰𑌾𑌃 ।
𑌸𑍍𑌤𑍁𑌤𑌾 𑌮𑌯𑌾 𑌵𑌨𑍇 𑌤𑌸𑍍𑌮𑌿𑌨𑍍𑌪𑌾𑌂𑌤𑍁 𑌤𑍍𑌵𑌾𑌂 𑌪𑍁𑌤𑍍𑌰 𑌨𑌿𑌤𑍍𑌯𑌶𑌃 ॥ 12 ॥
𑌶𑍈𑌲𑌾𑌸𑍍𑌸𑌰𑍍𑌵𑍇 𑌸𑌮𑍁𑌦𑍍𑌰𑌾𑌶𑍍𑌚 𑌰𑌾𑌜𑌾 𑌵𑌰𑍁𑌣 𑌏𑌵 𑌚 ।
𑌦𑍍𑌯𑍌𑌰𑌂𑌤𑌰𑌿𑌕𑍍𑌷𑌂 𑌪𑍃𑌥𑌿𑌵𑍀 𑌨𑌦𑍍𑌯𑌸𑍍𑌸𑌰𑍍𑌵𑌾𑌸𑍍𑌤𑌥𑍈𑌵 𑌚 ॥ 13 ॥
𑌨𑌕𑍍𑌷𑌤𑍍𑌰𑌾𑌣𑌿 𑌚 𑌸𑌰𑍍𑌵𑌾𑌣𑌿 𑌗𑍍𑌰𑌹𑌾𑌶𑍍𑌚 𑌸𑌹𑌦𑍇𑌵𑌤𑌾𑌃 ।
𑌅𑌹𑍋𑌰𑌾𑌤𑍍𑌰𑍇 𑌤𑌥𑌾 𑌸𑌂𑌧𑍍𑌯𑍇 𑌪𑌾𑌂𑌤𑍁 𑌤𑍍𑌵𑌾𑌂 𑌵𑌨𑌮𑌾𑌶𑍍𑌰𑌿𑌤𑌮𑍍 ॥ 14 ॥
𑌋𑌤𑌵𑌶𑍍𑌚𑍈𑌵 𑌷𑌟𑍍𑌪𑍁𑌣𑍍𑌯𑌾 𑌮𑌾𑌸𑌾𑌸𑍍𑌸𑌂𑌵𑌤𑍍𑌸𑌰𑌾𑌸𑍍𑌤𑌥𑌾 ।
𑌕𑌲𑌾𑌶𑍍𑌚 𑌕𑌾𑌷𑍍𑌠𑌾𑌶𑍍𑌚 𑌤𑌥𑌾 𑌤𑌵 𑌶𑌰𑍍𑌮 𑌦𑌿𑌶𑌂𑌤𑍁 𑌤𑍇 ॥ 15 ॥
𑌮𑌹𑌾𑌵𑌨𑍇 𑌵𑌿𑌚𑌰𑌤𑍋 𑌮𑍁𑌨𑌿𑌵𑍇𑌷𑌸𑍍𑌯 𑌧𑍀𑌮𑌤𑌃 ।
𑌤𑌵𑌾𑌦𑌿𑌤𑍍𑌯𑌾𑌶𑍍𑌚 𑌦𑍈𑌤𑍍𑌯𑌾𑌶𑍍𑌚 𑌭𑌵𑌂𑌤𑍁 𑌸𑍁𑌖𑌦𑌾𑌸𑍍𑌸𑌦𑌾 ॥ 16 ॥
𑌰𑌾𑌕𑍍𑌷𑌸𑌾𑌨𑌾𑌂 𑌪𑌿𑌶𑌾𑌚𑌾𑌨𑌾𑌂 𑌰𑍌𑌦𑍍𑌰𑌾𑌣𑌾𑌂 𑌕𑍍𑌰𑍂𑌰𑌕𑌰𑍍𑌮𑌣𑌾𑌮𑍍 ।
𑌕𑍍𑌰𑌵𑍍𑌯𑌾𑌦𑌾𑌨𑌾𑌂 𑌚 𑌸𑌰𑍍𑌵𑍇𑌷𑌾𑌂 𑌮𑌾 𑌭𑍂𑌤𑍍𑌪𑍁𑌤𑍍𑌰𑌕 𑌤𑍇 𑌭𑌯𑌮𑍍 ॥ 1 ॥
𑌪𑍍𑌲𑌵𑌗𑌾 𑌵𑍃𑌶𑍍𑌚𑌿𑌕𑌾 𑌦𑌂𑌶𑌾𑌮𑌶𑌕𑌾𑌶𑍍𑌚𑍈𑌵 𑌕𑌾𑌨𑌨𑍇 ।
𑌸𑌰𑍀𑌸𑍃𑌪𑌾𑌶𑍍𑌚 𑌕𑍀𑌟𑌾𑌶𑍍𑌚 𑌮𑌾 𑌭𑍂𑌵𑌨𑍍𑌗𑌹𑌨𑍇 𑌤𑌵 ॥ 1 ॥
𑌮𑌹𑌾𑌦𑍍𑌵𑌿𑌪𑌾𑌶𑍍𑌚 𑌸𑌿𑌂𑌹𑌾𑌶𑍍𑌚 𑌵𑍍𑌯𑌾𑌘𑍍𑌰𑌾 𑌋𑌕𑍍𑌷𑌾𑌶𑍍𑌚 𑌦𑌂𑌷𑍍𑌟𑍍𑌰𑌿𑌣𑌃 ।
𑌮𑌹𑌿𑌷𑌾 𑌶𑍍𑌶𑍃𑌂𑌗𑌿𑌣𑍋 𑌰𑍌𑌦𑍍𑌰𑌾 𑌨 𑌤𑍇 𑌦𑍍𑌰𑍁𑌹𑍍𑌯𑌂𑌤𑍁 𑌪𑍁𑌤𑍍𑌰𑌕 ॥ 1 ॥
𑌨𑍃𑌮𑌾𑌂𑌸𑌭𑍋𑌜𑌨𑌾 𑌰𑍌𑌦𑍍𑌰𑌾 𑌯𑍇 𑌚𑌾𑌨𑍍𑌯𑍇 𑌸𑌤𑍍𑌵𑌜𑌾𑌤𑌯𑌃 ।
𑌮𑌾 𑌚 𑌤𑍍𑌵𑌾𑌂 𑌹𑌿𑌂𑌸𑌿𑌷𑍁𑌃 𑌪𑍁𑌤𑍍𑌰 𑌮𑌯𑌾 𑌸𑌂𑌪𑍂𑌜𑌿𑌤𑌾𑌸𑍍𑌤𑍍𑌵𑌿𑌹 ॥ 20 ॥
𑌆𑌗𑌮𑌾𑌸𑍍𑌤𑍇 𑌶𑌿𑌵𑌾𑌸𑍍𑌸𑌂𑌤𑍁 𑌸𑌿𑌧𑍍𑌯𑌂𑌤𑍁 𑌚 𑌪𑌰𑌾𑌕𑍍𑌰𑌮𑌾𑌃 ।
𑌸𑌰𑍍𑌵𑌸𑌂𑌪𑌤𑍍𑌤𑌯𑍇 𑌰𑌾𑌮 𑌸𑍍𑌵𑌸𑍍𑌤𑌿𑌮𑌾𑌨𑍍𑌗𑌚𑍍𑌛 𑌪𑍁𑌤𑍍𑌰𑌕 ॥ 21 ॥
𑌸𑍍𑌵𑌸𑍍𑌤𑌿 𑌤𑍇 𑌽𑌸𑍍𑌤𑍍𑌵𑌂𑌤𑌰𑌿𑌕𑍍𑌷𑍇𑌭𑍍𑌯𑌃 𑌪𑌾𑌰𑍍𑌥𑌿𑌵𑍇𑌭𑍍𑌯𑌃 𑌪𑍁𑌨𑌃 𑌪𑍁𑌨𑌃 ।
𑌸𑌰𑍍𑌵𑍇𑌭𑍍𑌯𑌶𑍍𑌚𑍈𑌵 𑌦𑍇𑌵𑍇𑌭𑍍𑌯𑍋 𑌯𑍇 𑌚 𑌵𑍈 𑌪𑌰𑌿𑌪𑌂𑌥𑌿𑌨𑌃 ॥ 22 ॥
𑌗𑍁𑌰𑍁𑌸𑍍𑌸𑍋𑌮𑌶𑍍𑌚 𑌸𑍂𑌰𑍍𑌯𑌶𑍍𑌚 𑌧𑌨𑌦𑍋𑌽𑌥 𑌯𑌮𑌸𑍍𑌤𑌥𑌾 ।
𑌪𑌾𑌂𑌤𑍁 𑌤𑍍𑌵𑌾𑌮𑌰𑍍𑌚𑌿𑌤𑌾 𑌰𑌾𑌮 𑌦𑌂𑌡𑌕𑌾𑌰𑌣𑍍𑌯𑌵𑌾𑌸𑌿𑌨𑌮𑍍 ॥ 23 ॥
𑌅𑌗𑍍𑌨𑌿𑌰𑍍𑌵𑌾𑌯𑍁𑌸𑍍𑌤𑌥𑌾 𑌧𑍂𑌮𑍋 𑌮𑌂𑌤𑍍𑌰𑌾𑌶𑍍𑌚𑌰𑍍𑌷𑌿𑌮𑍁𑌖𑌾𑌚𑍍𑌚𑍍𑌯𑍁𑌤𑌾𑌃 ।
𑌉𑌪𑌸𑍍𑌪𑌰𑍍𑌶𑌨𑌕𑌾𑌲𑍇 𑌤𑍁 𑌪𑌾𑌂𑌤𑍁 𑌤𑍍𑌵𑌾𑌂 𑌰𑌘𑍁𑌨𑌂𑌦𑌨 ॥ 24 ॥
𑌸𑌰𑍍𑌵𑌲𑍋𑌕𑌪𑍍𑌰𑌭𑍁𑌰𑍍𑌬𑍍𑌰𑌹𑍍𑌮𑌾 𑌭𑍂𑌤𑌭𑌰𑍍𑌤𑌾 𑌤𑌥𑌰𑍍𑌷𑌯𑌃 ।
𑌯𑍇 𑌚 𑌶𑍇𑌷𑌾𑌸𑍍𑌸𑍁𑌰𑌾𑌸𑍍𑌤𑍇 𑌤𑍍𑌵𑌾𑌂 𑌰𑌕𑍍𑌷𑌂𑌤𑍁 𑌵𑌨𑌵𑌾𑌸𑌿𑌨𑌮𑍍 ॥ 25 ॥
𑌇𑌤𑌿 𑌮𑌾𑌲𑍍𑌯𑍈𑌸𑍍𑌸𑍁𑌰𑌗𑌣𑌾𑌨𑍍𑌗𑌂𑌧𑍈𑌶𑍍𑌚𑌾𑌪𑌿 𑌯𑌶𑌸𑍍𑌵𑌿𑌨𑍀 ।
𑌸𑍍𑌤𑍁𑌤𑌿𑌭𑌿𑌶𑍍𑌚𑌾𑌨𑍁𑌰𑍂𑌪𑌾𑌭𑌿𑌰𑌾𑌨𑌰𑍍𑌚𑌾𑌽𑌯𑌤𑌲𑍋𑌚𑌨𑌾 ॥ 26 ॥
𑌜𑍍𑌵𑌲𑌨𑌂 𑌸𑌮𑍁𑌪𑌾𑌦𑌾𑌯 𑌬𑍍𑌰𑌾𑌹𑍍𑌮𑌣𑍇𑌨 𑌮𑌹𑌾𑌤𑍍𑌮𑌨𑌾 ।
𑌹𑌾𑌵𑌯𑌾𑌮𑌾𑌸 𑌵𑌿𑌧𑌿𑌨𑌾 𑌰𑌾𑌮𑌮𑌂𑌗𑌲𑌕𑌾𑌰𑌣𑌾𑌤𑍍 ॥ 2 ॥
𑌘𑍃𑌤𑌂 𑌶𑍍𑌵𑍇𑌤𑌾𑌨𑌿 𑌮𑌾𑌲𑍍𑌯𑌾𑌨𑌿 𑌸𑌮𑌿𑌧𑌶𑍍𑌶𑍍𑌵𑍇𑌤𑌸𑌰𑍍𑌷𑌪𑌾𑌨𑍍 ।
𑌉𑌪𑌸𑌂𑌪𑌾𑌦𑌯𑌾𑌮𑌾𑌸 𑌕𑍌𑌶𑌲𑍍𑌯𑌾 𑌪𑌰𑌮𑌾𑌂𑌗𑌨𑌾 ॥ 2 ॥
𑌉𑌪𑌾𑌧𑍍𑌯𑌾𑌯 𑌸𑍍𑌸𑌵𑌿𑌧𑌿𑌨𑌾 𑌹𑍁𑌤𑍍𑌵𑌾 𑌶𑌾𑌂𑌤𑌿𑌮𑌨𑌾𑌮𑌯𑌮𑍍 ।
𑌹𑍁𑌤𑌹𑌵𑍍𑌯𑌾𑌵𑌶𑍇𑌷𑍇𑌣 𑌬𑌾𑌹𑍍𑌯𑌂 𑌬𑌲𑌿𑌮𑌕𑌲𑍍𑌪𑌯𑌤𑍍 ॥ 2 ॥
𑌮𑌧𑍁 𑌦𑌧𑍍𑌯𑌕𑍍𑌷𑌤𑌘𑍃𑌤𑍈𑌃 𑌸𑍍𑌵𑌸𑍍𑌤𑌿𑌵𑌾𑌚𑍍𑌯𑌦𑍍𑌵𑌿𑌜𑌾𑌂𑌸𑍍𑌤𑌤𑌃 ।
𑌵𑌾𑌚𑌯𑌾𑌮𑌾𑌸 𑌰𑌾𑌮𑌸𑍍𑌯 𑌵𑌨𑍇𑌸𑍍𑌵𑌸𑍍𑌤𑍍𑌯𑌯𑌨𑌕𑍍𑌰𑌿𑌯𑌾𑌃 ॥ 30 ॥
𑌤𑌤𑌸𑍍𑌤𑌸𑍍𑌮𑍈 𑌦𑍍𑌵𑌿𑌜𑍇𑌂𑌦𑍍𑌰𑌾𑌯 𑌰𑌾𑌮𑌮𑌾𑌤𑌾 𑌯𑌶𑌸𑍍𑌵𑌿𑌨𑍀 ।
𑌦𑌕𑍍𑌷𑌿𑌣𑌾𑌂 𑌪𑍍𑌰𑌦𑌦𑍌 𑌕𑌾𑌮𑍍𑌯𑌾𑌂 𑌰𑌾𑌘𑌵𑌂 𑌚𑍇𑌦𑌮𑌬𑍍𑌰𑌵𑍀𑌤𑍍 ॥ 31 ॥
𑌯𑌨𑍍𑌮𑌂𑌗𑌲𑌂 𑌸𑌹𑌸𑍍𑌰𑌾𑌕𑍍𑌷𑍇 𑌸𑌰𑍍𑌵𑌦𑍇𑌵𑌨𑌮𑌸𑍍𑌕𑍃𑌤𑍇 ।
𑌵𑍃𑌤𑍍𑌰𑌨𑌾𑌶𑍇 𑌸𑌮𑌭𑌵𑌤𑍍𑌤𑌤𑍍𑌤𑍇 𑌭𑌵𑌤𑍁 𑌮𑌂𑌗𑌲𑌮𑍍 ॥ 32 ॥
𑌯𑌨𑍍𑌮𑌂𑌗𑌲𑌂 𑌸𑍁𑌪𑌰𑍍𑌣𑌸𑍍𑌯 𑌵𑌿𑌨𑌤𑌾𑌽𑌕𑌲𑍍𑌪𑌯𑌤𑍍𑌪𑍁𑌰𑌾 ।
𑌅𑌮𑍃𑌤𑌂 𑌪𑍍𑌰𑌾𑌰𑍍𑌥𑌯𑌾𑌨𑌸𑍍𑌯 𑌤𑌤𑍍𑌤𑍇 𑌭𑌵𑌤𑍁 𑌮𑌂𑌗𑌲𑌮𑍍 ॥ 33 ॥
𑌅𑌮𑍃𑌤𑍋𑌤𑍍𑌪𑌾𑌦𑌨𑍇 𑌦𑍈𑌤𑍍𑌯𑌾𑌨𑍍 𑌘𑍍𑌨𑌤𑍋 𑌵𑌜𑍍𑌰𑌧𑌰𑌸𑍍𑌯 𑌯𑌤𑍍 ।
𑌅𑌦𑌿𑌤𑌿𑌰𑍍𑌮𑌂𑌗𑌲𑌂 𑌪𑍍𑌰𑌾𑌦𑌾𑌤𑍍𑌤𑌤𑍍𑌤𑍇 𑌭𑌵𑌤𑍁 𑌮𑌂𑌗𑌲𑌮𑍍 ॥ 34 ॥
𑌤𑍍𑌰𑍀𑌨𑍍𑌵𑌿𑌕𑍍𑌰𑌮𑌾𑌨𑍍𑌪𑍍𑌰𑌕𑍍𑌰𑌮𑌤𑍋 𑌵𑌿𑌷𑍍𑌣𑍋𑌰𑌮𑌿𑌤𑌤𑍇𑌜𑌸𑌃 ।
𑌯𑌦𑌾𑌸𑍀𑌨𑍍𑌮𑌂𑌗𑌲𑌂 𑌰𑌾𑌮 𑌤𑌤𑍍𑌤𑍇 𑌭𑌵𑌤𑍁 𑌮𑌂𑌗𑌲𑌮𑍍 ॥ 35 ॥
𑌋𑌤𑌵𑌸𑍍𑌸𑌾𑌗𑌰𑌾 𑌦𑍍𑌵𑍀𑌪𑌾 𑌵𑍇𑌦𑌾 𑌲𑍋𑌕𑌾 𑌦𑌿𑌶𑌶𑍍𑌚 𑌤𑍇 ।
𑌮𑌂𑌗𑌲𑌾𑌨𑌿 𑌮𑌹𑌾𑌬𑌾𑌹𑍋 𑌦𑌿𑌶𑌂𑌤𑍁 𑌶𑍁𑌭𑌮𑌂𑌗𑌲𑌾𑌃 ॥ 36 ॥
𑌇𑌤𑌿 𑌪𑍁𑌤𑍍𑌰𑌸𑍍𑌯 𑌶𑍇𑌷𑌾𑌂𑌶𑍍𑌚 𑌕𑍃𑌤𑍍𑌵𑌾 𑌶𑌿𑌰𑌸𑌿 𑌭𑌾𑌮𑌿𑌨𑍀 ।
𑌗𑌂𑌧𑍈𑌶𑍍𑌚𑌾𑌪𑌿 𑌸𑌮𑌾𑌲𑌭𑍍𑌯 𑌰𑌾𑌮𑌮𑌾𑌯𑌤𑌲𑍋𑌚𑌨𑌾 ॥ 3 ॥
𑌓𑌷𑌧𑍀𑌂 𑌚𑌾𑌪𑌿 𑌸𑌿𑌦𑍍𑌧𑌾𑌰𑍍𑌥𑌾𑌂 𑌵𑌿𑌶𑌲𑍍𑌯𑌕𑌰𑌣𑍀𑌂 𑌶𑍁𑌭𑌾𑌮𑍍 ।
𑌚𑌕𑌾𑌰 𑌰𑌕𑍍𑌷𑌾𑌂 𑌕𑍌𑌶𑌲𑍍𑌯𑌾 𑌮𑌂𑌤𑍍𑌰𑍈𑌰𑌭𑌿𑌜𑌜𑌾𑌪 𑌚 ॥ 3 ॥
𑌉𑌵𑌾𑌚𑌾𑌤𑌿𑌪𑍍𑌰𑌹𑍃𑌷𑍍𑌟𑍇𑌵 𑌸𑌾 𑌦𑍁𑌃𑌖𑌵𑌶𑌵𑌰𑍍𑌤𑌿𑌨𑍀 ।
𑌵𑌾𑌂𑌗𑍍𑌮𑌾𑌤𑍍𑌰𑍇𑌣 𑌨 𑌭𑌾𑌵𑍇𑌨 𑌵𑌾𑌚𑌾𑌽𑌸𑌂𑌸𑌜𑍍𑌜𑌮𑌾𑌨𑌯𑌾 ॥ 3 ॥
𑌆𑌨𑌮𑍍𑌯 𑌮𑍂𑌰𑍍𑌧𑍍𑌨𑌿 𑌚𑌾𑌘𑍍𑌰𑌾𑌯 𑌪𑌰𑌿𑌷𑍍𑌵𑌜𑍍𑌯 𑌯𑌶𑌸𑍍𑌵𑌿𑌨𑍀 ।
𑌅𑌵𑌦𑌤𑍍𑌪𑍁𑌤𑍍𑌰 𑌸𑌿𑌦𑍍𑌧𑌾𑌰𑍍𑌥𑍋 𑌗𑌚𑍍𑌛 𑌰𑌾𑌮 𑌯𑌥𑌾𑌸𑍁𑌖𑌮𑍍 ॥ 40 ॥
𑌅𑌰𑍋𑌗𑌂 𑌸𑌰𑍍𑌵𑌸𑌿𑌦𑍍𑌧𑌾𑌰𑍍𑌥𑌮𑌯𑍋𑌧𑍍𑌯𑌾𑌂 𑌪𑍁𑌨𑌰𑌾𑌗𑌤𑌮𑍍 ।
𑌪𑌶𑍍𑌯𑌾𑌮𑌿 𑌤𑍍𑌵𑌾𑌂 𑌸𑍁𑌖𑌂 𑌵𑌤𑍍𑌸 𑌸𑍁𑌸𑍍𑌥𑌿𑌤𑌂 𑌰𑌾𑌜𑌵𑌰𑍍𑌤𑍍𑌮𑌨𑌿 ॥ 41 ॥
𑌪𑍍𑌰𑌣𑌷𑍍𑌟𑌦𑍁𑌃𑌖𑌸𑌂𑌕𑌲𑍍𑌪𑌾 𑌹𑌰𑍍𑌷𑌵𑌿𑌦𑍍𑌯𑍋𑌤𑌿𑌤𑌾𑌨𑌨𑌾 ।
𑌦𑍍𑌰𑌕𑍍𑌷𑍍𑌯𑌾𑌮𑌿 𑌤𑍍𑌵𑌾𑌂 𑌵𑌨𑌾𑌤𑍍𑌪𑍍𑌰𑌾𑌪𑍍𑌤𑌂 𑌪𑍂𑌰𑍍𑌣𑌚𑌂𑌦𑍍𑌰𑌮𑌿𑌵𑍋𑌦𑌿𑌤𑌮𑍍 ॥ 42 ॥
𑌭𑌦𑍍𑌰𑌾𑌸𑌨𑌗𑌤𑌂 𑌰𑌾𑌮 𑌵𑌨𑌵𑌾𑌸𑌾𑌦𑌿𑌹𑌾𑌗𑌤𑌮𑍍 ।
𑌦𑍍𑌰𑌕𑍍𑌷𑍍𑌯𑌾𑌮𑌿 𑌚 𑌪𑍁𑌨𑌸𑍍𑌤𑍍𑌵𑌾𑌂 𑌤𑍁 𑌤𑍀𑌰𑍍𑌣𑌵𑌂𑌤𑌂 𑌪𑌿𑌤𑍁𑌰𑍍𑌵𑌚𑌃 ॥ 43 ॥
𑌮𑌂𑌗𑌲𑍈𑌰𑍁𑌪𑌸𑌪𑌨𑍍𑌨𑍋 𑌵𑌨𑌵𑌾𑌸𑌾𑌦𑌿𑌹𑌾𑌗𑌤𑌃 ।
𑌵𑌧𑍍𑌵𑌾 𑌮𑌮 𑌚 𑌨𑌿𑌤𑍍𑌯𑌂 𑌤𑍍𑌵𑌂 𑌕𑌾𑌮𑌾𑌨𑍍𑌸𑌂𑌵𑌰𑍍𑌧 𑌯𑌾𑌹𑌿 𑌭𑍋𑌃 ॥ 44 ॥
𑌮𑌯𑌾𑌽𑌰𑍍𑌚𑌿𑌤𑌾 𑌦𑍇𑌵𑌗𑌣𑌾𑌶𑍍𑌶𑌿𑌵𑌾𑌦𑌯𑍋 𑌮𑌹𑌰𑍍𑌷𑌯𑍋 𑌭𑍂𑌤𑌮𑌹𑌾𑌸𑍁𑌰𑍋𑌰𑌗𑌾𑌃 ।
𑌅𑌭𑌿𑌪𑍍𑌰𑌯𑌾𑌤𑌸𑍍𑌯 𑌵𑌨𑌂 𑌚𑌿𑌰𑌾𑌯 𑌤𑍇 𑌹𑌿𑌤𑌾𑌨𑌿 𑌕𑌾𑌂𑌕𑍍𑌷𑌂𑌤𑍁 𑌦𑌿𑌶𑌶𑍍𑌚 𑌰𑌾𑌘𑌵 ॥ 45 ॥
𑌇𑌤𑍀𑌵 𑌸𑌾𑌽𑌶𑍍𑌰𑍁𑌪𑍍𑌰𑌤𑌿𑌪𑍂𑌰𑍍𑌣𑌲𑍋𑌚𑌨𑌾 𑌸𑌮𑌾𑌪𑍍𑌯 𑌚 𑌸𑍍𑌵𑌸𑍍𑌤𑍍𑌯𑌯𑌨𑌂 𑌯𑌥𑌾𑌵𑌿𑌧𑌿 ।
𑌪𑍍𑌰𑌦𑌕𑍍𑌷𑌿𑌣𑌂 𑌚𑍈𑌵 𑌚𑌕𑌾𑌰 𑌰𑌾𑌘𑌵𑌂 𑌪𑍁𑌨𑌃 𑌪𑍁𑌨𑌶𑍍𑌚𑌾𑌪𑌿 𑌨𑌿𑌪𑍀𑌡𑍍𑌯 𑌸𑌸𑍍𑌵𑌜𑍇 ॥ 46 ॥
𑌤𑌥𑌾 𑌤𑍁 𑌦𑍇𑌵𑍍𑌯𑌾 𑌸 𑌕𑍃𑌤𑌪𑍍𑌰𑌦𑌕𑍍𑌷𑌿𑌣𑍋 𑌨𑌿𑌪𑍀𑌡𑍍𑌯 𑌮𑌾𑌤𑍁𑌶𑍍𑌚𑌰𑌣𑍌 𑌪𑍁𑌨𑌃 𑌪𑍁𑌨𑌃 ।
𑌜𑌗𑌾𑌮 𑌸𑍀𑌤𑌾𑌨𑌿𑌲𑌯𑌂 𑌮𑌹𑌾𑌯𑌶𑌾 𑌸𑍍𑌸 𑌰𑌾𑌘𑌵𑌃 𑌪𑍍𑌰𑌜𑍍𑌵𑌲𑌿𑌤 𑌸𑍍𑌸𑍍𑌵𑌯𑌾 𑌶𑍍𑌰𑌿𑌯𑌾 ॥ 4 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌪𑌂𑌚𑌵𑌿𑌂𑌶𑌸𑍍𑌸𑌰𑍍𑌗𑌃 ॥
