𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌮𑌣𑌿𑌂 𑌦𑌤𑍍𑌤𑍍𑌵𑌾 𑌤𑌤𑌃 𑌸𑍀𑌤𑌾 𑌹𑌨𑍂𑌮𑌂𑌤𑌮𑌥𑌾𑌬𑍍𑌰𑌵𑍀𑌤𑍍 ।
𑌅𑌭𑌿𑌜𑍍𑌞𑌾𑌨𑌮𑌭𑌿𑌜𑍍𑌞𑌾𑌤𑌮𑍇𑌤𑌦𑍍𑌰𑌾𑌮𑌸𑍍𑌯 𑌤𑌤𑍍𑌤𑍍𑌵𑌤𑌃 ॥ 1 ॥
𑌮𑌣𑌿𑌂 𑌤𑍁 𑌦𑍃𑌷𑍍𑌟𑍍𑌵𑌾 𑌰𑌾𑌮𑍋 𑌵𑍈 𑌤𑍍𑌰𑌯𑌾𑌣𑌾𑌂 𑌸𑌂𑌸𑍍𑌮𑌰𑌿𑌷𑍍𑌯𑌤𑌿 ।
𑌵𑍀𑌰𑍋 𑌜𑌨𑌨𑍍𑌯𑌾 𑌮𑌮 𑌚 𑌰𑌾𑌜𑍍𑌞𑍋 𑌦𑌶𑌰𑌥𑌸𑍍𑌯 𑌚 ॥ 2 ॥
𑌸 𑌭𑍂𑌯𑌸𑍍𑌤𑍍𑌵𑌂 𑌸𑌮𑍁𑌤𑍍𑌸𑌾𑌹𑍇 𑌚𑍋𑌦𑌿𑌤𑍋 𑌹𑌰𑌿𑌸𑌤𑍍𑌤𑌮 ।
𑌅𑌸𑍍𑌮𑌿𑌨𑍍𑌕𑌾𑌰𑍍𑌯𑌸𑌮𑌾𑌰𑌂𑌭𑍇 𑌪𑍍𑌰𑌚𑌿𑌂𑌤𑌯 𑌯𑌦𑍁𑌤𑍍𑌤𑌰𑌮𑍍 ॥ 3 ॥
𑌤𑍍𑌵𑌮𑌸𑍍𑌮𑌿𑌨𑍍𑌕𑌾𑌰𑍍𑌯𑌨𑌿𑌰𑍍𑌯𑍋𑌗𑍇 𑌪𑍍𑌰𑌮𑌾𑌣𑌂 𑌹𑌰𑌿𑌸𑌤𑍍𑌤𑌮 ।
𑌹𑌨𑍁𑌮𑌨𑍍𑌯𑌤𑍍𑌨𑌮𑌾𑌸𑍍𑌥𑌾𑌯 𑌦𑍁𑌃𑌖𑌕𑍍𑌷𑌯𑌕𑌰𑍋 𑌭𑌵 ॥ 4 ॥
𑌤𑌸𑍍𑌯 𑌚𑌿𑌂𑌤𑌯𑌤𑍋 𑌯𑌤𑍍𑌨𑍋 𑌦𑍁𑌃𑌖𑌕𑍍𑌷𑌯𑌕𑌰𑍋 𑌭𑌵𑍇𑌤𑍍 ।
𑌸 𑌤𑌥𑍇𑌤𑌿 𑌪𑍍𑌰𑌤𑌿𑌜𑍍𑌞𑌾𑌯 𑌮𑌾𑌰𑍁𑌤𑌿𑌰𑍍𑌭𑍀𑌮𑌵𑌿𑌕𑍍𑌰𑌮𑌃 ॥ 5 ॥
𑌶𑌿𑌰𑌸𑌾 𑌵𑌂𑌧𑍍𑌯 𑌵𑍈𑌦𑍇𑌹𑍀𑌂 𑌗𑌮𑌨𑌾𑌯𑍋𑌪𑌚𑌕𑍍𑌰𑌮𑍇 ।
𑌜𑍍𑌞𑌾𑌤𑍍𑌵𑌾 𑌸𑌂𑌪𑍍𑌰𑌸𑍍𑌥𑌿𑌤𑌂 𑌦𑍇𑌵𑍀 𑌵𑌾𑌨𑌰𑌂 𑌮𑌾𑌰𑍁𑌤𑌾𑌤𑍍𑌮𑌜𑌮𑍍 ॥ 6 ॥
𑌬𑌾𑌷𑍍𑌪𑌗𑌦𑍍𑌗𑌦𑌯𑌾 𑌵𑌾𑌚𑌾 𑌮𑍈𑌥𑌿𑌲𑍀 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।
𑌕𑍁𑌶𑌲𑌂 𑌹𑌨𑍁𑌮𑌨𑍍𑌬𑍍𑌰𑍂𑌯𑌾𑌃 𑌸𑌹𑌿𑌤𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ ॥
𑌸𑍁𑌗𑍍𑌰𑍀𑌵𑌂 𑌚 𑌸𑌹𑌾𑌮𑌾𑌤𑍍𑌯𑌂 𑌵𑍃𑌦𑍍𑌧𑌾𑌨𑍍 𑌸𑌰𑍍𑌵𑌾𑌂𑌶𑍍𑌚 𑌵𑌾𑌨𑌰𑌾𑌨𑍍 ।
𑌬𑍍𑌰𑍂𑌯𑌾𑌸𑍍𑌤𑍍𑌵𑌂 𑌵𑌾𑌨𑌰𑌶𑍍𑌰𑍇𑌷𑍍𑌠 𑌕𑍁𑌶𑌲𑌂 𑌧𑌰𑍍𑌮𑌸𑌂𑌹𑌿𑌤𑌮𑍍 ॥ ॥
𑌯𑌥𑌾 𑌸 𑌚 𑌮𑌹𑌾𑌬𑌾𑌹𑍁𑌰𑍍𑌮𑌾𑌂 𑌤𑌾𑌰𑌯𑌤𑌿 𑌰𑌾𑌘𑌵𑌃 ।
𑌅𑌸𑍍𑌮𑌾𑌦𑍍𑌧𑍁𑌃𑌖𑌾𑌂𑌬𑍁𑌸𑌂𑌰𑍋𑌧𑌾𑌤𑍍𑌤𑍍𑌵𑌂 𑌸𑌮𑌾𑌧𑌾𑌤𑍁𑌮𑌰𑍍𑌹𑌸𑌿 ॥ ॥
𑌜𑍀𑌵𑌂𑌤𑍀𑌂 𑌮𑌾𑌂 𑌯𑌥𑌾 𑌰𑌾𑌮𑌃 𑌸𑌂𑌭𑌾𑌵𑌯𑌤𑌿 𑌕𑍀𑌰𑍍𑌤𑌿𑌮𑌾𑌨𑍍 ।
𑌤𑌤𑍍𑌤𑌥𑌾 𑌹𑌨𑍁𑌮𑌨𑍍𑌵𑌾𑌚𑍍𑌯𑌂 𑌵𑌾𑌚𑌾 𑌧𑌰𑍍𑌮𑌮𑌵𑌾𑌪𑍍𑌨𑍁𑌹𑌿 ॥ 10 ॥
𑌨𑌿𑌤𑍍𑌯𑌮𑍁𑌤𑍍𑌸𑌾𑌹𑌯𑍁𑌕𑍍𑌤𑌾𑌶𑍍𑌚 𑌵𑌾𑌚𑌶𑍍𑌰𑍁𑌤𑍍𑌵𑌾 𑌤𑍍𑌵𑌯𑍇𑌰𑌿𑌤𑌾𑌃 ।
𑌵𑌰𑍍𑌧𑌿𑌷𑍍𑌯𑌤𑍇 𑌦𑌾𑌶𑌰𑌥𑍇𑌃 𑌪𑍌𑌰𑍁𑌷𑌂 𑌮𑌦𑌵𑌾𑌪𑍍𑌤𑌯𑍇 ॥ 11 ॥
𑌮𑌤𑍍𑌸𑌂𑌦𑍇𑌶𑌯𑍁𑌤𑌾 𑌵𑌾𑌚𑌸𑍍𑌤𑍍𑌵𑌤𑍍𑌤𑌶𑍍𑌶𑍍𑌰𑍁𑌤𑍍𑌵𑌾 𑌚 𑌰𑌾𑌘𑌵𑌃 ।
𑌪𑌰𑌾𑌕𑍍𑌰𑌮𑌵𑌿𑌧𑌿𑌂 𑌵𑍀𑌰𑍋 𑌵𑌿𑌧𑌿𑌵𑌤𑍍𑌸𑌂𑌵𑌿𑌧𑌾𑌸𑍍𑌯𑌤𑌿 ॥ 12 ॥
𑌸𑍀𑌤𑌾𑌯𑌾 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌹𑌨𑍁𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌶𑌿𑌰𑌸𑍍𑌯𑌂𑌜𑌲𑌿𑌮𑌾𑌧𑌾𑌯 𑌵𑌾𑌕𑍍𑌯𑌮𑍁𑌤𑍍𑌤𑌰𑌮𑌬𑍍𑌰𑌵𑍀𑌤𑍍 ॥ 13 ॥
𑌕𑍍𑌷𑌿𑌪𑍍𑌰𑌮𑍇𑌷𑍍𑌯𑌤𑌿 𑌕𑌾𑌕𑍁𑌤𑍍𑌸𑍍𑌥𑍋 𑌹𑌾𑌰𑍍𑌯𑍃𑌕𑍍𑌷𑌪𑍍𑌰𑌵𑌰𑍈𑌰𑍍𑌵𑍃𑌤𑌃 ।
𑌯𑌸𑍍𑌤𑍇 𑌯𑍁𑌧𑌿 𑌵𑌿𑌜𑌿𑌤𑍍𑌯𑌾𑌰𑍀𑌨𑍍𑌶𑍋𑌕𑌂 𑌵𑍍𑌯𑌪𑌨𑌯𑌿𑌷𑍍𑌯𑌤𑌿 ॥ 14 ॥
𑌨 𑌹𑌿 𑌪𑌶𑍍𑌯𑌾𑌮𑌿 𑌮𑌰𑍍𑌤𑍍𑌯𑍇𑌷𑍁 𑌨𑌾𑌸𑍁𑌰𑍇𑌷𑍁 𑌸𑍁𑌰𑍇𑌷𑍁 𑌵𑌾 ।
𑌯𑌸𑍍𑌤𑌸𑍍𑌯 𑌕𑍍𑌷𑌿𑌪𑌤𑍋 𑌬𑌾𑌣𑌾𑌨𑍍𑌸𑍍𑌥𑌾𑌤𑍁𑌮𑍁𑌤𑍍𑌸𑌹𑌤𑍇𑌽𑌗𑍍𑌰𑌤𑌃 ॥ 15 ॥
𑌅𑌪𑍍𑌯𑌰𑍍𑌕𑌮𑌪𑌿 𑌪𑌰𑍍𑌜𑌨𑍍𑌯𑌮𑌪𑌿 𑌵𑍈𑌵𑌸𑍍𑌵𑌤𑌂 𑌯𑌮𑌮𑍍 ।
𑌸 𑌹𑌿 𑌸𑍋𑌢𑍁𑌂 𑌰𑌣𑍇 𑌶𑌕𑍍𑌤𑌸𑍍𑌤𑌵 𑌹𑍇𑌤𑍋𑌰𑍍𑌵𑌿𑌶𑍇𑌷𑌤𑌃 ॥ 16 ॥
𑌸 𑌹𑌿 𑌸𑌾𑌗𑌰𑌪𑌰𑍍𑌯𑌂𑌤𑌾𑌂 𑌮𑌹𑍀𑌂 𑌶𑌾𑌸𑌿𑌤𑍁𑌮𑍀𑌹𑌤𑌿 ।
𑌤𑍍𑌵𑌨𑍍𑌨𑌿𑌮𑌿𑌤𑍍𑌤𑍋 𑌹𑌿 𑌰𑌾𑌮𑌸𑍍𑌯 𑌜𑌯𑍋 𑌜𑌨𑌕𑌨𑌂𑌦𑌿𑌨𑌿 ॥ 1 ॥
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌸𑌮𑍍𑌯𑌕𑍍𑌸𑌤𑍍𑌯𑌂 𑌸𑍁𑌭𑌾𑌷𑌿𑌤𑌮𑍍 ।
𑌜𑌾𑌨𑌕𑍀 𑌬𑌹𑍁𑌮𑍇𑌨𑍇𑌽𑌥 𑌵𑌚𑌨𑌂 𑌚𑍇𑌦𑌮𑌬𑍍𑌰𑌵𑍀𑌤𑍍 ॥ 1 ॥
𑌤𑌤𑌸𑍍𑌤𑌂 𑌪𑍍𑌰𑌸𑍍𑌥𑌿𑌤𑌂 𑌸𑍀𑌤𑌾 𑌵𑍀𑌕𑍍𑌷𑌮𑌾𑌣𑌾 𑌪𑍁𑌨𑌃 𑌪𑍁𑌨𑌃 ।
𑌭𑌰𑍍𑌤𑍃𑌸𑍍𑌨𑍇𑌹𑌾𑌨𑍍𑌵𑌿𑌤𑌂 𑌵𑌾𑌕𑍍𑌯𑌂 𑌸𑍌𑌹𑌾𑌰𑍍𑌦𑌾𑌦𑌨𑍁𑌮𑌾𑌨𑌯𑌤𑍍 ॥ 1 ॥
𑌯𑌦𑌿 𑌵𑌾 𑌮𑌨𑍍𑌯𑌸𑍇 𑌵𑍀𑌰 𑌵𑌸𑍈𑌕𑌾𑌹𑌮𑌰𑌿𑌂𑌦𑌮 ।
𑌕𑌸𑍍𑌮𑌿𑌂𑌶𑍍𑌚𑌿𑌤𑍍𑌸𑌂𑌵𑍃𑌤𑍇 𑌦𑍇𑌶𑍇 𑌵𑌿𑌶𑍍𑌰𑌾𑌂𑌤𑌃𑌶𑍍𑌵𑍋 𑌗𑌮𑌿𑌷𑍍𑌯𑌸𑌿 ॥ 20 ॥
𑌮𑌮 𑌚𑍇𑌦𑌲𑍍𑌪𑌭𑌾𑌗𑍍𑌯𑌾𑌯𑌾 𑌸𑌾𑌨𑍍𑌨𑌿𑌧𑍍𑌯𑌾𑌤𑍍𑌤𑌵 𑌵𑌾𑌨𑌰 ।
𑌅𑌸𑍍𑌯 𑌶𑍋𑌕𑌸𑍍𑌯 𑌮𑌹𑌤𑍋 𑌮𑍁𑌹𑍂𑌰𑍍𑌤𑌂 𑌮𑍋𑌕𑍍𑌷𑌣𑌂 𑌭𑌵𑍇𑌤𑍍 ॥ 21 ॥
𑌗𑌤𑍇 𑌹𑌿 𑌹𑌰𑌿𑌶𑌾𑌰𑍍𑌦𑍂𑌲 𑌪𑍁𑌨𑌰𑌾𑌗𑌮𑌨𑌾𑌯 𑌤𑍁 ।
𑌪𑍍𑌰𑌾𑌣𑌾𑌨𑌾𑌮𑌪𑌿 𑌸𑌂𑌦𑍇𑌹𑍋 𑌮𑌮 𑌸𑍍𑌯𑌾𑌨𑍍𑌨𑌾𑌤𑍍𑌰 𑌸𑌂𑌶𑌯𑌃 ॥ 22 ॥
𑌤𑌵𑌾𑌦𑌰𑍍𑌶𑌨𑌜𑌃 𑌶𑍋𑌕𑍋 𑌭𑍂𑌯𑍋 𑌮𑌾𑌂 𑌪𑌰𑌿𑌤𑌾𑌪𑌯𑍇𑌤𑍍 ।
𑌦𑍁𑌃𑌖𑌾𑌦𑍍𑌧𑍁𑌃𑌖𑌪𑌰𑌾𑌮𑍃𑌷𑍍𑌟𑌾𑌂 𑌦𑍀𑌪𑌯𑌨𑍍𑌨𑌿𑌵 𑌵𑌾𑌨𑌰 ॥ 23 ॥
𑌅𑌯𑌂 𑌚 𑌵𑍀𑌰 𑌸𑌂𑌦𑍇𑌹𑌸𑍍𑌤𑌿𑌷𑍍𑌠𑌤𑍀𑌵 𑌮𑌮𑌾𑌗𑍍𑌰𑌤𑌃 ।
𑌸𑍁𑌮𑌹𑌾𑌂𑌸𑍍𑌤𑍍𑌵𑌤𑍍𑌸𑌹𑌾𑌯𑍇𑌷𑍁 𑌹𑌰𑍍𑌯𑍃𑌕𑍍𑌷𑍇𑌷𑍁 𑌹𑌰𑍀𑌶𑍍𑌵𑌰𑌃 ॥ 24 ॥
𑌕𑌥𑌂 𑌨𑍁 𑌖𑌲𑍁 𑌦𑍁𑌷𑍍𑌪𑌾𑌰𑌂 𑌤𑌰𑌿𑌷𑍍𑌯𑌂𑌤𑌿 𑌮𑌹𑍋𑌦𑌧𑌿𑌮𑍍 ।
𑌤𑌾𑌨𑌿 𑌹𑌰𑍍𑌯𑍃𑌕𑍍𑌷𑌸𑍈𑌨𑍍𑌯𑌾𑌨𑌿 𑌤𑍌 𑌵𑌾 𑌨𑌰𑌵𑌰𑌾𑌤𑍍𑌮𑌜𑍌 ॥ 25 ॥
𑌤𑍍𑌰𑌯𑌾𑌣𑌾𑌮𑍇𑌵 𑌭𑍂𑌤𑌾𑌨𑌾𑌂 𑌸𑌾𑌗𑌰𑌸𑍍𑌯𑌾𑌸𑍍𑌯 𑌲𑌂𑌘𑌨𑍇 ।
𑌶𑌕𑍍𑌤𑌿𑌸𑍍𑌸𑍍𑌯𑌾𑌦𑍍𑌵𑍈𑌨𑌤𑍇𑌯𑌸𑍍𑌯 𑌤𑌵 𑌵𑌾 𑌮𑌾𑌰𑍁𑌤𑌸𑍍𑌯 𑌵𑌾 ॥ 26 ॥
𑌤𑌦𑌸𑍍𑌮𑌿𑌨𑍍𑌕𑌾𑌰𑍍𑌯𑌨𑌿𑌰𑍍𑌯𑍋𑌗𑍇 𑌵𑍀𑌰𑍈𑌵𑌂 𑌦𑍁𑌰𑌤𑌿𑌕𑍍𑌰𑌮𑍇 ।
𑌕𑌿𑌂 𑌪𑌶𑍍𑌯𑌸𑌿 𑌸𑌮𑌾𑌧𑌾𑌨𑌂 𑌤𑍍𑌵𑌂 𑌹𑌿 𑌕𑌾𑌰𑍍𑌯𑌵𑌿𑌦𑌾𑌂 𑌵𑌰𑌃 ॥ 2 ॥
𑌕𑌾𑌮𑌮𑌸𑍍𑌯 𑌤𑍍𑌵𑌮𑍇𑌵𑍈𑌕𑌃 𑌕𑌾𑌰𑍍𑌯𑌸𑍍𑌯 𑌪𑌰𑌿𑌸𑌾𑌧𑌨𑍇 ।
𑌪𑌰𑍍𑌯𑌾𑌪𑍍𑌤𑌃 𑌪𑌰𑌵𑍀𑌰𑌘𑍍𑌨 𑌯𑌶𑌸𑍍𑌯𑌸𑍍𑌤𑍇 𑌫𑌲𑍋𑌦𑌯𑌃 ॥ 2 ॥
𑌬𑌲𑍈𑌸𑍍𑌸𑌮𑌗𑍍𑌰𑍈𑌰𑍍𑌯𑌦𑌿 𑌮𑌾𑌂 𑌰𑌾𑌵𑌣𑌂 𑌜𑌿𑌤𑍍𑌯 𑌸𑌂𑌯𑍁𑌗𑍇 ।
𑌵𑌿𑌜𑌯𑍀 𑌸𑍍𑌵𑌪𑍁𑌰𑌂 𑌯𑌾𑌯𑌾𑌤𑍍𑌤𑌤𑍍𑌤𑌸𑍍𑌯 𑌸𑌦𑍃𑌶𑌂 𑌭𑌵𑍇𑌤𑍍 ॥ 2 ॥
𑌶𑌰𑍈𑌸𑍍𑌤𑍁 𑌸𑌂𑌕𑍁𑌲𑌾𑌂 𑌕𑍃𑌤𑍍𑌵𑌾 𑌲𑌂𑌕𑌾𑌂 𑌪𑌰𑌬𑌲𑌾𑌰𑍍𑌦𑌨𑌃 ।
𑌮𑌾𑌂 𑌨𑌯𑍇𑌦𑍍𑌯𑌦𑌿 𑌕𑌾𑌕𑍁𑌤𑍍𑌸𑍍𑌥𑌃 𑌤𑌤𑍍𑌤𑌸𑍍𑌯 𑌸𑌦𑍃𑌶𑌂 𑌭𑌵𑍇𑌤𑍍 ॥ 30 ॥
𑌤𑌦𑍍𑌯𑌥𑌾 𑌤𑌸𑍍𑌯 𑌵𑌿𑌕𑍍𑌰𑌾𑌂𑌤𑌮𑌨𑍁𑌰𑍂𑌪𑌂 𑌮𑌹𑌾𑌤𑍍𑌮𑌨𑌃 ।
𑌭𑌵𑍇𑌦𑌾𑌹𑌵𑌶𑍂𑌰𑌸𑍍𑌯 𑌤𑌥𑌾 𑌤𑍍𑌵𑌮𑍁𑌪𑌪𑌾𑌦𑌯 ॥ 31 ॥
𑌤𑌦𑌰𑍍𑌥𑍋𑌪𑌹𑌿𑌤𑌂 𑌵𑌾𑌕𑍍𑌯𑌂 𑌪𑍍𑌰𑌶𑍍𑌰𑌿𑌤𑌂 𑌹𑍇𑌤𑍁𑌸𑌂𑌹𑌿𑌤𑌮𑍍 ।
𑌨𑌿𑌶𑌮𑍍𑌯 𑌹𑌨𑍁𑌮𑌾𑌨𑍍𑌶𑍇𑌷𑌂 𑌵𑌾𑌕𑍍𑌯𑌮𑍁𑌤𑍍𑌤𑌰𑌮𑌬𑍍𑌰𑌵𑍀𑌤𑍍 ॥ 32 ॥
𑌦𑍇𑌵𑌿 𑌹𑌰𑍍𑌯𑍃𑌕𑍍𑌷𑌸𑍈𑌨𑍍𑌯𑌾𑌨𑌾𑌮𑍀𑌶𑍍𑌵𑌰𑌃 𑌪𑍍𑌲𑌵𑌤𑌾𑌂 𑌵𑌰𑌃 ।
𑌸𑍁𑌗𑍍𑌰𑍀𑌵𑌸𑍍𑌸𑌤𑍍𑌤𑍍𑌵𑌸𑌂𑌪𑌨𑍍𑌨𑌸𑍍𑌤𑌵𑌾𑌰𑍍𑌥𑍇 𑌕𑍃𑌤𑌨𑌿𑌶𑍍𑌚𑌯𑌃 ॥ 33 ॥
𑌸 𑌵𑌾𑌨𑌰𑌸𑌹𑌸𑍍𑌰𑌾𑌣𑌾𑌂 𑌕𑍋𑌟𑍀𑌭𑌿𑌰𑌭𑌿𑌸𑌂𑌵𑍃𑌤𑌃 ।
𑌕𑍍𑌷𑌿𑌪𑍍𑌰𑌮𑍇𑌷𑍍𑌯𑌤𑌿 𑌵𑍈𑌦𑍇𑌹𑌿 𑌰𑌾𑌕𑍍𑌷𑌸𑌾𑌨𑌾𑌂 𑌨𑌿𑌬𑌰𑍍𑌹𑌣𑌃 ॥ 34 ॥
𑌤𑌸𑍍𑌯 𑌵𑌿𑌕𑍍𑌰𑌮𑌸𑌂𑌪𑌨𑍍𑌨𑌾𑌸𑍍𑌸𑌤𑍍𑌤𑍍𑌵𑌵𑌂𑌤𑍋 𑌮𑌹𑌾𑌬𑌲𑌾𑌃 ।
𑌮𑌨𑌸𑍍𑌸𑌂𑌕𑌲𑍍𑌪𑌸𑌂𑌪𑌾𑌤𑌾 𑌨𑌿𑌦𑍇𑌶𑍇 𑌹𑌰𑌯𑌃 𑌸𑍍𑌥𑌿𑌤𑌾𑌃 ॥ 35 ॥
𑌯𑍇𑌷𑌾𑌂 𑌨𑍋𑌪𑌰𑌿 𑌨𑌾𑌧𑌸𑍍𑌤𑌾𑌨𑍍𑌨 𑌤𑌿𑌰𑍍𑌯𑌕𑍍𑌸𑌜𑍍𑌜𑌤𑍇 𑌗𑌤𑌿𑌃 ।
𑌨 𑌚 𑌕𑌰𑍍𑌮𑌸𑍁 𑌸𑍀𑌦𑌂𑌤𑌿 𑌮𑌹𑌤𑍍𑌸𑍍𑌵𑌮𑌿𑌤𑌤𑍇𑌜𑌸𑌃 ॥ 36 ॥
𑌅𑌸𑌕𑍃𑌤𑍍𑌤𑍈𑌰𑍍𑌮𑌹𑍋𑌤𑍍𑌸𑌾𑌹𑍈𑌸𑍍𑌸𑌸𑌾𑌗𑌰𑌧𑌰𑌾𑌧𑌰𑌾 ।
𑌪𑍍𑌰𑌦𑌕𑍍𑌷𑌿𑌣𑍀𑌕𑍃𑌤𑌾 𑌭𑍂𑌮𑌿𑌰𑍍𑌵𑌾𑌯𑍁𑌮𑌾𑌰𑍍𑌗𑌾𑌨𑍁𑌸𑌾𑌰𑌿𑌭𑌿𑌃 ॥ 3 ॥
𑌮𑌦𑍍𑌵𑌿𑌶𑌿𑌷𑍍𑌟𑌾𑌶𑍍𑌚 𑌤𑍁𑌲𑍍𑌯𑌾𑌶𑍍𑌚 𑌸𑌂𑌤𑌿 𑌤𑌤𑍍𑌰 𑌵𑌨𑍌𑌕𑌸𑌃 ।
𑌮𑌤𑍍𑌤𑌃 𑌪𑍍𑌰𑌤𑍍𑌯𑌵𑌰𑌃 𑌕𑌶𑍍𑌚𑌿𑌨𑍍𑌨𑌾𑌸𑍍𑌤𑌿 𑌸𑍁𑌗𑍍𑌰𑍀𑌵𑌸𑌨𑍍𑌨𑌿𑌧𑍌 ॥ 3 ॥
𑌅𑌹𑌂 𑌤𑌾𑌵𑌦𑌿𑌹 𑌪𑍍𑌰𑌾𑌪𑍍𑌤𑌃 𑌕𑌿𑌂 𑌪𑍁𑌨𑌸𑍍𑌤𑍇 𑌮𑌹𑌾𑌬𑌲𑌾𑌃 ।
𑌨 𑌹𑌿 𑌪𑍍𑌰𑌕𑍃𑌷𑍍𑌟𑌾𑌃 𑌪𑍍𑌰𑍇𑌷𑍍𑌯𑌂𑌤𑍇 𑌪𑍍𑌰𑍇𑌷𑍍𑌯𑌂𑌤𑍇 𑌹𑍀𑌤𑌰𑍇 𑌜𑌨𑌾𑌃 ॥ 3 ॥
𑌤𑌦𑌲𑌂 𑌪𑌰𑌿𑌤𑌾𑌪𑍇𑌨 𑌦𑍇𑌵𑌿 𑌶𑍋𑌕𑍋 𑌵𑍍𑌯𑌪𑍈𑌤𑍁 𑌤𑍇 ।
𑌏𑌕𑍋𑌤𑍍𑌪𑌾𑌤𑍇𑌨 𑌤𑍇 𑌲𑌂𑌕𑌾𑌮𑍇𑌷𑍍𑌯𑌂𑌤𑌿 𑌹𑌰𑌿𑌯𑍂𑌥𑌪𑌾𑌃 ॥ 40 ॥
𑌮𑌮 𑌪𑍃𑌷𑍍𑌠𑌗𑌤𑍌 𑌤𑍌 𑌚 𑌚𑌂𑌦𑍍𑌰𑌸𑍂𑌰𑍍𑌯𑌾𑌵𑌿𑌵𑍋𑌦𑌿𑌤𑍌 ।
𑌤𑍍𑌵𑌤𑍍𑌸𑌕𑌾𑌶𑌂 𑌮𑌹𑌾𑌸𑌤𑍍𑌤𑍍𑌵𑍌 𑌨𑍃𑌸𑌿𑌂𑌹𑌾𑌵𑌾𑌗𑌮𑌿𑌷𑍍𑌯𑌤𑌃 ॥ 41 ॥
𑌤𑌤𑍋 𑌵𑍀𑌰𑍌 𑌨𑌰𑌵𑌰𑍌 𑌸𑌹𑌿𑌤𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ।
𑌆𑌗𑌮𑍍𑌯 𑌨𑌗𑌰𑍀𑌂 𑌲𑌂𑌕𑌾𑌂 𑌸𑌾𑌯𑌕𑍈𑌰𑍍𑌵𑌿𑌧𑌮𑌿𑌷𑍍𑌯𑌤𑌃 ॥ 42 ॥
𑌸𑌗𑌣𑌂 𑌰𑌾𑌵𑌣𑌂 𑌹𑌤𑍍𑌤𑍍𑌵𑌾 𑌰𑌾𑌘𑌵𑍋 𑌰𑌘𑍁𑌨𑌂𑌦𑌨𑌃 ।
𑌤𑍍𑌵𑌾𑌮𑌾𑌦𑌾𑌯 𑌵𑌰𑌾𑌰𑍋𑌹𑍇 𑌸𑍍𑌵𑌪𑍁𑌰𑍀𑌂 𑌪𑍍𑌰𑌤𑌿𑌯𑌾𑌸𑍍𑌯𑌤𑌿 ॥ 43 ॥
𑌤𑌦𑌾𑌶𑍍𑌵𑌸𑌿𑌹𑌿 𑌭𑌦𑍍𑌰𑌂 𑌤𑍇 𑌭𑌵 𑌤𑍍𑌵𑌂 𑌕𑌾𑌲𑌕𑌾𑌂𑌕𑍍𑌷𑌿𑌣𑍀 ।
𑌨𑌚𑌿𑌰𑌾𑌦𑍍𑌦𑍍𑌰𑌕𑍍𑌷𑍍𑌯𑌸𑍇 𑌰𑌾𑌮𑌂 𑌪𑍍𑌰𑌜𑍍𑌵𑌲𑌂𑌤𑌮𑌿𑌵𑌾𑌨𑌲𑌮𑍍 ॥ 44 ॥
𑌨𑌿𑌹𑌤𑍇 𑌰𑌾𑌕𑍍𑌷𑌸𑍇𑌂𑌦𑍍𑌰𑍇𑌽𑌸𑍍𑌮𑌿𑌨𑍍𑌸𑌪𑍁𑌤𑍍𑌰𑌾𑌮𑌾𑌤𑍍𑌯𑌬𑌾𑌂𑌧𑌵𑍇 ।
𑌤𑍍𑌵𑌂 𑌸𑌮𑍇𑌷𑍍𑌵𑌸𑌿 𑌰𑌾𑌮𑍇𑌣 𑌶𑌶𑌾𑌂𑌕𑍇𑌨𑍇𑌵 𑌰𑍋𑌹𑌿𑌣𑍀 ॥ 45 ॥
𑌕𑍍𑌷𑌿𑌪𑍍𑌰𑌂 𑌤𑍍𑌵𑌂 𑌦𑍇𑌵𑌿 𑌶𑍋𑌕𑌸𑍍𑌯 𑌪𑌾𑌰𑌂 𑌯𑌾𑌸𑍍𑌯𑌸𑌿 𑌮𑍈𑌥𑌿𑌲𑌿 ।
𑌰𑌾𑌵𑌣𑌂 𑌚𑍈𑌵 𑌰𑌾𑌮𑍇𑌣 𑌨𑌿𑌹𑌤𑌂 𑌦𑍍𑌰𑌕𑍍𑌷𑍍𑌯𑌸𑍇𑌽𑌚𑌿𑌰𑌾𑌤𑍍 ॥ 46 ॥
𑌏𑌵𑌮𑌾𑌶𑍍𑌵𑌾𑌸𑍍𑌯 𑌵𑍈𑌦𑍇𑌹𑍀𑌂 𑌹𑌨𑍁𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌗𑌮𑌨𑌾𑌯 𑌮𑌤𑌿𑌂 𑌕𑍃𑌤𑍍𑌵𑌾 𑌵𑍈𑌦𑍇𑌹𑍀𑌂 𑌪𑍁𑌨𑌰𑌬𑍍𑌰𑌵𑍀𑌤𑍍 ॥ 4 ॥
𑌤𑌮𑌰𑌿𑌘𑍍𑌨𑌂 𑌕𑍃𑌤𑌾𑌤𑍍𑌮𑌾𑌨𑌂 𑌕𑍍𑌷𑌿𑌪𑍍𑌰𑌂 𑌦𑍍𑌰𑌕𑍍𑌷𑍍𑌯𑌸𑌿 𑌰𑌾𑌘𑌵𑌮𑍍 ।
𑌲𑌕𑍍𑌷𑍍𑌮𑌣𑌂 𑌚 𑌧𑌨𑍁𑌷𑍍𑌪𑌾𑌣𑌿𑌂 𑌲𑌂𑌕𑌾𑌦𑍍𑌵𑌾𑌰𑌮𑍁𑌪𑌾𑌗𑌤𑌮𑍍 ॥ 4 ॥
𑌨𑌖𑌦𑌂𑌷𑍍𑌟𑍍𑌰𑌾𑌯𑍁𑌧𑌾𑌨𑍍𑌵𑍀𑌰𑌾𑌨𑍍𑌸𑌿𑌮𑍍𑌹𑌶𑌾𑌰𑍍𑌦𑍂𑌲𑌵𑌿𑌕𑍍𑌰𑌮𑌾𑌨𑍍 ।
𑌵𑌾𑌨𑌰𑌾𑌨𑍍𑌵𑌾𑌰𑌣𑍇𑌂𑌦𑍍𑌰𑌾𑌭𑌾𑌨𑍍𑌕𑍍𑌷𑌿𑌪𑍍𑌰𑌂 𑌦𑍍𑌰𑌕𑍍𑌷𑍍𑌯𑌸𑌿 𑌸𑌂𑌗𑌤𑌾𑌨𑍍 ॥ 4 ॥
𑌶𑍈𑌲𑌾𑌂𑌬𑍁𑌦𑌨𑌿𑌕𑌾𑌶𑌾𑌨𑌾𑌂 𑌲𑌂𑌕𑌾𑌮𑌲𑌯𑌸𑌾𑌨𑍁𑌷𑍁 ।
𑌨𑌰𑍍𑌦𑌤𑌾𑌂 𑌕𑌪𑌿𑌮𑍁𑌖𑍍𑌯𑌾𑌨𑌾𑌮𑌾𑌰𑍍𑌯𑍇 𑌯𑍂𑌧𑌾𑌨𑍍𑌯𑌨𑍇𑌕𑌶𑌃 ॥ 50 ॥
𑌸 𑌤𑍁 𑌮𑌰𑍍𑌮𑌣𑌿 𑌘𑍋𑌰𑍇𑌣 𑌤𑌾𑌡𑌿𑌤𑍋 𑌮𑌨𑍍𑌮𑌥𑍇𑌷𑍁𑌣𑌾 ।
𑌨 𑌶𑌰𑍍𑌮 𑌲𑌭𑌤𑍇 𑌰𑌾𑌮𑌸𑍍𑌸𑌿𑌂𑌹𑌾𑌰𑍍𑌧𑌿𑌤 𑌇𑌵 𑌦𑍍𑌵𑌿𑌪𑌃 ॥ 51 ॥
𑌮𑌾 𑌰𑍁𑌦𑍋 𑌦𑍇𑌵𑌿 𑌶𑍋𑌕𑍇𑌨 𑌮𑌾𑌭𑍂𑌤𑍍𑌤𑍇 𑌮𑌨𑌸𑍋𑌽𑌪𑍍𑌰𑌿𑌯𑌮𑍍 ।
𑌶𑌚𑍀𑌵 𑌪𑌤𑍍𑌯𑌾 𑌶𑌕𑍍𑌰𑍇𑌣 𑌭𑌰𑍍𑌤𑍍𑌰𑌾 𑌨𑌾𑌥𑌵𑌤𑍀 𑌹𑍍𑌯𑌸𑌿 ॥ 52 ॥
𑌰𑌾𑌮𑌾𑌦𑍍𑌵𑌿𑌶𑌿𑌷𑍍𑌟𑌃 𑌕𑍋𑌽𑌨𑍍𑌯𑍋𑌽𑌸𑍍𑌤𑌿 𑌕𑌶𑍍𑌚𑌿𑌤𑍍𑌸𑍌𑌮𑌿𑌤𑍍𑌰𑌿𑌣𑌾 𑌸𑌮𑌃 ।
𑌅𑌗𑍍𑌨𑌿𑌮𑌾𑌰𑍁𑌤𑌕𑌲𑍍𑌪𑍌 𑌤𑍌 𑌭𑍍𑌰𑌾𑌤𑌰𑍌 𑌤𑌵 𑌸𑌂𑌶𑍍𑌰𑌯𑍌 ॥ 53 ॥
𑌨𑌾𑌸𑍍𑌮𑌿𑌂𑌶𑍍𑌚𑌿𑌰𑌂 𑌵𑌤𑍍𑌸𑍍𑌯𑌸𑌿 𑌦𑍇𑌵𑌿 𑌦𑍇𑌶𑍇 𑌰𑌕𑍍𑌷𑍋𑌗𑌣𑍈𑌰𑌧𑍍𑌯𑍁𑌷𑌿𑌤𑍇𑌽𑌤𑌿𑌰𑍌𑌦𑍍𑌰𑍇 ।
𑌨 𑌤𑍇 𑌚𑌿𑌰𑌾𑌦𑌾𑌮𑌗𑌮𑌨𑌂 𑌪𑍍𑌰𑌿𑌯𑌸𑍍𑌯 𑌕𑍍𑌷𑌮𑌸𑍍𑌵 𑌮𑌤𑍍𑌸𑌂𑌗𑌮𑌕𑌾𑌲𑌮𑌾𑌤𑍍𑌰𑌮𑍍 ॥ 54 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌏𑌕𑍋𑌨𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
