𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌿𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌏𑌵𑌮𑍁𑌕𑍍𑌤𑍍𑌵𑌾 𑌤𑍁 𑌵𑌚𑌨𑌂 𑌮𑌾𑌰𑍀𑌚𑍋 𑌰𑌾𑌵𑌣𑌂 𑌤𑌤𑌃 ।
𑌗𑌚𑍍𑌛𑌾𑌵𑍇𑌤𑍍𑌯𑌬𑍍𑌰𑌵𑍀𑌦𑍍𑌦𑍀𑌨𑍋 𑌭𑌯𑌾𑌦𑍍𑌰𑌾𑌤𑍍𑌰𑌿𑌂𑌚𑌰𑌪𑍍𑌰𑌭𑍋𑌃 ॥ 1 ॥
𑌦𑍃𑌷𑍍𑌟𑌶𑍍𑌚𑌾𑌹𑌂 𑌪𑍁𑌨𑌸𑍍𑌤𑍇𑌨 𑌶𑌰𑌚𑌾𑌪𑌾𑌸𑌿𑌧𑌾𑌰𑌿𑌣𑌾 ।
𑌮𑌦𑍍𑌵𑌧𑍋𑌦𑍍𑌯𑌤𑌶𑌸𑍍𑌤𑍍𑌰𑍇𑌽𑌣 𑌵𑌿𑌨𑌷𑍍𑌟𑌂 𑌜𑍀𑌵𑌿𑌤𑌂 𑌚 𑌮𑍇 ॥ 2 ॥
𑌨 𑌹𑌿 𑌰𑌾𑌮𑌂 𑌪𑌰𑌾𑌕𑍍𑌰𑌮𑍍𑌯 𑌜𑍀𑌵𑌨𑍍𑌪𑍍𑌰𑌤𑌿𑌨𑌿𑌵𑌰𑍍𑌤𑌤𑍇 ।
𑌵𑌰𑍍𑌤𑌤𑍇 𑌪𑍍𑌰𑌤𑌿𑌰𑍂𑌪𑍋𑌽𑌸𑍌 𑌯𑌮𑌦𑌂𑌡𑌹𑌤𑌸𑍍𑌯 𑌤𑍇 ॥ 3 ॥
𑌕𑌿𑌂 𑌨𑍁 𑌶𑌕𑍍𑌯𑌂 𑌮𑌯𑌾 𑌕𑌰𑍍𑌤𑍁𑌮𑍇𑌵𑌂 𑌤𑍍𑌵𑌯𑌿 𑌦𑍁𑌰𑌾𑌤𑍍𑌮𑌨𑌿 ।
𑌏𑌷 𑌗𑌚𑍍𑌛𑌾𑌮𑍍𑌯𑌹𑌂 𑌤𑌾𑌤 𑌸𑍍𑌵𑌸𑍍𑌤𑌿 𑌤𑍇𑌽𑌸𑍍𑌤𑍁 𑌨𑌿𑌶𑌾𑌚𑌰 ॥ 4 ॥
𑌪𑍍𑌰𑌹𑍃𑌷𑍍𑌟𑌸𑍍𑌤𑍍𑌵𑌭𑌵𑌤𑍍𑌤𑍇𑌨 𑌵𑌚𑌨𑍇𑌨 𑌸 𑌰𑌾𑌵𑌣𑌃 ।
𑌪𑌰𑌿𑌷𑍍𑌵𑌜𑍍𑌯 𑌸𑍁𑌸𑌂𑌶𑍍𑌲𑌿𑌷𑍍𑌟𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 5 ॥
𑌏𑌤𑌚𑍍𑌛𑍌𑌂𑌡𑍀𑌰𑍍𑌯𑌯𑍁𑌕𑍍𑌤𑌂 𑌤𑍇 𑌮𑌚𑍍𑌛𑌂𑌦𑌵𑌶𑌵𑌰𑍍𑌤𑌿𑌨𑌃 ।
𑌇𑌦𑌾𑌨𑍀𑌮𑌸𑌿 𑌮𑌾𑌰𑍀𑌚𑌃 𑌪𑍂𑌰𑍍𑌵𑌮𑌨𑍍𑌯𑍋 𑌨𑌿𑌶𑌾𑌚𑌰𑌃 ॥ 6 ॥
𑌆𑌰𑍁𑌹𑍍𑌯𑌤𑌾𑌮𑌯𑌂 𑌶𑍀𑌘𑍍𑌰𑌂 𑌰𑌥𑍋 𑌰𑌤𑍍𑌨𑌵𑌿𑌭𑍂𑌷𑌿𑌤𑌃 ।
𑌮𑌯𑌾 𑌸𑌹 𑌤𑌥𑌾 𑌯𑍁𑌕𑍍𑌤𑌃 𑌪𑌿𑌶𑌾𑌚𑌵𑌦𑌨𑍈𑌃 𑌖𑌰𑍈𑌃 ॥ ॥
𑌪𑍍𑌰𑌲𑍋𑌭𑌯𑌿𑌤𑍍𑌵𑌾 𑌵𑍈𑌦𑍇𑌹𑍀𑌂 𑌯𑌥𑍇𑌷𑍍𑌟𑌂 𑌗𑌂𑌤𑍁𑌮𑌰𑍍𑌹𑌸𑌿 ।
𑌤𑌾𑌂 𑌶𑍂𑌨𑍍𑌯𑍇 𑌪𑍍𑌰𑌸𑌭𑌂 𑌸𑍀𑌤𑌾𑌮𑌾𑌨𑌯𑌿𑌷𑍍𑌯𑌾𑌮𑌿 𑌮𑍈𑌥𑌿𑌲𑍀𑌮𑍍 ॥ ॥
𑌤𑌤𑍋 𑌰𑌾𑌵𑌣𑌮𑌾𑌰𑍀𑌚𑍌 𑌵𑌿𑌮𑌾𑌨𑌮𑌿𑌵 𑌤𑌂 𑌰𑌥𑌮𑍍 ।
𑌆𑌰𑍁𑌹𑍍𑌯 𑌯𑌯𑌤𑍁𑌶𑍍𑌶𑍀𑌘𑍍𑌰𑌂 𑌤𑌸𑍍𑌮𑌾𑌦𑌾𑌶𑍍𑌰𑌮𑌮𑌂𑌡𑌲𑌾𑌤𑍍 ॥ ॥
𑌤𑌥𑍈𑌵 𑌤𑌤𑍍𑌰 𑌪𑌶𑍍𑌯𑌂𑌤𑍌 𑌪𑌤𑍍𑌤𑌨𑌾𑌨𑌿 𑌵𑌨𑌾𑌨𑌿 𑌚 ।
𑌗𑍀𑌰𑍀𑌂𑌶𑍍𑌚 𑌸𑌰𑌿𑌤𑌸𑍍𑌸𑌰𑍍𑌵𑌾 𑌰𑌾𑌷𑍍𑌟𑍍𑌰𑌾𑌣𑌿 𑌨𑌗𑌰𑌾𑌣𑌿 𑌚 ॥ 10 ॥
𑌸𑌮𑍇𑌤𑍍𑌯 𑌦𑌂𑌡𑌕𑌾𑌰𑌣𑍍𑌯𑌂 𑌰𑌾𑌘𑌵𑌸𑍍𑌯𑌾𑌶𑍍𑌰𑌮𑌂 𑌤𑌤𑌃 ।
𑌦𑌦𑌰𑍍𑌶 𑌸𑌹 𑌮𑌾𑌰𑍀𑌚𑍋 𑌰𑌾𑌵𑌣𑍋 𑌰𑌾𑌕𑍍𑌷𑌸𑌾𑌧𑌿𑌪𑌃 ॥ 11 ॥
𑌅𑌵𑌤𑍀𑌰𑍍𑌯 𑌰𑌥𑌾𑌤𑍍𑌤𑌸𑍍𑌮𑌾𑌤𑍍𑌤𑌤𑌃 𑌕𑌾𑌂𑌚𑌨𑌭𑍂𑌷𑌣𑌾𑌤𑍍 ।
𑌹𑌸𑍍𑌤𑍇 𑌗𑍃𑌹𑍀𑌤𑍍𑌵𑌾 𑌮𑌾𑌰𑍀𑌚𑌂 𑌰𑌾𑌵𑌣𑍋 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 12 ॥
𑌏𑌤𑌦𑌾𑌶𑍍𑌰𑌮𑌪𑌦𑌂 𑌦𑍃𑌶𑍍𑌯𑌤𑍇 𑌕𑌦𑌲𑍀𑌵𑍃𑌤𑌮𑍍 ।
𑌕𑍍𑌰𑌿𑌯𑌤𑌾𑌂 𑌤𑌤𑍍𑌸𑌖𑍇 𑌶𑍀𑌘𑍍𑌰𑌂 𑌯𑌦𑌰𑍍𑌥𑌂 𑌵𑌯𑌮𑌾𑌗𑌤𑌾𑌃 ॥ 13 ॥
𑌸 𑌰𑌾𑌵𑌣𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌮𑌾𑌰𑍀𑌚𑍋 𑌰𑌾𑌕𑍍𑌷𑌸𑌸𑍍𑌤𑌦𑌾 ।
𑌮𑍃𑌗𑍋 𑌭𑍂𑌤𑍍𑌵𑌾𑌽𑌶𑍍𑌰𑌮𑌦𑍍𑌵𑌾𑌰𑌿 𑌰𑌾𑌮𑌸𑍍𑌯 𑌵𑌿𑌚𑌚𑌾𑌰 𑌹 ॥ 14 ॥
𑌸 𑌤𑍁 𑌤𑌦𑍍𑌰𑍂𑌪𑌮𑌾𑌸𑍍𑌥𑌾𑌯 𑌮𑌹𑌦𑌦𑍍𑌭𑍁𑌤𑌦𑌰𑍍𑌶𑌨𑌮𑍍 ।
𑌮𑌣𑌿𑌪𑍍𑌰𑌵𑌰𑌶𑍃𑌂𑌗𑌾𑌗𑍍𑌰𑌸𑍍𑌸𑌿𑌤𑌾𑌸𑌿𑌤𑌮𑍁𑌖𑌾𑌕𑍃𑌤𑌿𑌃 ॥ 15 ॥
𑌰𑌕𑍍𑌤𑌪𑌦𑍍𑌮𑍋𑌤𑍍𑌪𑌲𑌮𑍁𑌖 𑌇𑌂𑌦𑍍𑌰𑌨𑍀𑌲𑍋𑌤𑍍𑌪𑌲𑌶𑍍𑌰𑌵𑌾𑌃 ।
𑌕𑌿𑌂𑌚𑌿𑌦𑌭𑍍𑌯𑍁𑌨𑍍𑌨𑌤𑌗𑍍𑌰𑍀𑌵 𑌇𑌂𑌦𑍍𑌰𑌨𑍀𑌲𑌦𑌲𑌾𑌧𑌰𑌃 ॥ 16 ॥
𑌕𑍁𑌂𑌦𑍇𑌂𑌦𑍁𑌵𑌜𑍍𑌰𑌸𑌂𑌕𑌾𑌶𑌮𑍁𑌦𑌰𑌂 𑌚𑌾𑌸𑍍𑌯 𑌭𑌾𑌸𑍍𑌵𑌰𑌮𑍍 ।
𑌮𑌧𑍂𑌕𑌨𑌿𑌭𑌪𑌾𑌰𑍍𑌶𑍍𑌵𑌶𑍍𑌚 𑌪𑌦𑍍𑌮𑌕𑌿𑌂𑌜𑌲𑍍𑌕𑌸𑌨𑍍𑌨𑌿𑌭𑌃 ॥ 1 ॥
𑌵𑍈𑌡𑍂𑌰𑍍𑌯𑌸𑌂𑌕𑌾𑌶𑌖𑍁𑌰𑌸𑍍𑌤𑌨𑍁𑌜𑌂𑌘𑌸𑍍𑌸𑍁𑌸𑌂𑌹𑌤𑌃 ।
𑌇𑌂𑌦𑍍𑌰𑌾𑌯𑍁𑌧𑌸𑌵𑌰𑍍𑌣𑍇𑌨 𑌪𑍁𑌚𑍍𑌛𑍇𑌨𑍋𑌰𑍍𑌧𑍍𑌵𑌂 𑌵𑌿𑌰𑌾𑌜𑌤𑌾 ॥ 1 ॥
𑌮𑌨𑍋𑌹𑌰𑌸𑍍𑌸𑍍𑌨𑌿𑌗𑍍𑌧𑌵𑌰𑍍𑌣𑍋 𑌰𑌤𑍍𑌨𑍈𑌰𑍍𑌨𑌾𑌨𑌾𑌵𑌿𑌧𑍈𑌰𑍍𑌵𑍃𑌤𑌃 ।
𑌕𑍍𑌷𑌣𑍇𑌨 𑌰𑌾𑌕𑍍𑌷𑌸𑍋 𑌜𑌾𑌤𑍋 𑌮𑍃𑌗𑌃 𑌪𑌰𑌮𑌶𑍋𑌭𑌨𑌃 ॥ 1 ॥
𑌵𑌨𑌂 𑌪𑍍𑌰𑌜𑍍𑌵𑌲𑌯𑌨𑍍𑌰𑌮𑍍𑌯𑌂 𑌰𑌾𑌮𑌾𑌶𑍍𑌰𑌮𑌪𑌦𑌂 𑌚 𑌤𑌤𑍍 ।
𑌮𑌨𑍋𑌹𑌰𑌂 𑌦𑌰𑍍𑌶𑌨𑍀𑌯𑌂 𑌰𑍂𑌪𑌂 𑌕𑍃𑌤𑍍𑌵𑌾 𑌸 𑌰𑌾𑌕𑍍𑌷𑌸𑌃 ॥ 20 ॥
𑌪𑍍𑌰𑌲𑍋𑌭𑌨𑌾𑌰𑍍𑌥𑌂 𑌵𑍈𑌦𑍇𑌹𑍍𑌯𑌾 𑌨𑌾𑌨𑌾𑌧𑌾𑌤𑍁𑌵𑌿𑌚𑌿𑌤𑍍𑌰𑌿𑌤𑌮𑍍 ।
𑌵𑌿𑌚𑌰𑌨𑍍𑌗𑌚𑍍𑌛𑌤𑍇 𑌤𑌸𑍍𑌮𑌾𑌚𑍍𑌛𑌾𑌦𑍍𑌵𑌲𑌾𑌨𑌿 𑌸𑌮𑌂𑌤𑌤𑌃 ॥ 21 ॥
𑌰𑍂𑌪𑍍𑌯𑍈𑌰𑍍𑌬𑌿𑌂𑌦𑍁𑌶𑌤𑍈𑌶𑍍𑌚𑌿𑌤𑍍𑌰𑍋 𑌭𑍂𑌤𑍍𑌵𑌾 𑌸 𑌪𑍍𑌰𑌿𑌯𑌦𑌰𑍍𑌶𑌨𑌃 ।
𑌵𑌿𑌟𑌪𑍀𑌨𑌾𑌂 𑌕𑌿𑌸𑌲𑌯𑌾𑌨𑍍𑌭𑌙𑍍𑌤𑍍𑌕𑍍𑌵𑌾𑌽𑌦𑌨𑍍𑌵𑌿𑌚𑌚𑌾𑌰 𑌹 ॥ 22 ॥
𑌕𑌦𑌲𑍀𑌗𑍃𑌹𑌕𑌂 𑌗𑌤𑍍𑌵𑌾 𑌕𑌰𑍍𑌣𑌿𑌕𑌾𑌰𑌾𑌨𑌿𑌤𑌸𑍍𑌤𑌤𑌃 ।
𑌸𑌮𑌾𑌶𑍍𑌰𑌯𑌨𑍍𑌮𑌂𑌦𑌗𑌤𑌿𑌸𑍍𑌸𑍀𑌤𑌾𑌸𑌂𑌦𑌰𑍍𑌶𑌨𑌂 𑌤𑌥𑌾 ॥ 23 ॥
𑌰𑌾𑌜𑍀𑌵𑌚𑌿𑌤𑍍𑌰𑌪𑍃𑌷𑍍𑌠𑌸𑍍𑌸 𑌵𑌿𑌰𑌰𑌾𑌜 𑌮𑌹𑌾𑌮𑍃𑌗𑌃 ।
𑌰𑌾𑌮𑌾𑌶𑍍𑌰𑌮𑌪𑌦𑌾𑌭𑍍𑌯𑌾𑌶𑍇 𑌵𑌿𑌚𑌚𑌾𑌰 𑌯𑌥𑌾𑌸𑍁𑌖𑌮𑍍 ॥ 24 ॥
𑌪𑍁𑌨𑌰𑍍𑌗𑌤𑍍𑌵𑌾 𑌨𑌿𑌵𑍃𑌤𑍍𑌤𑌶𑍍𑌚 𑌵𑌿𑌚𑌚𑌾𑌰 𑌮𑍃𑌗𑍋𑌤𑍍𑌤𑌮𑌃 ।
𑌗𑌤𑍍𑌵𑌾 𑌮𑍁𑌹𑍂𑌰𑍍𑌤𑌂 𑌤𑍍𑌵𑌰𑌯𑌾 𑌪𑍁𑌨𑌃 𑌪𑍍𑌰𑌤𑌿𑌨𑌿𑌵𑌰𑍍𑌤𑌤𑍇 ॥ 25 ॥
𑌵𑌿𑌕𑍍𑌰𑍀𑌡𑌂𑌶𑍍𑌚 𑌕𑍍𑌵𑌚𑌿𑌦𑍍𑌭𑍂𑌮𑍌 𑌪𑍁𑌨𑌰𑍇𑌵 𑌨𑌿𑌷𑍀𑌦𑌤𑌿 ।
𑌆𑌶𑍍𑌰𑌮𑌦𑍍𑌵𑌾𑌰𑌮𑌾𑌗𑌮𑍍𑌯 𑌮𑍃𑌗𑌯𑍂𑌥𑌾𑌨𑌿 𑌗𑌚𑍍𑌛𑌤𑌿 ॥ 26 ॥
𑌮𑍃𑌗𑌯𑍂𑌥𑍈𑌰𑌨𑍁𑌗𑌤𑌃 𑌪𑍁𑌨𑌰𑍇𑌵 𑌨𑌿𑌵𑌰𑍍𑌤𑌤𑍇 ।
𑌸𑍀𑌤𑌾𑌦𑌰𑍍𑌶𑌨𑌮𑌾𑌕𑌾𑌂𑌕𑍍𑌷𑌨𑍍𑌰𑌾𑌕𑍍𑌷𑌸𑍋 𑌮𑍃𑌗𑌤𑌾𑌂 𑌗𑌤𑌃 ॥ 2 ॥
𑌪𑌰𑌿𑌭𑍍𑌰𑌮𑌤𑌿 𑌚𑌿𑌤𑍍𑌰𑌾𑌣𑌿 𑌮𑌂𑌡𑌲𑌾𑌨𑌿 𑌵𑌿𑌨𑌿𑌷𑍍𑌪𑌤𑌨𑍍 ।
𑌸𑌮𑍁𑌦𑍍𑌵𑍀𑌕𑍍𑌷𑍍𑌯 𑌚 𑌤𑍇 𑌸𑌰𑍍𑌵𑍇 𑌮𑍃𑌗𑌾 𑌹𑍍𑌯𑌨𑍍𑌯𑍇 𑌵𑌨𑍇𑌚𑌰𑌾𑌃 ॥ 2 ॥
𑌉𑌪𑌾𑌗𑌮𑍍𑌯 𑌸𑌮𑌾𑌘𑍍𑌰𑌾𑌯 𑌵𑌿𑌦𑍍𑌰𑌵𑌂𑌤𑌿 𑌦𑌿𑌶𑍋 𑌦𑌶 ।
𑌰𑌾𑌕𑍍𑌷𑌸𑌸𑍍𑌸𑍋𑌽𑌪𑌿 𑌤𑌾𑌨𑍍𑌵𑌨𑍍𑌯𑌾𑌨𑍍𑌮𑍃𑌗𑌾𑌨𑍍𑌮𑍃𑌗𑌵𑌧𑍇 𑌰𑌤𑌃 ॥ 2 ॥
𑌪𑍍𑌰𑌚𑍍𑌛𑌾𑌦𑌨𑌾𑌰𑍍𑌥𑌂 𑌭𑌾𑌵𑌸𑍍𑌯 𑌨 𑌭𑌕𑍍𑌷𑌯𑌤𑌿 𑌸𑌂𑌸𑍍𑌪𑍃𑌶𑌨𑍍 ।
𑌤𑌸𑍍𑌮𑌿𑌨𑍍𑌨𑍇𑌵 𑌤𑌤𑌃 𑌕𑌾𑌲𑍇 𑌵𑍈𑌦𑍇𑌹𑍀 𑌶𑍁𑌭𑌲𑍋𑌚𑌨𑌾 ॥ 30 ॥
𑌕𑍁𑌸𑍁𑌮𑌾𑌵𑌚𑌯𑌵𑍍𑌯𑌗𑍍𑌰𑌾 𑌪𑌾𑌦𑌪𑌾𑌨𑌭𑍍𑌯𑌵𑌰𑍍𑌤𑌤 ।
𑌕𑌰𑍍𑌣𑌿𑌕𑌾𑌰𑌾𑌨𑌶𑍋𑌕𑌾𑌂𑌶𑍍𑌚 𑌚𑍂𑌤𑌾𑌂𑌶𑍍𑌚 𑌮𑌦𑌿𑌰𑍇𑌕𑍍𑌷𑌣𑌾 ॥ 31 ॥
𑌕𑍁𑌸𑍁𑌮𑌾𑌨𑍍𑌯𑌵𑌚𑌿𑌨𑍍𑌵𑌂𑌤𑍀 𑌚𑌚𑌾𑌰 𑌰𑍁𑌚𑌿𑌰𑌾𑌨𑌨𑌾 ।
𑌅𑌨𑌰𑍍𑌹𑌾𑌽𑌰𑌣𑍍𑌯𑌵𑌾𑌸𑌸𑍍𑌯 𑌸𑌾 𑌤𑌂 𑌰𑌤𑍍𑌨𑌮𑌯𑌂 𑌮𑍃𑌗𑌮𑍍 ॥ 32 ॥
𑌮𑍁𑌕𑍍𑌤𑌾𑌮𑌣𑌿 𑌵𑌿𑌚𑌿𑌤𑍍𑌰𑌾𑌂𑌗𑌂 𑌦𑌦𑌰𑍍𑌶 𑌪𑌰𑌮𑌾𑌂𑌗𑌨𑌾 ।
𑌸𑌾 𑌤𑌂 𑌰𑍁𑌚𑌿𑌰𑌦𑌂𑌤𑍋𑌷𑍍𑌠𑍀 𑌰𑍂𑌪𑍍𑌯𑌧𑌾𑌤𑍁𑌤𑌨𑍂𑌰𑍁𑌹𑌮𑍍 ॥ 33 ॥
𑌵𑌿𑌸𑍍𑌮𑌯𑍋𑌤𑍍𑌫𑍁𑌲𑍍𑌲𑌨𑌯𑌨𑌾 𑌸𑌸𑍍𑌨𑍇𑌹𑌂 𑌸𑌮𑍁𑌦𑍈𑌕𑍍𑌷𑌤 ।
𑌸 𑌚 𑌤𑌾𑌂 𑌰𑌾𑌮𑌦𑌯𑌿𑌤𑌾𑌂 𑌪𑌶𑍍𑌯𑌨𑍍𑌮𑌾𑌯𑌾𑌮𑌯𑍋 𑌮𑍃𑌗𑌃 ॥ 34 ॥
𑌵𑌿𑌚𑌚𑌾𑌰 𑌪𑍁𑌨𑌶𑍍𑌚𑌿𑌤𑍍𑌰𑌂 𑌦𑍀𑌪𑌯𑌨𑍍𑌨𑌿𑌵 𑌤𑌦𑍍𑌵𑌨𑌮𑍍 ।
𑌅𑌦𑍃𑌷𑍍𑌟𑌪𑍂𑌰𑍍𑌵𑌂 𑌤𑌂 𑌦𑍃𑌷𑍍𑌟𑍍𑌵𑌾 𑌨𑌾𑌨𑌾𑌰𑌤𑍍𑌨𑌮𑌯𑌂 𑌮𑍃𑌗𑌮𑍍 ॥ 35 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌦𑍍𑌵𑌿𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
