𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌿𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌤𑌃 𑌸𑌮𑍀𑌕𑍍𑌷𑍍𑌯 𑌶𑌯𑌨𑍇 𑌸𑌨𑍍𑌨𑌂 𑌶𑍋𑌕𑍇𑌨 𑌪𑌾𑌰𑍍𑌥𑌿𑌵𑌮𑍍 ।
𑌕𑍌𑌶𑌲𑍍𑌯𑌾 𑌪𑍁𑌤𑍍𑌰𑌶𑍋𑌕𑌾𑌰𑍍𑌤𑌾 𑌤𑌮𑍁𑌵𑌾𑌚 𑌮𑌹𑍀𑌪𑌤𑌿𑌮𑍍 ॥ 1 ॥
𑌰𑌾𑌘𑌵𑍇 𑌨𑌰𑌶𑌾𑌰𑍍𑌦𑍂𑌲𑍇 𑌵𑌿𑌷𑌮𑍁𑌪𑍍𑌤𑍍𑌵𑌾𑌹𑌿𑌜𑌿𑌹𑍍𑌮𑌗𑌾 ।
𑌵𑌿𑌚𑌰𑌿𑌷𑍍𑌯𑌤𑌿 𑌕𑍈𑌕𑍇𑌯𑍀 𑌨𑌿𑌰𑍍𑌮𑍁𑌕𑍍𑌤𑍇𑌵 𑌹𑌿 𑌪𑌨𑍍𑌨𑌗𑍀 ॥ 2 ॥
𑌵𑌿𑌵𑌾𑌸𑍍𑌯 𑌰𑌾𑌮𑌂 𑌸𑍁𑌭𑌗𑌾 𑌲𑌬𑍍𑌧𑌕𑌾𑌮𑌾 𑌸𑌮𑌾𑌹𑌿𑌤𑌾 ।
𑌤𑍍𑌰𑌾𑌸𑌯𑌿𑌷𑍍𑌯𑌤𑌿 𑌮𑌾𑌂 𑌭𑍂𑌯𑍋 𑌦𑍁𑌷𑍍𑌟𑌾𑌹𑌿𑌰𑌿𑌵 𑌵𑍇𑌶𑍍𑌮𑌨𑌿 ॥ 3 ॥
𑌅𑌥 𑌸𑍍𑌮 𑌨𑌗𑌰𑍇 𑌰𑌾𑌮𑌶𑍍𑌚𑌰𑌨𑍍 𑌭𑍈𑌕𑍍𑌷𑌂 𑌗𑍃𑌹𑍇 𑌵𑌸𑍇𑌤𑍍 ।
𑌕𑌾𑌮𑌕𑌾𑌰𑍋 𑌵𑌰𑌂 𑌦𑌾𑌤𑍁𑌮𑌪𑌿 𑌦𑌾𑌸𑌂 𑌮𑌮𑌾𑌤𑍍𑌮𑌜𑌮𑍍 ॥ 4 ॥
𑌪𑌾𑌤𑌯𑌿𑌤𑍍𑌵𑌾 𑌤𑍁 𑌕𑍈𑌕𑍇𑌯𑍍𑌯𑌾 𑌰𑌾𑌮𑌂 𑌸𑍍𑌥𑌾𑌨𑌾𑌦𑍍𑌯𑌥𑍇𑌷𑍍𑌟𑌤𑌃 ।
𑌪𑍍𑌰𑌦𑌿𑌷𑍍𑌟𑍋 𑌰𑌕𑍍𑌷𑌸𑌾𑌂 𑌭𑌾𑌗𑌃 𑌪𑌰𑍍𑌵𑌣𑍀𑌵𑌾𑌹𑌿𑌤𑌾𑌗𑍍𑌨𑌿𑌨𑌾 ॥ 5 ॥
𑌗𑌜𑌰𑌾𑌜𑌗𑌤𑌿𑌰𑍍𑌵𑍀𑌰𑍋 𑌮𑌹𑌾𑌬𑌾𑌹𑍁𑌰𑍍𑌧𑌨𑍁𑌰𑍍𑌧𑌰𑌃 ।
𑌵𑌨𑌮𑌾𑌵𑌿𑌶𑌤𑍇 𑌨𑍂𑌨𑌂 𑌸𑌭𑌾𑌰𑍍𑌯 𑌸𑍍𑌸𑌹 𑌲𑌕𑍍𑌷𑍍𑌮𑌣𑌃 ॥ 6 ॥
𑌵𑌨𑍇 𑌤𑍍𑌵𑌦𑍃𑌷𑍍𑌟𑌦𑍁𑌃𑌖𑌾𑌨𑌾𑌂 𑌕𑍇𑌕𑌯𑍍𑌯𑌾𑌨𑍁𑌮𑌤𑍇 𑌤𑍍𑌵𑌯𑌾 ।
𑌤𑍍𑌯𑌕𑍍𑌤𑌾𑌨𑌾𑌂 𑌵𑌨𑌵𑌾𑌸𑌾𑌯 𑌕𑌾𑌨𑍍𑌵𑌵𑌸𑍍𑌥𑌾 𑌭𑌵𑌿𑌷𑍍𑌯𑌤𑌿 ॥ ॥
𑌤𑍇 𑌰𑌤𑍍𑌨𑌹𑍀𑌨𑌾𑌸𑍍𑌤𑌰𑍁𑌣𑌾𑌃 𑌫𑌲𑌕𑌾𑌲𑍇 𑌵𑌿𑌵𑌾𑌸𑌿𑌤𑌾𑌃 ।
𑌕𑌥𑌂 𑌵𑌤𑍍𑌸𑍍𑌯𑌂𑌤𑌿 𑌕𑍃𑌪𑌣𑌾𑌃 𑌫𑌲𑌮𑍂𑌲𑍈𑌃 𑌕𑍃𑌤𑌾𑌶𑌨𑌾𑌃 ॥ ॥
𑌅𑌪𑍀𑌦𑌾𑌨𑍀𑌂 𑌸 𑌕𑌾𑌲𑌸𑍍𑌸𑍍𑌯𑌾𑌨𑍍𑌮𑌮 𑌶𑍋𑌕𑌕𑍍𑌷𑌯 𑌶𑍍𑌶𑌿𑌵𑌃 ।
𑌸𑌭𑌾𑌰𑍍𑌯𑌂 𑌯𑌤𑍍𑌸𑌹 𑌭𑍍𑌰𑌾𑌤𑍍𑌰𑌾 𑌪𑌶𑍍𑌯𑍇𑌯𑌮𑌿𑌹 𑌰𑌾𑌘𑌵𑌮𑍍 ॥ ॥
𑌶𑍍𑌰𑍃𑌤𑍍𑌵𑍈𑌵𑍋𑌪𑌸𑍍𑌥𑌿𑌤𑍌 𑌵𑍀𑌰𑍌 𑌕𑌦𑌾𑌯𑍋𑌧𑍍𑌯𑌾 𑌭𑌵𑌿𑌷𑍍𑌯𑌤𑌿 ।
𑌯𑌶𑌸𑍍𑌵𑌿𑌨𑍀 𑌹𑍃𑌷𑍍𑌟𑌜𑌨𑌾 𑌸𑍂𑌚𑍍𑌛𑍍𑌰𑌿𑌤𑌧𑍍𑌵𑌜𑌮𑌾𑌲𑌿𑌨𑍀 ॥ 10 ॥
𑌕𑌦𑌾 𑌪𑍍𑌰𑍇𑌕𑍍𑌷𑍍𑌯 𑌨𑌰𑌵𑍍𑌯𑌾𑌘𑍍𑌰𑌾𑌵𑌰𑌣𑍍𑌯𑌾𑌤𑍍𑌪𑍁𑌨𑌰𑌾𑌗𑌤𑍌 ।
𑌨𑌂𑌦𑌿𑌷𑍍𑌯𑌤𑌿 𑌪𑍁𑌰𑍀 𑌹𑍃𑌷𑍍𑌟𑌾 𑌸𑌮𑍁𑌦𑍍𑌰 𑌇𑌵 𑌪𑌰𑍍𑌵𑌣𑌿 ॥ 11 ॥
𑌕𑌦𑌾𑌽𑌯𑍋𑌧𑍍𑌯𑌾𑌂 𑌮𑌹𑌾𑌬𑌾𑌹𑍁𑌃 𑌪𑍁𑌰𑍀𑌂 𑌵𑍀𑌰𑌃 𑌪𑍍𑌰𑌵𑍇𑌕𑍍𑌷𑍍𑌯𑌤𑌿 ।
𑌪𑍁𑌰𑌸𑍍𑌕𑍃𑌤𑍍𑌯 𑌰𑌥𑍇 𑌸𑍀𑌤𑌾𑌂 𑌵𑍃𑌷𑌭𑍋 𑌗𑍋𑌵𑌧𑍂𑌮𑌿𑌵 ॥ 12 ॥
𑌕𑌦𑌾 𑌪𑍍𑌰𑌾𑌣𑌿𑌸𑌹𑌸𑍍𑌰𑌾𑌣𑌿 𑌰𑌾𑌜𑌮𑌾𑌰𑍍𑌗𑍇 𑌮𑌮𑌾𑌤𑍍𑌮𑌜𑍌 ।
𑌲𑌾𑌜𑍈𑌰𑌵𑌕𑌿𑌰𑌿𑌷𑍍𑌯𑌂𑌤𑌿 𑌪𑍍𑌰𑌵𑌿𑌶𑌂𑌤𑌾𑌵𑌰𑌿𑌂𑌦𑌮𑍌 ॥ 13 ॥
𑌪𑍍𑌰𑌵𑌿𑌶𑌂𑌤𑍌 𑌕𑌦𑌾𑌽𑌯𑍋𑌧𑍍𑌯𑌾𑌂 𑌦𑍍𑌰𑌕𑍍𑌷𑍍𑌯𑌾𑌮𑌿 𑌶𑍁𑌭𑌕𑍁𑌂𑌡𑌲𑍌 ।
𑌉𑌦𑌗𑍍𑌰𑌾𑌯𑍁𑌧𑌨𑌿𑌸𑍍𑌤𑍍𑌰𑌿𑌂𑌶𑍌 𑌸𑌶𑍍𑌰𑍃𑌂𑌗𑌾𑌵𑌿𑌵 𑌪𑌰𑍍𑌵𑌤𑍌 ॥ 14 ॥
𑌕𑌦𑌾𑌸𑍁𑌮𑌨𑌸𑌃 𑌕𑌨𑍍𑌯𑌾𑌦𑍍𑌵𑌿𑌜𑌾𑌤𑍀𑌨𑌾𑌂 𑌫𑌲𑌾𑌨𑌿 𑌚 ।
𑌪𑍍𑌰𑌦𑌿𑌶𑌂𑌤𑌃 𑌪𑍁𑌰𑍀𑌂 𑌹𑍃𑌷𑍍𑌟𑌾𑌃 𑌕𑌰𑌿𑌷𑍍𑌯𑌂𑌤𑌿 𑌪𑍍𑌰𑌦𑌕𑍍𑌷𑌿𑌣𑌮𑍍 ॥ 15 ॥
𑌕𑌦𑌾 𑌪𑌰𑌿𑌣𑌤𑍋 𑌬𑍁𑌦𑍍𑌧𑍍𑌯𑌾 𑌵𑌯𑌸𑌾 𑌚𑌾𑌮𑌰𑌪𑍍𑌰𑌭𑌃 ।
𑌅𑌭𑍍𑌯𑍁𑌪𑍈𑌷𑍍𑌯𑌤𑌿 𑌧𑌰𑍍𑌮𑌜𑍍𑌞𑌸𑍍𑌤𑍍𑌰𑌿𑌵𑌰𑍍𑌷 𑌇𑌵 𑌮𑌾𑌂 𑌲𑌲𑌨𑍍 ॥ 16 ॥
𑌨𑌿𑌸𑍍𑌸𑌂𑌶𑌯𑌂 𑌮𑌯𑌾 𑌮𑌨𑍍𑌯𑍇 𑌪𑍁𑌰𑌾 𑌵𑍀𑌰 𑌕𑌦𑌰𑍍𑌯𑌯𑌾 ।
𑌪𑌾𑌤𑍁𑌕𑌾𑌮𑍇𑌷𑍁 𑌵𑌤𑍍𑌸𑍇𑌷𑍁 𑌮𑌾𑌤𑍃𑌣𑌾𑌂 𑌶𑌾𑌤𑌿𑌤𑌾𑌸𑍍𑌸𑍍𑌤𑌨𑌾𑌃 ॥ 1 ॥
𑌸𑌾𑌹𑌂 𑌗𑍌𑌰𑌿𑌵 𑌸𑌿𑌂𑌹𑍇𑌨 𑌵𑌿𑌵𑌤𑍍𑌸𑌾 𑌵𑌤𑍍𑌸𑌲𑌾 𑌕𑍃𑌤𑌾 ।
𑌕𑍈𑌕𑍇𑌯𑍍𑌯𑌾 𑌪𑍁𑌰𑍁𑌷𑌵𑍍𑌯𑌾𑌘𑍍𑌰 𑌬𑌾𑌲𑌵𑌤𑍍𑌸𑍇𑌵 𑌗𑍌𑌰𑍍𑌬𑌲𑌾𑌤𑍍 ॥ 1 ॥
𑌨 𑌹𑌿 𑌤𑌾𑌵𑌦𑍍𑌗𑍁𑌣𑍈𑌰𑍍𑌜𑍁𑌷𑍍𑌟𑌂 𑌸𑌰𑍍𑌵𑌶𑌾𑌸𑍍𑌤𑍍𑌰𑌵𑌿𑌶𑌾𑌰𑌦𑌮𑍍 ।
𑌏𑌕𑌪𑍁𑌤𑍍𑌰𑌾 𑌵𑌿𑌨𑌾 𑌪𑍁𑌤𑍍𑌰𑌮𑌹𑌂 𑌜𑍀𑌵𑌿𑌤𑍁𑌮𑍁𑌤𑍍𑌸𑌹𑍇 ॥ 1 ॥
𑌨 𑌹𑌿 𑌮𑍇 𑌜𑍀𑌵𑌿𑌤𑍇 𑌕𑌿𑌂𑌚𑌿𑌤𑍍𑌸𑌾𑌮𑌰𑍍𑌥𑍍𑌯𑌮𑌿𑌹 𑌕𑌲𑍍𑌪𑍍𑌯𑌤𑍇 ।
𑌅𑌪𑌶𑍍𑌯𑌂𑌤𑍍𑌯𑌾𑌃 𑌪𑍍𑌰𑌿𑌯𑌂 𑌪𑍁𑌤𑍍𑌰𑌂 𑌮𑌹𑌾𑌬𑌾𑌹𑍁𑌂 𑌮𑌹𑌾𑌬𑌲𑌮𑍍 ॥ 20 ॥
𑌅𑌯𑌂 𑌹𑌿 𑌮𑌾𑌂 𑌦𑍀𑌪𑌯𑌤𑍇 𑌸𑌮𑍁𑌤𑍍𑌥𑌿𑌤𑌃 𑌤𑌨𑍂𑌜𑌶𑍋𑌕𑌪𑍍𑌰𑌭𑌵𑍋 𑌹𑍁𑌤𑌾𑌶𑌨𑌃 ।
𑌮𑌹𑍀𑌮𑌿𑌮𑌾𑌂 𑌰𑌶𑍍𑌮𑌿𑌭𑌿𑌰𑍁𑌦𑍍𑌧𑌤𑌪𑍍𑌰𑌭𑌃 𑌯𑌥𑌾 𑌨𑌿𑌦𑌾𑌘𑍇 𑌭𑌗𑌵𑌾𑌨𑍍 𑌦𑌿𑌵𑌾𑌕𑌰𑌃 ॥ 21 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌤𑍍𑌰𑌿𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
