𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌜𑌨𑌕𑍇𑌨 𑌸𑌮𑌾𑌦𑌿𑌷𑍍𑌟𑌾 𑌦𑍂𑌤𑌾𑌸𑍍𑌤𑍇 𑌕𑍍𑌲𑌾𑌂𑌤𑌵𑌾𑌹𑌨𑌾𑌃 ।
𑌤𑍍𑌰𑌿𑌰𑌾𑌤𑍍𑌰𑌮𑍁𑌷𑌿𑌤𑌾 𑌮𑌾𑌰𑍍𑌗𑍇 𑌤𑍇𑌽𑌯𑍋𑌧𑍍𑌯𑌾𑌂 𑌪𑍍𑌰𑌾𑌵𑌿𑌶𑌨𑍍 𑌪𑍁𑌰𑍀𑌮𑍍 ॥ 1 ॥
𑌰𑌾𑌜𑍍𑌞𑍋 𑌭𑌵𑌨𑌮𑌾𑌸𑌾𑌦𑍍𑌯 𑌦𑍍𑌵𑌾𑌰𑌸𑍍𑌥𑌾𑌨𑌿𑌦𑌮𑌬𑍍𑌰𑍁𑌵𑌨𑍍 ।
𑌶𑍀𑌘𑍍𑌰𑌂 𑌨𑌿𑌵𑍇𑌦𑍍𑌯𑌤𑌾𑌂 𑌰𑌾𑌜𑍍𑌞𑍇 𑌦𑍂𑌤𑌾𑌨𑍍𑌨𑍋 𑌜𑌨𑌕𑌸𑍍𑌯 𑌚 ॥ 2 ॥
𑌇𑌤𑍍𑌯𑍁𑌕𑍍𑌤𑌾 𑌦𑍍𑌵𑌾𑌰𑌪𑌾𑌲𑌾𑌸𑍍𑌤𑍇 𑌰𑌾𑌘𑌵𑌾𑌯 𑌨𑍍𑌯𑌵𑍇𑌦𑌯𑌨𑍍 ।
𑌤𑍇 𑌰𑌾𑌜𑌵𑌚𑌨𑌾𑌦𑍍𑌦𑍂𑌤𑌾 𑌰𑌾𑌜𑌵𑍇𑌶𑍍𑌮𑌪𑍍𑌰𑌵𑍇𑌶𑌿𑌤𑌾𑌃 ।
𑌦𑌦𑍃𑌶𑍁𑌰𑍍𑌦𑍇𑌵𑌸𑌂𑌕𑌾𑌶𑌂 𑌵𑍃𑌦𑍍𑌧𑌂 𑌦𑌶𑌰𑌥𑌂 𑌨𑍃𑌪𑌮𑍍 ॥ 3 ॥
𑌬𑌦𑍍𑌧𑌾𑌂𑌜𑌲𑌿𑌪𑍁𑌟𑌾 𑌸𑍍𑌸𑌰𑍍𑌵𑍇 𑌦𑍂𑌤𑌾 𑌵𑌿𑌗𑌤𑌸𑌾𑌧𑍍𑌵𑌸𑌾𑌃 ।
𑌰𑌾𑌜𑌾𑌨𑌂 𑌪𑍍𑌰𑌯𑌤𑌾 𑌵𑌾𑌕𑍍𑌯𑌮𑌬𑍍𑌰𑍁𑌵𑌨𑍍𑌮𑌧𑍁𑌰𑌾𑌕𑍍𑌷𑌰𑌮𑍍 ॥ 4 ॥
𑌮𑍈𑌥𑌿𑌲𑍋 𑌜𑌨𑌕𑍋 𑌰𑌾𑌜𑌾 𑌸𑌾𑌗𑍍𑌨𑌿𑌹𑍋𑌤𑍍𑌰𑌪𑍁𑌰𑌸𑍍𑌕𑍃𑌤𑌮𑍍 ।
𑌕𑍁𑌶𑌲𑌂 𑌚𑌾𑌵𑍍𑌯𑌯𑌂 𑌚𑍈𑌵 𑌸𑍋𑌪𑌾𑌧𑍍𑌯𑌾𑌯𑌪𑍁𑌰𑍋𑌹𑌿𑌤𑌮𑍍 ॥ 5 ॥
𑌮𑍁𑌹𑍁𑌰𑍍𑌮𑍁𑌹𑍁𑌰𑍍𑌮𑌧𑍁𑌰𑌯𑌾 𑌸𑍍𑌨𑍇𑌹𑌸𑌂𑌯𑍁𑌕𑍍𑌤𑌯𑌾 𑌗𑌿𑌰𑌾 ।
𑌜𑌨𑌕𑌸𑍍𑌤𑍍𑌵𑌾𑌂 𑌮𑌹𑌾𑌰𑌾𑌜 𑌪𑍃𑌚𑍍𑌛𑌤𑍇 𑌸𑌪𑍁𑌰𑌸𑍍𑌸𑌰𑌮𑍍 ॥ 6 ॥
𑌪𑍃𑌷𑍍𑌟𑍍𑌵𑌾 𑌕𑍁𑌶𑌲𑌮𑌵𑍍𑌯𑌗𑍍𑌰𑌂 𑌵𑍈𑌦𑍇𑌹𑍋 𑌮𑌿𑌥𑌿𑌲𑌾𑌧𑌿𑌪𑌃 ।
𑌕𑍌𑌶𑌿𑌕𑌾𑌨𑍁𑌮𑌤𑍇 𑌵𑌾𑌕𑍍𑌯𑌂 𑌭𑌵𑌂𑌤𑌮𑌿𑌦𑌮𑌬𑍍𑌰𑌵𑍀𑌤𑍍 ॥ ॥
𑌪𑍂𑌰𑍍𑌵𑌂 𑌪𑍍𑌰𑌤𑌿𑌜𑍍𑌞𑌾 𑌵𑌿𑌦𑌿𑌤𑌾 𑌵𑍀𑌰𑍍𑌯𑌶𑍁𑌲𑍍𑌕𑌾 𑌮𑌮𑌾𑌤𑍍𑌮𑌜𑌾 ।
𑌰𑌾𑌜𑌾𑌨𑌶𑍍𑌚 𑌕𑍃𑌤𑌾𑌮𑌰𑍍𑌷𑌾𑌨𑌿𑌰𑍍𑌵𑍀𑌰𑍍𑌯𑌾 𑌵𑌿𑌮𑍁𑌖𑍀𑌕𑍃𑌤𑌾𑌃 ॥ ॥
𑌸𑍇𑌯𑌂 𑌮𑌮 𑌸𑍁𑌤𑌾 𑌰𑌾𑌜𑌨𑍍 𑌵𑌿𑌶𑍍𑌵𑌾𑌮𑌿𑌤𑍍𑌰𑌪𑍁𑌰𑌸𑍍𑌸𑌰𑍈𑌃 ।
𑌯𑌦𑍃𑌚𑍍𑌛𑌯𑌾𑌗𑌤𑍈𑌰𑍍𑌵𑍀𑌰𑍈𑌰𑍍𑌨𑌿𑌰𑍍𑌜𑌿𑌤𑌾 𑌤𑌵 𑌪𑍁𑌤𑍍𑌰𑌕𑍈𑌃 ॥ ॥
𑌤𑌚𑍍𑌚 𑌰𑌾𑌜𑌨𑍍 𑌧𑌨𑍁𑌰𑍍𑌦𑌿𑌵𑍍𑌯𑌂 𑌮𑌧𑍍𑌯𑍇 𑌭𑌗𑍍𑌨𑌂 𑌮𑌹𑌾𑌤𑍍𑌮𑌨𑌾 ।
𑌰𑌾𑌮𑍇𑌣 𑌹𑌿 𑌮𑌹𑌾𑌰𑌾𑌜 𑌮𑌹𑌤𑍍𑌯𑌾𑌂 𑌜𑌨𑌸𑌂𑌸𑌦𑌿 ॥ 10 ॥
𑌅𑌸𑍍𑌮𑍈 𑌦𑍇𑌯𑌾 𑌮𑌯𑌾 𑌸𑍀𑌤𑌾 𑌵𑍀𑌰𑍍𑌯𑌶𑍁𑌲𑍍𑌕𑌾 𑌮𑌹𑌾𑌤𑍍𑌮𑌨𑍇 ।
𑌪𑍍𑌰𑌤𑌿𑌜𑍍𑌞𑌾𑌂 𑌕𑌰𑍍𑌤𑍁𑌮𑌿𑌚𑍍𑌛𑌾𑌮𑌿 𑌤𑌦𑌨𑍁𑌜𑍍𑌞𑌾𑌤𑍁𑌮𑌰𑍍𑌹𑌸𑌿 ॥ 11 ॥
𑌸𑍋𑌪𑌾𑌧𑍍𑌯𑌾𑌯𑍋 𑌮𑌹𑌾𑌰𑌾𑌜 𑌪𑍁𑌰𑍋𑌹𑌿𑌤𑌪𑍁𑌰𑌸𑍍𑌸𑌰𑌃 ।
𑌶𑍀𑌘𑍍𑌰𑌮𑌾𑌗𑌚𑍍𑌛 𑌭𑌦𑍍𑌰𑌂 𑌤𑍇 𑌦𑍍𑌰𑌷𑍍𑌟𑍁𑌮𑌰𑍍𑌹𑌸𑌿 𑌰𑌾𑌘𑌵𑍌 ॥ 12 ॥
𑌪𑍍𑌰𑍀𑌤𑌿𑌂 𑌚 𑌮𑌮 𑌰𑌾𑌜𑍇𑌂𑌦𑍍𑌰 𑌨𑌿𑌰𑍍𑌵𑌰𑍍𑌤𑌯𑌿𑌤𑍁𑌮𑌰𑍍𑌹𑌸𑌿 ।
𑌪𑍁𑌤𑍍𑌰𑌯𑍋𑌰𑍁𑌭𑌯𑍋𑌰𑍇𑌵 𑌪𑍍𑌰𑍀𑌤𑌿𑌂 𑌤𑍍𑌵𑌮𑌪𑌿 𑌲𑌪𑍍𑌸𑍍𑌯𑌸𑍇 ॥ 13 ॥
𑌏𑌵𑌂 𑌵𑌿𑌦𑍇𑌹𑌾𑌧𑌿𑌪𑌤𑌿𑌰𑍍𑌮𑌧𑍁𑌰𑌂 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 14 ॥
𑌵𑌿𑌶𑍍𑌵𑌾𑌮𑌿𑌤𑍍𑌰𑌾𑌭𑍍𑌯𑌨𑍁𑌜𑍍𑌞𑌾𑌤 𑌶𑍍𑌶𑌤𑌾𑌨𑌂𑌦𑌮𑌤𑍇 𑌸𑍍𑌥𑌿𑌤𑌃 ।
𑌇𑌤𑍍𑌯𑍁𑌕𑍍𑌤𑍍𑌵𑌾 𑌵𑌿𑌰𑌤𑌾 𑌦𑍂𑌤𑌾 𑌰𑌾𑌜𑌗𑍌𑌰𑌵𑌶𑌂𑌕𑌿𑌤𑌾𑌃 ॥ 15 ॥
𑌦𑍂𑌤𑌵𑌾𑌕𑍍𑌯𑌂 𑌚 𑌤𑌚𑍍𑌛𑍍𑌰𑍁𑌤𑍍𑌵𑌾 𑌰𑌾𑌜𑌾 𑌪𑌰𑌮𑌹𑌰𑍍𑌷𑌿𑌤𑌃 ।
𑌵𑌸𑌿𑌷𑍍𑌠𑌂 𑌵𑌾𑌮𑌦𑍇𑌵𑌂 𑌚 𑌮𑌂𑌤𑍍𑌰𑌿𑌣𑍋𑌽𑌨𑍍𑌯𑌾𑌂𑌶𑍍𑌚 𑌸𑍋𑌽𑌬𑍍𑌰𑌵𑍀𑌤𑍍 ॥ 16 ॥
𑌗𑍁𑌪𑍍𑌤𑌃 𑌕𑍁𑌶𑌿𑌕𑌪𑍁𑌤𑍍𑌰𑍇𑌣 𑌕𑍌𑌸𑌲𑍍𑌯𑌾𑌨𑌂𑌦𑌵𑌰𑍍𑌧𑌨𑌃 ।
𑌲𑌕𑍍𑌷𑍍𑌮𑌣𑍇𑌨 𑌸𑌹 𑌭𑍍𑌰𑌾𑌤𑍍𑌰𑌾 𑌵𑌿𑌦𑍇𑌹𑍇𑌷𑍁 𑌵𑌸𑌤𑍍𑌯𑌸𑍌 ॥ 1 ॥
𑌦𑍃𑌷𑍍𑌟𑌵𑍀𑌰𑍍𑌯𑌸𑍍𑌤𑍁 𑌕𑌾𑌕𑍁𑌤𑍍𑌸𑍍𑌥𑍋 𑌜𑌨𑌕𑍇𑌨 𑌮𑌹𑌾𑌤𑍍𑌮𑌨𑌾 ।
𑌸𑌂𑌪𑍍𑌰𑌦𑌾𑌨𑌂 𑌸𑍁𑌤𑌾𑌯𑌾𑌸𑍍𑌤𑍁 𑌰𑌾𑌘𑌵𑍇 𑌕𑌰𑍍𑌤𑍁𑌮𑌿𑌚𑍍𑌛𑌤𑌿 ॥ 1 ॥
𑌯𑌦𑌿 𑌵𑍋 𑌰𑍋𑌚𑌤𑍇 𑌵𑍃𑌤𑍍𑌤𑌂 𑌜𑌨𑌕𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌪𑍁𑌰𑍀𑌂 𑌗𑌚𑍍𑌛𑌾𑌮𑌹𑍇 𑌶𑍀𑌘𑍍𑌰𑌂 𑌮𑌾 𑌭𑍂𑌤𑍍𑌕𑌾𑌲𑌸𑍍𑌯 𑌪𑌰𑍍𑌯𑌯𑌃 ॥ 1 ॥
𑌮𑌂𑌤𑍍𑌰𑌿𑌣𑍋 𑌬𑌾𑌢𑌮𑌿𑌤𑍍𑌯𑌾𑌹𑍁𑌃 𑌸𑌹 𑌸𑌰𑍍𑌵𑍈𑌰𑍍𑌮𑌹𑌰𑍍𑌷𑌿𑌭𑌿𑌃 ।
𑌸𑍁𑌪𑍍𑌰𑍀𑌤𑌶𑍍𑌚𑌾𑌬𑍍𑌰𑌵𑍀𑌦𑍍𑌰𑌾𑌜𑌾 𑌶𑍍𑌵𑍋 𑌯𑌾𑌤𑍍𑌰𑍇𑌤𑌿 𑌸 𑌮𑌂𑌤𑍍𑌰𑌿𑌣𑌃 ॥ 20 ॥
𑌮𑌂𑌤𑍍𑌰𑌿𑌣𑌸𑍍𑌤𑍁 𑌨𑌰𑍇𑌂𑌦𑍍𑌰𑌸𑍍𑌯 𑌰𑌾𑌤𑍍𑌰𑌿𑌂 𑌪𑌰𑌮𑌸𑌤𑍍𑌕𑍃𑌤𑌾𑌃 ।
𑌊𑌷𑍁 𑌸𑍍𑌤𑍇𑌮𑍁𑌦𑌿𑌤𑌾 𑌸𑍍𑌸𑌰𑍍𑌵𑍇 𑌗𑍁𑌣𑍈 𑌸𑍍𑌸𑌰𑍍𑌵𑍈𑌸𑍍𑌸𑌮𑌨𑍍𑌵𑌿𑌤𑌾𑌃 ॥ 21 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌅𑌷𑍍𑌟𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
