𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌉𑌕𑍍𑌤𑌵𑌾𑌕𑍍𑌯𑌂 𑌤𑍁 𑌰𑌾𑌜𑌾𑌨𑌂 𑌕𑍃𑌪𑌯𑌾 𑌕𑍁𑌶𑌿𑌕𑌾𑌤𑍍𑌮𑌜𑌃 ।
𑌅𑌬𑍍𑌰𑌵𑍀𑌨𑍍𑌮𑌧𑍁𑌰𑌂 𑌵𑌾𑌕𑍍𑌯𑌂 𑌸𑌾𑌕𑍍𑌷𑌾𑌚𑍍𑌚𑌂𑌡𑌾𑌲𑌰𑍂𑌪𑌿𑌣𑌮𑍍 ॥ 1 ॥
𑌐𑌕𑍍𑌷𑍍𑌵𑌾𑌕 𑌸𑍍𑌵𑌾𑌗𑌤𑌂 𑌵𑌤𑍍𑌸 𑌜𑌾𑌨𑌾𑌮𑌿 𑌤𑍍𑌵𑌾𑌂 𑌸𑍁𑌧𑌾𑌰𑍍𑌮𑌿𑌕𑌮𑍍 ।
𑌶𑌰𑌣𑌂 𑌤𑍇 𑌭𑌵𑌿𑌷𑍍𑌯𑌾𑌮𑌿 𑌮𑌾 𑌭𑍈𑌷𑍀𑌰𑍍𑌨𑍃𑌪𑌪𑍁𑌂𑌗𑌵 ॥ 2 ॥
𑌅𑌹𑌮𑌾𑌮𑌂𑌤𑍍𑌰𑌯𑍇 𑌸𑌰𑍍𑌵𑌾𑌨𑍍𑌮𑌹𑌰𑍍𑌷𑍀𑌨𑍍𑌪𑍁𑌣𑍍𑌯𑌕𑌰𑍍𑌮𑌣𑌃 ।
𑌯𑌜𑍍𑌞𑌸𑌾𑌹𑍍𑌯𑌕𑌰𑌾𑌨𑍍 𑌰𑌾𑌜𑌨𑍍 𑌤𑌤𑍋 𑌯𑌕𑍍𑌷𑍍𑌯𑌸𑌿 𑌨𑌿𑌰𑍍𑌵𑍃𑌤𑌃 ॥ 3 ॥
𑌗𑍁𑌰𑍁𑌶𑌾𑌪𑌕𑍃𑌤𑌂 𑌰𑍂𑌪𑌂 𑌯𑌦𑌿𑌦𑌂 𑌤𑍍𑌵𑌯𑌿 𑌵𑌰𑍍𑌤𑌤𑍇 ।
𑌅𑌨𑍇𑌨 𑌸𑌹 𑌰𑍂𑌪𑍇𑌣 𑌸𑌶𑌰𑍀𑌰𑍋 𑌗𑌮𑌿𑌷𑍍𑌯𑌸𑌿 ॥ 4 ॥
𑌹𑌸𑍍𑌤𑌪𑍍𑌰𑌾𑌪𑍍𑌤𑌮𑌹𑌂 𑌮𑌨𑍍𑌯𑍇 𑌸𑍍𑌵𑌰𑍍𑌗𑌂 𑌤𑌵 𑌨𑌰𑌾𑌧𑌿𑌪 ।
𑌯𑌸𑍍𑌤𑍍𑌵𑌂 𑌕𑍌𑌶𑌿𑌕𑌮𑌾𑌗𑌮𑍍𑌯 𑌶𑌰𑌣𑍍𑌯𑌂 𑌶𑌰𑌣𑌾𑌗𑌤𑌃 ॥ 5 ॥
𑌏𑌵𑌮𑍁𑌕𑍍𑌤𑍍𑌵𑌾 𑌮𑌹𑌾𑌤𑍇𑌜𑌾𑌃 𑌪𑍁𑌤𑍍𑌰𑌾𑌨𑍍 𑌪𑌰𑌮𑌧𑌾𑌰𑍍𑌮𑌿𑌕𑌾𑌨𑍍 ।
𑌵𑍍𑌯𑌾𑌦𑌿𑌦𑍇𑌶 𑌮𑌹𑌾𑌪𑍍𑌰𑌾𑌜𑍍𑌞𑌾𑌨𑍍 𑌯𑌜𑍍𑌞𑌸𑌂𑌭𑌾𑌰𑌕𑌾𑌰𑌣𑌾𑌤𑍍 ॥ 6 ॥
𑌸𑌰𑍍𑌵𑌾𑌨𑍍 𑌶𑌿𑌷𑍍𑌯𑌾𑌨𑍍 𑌸𑌮𑌾𑌹𑍂𑌯 𑌵𑌾𑌕𑍍𑌯𑌮𑍇𑌤𑌦𑍁𑌵𑌾𑌚 𑌹 ।
𑌸𑌰𑍍𑌵𑌾𑌨𑍃𑌷𑌿𑌗𑌣𑌾𑌨𑍍𑌵𑌤𑍍𑌸𑌾 𑌆𑌨𑌯𑌧𑍍𑌵𑌂 𑌮𑌮𑌾𑌜𑍍𑌞𑌯𑌾 ।
𑌸𑌶𑌿𑌷𑍍𑌯𑌸𑍁𑌹𑍃𑌦𑌶𑍍𑌚𑍈𑌵 𑌸𑌰𑍍𑌤𑍍𑌵𑌿𑌜 𑌸𑍍𑌸𑌬𑌹𑍁𑌶𑍍𑌰𑍁𑌤𑌾𑌨𑍍 ॥ ॥
𑌯𑌦𑌨𑍍𑌯𑍋 𑌵𑌚𑌨𑌂 𑌬𑍍𑌰𑍂𑌯𑌾𑌨𑍍𑌮𑌦𑍍𑌵𑌾𑌕𑍍𑌯𑌬𑌲𑌚𑍋𑌦𑌿𑌤𑌃 ।
𑌤𑌤𑍍𑌸𑌰𑍍𑌵𑌮𑌖𑌿𑌲𑍇𑌨𑍋𑌕𑍍𑌤𑌂 𑌮𑌮𑌾𑌖𑍍𑌯𑍇𑌯𑌮𑌨𑌾𑌦𑍃𑌤𑌮𑍍 ॥ ॥
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌦𑌿𑌶𑍋 𑌜𑌗𑍍𑌮𑍁𑌸𑍍𑌤𑌦𑌾𑌜𑍍𑌞𑌯𑌾 ।
𑌆𑌜𑌗𑍍𑌮𑍁𑌰𑌥 𑌦𑍇𑌶𑍇𑌭𑍍𑌯 𑌸𑍍𑌸𑌰𑍍𑌵𑍇𑌭𑍍𑌯𑍋 𑌬𑍍𑌰𑌹𑍍𑌮𑌵𑌾𑌦𑌿𑌨𑌃 ॥ ॥
𑌤𑍇 𑌚 𑌶𑌿𑌷𑍍𑌯𑌾𑌃 𑌸𑌮𑌾𑌗𑌮𑍍𑌯 𑌮𑍁𑌨𑌿𑌂 𑌜𑍍𑌵𑌲𑌿𑌤𑌤𑍇𑌜𑌸𑌮𑍍 ।
𑌊𑌚𑍁𑌶𑍍𑌚𑌵𑌚𑌨𑌂 𑌸𑌰𑍍𑌵𑍇 𑌸𑌰𑍍𑌵𑍇𑌷𑌾𑌂 𑌬𑍍𑌰𑌹𑍍𑌮𑌵𑌾𑌦𑌿𑌨𑌾𑌮𑍍 ॥ 10 ॥
𑌶𑍍𑌰𑍁𑌤𑍍𑌵𑌾 𑌤𑍇 𑌵𑌚𑌨𑌂 𑌸𑌰𑍍𑌵𑍇 𑌸𑌮𑌾𑌯𑌾𑌂𑌤𑌿 𑌦𑍍𑌵𑌿𑌜𑌾𑌤𑌯𑌃 ।
𑌸𑌰𑍍𑌵𑌦𑍇𑌶𑍇𑌷𑍁 𑌚𑌾𑌗𑌚𑍍𑌛𑌨𑍍 𑌵𑌰𑍍𑌜𑌯𑌿𑌤𑍍𑌵𑌾 𑌮𑌹𑍋𑌦𑌯𑌮𑍍 ॥ 11 ॥
𑌵𑌾𑌸𑌿𑌷𑍍𑌠𑌂 𑌤𑌚𑍍𑌛𑌤𑌂 𑌸𑌰𑍍𑌵𑌂 𑌕𑍍𑌰𑍋𑌧𑌪𑌰𑍍𑌯𑌾𑌕𑍁𑌲𑌾𑌕𑍍𑌷𑌰𑌮𑍍 ।
𑌯𑌦𑌾𑌹 𑌵𑌚𑌨𑌂 𑌸𑌰𑍍𑌵𑌂 𑌶𑍃𑌣𑍁 𑌤𑍍𑌵𑌂 𑌮𑍁𑌨𑌿𑌪𑍁𑌂𑌗𑌵 ॥ 12 ॥
𑌕𑍍𑌷𑌤𑍍𑌰𑌿𑌯𑍋 𑌯𑌾𑌜𑌕𑍋 𑌯𑌸𑍍𑌯 𑌚𑌂𑌡𑌾𑌲𑌸𑍍𑌯 𑌵𑌿𑌶𑍇𑌷𑌤𑌃 ।
𑌕𑌥𑌂 𑌸𑌦𑌸𑌿 𑌭𑍋𑌕𑍍𑌤𑌾𑌰𑍋 𑌹𑌵𑌿𑌸𑍍𑌤𑌸𑍍𑌯 𑌸𑍁𑌰𑌰𑍍𑌷𑌯𑌃 ॥ 13 ॥
𑌬𑍍𑌰𑌾𑌹𑍍𑌮𑌣𑌾 𑌵𑌾 𑌮𑌹𑌾𑌤𑍍𑌮𑌾𑌨𑍋 𑌭𑍁𑌕𑍍𑌤𑍍𑌵𑌾 𑌚𑌂𑌡𑌾𑌲𑌭𑍋𑌜𑌨𑌮𑍍 ।
𑌕𑌥𑌂 𑌸𑍍𑌵𑌰𑍍𑌗𑌂 𑌗𑌮𑌿𑌷𑍍𑌯𑌂𑌤𑌿 𑌵𑌿𑌶𑍍𑌵𑌾𑌮𑌿𑌤𑍍𑌰𑍇𑌣 𑌪𑌾𑌲𑌿𑌤𑌾𑌃 ॥ 14 ॥
𑌏𑌤𑌦𑍍𑌵𑌚𑌨𑌨𑍈𑌷𑍍𑌠𑍁𑌰𑍍𑌯𑌮𑍂𑌚𑍁 𑌸𑍍𑌸𑌂𑌰𑌕𑍍𑌤𑌲𑍋𑌚𑌨𑌾𑌃 ।
𑌵𑌾𑌸𑌿𑌷𑍍𑌠𑌾 𑌮𑍁𑌨𑌿𑌶𑌾𑌰𑍍𑌦𑍂𑌲 𑌸𑌰𑍍𑌵𑍇 𑌤𑍇 𑌸𑌮𑌹𑍋𑌦𑌯𑌾𑌃 ॥ 15 ॥
𑌤𑍇𑌷𑌾𑌂 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌸𑌰𑍍𑌵𑍇𑌷𑌾𑌂 𑌮𑍁𑌨𑌿𑌪𑍁𑌂𑌗𑌵𑌃 ।
𑌕𑍍𑌰𑍋𑌧𑌸𑌂𑌰𑌕𑍍𑌤𑌨𑌯𑌨 𑌸𑍍𑌸𑌰𑍋𑌷𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 16 ॥
𑌯𑍇 𑌦𑍂𑌷𑌯𑌂𑌤𑍍𑌯𑌦𑍁𑌷𑍍𑌟𑌂 𑌮𑌾𑌂 𑌤𑌪 𑌉𑌗𑍍𑌰𑌂 𑌸𑌮𑌾𑌸𑍍𑌥𑌿𑌤𑌮𑍍 ।
𑌭𑌸𑍍𑌮𑍀𑌭𑍂𑌤𑌾 𑌦𑍁𑌰𑌾𑌤𑍍𑌮𑌾𑌨𑍋 𑌭𑌵𑌿𑌷𑍍𑌯𑌂𑌤𑌿 𑌨 𑌸𑌂𑌶𑌯𑌃 ॥ 1 ॥
𑌅𑌦𑍍𑌯 𑌤𑍇 𑌕𑌾𑌲𑌪𑌾𑌶𑍇𑌨 𑌨𑍀𑌤𑌾 𑌵𑍈𑌵𑌸𑍍𑌵𑌤𑌕𑍍𑌷𑌯𑌮𑍍 ।
𑌸𑌪𑍍𑌤𑌜𑌾𑌤𑌿𑌶𑌤𑌾𑌨𑍍𑌯𑍇𑌵 𑌮𑍃𑌤𑌪𑌸𑍍𑌸𑌂𑌤𑍁 𑌸𑌰𑍍𑌵𑌶𑌃 ॥ 1 ॥
𑌶𑍍𑌵𑌮𑌾𑌂𑌸𑌨𑌿𑌯𑌤𑌾𑌹𑌾𑌰𑌾 𑌮𑍁𑌷𑍍𑌟𑌿𑌕𑌾 𑌨𑌾𑌮 𑌨𑌿𑌰𑍍𑌘𑍃𑌣𑌾𑌃 ।
𑌵𑌿𑌕𑍃𑌤𑌾𑌶𑍍𑌚 𑌵𑌿𑌰𑍂𑌪𑌾𑌶𑍍𑌚 𑌲𑍋𑌕𑌾𑌨𑌨𑍁𑌚𑌰𑌂𑌤𑍍𑌵𑌿𑌮𑌾𑌨𑍍 ॥ 1 ॥
𑌮𑌹𑍋𑌦𑌯𑌸𑍍𑌤𑍁 𑌦𑍁𑌰𑍍𑌬𑍁𑌦𑍍𑌧𑌿𑌰𑍍𑌮𑌾𑌮𑌦𑍂𑌷𑍍𑌯𑌂 𑌹𑍍𑌯𑌦𑍂𑌷𑌯𑌤𑍍 ।
𑌦𑍂𑌷𑌿𑌤 𑌸𑍍𑌸𑌰𑍍𑌵𑌲𑍋𑌕𑍇𑌷𑍁 𑌨𑌿𑌷𑌾𑌦𑌤𑍍𑌵𑌂 𑌗𑌮𑌿𑌷𑍍𑌯𑌤𑌿 ॥ 20 ॥
𑌪𑍍𑌰𑌾𑌣𑌾𑌤𑌿𑌪𑌾𑌤𑌨𑌿𑌰𑌤𑍋 𑌨𑌿𑌰𑌨𑍁𑌕𑍍𑌰𑍋𑌶𑌤𑌾𑌂 𑌗𑌤𑌃 ।
𑌦𑍀𑌰𑍍𑌘𑌕𑌾𑌲𑌂 𑌮𑌮 𑌕𑍍𑌰𑍋𑌧𑌾𑌦𑍍𑌦𑍁𑌰𑍍𑌗𑌤𑌿𑌂 𑌵𑌰𑍍𑌤𑌯𑌿𑌷𑍍𑌯𑌤𑌿 ॥ 21 ॥
𑌏𑌤𑌾𑌵𑌦𑍁𑌕𑍍𑌤𑍍𑌵𑌾 𑌵𑌚𑌨𑌂 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌤𑌪𑌾𑌃 ।
𑌵𑌿𑌰𑌰𑌾𑌮 𑌮𑌹𑌾𑌤𑍇𑌜𑌾 𑌋𑌷𑌿𑌮𑌧𑍍𑌯𑍇 𑌮𑌹𑌾𑌮𑍁𑌨𑌿𑌃 ॥ 22 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌏𑌕𑍋𑌨𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
