VR 4.60 Kishkindha Kanda - Sarga 60 - Grantha

Collection of Spiritual and Devotional Literature in Various Indian Languages

View this in:

4.60 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡 - 𑌷𑌷𑍍𑌟𑌿𑌤𑌮 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।

𑌤𑌤𑌃 𑌕𑍃𑌤𑍋𑌦𑌕𑌂 𑌸𑍍𑌨𑌾𑌤𑌂 𑌤𑌂 𑌗𑍃𑌧𑍍𑌰𑌂 𑌹𑌰𑌿𑌯𑍂𑌥𑌪𑌾𑌃 ।
𑌉𑌪𑌵𑌿𑌷𑍍𑌟𑌾 𑌗𑌿𑌰𑍌 𑌰𑌮𑍍𑌯𑍇 𑌪𑌰𑌿𑌵𑌾𑌰𑍍𑌯 𑌸𑌮𑌂𑌤𑌤𑌃 ॥ 1 ॥

𑌤𑌮𑌂𑌗𑌦𑌮𑍁𑌪𑌾𑌸𑍀𑌨𑌂 𑌤𑍈𑌸𑍍𑌸𑌰𑍍𑌵𑍈𑌰𑍍𑌹𑌰𑌿𑌭𑌿𑌰𑍍𑌵𑍃𑌤𑌮𑍍 ।
𑌜𑌨𑌿𑌤𑌪𑍍𑌰𑌤𑍍𑌯𑌯𑍋 𑌹𑌰𑍍𑌷𑌾𑌤𑍍𑌸𑌂𑌪𑌾𑌤𑌿𑌃 𑌪𑍁𑌨𑌰𑌬𑍍𑌰𑌵𑍀𑌤𑍍 ॥ 2 ॥

𑌕𑍃𑌤𑍍𑌵𑌾 𑌨𑌿𑌶𑍍𑌶𑌬𑍍𑌦𑌮𑍇𑌕𑌾𑌗𑍍𑌰𑌾 𑌶𑍍𑌶𑍍𑌰𑍁𑌣𑍍𑌵𑌂𑌤𑍁 𑌹𑌰𑌯𑍋 𑌮𑌮 ।
𑌤𑌤𑍍𑌵𑌂 𑌸𑌂𑌕𑍀𑌰𑍍𑌤𑌯𑌿𑌷𑍍𑌯𑌾𑌮𑌿 𑌯𑌥𑌾 𑌜𑌾𑌨𑌾𑌮𑌿 𑌮𑍈𑌥𑌿𑌲𑍀𑌮𑍍 ॥ 3 ॥

𑌅𑌸𑍍𑌯 𑌵𑌿𑌂𑌧𑍍𑌯𑌸𑍍𑌯 𑌶𑌿𑌖𑌰𑍇 𑌪𑌤𑌿𑌤𑍋𑌽𑌸𑍍𑌮𑌿 𑌪𑍁𑌰𑌾𑌵𑌨𑍇 ।
𑌸𑍂𑌰𑍍𑌯𑌤𑌪𑌪𑌰𑍀𑌤𑌾𑌂𑌗𑍋 𑌨𑌿𑌰𑍍𑌦𑌗𑍍𑌧𑌸𑍍𑌸𑍂𑌰𑍍𑌯𑌰𑌶𑍍𑌮𑌿𑌭𑌿𑌃 ॥ 4 ॥

𑌲𑌬𑍍𑌧𑌸𑌂𑌜𑍍𑌞𑌸𑍍𑌤𑍁 𑌷𑌡𑍍𑌰𑌾𑌤𑍍𑌰𑌾𑌦𑍍𑌵𑌿𑌵𑌶𑍋 𑌵𑌿𑌹𑍍𑌵𑌲𑌨𑍍𑌨𑌿𑌵 ।
𑌵𑍀𑌕𑍍𑌷𑌮𑌾𑌣𑍋 𑌦𑌿𑌶𑌸𑍍𑌸𑌰𑍍𑌵𑌾 𑌨𑌾𑌭𑌿𑌜𑌾𑌨𑌾𑌮𑌿 𑌕𑌿𑌂𑌚𑌨 ॥ 5 ॥

𑌤𑌤𑌸𑍍𑌤𑍁 𑌸𑌾𑌗𑌰𑌾𑌨𑍍 𑌶𑍈𑌲𑌾𑌨𑍍𑌨𑌦𑍀𑌸𑍍𑌸𑌰𑍍𑌵𑌾𑌸𑍍𑌸𑌰𑌾𑌂𑌸𑌿 𑌚 ।
𑌵𑌨𑌾𑌨𑌿 𑌚 𑌪𑍍𑌰𑌦𑍇𑌶𑌾𑌂𑌶𑍍𑌚 𑌨𑍀𑌰𑍀𑌕𑍍𑌷𑍍𑌯 𑌮𑌤𑌿𑌰𑌾𑌗𑌤𑌾 ॥ 6 ॥

𑌹𑍃𑌷𑍍𑌟𑌪𑌕𑍍𑌷𑌿𑌗𑌣𑌾𑌕𑍀𑌰𑍍𑌣𑌃 𑌕𑌂𑌦𑌰𑌾𑌂𑌤𑌰𑌕𑍂𑌟𑌵𑌾𑌨𑍍 ।
𑌦𑌕𑍍𑌷𑌿𑌣𑌸𑍍𑌯𑍋𑌦𑌧𑍇𑌸𑍍𑌤𑍀𑌰𑍇 𑌵𑌿𑌂𑌧𑍍𑌯𑍋𑌽𑌯𑌮𑌿𑌤𑌿 𑌨𑌿𑌶𑍍𑌚𑌿𑌤𑌃 ॥ 𑍭 ॥

𑌆𑌸𑍀𑌚𑍍𑌚𑌾𑌤𑍍𑌰𑌾𑌶𑍍𑌰𑌮𑌂 𑌪𑍁𑌣𑍍𑌯𑌂 𑌸𑍁𑌰𑍈𑌰𑌪𑌿 𑌸𑍁𑌪𑍂𑌜𑌿𑌤𑌮𑍍 ।
𑌋𑌷𑌿𑌰𑍍𑌨𑌿𑌶𑌾𑌕𑌰𑍋 𑌨𑌾𑌮 𑌯𑌸𑍍𑌮𑌿𑌨𑍍𑌨𑍁𑌗𑍍𑌰𑌤𑌪𑌾𑌭𑌵𑌤𑍍 ॥ 𑍮 ॥

𑌅𑌷𑍍𑌟𑍌 𑌵𑌰𑍍𑌷𑌸𑌹𑌸𑍍𑌰𑌾𑌣𑌿 𑌤𑍇𑌨𑌾𑌸𑍍𑌮𑌿𑌨𑍍𑌨𑍃𑌷𑌿𑌣𑌾 𑌵𑌿𑌨𑌾 ।
𑌵𑌸𑌤𑍋 𑌮𑌮 𑌧𑌰𑍍𑌮𑌜𑍍𑌞𑌾 𑌸𑍍𑌵𑌰𑍍𑌗𑌤𑍇 𑌤𑍁 𑌨𑌿𑌶𑌾𑌕𑌰𑍇 ॥ 𑍯 ॥

𑌅𑌵𑌤𑍀𑌰𑍍𑌯 𑌤𑍁 𑌵𑌿𑌂𑌧𑍍𑌯𑌾𑌗𑍍𑌰𑌾𑌤𑍍𑌕𑍃𑌚𑍍𑌛𑍍𑌰𑍇𑌣 𑌵𑌿𑌷𑌮𑌾𑌚𑍍𑌛𑌨𑍈𑌃 ।
𑌤𑍀𑌕𑍍𑌷𑍍𑌣𑌦𑌰𑍍𑌭𑌾𑌂 𑌵𑌸𑍁𑌮𑌤𑍀𑌂 𑌦𑍁𑌃𑌖𑍇𑌨 𑌪𑍁𑌨𑌰𑌾𑌗𑌤𑌃 ॥ 10 ॥

𑌤𑌮𑍃𑌷𑌿𑌂 𑌦𑍍𑌰𑌷𑍍𑌟𑍁𑌕𑌾𑌮𑍋𑌽𑌸𑍍𑌮𑌿 𑌦𑍁𑌃𑌖𑍇𑌨𑌾𑌭𑍍𑌯𑌾𑌗𑌤𑍋 𑌭𑍃𑌶𑌮𑍍 ।
𑌜𑌟𑌾𑌯𑍁𑌷𑌾 𑌮𑌯𑌾 𑌚𑍈𑌵 𑌬𑌹𑍁𑌶𑍋𑌽𑌭𑌿𑌗𑌤𑍋 𑌹𑌿 𑌸𑌃 ॥ 11 ॥

𑌤𑌸𑍍𑌯𑌾𑌶𑍍𑌰𑌮𑌪𑌦𑌾𑌭𑍍𑌯𑌾𑌶𑍇 𑌵𑌵𑍁𑌰𑍍𑌵𑌾𑌤𑌾𑌸𑍍𑌸𑍁𑌗𑌂𑌧𑌿𑌨𑌃 ।
𑌵𑍃𑌕𑍍𑌷𑍋 𑌵𑌾𑌪𑍁𑌷𑍍𑌪𑌿𑌤𑌃 𑌕𑌶𑍍𑌚𑌿𑌦𑌫𑌲𑍋 𑌵𑌾 𑌨 𑌵𑌿𑌦𑍍𑌯𑌤𑍇 ॥ 12 ॥

𑌉𑌪𑍇𑌤𑍍𑌯 𑌚𑌾𑌶𑍍𑌰𑌮𑌂 𑌪𑍁𑌣𑍍𑌯𑌂 𑌵𑍃𑌕𑍍𑌷𑌮𑍂𑌲𑌮𑍁𑌪𑌾𑌶𑍍𑌰𑌿𑌤𑌃 ।
𑌦𑍍𑌰𑌷𑍍𑌟𑍁𑌕𑌾𑌮𑌃 𑌪𑍍𑌰𑌤𑍀𑌕𑍍𑌷𑍇𑌽𑌹𑌂 𑌭𑌗𑌵𑌂𑌤𑌂 𑌨𑌿𑌶𑌾𑌕𑌰𑌮𑍍 ॥ 13 ॥

𑌅𑌥𑌾𑌪𑌶𑍍𑌯𑌮𑌦𑍂𑌰𑌸𑍍𑌥𑌮𑍃𑌷𑌿𑌂 𑌜𑍍𑌵𑌲𑌿𑌤𑌤𑍇𑌜𑌸𑌮𑍍 ।
𑌕𑍃𑌤𑌾𑌭𑌿𑌷𑍇𑌕𑌂 𑌦𑍁𑌰𑍍𑌧𑌰𑍍𑌷𑌮𑍁𑌪𑌾𑌵𑍃𑌤𑍍𑌤𑌮𑍁𑌦𑌙𑍍𑌮𑍁𑌖𑌮𑍍 ॥ 14 ॥

𑌤𑌮𑍃𑌕𑍍𑌷𑌾𑌸𑍍𑌸𑍃𑌮𑌰𑌾 𑌵𑍍𑌯𑌾𑌘𑍍𑌰𑌾𑌸𑍍𑌸𑌿𑌂𑌹𑌾 𑌨𑌾𑌗𑌾𑌸𑍍𑌸𑌰𑍀𑌸𑍃𑌪𑌾𑌃 ।
𑌪𑌰𑌿𑌵𑌾𑌰𑍍𑌯𑍋𑌪𑌗𑌚𑍍𑌛𑌂𑌤𑌿 𑌧𑌾𑌤𑌾𑌰𑌂 𑌪𑍍𑌰𑌾𑌣𑌿𑌨𑍋 𑌯𑌥𑌾 ॥ 15 ॥

𑌤𑌤𑌃 𑌪𑍍𑌰𑌾𑌪𑍍𑌤𑌮𑍃𑌷𑌿𑌂 𑌜𑍍𑌞𑌾𑌤𑍍𑌵𑌾 𑌤𑌾𑌨𑌿 𑌸𑌤𑍍𑌤𑍍𑌵𑌾𑌨𑌿 𑌵𑍈 𑌯𑌯𑍁𑌃 ।
𑌪𑍍𑌰𑌵𑌿𑌷𑍍𑌟𑍇 𑌰𑌾𑌜𑌨𑌿 𑌯𑌥𑌾 𑌸𑌰𑍍𑌵𑌂 𑌸𑌾𑌮𑌾𑌤𑍍𑌯𑌕𑌂 𑌬𑌲𑌮𑍍 ॥ 16 ॥

𑌋𑌷𑌿𑌸𑍍𑌤𑍁 𑌦𑍃𑌷𑍍𑌟𑍍𑌵𑌾 𑌮𑌾𑌂 𑌪𑍍𑌰𑍀𑌤𑌃 𑌪𑍍𑌰𑌵𑌿𑌷𑍍𑌟𑌶𑍍𑌚𑌾𑌶𑍍𑌰𑌮𑌂 𑌪𑍁𑌨𑌃 ।
𑌮𑍁𑌹𑍂𑌰𑍍𑌤𑌮𑌾𑌤𑍍𑌰𑌾𑌨𑍍𑌨𑌿𑌷𑍍𑌕𑍍𑌰𑌮𑍍𑌯 𑌤𑌤𑌃 𑌕𑌾𑌰𑍍𑌯𑌮𑌪𑍃𑌚𑍍𑌛𑌤 ॥ 1𑍭 ॥

𑌸𑍌𑌮𑍍𑌯 𑌵𑍈𑌕𑌲𑍍𑌯𑌤𑌾𑌂 𑌦𑍃𑌷𑍍𑌟𑍍𑌵𑌾 𑌰𑍋𑌮𑍍𑌣𑌾𑌂 𑌤𑍇 𑌨𑌾𑌵𑌗𑌮𑍍𑌯𑌤𑍇 ।
𑌅𑌗𑍍𑌨𑌿𑌦𑌗𑍍𑌧𑌾𑌵𑌿𑌮𑍌 𑌪𑌕𑍍𑌷𑍌 𑌵𑍍𑌰𑌣𑌾𑌶𑍍𑌚𑌾𑌪𑌿 𑌶𑌰𑍀𑌰𑌕𑍇 ॥ 1𑍮 ॥

𑌗𑍃𑌧𑍍𑌰𑍌 𑌦𑍍𑌵𑍌 𑌦𑍃𑌷𑍍𑌟𑌪𑍂𑌰𑍍𑌵𑍌 𑌮𑍇 𑌮𑌾𑌤𑌰𑌿𑌶𑍍𑌵𑌸𑌮𑍌 𑌜𑌵𑍇 ।
𑌗𑍃𑌧𑍍𑌰𑌾𑌣𑌾𑌂 𑌚𑍈𑌵 𑌰𑌾𑌜𑌾𑌨𑍌 𑌭𑍍𑌰𑌾𑌤𑌰𑍌 𑌕𑌾𑌮𑌰𑍂𑌪𑌿𑌣𑍌 ॥ 1𑍯 ॥

𑌜𑍍𑌯𑍇𑌷𑍍𑌠𑍋 𑌹𑌿 𑌤𑍍𑌵𑌂 𑌤𑍁 𑌸𑌂𑌪𑌾𑌤𑍇 𑌜𑌟𑌾𑌯𑍁𑌰𑌨𑍁𑌜𑌸𑍍𑌤𑌵 ।
𑌮𑌾𑌨𑍁𑌷𑌂 𑌰𑍂𑌪𑌮𑌾𑌸𑍍𑌥𑌾𑌯 𑌗𑍃𑌹𑍍𑌣𑍀𑌤𑌾𑌂 𑌚𑌰𑌣𑍌 𑌮𑌮 ॥ 20 ॥

𑌕𑌿𑌂 𑌤𑍇 𑌵𑍍𑌯𑌾𑌧𑌿𑌸𑌮𑍁𑌤𑍍𑌥𑌾𑌨𑌂 𑌪𑌕𑍍𑌷𑌯𑍋𑌃 𑌪𑌤𑌨𑌂 𑌕𑌥𑌮𑍍 ।
𑌦𑌂𑌡𑍋𑌽𑌯𑌂𑌚 𑌕𑍃𑌤𑌃 𑌕𑍇𑌨 𑌸𑌰𑍍𑌵𑌮𑌾𑌖𑍍𑌯𑌾𑌹𑌿 𑌪𑍃𑌚𑍍𑌛𑌤𑌃 ॥ 21 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥

Browse Related Categories: