𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌸𑍇𑌨𑌾𑌪𑌤𑍀𑌨𑍍𑌪𑌂𑌚 𑌸 𑌤𑍁 𑌪𑍍𑌰𑌮𑌾𑌪𑌿𑌤𑌾𑌨𑍍 𑌹𑌨𑍂𑌮𑌤𑌾 𑌸𑌾𑌨𑍁𑌚𑌰𑌾𑌨𑍍𑌸𑌵𑌾𑌹𑌨𑌾𑌨𑍍 ।
𑌸𑌮𑍀𑌕𑍍𑌷𑍍𑌯 𑌰𑌾𑌜𑌾 𑌸𑌮𑌰𑍋𑌦𑍍𑌧𑌤𑍋𑌨𑍍𑌮𑍁𑌖𑌂 𑌕𑍁𑌮𑌾𑌰𑌮𑌕𑍍𑌷𑌂 𑌪𑍍𑌰𑌸𑌮𑍈𑌕𑍍𑌷𑌤𑌾𑌗𑍍𑌰𑌤𑌃 ॥ 1 ॥
𑌸 𑌤𑌸𑍍𑌯 𑌦𑍃𑌷𑍍𑌟𑍍𑌯𑌰𑍍𑌪𑌣𑌸𑌂𑌪𑍍𑌰𑌚𑍋𑌦𑌿𑌤𑌃 𑌪𑍍𑌰𑌤𑌾𑌪𑌵𑌾𑌨𑍍𑌕𑌾𑌂𑌚𑌨𑌚𑌿𑌤𑍍𑌰𑌕𑌾𑌰𑍍𑌮𑍁𑌕𑌃 ।
𑌸𑌮𑍁𑌤𑍍𑌪𑌪𑌾𑌤𑌾𑌥 𑌸𑌦𑌸𑍍𑌯𑍁𑌦𑍀𑌰𑌿𑌤𑍋 𑌦𑍍𑌵𑌿𑌜𑌾𑌤𑌿𑌮𑍁𑌖𑍍𑌯𑍈𑌰𑍍𑌹𑌵𑌿𑌷𑍇𑌵 𑌪𑌾𑌵𑌕𑌃 ॥ 2 ॥
𑌤𑌤𑍋 𑌮𑌹𑌦𑍍𑌬𑌾𑌲𑌦𑌿𑌵𑌾𑌕𑌰𑌪𑍍𑌰𑌭𑌂 𑌪𑍍𑌰𑌤𑌪𑍍𑌤𑌜𑌾𑌂𑌬𑍂𑌨𑌦𑌜𑌾𑌲𑌸𑌂𑌤𑌤𑌮𑍍 ।
𑌰𑌥𑌂 𑌸𑌮𑌾𑌸𑍍𑌥𑌾𑌯 𑌯𑌯𑍌 𑌸 𑌵𑍀𑌰𑍍𑌯𑌵𑌾𑌨𑍍𑌮𑌹𑌾𑌹𑌰𑌿𑌂 𑌤𑌂 𑌪𑍍𑌰𑌤𑌿 𑌨𑍈𑌰𑍃𑌤𑌰𑍍𑌷𑌭𑌃 ॥ 3 ॥
𑌤𑌤𑌸𑍍𑌤𑌪𑌸𑍍𑌸𑌂𑌗𑍍𑌰𑌹𑌸𑌂𑌚𑌯𑌾𑌰𑍍𑌜𑌿𑌤𑌂 𑌪𑍍𑌰𑌤𑌪𑍍𑌤𑌜𑌾𑌂𑌬𑍂𑌨𑌦𑌜𑌾𑌲𑌶𑍋𑌭𑌿𑌤𑌮𑍍 ।
𑌪𑌤𑌾𑌕𑌿𑌨𑌂 𑌰𑌤𑍍𑌨𑌵𑌿𑌭𑍂𑌷𑌿𑌤𑌧𑍍𑌵𑌜𑌂 𑌮𑌨𑍋𑌜𑌵𑌾𑌷𑍍𑌟𑌾𑌶𑍍𑌵𑌵𑌰𑍈𑌃 𑌸𑍁𑌯𑍋𑌜𑌿𑌤𑌮𑍍 ॥ 4 ॥
𑌸𑍁𑌰𑌾𑌸𑍁𑌰𑌾𑌧𑍃𑌷𑍍𑌯𑌮𑌸𑌂𑌗𑌚𑌾𑌰𑌿𑌣𑌂 𑌰𑌵𑌿𑌪𑍍𑌰𑌭𑌂 𑌵𑍍𑌯𑍋𑌮𑌚𑌰𑌂 𑌸𑌮𑌾𑌹𑌿𑌤𑌮𑍍 ।
𑌸𑌤𑍂𑌣𑌮𑌷𑍍𑌟𑌾𑌸𑌿𑌨𑌿𑌬𑌦𑍍𑌧𑌬𑌂𑌧𑍁𑌰𑌂 𑌯𑌥𑌾𑌕𑍍𑌰𑌮𑌾𑌵𑍇𑌶𑌿𑌤𑌶𑌕𑍍𑌤𑌿𑌤𑍋𑌮𑌰𑌮𑍍 ॥ 5 ॥
𑌵𑌿𑌰𑌾𑌜𑌮𑌾𑌨𑌂 𑌪𑍍𑌰𑌤𑌿𑌪𑍂𑌰𑍍𑌣𑌵𑌸𑍍𑌤𑍁𑌨𑌾 𑌸𑌹𑍇𑌮𑌦𑌾𑌮𑍍𑌨𑌾 𑌶𑌶𑌿𑌸𑍂𑌰𑍍𑌯𑌵𑌰𑍍𑌚𑌸𑌾 ।
𑌦𑌿𑌵𑌾𑌕𑌰𑌾𑌭𑌂 𑌰𑌥𑌮𑌾𑌸𑍍𑌥𑌿𑌤𑌸𑍍𑌤𑌤𑌸𑍍𑌸 𑌨𑌿𑌰𑍍𑌜𑌗𑌾𑌮𑌾𑌮𑌰𑌤𑍁𑌲𑍍𑌯𑌵𑌿𑌕𑍍𑌰𑌮𑌃 ॥ 6 ॥
𑌸 𑌪𑍂𑌰𑌯𑌨𑍍𑌖𑌂 𑌚 𑌮𑌹𑍀𑌂 𑌚 𑌸𑌾𑌚𑌲𑌾𑌂 𑌤𑍁𑌰𑌂𑌗𑌮𑌾𑌤𑌂𑌗𑌮𑌹𑌾𑌰𑌥𑌸𑍍𑌵𑌨𑍈𑌃 ।
𑌬𑌲𑍈𑌸𑍍𑌸𑌮𑍇𑌤𑍈𑌸𑍍𑌸𑌹𑌿 𑌤𑍋𑌰𑌣𑌸𑍍𑌥𑌿𑌤𑌂 𑌸𑌮𑌰𑍍𑌥𑌮𑌾𑌸𑍀𑌨𑌮𑍁𑌪𑌾𑌗𑌮𑌤𑍍𑌕𑌪𑌿𑌮𑍍 ॥ ॥
𑌸 𑌤𑌂 𑌸𑌮𑌾𑌸𑌾𑌦𑍍𑌯 𑌹𑌰𑌿𑌂 𑌹𑌰𑍀𑌕𑍍𑌷𑌣𑍋 𑌯𑍁𑌗𑌾𑌂𑌤𑌕𑌾𑌲𑌾𑌗𑍍𑌨𑌿𑌮𑌿𑌵 𑌪𑍍𑌰𑌜𑌾𑌕𑍍𑌷𑌯𑍇 ।
𑌅𑌵𑌸𑍍𑌥𑌿𑌤𑌂 𑌵𑌿𑌸𑍍𑌮𑌿𑌤𑌜𑌾𑌤𑌸𑌂𑌭𑍍𑌰𑌮 𑌸𑍍𑌸𑌮𑍈𑌕𑍍𑌷𑌤𑌾𑌕𑍍𑌷𑍋 𑌬𑌹𑍁𑌮𑌾𑌨𑌚𑌕𑍍𑌷𑍁𑌷𑌾 ॥ ॥
𑌸 𑌤𑌸𑍍𑌯 𑌵𑍇𑌗𑌂 𑌚 𑌕𑌪𑍇𑌰𑍍𑌮𑌹𑌾𑌤𑍍𑌮𑌨𑌃 𑌪𑌰𑌾𑌕𑍍𑌰𑌮𑌂 𑌚𑌾𑌰𑌿𑌷𑍁 𑌪𑌾𑌰𑍍𑌥𑌿𑌵𑌾𑌤𑍍𑌮𑌜𑌃 ।
𑌵𑌿𑌚𑌾𑌰𑌯𑌨𑍍𑌸𑍍𑌵𑌂 𑌚 𑌬𑌲𑌂 𑌮𑌹𑌾𑌬𑌲𑍋 𑌹𑌿𑌮𑌕𑍍𑌷𑌯𑍇 𑌸𑍂𑌰𑍍𑌯 𑌇𑌵𑌾𑌭𑌿𑌵𑌰𑍍𑌧𑌤𑍇 ॥ ॥
𑌸 𑌜𑌾𑌤𑌮𑌨𑍍𑌯𑍁𑌃 𑌪𑍍𑌰𑌸𑌮𑍀𑌕𑍍𑌷𑍍𑌯 𑌵𑌿𑌕𑍍𑌰𑌮𑌂 𑌸𑍍𑌥𑌿𑌰𑌂 𑌸𑍍𑌥𑌿𑌰𑌸𑍍𑌸𑌮𑍍𑌯𑌤𑌿 𑌦𑍁𑌰𑍍𑌨𑌿𑌵𑌾𑌰𑌣𑌮𑍍 ।
𑌸𑌮𑌾𑌹𑌿𑌤𑌾𑌤𑍍𑌮𑌾 𑌹𑌨𑍁𑌮𑌂𑌤𑌮𑌾𑌹𑌵𑍇 𑌪𑍍𑌰𑌚𑍋𑌦𑌯𑌾𑌮𑌾𑌸 𑌶𑌰𑍈𑌸𑍍𑌤𑍍𑌰𑌿𑌭𑌿 𑌶𑍍𑌶𑌿𑌤𑍈𑌃 ॥ 10 ॥
𑌤𑌤𑌃 𑌕𑌪𑌿𑌂 𑌤𑌂 𑌪𑍍𑌰𑌸𑌮𑍀𑌕𑍍𑌷𑍍𑌯 𑌗𑌰𑍍𑌵𑌿𑌤𑌂 𑌜𑌿𑌤𑌶𑍍𑌰𑌮𑌂 𑌶𑌤𑍍𑌰𑍁𑌪𑌰𑌾𑌜𑌯𑍋𑌰𑍍𑌜𑌿𑌤𑌮𑍍 ।
𑌅𑌵𑍈𑌕𑍍𑌷𑌤𑌾𑌕𑍍𑌷𑌸𑍍𑌸𑌮𑍁𑌦𑍀𑌰𑍍𑌣𑌮𑌾𑌨𑌸𑌸𑍍𑌸𑌬𑌾𑌣𑌪𑌾𑌣𑌿𑌃 𑌪𑍍𑌰𑌗𑍃𑌹𑍀𑌤𑌕𑌾𑌰𑍍𑌮𑍁𑌕𑌃 ॥ 11 ॥
𑌸 𑌹𑍇𑌮𑌨𑌿𑌷𑍍𑌕𑌾𑌂𑌗𑌦𑌚𑌾𑌰𑍁𑌕𑍁𑌂𑌡𑌲 𑌸𑍍𑌸𑌮𑌾𑌸𑌸𑌾𑌦𑌾𑌽𑌶𑍁𑌪𑌰𑌾𑌕𑍍𑌰𑌮𑌃 𑌕𑌪𑌿𑌮𑍍 ।
𑌤𑌯𑍋𑌰𑍍𑌬𑌭𑍂𑌵𑌾𑌪𑍍𑌰𑌤𑌿𑌮𑌸𑍍𑌸𑌮𑌾𑌗𑌮 𑌸𑍍𑌸𑍁𑌰𑌾𑌸𑍁𑌰𑌾𑌣𑌾𑌮𑌪𑌿 𑌸𑌂𑌭𑍍𑌰𑌮𑌪𑍍𑌰𑌦𑌃 ॥ 12 ॥
𑌰𑌰𑌾𑌸 𑌭𑍂𑌮𑌿𑌰𑍍𑌨 𑌤𑌤𑌾𑌪 𑌭𑌾𑌨𑍁𑌮𑌾 𑌨𑍍𑌵𑌨𑍌 𑌨 𑌵𑌾𑌯𑍁𑌃 𑌪𑍍𑌰𑌚𑌾𑌚𑌲 𑌚𑌾𑌚𑌲𑌃 ।
𑌕𑌪𑍇𑌃 𑌕𑍁𑌮𑌾𑌰𑌸𑍍𑌯 𑌚 𑌵𑍀𑌕𑍍𑌷𑍍𑌯 𑌸𑌂𑌯𑍁𑌗𑌂 𑌨𑌨𑌾𑌦 𑌚 𑌦𑍍𑌯𑍌𑌰𑍁𑌦𑌧𑌿𑌶𑍍𑌚 𑌚𑍁𑌕𑍍𑌷𑍁𑌭𑍇 ॥ 13 ॥
𑌤𑌤𑌸𑍍𑌸 𑌵𑍀𑌰𑌸𑍍𑌸𑍁𑌮𑍁𑌖𑌾𑌨𑍍 𑌪𑌤𑌤𑍍𑌰𑌿𑌣𑌸𑍍𑌸𑍁𑌵𑌰𑍍𑌣𑌪𑍁𑌂𑌖𑌾𑌨𑍍𑌸𑌵𑌿𑌷𑌾𑌨𑌿𑌵𑍋𑌰𑌗𑌾𑌨𑍍 ।
𑌸𑌮𑌾𑌧𑌿𑌸𑌮𑍍𑌯𑍋𑌗𑌵𑌿𑌮𑍋𑌕𑍍𑌷𑌤𑌤𑍍𑌤𑍍𑌵𑌵𑌿𑌚𑍍𑌛𑌰𑌾𑌨𑌥 𑌤𑍍𑌰𑍀𑌨𑍍𑌕𑌪𑌿𑌮𑍂𑌰𑍍𑌧𑍍𑌨𑍍𑌯𑌪𑌾𑌤𑌯𑌤𑍍 ॥ 14 ॥
𑌸 𑌤𑍈 𑌶𑍍𑌶𑌰𑍈𑌰𑍍𑌮𑍂𑌰𑍍𑌧𑍍𑌨𑌿 𑌸𑌮𑌂 𑌨𑌿𑌪𑌾𑌤𑌿𑌤𑍈𑌃 𑌕𑍍𑌷𑌰𑌨𑍍𑌨𑌸𑍃𑌗𑍍𑌦𑌿𑌗𑍍𑌧𑌵𑌿𑌵𑍃𑌤𑍍𑌤𑌲𑍋𑌚𑌨𑌃 ।
𑌨𑌵𑍋𑌦𑌿𑌤𑌾𑌦𑌿𑌤𑍍𑌯𑌨𑌿𑌭 𑌶𑍍𑌶𑌰𑌾𑌂𑌶𑍁𑌮𑌾𑌨𑍍 𑌵𑍍𑌯𑌰𑌾𑌜𑌤𑌾𑌦𑌿𑌤𑍍𑌯 𑌇𑌵𑌾𑌂𑌶𑍁𑌮𑌾𑌲𑌿𑌕𑌃 ॥ 15 ॥
𑌤𑌤𑌸𑍍𑌸 𑌪𑌿𑌂𑌗𑌾𑌧𑌿𑌪𑌮𑌂𑌤𑍍𑌰𑌿𑌸𑌤𑍍𑌤𑌮𑌃 𑌸𑌮𑍀𑌕𑍍𑌷𑍍𑌯 𑌤𑌂 𑌰𑌾𑌜𑌵𑌰𑌾𑌤𑍍𑌮𑌜𑌂 𑌰𑌣𑍇 ।
𑌉𑌦𑌗𑍍𑌰𑌚𑌿𑌤𑍍𑌰𑌾𑌯𑍁𑌧𑌚𑌿𑌤𑍍𑌰𑌕𑌾𑌰𑍍𑌮𑍁𑌕𑌂 𑌜𑌹𑌰𑍍𑌷 𑌚𑌾𑌪𑍂𑌰𑍍𑌯𑌤 𑌚𑌾𑌹𑌵𑍋𑌨𑍍𑌮𑍁𑌖𑌃 ॥ 16 ॥
𑌸 𑌮𑌂𑌦𑌰𑌾𑌗𑍍𑌰𑌸𑍍𑌥 𑌇𑌵𑌾𑌂𑌶𑍁𑌮𑌾𑌲𑌿𑌕𑍋 𑌵𑌿𑌵𑍃𑌦𑍍𑌧𑌕𑍋𑌪𑍋 𑌬𑌲𑌵𑍀𑌰𑍍𑌯𑌸𑌂𑌯𑍁𑌤𑌃 ।
𑌕𑍁𑌮𑌾𑌰𑌮𑌕𑍍𑌷𑌂 𑌸𑌬𑌲𑌂 𑌸𑌵𑌾𑌹𑌨𑌂 𑌦𑌦𑌾𑌹 𑌨𑍇𑌤𑍍𑌰𑌾𑌗𑍍𑌨𑌿𑌮𑌰𑍀𑌚𑌿𑌭𑌿𑌸𑍍𑌤𑌦𑌾 ॥ 1 ॥
𑌤𑌤𑌸𑍍𑌸 𑌬𑌾𑌣𑌾𑌸𑌨𑌚𑌿𑌤𑍍𑌰𑌕𑌾𑌰𑍍𑌮𑍁𑌕 𑌶𑍍𑌶𑌰𑌪𑍍𑌰𑌵𑌰𑍍𑌷𑍋 𑌯𑍁𑌧𑌿 𑌰𑌾𑌕𑍍𑌷𑌸𑌾𑌂𑌬𑍁𑌦𑌃 ।
𑌶𑌰𑌾𑌨𑍍𑌮𑍁𑌮𑍋𑌚𑌾𑌶𑍁 𑌹𑌰𑍀𑌶𑍍𑌵𑌰𑌾𑌚𑌲𑍇 𑌵𑌲𑌾𑌹𑌕𑍋 𑌵𑍃𑌷𑍍𑌟𑌿𑌮𑌿𑌵𑌾𑌚𑌲𑍋𑌤𑍍𑌤𑌮𑍇 ॥ 1 ॥
𑌤𑌤𑌃 𑌕𑌪𑌿𑌸𑍍𑌤𑌂 𑌰𑌣𑌚𑌂𑌡𑌵𑌿𑌕𑍍𑌰𑌮𑌂 𑌵𑌿𑌵𑍃𑌦𑍍𑌧𑌤𑍇𑌜𑍋𑌬𑌲𑌵𑍀𑌰𑍍𑌯𑌸𑌂𑌯𑍁𑌤𑌮𑍍 ।
𑌕𑍁𑌮𑌾𑌰𑌮𑌕𑍍𑌷𑌂 𑌪𑍍𑌰𑌸𑌮𑍀𑌕𑍍𑌷𑍍𑌯 𑌸𑌂𑌯𑍁𑌗𑍇 𑌨𑌨𑌾𑌦 𑌹𑌰𑍍𑌷𑌾𑌦𑍍 𑌘𑌨𑌤𑍁𑌲𑍍𑌯𑌵𑌿𑌕𑍍𑌰𑌮𑌮𑍍 ॥ 1 ॥
𑌸 𑌬𑌾𑌲𑌭𑌾𑌵𑌾𑌦𑍍𑌯𑍁𑌧𑌿 𑌵𑍀𑌰𑍍𑌯𑌦𑌰𑍍𑌪𑌿𑌤𑌃 𑌪𑍍𑌰𑌵𑍃𑌦𑍍𑌧𑌮𑌨𑍍𑌯𑍁𑌃 𑌕𑍍𑌷𑌤𑌜𑍋𑌪𑌮𑍇𑌕𑍍𑌷𑌣𑌃 ।
𑌸𑌮𑌾𑌸𑌸𑌾𑌦𑌾𑌪𑍍𑌰𑌤𑌿𑌮𑌂 𑌕𑌪𑌿𑌂 𑌰𑌣𑍇 𑌗𑌜𑍋 𑌮𑌹𑌾𑌕𑍂𑌪𑌮𑌿𑌵𑌾𑌵𑍃𑌤𑌂 𑌤𑍃𑌣𑍈𑌃 ॥ 20 ॥
𑌸 𑌤𑍇𑌨 𑌬𑌾𑌣𑍈𑌃 𑌪𑍍𑌰𑌸𑌭𑌂 𑌨𑌿𑌪𑌾𑌤𑌿𑌤𑍈𑌶𑍍𑌚𑌕𑌾𑌰 𑌨𑌾𑌦𑌂 𑌘𑌨𑌨𑌾𑌦𑌨𑌿𑌸𑍍𑌸𑍍𑌵𑌨𑌃 ।
𑌸𑌮𑍁𑌤𑍍𑌪𑌪𑌾𑌤𑌾𑌶𑍁 𑌨𑌭𑌸𑍍𑌸 𑌮𑌾𑌰𑍁𑌤𑌿𑌰𑍍𑌭𑍁𑌜𑍋𑌰𑍁𑌵𑌿𑌕𑍍𑌷𑍇𑌪𑌣𑌘𑍋𑌰𑌦𑌰𑍍𑌶𑌨𑌃 ॥ 21 ॥
𑌸𑌮𑍁𑌤𑍍𑌪𑌤𑌂𑌤𑌂 𑌸𑌮𑌭𑌿𑌦𑍍𑌰𑌵𑌦𑍍𑌬𑌲𑍀 𑌸 𑌰𑌾𑌕𑍍𑌷𑌸𑌾𑌨𑌾𑌂 𑌪𑍍𑌰𑌵𑌰𑌃 𑌪𑍍𑌰𑌤𑌾𑌪𑌵𑌾𑌨𑍍 ।
𑌰𑌥𑍀 𑌰𑌥𑌿𑌶𑍍𑌰𑍇𑌷𑍍𑌠𑌤𑌮𑌃 𑌕𑌿𑌰𑌨𑍍𑌶𑌰𑍈𑌃 𑌪𑌯𑍋𑌧𑌰𑌶𑍍𑌶𑍈𑌲𑌮𑌿𑌵𑌾𑌶𑍍𑌮𑌵𑍃𑌷𑍍𑌟𑌿𑌭𑌿𑌃 ॥ 22 ॥
𑌸 𑌤𑌾𑌨𑍍𑌶𑌰𑌾𑌂𑌸𑍍𑌤𑌸𑍍𑌯 𑌹𑌰𑌿𑌰𑍍𑌵𑌿𑌮𑍋𑌕𑍍𑌷𑌯𑌂𑌶𑍍𑌚𑌚𑌾𑌰 𑌵𑍀𑌰𑌃 𑌪𑌥𑌿 𑌵𑌾𑌯𑍁𑌸𑍇𑌵𑌿𑌤𑍇 ।
𑌶𑌰𑌾𑌂𑌤𑌰𑍇 𑌮𑌾𑌰𑍁𑌤𑌵𑌦𑍍𑌵𑌿𑌨𑌿𑌷𑍍𑌪𑌤𑌨𑍍𑌮𑌨𑍋𑌜𑌵𑌸𑍍𑌸𑌂𑌯𑌤𑌿 𑌚𑌂𑌡𑌵𑌿𑌕𑍍𑌰𑌮𑌃 ॥ 23 ॥
𑌤𑌮𑌾𑌤𑍍𑌤𑌬𑌾𑌣𑌾𑌸𑌨𑌮𑌾𑌹𑌵𑍋𑌨𑍍𑌮𑍁𑌖𑌂 𑌖𑌮𑌾𑌸𑍍𑌤𑍃𑌣𑌂𑌤𑌂 𑌵𑌿𑌶𑌿𑌖𑍈𑌶𑍍𑌶𑌰𑍋𑌤𑍍𑌤𑌮𑍈𑌃 ।
𑌅𑌵𑍈𑌕𑍍𑌷𑌤𑌾𑌕𑍍𑌷𑌂 𑌬𑌹𑍁𑌮𑌾𑌨𑌚𑌕𑍍𑌷𑍁𑌷𑌾 𑌜𑌗𑌾𑌮 𑌚𑌿𑌂𑌤𑌾𑌂 𑌚 𑌸 𑌮𑌾𑌰𑍁𑌤𑌾𑌤𑍍𑌮𑌜𑌃 ॥ 24 ॥
𑌤𑌤𑌶𑍍𑌶𑌰𑍈𑌰𑍍𑌭𑌿𑌨𑍍𑌨𑌭𑍁𑌜𑌾𑌂𑌤𑌰𑌃 𑌕𑌪𑌿𑌃 𑌕𑍁𑌮𑌾𑌰𑌵𑍀𑌰𑍇𑌣 𑌮𑌹𑌾𑌤𑍍𑌮𑌨𑌾 𑌨𑌦𑌨𑍍 ।
𑌮𑌹𑌾𑌭𑍁𑌜𑌃 𑌕𑌰𑍍𑌮𑌵𑌿𑌶𑍇𑌷𑌤𑌤𑍍𑌤𑍍𑌵𑌵𑌿 𑌦𑍍𑌵𑌿𑌚𑌿𑌂𑌤𑌯𑌾𑌮𑌾𑌸 𑌰𑌣𑍇 𑌪𑌰𑌾𑌕𑍍𑌰𑌮𑌮𑍍 ॥ 25 ॥
𑌅𑌬𑌾𑌲𑌵𑌦𑍍𑌬𑌾𑌲𑌦𑌿𑌵𑌾𑌕𑌰𑌪𑍍𑌰𑌭𑌃 𑌕𑌰𑍋𑌤𑍍𑌯𑌯𑌂 𑌕𑌰𑍍𑌮 𑌮𑌹𑌨𑍍𑌮𑌹𑌾𑌬𑌲𑌃 ।
𑌨 𑌚𑌾𑌸𑍍𑌯 𑌸𑌰𑍍𑌵𑌾𑌹𑌵𑌕𑌰𑍍𑌮𑌶𑍋𑌭𑌿𑌨𑌃 𑌪𑍍𑌰𑌮𑌾𑌪𑌣𑍇 𑌮𑍇 𑌮𑌤𑌿𑌰𑌤𑍍𑌰 𑌜𑌾𑌯𑌤𑍇 ॥ 26 ॥
𑌅𑌯𑌂 𑌮𑌹𑌾𑌤𑍍𑌮𑌾 𑌚 𑌮𑌹𑌾𑌂𑌶𑍍𑌚 𑌵𑍀𑌰𑍍𑌯𑌤 𑌸𑍍𑌸𑌮𑌾𑌹𑌿𑌤𑌶𑍍𑌚𑌾𑌤𑌿𑌸𑌹𑌶𑍍𑌚 𑌸𑌂𑌯𑍁𑌗𑍇 ।
𑌅𑌸𑌂𑌶𑌯𑌂 𑌕𑌰𑍍𑌮𑌗𑍁𑌣𑍋𑌦𑌯𑌾𑌦𑌯𑌂 𑌸𑌨𑌾𑌗𑌯𑌕𑍍𑌷𑍈𑌰𑍍𑌮𑍁𑌨𑌿𑌭𑌿𑌶𑍍𑌚 𑌪𑍂𑌜𑌿𑌤𑌃 ॥ 2 ॥
𑌪𑌰𑌾𑌕𑍍𑌰𑌮𑍋𑌤𑍍𑌸𑌾𑌹𑌵𑌿𑌵𑍃𑌦𑍍𑌧𑌮𑌾𑌨𑌸 𑌸𑍍𑌸𑌮𑍀𑌕𑍍𑌷𑌤𑍇 𑌮𑌾𑌂 𑌪𑍍𑌰𑌮𑍁𑌖𑌾𑌗𑍍𑌰𑌤𑌃𑌸𑍍𑌥𑌿𑌤𑌃 ।
𑌪𑌰𑌾𑌕𑍍𑌰𑌮𑍋 𑌹𑍍𑌯𑌸𑍍𑌯 𑌮𑌨𑌾𑌂𑌸𑌿 𑌕𑌂𑌪𑌯𑍇𑌤𑍍𑌸𑍁𑌰𑌾𑌸𑍁𑌰𑌾𑌣𑌾𑌮𑌪𑌿 𑌶𑍀𑌘𑍍𑌰𑌗𑌾𑌮𑌿𑌨𑌃 ॥ 2 ॥
𑌨 𑌖𑌲𑍍𑌵𑌯𑌂 𑌨𑌾𑌭𑌿𑌭𑌵𑍇𑌦𑍁𑌪𑍇𑌕𑍍𑌷𑌿𑌤𑌃 𑌪𑌰𑌾𑌕𑍍𑌰𑌮𑍋 𑌹𑍍𑌯𑌸𑍍𑌯 𑌰𑌣𑍇 𑌵𑌿𑌵𑌰𑍍𑌧𑌤𑍇 ।
𑌪𑍍𑌰𑌮𑌾𑌪𑌣𑌂 𑌤𑍍𑌵𑍇𑌵 𑌮𑌮𑌾𑌦𑍍𑌯 𑌰𑍋𑌚𑌤𑍇 𑌨 𑌵𑌰𑍍𑌧𑌮𑌾𑌨𑍋𑌽𑌗𑍍𑌨𑌿𑌰𑍁𑌪𑍇𑌕𑍍𑌷𑌿𑌤𑍁𑌂 𑌕𑍍𑌷𑌮𑌃 ॥ 2 ॥
𑌇𑌤𑌿 𑌪𑍍𑌰𑌵𑍇𑌗𑌂 𑌤𑍁 𑌪𑌰𑌸𑍍𑌯 𑌚𑌿𑌂𑌤𑌯𑌨𑍍𑌸𑍍𑌵𑌕𑌰𑍍𑌮𑌯𑍋𑌗𑌂 𑌚 𑌵𑌿𑌧𑌾𑌯 𑌵𑍀𑌰𑍍𑌯𑌵𑌾𑌨𑍍 ।
𑌚𑌕𑌾𑌰 𑌵𑍇𑌗𑌂 𑌤𑍁 𑌮𑌹𑌾𑌬𑌲𑌸𑍍𑌤𑌦𑌾 𑌮𑌤𑌿𑌂 𑌚 𑌚𑌕𑍍𑌰𑍇𑌽𑌸𑍍𑌯 𑌵𑌧𑍇 𑌮𑌹𑌾𑌕𑌪𑌿𑌃 ॥ 30 ॥
𑌸 𑌤𑌸𑍍𑌯 𑌤𑌾𑌨𑌷𑍍𑌟𑌹𑌯𑌾𑌨𑍍𑌮𑌹𑌾𑌜𑌵𑌾𑌨𑍍 𑌸𑌮𑌾𑌹𑌿𑌤𑌾𑌨𑍍𑌭𑌾𑌰𑌸𑌹𑌾𑌨𑍍𑌵𑌿𑌵𑌰𑍍𑌤𑌨𑍇 ।
𑌜𑌘𑌾𑌨 𑌵𑍀𑌰𑌃 𑌪𑌥𑌿 𑌵𑌾𑌯𑍁𑌸𑍇𑌵𑌿𑌤𑍇 𑌤𑌲𑌪𑍍𑌰𑌹𑌾𑌰𑍈𑌃 𑌪𑌵𑌨𑌾𑌤𑍍𑌮𑌜𑌃 𑌕𑌪𑌿𑌃 ॥ 31 ॥
𑌤𑌤𑌸𑍍𑌤𑌲𑍇𑌨𑌾𑌭𑌿𑌹𑌤𑍋 𑌮𑌹𑌾𑌰𑌥 𑌸𑍍𑌸 𑌤𑌸𑍍𑌯 𑌪𑌿𑌂𑌗𑌾𑌧𑌿𑌪𑌮𑌂𑌤𑍍𑌰𑌿𑌨𑌿𑌰𑍍𑌜𑌿𑌤𑌃 ।
𑌪𑍍𑌰𑌭𑌗𑍍𑌨𑌨𑍀𑌡𑌃 𑌪𑌰𑌿𑌮𑍁𑌕𑍍𑌤𑌕𑍂𑌬𑌰𑌃 𑌪𑌪𑌾𑌤 𑌭𑍂𑌮𑍌 𑌹𑌤𑌵𑌾𑌜𑌿𑌰𑌂𑌬𑌰𑌾𑌤𑍍 ॥ 32 ॥
𑌸 𑌤𑌂 𑌪𑌰𑌿𑌤𑍍𑌯𑌜𑍍𑌯 𑌮𑌹𑌾𑌰𑌥𑍋 𑌰𑌥𑌂 𑌸𑌕𑌾𑌰𑍍𑌮𑍁𑌕𑌃 𑌖𑌂𑌗𑌧𑌰𑌃 𑌖𑌮𑍁𑌤𑍍𑌪𑌤𑌨𑍍 ।
𑌤𑌪𑍋𑌽𑌭𑌿𑌯𑍋𑌗𑌾𑌦𑍃𑌷𑌿𑌰𑍁𑌗𑍍𑌰𑌵𑍀𑌰𑍍𑌯𑌵𑌾𑌨𑍍𑌵𑌿𑌹𑌾𑌯 𑌦𑍇𑌹𑌂 𑌮𑌰𑍁𑌤𑌾𑌮𑌿𑌵𑌾𑌲𑌯𑌮𑍍 ॥ 33 ॥
𑌤𑌤𑌃 𑌕𑌪𑌿𑌸𑍍𑌤𑌂 𑌵𑌿𑌚𑌰𑌂𑌤𑌮𑌂𑌬𑌰𑍇 𑌪𑌤𑌤𑍍𑌰𑌿𑌰𑌾𑌜𑌾𑌨𑌿𑌲𑌸𑌿𑌦𑍍𑌧𑌸𑍇𑌵𑌿𑌤𑍇 ।
𑌸𑌮𑍇𑌤𑍍𑌯 𑌤𑌂 𑌮𑌾𑌰𑍁𑌤𑌤𑍁𑌲𑍍𑌯𑌵𑌿𑌕𑍍𑌰𑌮𑌃 𑌕𑍍𑌰𑌮𑍇𑌣 𑌜𑌗𑍍𑌰𑌾𑌹 𑌸 𑌪𑌾𑌦𑌯𑍋𑌰𑍍𑌦𑍃𑌢𑌮𑍍 ॥ 34 ॥
𑌸 𑌤𑌂 𑌸𑌮𑌾𑌵𑌿𑌧𑍍𑌯 𑌸𑌹𑌸𑍍𑌰𑌶𑌃 𑌕𑌪𑌿𑌰𑍍𑌮𑌹𑍋𑌰𑌗𑌂 𑌗𑍃𑌹𑍍𑌯 𑌇𑌵𑌾𑌂𑌡𑌜𑍇𑌶𑍍𑌵𑌰𑌃 ।
𑌮𑍁𑌮𑍋𑌚 𑌵𑍇𑌗𑌾𑌤𑍍𑌪𑌿𑌤𑍃𑌤𑍁𑌲𑍍𑌯𑌵𑌿𑌕𑍍𑌰𑌮𑍋 𑌮𑌹𑍀𑌤𑌲𑍇 𑌸𑌂𑌯𑌤𑌿 𑌵𑌾𑌨𑌰𑍋𑌤𑍍𑌤𑌮𑌃 ॥ 35 ॥
𑌸 𑌭𑌗𑍍𑌨𑌬𑌾𑌹𑍂𑌰𑍁𑌕𑌟𑍀𑌶𑌿𑌰𑍋𑌧𑌰𑌃 𑌕𑍍𑌷𑌰𑌨𑍍𑌨𑌸𑍃𑌙𑌿𑌨𑌰𑍍𑌮𑌥𑌿𑌤𑌾𑌸𑍍𑌥𑌿𑌲𑍋𑌚𑌨𑌃 ।
𑌸𑌂𑌭𑌗𑍍𑌨𑌸𑌂𑌧𑌿𑌃 𑌪𑍍𑌰𑌵𑌿𑌕𑍀𑌰𑍍𑌣𑌬𑌂𑌧𑌨𑍋 𑌹𑌤𑌃 𑌕𑍍𑌷𑌿𑌤𑍌 𑌵𑌾𑌯𑍁𑌸𑍁𑌤𑍇𑌨 𑌰𑌾𑌕𑍍𑌷𑌸𑌃 ॥ 36 ॥
𑌮𑌹𑌾𑌕𑌪𑌿𑌰𑍍𑌭𑍂𑌮𑌿𑌤𑌲𑍇 𑌨𑌿𑌪𑍀𑌡𑍍𑌯 𑌤𑌂 𑌚𑌕𑌾𑌰 𑌰𑌕𑍍𑌷𑍋𑌧𑌿𑌪𑌤𑍇𑌰𑍍𑌮𑌹𑌦𑍍𑌭𑌯𑌮𑍍 ।
𑌮𑌹𑌰𑍍𑌷𑌿𑌭𑌿𑌶𑍍𑌚𑌕𑍍𑌰𑌚𑌰𑍈𑌰𑍍𑌮𑌹𑌾𑌵𑍍𑌰𑌤𑍈 𑌸𑍍𑌸𑌮𑍇𑌤𑍍𑌯 𑌭𑍂𑌤𑍈𑌶𑍍𑌚 𑌸𑌯𑌕𑍍𑌷𑌪𑌨𑍍𑌨𑌗𑍈𑌃 ॥ 3 ॥
𑌸𑍁𑌰𑍈𑌶𑍍𑌚 𑌸𑍇𑌂𑌦𑍍𑌰𑍈𑌰𑍍𑌭𑍃𑌶𑌜𑌾𑌤𑌵𑌿𑌸𑍍𑌮𑌯𑍈 𑌰𑍍𑌹𑌤𑍇 𑌕𑍁𑌮𑌾𑌰𑍇 𑌸 𑌕𑌪𑌿𑌰𑍍𑌨𑌿𑌰𑍀𑌕𑍍𑌷𑌿𑌤𑌃 ।
𑌨𑌿𑌹𑌤𑍍𑌯 𑌤𑌂 𑌵𑌜𑍍𑌰𑌿𑌸𑍁𑌤𑍋𑌪𑌮𑌪𑍍𑌰𑌭𑌂 𑌕𑍁𑌮𑌾𑌰𑌮𑌕𑍍𑌷𑌂 𑌕𑍍𑌷𑌤𑌜𑍋𑌪𑌮𑍇𑌕𑍍𑌷𑌣𑌮𑍍 ।
𑌤𑌮𑍇𑌵 𑌵𑍀𑌰𑍋𑌽𑌭𑌿𑌜𑌗𑌾𑌮 𑌤𑍋𑌰𑌣𑌂 𑌕𑍃𑌤𑌕𑍍𑌷𑌣𑌃 𑌕𑌾𑌲 𑌇𑌵 𑌪𑍍𑌰𑌜𑌾𑌕𑍍𑌷𑌯𑍇 ॥ 3 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌸𑌪𑍍𑌤𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
