𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌷𑌷𑍍𑌠𑌸𑍍𑌸𑌰𑍍𑌗𑌃 ।
𑌶𑌰𑌭𑌂𑌗𑍇 𑌦𑌿𑌵𑌂 𑌪𑍍𑌰𑌾𑌪𑍍𑌤𑍇 𑌮𑍁𑌨𑌿𑌸𑌂𑌘𑌾𑌸𑍍𑌸𑌮𑌾𑌗𑌤𑌾𑌃 ।
𑌅𑌭𑍍𑌯𑌗𑌚𑍍𑌛𑌂𑌤 𑌕𑌾𑌕𑍁𑌤𑍍𑌸𑍍𑌥𑌂 𑌰𑌾𑌮𑌂 𑌜𑍍𑌵𑌲𑌿𑌤𑌤𑍇𑌜𑌸𑌮𑍍 ॥ 1 ॥
𑌵𑍈𑌖𑌾𑌨𑌸𑌾 𑌵𑌾𑌲𑌖𑌿𑌲𑍍𑌯𑌾𑌸𑍍𑌸𑌂𑌪𑍍𑌰𑌕𑍍𑌷𑌾𑌲𑌾 𑌮𑌰𑍀𑌚𑌿𑌪𑌾𑌃 ।
𑌅𑌶𑍍𑌮𑌕𑍁𑌟𑍍𑌟𑌾𑌶𑍍𑌚 𑌬𑌹𑌵𑌃 𑌪𑌤𑍍𑌰𑌾𑌹𑌾𑌰𑌾𑌶𑍍𑌚 𑌤𑌾𑌪𑌸𑌾𑌃 ॥ 2 ॥
𑌦𑌂𑌤𑍋𑌲𑍂𑌖𑌲𑌿𑌨𑌶𑍍𑌚𑍈𑌵 𑌤𑌥𑍈𑌵𑍋𑌨𑍍𑌮𑌜𑍍𑌜𑌕𑌾𑌃 𑌪𑌰𑍇 ।
𑌗𑌾𑌤𑍍𑌰𑌶𑌯𑍍𑌯𑌾 𑌅𑌶𑌯𑍍𑌯𑌾𑌶𑍍𑌚 𑌤𑌥𑍈𑌵𑌾𑌭𑍍𑌰𑌾𑌵𑌕𑌾𑌶𑌕𑌾𑌃 ॥ 3 ॥
𑌮𑍁𑌨𑌯𑌸𑍍𑌸𑌲𑌿𑌲𑌾𑌹𑌾𑌰𑌾𑌵𑌾𑌯𑍁𑌭𑌕𑍍𑌷𑌾 𑌸𑍍𑌤𑌥𑌾𑌪𑌰𑍇 ।
𑌆𑌕𑌾𑌶𑌨𑌿𑌲𑌯𑌾𑌶𑍍𑌚𑍈𑌵 𑌤𑌥𑌾 𑌸𑍍𑌥𑌂𑌡𑌿𑌲𑌶𑌾𑌯𑌿𑌨𑌃 ॥ 4 ॥
𑌵𑍍𑌰𑌤𑍋𑌪𑌵𑌾𑌸𑌿𑌨𑍋 𑌦𑌾𑌂𑌤𑌾𑌸𑍍𑌤𑌥𑌾𑌽𑌰𑍍𑌦𑍍𑌰𑌪𑌟𑌵𑌾𑌸𑌸𑌃 ।
𑌸𑌜𑌪𑌾𑌶𑍍𑌚 𑌤𑌪𑍋𑌨𑌿𑌤𑍍𑌯𑌾𑌸𑍍𑌤𑌥𑌾 𑌪𑌂𑌚𑌤𑌪𑍋𑌽𑌨𑍍𑌵𑌿𑌤𑌾𑌃 ॥ 5 ॥
𑌸𑌰𑍍𑌵𑍇 𑌬𑍍𑌰𑌾𑌹𑍍𑌮𑍍𑌯𑌾 𑌶𑍍𑌰𑌿𑌯𑌾 𑌜𑍁𑌷𑍍𑌟𑌾 𑌦𑍃𑌢𑌯𑍋𑌗𑌾𑌸𑍍𑌸𑌮𑌾𑌹𑌿𑌤𑌾𑌃 ।
𑌶𑌰𑌭𑌂𑌗𑌾𑌶𑍍𑌰𑌮𑍇 𑌰𑌾𑌮𑌮𑌭𑌿𑌜𑌗𑍍𑌮𑍁𑌶𑍍𑌚 𑌤𑌾𑌪𑌸𑌾𑌃 ॥ 6 ॥
𑌅𑌭𑌿𑌗𑌮𑍍𑌯 𑌚 𑌧𑌰𑍍𑌮𑌜𑍍𑌞𑌾 𑌰𑌾𑌮𑌂 𑌧𑌰𑍍𑌮𑌭𑍃𑌤𑌾𑌂 𑌵𑌰𑌮𑍍 ।
𑌊𑌚𑍁𑌃 𑌪𑌰𑌮𑌧𑌰𑍍𑌮𑌜𑍍𑌞𑌮𑍃𑌷𑌿𑌸𑌂𑌘𑌾𑌸𑍍𑌸𑌮𑌾𑌹𑌿𑌤𑌾𑌃 ॥ ॥
𑌤𑍍𑌵𑌮𑌿𑌕𑍍𑌷𑍍𑌵𑌾𑌕𑍁𑌕𑍁𑌲𑌸𑍍𑌯𑌾𑌸𑍍𑌯 𑌪𑍃𑌥𑌿𑌵𑍍𑌯𑌾𑌶𑍍𑌚 𑌮𑌹𑌾𑌰𑌥 ।
𑌪𑍍𑌰𑌧𑌾𑌨𑌶𑍍𑌚𑌾𑌸𑌿 𑌨𑌾𑌥𑌶𑍍𑌚 𑌦𑍇𑌵𑌾𑌨𑌾𑌂 𑌮𑌘𑌵𑌾𑌨𑌿𑌵 ॥ ॥
𑌵𑌿𑌶𑍍𑌰𑍁𑌤𑌸𑍍𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌯𑌶𑌸𑌾 𑌵𑌿𑌕𑍍𑌰𑌮𑍇𑌣 𑌚 ।
𑌪𑌿𑌤𑍃𑌭𑌕𑍍𑌤𑌿𑌶𑍍𑌚 𑌸𑌤𑍍𑌯𑌂 𑌚 𑌤𑍍𑌵𑌯𑌿 𑌧𑌰𑍍𑌮𑌶𑍍𑌚 𑌪𑍁𑌷𑍍𑌕𑌲𑌃 ॥ ॥
𑌤𑍍𑌵𑌾𑌮𑌾𑌸𑌾𑌦𑍍𑌯 𑌮𑌹𑌾𑌤𑍍𑌮𑌾𑌨𑌂 𑌧𑌰𑍍𑌮𑌜𑍍𑌞𑌂 𑌧𑌰𑍍𑌮𑌵𑌤𑍍𑌸𑌲𑌮𑍍 ।
𑌅𑌰𑍍𑌥𑌿𑌤𑍍𑌵𑌾𑌨𑍍𑌨𑌾𑌥 𑌵𑌕𑍍𑌷𑍍𑌯𑌾𑌮𑌸𑍍𑌤𑌚𑍍𑌚 𑌨𑌃 𑌕𑍍𑌷𑌂𑌤𑍁𑌮𑌰𑍍𑌹𑌸𑌿 ॥ 10 ॥
𑌅𑌧𑌰𑍍𑌮𑌸𑍍𑌸𑍁𑌮𑌹𑌾𑌂𑌸𑍍𑌤𑌾𑌤 𑌭𑌵𑍇𑌤𑍍𑌤𑌸𑍍𑌯 𑌮𑌹𑍀𑌪𑌤𑍇𑌃 ।
𑌯𑍋 𑌹𑌰𑍇𑌦𑍍𑌬𑌲𑌿𑌷𑌡𑍍𑌭𑌾𑌗𑌾𑌂 𑌨 𑌚 𑌰𑌕𑍍𑌷𑌤𑌿 𑌪𑍁𑌤𑍍𑌰𑌵𑌤𑍍 ॥ 11 ॥
𑌯𑍁𑌂𑌜𑌾𑌨𑌸𑍍𑌸𑍍𑌵𑌾𑌨𑌿𑌵 𑌪𑍍𑌰𑌾𑌣𑌾𑌨𑍍𑌪𑍍𑌰𑌾𑌣𑍈𑌰𑌿𑌷𑍍𑌟𑌾𑌨𑍍𑌸𑍁𑌤𑌾𑌨𑌿𑌵 ।
𑌨𑌿𑌤𑍍𑌯𑌯𑍁𑌕𑍍𑌤𑌸𑍍𑌸𑌦𑌾 𑌰𑌕𑍍𑌷𑌨𑍍𑌸𑌰𑍍𑌵𑌾𑌨𑍍𑌵𑌿𑌷𑌯𑌵𑌾𑌸𑌿𑌨𑌃 ॥ 12 ॥
𑌪𑍍𑌰𑌾𑌪𑍍𑌨𑍋𑌤𑌿 𑌶𑌾𑌶𑍍𑌵𑌤𑍀𑌂 𑌰𑌾𑌮 𑌕𑍀𑌰𑍍𑌤𑌿𑌂 𑌸 𑌬𑌹𑍁𑌵𑌾𑌰𑍍𑌷𑌿𑌕𑍀𑌮𑍍 ।
𑌬𑍍𑌰𑌹𑍍𑌮𑌣𑌸𑍍𑌸𑍍𑌥𑌾𑌨𑌮𑌾𑌸𑌾𑌦𑍍𑌯 𑌤𑌤𑍍𑌰 𑌚𑌾𑌪𑌿 𑌮𑌹𑍀𑌯𑌤𑍇 ॥ 13 ॥
𑌯𑌤𑍍𑌕𑌰𑍋𑌤𑌿 𑌪𑌰𑌂 𑌧𑌰𑍍𑌮 𑌮𑍁𑌨𑌿𑌰𑍍𑌮𑍂𑌲𑌫𑌲𑌾𑌶𑌨𑌃 ।
𑌤𑌤𑍍𑌰 𑌰𑌾𑌜𑍍𑌞𑌶𑍍𑌚𑌤𑍁𑌰𑍍𑌭𑌾𑌗 𑌪𑍍𑌰𑌜𑌾 𑌧𑌰𑍍𑌮𑍇𑌣 𑌰𑌕𑍍𑌷𑌿𑌤𑌃 ॥ 14 ॥
𑌸𑍋𑌽𑌯𑌂 𑌬𑍍𑌰𑌾𑌹𑍍𑌮𑌣𑌭𑍂𑌯𑌿𑌷𑍍𑌠𑍋 𑌵𑌾𑌨𑌪𑍍𑌰𑌸𑍍𑌥𑌗𑌣𑍋 𑌮𑌹𑌾𑌨𑍍 ।
𑌤𑍍𑌵𑌨𑍍𑌨𑌾𑌥𑍋𑌽𑌨𑌾𑌥𑌵𑌦𑍍𑌰𑌾𑌮 𑌰𑌾𑌕𑍍𑌷𑌸𑍈𑌰𑍍𑌵𑌧𑍍𑌯𑌤𑍇 𑌭𑍃𑌶𑌮𑍍 ॥ 15 ॥
𑌏𑌹𑌿 𑌪𑌶𑍍𑌯 𑌶𑌰𑍀𑌰𑌾𑌣𑌿 𑌮𑍁𑌨𑍀𑌨𑌾𑌂 𑌭𑌾𑌵𑌿𑌤𑌾𑌤𑍍𑌮𑌨𑌾𑌮𑍍 ।
𑌹𑌤𑌾𑌨𑌾𑌂 𑌰𑌾𑌕𑍍𑌷𑌸𑍈𑌰𑍍𑌘𑍋𑌰𑍈𑌰𑍍𑌬𑌹𑍂𑌨𑌾𑌂 𑌬𑌹𑍁𑌧𑌾 𑌵𑌨𑍇 ॥ 16 ॥
𑌪𑌂𑌪𑌾𑌨𑌦𑍀𑌨𑌿𑌵𑌾𑌸𑌾𑌨𑌾𑌮𑌨𑍁𑌮𑌂𑌦𑌾𑌕𑌿𑌨𑍀𑌮𑌪𑌿 ।
𑌚𑌿𑌤𑍍𑌰𑌕𑍂𑌟𑌾𑌲𑌯𑌾𑌨𑌾𑌂 𑌚 𑌕𑍍𑌰𑌿𑌯𑌤𑍇 𑌕𑌦𑌨𑌂 𑌮𑌹𑌤𑍍 ॥ 1 ॥
𑌏𑌵𑌂 𑌵𑌯𑌂 𑌨 𑌮𑍃𑌷𑍍𑌯𑌾𑌮𑍋 𑌵𑌿𑌪𑍍𑌰𑌕𑌾𑌰𑌂 𑌤𑌪𑌸𑍍𑌵𑌿𑌨𑌾𑌮𑍍 ।
𑌕𑍍𑌰𑌿𑌯𑌮𑌾𑌣𑌂 𑌵𑌨𑍇 𑌘𑍋𑌰𑌂 𑌰𑌕𑍍𑌷𑍋𑌭𑌿𑌰𑍍𑌭𑍀𑌮𑌕𑌰𑍍𑌮𑌭𑌿𑌃 ॥ 1 ॥
𑌤𑌤𑌸𑍍𑌤𑍍𑌵𑌾𑌂 𑌶𑌰𑌣𑌾𑌰𑍍𑌥𑌂 𑌚 𑌶𑌰𑌣𑍍𑌯𑌂 𑌸𑌮𑍁𑌪𑌸𑍍𑌥𑌿𑌤𑌾𑌃 ।
𑌪𑌰𑌿𑌪𑌾𑌲𑌯 𑌨𑍋 𑌰𑌾𑌮 𑌵𑌧𑍍𑌯𑌮𑌾𑌨𑌾𑌨𑍍𑌨𑌿𑌶𑌾𑌚𑌰𑍈𑌃 ॥ 1 ॥
𑌪𑌰𑌾 𑌤𑍍𑌵𑌤𑍍𑌤𑍋 𑌗𑌤𑌿𑌰𑍍𑌵𑍀𑌰 𑌪𑍃𑌥𑌿𑌵𑍍𑌯𑌾𑌂 𑌨𑍋𑌪𑌪𑌦𑍍𑌯𑌤𑍇 ।
𑌪𑌰𑌿𑌪𑌾𑌲𑌯 𑌨 𑌸𑍍𑌸𑌰𑍍𑌵𑌾𑌨𑍍𑌰𑌾𑌕𑍍𑌷𑌸𑍇𑌭𑍍𑌯𑍋 𑌨𑍃𑌪𑌾𑌤𑍍𑌮𑌜 ॥ 20 ॥
𑌏𑌤𑌚𑍍𑌛𑍍𑌰𑍁𑌤𑍍𑌵𑌾 𑌤𑍁 𑌕𑌾𑌕𑍁𑌤𑍍𑌸𑍍𑌥𑌸𑍍𑌤𑌾𑌪𑌸𑌾𑌨𑌾𑌂 𑌤𑌪𑌸𑍍𑌵𑌿𑌨𑌾𑌮𑍍 ।
𑌇𑌦𑌂 𑌪𑍍𑌰𑍋𑌵𑌾𑌚 𑌧𑌰𑍍𑌮𑌾𑌤𑍍𑌮𑌾 𑌸𑌰𑍍𑌵𑌾𑌨𑍇𑌵 𑌤𑌪𑌸𑍍𑌵𑌿𑌨𑌃 ॥ 21 ॥
𑌨𑍈𑌵𑌮𑌰𑍍𑌹𑌥 𑌮𑌾𑌂 𑌵𑌕𑍍𑌤𑍁𑌮𑌾𑌜𑍍𑌞𑌾𑌪𑍍𑌯𑍋𑌽𑌹𑌂 𑌤𑌪𑌸𑍍𑌵𑌿𑌨𑌾𑌮𑍍 ।
𑌕𑍇𑌵𑌲𑍇𑌨𑌾𑌤𑍍𑌮𑌕𑌾𑌰𑍍𑌯𑍇𑌣 𑌪𑍍𑌰𑌵𑍇𑌷𑍍𑌟𑌵𑍍𑌯𑌂 𑌮𑌯𑌾 𑌵𑌨𑌮𑍍 ॥ 22 ॥
𑌵𑌿𑌪𑍍𑌰𑌕𑌾𑌰𑌮𑌪𑌾𑌕𑍍𑌰𑌷𑍍𑌟𑍁𑌂 𑌰𑌾𑌕𑍍𑌷𑌸𑍈𑌰𑍍𑌭𑌵𑌤𑌾𑌮𑌿𑌮𑌮𑍍 ।
𑌪𑌿𑌤𑍁𑌸𑍍𑌤𑍁 𑌨𑌿𑌰𑍍𑌦𑍇𑌶𑌕𑌰𑌃 𑌪𑍍𑌰𑌵𑌿𑌷𑍍𑌟𑍋𑌽𑌹𑌮𑌿𑌦𑌂 𑌵𑌨𑌮𑍍 ॥ 23 ॥
𑌭𑌵𑌤𑌾𑌮𑌰𑍍𑌥𑌸𑌿𑌦𑍍𑌧𑍍𑌯𑌰𑍍𑌥𑌮𑌾𑌗𑌤𑍋𑌽𑌹𑌂 𑌯𑌦𑍃𑌚𑍍𑌛𑌯𑌾 ।
𑌤𑌸𑍍𑌯 𑌮𑍇𑌽𑌯𑌂 𑌵𑌨𑍇 𑌵𑌾𑌸𑍋 𑌭𑌵𑌿𑌷𑍍𑌯𑌤𑌿 𑌮𑌹𑌾𑌫𑌲𑌃 ॥ 24 ॥
𑌤𑌪𑌸𑍍𑌵𑌿𑌨𑌾𑌂 𑌰𑌣𑍇 𑌶𑌤𑍍𑌰𑍂𑌨𑍍𑌹𑌂𑌤𑍁𑌮𑌿𑌚𑍍𑌛𑌾𑌮𑌿 𑌰𑌾𑌕𑍍𑌷𑌸𑌾𑌨𑍍 ।
𑌪𑌶𑍍𑌯𑌂𑌤𑍁 𑌵𑍀𑌰𑍍𑌯𑌮𑍃𑌷𑌯𑌸𑍍𑌸𑌭𑍍𑌰𑌾𑌤𑍁𑌰𑍍𑌮𑍇 𑌤𑌪𑍋𑌧𑌨𑌾𑌃 ॥ 25 ॥
𑌦𑌤𑍍𑌤𑍍𑌵𑌾𑌽𑌭𑌯𑌂 𑌚𑌾𑌪𑌿 𑌤𑌪𑍋𑌧𑌨𑌾𑌨𑌾𑌂 𑌧𑌰𑍍𑌮𑍇 𑌧𑍃𑌤𑌾𑌤𑍍𑌮𑌾 𑌸𑌹 𑌲𑌕𑍍𑌷𑍍𑌮𑌣𑍇𑌨 ।
𑌤𑌪𑍋𑌧𑌨𑍈𑌶𑍍𑌚𑌾𑌪𑌿 𑌸𑌭𑌾𑌜𑍍𑌯𑌵𑍃𑌤𑍍𑌤𑌃 𑌸𑍁𑌤𑍀𑌕𑍍𑌷𑍍𑌣𑌮𑍇𑌵𑌾𑌭𑌿𑌜𑌗𑌾𑌮 𑌵𑍀𑌰𑌃 ॥ 26 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌷𑌷𑍍𑌠𑌸𑍍𑌸𑌰𑍍𑌗𑌃 ॥
