Meaning, Multimedia
View this in:
| English | Devanagari | Telugu | Tamil | Kannada | Malayalam | Gujarati | Odia | Bengali  |
| Marathi | Assamese | Punjabi | Hindi | Samskritam | Konkani | Nepali | Sinhala | Grantha  |

4.1𑍯 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡 - 𑌏𑌕𑍋𑌨𑌵𑌿𑌂𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌵𑌿𑌂𑌶𑌸𑍍𑌸𑌰𑍍𑌗𑌃 ।

𑌸 𑌵𑌾𑌨𑌰𑌮𑌹𑌾𑌰𑌾𑌜𑌶𑍍𑌶𑌯𑌾𑌨𑌶𑍍𑌶𑌰𑌵𑌿𑌕𑍍𑌷𑌤𑌃 ।
𑌪𑍍𑌰𑌤𑍍𑌯𑍁𑌕𑍍𑌤𑍋 𑌹𑍇𑌤𑍁𑌮𑌦𑍍𑌵𑌾𑌕𑍍𑌯𑍈𑌰𑍍𑌨𑍋𑌤𑍍𑌤𑌰𑌂 𑌪𑍍𑌰𑌤𑍍𑌯𑌪𑌦𑍍𑌯𑌤 ॥ 1 ॥

𑌅𑌶𑍍𑌮𑌭𑌿𑌃 𑌪𑍍𑌰𑌵𑌿𑌭𑌿𑌨𑍍𑌨𑌾𑌂𑌗𑌃 𑌪𑌾𑌦𑌪𑍈𑌰𑌾𑌹𑌤𑍋 𑌭𑍃𑌶𑌮𑍍 ।
𑌰𑌾𑌮𑌬𑌾𑌣𑍇𑌨 𑌚𑌾𑌕𑍍𑌰𑌾𑌂𑌤𑍋 𑌜𑍀𑌵𑌿𑌤𑌾𑌂𑌤𑍇 𑌮𑍁𑌮𑍋𑌹 𑌸𑌃 ॥ 2 ॥

𑌤𑌂 𑌭𑌾𑌰𑍍𑌯𑌾 𑌬𑌾𑌣𑌮𑍋𑌕𑍍𑌷𑍇𑌣 𑌰𑌾𑌮𑌦𑌤𑍍𑌤𑍇𑌨 𑌸𑌂𑌯𑍁𑌗𑍇 ।
𑌹𑌤𑌂 𑌪𑍍𑌲𑌵𑌗𑌶𑌾𑌰𑍍𑌦𑍂𑌲𑌂 𑌤𑌾𑌰𑌾 𑌶𑍁𑌶𑍍𑌰𑌾𑌵 𑌵𑌾𑌲𑌿𑌨𑌮𑍍 ॥ 3 ॥

𑌸𑌾 𑌸𑌪𑍁𑌤𑍍𑌰𑌾𑌪𑍍𑌰𑌿𑌯𑌂 𑌶𑍍𑌰𑍁𑌤𑍍𑌵𑌾 𑌵𑌧𑌂 𑌭𑌰𑍍𑌤𑍁𑌸𑍍𑌸𑍁𑌦𑌾𑌰𑍁𑌣𑌮𑍍 ।
𑌨𑌿𑌷𑍍𑌪𑌪𑌾𑌤 𑌭𑍃𑌶𑌂 𑌤𑌸𑍍𑌮𑌾𑌦𑍍𑌵𑌿𑌵𑌿𑌧𑌾 𑌗𑌿𑌰𑌿𑌗𑌹𑍍𑌵𑌰𑌾𑌤𑍍 ॥ 4 ॥

𑌯𑍇 𑌤𑍍𑌵𑌂𑌗𑌦𑌪𑌰𑍀𑌵𑌾𑌰𑌾 𑌵𑌾𑌨𑌰𑌾 𑌭𑍀𑌮𑌵𑌿𑌕𑍍𑌰𑌮𑌾𑌃 ।
𑌤𑍇 𑌸𑌕𑌾𑌰𑍍𑌮𑍁𑌕𑌮𑌾𑌲𑍋𑌕𑍍𑌯 𑌰𑌾𑌮𑌂 𑌤𑍍𑌰𑌸𑍍𑌤𑌾𑌃 𑌪𑍍𑌰𑌦𑍁𑌦𑍍𑌰𑍁𑌵𑍁𑌃 ॥ 5 ॥

𑌸𑌾 𑌦𑌦𑌰𑍍𑌶 𑌤𑌤𑌸𑍍𑌤𑍍𑌰𑌸𑍍𑌤𑌾𑌨𑍍𑌹𑌰𑍀𑌨𑌾𑌪𑌤𑌤𑍋 𑌭𑍃𑌶𑌮𑍍 ।
𑌯𑍂𑌥𑌾𑌦𑌿𑌵 𑌪𑌰𑌿𑌭𑍍𑌰𑌷𑍍𑌟𑌾𑌨𑍍𑌮𑍃𑌗𑌾𑌨𑍍𑌨𑌿𑌹𑌤𑌯𑍂𑌥𑌪𑌾𑌨𑍍 ॥ 6 ॥

𑌤𑌾𑌨𑍁𑌵𑌾𑌚 𑌸𑌮𑌾𑌸𑌾𑌦𑍍𑌯 𑌦𑍁𑌃𑌖𑌿𑌤𑌾𑌂𑌦𑍁𑌖𑌿𑌤𑌾 𑌸𑌤𑍀 ।
𑌰𑌾𑌮𑌵𑌿𑌤𑍍𑌰𑌾𑌸𑌿𑌤𑌾𑌨𑍍𑌸𑌰𑍍𑌵𑌾𑌨𑌨𑍁𑌬𑌦𑍍𑌧𑌾𑌨𑌿𑌵𑍇𑌷𑍁𑌭𑌿𑌃 ॥ 𑍭 ॥

𑌵𑌾𑌨𑌰𑌾𑌃 𑌰𑌾𑌜𑌸𑌿𑌂𑌹𑌸𑍍𑌯 𑌯𑌸𑍍𑌯 𑌯𑍂𑌯𑌂 𑌪𑍁𑌰𑌸𑍍𑌸𑌰𑌾𑌃 ।
𑌤𑌂 𑌵𑌿𑌹𑌾𑌯 𑌸𑍁𑌸𑌂𑌤𑍍𑌰𑌸𑍍𑌤𑌾𑌃 𑌕𑌸𑍍𑌮𑌾𑌦𑍍𑌦𑍍𑌰𑌵𑌥 𑌦𑍁𑌰𑍍𑌗𑌤𑌾𑌃 ॥ 𑍮 ॥

𑌰𑌾𑌜𑍍𑌯𑌹𑍇𑌤𑍋𑌸𑍍𑌸 𑌚𑍇𑌦𑍍𑌭𑍍𑌰𑌾𑌤𑌾 𑌭𑍍𑌰𑌾𑌤𑍍𑌰𑌾 𑌰𑍌𑌦𑍍𑌰𑍇𑌣 𑌪𑌾𑌤𑌿𑌤𑌃 ।
𑌰𑌾𑌮𑍇𑌣 𑌪𑍍𑌰𑌹𑌿𑌤𑍈𑌰𑍌𑌦𑍍𑌰𑍈𑌰𑍍𑌮𑌾𑌰𑍍𑌗𑌣𑍈𑌰𑍍𑌦𑍂𑌰𑌪𑌾𑌤𑌿𑌭𑌿𑌃 ॥ 𑍯 ॥

𑌕𑌪𑌿𑌪𑌤𑍍𑌨𑍍𑌯𑌾 𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌕𑌪𑌯𑌃 𑌕𑌾𑌮𑌰𑍂𑌪𑌿𑌣𑌃 ।
𑌪𑍍𑌰𑌾𑌪𑍍𑌤𑌕𑌾𑌲𑌮𑌵𑌿𑌕𑍍𑌲𑌿𑌷𑍍𑌟𑌮𑍂𑌚𑍁𑌰𑍍𑌵𑌚𑌨𑌮𑌂𑌗𑌨𑌾𑌮𑍍 ॥ 10 ॥

𑌜𑍀𑌵𑌪𑍁𑌤𑍍𑌰𑍇 𑌨𑌿𑌵𑌰𑍍𑌤𑌸𑍍𑌵 𑌪𑍁𑌤𑍍𑌰𑌂 𑌰𑌕𑍍𑌷𑌸𑍍𑌵 𑌚𑌾𑌂𑌗𑌦𑌮𑍍 ।
𑌅𑌂𑌤𑌕𑍋 𑌰𑌾𑌮𑌰𑍂𑌪𑍇𑌣 𑌹𑌤𑍍𑌵𑌾 𑌨𑌯𑌤𑌿 𑌵𑌾𑌲𑌿𑌨𑌮𑍍 ॥ 11 ॥

𑌕𑍍𑌷𑌿𑌪𑍍𑌤𑌾𑌨𑍍 𑌵𑍃𑌕𑍍𑌷𑌾𑌨𑍍𑌸𑌮𑌾𑌵𑌿𑌧𑍍𑌯 𑌵𑌿𑌪𑍁𑌲𑌾𑌶𑍍𑌚 𑌶𑌿𑌲𑌾𑌸𑍍𑌤𑌥𑌾 ।
𑌵𑌾𑌲𑍀 𑌵𑌜𑍍𑌰𑌸𑌮𑍈𑌰𑍍𑌬𑌾𑌣𑍈 𑌰𑌾𑌮𑍇𑌣 𑌵𑌿𑌨𑌿𑌪𑌾𑌤𑌿𑌤𑌃 ॥ 12 ॥

𑌅𑌭𑌿𑌦𑍍𑌰𑍁𑌤𑌮𑌿𑌦𑌂 𑌸𑌰𑍍𑌵𑌂 𑌵𑌿𑌦𑍍𑌰𑍁𑌤𑌂 𑌪𑍍𑌰𑌸𑍃𑌤𑌂 𑌬𑌲𑌮𑍍 ।
𑌅𑌸𑍍𑌮𑌿𑌨𑍍 𑌪𑍍𑌲𑌵𑌗𑌶𑌾𑌰𑍍𑌦𑍂𑌲𑍇 𑌹𑌤𑍇 𑌶𑌕𑍍𑌰𑌸𑌮𑌪𑍍𑌰𑌭𑍇 ॥ 13 ॥

𑌰𑌕𑍍𑌷𑍍𑌯𑌤𑌾𑌂 𑌨𑌗𑌰𑌦𑍍𑌵𑌾𑌰𑌮𑌂𑌗𑌦𑌶𑍍𑌚𑌾𑌭𑌿𑌷𑌿𑌚𑍍𑌯𑌤𑌾𑌮𑍍 ।
𑌪𑌦𑌸𑍍𑌥𑌂 𑌵𑌾𑌲𑌿𑌨𑌃 𑌪𑍁𑌤𑍍𑌰𑌂 𑌭𑌜𑌿𑌷𑍍𑌯𑌂𑌤𑌿 𑌪𑍍𑌲𑌵𑌂𑌗𑌮𑌾𑌃 ॥ 14 ॥

𑌅𑌥𑌵𑌾𑌽𑌰𑍁𑌚𑌿𑌤𑌂 𑌸𑍍𑌥𑌾𑌨𑌮𑌿𑌹 𑌤𑍇 𑌰𑍁𑌚𑌿𑌰𑌾𑌨𑌨𑍇 ।
𑌆𑌵𑌿𑌶𑌂𑌤𑌿 𑌹𑌿 𑌦𑍁𑌰𑍍𑌗𑌾𑌣𑌿 𑌕𑍍𑌷𑌿𑌪𑍍𑌰𑌮𑌨𑍍𑌯𑌾𑌨𑌿 𑌵𑌾𑌨𑌰𑌾𑌃 ॥ 15 ॥

𑌅𑌭𑌾𑌰𑍍𑌯𑌾𑌶𑍍𑌚 𑌸𑌭𑌾𑌰𑍍𑌯𑌾𑌶𑍍𑌚 𑌸𑌂𑌤𑍍𑌯𑌤𑍍𑌰 𑌵𑌨𑌚𑌾𑌰𑌿𑌣𑌃 ।
𑌲𑍁𑌬𑍍𑌧𑍇𑌭𑍍𑌯𑍋 𑌵𑌿𑌪𑍍𑌰𑌯𑍁𑌕𑍍𑌤𑍇𑌭𑍍𑌯𑌸𑍍𑌤𑍇𑌭𑍍𑌯𑍋 𑌨𑌸𑍍𑌤𑍁𑌮𑍁𑌲𑌂 𑌭𑌯𑌮𑍍 ॥ 16 ॥

𑌅𑌲𑍍𑌪𑌾𑌂𑌤𑌰𑌗𑌤𑌾𑌨𑌾𑌂 𑌤𑍁 𑌶𑍍𑌰𑍁𑌤𑍍𑌵𑌾 𑌵𑌚𑌨𑌮𑌂𑌗𑌨𑌾 ।
𑌆𑌤𑍍𑌮𑌨𑌃 𑌪𑍍𑌰𑌤𑌿𑌰𑍂𑌪𑌂 𑌸𑌾 𑌬𑌭𑌾𑌷𑍇 𑌚𑌾𑌰𑍁𑌹𑌾𑌸𑌿𑌨𑍀 ॥ 1𑍭 ॥

𑌪𑍁𑌤𑍍𑌰𑍇𑌣 𑌮𑌮 𑌕𑌿𑌂 𑌕𑌾𑌰𑍍𑌯𑌂 𑌰𑌾𑌜𑍍𑌯𑍇𑌨𑌚 𑌕𑌿𑌮𑌾𑌤𑍍𑌮𑌨𑌾 ।
𑌕𑌪𑌿𑌸𑌿𑌂𑌹𑍇 𑌮𑌹𑌾𑌭𑌾𑌗𑍇 𑌤𑌸𑍍𑌮𑌿𑌨𑍍𑌭𑌰𑍍𑌤𑌰𑌿 𑌨𑌶𑍍𑌯𑌤𑌿 ॥ 1𑍮 ॥

𑌪𑌾𑌦𑌮𑍂𑌲𑌂 𑌗𑌮𑌿𑌷𑍍𑌯𑌾𑌮𑌿 𑌤𑌸𑍍𑌯𑍈𑌵𑌾𑌹𑌂 𑌮𑌹𑌾𑌤𑍍𑌮𑌨𑌃 ।
𑌯𑍋𑌽𑌸𑍌 𑌰𑌾𑌮𑌪𑍍𑌰𑌯𑍁𑌕𑍍𑌤𑍇𑌨 𑌶𑌰𑍇𑌣 𑌵𑌿𑌨𑌿𑌪𑌾𑌤𑌿𑌤𑌃 ॥ 1𑍯 ॥

𑌏𑌵𑌮𑍁𑌕𑍍𑌤𑍍𑌵𑌾 𑌪𑍍𑌰𑌦𑍁𑌦𑍍𑌰𑌾𑌵 𑌰𑍁𑌦𑌂𑌤𑍀 𑌶𑍋𑌕𑌕𑌰𑍍𑌶𑌿𑌤𑌾 ।
𑌶𑌿𑌰𑌶𑍍𑌚𑍋𑌰𑌶𑍍𑌚 𑌬𑌾𑌹𑍁𑌭𑍍𑌯𑌾𑌂 𑌦𑍁𑌃𑌖𑍇𑌨 𑌸𑌮𑌭𑌿𑌧𑍍𑌨𑌤𑍀 ॥ 20 ॥

𑌆𑌵𑍍𑌰𑌜𑌂𑌤𑍀 𑌦𑌦𑌰𑍍𑌶𑌾𑌥 𑌪𑌤𑌿𑌂 𑌨𑌿𑌪𑌤𑌿𑌤𑌂 𑌭𑍁𑌵𑌿 ।
𑌹𑌂𑌤𑌾𑌰𑌂 𑌦𑌾𑌨𑌵𑍇𑌂𑌦𑍍𑌰𑌾𑌣𑌾𑌂 𑌸𑌮𑌰𑍇𑌷𑍍𑌵𑌨𑌿𑌵𑌰𑍍𑌤𑌿𑌨𑌮𑍍 ॥ 21 ॥

𑌕𑍍𑌷𑍇𑌪𑍍𑌤𑌾𑌰𑌂 𑌪𑌰𑍍𑌵𑌤𑍇𑌂𑌦𑍍𑌰𑌾𑌣𑌾𑌂 𑌵𑌜𑍍𑌰𑌾𑌣𑌾𑌮𑌿𑌵 𑌵𑌾𑌸𑌵𑌮𑍍 ।
𑌮𑌹𑌾𑌵𑌾𑌤𑌸𑌮𑌾𑌵𑌿𑌷𑍍𑌟𑌂 𑌮𑌹𑌾𑌮𑍇𑌘𑍌𑌘𑌨𑌿𑌸𑍍𑌸𑍍𑌵𑌨𑌮𑍍 ॥ 22 ॥

𑌕𑍍𑌰𑌤𑍁𑌲𑍍𑌯𑌪𑌰𑌾𑌕𑍍𑌰𑌾𑌂𑌤𑌂 𑌵𑍃𑌷𑍍𑌟𑌵𑍇𑌵𑍋𑌪𑌰𑌤𑌂 𑌘𑌨𑌮𑍍 ।
𑌨𑌰𑍍𑌦𑌂𑌤𑌂 𑌨𑌰𑍍𑌦𑌤𑌾𑌂 𑌭𑍀𑌮𑌂 𑌶𑍂𑌰𑌂 𑌶𑍂𑌰𑍇𑌣 𑌪𑌾𑌤𑌿𑌤𑌮𑍍 ॥ 23 ॥

𑌶𑌾𑌰𑍍𑌦𑍂𑌲𑍇𑌨𑌾𑌮𑌿𑌷𑌸𑍍𑌯𑌾𑌰𑍍𑌥𑍇 𑌮𑍃𑌗𑌰𑌾𑌜𑌂 𑌯𑌥𑌾𑌹𑌤𑌮𑍍 ।
𑌅𑌰𑍍𑌚𑌿𑌤𑌂 𑌸𑌰𑍍𑌵𑌲𑍋𑌕𑌸𑍍𑌯 𑌸𑌪𑌤𑌾𑌕𑌂 𑌸𑌵𑍇𑌦𑌿𑌕𑌮𑍍 ॥ 24 ॥

𑌨𑌾𑌗𑌹𑍇𑌤𑍋𑌸𑍍𑌸𑍁𑌪𑌰𑍍𑌣𑍇𑌨 𑌚𑍈𑌤𑍍𑌯𑌮𑍁𑌨𑍍𑌮𑌥𑌿𑌤𑌂 𑌯𑌥𑌾 ।
𑌅𑌵𑌷𑍍𑌟𑌭𑍍𑌯 𑌚 𑌤𑌿𑌷𑍍𑌠𑌂𑌤𑌂 𑌦𑌦𑌰𑍍𑌶 𑌧𑌨𑍁𑌰𑍁𑌤𑍍𑌤𑌮𑍍 ॥ 25 ॥

𑌰𑌾𑌮𑌂 𑌰𑌾𑌮𑌾𑌨𑍁𑌜𑌂 𑌚𑍈𑌵 𑌭𑌰𑍍𑌤𑍁𑌶𑍍𑌚𑍈𑌵𑌾𑌨𑍁𑌜𑌂 𑌶𑍁𑌭𑌾 ।
𑌤𑌾𑌵𑌤𑍀𑌤𑍍𑌯 𑌸𑌮𑌾𑌸𑌾𑌦𑍍𑌯 𑌭𑌰𑍍𑌤𑌾𑌰𑌂 𑌨𑌿𑌹𑌤𑌂 𑌰𑌣𑍇 ॥ 26 ॥

𑌸𑌮𑍀𑌕𑍍𑌷𑍍𑌯 𑌵𑍍𑌯𑌥𑌿𑌤𑌾 𑌭𑍂𑌮𑍌 𑌸𑌂𑌭𑍍𑌰𑌾𑌂𑌤𑌾 𑌨𑌿𑌪𑌪𑌾𑌤 𑌹 ।
𑌸𑍁𑌪𑍍𑌤𑍍𑌵𑍇𑌵 𑌪𑍁𑌨𑌰𑍁𑌤𑍍𑌥𑌾𑌯 𑌆𑌰𑍍𑌯𑌪𑍁𑌤𑍍𑌰𑍇𑌤𑌿 𑌶𑍋𑌚𑌤𑍀 ॥ 2𑍭 ॥

𑌰𑍁𑌰𑍋𑌦 𑌸𑌾 𑌪𑌤𑌿𑌂 𑌦𑍃𑌷𑍍𑌟𑍍𑌵𑌾 𑌸𑌂𑌵𑍀𑌤𑌂 𑌮𑍃𑌤𑍍𑌯𑍁𑌦𑌾𑌮𑌭𑌿𑌃 ।
𑌤𑌾𑌮𑌵𑍇𑌕𑍍𑌷𑍍𑌯 𑌤𑍁 𑌸𑍁𑌗𑍍𑌰𑍀𑌵𑌃 𑌕𑍍𑌰𑍋𑌶𑌂𑌤𑍀𑌂 𑌕𑍁𑌰𑌰𑍀𑌮𑌿𑌵 ।
𑌵𑌿𑌷𑌾𑌦𑌮𑌗𑌮𑌤𑍍𑌕𑌷𑍍𑌟𑌂 𑌦𑍃𑌷𑍍𑌟𑍍𑌵𑌾 𑌚𑌾𑌂𑌗𑌦𑌮𑌾𑌗𑌤𑌮𑍍 ॥ 2𑍮 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌏𑌕𑍋𑌨𑌵𑌿𑌂𑌶𑌸𑍍𑌸𑌰𑍍𑌗𑌃 ॥


Browse Related Categories: