𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌾𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌵𑍀𑌕𑍍𑌷𑌮𑌾𑌣𑌸𑍍𑌤𑍁 𑌮𑌂𑌦𑌾𑌸𑍁𑌸𑍍𑌸𑌰𑍍𑌵𑌤𑍋 𑌮𑌂𑌦𑌮𑍁𑌚𑍍𑌛𑍍𑌵𑌸𑌨𑍍 ।
𑌆𑌦𑌾𑌵𑍇𑌵 𑌤𑍁 𑌸𑍁𑌗𑍍𑌰𑍀𑌵𑌂 𑌦𑌦𑌰𑍍𑌶𑌤𑍍𑌵𑌾𑌤𑍍𑌮𑌜𑌾𑌗𑍍𑌰𑌤𑌃 ॥ 1 ॥
𑌤𑌂 𑌪𑍍𑌰𑌾𑌪𑍍𑌤𑌵𑌿𑌜𑌯𑌂 𑌵𑌾𑌲𑍀 𑌸𑍁𑌗𑍍𑌰𑍀𑌵𑌂 𑌪𑍍𑌲𑌵𑌗𑍇𑌶𑍍𑌵𑌰𑌃 ।
𑌆𑌭𑌾𑌷𑍍𑌯 𑌵𑍍𑌯𑌕𑍍𑌤𑌯𑌾 𑌵𑌾𑌚𑌾 𑌸𑌸𑍍𑌨𑍇𑌹𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 2 ॥
𑌸𑍁𑌗𑍍𑌰𑍀𑌵 𑌦𑍋𑌷𑍇𑌣 𑌨 𑌮𑌾𑌂 𑌗𑌂𑌤𑍁𑌮𑌰𑍍𑌹𑌸𑌿 𑌕𑌿𑌲𑍍𑌬𑌿𑌷𑌾𑌤𑍍 ।
𑌕𑍃𑌷𑍍𑌯𑌮𑌾𑌣𑌂 𑌭𑌵𑌿𑌷𑍍𑌯𑍇𑌣 𑌬𑍁𑌦𑍍𑌧𑌿𑌮𑍋𑌹𑍇𑌨 𑌮𑌾𑌂 𑌬𑌲𑌾𑌤𑍍 ॥ 3 ॥
𑌯𑍁𑌗𑌪𑌦𑍍𑌵𑌿𑌹𑌿𑌤𑌂 𑌤𑌾𑌤 𑌨 𑌮𑌨𑍍𑌯𑍇 𑌸𑍁𑌖𑌮𑌾𑌵𑌯𑍋𑌃 ।
𑌸𑍌𑌹𑌾𑌰𑍍𑌦 𑌭𑍍𑌰𑌾𑌤𑍃𑌯𑍁𑌕𑍍𑌤𑌂 𑌹𑌿 𑌤𑌦𑌿𑌦𑌂 𑌤𑌾𑌤 𑌨𑌾𑌨𑍍𑌯𑌥𑌾 ॥ 4 ॥
𑌪𑍍𑌰𑌤𑌿𑌪𑌦𑍍𑌯 𑌤𑍍𑌵𑌮𑌦𑍍𑌯𑍈𑌵 𑌰𑌾𑌜𑍍𑌯𑌮𑍇𑌷𑌾𑌂 𑌵𑌨𑍌𑌕𑌸𑌾𑌮𑍍 ।
𑌮𑌾𑌮𑌪𑍍𑌯𑌦𑍍𑌯𑍈𑌵 𑌗𑌚𑍍𑌛𑌂𑌤𑌂 𑌵𑌿𑌦𑍍𑌧𑌿 𑌵𑍈𑌵𑌸𑍍𑌵𑌤𑌕𑍍𑌷𑌯𑌮𑍍 ॥ 5 ॥
𑌜𑍀𑌵𑌿𑌤𑌂 𑌚 𑌹𑌿 𑌰𑌾𑌜𑍍𑌯𑌂 𑌚 𑌶𑍍𑌰𑌿𑌯𑌂 𑌚 𑌵𑌿𑌪𑍁𑌲𑌾𑌮𑌿𑌮𑌾𑌮𑍍 ।
𑌪𑍍𑌰𑌜𑌹𑌾𑌮𑍍𑌯𑍇𑌷 𑌵𑍈 𑌤𑍂𑌰𑍍𑌣𑌂 𑌮𑌹𑌚𑍍𑌚𑌾𑌗𑌰𑍍𑌹𑌿𑌤𑌂 𑌯𑌶𑌃 ॥ 6 ॥
𑌅𑌸𑍍𑌯𑌾𑌂 𑌤𑍍𑌵𑌹𑌮𑌵𑌸𑍍𑌥𑌾𑌯𑌾𑌂 𑌵𑍀𑌰 𑌵𑌕𑍍𑌷𑍍𑌯𑌾𑌮𑌿 𑌯𑌦𑍍𑌵𑌚𑌃 ।
𑌯𑌦𑍍𑌯𑌪𑍍𑌯𑌸𑍁𑌕𑌰𑌂 𑌰𑌾𑌜𑌨𑍍𑌕𑌰𑍍𑌤𑍁𑌮𑍇𑌵 𑌤𑌦𑌰𑍍𑌹𑌸𑌿 ॥ ॥
𑌸𑍁𑌖𑌾𑌰𑍍𑌹𑌂 𑌸𑍁𑌖𑌸𑌂𑌵𑍃𑌦𑍍𑌧𑌂 𑌬𑌾𑌲𑌮𑍇𑌨𑌮𑌬𑌾𑌲𑌿𑌶𑌮𑍍 ।
𑌬𑌾𑌷𑍍𑌪𑌪𑍂𑌰𑍍𑌣𑌮𑍁𑌖𑌂 𑌪𑌶𑍍𑌯 𑌭𑍂𑌮𑍌 𑌪𑌤𑌿𑌤𑌮𑌂𑌗𑌦𑌮𑍍 ॥ ॥
𑌮𑌮 𑌪𑍍𑌰𑌾𑌣𑍈𑌃 𑌪𑍍𑌰𑌿𑌯𑌤𑌰𑌂 𑌪𑍁𑌤𑍍𑌰𑌂 𑌪𑍁𑌤𑍍𑌰𑌮𑌿𑌵𑍌𑌰𑌸𑌮𑍍 ।
𑌮𑌯𑌾 𑌹𑍀𑌨𑌮𑌹𑍀𑌨𑌾𑌰𑍍𑌥𑌂 𑌪𑌰𑍍𑌵𑌤𑌃 𑌪𑌰𑌿𑌪𑌾𑌲𑌯 ॥ ॥
𑌤𑍍𑌵𑌮𑍇𑌵𑌾𑌸𑍍𑌯 𑌹𑌿 𑌦𑌾𑌤𑌾 𑌚 𑌪𑌰𑌿𑌤𑍍𑌰𑌾𑌤𑌾 𑌚 𑌸𑌰𑍍𑌵𑌶𑌃 ।
𑌭𑌯𑍇𑌷𑍍𑌵𑌭𑌯𑌦𑌶𑍍𑌚𑍈𑌵 𑌯𑌥𑌾𑌽𑌹𑌂 𑌪𑍍𑌲𑌵𑌗𑍇𑌶𑍍𑌵𑌰 ॥ 10 ॥
𑌏𑌷 𑌤𑌾𑌰𑌾𑌤𑍍𑌮𑌜 𑌶𑍍𑌰𑍀𑌮𑌾𑌂𑌸𑍍𑌤𑍍𑌵𑌯𑌾 𑌤𑍁𑌲𑍍𑌯𑌪𑌰𑌾𑌕𑍍𑌰𑌮𑌃 ।
𑌰𑌕𑍍𑌷𑌸𑌾𑌂 𑌚 𑌵𑌧𑍇 𑌤𑍇𑌷𑌾𑌮𑌗𑍍𑌰𑌤𑌸𑍍𑌤𑍇 𑌭𑌵𑌿𑌷𑍍𑌯𑌤𑌿 ॥ 11 ॥
𑌅𑌨𑍁𑌰𑍂𑌪𑌾𑌣𑌿 𑌕𑌰𑍍𑌮𑌾𑌣𑌿 𑌵𑌿𑌕𑍍𑌰𑌮𑍍𑌯 𑌬𑌲𑌵𑌾𑌨𑍍𑌰𑌣𑍇 ।
𑌕𑌰𑌿𑌷𑍍𑌯𑌤𑍍𑌯𑍇𑌷 𑌤𑌾𑌰𑍇𑌯𑌸𑍍𑌤𑌰𑌸𑍍𑌵𑍀 𑌤𑌰𑍁𑌣𑍋𑌽𑌂𑌗𑌦𑌃 ॥ 12 ॥
𑌸𑍁𑌷𑍇𑌣𑌦𑍁𑌹𑌿𑌤𑌾 𑌚𑍇𑌯𑌮𑌰𑍍𑌥𑌸𑍂𑌕𑍍𑌷𑍍𑌮𑌵𑌿𑌮𑌨𑌿𑌶𑍍𑌚𑌯𑍇 ।
𑌔𑌤𑍍𑌪𑌾𑌤𑌿𑌕𑍇 𑌚 𑌵𑌿𑌵𑌿𑌧𑍇 𑌸𑌰𑍍𑌵𑌤𑌃 𑌪𑌰𑌿𑌨𑌿𑌷𑍍𑌠𑌿𑌤𑌾 ॥ 13 ॥
𑌯𑌦𑍇𑌷𑌾 𑌸𑌾𑌧𑍍𑌵𑌿𑌤𑌿 𑌬𑍍𑌰𑍂𑌯𑌾𑌤𑍍𑌕𑌾𑌰𑍍𑌯𑌂 𑌤𑌨𑍍𑌮𑍁𑌕𑍍𑌤𑌸𑌂𑌶𑌯𑌮𑍍 ।
𑌨 𑌹𑌿 𑌤𑌾𑌰𑌾𑌮𑌤𑌂 𑌕𑌿𑌂𑌚𑌿𑌦𑌨𑍍𑌯𑌥𑌾 𑌪𑌰𑌿𑌵𑌰𑍍𑌤𑌤𑍇 ॥ 14 ॥
𑌰𑌾𑌘𑌵𑌸𑍍𑌯 𑌚 𑌤𑍇 𑌕𑌾𑌰𑍍𑌯𑌂 𑌕𑌰𑍍𑌤𑌵𑍍𑌯𑌮𑌵𑌿𑌶𑌂𑌕𑌯𑌾 ।
𑌸𑍍𑌯𑌾𑌦𑌧𑌰𑍍𑌮𑍋 𑌹𑍍𑌯𑌕𑌰𑌣𑍇 𑌤𑍍𑌵𑌾𑌂 𑌚 𑌹𑌿𑌂𑌸𑍍𑌯𑌾𑌦𑍍𑌵𑌿𑌮𑌾𑌨𑌿𑌤𑌃 ॥ 15 ॥
𑌇𑌮𑌾𑌂 𑌚 𑌮𑌾𑌲𑌾𑌮𑌾𑌧𑌤𑍍𑌸𑍍𑌵 𑌦𑌿𑌵𑍍𑌯𑌾𑌂 𑌸𑍁𑌗𑍍𑌰𑍀𑌵 𑌕𑌾𑌂𑌚𑌨𑍀𑌮𑍍 ।
𑌉𑌦𑌾𑌰𑌾 𑌶𑍍𑌰𑍀𑌸𑍍𑌥𑌿𑌤𑌾 𑌹𑍍𑌯𑌾𑌸𑍍𑌯𑌾𑌂 𑌸𑌂𑌪𑍍𑌰𑌜𑌹𑍍𑌯𑌾𑌨𑍍𑌮𑍃𑌤𑍇 𑌮𑌯𑌿 ॥ 16 ॥
𑌇𑌤𑍍𑌯𑍇𑌵𑌮𑍁𑌕𑍍𑌤𑌸𑍍𑌸𑍁𑌗𑍍𑌰𑍀𑌵𑍋 𑌵𑌾𑌲𑌿𑌨𑌾 𑌭𑍍𑌰𑌾𑌤𑍃𑌸𑍌𑌹𑍃𑌦𑌾𑌤𑍍 ।
𑌹𑌰𑍍𑌷𑌂 𑌤𑍍𑌯𑌕𑍍𑌤𑍍𑌵𑌾 𑌪𑍁𑌨𑌰𑍍𑌦𑍀𑌨𑍋 𑌗𑍍𑌰𑌹𑌗𑍍𑌰𑌸𑍍𑌤 𑌇𑌵𑍋𑌡𑍁𑌰𑌾𑌟𑍍 ॥ 1 ॥
𑌤𑌦𑍍𑌵𑌾𑌲𑌿𑌵𑌚𑌨𑌾𑌚𑍍𑌛𑌾𑌂𑌤𑌃 𑌕𑍁𑌰𑍍𑌵𑌨𑍍𑌯𑍁𑌕𑍍𑌤𑌮𑌤𑌂𑌦𑍍𑌰𑌿𑌤𑌃 ।
𑌜𑌗𑍍𑌰𑌾𑌹 𑌸𑍋𑌽𑌭𑍍𑌯𑌨𑍁𑌜𑍍𑌞𑌾𑌤𑍋 𑌮𑌾𑌲𑌾𑌂 𑌤𑌾𑌂 𑌚𑍈𑌵 𑌕𑌾𑌂𑌚𑌨𑍀𑌮𑍍 ॥ 1 ॥
𑌤𑌾𑌂 𑌮𑌾𑌲𑌾𑌂 𑌕𑌾𑌂𑌚𑌨𑍀𑌂 𑌦𑌤𑍍𑌤𑍍𑌵𑌾 𑌦𑍃𑌷𑍍𑌟𑍍𑌵𑌾𑌚𑍈𑌵𑌾𑌤𑍍𑌮𑌜𑌂 𑌸𑍍𑌥𑌿𑌤𑌮𑍍 ।
𑌸𑌂𑌸𑌿𑌦𑍍𑌧𑌃 𑌪𑍍𑌰𑍇𑌤𑍍𑌯𑌭𑌾𑌵𑌾𑌯 𑌸𑍍𑌨𑍇𑌹𑌾𑌦𑌂𑌗𑌦𑌮𑌬𑍍𑌰𑌵𑍀𑌤𑍍 ॥ 1 ॥
𑌦𑍇𑌶𑌕𑌾𑌲𑍌 𑌭𑌜𑌸𑍍𑌵𑌾𑌦𑍍𑌯 𑌕𑍍𑌷𑌮𑌮𑌾𑌣𑌃 𑌪𑍍𑌰𑌿𑌯𑌾𑌪𑍍𑌰𑌿𑌯𑍇 ।
𑌸𑍁𑌖𑌦𑍁𑌃𑌖 𑌸𑌹𑌃 𑌕𑌾𑌲𑍇 𑌸𑍁𑌗𑍍𑌰𑍀𑌵𑌵𑌶𑌗𑍋 𑌭𑌵 ॥ 20 ॥
𑌯𑌥𑌾 𑌹𑌿 𑌤𑍍𑌵𑌂 𑌮𑌹𑌾𑌬𑌾𑌹𑍋 𑌲𑌾𑌲𑌿𑌤𑌸𑍍𑌸𑌤𑌤𑌂 𑌮𑌯𑌾 ।
𑌨 𑌤𑌥𑌾 𑌵𑌰𑍍𑌤𑌮𑌾𑌨𑌂 𑌤𑍍𑌵𑌾𑌂 𑌸𑍁𑌗𑍍𑌰𑍀𑌵𑍋 𑌬𑌹𑍁𑌮𑌂𑌸𑍍𑌯𑌤𑍇 ॥ 21 ॥
𑌮𑌾𑌽𑌸𑍍𑌯𑌾𑌮𑌿𑌤𑍍𑌰𑍈𑌰𑍍𑌗𑌤𑌂 𑌗𑌚𑍍𑌛𑍇𑌰𑍍𑌮𑌾 𑌶𑌤𑍍𑌰𑍁𑌭𑌿𑌰𑌰𑌿𑌂𑌦𑌮 ।
𑌭𑌰𑍍𑌤𑍁𑌰𑌰𑍍𑌥𑌪𑌰𑍋 𑌦𑌾𑌂𑌤𑌃 𑌸𑍁𑌗𑍍𑌰𑍀𑌵𑌵𑌶𑌗𑍋 𑌭𑌵 ॥ 22 ॥
𑌨 𑌚𑌾𑌤𑌿𑌪𑍍𑌰𑌣𑌯𑌃 𑌕𑌾𑌰𑍍𑌯𑌃 𑌕𑌰𑍍𑌤𑌵𑍍𑌯𑍋𑌽𑌪𑍍𑌰𑌣𑌯𑌶𑍍𑌚 𑌤𑍇 ।
𑌉𑌭𑌯𑌂 𑌹𑌿 𑌮𑌹𑌾𑌂𑌦𑍋𑌷 𑌸𑍍𑌤𑌸𑍍𑌮𑌾𑌦𑌂𑌤𑌰𑌦𑍃𑌗𑍍𑌭𑌵 ॥ 23 ॥
𑌇𑌤𑍍𑌯𑍁𑌕𑍍𑌤𑍍𑌵𑌾𑌽𑌥 𑌵𑌿𑌵𑍃𑌤𑍍𑌤𑌾𑌕𑍍𑌷𑌃 𑌶𑌰𑌸𑌂𑌪𑍀𑌡𑌿𑌤𑍋 𑌭𑍃𑌶𑌮𑍍 ।
𑌵𑌿𑌵𑍃𑌤𑍈𑌰𑍍𑌦𑌶𑌨𑍈 𑌰𑍍𑌭𑍀𑌮𑍈𑌰𑍍𑌬𑌭𑍂𑌵𑍋𑌤𑍍𑌕𑍍𑌰𑌾𑌂𑌤𑌜𑍀𑌵𑌿𑌤𑌃 ॥ 24 ॥
𑌤𑌤𑍋 𑌵𑌿𑌚𑍁𑌕𑍍𑌰𑍁𑌶𑍁𑌸𑍍𑌤𑌤𑍍𑌰 𑌵𑌾𑌨𑌰𑌾 𑌹𑌰𑌿𑌯𑍂𑌥𑌪𑌾𑌃 ।
𑌪𑌰𑌿𑌦𑍇𑌵𑌯𑌮𑌾𑌨𑌾𑌸𑍍𑌤𑍇 𑌸𑌰𑍍𑌵𑍇 𑌪𑍍𑌲𑌵𑌗𑌪𑍁𑌂𑌗𑌵𑌾𑌃 ॥ 25 ॥
𑌕𑌿𑌷𑍍𑌕𑌿𑌂𑌧𑌾 𑌹𑍍𑌯𑌦𑍍𑌯 𑌶𑍂𑌨𑍍𑌯𑌾𑌽𑌸𑍀𑌤𑍍𑌸𑍍𑌵𑌰𑍍𑌗𑌤𑍇 𑌵𑌾𑌨𑌰𑌾𑌧𑌿𑌪𑍇 ।
𑌉𑌦𑍍𑌯𑌾𑌨𑌾𑌨𑌿 𑌚 𑌶𑍂𑌨𑍍𑌯𑌾𑌨𑌿 𑌪𑌰𑍍𑌵𑌤𑌾𑌃 𑌕𑌾𑌨𑌨𑌾𑌨𑌿 𑌚 ॥ 26 ॥
𑌹𑌤𑍇 𑌪𑍍𑌲𑌵𑌗𑌶𑌾𑌰𑍍𑌦𑍂𑌲𑍇 𑌨𑌿𑌷𑍍𑌪𑍍𑌰𑌭𑌾 𑌵𑌾𑌨𑌰𑌾𑌃 𑌕𑍃𑌤𑌾𑌃 ।
𑌯𑌸𑍍𑌯 𑌵𑍇𑌗𑍇𑌨 𑌮𑌹𑌤𑌾 𑌕𑌾𑌨𑌨𑌾𑌨𑌿 𑌵𑌨𑌾𑌨𑌿 𑌚 ।
𑌪𑍁𑌷𑍍𑌪𑍌𑌘𑍇𑌣𑌾𑌨𑍁𑌬𑌧𑍍𑌯𑌂𑌤𑍇 𑌕𑌰𑌿𑌷𑍍𑌯𑌤𑌿 𑌤𑌦𑌦𑍍𑌯 𑌕𑌃 ॥ 2 ॥
𑌯𑍇𑌨 𑌦𑌤𑍍𑌤𑌂 𑌮𑌹𑌦𑍍𑌯𑍁𑌦𑍍𑌧𑌂 𑌗𑌂𑌧𑌰𑍍𑌵𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 2 ॥
𑌗𑍋𑌲𑌭𑌸𑍍𑌯 𑌮𑌹𑌾𑌬𑌾𑌹𑍋𑌰𑍍𑌦𑌶𑌵𑌰𑍍𑌷𑌾𑌣𑌿 𑌪𑌂𑌚 𑌚 ।
𑌨𑍈𑌵 𑌰𑌾𑌤𑍍𑌰𑍌 𑌨 𑌦𑌿𑌵𑌸𑍇 𑌤𑌦𑍍𑌯𑍁𑌦𑍍𑌧𑌮𑍁𑌪𑌶𑌾𑌮𑍍𑌯𑌤𑌿 ॥ 2 ॥
𑌤𑌤𑌸𑍍𑌤𑍁 𑌷𑍋𑌡𑌶𑍇 𑌵𑌰𑍍𑌷𑍇 𑌗𑍋𑌲𑌭𑍋 𑌵𑌿𑌨𑌿𑌪𑌾𑌤𑌿𑌤𑌃 ।
𑌹𑌤𑍍𑌵𑌾 𑌤𑌂 𑌦𑍁𑌰𑍍𑌵𑌿𑌨𑍀𑌤𑌂 𑌤𑍁 𑌵𑌾𑌲𑍀 𑌦𑌂𑌷𑍍𑌟𑍍𑌰𑌾𑌕𑌰𑌾𑌲𑌵𑌾𑌨𑍍 ॥ 30 ॥
𑌸𑌰𑍍𑌵𑌾𑌽𑌭𑌯𑌂𑌕𑌰𑍋𑌽𑌸𑍍𑌮𑌾𑌕𑌂 𑌕𑌥𑌮𑍇𑌷 𑌨𑌿𑌪𑌾𑌤𑌿𑌤𑌃 ।
𑌹𑌤𑍇 𑌤𑍁 𑌵𑍀𑌰𑍇 𑌪𑍍𑌲𑌵𑌗𑌾𑌧𑌿𑌪𑍇 𑌤𑌦𑌾 𑌪𑍍𑌲𑌵𑌂𑌗𑌮𑌾𑌸𑍍𑌤𑌤𑍍𑌰 𑌨 𑌶𑌰𑍍𑌮 𑌲𑍇𑌭𑌿𑌰𑍇 ।
𑌵𑌨𑍇𑌚𑌰𑌾𑌃 𑌸𑌿𑌂𑌹𑌯𑍁𑌤𑍇 𑌮𑌹𑌾𑌵𑌨𑍇 𑌯𑌥𑌾 𑌹𑌿 𑌗𑌾𑌵𑍋 𑌨𑌿𑌹𑌤𑍇 𑌗𑌵𑌾𑌂 𑌪𑌤𑍌 ॥ 31 ॥
𑌤𑌤𑌸𑍍𑌤𑍁 𑌤𑌾𑌰𑌾 𑌵𑍍𑌯𑌸𑌨𑌾𑌰𑍍𑌣𑌵𑌾𑌪𑍍𑌲𑍁𑌤𑌾 𑌮𑍃𑌤𑌸𑍍𑌯 𑌭𑌰𑍍𑌤𑍁𑌰𑍍𑌵𑌦𑌨𑌂 𑌸𑌮𑍀𑌕𑍍𑌷𑍍𑌯 𑌸𑌾 ।
𑌜𑌗𑌾𑌮 𑌭𑍂𑌮𑌿𑌂 𑌪𑌰𑌿𑌰𑌭𑍍𑌯 𑌵𑌾𑌲𑌿𑌨𑌂 𑌮𑌹𑌾𑌦𑍍𑌰𑍁𑌮𑌂 𑌛𑌿𑌨𑍍𑌨𑌮𑌿𑌵𑌾𑌶𑍍𑌰𑌿𑌤𑌾 𑌲𑌤𑌾 ॥ 32 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌦𑍍𑌵𑌾𑌵𑌿𑌂𑌶𑌸𑍍𑌸𑌰𑍍𑌗𑌃 ॥
