𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌷𑌣𑍍𑌣𑌵𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌤𑌾𑌂 𑌤𑌥𑌾 𑌦𑌰𑍍𑌶𑌯𑌿𑌤𑍍𑌵𑌾 𑌤𑍁 𑌮𑍈𑌥𑌿𑌲𑍀𑌂 𑌗𑌿𑌰𑌿𑌨𑌿𑌮𑍍𑌨𑌗𑌾𑌮𑍍 ।
𑌨𑌿𑌷𑌸𑌾𑌦 𑌗𑌿𑌰𑌿𑌪𑍍𑌰𑌸𑍍𑌥𑍇 𑌸𑍀𑌤𑌾𑌂 𑌮𑌾𑌂𑌸𑍇𑌨 𑌛𑌂𑌦𑌯𑌨𑍍 ॥ 1 ॥
𑌇𑌦𑌂 𑌮𑍇𑌧𑍍𑌯𑌮𑌿𑌦𑌂 𑌸𑍍𑌵𑌾𑌦𑍁 𑌨𑌿𑌷𑍍𑌟𑌪𑍍𑌤𑌮𑌿𑌦𑌮𑌗𑍍𑌨𑌿𑌨𑌾 ।
𑌏𑌵𑌮𑌾𑌸𑍍𑌤𑍇 𑌸 𑌧𑌰𑍍𑌮𑌾𑌤𑍍𑌮𑌾 𑌸𑍀𑌤𑌯𑌾 𑌸𑌹 𑌰𑌾𑌘𑌵𑌃 ॥ 2 ॥
𑌤𑌥𑌾 𑌤𑌤𑍍𑌰𑌾𑌽𑌸𑌤𑌸𑍍𑌤𑌸𑍍𑌯 𑌭𑌰𑌤𑌸𑍍𑌯𑍌𑌪𑌯𑌾𑌯𑌿𑌨𑌃 ।
𑌸𑍈𑌨𑍍𑌯𑌰𑍇𑌣𑍁𑌶𑍍𑌚 𑌶𑌬𑍍𑌦𑌶𑍍𑌚 𑌪𑍍𑌰𑌾𑌦𑍁𑌰𑌾𑌸𑍍𑌤𑌾𑌂 𑌨𑌭𑌸𑍍𑌪𑍃𑌶𑍌 ॥ 3 ॥
𑌏𑌤𑌸𑍍𑌮𑌿𑌨𑍍𑌨𑌂𑌤𑌰𑍇 𑌤𑍍𑌰𑌸𑍍𑌤𑌾 𑌶𑍍𑌶𑌬𑍍𑌦𑍇𑌨 𑌮𑌹𑌤𑌾 𑌤𑌤𑌃 ।
𑌅𑌰𑍍𑌦𑌿𑌤𑌾 𑌯𑍂𑌥𑌪𑌾 𑌮𑌤𑍍𑌤𑌾 𑌸𑍍𑌸𑌯𑍂𑌥𑌾 𑌦𑍁𑌦𑍍𑌰𑍁𑌵𑍁𑌰𑍍𑌦𑌿𑌶𑌃 ॥ 4 ॥
𑌸 𑌤𑌂 𑌸𑍈𑌨𑍍𑌯𑌸𑌮𑍁𑌦𑍍𑌧𑍂𑌤𑌂 𑌶𑌬𑍍𑌦𑌂 𑌶𑍁𑌶𑍍𑌰𑌾𑌵 𑌰𑌾𑌘𑌵𑌃 ।
𑌤𑌾𑌂 𑌶𑍍𑌚 𑌵𑌿𑌪𑍍𑌰𑌦𑍍𑌰𑍁𑌤𑌾𑌨𑍍𑌸𑌰𑍍𑌵𑌾𑌨𑍍𑌯𑍂𑌥𑌪𑌾𑌨𑌨𑍍𑌵𑌵𑍈𑌕𑍍𑌷𑌤 ॥ 5 ॥
𑌤𑌾𑌂𑌶𑍍𑌚 𑌵𑌿𑌦𑍍𑌰𑍁𑌵𑌤𑍋 𑌦𑍃𑌷𑍍𑌟𑍍𑌵𑌾 𑌤𑌂 𑌚 𑌶𑍍𑌰𑍁𑌤𑍍𑌵𑌾 𑌚 𑌨𑌿𑌸𑍍𑌵𑌨𑌮𑍍 ।
𑌉𑌵𑌾𑌚 𑌰𑌾𑌮 𑌸𑍍𑌸𑍌𑌮𑌿𑌤𑍍𑌰𑌿𑌂 𑌲𑌕𑍍𑌷𑍍𑌮𑌣𑌂 𑌦𑍀𑌪𑍍𑌤𑌤𑍇𑌜𑌸𑌮𑍍 ॥ 6 ॥
𑌹𑌂𑌤 𑌲𑌕𑍍𑌷𑍍𑌮𑌣 𑌪𑌶𑍍𑌯𑍇𑌹 𑌸𑍁𑌮𑌿𑌤𑍍𑌰𑌾𑌸𑍁𑌪𑍍𑌰𑌜𑌾𑌸𑍍𑌤𑍍𑌵𑌯𑌾 ।
𑌭𑍀𑌮𑌸𑍍𑌤𑌨𑌿𑌤𑌗𑌂𑌭𑍀𑌰𑌸𑍍𑌤𑍁𑌮𑍁𑌲𑌃 𑌶𑍍𑌰𑍂𑌯𑌤𑍇 𑌸𑍍𑌵𑌨𑌃 ॥ ॥
𑌗𑌜𑌯𑍂𑌥𑌾𑌨𑌿 𑌵𑌾𑌽𑌰𑌣𑍍𑌯𑍇 𑌮𑌹𑌿𑌷𑌾 𑌵𑌾 𑌮𑌹𑌾𑌵𑌨𑍇 ।
𑌵𑌿𑌤𑍍𑌰𑌾𑌸𑌿𑌤𑌾 𑌮𑍃𑌗𑌾 𑌸𑍍𑌸𑌿𑌂𑌹𑍈 𑌸𑍍𑌸𑌹𑌸𑌾 𑌪𑍍𑌰𑌦𑍍𑌰𑍁𑌤𑌾 𑌦𑌿𑌶𑌃 ॥ ॥
𑌰𑌾𑌜𑌾 𑌵𑌾 𑌰𑌾𑌜𑌪𑍁𑌤𑍍𑌰𑍋 𑌵𑌾 𑌮𑍃𑌗𑌯𑌾𑌮𑌟𑌤𑍇 𑌵𑌨𑍇 ।
𑌅𑌨𑍍𑌯𑌦𑍍𑌵𑌾 𑌶𑍍𑌵𑌾𑌪𑌦𑌂 𑌕𑌿𑌂𑌚𑌿𑌤𑍍𑌸𑍌𑌮𑌿𑌤𑍍𑌰𑍇 𑌜𑍍𑌞𑌾𑌤𑍁𑌮𑌰𑍍𑌹𑌸𑌿 ॥ ॥
𑌸𑍁𑌦𑍁𑌶𑍍𑌚𑌰𑍋 𑌗𑌿𑌰𑌿𑌶𑍍𑌚𑌾𑌯𑌂 𑌪𑌕𑍍𑌷𑌿𑌣𑌾𑌮𑌪𑌿 𑌲𑌕𑍍𑌷𑍍𑌮𑌣 ।
𑌸𑌰𑍍𑌵𑌮𑍇𑌤𑌦𑍍𑌯𑌥𑌾𑌤𑌤𑍍𑌤𑍍𑌵𑌮𑌚𑌿𑌰𑌾𑌤𑍍 𑌜𑍍𑌞𑌾𑌤𑍁𑌮𑌰𑍍𑌹𑌸𑌿 ॥ 10 ॥
𑌸 𑌲𑌕𑍍𑌷𑍍𑌮𑌣 𑌸𑍍𑌸𑌂𑌤𑍍𑌵𑌰𑌿𑌤 𑌸𑍍𑌸𑌾𑌲𑌮𑌾𑌰𑍁𑌹𑍍𑌯 𑌪𑍁𑌷𑍍𑌪𑌿𑌤𑌮𑍍 ।
𑌪𑍍𑌰𑍇𑌕𑍍𑌷𑌮𑌾𑌣𑍋 𑌦𑌿𑌶 𑌸𑍍𑌸𑌰𑍍𑌵𑌾𑌃 𑌪𑍂𑌰𑍍𑌵𑌾𑌂 𑌦𑌿𑌶𑌮𑍁𑌦𑍈𑌕𑍍𑌷𑌤 ॥ 11 ॥
𑌉𑌦𑌙𑍍𑌮𑍁𑌖𑌃 𑌪𑍍𑌰𑍇𑌕𑍍𑌷𑌮𑌾𑌣𑍋 𑌦𑌦𑌰𑍍𑌶 𑌮𑌹𑌤𑍀𑌂 𑌚𑌮𑍂𑌮𑍍 ।
𑌰𑌥𑌾𑌶𑍍𑌵𑌗𑌜𑌸𑌂𑌬𑌾𑌧𑌾𑌂 𑌯𑌤𑍍𑌤𑍈𑌰𑍍𑌯𑍁𑌕𑍍𑌤𑌾𑌂 𑌪𑌦𑌾𑌤𑌿𑌭𑌿𑌃 ॥ 12 ॥
𑌤𑌾𑌮𑌶𑍍𑌵𑌗𑌜𑌸𑌂𑌪𑍂𑌰𑍍𑌣𑌾𑌂 𑌰𑌥𑌧𑍍𑌵𑌜𑌵𑌿𑌭𑍂𑌷𑌿𑌤𑌾𑌮𑍍 ।
𑌶𑌶𑌂𑌸 𑌸𑍇𑌨𑌾𑌂 𑌰𑌾𑌮𑌾𑌯 𑌵𑌚𑌨𑌂 𑌚𑍇𑌦𑌮𑌬𑍍𑌰𑌵𑍀𑌤𑍍 ॥ 13 ॥
𑌅𑌗𑍍𑌨𑌿𑌂 𑌸𑌂𑌶𑌮𑌯𑌤𑍍𑌵𑌾𑌰𑍍𑌯 𑌸𑍍𑌸𑍀𑌤𑌾 𑌚 𑌭𑌜𑌤𑌾𑌂 𑌗𑍁𑌹𑌾𑌮𑍍 ।
𑌸𑌜𑍍𑌯𑌂 𑌕𑍁𑌰𑍁𑌷𑍍𑌵 𑌚𑌾𑌪𑌂 𑌚 𑌶𑌰𑌾𑌂𑌶𑍍𑌚 𑌕𑌵𑌚𑌂 𑌤𑌥𑌾 ॥ 14 ॥
𑌤𑌂 𑌰𑌾𑌮𑌃 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑍋 𑌲𑌕𑍍𑌷𑍍𑌮𑌣𑌂 𑌪𑍍𑌰𑌤𑍍𑌯𑍁𑌵𑌾𑌚 𑌹 ।
𑌅𑌂𑌗𑌾𑌵𑍇𑌕𑍍𑌷𑌸𑍍𑌵 𑌸𑍌𑌮𑌿𑌤𑍍𑌰𑍇 𑌕𑌸𑍍𑌯𑍇𑌮𑌾𑌂 𑌮𑌨𑍍𑌯𑌸𑍇 𑌚𑌮𑍂𑌮𑍍 ॥ 15 ॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌰𑌾𑌮𑍇𑌣 𑌲𑌕𑍍𑌷𑍍𑌮𑌣𑍋 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।
𑌦𑌿𑌧𑌕𑍍𑌷𑌨𑍍𑌨𑌿𑌵 𑌤𑌾𑌂 𑌸𑍇𑌨𑌾𑌂 𑌰𑍁𑌷𑌿𑌤𑌃 𑌪𑌾𑌵𑌕𑍋 𑌯𑌥𑌾 ॥ 16 ॥
𑌸𑌂𑌪𑌨𑍍𑌨𑌂 𑌰𑌾𑌜𑍍𑌯𑌮𑌿𑌚𑍍𑌛𑌂𑌸𑍍𑌤𑍁 𑌵𑍍𑌯𑌕𑍍𑌤𑌂 𑌪𑍍𑌰𑌾𑌪𑍍𑌯𑌾𑌭𑌿𑌷𑍇𑌚𑌨𑌮𑍍 ।
𑌆𑌵𑌾𑌂 𑌹𑌂𑌤𑍁𑌂 𑌸𑌮𑌭𑍍𑌯𑍇𑌤𑌿 𑌕𑍈𑌕𑍇𑌯𑍍𑌯𑌾 𑌭𑌰𑌤𑌸𑍍𑌸𑍁𑌤𑌃 ॥ 1 ॥
𑌏𑌷 𑌵𑍈 𑌸𑍁𑌮𑌹𑌾𑌂𑌛𑍍𑌰𑍀𑌮𑌾𑌨𑍍𑌵𑌿𑌟𑌪𑍀 𑌸𑌂𑌪𑍍𑌰𑌕𑌾𑌶𑌤𑍇 ।
𑌵𑌿𑌰𑌾𑌜𑌤𑍍𑌯𑍁𑌦𑍍𑌗𑌤𑌸𑍍𑌕𑌂𑌧𑌂 𑌕𑍋𑌵𑌿𑌦𑌾𑌰𑌧𑍍𑌵𑌜𑍋 𑌰𑌥𑍇 ॥ 1 ॥
𑌅𑌸𑍌 𑌹𑌿 𑌸𑍁𑌮𑌹𑌾𑌸𑍍𑌕𑌂𑌧𑍋 𑌵𑌿𑌟𑌪𑍀 𑌚 𑌮𑌹𑌾𑌦𑍍𑌰𑍁𑌮𑌃 ।
𑌵𑌿𑌰𑌾𑌜𑌤𑍇 𑌮𑌹𑌾𑌸𑍈𑌨𑍍𑌯𑍇 𑌕𑍋𑌵𑌿𑌦𑌾𑌰𑌧𑍍𑌵𑌜𑍋 𑌰𑌥𑍇 ॥ 1 ॥
𑌭𑌜𑌂𑌤𑍍𑌯𑍇𑌤𑍇 𑌯𑌥𑌾𑌕𑌾𑌮𑌮𑌶𑍍𑌵𑌾𑌨𑌾𑌰𑍁𑌹𑍍𑌯 𑌶𑍀𑌘𑍍𑌰𑌗𑌾𑌨𑍍 ।
𑌏𑌤𑍇 𑌭𑍍𑌰𑌾𑌜𑌂𑌤𑌿 𑌸𑌂𑌹𑍃𑌷𑍍𑌟𑌾 𑌗𑌜𑌾𑌨𑌾𑌰𑍁𑌹𑍍𑌯 𑌸𑌾𑌦𑌿𑌨𑌃 ॥ 20 ॥
𑌗𑍃𑌹𑍀𑌤𑌧𑌨𑍁𑌷𑍌 𑌚𑌾𑌵𑌾𑌂 𑌗𑌿𑌰𑌿𑌂 𑌵𑍀𑌰 𑌶𑍍𑌰𑌯𑌾𑌵𑌹𑍈 ।
𑌅𑌥𑌵𑍇𑌹𑍈𑌵 𑌤𑌿𑌷𑍍𑌠𑌾𑌵 𑌸𑍍𑌸𑌨𑍍𑌨𑌦𑍍𑌧𑌾𑌵𑍁𑌦𑍍𑌯𑌤𑌾𑌯𑍁𑌧𑍌 ॥ 21 ॥
𑌅𑌪𑌿 𑌨𑍌 𑌵𑌶𑌮𑌾𑌗𑌚𑍍𑌛𑍇𑌤𑍍𑌕𑍋𑌵𑌿𑌦𑌾𑌰𑌧𑍍𑌵𑌜𑍋 𑌰𑌣𑍇 ।
𑌅𑌪𑌿 𑌦𑍍𑌰𑌕𑍍𑌷𑍍𑌯𑌾𑌮𑌿 𑌭𑌰𑌤𑌂 𑌯𑌤𑍍𑌕𑍃𑌤𑍇 𑌵𑍍𑌯𑌸𑌨𑌂 𑌮𑌹𑌤𑍍 ॥ 22 ॥
𑌤𑍍𑌵𑌯𑌾 𑌰𑌾𑌘𑌵 𑌸𑌂𑌪𑍍𑌰𑌾𑌪𑍍𑌤𑌂 𑌸𑍀𑌤𑌯𑌾 𑌚 𑌮𑌯𑌾 𑌤𑌥𑌾 ।
𑌯𑌨𑍍𑌨𑌿𑌮𑌿𑌤𑍍𑌤𑌂 𑌭𑌵𑌾𑌨𑍍𑌰𑌾𑌜𑍍𑌯𑌾𑌚𑍍𑌛𑍍𑌯𑍁𑌤𑍋 𑌰𑌾𑌘𑌵 𑌶𑌾𑌶𑍍𑌵𑌤𑌾𑌤𑍍 ॥ 23 ॥
𑌸𑌂𑌪𑍍𑌰𑌾𑌪𑍍𑌤𑍋𑌽𑌯𑌮𑌰𑌿𑌰𑍍𑌵𑍀𑌰 𑌭𑌰𑌤𑍋 𑌵𑌧𑍍𑌯 𑌏𑌵 𑌮𑍇 ।
𑌭𑌰𑌤𑌸𑍍𑌯 𑌵𑌧𑍇 𑌦𑍋𑌷𑌂 𑌨𑌾𑌹𑌂 𑌪𑌶𑍍𑌯𑌾𑌮𑌿 𑌰𑌾𑌘𑌵 ।
𑌪𑍂𑌰𑍍𑌵𑌾𑌪𑌕𑌾𑌰𑌿𑌣𑌂 𑌹𑌤𑍍𑌵𑌾 𑌨 𑌹𑍍𑌯𑌧𑌰𑍍𑌮𑍇𑌣 𑌯𑍁𑌜𑍍𑌯𑌤𑍇 ॥ 24 ॥
𑌪𑍂𑌰𑍍𑌵𑌾𑌪𑌕𑌾𑌰𑍀 𑌭𑌰𑌤𑌸𑍍𑌤𑍍𑌯𑌕𑍍𑌤𑌧𑌰𑍍𑌮𑌶𑍍𑌚 𑌰𑌾𑌘𑌵 ।
𑌏𑌤𑌸𑍍𑌮𑌿𑌨𑍍𑌨𑌿𑌹𑌤𑍇 𑌕𑍃𑌤𑍍𑌸𑍍𑌨𑌾𑌮𑌨𑍁𑌶𑌾𑌧𑌿 𑌵𑌸𑍁𑌂𑌧𑌰𑌾𑌮𑍍 ॥ 25 ॥
𑌅𑌦𑍍𑌯 𑌪𑍁𑌤𑍍𑌰𑌂 𑌹𑌤𑌂 𑌸𑌂𑌖𑍍𑌯𑍇 𑌕𑍈𑌕𑍇𑌯𑍀 𑌰𑌾𑌜𑍍𑌯𑌕𑌾𑌮𑍁𑌕𑌾 ।
𑌮𑌯𑌾 𑌪𑌶𑍍𑌯𑍇𑌤𑍍𑌸𑍁𑌦𑍁𑌃𑌖𑌾𑌰𑍍𑌤𑌾 𑌹𑌸𑍍𑌤𑌿𑌭𑌗𑍍𑌨𑌮𑌿𑌵 𑌦𑍍𑌰𑍁𑌮𑌮𑍍 ॥ 26 ॥
𑌕𑍈𑌕𑍇𑌯𑍀𑌂 𑌚 𑌵𑌧𑌿𑌷𑍍𑌯𑌾𑌮𑌿 𑌸𑌾𑌨𑍁𑌬𑌂𑌧𑌾𑌂 𑌸𑌬𑌾𑌂𑌧𑌵𑌾𑌮𑍍 ।
𑌕𑌲𑍁𑌷𑍇𑌣𑌾𑌦𑍍𑌯 𑌮𑌹𑌤𑌾 𑌮𑍇𑌦𑌿𑌨𑍀 𑌪𑌰𑌿𑌮𑍁𑌚𑍍𑌯𑌤𑌾𑌮𑍍 ॥ 2 ॥
𑌅𑌦𑍍𑌯𑍇𑌮𑌂 𑌸𑌂𑌯𑌤𑌂 𑌕𑍍𑌰𑍋𑌧𑌮𑌸𑌤𑍍𑌕𑌾𑌰𑌂 𑌚 𑌮𑌾𑌨𑌦 ।
𑌮𑍋𑌕𑍍𑌷𑍍𑌯𑌾𑌮𑌿 𑌶𑌤𑍍𑌰𑍁𑌸𑍈𑌨𑍍𑌯𑍇𑌷𑍁 𑌕𑌕𑍍𑌷𑍇𑌷𑍍𑌵𑌿𑌵 𑌹𑍁𑌤𑌾𑌶𑌨𑌮𑍍 ॥ 2 ॥
𑌅𑌦𑍍𑌯𑍈𑌤𑌚𑍍𑌛𑌿𑌤𑍍𑌰𑌕𑍂𑌟𑌸𑍍𑌯 𑌕𑌾𑌨𑌨𑌂 𑌨𑌿𑌶𑌿𑌤𑍈 𑌶𑍍𑌶𑌰𑍈𑌃 ।
𑌛𑌿𑌂𑌦𑌂𑌚𑌤𑍍𑌰𑍁𑌶𑌰𑍀𑌰𑌾𑌣𑌿 𑌕𑌰𑌿𑌷𑍍𑌯𑍇 𑌶𑍋𑌣𑌿𑌤𑍋𑌕𑍍𑌷𑌿𑌤𑌮𑍍 ॥ 2 ॥
𑌶𑌰𑍈𑌰𑍍𑌨𑌿𑌰𑍍𑌭𑌿𑌨𑍍𑌨𑌹𑍃𑌦𑌯𑌾𑌨𑍍𑌕𑍁𑌂𑌜𑌰𑌾𑌂𑌸𑍍𑌤𑍁𑌰𑌗𑌾𑌂𑌸𑍍𑌤𑌥𑌾 ।
𑌶𑍍𑌵𑌾𑌪𑌦𑌾𑌃 𑌪𑌰𑌿𑌕𑌰𑍍𑌷𑌂𑌤𑍁 𑌨𑌰𑌾𑌂𑌶𑍍𑌚 𑌨𑌿𑌹𑌤𑌾𑌨𑍍𑌮𑌯𑌾 ॥ 30 ॥
𑌶𑌰𑌾𑌣𑌾𑌂 𑌧𑌨𑍁𑌷𑌶𑍍𑌚𑌾𑌹𑌮𑌨𑍃𑌣𑍋𑌽𑌸𑍍𑌮𑌿𑌨𑍍𑌮𑌹𑌾𑌵𑌨𑍇 ।
𑌸𑌸𑍈𑌨𑍍𑌯𑌂 𑌭𑌰𑌤𑌂 𑌹𑌤𑍍𑌵𑌾 𑌭𑌵𑌿𑌷𑍍𑌯𑌾𑌮𑌿 𑌨 𑌸𑌂𑌶𑌯𑌃 ॥ 31 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌷𑌣𑍍𑌣𑌵𑌤𑌿𑌤𑌮𑌸𑍍𑌸𑌰𑍍𑌗𑌃 ॥
