𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌿𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌪𑍍𑌰𑌭𑌾𑌤𑌾𑌯𑌾𑌂 𑌤𑍁 𑌶𑌰𑍍𑌵𑌰𑍍𑌯𑌾𑌂 𑌪𑍃𑌥𑍁𑌵𑌕𑍍𑌷𑌾 𑌮𑌹𑌾𑌯𑌶𑌾𑌃 ।
𑌉𑌵𑌾𑌚 𑌰𑌾𑌮𑌃 𑌸𑍌𑌮𑌿𑌤𑍍𑌰𑌿𑌂 𑌲𑌕𑍍𑌷𑍍𑌮𑌣𑌂 𑌶𑍁𑌭𑌲𑌕𑍍𑌷𑌣𑌮𑍍 ॥ 1 ॥
𑌭𑌾𑌸𑍍𑌕𑌰𑍋𑌦𑌯𑌕𑌾𑌲𑍋𑌽𑌯𑌂 𑌗𑌤𑌾 𑌭𑌗𑌵𑌤𑍀 𑌨𑌿𑌶𑌾 ।
𑌅𑌸𑍌 𑌸𑍁𑌕𑍃𑌷𑍍𑌣𑍋 𑌵𑌿𑌹𑌗𑌃 𑌕𑍋𑌕𑌿𑌲𑌸𑍍𑌤𑌾𑌤 𑌕𑍂𑌜𑌤𑌿 ॥ 2 ॥
𑌬𑌰𑍍𑌹𑌿𑌣𑌾𑌨𑌾𑌂 𑌚 𑌨𑌿𑌰𑍍𑌘𑍋𑌷𑌃 𑌶𑍍𑌰𑍂𑌯𑌤𑍇 𑌨𑌦𑌤𑌾𑌂 𑌵𑌨𑍇 ।
𑌤𑌰𑌾𑌮 𑌜𑌾𑌹𑍍𑌨𑌵𑍀𑌂 𑌸𑍌𑌮𑍍𑌯 𑌶𑍀𑌘𑍍𑌰𑌗𑌾𑌂 𑌸𑌾𑌗𑌰𑌂𑌗𑌮𑌾𑌮𑍍 ॥ 3 ॥
𑌵𑌿𑌜𑍍𑌞𑌾𑌯 𑌰𑌾𑌮𑌸𑍍𑌯 𑌵𑌚𑌃 𑌸𑍌𑌮𑌿𑌤𑍍𑌰𑌿𑌰𑍍𑌮𑌿𑌤𑍍𑌰𑌨𑌂𑌦𑌨𑌃 ।
𑌗𑍁𑌹𑌮𑌾𑌮𑌂𑌤𑍍𑌰𑍍𑌯 𑌸𑍂𑌤𑌂 𑌚 𑌸𑍋𑌽𑌤𑌿𑌷𑍍𑌠𑌦𑍍𑌭𑍍𑌰𑌾𑌤𑍁𑌰𑌗𑍍𑌰𑌤𑌃 ॥ 4 ॥
𑌸 𑌤𑍁 𑌰𑌾𑌮𑌸𑍍𑌯 𑌵𑌚𑌨𑌂 𑌨𑌿𑌶𑌮𑍍𑌯 𑌪𑍍𑌰𑌤𑌿𑌗𑍃𑌹𑍍𑌯 𑌚 ।
𑌸𑍍𑌥𑌪𑌤𑌿𑌸𑍍𑌤𑍂𑌰𑍍𑌣𑌮𑌾𑌹𑍂𑌯 𑌸𑌚𑌿𑌵𑌾𑌨𑌿𑌦𑌮𑌬𑍍𑌰𑌵𑍀𑌤𑍍 ॥ 5 ॥
𑌅𑌸𑍍𑌯 𑌵𑌾𑌹𑌨𑌸𑌂𑌯𑍁𑌕𑍍𑌤𑌾𑌂 𑌕𑌰𑍍𑌣𑌗𑍍𑌰𑌾𑌹𑌵𑌤𑍀𑌂 𑌶𑍁𑌭𑌾𑌮𑍍 ।
𑌸𑍁𑌪𑍍𑌰𑌤𑌾𑌰𑌾𑌂 𑌦𑍃𑌢𑌾𑌂 𑌤𑍀𑌰𑍍𑌥𑍇 𑌶𑍀𑌘𑍍𑌰𑌂 𑌨𑌾𑌵𑌮𑍁𑌪𑌾𑌹𑌰 ॥ 6 ॥
𑌤𑌂 𑌨𑌿𑌶𑌮𑍍𑌯 𑌸𑌮𑌾𑌦𑍇𑌶𑌂 𑌗𑍁𑌹𑌾𑌮𑌾𑌤𑍍𑌯𑌗𑌣𑍋 𑌮𑌹𑌾𑌨𑍍 ।
𑌉𑌪𑍋𑌹𑍍𑌯 𑌰𑍁𑌚𑌿𑌰𑌾𑌂 𑌨𑌾𑌵𑌂 𑌗𑍁𑌹𑌾𑌯 𑌪𑍍𑌰𑌤𑍍𑌯𑌵𑍇𑌦𑌯𑌤𑍍 ॥ ॥
𑌤𑌤𑌃 𑌸 𑌪𑍍𑌰𑌾𑌂𑌜𑌲𑌿𑌰𑍍𑌭𑍂𑌤𑍍𑌵𑌾 𑌗𑍁𑌹𑍋 𑌰𑌾𑌘𑌵𑌮𑌬𑍍𑌰𑌵𑍀𑌤𑍍 ।
𑌉𑌪𑌸𑍍𑌥𑌿𑌤𑍇𑌯𑌂 𑌨𑍌𑌰𑍍𑌦𑍇𑌵 𑌭𑍂𑌯𑌃 𑌕𑌿𑌂 𑌕𑌰𑌵𑌾𑌣𑌿 𑌤𑍇 ॥ ॥
𑌤𑌵𑌾𑌮𑌰𑌸𑍁𑌤𑌪𑍍𑌰𑌖𑍍𑌯 𑌤𑌰𑍍𑌤𑍁𑌂 𑌸𑌾𑌗𑌰𑌗𑌾𑌂 𑌨𑌦𑍀𑌮𑍍 ।
𑌨𑍌𑌰𑌿𑌯𑌂 𑌪𑍁𑌰𑍁𑌷𑌵𑍍𑌯𑌾𑌘𑍍𑌰 𑌤𑌾𑌂 𑌤𑍍𑌵𑌮𑌾𑌰𑍋𑌹 𑌸𑍁𑌵𑍍𑌰𑌤 ॥ ॥
𑌅𑌥𑍋𑌵𑌾𑌚 𑌮𑌹𑌾𑌤𑍇𑌜𑌾 𑌰𑌾𑌮𑍋 𑌗𑍁𑌹𑌮𑌿𑌦𑌂 𑌵𑌚𑌃 ।
𑌕𑍃𑌤𑌕𑌾𑌮𑍋𑌽𑌸𑍍𑌮𑌿 𑌭𑌵𑌤𑌾 𑌶𑍀𑌘𑍍𑌰𑌮𑌾𑌰𑍋𑌪𑍍𑌯𑌤𑌾𑌮𑌿𑌤𑌿 ॥ 10 ॥
𑌤𑌤𑌃 𑌕𑌲𑌾𑌪𑌾𑌨𑍍 𑌸𑌨𑍍𑌨𑌹𑍍𑌯 𑌖𑌡𑍍𑌗𑍌 𑌬𑌧𑍍𑌵𑌾 𑌚 𑌧𑌨𑍍𑌵𑌿𑌨𑍌 ।
𑌜𑌗𑍍𑌮𑌤𑍁𑌰𑍍𑌯𑍇𑌨 𑌤𑍌 𑌗𑌂𑌗𑌾𑌂 𑌸𑍀𑌤𑌯𑌾 𑌸𑌹 𑌰𑌾𑌘𑌵𑍌 ॥ 11 ॥
𑌰𑌾𑌮𑌮𑍇𑌵 𑌤𑍁 𑌧𑌰𑍍𑌮𑌜𑍍𑌞𑌮𑍁𑌪𑌗𑌮𑍍𑌯 𑌵𑌿𑌨𑍀𑌤𑌵𑌤𑍍 ।
𑌕𑌿𑌮𑌹𑌂 𑌕𑌰𑌵𑌾𑌣𑍀𑌤𑌿 𑌸𑍂𑌤𑌃 𑌪𑍍𑌰𑌾𑌂𑌜𑌲𑌿𑌰𑌬𑍍𑌰𑌵𑍀𑌤𑍍 ॥ 12 ॥
𑌤𑌤𑍋𑌽𑌬𑍍𑌰𑌵𑍀𑌦𑍍𑌦𑌾𑌶𑌰𑌥𑌿𑌃 𑌸𑍁𑌮𑌂𑌤𑍍𑌰𑌂 𑌸𑍍𑌪𑍃𑌶𑌨𑍍 𑌕𑌰𑍇𑌣𑍋𑌤𑍍𑌤𑌮𑌦𑌕𑍍𑌷𑌿𑌣𑍇𑌨 ।
𑌸𑍁𑌮𑌂𑌤𑍍𑌰 𑌶𑍀𑌘𑍍𑌰𑌂 𑌪𑍁𑌨𑌰𑍇𑌵 𑌯𑌾𑌹𑌿 𑌰𑌾𑌜𑍍𑌞𑌃 𑌸𑌕𑌾𑌶𑍇 𑌭𑌵 𑌚𑌾𑌪𑍍𑌰𑌮𑌤𑍍𑌤𑌃 ॥ 13 ॥
𑌨𑌿𑌵𑌰𑍍𑌤𑌸𑍍𑌵𑍇𑌤𑍍𑌯𑍁𑌵𑌾𑌚𑍈𑌵 𑌹𑍍𑌯𑍇𑌤𑌾𑌵𑌦𑍍𑌧𑌿 𑌕𑍃𑌤𑌂 𑌮𑌮 ।
𑌰𑌥𑌂 𑌵𑌿𑌹𑌾𑌯 𑌪𑌦𑍍𑌭𑍍𑌯𑌾𑌂 𑌤𑍁 𑌗𑌮𑌿𑌷𑍍𑌯𑌾𑌮𑌿 𑌮𑌹𑌾𑌵𑌨𑌮𑍍 ॥ 14 ॥
𑌆𑌤𑍍𑌮𑌾𑌨𑌂 𑌤𑍍𑌵𑌭𑍍𑌯𑌨𑍁𑌜𑍍𑌞𑌾𑌤𑌮𑌵𑍇𑌕𑍍𑌷𑍍𑌯𑌾𑌰𑍍𑌤𑌃 𑌸 𑌸𑌾𑌰𑌥𑌿𑌃 ।
𑌸𑍁𑌮𑌂𑌤𑍍𑌰𑌃 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑌮𑍈𑌕𑍍𑌷𑍍𑌵𑌾𑌕𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 15 ॥
𑌨𑌾𑌤𑌿𑌕𑍍𑌰𑌾𑌂𑌤𑌮𑌿𑌦𑌂 𑌲𑍋𑌕𑍇 𑌪𑍁𑌰𑍁𑌷𑍇𑌣𑍇𑌹 𑌕𑍇𑌨𑌚𑌿𑌤𑍍 ।
𑌤𑌵 𑌸𑌭𑍍𑌰𑌾𑌤𑍃𑌭𑌾𑌰𑍍𑌯𑌸𑍍𑌯 𑌵𑌾𑌸𑌃 𑌪𑍍𑌰𑌾𑌕𑍃𑌤𑌵𑌦𑍍𑌵𑌨𑍇 ॥ 16 ॥
𑌨 𑌮𑌨𑍍𑌯𑍇 𑌬𑍍𑌰𑌹𑍍𑌮𑌚𑌰𑍍𑌯𑍇𑌽𑌸𑍍𑌤𑌿 𑌸𑍍𑌵𑌧𑍀𑌤𑍇 𑌵𑌾 𑌫𑌲𑍋𑌦𑌯𑌃 ।
𑌮𑌾𑌰𑍍𑌦𑌵𑌾𑌰𑍍𑌜𑌵𑌯𑍋𑌰𑍍𑌵𑌾𑌪𑌿 𑌤𑍍𑌵𑌾𑌂 𑌚𑍇𑌦𑍍𑌵𑍍𑌯𑌸𑌨𑌮𑌾𑌗𑌤𑌮𑍍 ॥ 1 ॥
𑌸𑌹 𑌰𑌾𑌘𑌵 𑌵𑍈𑌦𑍇𑌹𑍍𑌯𑌾 𑌭𑍍𑌰𑌾𑌤𑍍𑌰𑌾 𑌚𑍈𑌵 𑌵𑌨𑍇 𑌵𑌸𑌨𑍍 ।
𑌤𑍍𑌵𑌂 𑌗𑌤𑌿𑌂 𑌪𑍍𑌰𑌾𑌪𑍍𑌸𑍍𑌯𑌸𑍇 𑌵𑍀𑌰 𑌤𑍍𑌰𑍀𑌨𑍍 𑌲𑍋𑌕𑌾𑌂𑌸𑍍𑌤𑍁 𑌜𑌯𑌨𑍍𑌨𑌿𑌵 ॥ 1 ॥
𑌵𑌯𑌂 𑌖𑌲𑍁 𑌹𑌤𑌾 𑌰𑌾𑌮 𑌯𑍇 𑌤𑍍𑌵𑌯𑌾𑌪𑍍𑌯𑍁𑌪𑌵𑌂𑌚𑌿𑌤𑌾𑌃 ।
𑌕𑍈𑌕𑍇𑌯𑍍𑌯𑌾 𑌵𑌶𑌮𑍇𑌷𑍍𑌯𑌾𑌮𑌃 𑌪𑌾𑌪𑌾𑌯𑌾 𑌦𑍁𑌃𑌖𑌭𑌾𑌗𑌿𑌨𑌃 ॥ 1 ॥
𑌇𑌤𑌿 𑌬𑍍𑌰𑍁𑌵𑌨𑍍𑌨𑌾𑌤𑍍𑌮𑌸𑌮𑌂 𑌸𑍁𑌮𑌂𑌤𑍍𑌰𑌃 𑌸𑌾𑌰𑌥𑌿𑌸𑍍𑌤𑌦𑌾 ।
𑌦𑍃𑌷𑍍𑌟𑍍𑌵𑌾 𑌦𑍂𑌰𑌗𑌤𑌂 𑌰𑌾𑌮𑌂 𑌦𑍁𑌃𑌖𑌾𑌰𑍍𑌤𑍋 𑌰𑍁𑌰𑍁𑌦𑍇 𑌚𑌿𑌰𑌮𑍍 ॥ 20 ॥
𑌤𑌤𑌸𑍍𑌤𑍁 𑌵𑌿𑌗𑌤𑍇 𑌬𑌾𑌷𑍍𑌪𑍇 𑌸𑍂𑌤𑌂 𑌸𑍍𑌪𑍃𑌷𑍍𑌟𑍋𑌦𑌕𑌂 𑌶𑍁𑌚𑌿𑌮𑍍 ।
𑌰𑌾𑌮𑌸𑍍𑌤𑍁 𑌮𑌧𑍁𑌰𑌂 𑌵𑌾𑌕𑍍𑌯𑌂 𑌪𑍁𑌨𑌃 𑌪𑍁𑌨𑌰𑍁𑌵𑌾𑌚 𑌤𑌮𑍍 ॥ 21 ॥
𑌇𑌕𑍍𑌷𑍍𑌵𑌾𑌕𑍂𑌣𑌾𑌂 𑌤𑍍𑌵𑌯𑌾 𑌤𑍁𑌲𑍍𑌯𑌂 𑌸𑍁𑌹𑍃𑌦𑌂 𑌨𑍋𑌪𑌲𑌕𑍍𑌷𑌯𑍇 ।
𑌯𑌥𑌾 𑌦𑌶𑌰𑌥𑍋 𑌰𑌾𑌜𑌾 𑌮𑌾𑌂 𑌨 𑌶𑍋𑌚𑍇𑌤𑍍𑌤𑌥𑌾 𑌕𑍁𑌰𑍁 ॥ 22 ॥
𑌶𑍋𑌕𑍋𑌪𑌹𑌤𑌚𑍇𑌤𑌾𑌶𑍍𑌚 𑌵𑍃𑌦𑍍𑌧𑌶𑍍𑌚 𑌜𑌗𑌤𑍀𑌪𑌤𑌿𑌃 ।
𑌕𑌾𑌮𑌭𑌾𑌵𑌾𑌵𑌸𑌨𑍍𑌨𑌶𑍍𑌚 𑌤𑌸𑍍𑌮𑌾𑌦𑍇𑌤𑌦𑍍𑌬𑍍𑌰𑌵𑍀𑌮𑌿 𑌤𑍇 ॥ 23 ॥
𑌯𑌦𑍍𑌯𑌦𑌾𑌜𑍍𑌞𑌾𑌪𑌯𑍇𑌤𑍍𑌕𑌿𑌂𑌚𑌿𑌤𑍍𑌸 𑌮𑌹𑌾𑌤𑍍𑌮𑌾 𑌮𑌹𑍀𑌪𑌤𑌿𑌃 ।
𑌕𑍈𑌕𑍇𑌯𑍍𑌯𑌾𑌃 𑌪𑍍𑌰𑌿𑌯𑌕𑌾𑌮𑌾𑌰𑍍𑌥𑌂 𑌕𑌾𑌰𑍍𑌯𑌂 𑌤𑌦𑌵𑌿𑌕𑌾𑌂𑌕𑍍𑌷𑌯𑌾 ॥ 24 ॥
𑌏𑌤𑌦𑌰𑍍𑌥𑌂 𑌹𑌿 𑌰𑌾𑌜𑍍𑌯𑌾𑌨𑌿 𑌪𑍍𑌰𑌶𑌾𑌸𑌤𑌿 𑌨𑌰𑍇𑌶𑍍𑌵𑌰𑌾𑌃 ।
𑌯𑌦𑍇𑌷𑌾𑌂 𑌸𑌰𑍍𑌵𑌕𑍃𑌤𑍍𑌯𑍇𑌷𑍁 𑌮𑌨𑍋 𑌨 𑌪𑍍𑌰𑌤𑌿𑌹𑌨𑍍𑌯𑌤𑍇 ॥ 25 ॥
𑌯𑌦𑍍𑌯𑌥𑌾 𑌸 𑌮𑌹𑌾𑌰𑌾𑌜𑍋 𑌨𑌾𑌲𑍀𑌕𑌮𑌧𑌿𑌗𑌚𑍍𑌛𑌤𑌿 ।
𑌨 𑌚 𑌤𑌾𑌮𑍍𑌯𑌤𑌿 𑌦𑍁𑌃𑌖𑍇𑌨 𑌸𑍁𑌮𑌂𑌤𑍍𑌰 𑌕𑍁𑌰𑍁 𑌤𑌤𑍍𑌤𑌥𑌾 ॥ 26 ॥
𑌅𑌦𑍃𑌷𑍍𑌟𑌦𑍁𑌃𑌖𑌂 𑌰𑌾𑌜𑌾𑌨𑌂 𑌵𑍃𑌦𑍍𑌧𑌮𑌾𑌰𑍍𑌯𑌂 𑌜𑌿𑌤𑍇𑌂𑌦𑍍𑌰𑌿𑌯𑌮𑍍 ।
𑌬𑍍𑌰𑍂𑌯𑌾𑌸𑍍𑌤𑍍𑌵𑌮𑌭𑌿𑌵𑌾𑌦𑍍𑌯𑍈𑌵 𑌮𑌮 𑌹𑍇𑌤𑍋𑌰𑌿𑌦𑌂 𑌵𑌚𑌃 ॥ 2 ॥
𑌨𑍈𑌵𑌾𑌹𑌮𑌨𑍁𑌶𑍋𑌚𑌾𑌮𑌿 𑌲𑌕𑍍𑌷𑍍𑌮𑌣𑍋 𑌨 𑌚 𑌮𑍈𑌥𑌿𑌲𑍀 ।
𑌅𑌯𑍋𑌧𑍍𑌯𑌾𑌯𑌾𑌶𑍍𑌚𑍍𑌯𑍁𑌤𑌾𑌶𑍍𑌚𑍇𑌤𑌿 𑌵𑌨𑍇 𑌵𑌤𑍍𑌸𑍍𑌯𑌾𑌮𑌹𑍇𑌤𑌿 𑌚 ॥ 2 ॥
𑌚𑌤𑍁𑌰𑍍𑌦𑌶𑌸𑍁 𑌵𑌰𑍍𑌷𑍇𑌷𑍁 𑌨𑌿𑌵𑍃𑌤𑍍𑌤𑍇𑌷𑍁 𑌪𑍁𑌨𑌃 𑌪𑍁𑌨𑌃 ।
𑌲𑌕𑍍𑌷𑍍𑌮𑌣𑌂 𑌮𑌾𑌂 𑌚 𑌸𑍀𑌤𑌾𑌂 𑌚 𑌦𑍍𑌰𑌕𑍍𑌷𑍍𑌯𑌸𑍇 𑌕𑍍𑌷𑌿𑌪𑍍𑌰𑌮𑌾𑌗𑌤𑌾𑌨𑍍 ॥ 2 ॥
𑌏𑌵𑌮𑍁𑌕𑍍𑌤𑍍𑌵𑌾 𑌤𑍁 𑌰𑌾𑌜𑌾𑌨𑌂 𑌮𑌾𑌤𑌰𑌂 𑌚 𑌸𑍁𑌮𑌂𑌤𑍍𑌰 𑌮𑍇 ।
𑌅𑌨𑍍𑌯𑌾𑌶𑍍𑌚 𑌦𑍇𑌵𑍀𑌸𑍍𑌸𑌹𑌿𑌤𑌾𑌃 𑌕𑍈𑌕𑍇𑌯𑍀𑌂 𑌚 𑌪𑍁𑌨𑌃 𑌪𑍁𑌨𑌃 ॥ 30 ॥
𑌆𑌰𑍋𑌗𑍍𑌯𑌂 𑌬𑍍𑌰𑍂𑌹𑌿 𑌕𑍌𑌶𑌲𑍍𑌯𑌾𑌮𑌥 𑌪𑌾𑌦𑌾𑌭𑌿𑌵𑌂𑌦𑌨𑌮𑍍 ।
𑌸𑍀𑌤𑌾𑌯𑌾 𑌮𑌮 𑌚𑌾𑌽𑌽𑌰𑍍𑌯𑌸𑍍𑌯 𑌵𑌚𑌨𑌾𑌲𑍍𑌲𑌕𑍍𑌷𑍍𑌮𑌣𑌸𑍍𑌯 𑌚 ॥ 31 ॥
𑌬𑍍𑌰𑍂𑌯𑌾𑌶𑍍𑌚 𑌹𑌿 𑌮𑌹𑌾𑌰𑌾𑌜𑌂 𑌭𑌰𑌤𑌂 𑌕𑍍𑌷𑌿𑌪𑍍𑌰𑌮𑌾𑌨𑌯 ।
𑌆𑌗𑌤𑌶𑍍𑌚𑌾𑌪𑌿 𑌭𑌰𑌤𑌃 𑌸𑍍𑌥𑌾𑌪𑍍𑌯𑍋 𑌨𑍃𑌪𑌮𑌤𑍇 𑌪𑌦𑍇 ॥ 32 ॥
𑌭𑌰𑌤𑌂 𑌚 𑌪𑌰𑌿𑌷𑍍𑌵𑌜𑍍𑌯 𑌯𑍌𑌵𑌰𑌾𑌜𑍍𑌯𑍇𑌽𑌭𑌿𑌷𑌿𑌚𑍍𑌯 𑌚 ।
𑌅𑌸𑍍𑌮𑌤𑍍𑌸𑌂𑌤𑌾𑌪𑌜𑌂 𑌦𑍁𑌃𑌖𑌂 𑌨 𑌤𑍍𑌵𑌾𑌮𑌭𑌿𑌭𑌵𑌿𑌷𑍍𑌯𑌤𑌿 ॥ 33 ॥
𑌭𑌰𑌤𑌶𑍍𑌚𑌾𑌪𑌿 𑌵𑌕𑍍𑌤𑌵𑍍𑌯𑍋 𑌯𑌥𑌾 𑌰𑌾𑌜𑌨𑌿 𑌵𑌰𑍍𑌤𑌸𑍇 ।
𑌤𑌥𑌾 𑌮𑌾𑌤𑍃𑌷𑍁 𑌵𑌰𑍍𑌤𑍇𑌥𑌾𑌃 𑌸𑌰𑍍𑌵𑌾𑌸𑍍𑌵𑍇𑌵𑌾𑌵𑌿𑌶𑍇𑌷𑌤𑌃 ॥ 34 ॥
𑌤𑌾𑌤𑌸𑍍𑌯 𑌪𑍍𑌰𑌿𑌯𑌕𑌾𑌮𑍇𑌨 𑌯𑍌𑌵𑌰𑌾𑌜𑍍𑌯𑌮𑌪𑍇𑌕𑍍𑌷𑌤𑌾 ।
𑌲𑍋𑌕𑌯𑍋𑌰𑍁𑌭𑌯𑍋𑌃 𑌶𑌕𑍍𑌯𑌂 𑌤𑍍𑌵𑌯𑌾 𑌯𑌤𑍍𑌸𑍁𑌖𑌮𑍇𑌧𑌿𑌤𑍁𑌮𑍍 ॥ 35 ॥
𑌨𑌿𑌵𑌰𑍍𑌤𑍍𑌯𑌮𑌾𑌨𑍋 𑌰𑌾𑌮𑍇𑌣 𑌸𑍁𑌮𑌂𑌤𑍍𑌰𑌃 𑌶𑍋𑌕𑌕𑌰𑍍𑌶𑌿𑌤𑌃 ।
𑌤𑌤𑍍𑌸𑌰𑍍𑌵𑌂 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌸𑍍𑌨𑍇𑌹𑌾𑌤𑍍𑌕𑌾𑌕𑍁𑌤𑍍𑌸𑍍𑌥𑌮𑌬𑍍𑌰𑌵𑍀𑌤𑍍 ॥ 36 ॥
𑌯𑌦𑌹𑌂 𑌨𑍋𑌪𑌚𑌾𑌰𑍇𑌣 𑌬𑍍𑌰𑍂𑌯𑌾𑌂 𑌸𑍍𑌨𑍇𑌹𑌾𑌦𑌵𑌿𑌕𑍍𑌲𑌬𑌃 ।
𑌭𑌕𑍍𑌤𑌿𑌮𑌾𑌨𑌿𑌤𑌿 𑌤𑌤𑍍𑌤𑌾𑌵𑌦𑍍𑌵𑌾𑌕𑍍𑌯𑌂 𑌤𑍍𑌵𑌂 𑌕𑍍𑌷𑌂𑌤𑍁𑌮𑌰𑍍𑌹𑌸𑌿 ॥ 3 ॥
𑌕𑌥𑌂 𑌹𑌿 𑌤𑍍𑌵𑌦𑍍𑌵𑌿𑌹𑍀𑌨𑍋𑌽𑌹𑌂 𑌪𑍍𑌰𑌤𑌿𑌯𑌾𑌸𑍍𑌯𑌾𑌮𑌿 𑌤𑌾𑌂 𑌪𑍁𑌰𑍀𑌮𑍍 ।
𑌤𑌵 𑌤𑌾𑌵𑌦𑍍𑌵𑌿𑌯𑍋𑌗𑍇𑌨 𑌪𑍁𑌤𑍍𑌰𑌶𑍋𑌕𑌾𑌕𑍁𑌲𑌾𑌮𑌿𑌵 ॥ 3 ॥
𑌸𑌰𑌾𑌮𑌮𑌪𑌿 𑌤𑌾𑌵𑌨𑍍𑌮𑍇 𑌰𑌥𑌂 𑌦𑍃𑌷𑍍𑌟𑍍𑌵𑌾 𑌤𑌦𑌾 𑌜𑌨𑌃 ।
𑌵𑌿𑌨𑌾 𑌰𑌾𑌮𑌂 𑌰𑌥𑌂 𑌦𑍃𑌷𑍍𑌟𑍍𑌵𑌾 𑌵𑌿𑌦𑍀𑌰𑍍𑌯𑍇𑌤𑌾𑌪𑌿 𑌸𑌾 𑌪𑍁𑌰𑍀 ॥ 3 ॥
𑌦𑍈𑌨𑍍𑌯𑌂 𑌹𑌿 𑌨𑌗𑌰𑍀 𑌗𑌚𑍍𑌛𑍇𑌦𑍍𑌦𑍃𑌷𑍍𑌟𑍍𑌵𑌾 𑌶𑍂𑌨𑍍𑌯𑌮𑌿𑌮𑌂 𑌰𑌥𑌮𑍍 ।
𑌸𑍂𑌤𑌾𑌵𑌶𑍇𑌷𑌂 𑌸𑍍𑌵𑌂 𑌸𑍈𑌨𑍍𑌯𑌂 𑌹𑌤𑌵𑍀𑌰𑌮𑌿𑌵𑌾𑌽𑌹𑌵𑍇 ॥ 40 ॥
𑌦𑍂𑌰𑍇𑌽𑌪𑌿 𑌨𑌿𑌵𑌸𑌂𑌤𑌂 𑌤𑍍𑌵𑌾𑌂 𑌮𑌾𑌨𑌸𑍇𑌨𑌾𑌗𑍍𑌰𑌤𑌃 𑌸𑍍𑌥𑌿𑌤𑌮𑍍 ।
𑌚𑌿𑌂𑌤𑌯𑌂𑌤𑍋𑌽𑌦𑍍𑌯 𑌨𑍂𑌨𑌂 𑌤𑍍𑌵𑌾𑌂 𑌨𑌿𑌰𑌾𑌹𑌾𑌰𑌾𑌃 𑌕𑍃𑌤𑌾𑌃 𑌪𑍍𑌰𑌜𑌾𑌃 ॥ 41 ॥
𑌦𑍃𑌷𑍍𑌟𑌂 𑌤𑌦𑍍𑌧𑌿 𑌤𑍍𑌵𑌯𑌾 𑌰𑌾𑌮 𑌯𑌾𑌦𑍃𑌶𑌂 𑌤𑍍𑌵𑌤𑍍𑌪𑍍𑌰𑌵𑌾𑌸𑌨𑍇 ।
𑌪𑍍𑌰𑌜𑌾𑌨𑌾𑌂 𑌸𑌂𑌕𑍁𑌲𑌂 𑌵𑍃𑌤𑍍𑌤𑌂 𑌤𑍍𑌵𑌚𑍍𑌛𑍋𑌕𑌕𑍍𑌲𑌾𑌂𑌤𑌚𑍇𑌤𑌸𑌾𑌮𑍍 ॥ 42 ॥
𑌆𑌰𑍍𑌤𑌨𑌾𑌦𑍋 𑌹𑌿 𑌯𑌃 𑌪𑍌𑌰𑍈𑌰𑍍𑌮𑍁𑌕𑍍𑌤𑌸𑍍𑌤𑍍𑌵𑌦𑍍𑌵𑌿𑌪𑍍𑌰𑌵𑌾𑌸𑌨𑍇 ।
𑌸𑌰𑌥𑌂 𑌮𑌾𑌂 𑌨𑌿𑌶𑌾𑌮𑍍𑌯𑍈𑌵 𑌕𑍁𑌰𑍍𑌯𑍁𑌃 𑌶𑌤𑌗𑍁𑌣𑌂 𑌤𑌤𑌃 ॥ 43 ॥
𑌅𑌹𑌂 𑌕𑌿𑌂 𑌚𑌾𑌪𑌿 𑌵𑌕𑍍𑌷𑍍𑌯𑌾𑌮𑌿 𑌦𑍇𑌵𑍀𑌂 𑌤𑌵 𑌸𑍁𑌤𑍋 𑌮𑌯𑌾 ।
𑌨𑍀𑌤𑍋𑌽𑌸𑍌 𑌮𑌾𑌤𑍁𑌲𑌕𑍁𑌲𑌂 𑌸𑌂𑌤𑌾𑌪𑌂 𑌮𑌾 𑌕𑍃𑌥𑌾 𑌇𑌤𑌿 ॥ 44 ॥
𑌅𑌸𑌤𑍍𑌯𑌮𑌪𑌿 𑌨𑍈𑌵𑌾𑌹𑌂 𑌬𑍍𑌰𑍂𑌯𑌾𑌂 𑌵𑌚𑌨𑌮𑍀𑌦𑍃𑌶𑌮𑍍 ।
𑌕𑌥𑌮𑌪𑍍𑌰𑌿𑌯𑌮𑍇𑌵𑌾𑌹𑌂 𑌬𑍍𑌰𑍂𑌯𑌾𑌂 𑌸𑌤𑍍𑌯𑌮𑌿𑌦𑌂 𑌵𑌚𑌃 ॥ 45 ॥
𑌮𑌮 𑌤𑌾𑌵𑌨𑍍𑌨𑌿𑌯𑍋𑌗𑌸𑍍𑌥𑌾𑌸𑍍𑌤𑍍𑌵𑌦𑍍𑌬𑌂𑌧𑍁𑌜𑌨𑌵𑌾𑌹𑌿𑌨𑌃 ।
𑌕𑌥𑌂 𑌰𑌥𑌂 𑌤𑍍𑌵𑌯𑌾 𑌹𑍀𑌨𑌂 𑌪𑍍𑌰𑌵𑌕𑍍𑌷𑍍𑌯𑌂𑌤𑌿 𑌹𑌯𑍋𑌤𑍍𑌤𑌮𑌾𑌃 ॥ 46 ॥
𑌤𑌨𑍍𑌨 𑌶𑌕𑍍𑌷𑍍𑌯𑌾𑌮𑍍𑌯𑌹𑌂 𑌗𑌂𑌤𑍁𑌮𑌯𑍋𑌧𑍍𑌯𑌾𑌂 𑌤𑍍𑌵𑌦𑍃𑌤𑍇𑌽𑌨𑌘 ।
𑌵𑌨𑌵𑌾𑌸𑌾𑌨𑍁𑌯𑌾𑌨𑌾𑌯 𑌮𑌾𑌮𑌨𑍁𑌜𑍍𑌞𑌾𑌤𑍁𑌮𑌰𑍍𑌹𑌸𑌿 ॥ 4 ॥
𑌯𑌦𑌿 𑌮𑍇 𑌯𑌾𑌚𑌮𑌾𑌨𑌸𑍍𑌯 𑌤𑍍𑌯𑌾𑌗𑌮𑍇𑌵 𑌕𑌰𑌿𑌷𑍍𑌯𑌸𑌿 ।
𑌸𑌰𑌥𑍋𑌽𑌗𑍍𑌨𑌿𑌂 𑌪𑍍𑌰𑌵𑍇𑌕𑍍𑌷𑍍𑌯𑌾𑌮𑌿 𑌤𑍍𑌯𑌕𑍍𑌤𑌮𑌾𑌤𑍍𑌰 𑌇𑌹 𑌤𑍍𑌵𑌯𑌾 ॥ 4 ॥
𑌭𑌵𑌿𑌷𑍍𑌯𑌂𑌤𑌿 𑌵𑌨𑍇 𑌯𑌾𑌨𑌿 𑌤𑌪𑍋𑌵𑌿𑌘𑍍𑌨𑌕𑌰𑌾𑌣𑌿 𑌤𑍇 ।
𑌰𑌥𑍇𑌨 𑌪𑍍𑌰𑌤𑌿𑌬𑌾𑌧𑌿𑌷𑍍𑌯𑍇 𑌤𑌾𑌨𑌿 𑌸𑌤𑍍𑌤𑍍𑌵𑌾𑌨𑌿 𑌰𑌾𑌘𑌵 ॥ 4 ॥
𑌤𑍍𑌵𑌤𑍍𑌕𑍃𑌤𑍇 𑌨 𑌮𑌯𑌾𑌽𑌵𑌾𑌪𑍍𑌤𑌂 𑌰𑌥𑌚𑌰𑍍𑌯𑌾𑌕𑍃𑌤𑌂 𑌸𑍁𑌖𑌮𑍍 ।
𑌆𑌶𑌂𑌸𑍇 𑌤𑍍𑌵𑌤𑍍𑌕𑍃𑌤𑍇 𑌨𑌾𑌹𑌂 𑌵𑌨𑌵𑌾𑌸𑌕𑍃𑌤𑌂 𑌸𑍁𑌖𑌮𑍍 ॥ 50 ॥
𑌪𑍍𑌰𑌸𑍀𑌦𑍇𑌚𑍍𑌛𑌾𑌮𑌿 𑌤𑍇𑌽𑌰𑌣𑍍𑌯𑍇 𑌭𑌵𑌿𑌤𑍁𑌂 𑌪𑍍𑌰𑌤𑍍𑌯𑌨𑌂𑌤𑌰𑌃 ।
𑌪𑍍𑌰𑍀𑌤𑍍𑌯𑌾𑌽𑌭𑌿𑌹𑌿𑌤𑌮𑌿𑌚𑍍𑌛𑌾𑌮𑌿 𑌭𑌵 𑌮𑍇 𑌪𑍍𑌰𑌤𑍍𑌯𑌨𑌂𑌤𑌰𑌃 ॥ 51 ॥
𑌇𑌮𑍇 𑌚𑌾𑌪𑌿 𑌹𑌯𑌾 𑌵𑍀𑌰 𑌯𑌦𑌿 𑌤𑍇 𑌵𑌨𑌵𑌾𑌸𑌿𑌨𑌃 ।
𑌪𑌰𑌿𑌚𑌰𑍍𑌯𑌾𑌂 𑌕𑌰𑌿𑌷𑍍𑌯𑌂𑌤𑌿 𑌪𑍍𑌰𑌾𑌪𑍍𑌸𑍍𑌯𑌂𑌤𑌿 𑌪𑌰𑌮𑌾𑌂 𑌗𑌤𑌿𑌮𑍍 ॥ 52 ॥
𑌤𑌵 𑌶𑍁𑌶𑍍𑌰𑍂𑌷𑌣𑌂 𑌮𑍂𑌰𑍍𑌧𑍍𑌨𑌾 𑌕𑌰𑌿𑌷𑍍𑌯𑌾𑌮𑌿 𑌵𑌨𑍇 𑌵𑌸𑌨𑍍 ।
𑌅𑌯𑍋𑌧𑍍𑌯𑌾𑌂 𑌦𑍇𑌵𑌲𑍋𑌕𑌂 𑌵𑌾 𑌸𑌰𑍍𑌵𑌥𑌾 𑌪𑍍𑌰𑌜𑌹𑌾𑌮𑍍𑌯𑌹𑌮𑍍 ॥ 53 ॥
𑌨 𑌹𑌿 𑌶𑌕𑍍𑌯𑌾 𑌪𑍍𑌰𑌵𑍇𑌷𑍍𑌟𑍁𑌂 𑌸𑌾 𑌮𑌯𑌾𑌽𑌯𑍋𑌧𑍍𑌯𑌾 𑌤𑍍𑌵𑌯𑌾 𑌵𑌿𑌨𑌾 ।
𑌰𑌾𑌜𑌧𑌾𑌨𑍀 𑌮𑌹𑍇𑌂𑌦𑍍𑌰𑌸𑍍𑌯 𑌯𑌥𑌾 𑌦𑍁𑌷𑍍𑌕𑍃𑌤𑌕𑌰𑍍𑌮𑌣𑌾 ॥ 54 ॥
𑌵𑌨𑌵𑌾𑌸𑍇 𑌕𑍍𑌷𑌯𑌂 𑌪𑍍𑌰𑌾𑌪𑍍𑌤𑍇 𑌮𑌮𑍈𑌷 𑌹𑌿 𑌮𑌨𑍋𑌰𑌥𑌃 ।
𑌯𑌦𑌨𑍇𑌨 𑌰𑌥𑍇𑌨𑍈𑌵 𑌤𑍍𑌵𑌾𑌂 𑌵𑌹𑍇𑌯𑌂 𑌪𑍁𑌰𑍀𑌂 𑌪𑍁𑌨𑌃 ॥ 55 ॥
𑌚𑌤𑍁𑌰𑍍𑌦𑌶 𑌹𑌿 𑌵𑌰𑍍𑌷𑌾𑌣𑌿 𑌸𑌹𑌿𑌤𑌸𑍍𑌯 𑌤𑍍𑌵𑌯𑌾 𑌵𑌨𑍇 ।
𑌕𑍍𑌷𑌣𑌭𑍂𑌤𑌾𑌨𑌿 𑌯𑌾𑌸𑍍𑌯𑌂𑌤𑌿 𑌶𑌤𑌸𑌂𑌖𑍍𑌯𑌾𑌨𑍍𑌯𑌤𑍋𑌽𑌨𑍍𑌯𑌥𑌾 ॥ 56 ॥
𑌭𑍃𑌤𑍍𑌯𑌵𑌤𑍍𑌸𑌲 𑌤𑌿𑌷𑍍𑌠𑌂𑌤𑌂 𑌭𑌰𑍍𑌤𑍃𑌪𑍁𑌤𑍍𑌰𑌗𑌤𑍇 𑌪𑌥𑌿 ।
𑌭𑌕𑍍𑌤𑌂 𑌭𑍃𑌤𑍍𑌯𑌂 𑌸𑍍𑌥𑌿𑌤𑌂 𑌸𑍍𑌥𑌿𑌤𑍍𑌯𑌾𑌂 𑌤𑍍𑌵𑌂 𑌨 𑌮𑌾𑌂 𑌹𑌾𑌤𑍁𑌮𑌰𑍍𑌹𑌸𑌿 ॥ 5 ॥
𑌏𑌵𑌂 𑌬𑌹𑍁𑌵𑌿𑌧𑌂 𑌦𑍀𑌨𑌂 𑌯𑌾𑌚𑌮𑌾𑌨𑌂 𑌪𑍁𑌨𑌃 𑌪𑍁𑌨𑌃 ।
𑌰𑌾𑌮𑍋 𑌭𑍃𑌤𑍍𑌯𑌾𑌨𑍁𑌕𑌂𑌪𑍀 𑌤𑍁 𑌸𑍁𑌮𑌂𑌤𑍍𑌰𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 5 ॥
𑌜𑌾𑌨𑌾𑌮𑌿 𑌪𑌰𑌮𑌾𑌂 𑌭𑌕𑍍𑌤𑌿𑌂 𑌮𑌯𑌿 𑌤𑍇 𑌭𑌰𑍍𑌤𑍃𑌵𑌤𑍍𑌸𑌲 ।
𑌶𑍃𑌣𑍁 𑌚𑌾𑌪𑌿 𑌯𑌦𑌰𑍍𑌥𑌂 𑌤𑍍𑌵𑌾𑌂 𑌪𑍍𑌰𑍇𑌷𑌯𑌾𑌮𑌿 𑌪𑍁𑌰𑍀𑌮𑌿𑌤𑌃 ॥ 5 ॥
𑌨𑌗𑌰𑍀𑌂 𑌤𑍍𑌵𑌾𑌂 𑌗𑌤𑌂 𑌦𑍃𑌷𑍍𑌟𑍍𑌵𑌾 𑌜𑌨𑌨𑍀 𑌮𑍇 𑌯𑌵𑍀𑌯𑌸𑍀 ।
𑌕𑍈𑌕𑍇𑌯𑍀 𑌪𑍍𑌰𑌤𑍍𑌯𑌯𑌂 𑌗𑌚𑍍𑌛𑍇𑌦𑌿𑌤𑌿 𑌰𑌾𑌮𑍋 𑌵𑌨𑌂 𑌗𑌤𑌃 ॥ 60 ॥
𑌪𑌰𑌿𑌤𑍁𑌷𑍍𑌟𑌾 𑌹𑌿 𑌸𑌾 𑌦𑍇𑌵𑍀 𑌵𑌨𑌵𑌾𑌸𑌂 𑌗𑌤𑍇 𑌮𑌯𑌿 ।
𑌰𑌾𑌜𑌾𑌨𑌂 𑌨𑌾𑌤𑌿𑌶𑌂𑌕𑍇𑌤 '𑌮𑌿𑌥𑍍𑌯𑌾𑌵𑌾𑌦𑍀'𑌤𑌿 𑌧𑌾𑌰𑍍𑌮𑌿𑌕𑌮𑍍 ॥ 61 ॥
𑌏𑌷 𑌮𑍇 𑌪𑍍𑌰𑌥𑌮𑌃 𑌕𑌲𑍍𑌪𑍋 𑌯𑌦𑌂𑌬𑌾 𑌮𑍇 𑌯𑌵𑍀𑌯𑌸𑍀 ।
𑌭𑌰𑌤𑌾𑌰𑌕𑍍𑌷𑌿𑌤𑌂 𑌸𑍍𑌫𑍀𑌤𑌂 𑌪𑍁𑌤𑍍𑌰𑌰𑌾𑌜𑍍𑌯𑌮𑌵𑌾𑌪𑍍𑌨𑍁𑌯𑌾𑌤𑍍 ॥ 62 ॥
𑌮𑌮 𑌪𑍍𑌰𑌿𑌯𑌾𑌰𑍍𑌥𑌂 𑌰𑌾𑌜𑍍𑌞𑌶𑍍𑌚 𑌸𑌰𑌥𑌸𑍍𑌤𑍍𑌵𑌂 𑌪𑍁𑌰𑍀𑌂 𑌵𑍍𑌰𑌜 ।
𑌸𑌂𑌦𑌿𑌷𑍍𑌟𑌶𑍍𑌚𑌾𑌸𑌿 𑌯𑌾𑌨𑌰𑍍𑌥𑌾𑌂𑌸𑍍𑌤𑌾𑌂 𑌸𑍍𑌤𑌾𑌨𑍍 𑌬𑍍𑌰𑍂𑌯𑌾𑌸𑍍𑌤𑌥𑌾 𑌤𑌥𑌾 ॥ 63 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌵𑌚𑌨𑌂 𑌸𑍂𑌤𑌂 𑌸𑌾𑌂𑌤𑍍𑌵𑌯𑌿𑌤𑍍𑌵𑌾 𑌪𑍁𑌨𑌃 𑌪𑍁𑌨𑌃 ।
𑌗𑍁𑌹𑌂 𑌵𑌚𑌨𑌮𑌕𑍍𑌲𑍀𑌬𑍋 𑌰𑌾𑌮𑍋 𑌹𑍇𑌤𑍁𑌮𑌦𑌬𑍍𑌰𑌵𑍀𑌤𑍍 ॥ 64 ॥
𑌨𑍇𑌦𑌾𑌨𑍀𑌂 𑌗𑍁𑌹 𑌯𑍋𑌗𑍍𑌯𑍋𑌽𑌯𑌂 𑌵𑌾𑌸𑍋 𑌮𑍇 𑌸𑌜𑌨𑍇 𑌵𑌨𑍇 ।
𑌆𑌵𑌶𑍍𑌯𑌂 𑌹𑍍𑌯𑌾𑌶𑍍𑌰𑌮𑍇 𑌵𑌾𑌸𑌃 𑌕𑌰𑍍𑌤𑌵𑍍𑌯𑌸𑍍𑌤𑌦𑍍𑌗𑌤𑍋 𑌵𑌿𑌧𑌿𑌃 ॥ 65 ॥
𑌸𑍋𑌽𑌹𑌂 𑌗𑍃𑌹𑍀𑌤𑍍𑌵𑌾 𑌨𑌿𑌯𑌮𑌂 𑌤𑌪𑌸𑍍𑌵𑌿 𑌜𑌨𑌭𑍂𑌷𑌣𑌮𑍍 ।
𑌹𑌿𑌤𑌕𑌾𑌮𑌃 𑌪𑌿𑌤𑍁𑌰𑍍𑌭𑍂𑌯𑌃 𑌸𑍀𑌤𑌾𑌯𑌾 𑌲𑌕𑍍𑌷𑍍𑌮𑌣𑌸𑍍𑌯 𑌚 ॥ 66 ॥
𑌜𑌟𑌾𑌃 𑌕𑍃𑌤𑍍𑌵𑌾 𑌗𑌮𑌿𑌷𑍍𑌯𑌾𑌮𑌿 𑌨𑍍𑌯𑌗𑍍𑌰𑍋𑌧𑌕𑍍𑌷𑍀𑌰𑌮𑌾𑌨𑌯 ।
𑌤𑌤𑍍 𑌕𑍍𑌷𑍀𑌰𑌂 𑌰𑌾𑌜𑌪𑍁𑌤𑍍𑌰𑌾𑌯 𑌗𑍁𑌹𑌃 𑌕𑍍𑌷𑌿𑌪𑍍𑌰𑌮𑍁𑌪𑌾𑌹𑌰𑌤𑍍 ॥ 6 ॥
𑌲𑌕𑍍𑌷𑍍𑌮𑌣𑌸𑍍𑌯𑌾𑌤𑍍𑌮𑌨𑌶𑍍𑌚𑍈𑌵 𑌰𑌾𑌮𑌸𑍍𑌤𑍇𑌨𑌾𑌕𑌰𑍋𑌜𑍍𑌜𑌟𑌾𑌃 ।
𑌦𑍀𑌰𑍍𑌘𑌬𑌾𑌹𑍁𑌰𑍍𑌨𑌰𑌵𑍍𑌯𑌾𑌘𑍍𑌰𑍋 𑌜𑌟𑌿𑌲𑌤𑍍𑌵𑌮𑌧𑌾𑌰𑌯𑌤𑍍 ॥ 6 ॥
𑌤𑍌 𑌤𑌦𑌾 𑌚𑍀𑌰𑌵𑌸𑌨𑍌 𑌜𑌟𑌾𑌮𑌂𑌡𑌲𑌧𑌾𑌰𑌿𑌣𑍌 ।
𑌆𑌶𑍋𑌭𑍇𑌤𑌾𑌮𑍃𑌷𑌿𑌸𑌮𑍌 𑌭𑍍𑌰𑌾𑌤𑌰𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ 6 ॥
𑌤𑌤𑍋 𑌵𑍈𑌖𑌾𑌨𑌸𑌂 𑌮𑌾𑌰𑍍𑌗𑌮𑌾𑌸𑍍𑌥𑌿𑌤𑌃 𑌸𑌹 𑌲𑌕𑍍𑌷𑍍𑌮𑌣𑌃 ।
𑌵𑍍𑌰𑌤𑌮𑌾𑌦𑌿𑌷𑍍𑌟𑌵𑌾𑌨𑍍 𑌰𑌾𑌮𑌃 𑌸𑌖𑌾𑌯𑌂 𑌗𑍁𑌹𑌮𑌬𑍍𑌰𑌵𑍀𑌤𑍍 ॥ 0 ॥
𑌅𑌪𑍍𑌰𑌮𑌤𑍍𑌤𑍋 𑌬𑌲𑍇 𑌕𑍋𑌶𑍇 𑌦𑍁𑌰𑍍𑌗𑍇 𑌜𑌨𑌪𑌦𑍇 𑌤𑌥𑌾 ।
𑌭𑌵𑍇𑌥𑌾 𑌗𑍁𑌹 𑌰𑌾𑌜𑍍𑌯𑌂 𑌹𑌿 𑌦𑍁𑌰𑌾𑌰𑌕𑍍𑌷𑌤𑌮𑌂 𑌮𑌤𑌮𑍍 ॥ 1 ॥
𑌤𑌤𑌸𑍍𑌤𑌂 𑌸𑌮𑌨𑍁𑌜𑍍𑌞𑌾𑌯 𑌗𑍁𑌹𑌮𑌿𑌕𑍍𑌷𑍍𑌵𑌾𑌕𑍁𑌨𑌂𑌦𑌨𑌃 ।
𑌜𑌗𑌾𑌮 𑌤𑍂𑌰𑍍𑌣𑌮𑌵𑍍𑌯𑌗𑍍𑌰𑌃 𑌸𑌭𑌾𑌰𑍍𑌯𑌃 𑌸𑌹 𑌲𑌕𑍍𑌷𑍍𑌮𑌣𑌃 ॥ 2 ॥
𑌸 𑌤𑍁 𑌦𑍃𑌷𑍍𑌟𑍍𑌵𑌾 𑌨𑌦𑍀𑌤𑍀𑌰𑍇 𑌨𑌾𑌵𑌮𑌿𑌕𑍍𑌷𑍍𑌵𑌾𑌕𑍁𑌨𑌂𑌦𑌨𑌃 ।
𑌤𑌿𑌤𑍀𑌰𑍍𑌷𑍁𑌃 𑌶𑍀𑌘𑍍𑌰𑌗𑌾𑌂 𑌗𑌂𑌗𑌾𑌮𑌿𑌦𑌂 𑌲𑌕𑍍𑌷𑍍𑌮𑌣𑌮𑌬𑍍𑌰𑌵𑍀𑌤𑍍 ॥ 3 ॥
𑌆𑌰𑍋𑌹 𑌤𑍍𑌵𑌂 𑌨𑌰𑌵𑍍𑌯𑌾𑌘𑍍𑌰 𑌸𑍍𑌥𑌿𑌤𑌾𑌂 𑌨𑌾𑌵𑌮𑌿𑌮𑌾𑌂 𑌶𑌨𑍈𑌃 ।
𑌸𑍀𑌤𑌾𑌂 𑌚𑌾𑌰𑍋𑌪𑌯𑌾𑌨𑍍𑌵𑌕𑍍𑌷𑌂 𑌪𑌰𑌿𑌗𑍃𑌹𑍍𑌯 𑌮𑌨𑌸𑍍𑌵𑌿𑌨𑍀𑌮𑍍 ॥ 4 ॥
𑌸 𑌭𑍍𑌰𑌾𑌤𑍁𑌃 𑌶𑌾𑌸𑌨𑌂 𑌶𑍍𑌰𑍁𑌤𑍍𑌵𑌾 𑌸𑌰𑍍𑌵𑌮𑌪𑍍𑌰𑌤𑌿𑌕𑍂𑌲𑌯𑌨𑍍 ।
𑌆𑌰𑍋𑌪𑍍𑌯 𑌮𑍈𑌥𑌿𑌲𑍀𑌂 𑌪𑍂𑌰𑍍𑌵𑌮𑌾𑌰𑍁𑌰𑍋𑌹𑌾𑌽𑌽𑌤𑍍𑌮𑌵𑌾𑌂 𑌸𑍍𑌤𑌤𑌃 ॥ 5 ॥
𑌅𑌥𑌾𑌰𑍁𑌰𑍋𑌹 𑌤𑍇𑌜𑌸𑍍𑌵𑍀 𑌸𑍍𑌵𑌯𑌂 𑌲𑌕𑍍𑌷𑍍𑌮𑌣𑌪𑍂𑌰𑍍𑌵𑌜𑌃 ।
𑌤𑌤𑍋 𑌨𑌿𑌷𑌾𑌦𑌾𑌧𑌿𑌪𑌤𑌿𑌰𑍍𑌗𑍁𑌹𑍋 𑌜𑍍𑌞𑌾𑌤𑍀𑌨𑌚𑍋𑌦𑌯𑌤𑍍 ॥ 6 ॥
𑌰𑌾𑌘𑌵𑍋𑌽𑌪𑌿 𑌮𑌹𑌾𑌤𑍇𑌜𑌾 𑌨𑌾𑌵𑌮𑌾𑌰𑍁𑌹𑍍𑌯 𑌤𑌾𑌂 𑌤𑌤𑌃 ।
𑌬𑍍𑌰𑌹𑍍𑌮𑌵𑌤𑍍 𑌕𑍍𑌷𑌤𑍍𑌰𑌵𑌚𑍍𑌚𑍈𑌵 𑌜𑌜𑌾𑌪 𑌹𑌿𑌤𑌮𑌾𑌤𑍍𑌮𑌨𑌃 ॥ ॥
𑌆𑌚𑌮𑍍𑌯 𑌚 𑌯𑌥𑌾𑌶𑌾𑌸𑍍𑌤𑍍𑌰𑌂 𑌨𑌦𑍀𑌂 𑌤𑌾𑌂 𑌸𑌹 𑌸𑍀𑌤𑌯𑌾 ।
𑌪𑍍𑌰𑌾𑌣𑌮𑌤𑍍𑌪𑍍𑌰𑍀𑌤𑌿𑌸𑌂𑌹𑍃𑌷𑍍𑌟𑍋 𑌲𑌕𑍍𑌷𑍍𑌮𑌣𑌶𑍍𑌚𑌾𑌮𑌿𑌤𑌪𑍍𑌰𑌭𑌃 ॥ ॥
𑌅𑌨𑍁𑌜𑍍𑌞𑌾𑌯 𑌸𑍁𑌮𑌂𑌤𑍍𑌰𑌂 𑌚 𑌸𑌬𑌲𑌂 𑌚𑍈𑌵 𑌤𑌂 𑌗𑍁𑌹𑌮𑍍 ।
𑌆𑌸𑍍𑌥𑌾𑌯 𑌨𑌾𑌵𑌂 𑌰𑌾𑌮𑌸𑍍𑌤𑍁 𑌚𑍋𑌦𑌯𑌾𑌮𑌾𑌸 𑌨𑌾𑌵𑌿𑌕𑌾𑌨𑍍 ॥ ॥
𑌤𑌤𑌸𑍍𑌤𑍈𑌶𑍍𑌚𑍋𑌦𑌿𑌤𑌾 𑌸𑌾 𑌨𑍌𑌃 𑌕𑌰𑍍𑌣𑌧𑌾𑌰𑌸𑌮𑌾𑌹𑌿𑌤𑌾 ।
𑌶𑍁𑌭𑌸𑍍𑌫𑍍𑌯𑌵𑍇𑌗𑌾𑌭𑌿𑌹𑌤𑌾 𑌶𑍀𑌘𑍍𑌰𑌂 𑌸𑌲𑌿𑌲𑌮𑌤𑍍𑌯𑌗𑌾𑌤𑍍 ॥ 0 ॥
. ।
𑌮𑌧𑍍𑌯𑌂 𑌤𑍁 𑌸𑌮𑌨𑍁𑌪𑍍𑌰𑌾𑌪𑍍𑌯 𑌭𑌾𑌗𑍀𑌰𑌥𑍍𑌯𑌾𑌸𑍍𑌤𑍍𑌵𑌨𑌿𑌂𑌦𑌿𑌤𑌾 ।
𑌵𑍈𑌦𑍇𑌹𑍀 𑌪𑍍𑌰𑌾𑌂𑌜𑌲𑌿𑌰𑍍𑌭𑍂𑌤𑍍𑌵𑌾 𑌤𑌾𑌂 𑌨𑌦𑍀𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 1 ॥
𑌪𑍁𑌤𑍍𑌰𑍋 𑌦𑌶𑌰𑌥𑌸𑍍𑌯𑌾𑌯𑌂 𑌮𑌹𑌾𑌰𑌾𑌜𑌸𑍍𑌯 𑌧𑍀𑌮𑌤𑌃 ।
𑌨𑌿𑌦𑍇𑌶𑌂 𑌪𑌾𑌰𑌯𑌿𑌤𑍍𑌵𑍇𑌮𑌂 𑌗𑌂𑌗𑍇 𑌤𑍍𑌵𑌦𑌭𑌿𑌰𑌕𑍍𑌷𑌿𑌤𑌃 ॥ 2 ॥
𑌚𑌤𑍁𑌰𑍍𑌦𑌶 𑌹𑌿 𑌵𑌰𑍍𑌷𑌾𑌣𑌿 𑌸𑌮𑌗𑍍𑌰𑌾𑌣𑍍𑌯𑍁𑌷𑍍𑌯 𑌕𑌾𑌨𑌨𑍇 ।
𑌭𑍍𑌰𑌾𑌤𑍍𑌰𑌾 𑌸𑌹 𑌮𑌯𑌾 𑌚𑍈𑌵 𑌪𑍁𑌨𑌃 𑌪𑍍𑌰𑌤𑍍𑌯𑌾𑌗𑌮𑌿𑌷𑍍𑌯𑌤𑌿 ॥ 3 ॥
𑌤𑌤𑌸𑍍𑌤𑍍𑌵𑌾𑌂 𑌦𑍇𑌵𑌿 𑌸𑍁𑌭𑌗𑍇 𑌕𑍍𑌷𑍇𑌮𑍇𑌣 𑌪𑍁𑌨𑌰𑌾𑌗𑌤𑌾 ।
𑌯𑌕𑍍𑌷𑍍𑌯𑍇 𑌪𑍍𑌰𑌮𑍁𑌦𑌿𑌤𑌾 𑌗𑌂𑌗𑍇 𑌸𑌰𑍍𑌵𑌕𑌾𑌮𑌸𑌮𑍃𑌦𑍍𑌧𑌿𑌨𑍀 ॥ 4 ॥
𑌤𑍍𑌵𑌂 𑌹𑌿 𑌤𑍍𑌰𑌿𑌪𑌥𑌗𑌾 𑌦𑍇𑌵𑌿 𑌬𑍍𑌰𑌹𑍍𑌮𑌲𑍋𑌕𑌂 𑌸𑌮𑍀𑌕𑍍𑌷𑌸𑍇 ।
𑌭𑌾𑌰𑍍𑌯𑌾 𑌚𑍋𑌦𑌧𑌿𑌰𑌾𑌜𑌸𑍍𑌯 𑌲𑍋𑌕𑍇𑌽𑌸𑍍𑌮𑌿𑌨𑍍 𑌸𑌂𑌪𑍍𑌰𑌦𑍃𑌶𑍍𑌯𑌸𑍇 ॥ 5 ॥
𑌸𑌾 𑌤𑍍𑌵𑌾𑌂 𑌦𑍇𑌵𑌿 𑌨𑌮𑌸𑍍𑌯𑌾𑌮𑌿 𑌪𑍍𑌰𑌶𑌂𑌸𑌾𑌮𑌿 𑌚 𑌶𑍋𑌭𑌨𑍇 ।
𑌪𑍍𑌰𑌾𑌪𑍍𑌤𑌰𑌾𑌜𑍍𑌯𑍇 𑌨𑌰𑌵𑍍𑌯𑌾𑌘𑍍𑌰𑍇 𑌶𑌿𑌵𑍇𑌨 𑌪𑍁𑌨𑌰𑌾𑌗𑌤𑍇 ॥ 6 ॥
𑌗𑌵𑌾𑌂 𑌶𑌤𑌸𑌹𑌸𑍍𑌰𑌾𑌣𑌿 𑌵𑌸𑍍𑌤𑍍𑌰𑌾𑌣𑍍𑌯𑌨𑍍𑌨𑌂 𑌚 𑌪𑍇𑌶𑌲𑌮𑍍 ।
𑌬𑍍𑌰𑌾𑌹𑍍𑌮𑌣𑍇𑌭𑍍𑌯𑌃 𑌪𑍍𑌰𑌦𑌾𑌸𑍍𑌯𑌾𑌮𑌿 𑌤𑌵 𑌪𑍍𑌰𑌿𑌯𑌚𑌿𑌕𑍀𑌰𑍍𑌷𑌯𑌾 ॥ ॥
𑌸𑍁𑌰𑌾𑌘𑌟𑌸𑌹𑌸𑍍𑌰𑍇𑌣 𑌮𑌾𑌂𑌸𑌭𑍂𑌤𑍌𑌦𑌨𑍇𑌨 𑌚 ।
𑌯𑌕𑍍𑌷𑍍𑌯𑍇 𑌤𑍍𑌵𑌾𑌂 𑌪𑍍𑌰𑌯𑌤𑌾 𑌦𑍇𑌵𑌿 𑌪𑍁𑌰𑍀𑌂 𑌪𑍁𑌨𑌰𑍁𑌪𑌾𑌗𑌤𑌾 ॥ ॥
𑌯𑌾𑌨𑌿 𑌤𑍍𑌵𑌤𑍍𑌤𑍀𑌰𑌵𑌾𑌸𑍀𑌨𑌿 𑌦𑍈𑌵𑌤𑌾𑌨𑌿 𑌚 𑌸𑌂𑌤𑌿 𑌹𑌿 ।
𑌤𑌾𑌨𑌿 𑌸𑌰𑍍𑌵𑌾𑌣𑌿 𑌯𑌕𑍍𑌷𑍍𑌯𑌾𑌮𑌿 𑌤𑍀𑌰𑍍𑌥𑌾𑌨𑍍𑌯𑌾𑌯𑌤𑌨𑌾𑌨𑌿 𑌚 ॥ ॥
𑌪𑍁𑌨𑌰𑍇𑌵 𑌮𑌹𑌾𑌬𑌾𑌹𑍁𑌰𑍍𑌮𑌯𑌾 𑌭𑍍𑌰𑌾𑌤𑍍𑌰𑌾 𑌚 𑌸𑌂𑌗𑌤𑌃 ।
𑌅𑌯𑍋𑌧𑍍𑌯𑌾𑌂 𑌵𑌨𑌵𑌾𑌸𑌾𑌤𑍍𑌤𑍁 𑌪𑍍𑌰𑌵𑌿𑌶𑌤𑍍𑌵𑌨𑌘𑍋𑌽𑌨𑌘𑍇 ॥ 0 ॥
𑌤𑌥𑌾 𑌸𑌂𑌭𑌾𑌷𑌮𑌾𑌣𑌾 𑌸𑌾 𑌸𑍀𑌤𑌾 𑌗𑌂𑌗𑌾𑌮𑌨𑌿𑌂𑌦𑌿𑌤𑌾 ।
𑌦𑌕𑍍𑌷𑌿𑌣𑌾 𑌦𑌕𑍍𑌷𑌿𑌣𑌂 𑌤𑍀𑌰𑌂 𑌕𑍍𑌷𑌿𑌪𑍍𑌰𑌮𑍇𑌵𑌾𑌭𑍍𑌯𑍁𑌪𑌾𑌗𑌮𑌤𑍍 ॥ 1 ॥
𑌤𑍀𑌰𑌂 𑌤𑍁 𑌸𑌮𑌨𑍁𑌪𑍍𑌰𑌾𑌪𑍍𑌯 𑌨𑌾𑌵𑌂 𑌹𑌿𑌤𑍍𑌵𑌾 𑌨𑌰𑌰𑍍𑌷𑌭𑌃 ।
𑌪𑍍𑌰𑌾𑌤𑌿𑌷𑍍𑌠𑌤 𑌸𑌹 𑌭𑍍𑌰𑌾𑌤𑍍𑌰𑌾 𑌵𑍈𑌦𑍇𑌹𑍍𑌯𑌾 𑌚 𑌪𑌰𑌂𑌤𑌪𑌃 ॥ 2 ॥
𑌅𑌥𑌾𑌬𑍍𑌰𑌵𑍀𑌨𑍍𑌮𑌹𑌾𑌬𑌾𑌹𑍁𑌃 𑌸𑍁𑌮𑌿𑌤𑍍𑌰𑌾𑌨𑌂𑌦𑌵𑌰𑍍𑌧𑌨𑌮𑍍 ।
𑌭𑌵 𑌸𑌂𑌰𑌕𑍍𑌷𑌣𑌾𑌰𑍍𑌥𑌾𑌯 𑌸𑌜𑌨𑍇 𑌵𑌿𑌜𑌨𑍇𑌽𑌪𑌿 𑌵𑌾 ॥ 3 ॥
𑌅𑌵𑌶𑍍𑌯𑌂 𑌰𑌕𑍍𑌷𑌣𑌂 𑌕𑌾𑌰𑍍𑌯𑌮𑌦𑍃𑌷𑍍𑌟𑍇 𑌵𑌿𑌜𑌨𑍇 𑌵𑌨𑍇 ।
𑌅𑌗𑍍𑌰𑌤𑍋 𑌗𑌚𑍍𑌛 𑌸𑍌𑌮𑌿𑌤𑍍𑌰𑍇 𑌸𑍀𑌤𑌾 𑌤𑍍𑌵𑌾𑌮𑌨𑍁𑌗𑌚𑍍𑌛𑌤𑍁 ॥ 4 ॥
𑌪𑍃𑌷𑍍𑌠𑌤𑍋𑌽𑌹𑌂 𑌗𑌮𑌿𑌷𑍍𑌯𑌾𑌮𑌿 𑌤𑍍𑌵𑌾𑌂 𑌚 𑌸𑍀𑌤𑌾𑌂 𑌚 𑌪𑌾𑌲𑌯𑌨𑍍 ।
𑌅𑌨𑍍𑌯𑍋𑌨𑍍𑌯𑌸𑍍𑌯𑍇𑌹 𑌨𑍋 𑌰𑌕𑍍𑌷𑌾 𑌕𑌰𑍍𑌤𑌵𑍍𑌯𑌾 𑌪𑍁𑌰𑍁𑌷𑌰𑍍𑌷𑌭 ॥ 5 ॥
𑌨 𑌹𑌿 𑌤𑌾𑌵𑌦𑌤𑌿𑌕𑍍𑌰𑌾𑌂𑌤𑌾 𑌸𑍁𑌕𑌰𑌾 𑌕𑌾𑌚𑌨 𑌕𑍍𑌰𑌿𑌯𑌾 ।
𑌅𑌦𑍍𑌯 𑌦𑍁𑌃𑌖𑌂 𑌤𑍁 𑌵𑍈𑌦𑍇𑌹𑍀 𑌵𑌨𑌵𑌾𑌸𑌸𑍍𑌯 𑌵𑍇𑌤𑍍𑌸𑍍𑌯𑌤𑌿 ॥ 6 ॥
𑌪𑍍𑌰𑌣𑌷𑍍𑌟𑌜𑌨𑌸𑌂𑌬𑌾𑌧𑌂 𑌕𑍍𑌷𑍇𑌤𑍍𑌰𑌾𑌰𑌾𑌮𑌵𑌿𑌵𑌰𑍍𑌜𑌿𑌤𑌮𑍍 ।
𑌵𑌿𑌷𑌮𑌂 𑌚 𑌪𑍍𑌰𑌪𑌾𑌤𑌂 𑌚 𑌵𑌨𑌮𑌦𑍍𑌯 𑌪𑍍𑌰𑌵𑍇𑌕𑍍𑌷𑍍𑌯𑌤𑌿 ॥ ॥
𑌶𑍍𑌰𑍁𑌤𑍍𑌵𑌾 𑌰𑌾𑌮𑌸𑍍𑌯 𑌵𑌚𑌨𑌂 𑌪𑍍𑌰𑌤𑌸𑍍𑌥𑍇 𑌲𑌕𑍍𑌷𑍍𑌮𑌣𑍋𑌽𑌗𑍍𑌰𑌤𑌃 ।
𑌅𑌨𑌂𑌤𑌰𑌂 𑌚 𑌸𑍀𑌤𑌾𑌯𑌾 𑌰𑌾𑌘𑌵𑍋 𑌰𑌘𑍁𑌨𑌂𑌦𑌨𑌃 ॥ ॥
𑌗𑌤𑌂 𑌤𑍁 𑌗𑌂𑌗𑌾𑌪𑌰𑌪𑌾𑌰𑌮𑌾𑌶𑍁 𑌰𑌾𑌮𑌂 𑌸𑍁𑌮𑌂𑌤𑍍𑌰𑌃 𑌪𑍍𑌰𑌤𑌤𑌂 𑌨𑌿𑌰𑍀𑌕𑍍𑌷𑍍𑌯 ।
𑌅𑌧𑍍𑌵𑌪𑍍𑌰𑌕𑌰𑍍𑌷𑌾𑌦𑍍𑌵𑌿𑌨𑌿𑌵𑍃𑌤𑍍𑌤𑌦𑍃𑌷𑍍𑌟𑌿 𑌰𑍍𑌮𑍁𑌮𑍋𑌚 𑌬𑌾𑌷𑍍𑌪𑌂 𑌵𑍍𑌯𑌥𑌿𑌤 𑌸𑍍𑌤𑌪𑌸𑍍𑌵𑍀 ॥ ॥
𑌸 𑌲𑍋𑌕𑌪𑌾𑌲𑌪𑍍𑌰𑌤𑌿𑌮𑌪𑍍𑌰𑌭𑌾𑌵𑌵𑌾𑌂 𑌸𑍍𑌤𑍀𑌰𑍍𑌤𑍍𑌵𑌾 𑌮𑌹𑌾𑌤𑍍𑌮𑌾 𑌵𑌰𑌦𑍋 𑌮𑌹𑌾𑌨𑌦𑍀𑌮𑍍 ।
𑌤𑌤𑌃 𑌸𑌮𑍃𑌦𑍍𑌧𑌾𑌨𑍍 𑌶𑍁𑌭𑌸𑌸𑍍𑌯𑌮𑌾𑌲𑌿𑌨𑌃 𑌕𑍍𑌰𑌮𑍇𑌣 𑌵𑌤𑍍𑌸𑌾𑌨𑍍 𑌮𑍁𑌦𑌿𑌤𑌾𑌨𑍁𑌪𑌾𑌗𑌮𑌤𑍍 ॥ 100 ॥
𑌤𑍌 𑌤𑌤𑍍𑌰 𑌹𑌤𑍍𑌵𑌾 𑌚𑌤𑍁𑌰𑍋 𑌮𑌹𑌾𑌮𑍃𑌗𑌾𑌨𑍍 𑌵𑌰𑌾𑌹𑌮𑍃𑌶𑍍𑌯𑌂 𑌪𑍃𑌷𑌤𑌂 𑌮𑌹𑌾𑌰𑍁𑌰𑍁𑌮𑍍 ।
𑌆𑌦𑌾𑌯 𑌮𑍇𑌧𑍍𑌯𑌂 𑌤𑍍𑌵𑌰𑌿𑌤𑌂 𑌬𑍁𑌭𑍁𑌕𑍍𑌷𑌿𑌤𑍌 𑌵𑌾𑌸𑌾𑌯 𑌕𑌾𑌲𑍇 𑌯𑌯𑌤𑍁𑌰𑍍𑌵𑌨𑌸𑍍𑌪𑌤𑌿𑌮𑍍 ॥ 101 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌦𑍍𑌵𑌿𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
