𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌉𑌪𑌾𑌸𑍍𑌯 𑌰𑌾𑌤𑍍𑌰𑌿𑌶𑍇𑌷𑌂 𑌤𑍁 𑌶𑍋𑌣𑌾𑌕𑍂𑌲𑍇 𑌮𑌹𑌰𑍍𑌷𑌿𑌭𑌿𑌃 ।
𑌨𑌿𑌶𑌾𑌯𑌾𑌂 𑌸𑍁𑌪𑍍𑌰𑌭𑌾𑌤𑌾𑌯𑌾𑌂 𑌵𑌿𑌶𑍍𑌵𑌾𑌮𑌿𑌤𑍍𑌰𑍋𑌽𑌭𑍍𑌯𑌭𑌾𑌷𑌤 ॥ 1 ॥
𑌸𑍁𑌪𑍍𑌰𑌭𑌾𑌤𑌾 𑌨𑌿𑌶𑌾 𑌰𑌾𑌮 𑌪𑍂𑌰𑍍𑌵𑌾 𑌸𑌂𑌧𑍍𑌯𑌾 𑌪𑍍𑌰𑌵𑌰𑍍𑌤𑌤𑍇 ।
𑌉𑌤𑍍𑌤𑌿𑌷𑍍𑌠𑍋𑌤𑍍𑌤𑌿𑌷𑍍𑌠 𑌭𑌦𑍍𑌰𑌂 𑌤𑍇 𑌗𑌮𑌨𑌾𑌯𑌾𑌭𑌿𑌰𑍋𑌚𑌯 ॥ 2 ॥
𑌤𑌚𑍍𑌛𑍍𑌰𑍁𑌤𑍍𑌵𑌾 𑌵𑌚𑌨𑌂 𑌤𑌸𑍍𑌯 𑌕𑍃𑌤𑍍𑌵𑌾 𑌪𑍌𑌰𑍍𑌵𑌾𑌹𑍍𑌣𑌿𑌕𑍀𑌂 𑌕𑍍𑌰𑌿𑌯𑌾𑌮𑍍 ।
𑌗𑌮𑌨𑌂 𑌰𑍋𑌚𑌯𑌾𑌮𑌾𑌸 𑌵𑌾𑌕𑍍𑌯𑌂 𑌚𑍇𑌦𑌮𑍁𑌵𑌾𑌚 𑌹 ॥ 3 ॥
𑌅𑌯𑌂 𑌶𑍋𑌣𑌶𑍍𑌶𑍁𑌭𑌜𑌲𑍋𑌽𑌗𑌾𑌧𑌃 𑌪𑍁𑌲𑌿𑌨𑌮𑌂𑌡𑌿𑌤𑌃 ।
𑌕𑌤𑌰𑍇𑌣 𑌪𑌥𑌾 𑌬𑍍𑌰𑌹𑍍𑌮𑌨𑍍 𑌸𑌂𑌤𑌰𑌿𑌷𑍍𑌯𑌾𑌮𑌹𑍇 𑌵𑌯𑌮𑍍 ॥ 4 ॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌰𑌾𑌮𑍇𑌣 𑌵𑌿𑌶𑍍𑌵𑌾𑌮𑌿𑌤𑍍𑌰𑍋𑌽𑌬𑍍𑌰𑌵𑍀𑌦𑌿𑌦𑌮𑍍 ।
𑌏𑌷 𑌪𑌂𑌥𑌾 𑌮𑌯𑍋𑌦𑍍𑌦𑌿𑌷𑍍𑌟𑍋 𑌯𑍇𑌨 𑌯𑌾𑌂𑌤𑌿 𑌮𑌹𑌰𑍍𑌷𑌯𑌃 ॥ 5 ॥
𑌏𑌵𑌮𑍁𑌕𑍍𑌤𑌾 𑌮𑌹𑌰𑍍𑌷𑌯𑍋 𑌵𑌿𑌶𑍍𑌵𑌾𑌮𑌿𑌤𑍍𑌰𑍇𑌣 𑌧𑍀𑌮𑌤𑌾 ।
𑌪𑌶𑍍𑌯𑌂𑌤𑌸𑍍𑌤𑍇 𑌪𑍍𑌰𑌯𑌾𑌤𑌾 𑌵𑍈 𑌵𑌨𑌾𑌨𑌿 𑌵𑌿𑌵𑌿𑌧𑌾𑌨𑌿 𑌚 ॥ 6 ॥
𑌤𑍇 𑌗𑌤𑍍𑌵𑌾 𑌦𑍂𑌰𑌮𑌧𑍍𑌵𑌾𑌨𑌂 𑌗𑌤𑍇𑌽𑌰𑍍𑌧𑌦𑌿𑌵𑌸𑍇 𑌤𑌦𑌾 ।
𑌜𑌾𑌹𑍍𑌨𑌵𑍀𑌂 𑌸𑌰𑌿𑌤𑌾𑌂 𑌶𑍍𑌰𑍇𑌷𑍍𑌠𑌾𑌂 𑌦𑌦𑍃𑌶𑍁𑌰𑍍𑌮𑍁𑌨𑌿𑌸𑍇𑌵𑌿𑌤𑌾𑌮𑍍 ॥ ॥
𑌤𑌾𑌂 𑌦𑍃𑌷𑍍𑌟𑍍𑌵𑌾 𑌪𑍁𑌣𑍍𑌯𑌸𑌲𑌿𑌲𑌾𑌂 𑌹𑌂𑌸𑌸𑌾𑌰𑌸𑌸𑍇𑌵𑌿𑌤𑌾𑌮𑍍 ।
𑌬𑌭𑍂𑌵𑍁𑌰𑍍𑌮𑍁𑌦𑌿𑌤𑌾 𑌸𑍍𑌸𑌰𑍍𑌵𑍇 𑌮𑍁𑌨𑌯𑌸𑍍𑌸𑌹 𑌰𑌾𑌘𑌵𑌾𑌃 ॥ ॥
𑌤𑌸𑍍𑌯𑌾𑌸𑍍𑌤𑍀𑌰𑍇 𑌤𑌤𑌶𑍍𑌚𑌕𑍍𑌰𑍁𑌸𑍍𑌤 𑌆𑌵𑌾𑌸𑌪𑌰𑌿𑌗𑍍𑌰𑌹𑌮𑍍 ।
𑌤𑌤𑌸𑍍𑌸𑍍𑌨𑌾𑌤𑍍𑌵𑌾 𑌯𑌥𑌾𑌨𑍍𑌯𑌾𑌯𑌂 𑌸𑌂𑌤𑌰𑍍𑌪𑍍𑌯 𑌪𑌿𑌤𑍃𑌦𑍇𑌵𑌤𑌾𑌃 ॥ ॥
𑌹𑍁𑌤𑍍𑌵𑌾 𑌚𑍈𑌵𑌾𑌗𑍍𑌨𑌿𑌹𑍋𑌤𑍍𑌰𑌾𑌣𑌿 𑌪𑍍𑌰𑌾𑌶𑍍𑌯 𑌚𑌾𑌮𑍃𑌤𑌵𑌦𑍍𑌧𑌵𑌿𑌃 ।
𑌵𑌿𑌵𑌿𑌶𑍁𑌰𑍍𑌜𑌾𑌹𑍍𑌨𑌵𑍀𑌤𑍀𑌰𑍇 𑌶𑍁𑌚𑍌 𑌮𑍁𑌦𑌿𑌤𑌮𑌾𑌨𑌸𑌾𑌃 ॥ 10 ॥
𑌵𑌿𑌶𑍍𑌵𑌾𑌮𑌿𑌤𑍍𑌰𑌂 𑌮𑌹𑌾𑌤𑍍𑌮𑌾𑌨𑌂 𑌪𑌰𑌿𑌵𑌾𑌰𑍍𑌯 𑌸𑌮𑌂𑌤𑌤𑌃 ।
𑌅𑌥 𑌤𑌤𑍍𑌰 𑌤𑌦𑌾 𑌰𑌾𑌮𑍋 𑌵𑌿𑌶𑍍𑌵𑌾𑌮𑌿𑌤𑍍𑌰𑌮𑌥𑌾𑌬𑍍𑌰𑌵𑍀𑌤𑍍 ॥ 11 ॥
𑌭𑌗𑌵𑌨𑍍 𑌶𑍍𑌰𑍋𑌤𑍁𑌮𑌿𑌚𑍍𑌛𑌾𑌮𑌿 𑌗𑌂𑌗𑌾𑌂 𑌤𑍍𑌰𑌿𑌪𑌥𑌗𑌾𑌂 𑌨𑌦𑍀𑌮𑍍 ।
𑌤𑍍𑌰𑍈𑌲𑍋𑌕𑍍𑌯𑌂 𑌕𑌥𑌮𑌾𑌕𑍍𑌰𑌮𑍍𑌯 𑌗𑌤𑌾 𑌨𑌦𑌨𑌦𑍀𑌪𑌤𑌿𑌮𑍍 ॥ 12 ॥
𑌚𑍋𑌦𑌿𑌤𑍋 𑌰𑌾𑌮𑌵𑌾𑌕𑍍𑌯𑍇𑌨 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌮𑍁𑌨𑌿𑌃 ।
𑌵𑍃𑌦𑍍𑌧𑌿𑌂 𑌜𑌨𑍍𑌮 𑌚 𑌗𑌂𑌗𑌾𑌯𑌾 𑌵𑌕𑍍𑌤𑍁𑌮𑍇𑌵𑍋𑌪𑌚𑌕𑍍𑌰𑌮𑍇 ॥ 13 ॥
𑌶𑍈𑌲𑍇𑌂𑌦𑍍𑌰𑍋 𑌹𑌿𑌮𑌵𑌾𑌨𑍍𑌨𑌾𑌮 𑌧𑌾𑌤𑍂𑌨𑌾𑌮𑌾𑌕𑌰𑍋 𑌮𑌹𑌾𑌨𑍍 ।
𑌤𑌸𑍍𑌯 𑌕𑌨𑍍𑌯𑌾𑌦𑍍𑌵𑌯𑌂 𑌰𑌾𑌮 𑌰𑍂𑌪𑍇𑌣𑌾𑌪𑍍𑌰𑌤𑌿𑌮𑌂 𑌭𑍁𑌵𑌿 ॥ 14 ॥
𑌯𑌾 𑌮𑍇𑌰𑍁𑌦𑍁𑌹𑌿𑌤𑌾 𑌰𑌾𑌮 𑌤𑌯𑍋𑌰𑍍𑌮𑌾𑌤𑌾 𑌸𑍁𑌮𑌧𑍍𑌯𑌮𑌾 ।
𑌨𑌾𑌮𑍍𑌨𑌾 𑌮𑌨𑍋𑌰𑌮𑌾 𑌨𑌾𑌮 𑌪𑌤𑍍𑌨𑍀 𑌹𑌿𑌮𑌵𑌤𑌃 𑌪𑍍𑌰𑌿𑌯𑌾 ॥ 15 ॥
𑌤𑌸𑍍𑌯𑌾𑌂 𑌗𑌂𑌗𑍇𑌯𑌮𑌭𑌵𑌜𑍍𑌜𑍍𑌯𑍇𑌷𑍍𑌠𑌾 𑌹𑌿𑌮𑌵𑌤𑌸𑍍𑌸𑍁𑌤𑌾 ।
𑌉𑌮𑌾 𑌨𑌾𑌮 𑌦𑍍𑌵𑌿𑌤𑍀𑌯𑌾𑌭𑍂𑌨𑍍𑌨𑌾𑌮𑍍𑌨𑌾 𑌤𑌸𑍍𑌯𑍈𑌵 𑌰𑌾𑌘𑌵 ॥ 16 ॥
𑌅𑌥 𑌜𑍍𑌯𑍇𑌷𑍍𑌠𑌾𑌂 𑌸𑍁𑌰𑌾𑌸𑍍𑌸𑌰𑍍𑌵𑍇 𑌦𑍇𑌵𑌤𑌾𑌰𑍍𑌥𑌚𑌿𑌕𑍀𑌰𑍍𑌷𑌯𑌾 ।
𑌶𑍈𑌲𑍇𑌂𑌦𑍍𑌰𑌂 𑌵𑌰𑌯𑌾𑌮𑌾𑌸𑍁𑌰𑍍𑌗𑌂𑌗𑌾𑌂 𑌤𑍍𑌰𑌿𑌪𑌥𑌗𑌾𑌂 𑌨𑌦𑍀𑌮𑍍 ॥ 1 ॥
𑌦𑌦𑍌 𑌧𑌰𑍍𑌮𑍇𑌣 𑌹𑌿𑌮𑌵𑌾𑌨𑍍 𑌤𑌨𑌯𑌾𑌂 𑌲𑍋𑌕𑌪𑌾𑌵𑌨𑍀𑌮𑍍 ।
𑌸𑍍𑌵𑌚𑍍𑌛𑌂𑌦𑌪𑌥𑌗𑌾𑌂 𑌗𑌂𑌗𑌾𑌂 𑌤𑍍𑌰𑍈𑌲𑍋𑌕𑍍𑌯𑌹𑌿𑌤𑌕𑌾𑌮𑍍𑌯𑌯𑌾 ॥ 1 ॥
𑌪𑍍𑌰𑌤𑌿𑌗𑍃𑌹𑍍𑌯 𑌤𑌤𑍋 𑌦𑍇𑌵𑌾𑌸𑍍𑌤𑍍𑌰𑌿𑌲𑍋𑌕𑌹𑌿𑌤𑌕𑌾𑌰𑌿𑌣𑌃 ।
𑌗𑌂𑌗𑌾𑌮𑌾𑌦𑌾𑌯 𑌤𑍇𑌽𑌗𑌚𑍍𑌛𑌨𑍍 𑌕𑍃𑌤𑌾𑌰𑍍𑌥𑍇𑌨𑌾𑌂𑌤𑌰𑌾𑌤𑍍𑌮𑌨𑌾 ॥ 1 ॥
𑌯𑌾 𑌚𑌾𑌨𑍍𑌯𑌾 𑌶𑍈𑌲𑌦𑍁𑌹𑌿𑌤𑌾 𑌕𑌨𑍍𑌯𑌾𑌸𑍀𑌦𑍍𑌰𑌘𑍁𑌨𑌂𑌦𑌨 ।
𑌉𑌗𑍍𑌰𑌂 𑌸𑌾 𑌵𑍍𑌰𑌤𑌮𑌾𑌸𑍍𑌥𑌾𑌯 𑌤𑌪𑌸𑍍𑌤𑍇𑌪𑍇 𑌤𑌪𑍋𑌧𑌨𑌾 ॥ 20 ॥
𑌉𑌗𑍍𑌰𑍇𑌣 𑌤𑌪𑌸𑌾 𑌯𑍁𑌕𑍍𑌤𑌾𑌂 𑌦𑌦𑍌 𑌶𑍈𑌲𑌵𑌰𑌸𑍍𑌸𑍁𑌤𑌾𑌮𑍍 ।
𑌰𑍁𑌦𑍍𑌰𑌾𑌯𑌾𑌪𑍍𑌰𑌤𑌿𑌰𑍂𑌪𑌾𑌯 𑌉𑌮𑌾𑌂 𑌲𑍋𑌕𑌨𑌮𑌸𑍍𑌕𑍃𑌤𑌾𑌮𑍍 ॥ 21 ॥
𑌏𑌤𑍇 𑌤𑍇 𑌶𑍈𑌲𑌰𑌾𑌜𑌸𑍍𑌯 𑌸𑍁𑌤𑍇 𑌲𑍋𑌕𑌨𑌮𑌸𑍍𑌕𑍃𑌤𑍇 ।
𑌗𑌂𑌗𑌾 𑌚 𑌸𑌰𑌿𑌤𑌾𑌂 𑌶𑍍𑌰𑍇𑌷𑍍𑌠𑌾 𑌉𑌮𑌾𑌦𑍇𑌵𑍀 𑌚 𑌰𑌾𑌘𑌵 ॥ 22 ॥
𑌏𑌤𑌤𑍍𑌤𑍇 𑌸𑌰𑍍𑌵𑌮𑌾𑌖𑍍𑌯𑌾𑌤𑌂 𑌯𑌥𑌾 𑌤𑍍𑌰𑌿𑌪𑌥𑌗𑌾 𑌨𑌦𑍀 ।
𑌖𑌂 𑌗𑌤𑌾 𑌪𑍍𑌰𑌥𑌮𑌂 𑌤𑌾𑌤 𑌗𑌤𑌿𑌂 𑌗𑌤𑌿𑌮𑌤𑌾𑌂 𑌵𑌰 ॥ 23 ॥
𑌸𑍈𑌷𑌾 𑌸𑍁𑌰𑌨𑌦𑍀 𑌰𑌮𑍍𑌯𑌾 𑌶𑍈𑌲𑍇𑌂𑌦𑍍𑌰𑌸𑍍𑌯 𑌸𑍁𑌤𑌾 𑌤𑌦𑌾 ।
𑌸𑍁𑌰𑌲𑍋𑌕𑌂 𑌸𑌮𑌾𑌰𑍂𑌢𑌾 𑌵𑌿𑌪𑌾𑌪𑌾 𑌜𑌲𑌵𑌾𑌹𑌿𑌨𑍀 ॥ 24 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌪𑌂𑌚𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
