𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌏𑌕𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌆𑌜𑍍𑌞𑌪𑍍𑌤𑍋 𑌰𑌾𑌜𑌵𑌦𑍍𑌵𑌾𑌕𑍍𑌯𑌂 𑌪𑍍𑌰𑌤𑌿𑌕𑍂𑌲𑌂 𑌨𑌿𑌶𑌾𑌚𑌰𑌃 ।
𑌅𑌬𑍍𑌰𑌵𑍀𑌤𑍍𑌪𑌰𑍁𑌷𑌂 𑌵𑌾𑌕𑍍𑌯𑌂 𑌮𑌾𑌰𑍀𑌚𑍋 𑌰𑌾𑌕𑍍𑌷𑌸𑌾𑌧𑌿𑌪𑌮𑍍 ॥ 1 ॥
𑌕𑍇𑌨𑌾𑌯𑌮𑍁𑌪𑌦𑌿𑌷𑍍𑌟𑌸𑍍𑌤𑍇 𑌵𑌿𑌨𑌾𑌶𑌃 𑌪𑌾𑌪𑌕𑌰𑍍𑌮𑌣𑌾 ।
𑌸𑌪𑍁𑌤𑍍𑌰𑌸𑍍𑌯 𑌸𑌰𑌾𑌷𑍍𑌟𑍍𑌰𑌸𑍍𑌯 𑌸𑌾𑌮𑌾𑌤𑍍𑌯𑌸𑍍𑌯 𑌨𑌿𑌶𑌾𑌚𑌰 ॥ 2 ॥
𑌕𑌸𑍍𑌤𑍍𑌵𑌯𑌾 𑌸𑍁𑌖𑌿𑌨𑌾 𑌰𑌾𑌜𑌨𑍍𑌨𑌾𑌭𑌿𑌨𑌂𑌦𑌤𑌿 𑌪𑌾𑌪𑌕𑍃𑌤𑍍 ।
𑌕𑍇𑌨𑍇𑌦𑌮𑍁𑌪𑌦𑌿𑌷𑍍𑌟𑌂 𑌤𑍇 𑌮𑍃𑌤𑍍𑌯𑍁𑌦𑍍𑌵𑌾𑌰𑌮𑍁𑌪𑌾𑌯𑌤𑌃 ॥ 3 ॥
𑌶𑌤𑍍𑌰𑌵𑌸𑍍𑌤𑌵 𑌸𑍁𑌵𑍍𑌯𑌕𑍍𑌤𑌂 𑌹𑍀𑌨𑌵𑍀𑌰𑍍𑌯𑌾 𑌨𑌿𑌶𑌾𑌚𑌰𑌾𑌃 ।
𑌇𑌚𑍍𑌛𑌂𑌤𑌿 𑌤𑍍𑌵𑌾𑌂 𑌵𑌿𑌨𑌶𑍍𑌯𑌂𑌤𑌮𑍁𑌪𑌰𑍁𑌦𑍍𑌧𑌂 𑌬𑌲𑍀𑌯𑌸𑌾 ॥ 4 ॥
𑌕𑍇𑌨𑍇𑌦𑌮𑍁𑌪𑌦𑌿𑌷𑍍𑌟𑌂 𑌤𑍇 𑌕𑍍𑌷𑍁𑌦𑍍𑌰𑍇𑌣𑌾𑌹𑌿𑌤𑌵𑌾𑌦𑌿𑌨𑌾 ।
𑌯𑌸𑍍𑌤𑍍𑌵𑌾𑌮𑌿𑌚𑍍𑌛𑌤𑌿 𑌨𑌶𑍍𑌯𑌂𑌤𑌂 𑌸𑍍𑌵𑌕𑍃𑌤𑍇𑌨 𑌨𑌿𑌶𑌾𑌚𑌰 ॥ 5 ॥
𑌵𑌧𑍍𑌯𑌾𑌃 𑌖𑌲𑍁 𑌨 𑌹𑌨𑍍𑌯𑌂𑌤𑍇 𑌸𑌚𑌿𑌵𑌾𑌸𑍍𑌤𑌵 𑌰𑌾𑌵𑌣 ।
𑌯𑍇 𑌤𑍍𑌵𑌾𑌮𑍁𑌤𑍍𑌪𑌥𑌮𑌾𑌰𑍂𑌢𑌂 𑌨 𑌨𑌿𑌗𑍃𑌹𑍍𑌣𑌂𑌤𑌿 𑌸𑌰𑍍𑌵𑌶𑌃 ॥ 6 ॥
𑌅𑌮𑌾𑌤𑍍𑌯𑍈𑌃 𑌕𑌾𑌮𑌵𑍃𑌤𑍍𑌤𑍋 𑌹𑌿 𑌰𑌾𑌜𑌾 𑌕𑌾𑌪𑌥𑌮𑌾𑌶𑍍𑌰𑌿𑌤𑌃 ।
𑌨𑌿𑌗𑍍𑌰𑌾𑌹𑍍𑌯𑌸𑍍𑌸𑌰𑍍𑌵𑌥𑌾 𑌸𑌦𑌭𑌿𑌰𑍍𑌨 𑌨𑌿𑌗𑍍𑌰𑌾𑌹𑍍𑌯𑍋 𑌨𑌿𑌗𑍃𑌹𑍍𑌯𑌸𑍇 ॥ ॥
𑌧𑌰𑍍𑌮𑌮𑌰𑍍𑌥𑌂 𑌚 𑌕𑌾𑌮𑌂 𑌚 𑌯𑌶𑌶𑍍𑌚 𑌜𑌯𑌤𑌾𑌂 𑌵𑌰 ।
𑌸𑍍𑌵𑌾𑌮𑌿𑌪𑍍𑌰𑌸𑌾𑌦𑌾𑌤𑍍𑌸𑌚𑌿𑌵𑌾𑌃 𑌪𑍍𑌰𑌾𑌪𑍍𑌨𑍁𑌵𑌂𑌤𑌿 𑌨𑌿𑌶𑌾𑌚𑌰 ॥ ॥
𑌵𑌿𑌪𑌰𑍍𑌯𑌯𑍇 𑌤𑍁 𑌤𑌤𑍍𑌸𑌰𑍍𑌵𑌂 𑌵𑍍𑌯𑌰𑍍𑌥𑌂 𑌭𑌵𑌤𑌿 𑌰𑌾𑌵𑌣 ।
𑌵𑍍𑌯𑌸𑌨𑌂 𑌸𑍍𑌵𑌾𑌮𑌿𑌵𑍈𑌗𑍁𑌣𑍍𑌯𑌾𑌤𑍍𑌪𑍍𑌰𑌾𑌪𑍍𑌨𑍁𑌵𑌂𑌤𑍀𑌤𑌰𑍇 𑌜𑌨𑌾𑌃 ॥ ॥
𑌰𑌾𑌜𑌮𑍂𑌲𑍋 𑌹𑌿 𑌧𑌰𑍍𑌮𑌶𑍍𑌚 𑌜𑌯𑌶𑍍𑌚 𑌜𑌯𑌤𑌾𑌂 𑌵𑌰 ।
𑌤𑌸𑍍𑌮𑌾𑌤𑍍𑌸𑌰𑍍𑌵𑌾𑌸𑍍𑌵𑌵𑌸𑍍𑌥𑌾𑌸𑍁 𑌰𑌕𑍍𑌷𑌿𑌤𑌵𑍍𑌯𑌾 𑌨𑌰𑌾𑌧𑌿𑌪𑌾𑌃 ॥ 10 ॥
𑌰𑌾𑌜𑍍𑌯𑌂 𑌪𑌾𑌲𑌯𑌿𑌤𑍁𑌂 𑌶𑌕𑍍𑌯𑌂 𑌨 𑌤𑍀𑌕𑍍𑌷𑍍𑌣𑍇𑌨 𑌨𑌿𑌶𑌾𑌚𑌰 ।
𑌨 𑌚𑌾𑌪𑌿 𑌪𑍍𑌰𑌤𑌿𑌕𑍂𑌲𑍇𑌨 𑌨𑌾𑌵𑌿𑌨𑍀𑌤𑍇𑌨 𑌰𑌾𑌕𑍍𑌷𑌸 ॥ 11 ॥
𑌯𑍇 𑌤𑍀𑌕𑍍𑌷𑍍𑌣𑌮𑌂𑌤𑍍𑌰𑌾𑌸𑍍𑌸𑌚𑌿𑌵𑌾 𑌭𑌜𑍍𑌯𑌂𑌤𑍇 𑌸𑌹 𑌤𑍇𑌨 𑌵𑍈 ।
𑌵𑌿𑌷𑌮𑍇 𑌤𑍁𑌰𑌗𑌾 𑌶𑍍𑌶𑍀𑌘𑍍𑌰𑌾 𑌮𑌂𑌦𑌸𑌾𑌰𑌥𑌯𑍋 𑌯𑌥𑌾 ॥ 12 ॥
𑌬𑌹𑌵𑌸𑍍𑌸𑌾𑌧𑌵𑍋 𑌲𑍋𑌕𑍇 𑌯𑍁𑌕𑍍𑌤𑌾 𑌧𑌰𑍍𑌮𑌮𑌨𑍁𑌷𑍍𑌠𑌿𑌤𑌾𑌃 ।
𑌪𑌰𑍇𑌷𑌾𑌮𑌪𑌰𑌾𑌧𑍇𑌨 𑌵𑌿𑌨𑌷𑍍𑌟𑌾𑌸𑍍𑌸𑌪𑌰𑌿𑌚𑍍𑌛𑌦𑌾𑌃 ॥ 13 ॥
𑌸𑍍𑌵𑌾𑌮𑌿𑌨𑌾 𑌪𑍍𑌰𑌤𑌿𑌕𑍂𑌲𑍇𑌨 𑌪𑍍𑌰𑌜𑌾𑌸𑍍𑌤𑍀𑌕𑍍𑌷𑍍𑌣𑍇𑌨 𑌰𑌾𑌵𑌣 ।
𑌰𑌕𑍍𑌷𑍍𑌯𑌮𑌾𑌣𑌾 𑌨 𑌵𑌰𑍍𑌧𑌂𑌤𑍇 𑌮𑍇𑌷𑌾 𑌗𑍋𑌮𑌾𑌯𑍁𑌨𑌾 𑌯𑌥𑌾 ॥ 14 ॥
𑌅𑌵𑌶𑍍𑌯𑌂 𑌵𑌿𑌨𑌶𑌿𑌷𑍍𑌯𑌂𑌤𑌿 𑌸𑌰𑍍𑌵𑍇 𑌰𑌾𑌵𑌣 𑌰𑌾𑌕𑍍𑌷𑌸𑌾𑌃 ।
𑌯𑍇𑌷𑌾𑌂 𑌤𑍍𑌵𑌂 𑌕𑌰𑍍𑌕𑌶𑍋 𑌰𑌾𑌜𑌾 𑌦𑍁𑌰𑍍𑌬𑍁𑌦𑍍𑌧𑌿𑌰𑌜𑌿𑌤𑍇𑌂𑌦𑍍𑌰𑌿𑌯𑌃 ॥ 15 ॥
𑌤𑌦𑌿𑌦𑌂 𑌕𑌾𑌕𑌤𑌾𑌲𑍀𑌯𑌂 𑌘𑍋𑌰𑌮𑌾𑌸𑌾𑌦𑌿𑌤𑌂 𑌮𑌯𑌾 ।
𑌅𑌤𑍍𑌰 𑌕𑌿𑌂 𑌶𑍋𑌚𑌨𑍀𑌯𑌸𑍍𑌤𑍍𑌵𑌂 𑌸𑌸𑍈𑌨𑍍𑌯𑍋 𑌵𑌿𑌨𑌶𑌿𑌷𑍍𑌯𑌸𑌿 ॥ 16 ॥
𑌮𑌾𑌂 𑌨𑌿𑌹𑌤𑍍𑌯 𑌤𑍁 𑌰𑌾𑌮𑌶𑍍𑌚 𑌨 𑌚𑌿𑌰𑌾𑌤𑍍𑌤𑍍𑌵𑌾𑌂 𑌵𑌧𑌿𑌷𑍍𑌯𑌤𑌿 ।
𑌅𑌨𑍇𑌨 𑌕𑍃𑌤𑌕𑍃𑌤𑍍𑌯𑍋𑌽𑌸𑍍𑌮𑌿 𑌮𑍍𑌰𑌿𑌯𑍇𑌯𑌮𑌰𑌿𑌣𑌾 𑌹𑌤𑌃 ॥ 1 ॥
𑌦𑌰𑍍𑌶𑌨𑌾𑌦𑍇𑌵 𑌰𑌾𑌮𑌸𑍍𑌯 𑌹𑌤𑌂 𑌮𑌾𑌮𑌵𑌧𑌾𑌰𑌯 ।
𑌆𑌤𑍍𑌮𑌾𑌨𑌂 𑌚 𑌹𑌤𑌂 𑌵𑌿𑌦𑍍𑌧𑌿 𑌹𑍃𑌤𑍍𑌵𑌾 𑌸𑍀𑌤𑌾𑌂 𑌸𑌬𑌾𑌂𑌧𑌵𑌮𑍍 ॥ 1 ॥
𑌆𑌨𑌯𑌿𑌷𑍍𑌯𑌸𑌿 𑌚𑍇𑌤𑍍𑌸𑍀𑌤𑌾𑌮𑌾𑌶𑍍𑌰𑌮𑌾𑌤𑍍𑌸𑌹𑌿𑌤𑍋 𑌮𑌯𑌾 ।
𑌨𑍈𑌵𑌤𑍍𑌵𑌮𑌸𑌿 𑌨𑌾𑌹𑌂 𑌚 𑌨𑍈𑌵 𑌲𑌂𑌕𑌾 𑌨 𑌰𑌾𑌕𑍍𑌷𑌸𑌾𑌃 ॥ 1 ॥
𑌨𑌿𑌵𑌾𑌰𑍍𑌯𑌮𑌾𑌣𑌸𑍍𑌤𑍁 𑌮𑌯𑌾 𑌹𑌿𑌤𑍈𑌷𑌿𑌣𑌾 𑌨 𑌮𑍃𑌷𑍍𑌯𑌸𑍇 𑌵𑌾𑌕𑍍𑌯𑌮𑌿𑌦𑌂 𑌨𑌿𑌶𑌾𑌚𑌰 ।
𑌪𑌰𑍇𑌤𑌕𑌲𑍍𑌪𑌾 𑌹𑌿 𑌗𑌤𑌾𑌯𑍁𑌷𑍋 𑌨𑌰𑌾 𑌹𑌿𑌤𑌂 𑌨 𑌗𑍃𑌹𑍍𑌣𑌂𑌤𑌿 𑌸𑍁𑌹𑍃𑌦𑍍𑌭𑌿𑌰𑍀𑌰𑌿𑌤𑌮𑍍 ॥ 20 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌏𑌕𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
