𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌅𑌥 𑌹𑍈𑌮𑌵𑌤𑍀𑌂 𑌰𑌾𑌮 𑌦𑌿𑌶𑌂 𑌤𑍍𑌯𑌕𑍍𑌤𑍍𑌵𑌾 𑌮𑌹𑌾𑌮𑍁𑌨𑌿𑌃 ।
𑌪𑍂𑌰𑍍𑌵𑌾𑌂 𑌦𑌿𑌶𑌮𑌨𑍁𑌪𑍍𑌰𑌾𑌪𑍍𑌯 𑌤𑌪𑌸𑍍𑌤𑍇𑌪𑍇 𑌸𑍁𑌦𑌾𑌰𑍁𑌣𑌮𑍍 ॥ 1 ॥
𑌮𑍌𑌨𑌂 𑌵𑌰𑍍𑌷𑌸𑌹𑌸𑍍𑌰𑌸𑍍𑌯 𑌕𑍃𑌤𑍍𑌵𑌾 𑌵𑍍𑌰𑌤𑌮𑌨𑍁𑌤𑍍𑌤𑌮𑌮𑍍 ।
𑌚𑌕𑌾𑌰𑌾𑌪𑍍𑌰𑌤𑌿𑌮𑌂 𑌰𑌾𑌮 𑌤𑌪𑌃 𑌪𑌰𑌮𑌦𑍁𑌷𑍍𑌕𑌰𑌮𑍍 ॥ 2 ॥
𑌪𑍂𑌰𑍍𑌣𑍇 𑌵𑌰𑍍𑌷𑌸𑌹𑌸𑍍𑌰𑍇 𑌤𑍁 𑌕𑌾𑌷𑍍𑌠𑌭𑍂𑌤𑌂 𑌮𑌹𑌾𑌮𑍁𑌨𑌿𑌮𑍍 ।
𑌵𑌿𑌘𑍍𑌨𑍈𑌰𑍍𑌬𑌹𑍁𑌭𑌿𑌰𑌾𑌧𑍂𑌤𑌂 𑌕𑍍𑌰𑍋𑌧𑍋 𑌨𑌾𑌂𑌤𑌰 𑌆𑌵𑌿𑌶𑌤𑍍 ॥ 3 ॥
𑌸 𑌕𑍃𑌤𑍍𑌵𑌾 𑌨𑌿𑌶𑍍𑌚𑌯𑌂 𑌰𑌾𑌮 𑌤𑌪 𑌆𑌤𑌿𑌷𑍍𑌟𑌦𑌵𑍍𑌯𑌯𑌮𑍍 ।
𑌤𑌸𑍍𑌯 𑌵𑌰𑍍𑌷𑌸𑌹𑌸𑍍𑌰𑌸𑍍𑌯 𑌵𑍍𑌰𑌤𑍇 𑌪𑍂𑌰𑍍𑌣𑍇 𑌮𑌹𑌾𑌵𑍍𑌰𑌤𑌃 ॥ 4 ॥
𑌭𑍋𑌕𑍍𑌤𑍁𑌮𑌾𑌰𑌬𑍍𑌧𑌵𑌾𑌨𑌨𑍍𑌨𑌂 𑌤𑌸𑍍𑌮𑌿𑌨𑍍 𑌕𑌾𑌲𑍇 𑌰𑌘𑍂𑌤𑍍𑌤𑌮 ।
𑌇𑌂𑌦𑍍𑌰𑍋 𑌦𑍍𑌵𑌿𑌜𑌾𑌤𑌿𑌰𑍍𑌭𑍂𑌤𑍍𑌵𑌾 𑌤𑌂 𑌸𑌿𑌦𑍍𑌧𑌮𑌨𑍍𑌨𑌮𑌯𑌾𑌚𑌤 ॥ 5 ॥
𑌤𑌸𑍍𑌮𑍈 𑌦𑌤𑍍𑌵𑌾 𑌤𑌦𑌾 𑌸𑌿𑌦𑍍𑌧𑌂 𑌸𑌰𑍍𑌵𑌂 𑌵𑌿𑌪𑍍𑌰𑌾𑌯 𑌨𑌿𑌶𑍍𑌚𑌿𑌤𑌃 ।
𑌨𑌿𑌶𑍍𑌶𑍇𑌷𑌿𑌤𑍇𑌽𑌨𑍍𑌨𑍇 𑌭𑌗𑌵𑌾𑌨𑌭𑍁𑌕𑍍𑌤𑍈𑌵 𑌮𑌹𑌾𑌤𑌪𑌾𑌃 ॥ 6 ॥
𑌨 𑌕𑌿𑌂𑌚𑌿𑌦𑌵𑌦𑌦𑍍𑌵𑌿𑌪𑍍𑌰𑌂 𑌮𑍌𑌨𑌵𑍍𑌰𑌤𑌮𑍁𑌪𑌸𑍍𑌥𑌿𑌤𑌃 ।
𑌅𑌥 𑌵𑌰𑍍𑌷𑌸𑌹𑌸𑍍𑌰𑌂 𑌵𑍈 𑌨𑍋𑌚𑍍𑌛𑍍𑌵𑌸𑌨𑍍𑌮𑍁𑌨𑌿𑌪𑍁𑌂𑌗𑌵𑌃 ॥ ॥
𑌤𑌸𑍍𑌯𑌾𑌨𑍁𑌚𑍍𑌛𑍍𑌵𑌸𑌮𑌾𑌨𑌸𑍍𑌯 𑌮𑍂𑌰𑍍𑌧𑍍𑌨𑌿 𑌧𑍂𑌮𑍋 𑌵𑍍𑌯𑌜𑌾𑌯𑌤 ।
𑌤𑍍𑌰𑍈𑌲𑍋𑌕𑍍𑌯𑌂 𑌯𑍇𑌨 𑌸𑌂𑌭𑍍𑌰𑌾𑌂𑌤𑌮𑌾𑌦𑍀𑌪𑌿𑌤𑌮𑌿𑌵𑌾𑌭𑌵𑌤𑍍 ॥ ॥
𑌤𑌤𑍋 𑌦𑍇𑌵𑌾𑌸𑍍𑌸𑌗𑌂𑌧𑌰𑍍𑌵𑌾𑌃 𑌪𑌨𑍍𑌨𑌗𑍋𑌰𑌗𑌰𑌾𑌕𑍍𑌷𑌸𑌾𑌃 ।
𑌮𑍋𑌹𑌿𑌤𑌾𑌸𑍍𑌤𑍇𑌜𑌸𑌾 𑌤𑌸𑍍𑌯 𑌤𑌪𑌸𑌾 𑌮𑌂𑌦𑌰𑌶𑍍𑌮𑌯𑌃 ॥ ॥
𑌕𑌶𑍍𑌮𑌲𑍋𑌪𑌹𑌤𑌾 𑌸𑍍𑌸𑌰𑍍𑌵𑍇 𑌪𑌿𑌤𑌾𑌮𑌹𑌮𑌥𑌾𑌬𑍍𑌰𑍁𑌵𑌨𑍍 ।
𑌬𑌹𑍁𑌭𑌿𑌃 𑌕𑌾𑌰𑌣𑍈𑌰𑍍𑌦𑍇𑌵 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌮𑍁𑌨𑌿𑌃 ॥ 10 ॥
𑌲𑍋𑌭𑌿𑌤𑌃 𑌕𑍍𑌰𑍋𑌧𑌿𑌤𑌶𑍍𑌚𑍈𑌵 𑌤𑌪𑌸𑌾 𑌚𑌾𑌭𑌿𑌵𑌰𑍍𑌧𑌤𑍇 ।
𑌨 𑌹𑍍𑌯𑌸𑍍𑌯 𑌵𑍃𑌜𑌿𑌨𑌂 𑌕𑌿𑌂𑌚𑌿𑌦𑍍𑌦𑍃𑌶𑍍𑌯𑌤𑍇 𑌸𑍂𑌕𑍍𑌷𑍍𑌮𑌮𑌪𑍍𑌯𑌥 ॥ 11 ॥
𑌨 𑌦𑍀𑌯𑌤𑍇 𑌯𑌦𑌿 𑌤𑍍𑌵𑌸𑍍𑌯 𑌮𑌨𑌸𑌾 𑌯𑌦𑌭𑍀𑌪𑍍𑌸𑌿𑌤𑌮𑍍 ।
𑌵𑌿𑌨𑌾𑌶𑌯𑌤𑌿 𑌤𑍍𑌰𑍈𑌲𑍋𑌕𑍍𑌯𑌂 𑌤𑌪𑌸𑌾 𑌸𑌚𑌰𑌾𑌚𑌰𑌮𑍍 ॥ 12 ॥
𑌵𑍍𑌯𑌾𑌕𑍁𑌲𑌾𑌶𑍍𑌚 𑌦𑌿𑌶𑌸𑍍𑌸𑌰𑍍𑌵𑌾 𑌨 𑌚 𑌕𑌿𑌂𑌚𑌿𑌤𑍍𑌪𑍍𑌰𑌕𑌾𑌶𑌤𑍇 ।
𑌸𑌾𑌗𑌰𑌾𑌃 𑌕𑍍𑌷𑍁𑌭𑌿𑌤𑌾𑌸𑍍𑌸𑌰𑍍𑌵𑍇 𑌵𑌿𑌶𑍀𑌰𑍍𑌯𑌂𑌤𑍇 𑌚 𑌪𑌰𑍍𑌵𑌤𑌾𑌃 ॥ 13 ॥
𑌪𑍍𑌰𑌕𑌂𑌪𑌤𑍇 𑌚 𑌪𑍃𑌥𑌿𑌵𑍀 𑌵𑌾𑌯𑍁𑌰𑍍𑌵𑌾𑌤𑌿 𑌭𑍃𑌶𑌾𑌕𑍁𑌲𑌃 ।
𑌬𑍃𑌹𑍍𑌮𑌨𑍍𑌨 𑌪𑍍𑌰𑌤𑌿𑌜𑌾𑌨𑍀𑌮𑍋𑌨𑌾𑌸𑍍𑌤𑌿𑌕𑍋 𑌜𑌾𑌯𑌤𑍇 𑌜𑌨𑌃 ॥ 14 ॥
𑌸𑌮𑍍𑌮𑍂𑌢𑌮𑌿𑌵 𑌤𑍍𑌰𑍈𑌲𑍋𑌕𑍍𑌯𑌂 𑌸𑌂𑌪𑍍𑌰𑌕𑍍𑌷𑍁𑌭𑌿𑌤𑌮𑌾𑌨𑌸𑌮𑍍 ।
𑌭𑌾𑌸𑍍𑌕𑌰𑍋 𑌨𑌿𑌷𑍍𑌪𑍍𑌰𑌭𑌶𑍍𑌚𑍈𑌵 𑌮𑌹𑌰𑍍𑌷𑍇𑌸𑍍𑌤𑌸𑍍𑌯 𑌤𑍇𑌜𑌸𑌾 ॥ 15 ॥
𑌬𑍁𑌦𑍍𑌧𑌿𑌂 𑌨 𑌕𑍁𑌰𑍁𑌤𑍇 𑌯𑌾𑌵𑌨𑍍𑌨𑌾𑌶𑍇 𑌦𑍇𑌵 𑌮𑌹𑌾𑌮𑍁𑌨𑌿𑌃 ।
𑌤𑌾𑌵𑌤𑍍𑌪𑍍𑌰𑌸𑌾𑌦𑍍𑌯𑍋 𑌭𑌗𑌵𑌾 𑌨𑌗𑍍𑌨𑌿𑌰𑍂𑌪𑍋𑌮𑌹𑌾𑌦𑍍𑌯𑍁𑌤𑌿𑌃 ॥ 16 ॥
𑌕𑌾𑌲𑌾𑌗𑍍𑌨𑌿𑌨𑌾 𑌯𑌥𑌾𑌪𑍂𑌰𑍍𑌵𑌂 𑌤𑍍𑌰𑍈𑌲𑍋𑌕𑍍𑌯𑌂 𑌦𑌹𑍍𑌯𑌤𑍇𑌽𑌖𑌿𑌲𑌮𑍍 ।
𑌦𑍇𑌵𑌰𑌾𑌜𑍍𑌯𑌂 𑌚𑌿𑌕𑍀𑌰𑍍𑌷𑍇𑌤 𑌦𑍀𑌯𑌤𑌾𑌮𑌸𑍍𑌯 𑌯𑌨𑍍𑌮𑌤𑌮𑍍 ॥ 1 ॥
𑌤𑌤𑌸𑍍𑌸𑍁𑌰𑌗𑌣𑌾𑌸𑍍𑌸𑌰𑍍𑌵𑍇 𑌪𑌿𑌤𑌾𑌮𑌹𑌪𑍁𑌰𑍋𑌗𑌮𑌾𑌃 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌂 𑌮𑌹𑌾𑌤𑍍𑌮𑌾𑌨𑌂 𑌮𑌧𑍁𑌰𑌂 𑌵𑌾𑌕𑍍𑌯𑌮𑌬𑍍𑌰𑍁𑌵𑌨𑍍 ॥ 1 ॥
𑌬𑍍𑌰𑌹𑍍𑌮𑌰𑍍𑌷𑍇 𑌸𑍍𑌵𑌾𑌗𑌤𑌂 𑌤𑍇𑌽𑌸𑍍𑌤𑍁 𑌤𑌪𑌸𑌾 𑌸𑍍𑌮 𑌸𑍁𑌤𑍋𑌷𑌿𑌤𑌾𑌃 ।
𑌬𑍍𑌰𑌾𑌹𑍍𑌮𑌣𑍍𑌯𑌂 𑌤𑌪𑌸𑍋𑌗𑍍𑌰𑍇𑌣 𑌪𑍍𑌰𑌾𑌪𑍍𑌤𑌵𑌾𑌨𑌸𑌿 𑌕𑍌𑌶𑌿𑌕 ॥ 1 ॥
𑌦𑍀𑌰𑍍𑌘𑌮𑌾𑌯𑍁𑌶𑍍𑌚 𑌤𑍇 𑌬𑍍𑌰𑌹𑍍𑌮𑌨𑍍 𑌦𑌦𑌾𑌮𑌿 𑌸𑌮𑌰𑍁𑌦𑍍𑌗𑌣𑌃 ।
𑌸𑍍𑌵𑌸𑍍𑌤𑌿 𑌪𑍍𑌰𑌾𑌪𑍍𑌨𑍁𑌹𑌿 𑌭𑌦𑍍𑌰𑌂 𑌤𑍇 𑌗𑌚𑍍𑌛 𑌸𑍌𑌮𑍍𑌯 𑌯𑌥𑌾𑌸𑍁𑌖𑌮𑍍 ॥ 20 ॥
𑌪𑌿𑌤𑌾𑌮𑌹𑌵𑌚𑌶𑍍𑌶𑍃𑌤𑍍𑌵𑌾 𑌸𑌰𑍍𑌵𑍇𑌷𑌾𑌂 𑌚 𑌦𑌿𑌵𑍌𑌕𑌸𑌾𑌮𑍍 ।
𑌕𑍃𑌤𑍍𑌵𑌾 𑌪𑍍𑌰𑌣𑌾𑌮𑌂 𑌮𑍁𑌦𑌿𑌤𑍋 𑌵𑍍𑌯𑌾𑌜𑌹𑌾𑌰 𑌮𑌹𑌾𑌮𑍁𑌨𑌿𑌃 ॥ 21 ॥
𑌬𑍍𑌰𑌾𑌹𑍍𑌮𑌣𑍍𑌯𑌂 𑌯𑌦𑌿 𑌮𑍇 𑌪𑍍𑌰𑌾𑌪𑍍𑌤𑌂 𑌦𑍀𑌰𑍍𑌘𑌮𑌾𑌯𑍁𑌸𑍍𑌤𑌥𑍈𑌵 𑌚 ।
𑌓𑌂𑌕𑌾𑌰𑌶𑍍𑌚 𑌵𑌷𑌟𑍍𑌕𑌾𑌰𑍋 𑌵𑍇𑌦𑌾𑌶𑍍𑌚 𑌵𑌰𑌯𑌂𑌤𑍁 𑌮𑌾𑌮𑍍 ॥ 22 ॥
𑌕𑍍𑌷𑌤𑍍𑌰𑌵𑍇𑌦𑌵𑌿𑌦𑌾𑌂 𑌶𑍍𑌰𑍇𑌷𑍍𑌠𑍋 𑌬𑍍𑌰𑌹𑍍𑌮𑌵𑍇𑌦𑌵𑌿𑌦𑌾𑌮𑌪𑌿 ।
𑌬𑍍𑌰𑌹𑍍𑌮𑌪𑍁𑌤𑍍𑌰𑍋 𑌵𑌸𑌿𑌷𑍍𑌠𑍋 𑌮𑌾𑌮𑍇𑌵𑌂 𑌵𑌦𑌤𑍁 𑌦𑍇𑌵𑌤𑌾𑌃 ॥ 23 ॥
𑌯𑌦𑍍𑌯𑌯𑌂 𑌪𑌰𑌮𑌃 𑌕𑌾𑌮𑌃 𑌕𑍃𑌤𑍋 𑌯𑌾𑌂𑌤𑍁 𑌸𑍁𑌰𑌰𑍍𑌷𑌭𑌾𑌃 ।
𑌤𑌤𑌃 𑌪𑍍𑌰𑌸𑌾𑌦𑌿𑌤𑍋 𑌦𑍇𑌵𑍈𑌰𑍍𑌵𑌸𑌿𑌷𑍍𑌠𑍋 𑌜𑌪𑌤𑌾𑌂 𑌵𑌰𑌃 ॥ 24 ॥
𑌸𑌖𑍍𑌯𑌂 𑌚𑌕𑌾𑌰 𑌬𑍍𑌰𑌹𑍍𑌮𑌰𑍍𑌷𑌿𑌰𑍇𑌵𑌮𑌸𑍍𑌤𑍍𑌵𑌿𑌤𑌿 𑌚𑌾𑌬𑍍𑌰𑌵𑍀𑌤𑍍 ।
𑌬𑍍𑌰𑌹𑍍𑌮𑌰𑍍𑌷𑌿𑌸𑍍𑌤𑍍𑌵𑌂 𑌨 𑌸𑌂𑌦𑍇𑌹𑌸𑍍𑌸𑌰𑍍𑌵𑌂 𑌸𑌂𑌪𑌤𑍍𑌸𑍍𑌯𑌤𑍇 𑌤𑌵 ॥ 25 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌦𑍇𑌵𑌤𑌾𑌶𑍍𑌚𑌾𑌪𑌿 𑌸𑌰𑍍𑌵𑌾 𑌜𑌗𑍍𑌮𑍁𑌰𑍍𑌯𑌥𑌾𑌗𑌤𑌮𑍍 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑍋𑌽𑌪𑌿 𑌧𑌰𑍍𑌮𑌾𑌤𑍍𑌮𑌾 𑌲𑌬𑍍𑌧𑍍𑌵𑌾 𑌬𑍍𑌰𑌾𑌹𑍍𑌮𑌣𑍍𑌯𑌮𑍁𑌤𑍍𑌤𑌮𑌮𑍍 ॥ 26 ॥
𑌪𑍂𑌜𑌯𑌾𑌮𑌾𑌸 𑌬𑍍𑌰𑌹𑍍𑌮𑌰𑍍𑌷𑌿𑌂 𑌵𑌸𑌿𑌷𑍍𑌠𑌂 𑌜𑌪𑌤𑌾𑌂 𑌵𑌰𑌮𑍍 ।
𑌕𑍃𑌤𑌕𑌾𑌮𑍋 𑌮𑌹𑍀𑌂 𑌸𑌰𑍍𑌵𑌾𑌂 𑌚𑌚𑌾𑌰 𑌤𑌪𑌸𑌿 𑌸𑍍𑌥𑌿𑌤𑌃 ॥ 2 ॥
𑌏𑌵𑌂 𑌤𑍍𑌵𑌨𑍇𑌨 𑌬𑍍𑌰𑌾𑌹𑍍𑌮𑌣𑍍𑌯𑌂 𑌪𑍍𑌰𑌾𑌪𑍍𑌤𑌂 𑌰𑌾𑌮 𑌮𑌹𑌾𑌤𑍍𑌮𑌨𑌾 ।
𑌏𑌷 𑌰𑌾𑌮 𑌮𑍁𑌨𑌿𑌶𑍍𑌰𑍇𑌷𑍍𑌠 𑌏𑌷 𑌵𑌿𑌗𑍍𑌰𑌹𑌵𑌾𑌂𑌸𑍍𑌤𑌪𑌃 ॥ 2 ॥
𑌏𑌷 𑌧𑌰𑍍𑌮𑌪𑌰𑍋 𑌨𑌿𑌤𑍍𑌯𑌂 𑌵𑍀𑌰𑍍𑌯𑌸𑍍𑌯𑍈𑌷 𑌪𑌰𑌾𑌯𑌣𑌮𑍍 ।
𑌏𑌵𑌮𑍁𑌕𑍍𑌤𑍍𑌵𑌾 𑌮𑌹𑌾𑌤𑍇𑌜𑌾 𑌵𑌿𑌰𑌰𑌾𑌮 𑌦𑍍𑌵𑌿𑌜𑍋𑌤𑍍𑌤𑌮𑌃 ॥ 2 ॥
𑌶𑌤𑌾𑌨𑌂𑌦𑌵𑌚𑌃 𑌶𑍍𑌰𑍁𑌤𑍍𑌵𑌾 𑌰𑌾𑌮𑌲𑌕𑍍𑌷𑍍𑌮𑌣𑌸𑌨𑍍𑌨𑌿𑌧𑍌 ।
𑌜𑌨𑌕𑌃 𑌪𑍍𑌰𑌾𑌂𑌜𑌲𑌿𑌰𑍍𑌵𑌾𑌕𑍍𑌯𑌮𑍁𑌵𑌾𑌚 𑌕𑍁𑌶𑌿𑌕𑌾𑌤𑍍𑌮𑌜𑌮𑍍 ॥ 30 ॥
𑌧𑌨𑍍𑌯𑍋𑌽𑌸𑍍𑌮𑍍𑌯𑌨𑍁𑌗𑍃𑌹𑍀𑌤𑍋𑌽𑌸𑍍𑌮𑌿 𑌯𑌸𑍍𑌯 𑌮𑍇 𑌮𑍁𑌨𑌿𑌪𑍁𑌂𑌗𑌵 ।
𑌯𑌜𑍍𑌞𑌂 𑌕𑌾𑌕𑍁𑌤𑍍𑌸𑍍𑌥𑌸𑌹𑌿𑌤𑌃 𑌪𑍍𑌰𑌾𑌪𑍍𑌤𑌵𑌾𑌨𑌸𑌿 𑌧𑌾𑌰𑍍𑌮𑌿𑌕 ॥ 31 ॥
𑌪𑌾𑌵𑌿𑌤𑍋𑌽𑌹𑌂 𑌤𑍍𑌵𑌯𑌾 𑌬𑍍𑌰𑌹𑍍𑌮𑌨𑍍 𑌦𑌰𑍍𑌶𑌨𑍇𑌨 𑌮𑌹𑌾𑌮𑍁𑌨𑍇 ।
𑌗𑍁𑌣𑌾 𑌬𑌹𑍁𑌵𑌿𑌧𑌾𑌃 𑌪𑍍𑌰𑌾𑌪𑍍𑌤𑌾𑌸𑍍𑌤𑌵 𑌸𑌂𑌦𑌰𑍍𑌶𑌨𑌾𑌨𑍍𑌮𑌯𑌾 ॥ 32 ॥
𑌵𑌿𑌸𑍍𑌤𑌰𑍇𑌣 𑌚 𑌤𑍇 𑌬𑍍𑌰𑌹𑍍𑌮𑌨𑍍 𑌕𑍀𑌰𑍍𑌤𑍍𑌯𑌮𑌾𑌨𑌂 𑌮𑌹𑌤𑍍𑌤𑌪𑌃 ।
𑌶𑍍𑌰𑍁𑌤𑌂 𑌮𑌯𑌾 𑌮𑌹𑌾𑌤𑍇𑌜𑍋 𑌰𑌾𑌮𑍇𑌣 𑌚 𑌮𑌹𑌾𑌤𑍍𑌮𑌨𑌾 ॥ 33 ॥
𑌸𑌦𑌸𑍍𑌯𑍈𑌃 𑌪𑍍𑌰𑌾𑌪𑍍𑌯 𑌚 𑌸𑌦𑌃 𑌶𑍍𑌰𑍁𑌤𑌾𑌸𑍍𑌤𑍇 𑌬𑌹𑌵𑍋 𑌗𑍁𑌣𑌾𑌃 ।
𑌅𑌪𑍍𑌰𑌮𑍇𑌯𑌂 𑌤𑌪𑌸𑍍𑌤𑍁𑌭𑍍𑌯𑌮𑌪𑍍𑌰𑌮𑍇𑌯𑌂 𑌚 𑌤𑍇 𑌬𑌲𑌮𑍍 ॥ 34 ॥
𑌅𑌪𑍍𑌰𑌮𑍇𑌯𑌾 𑌗𑍁𑌣𑌾𑌶𑍍𑌚𑍈𑌵 𑌨𑌿𑌤𑍍𑌯𑌂 𑌤𑍇 𑌕𑍁𑌶𑌿𑌕𑌾𑌤𑍍𑌮𑌜 ।
𑌤𑍃𑌪𑍍𑌤𑌿𑌰𑌾𑌶𑍍𑌚𑌰𑍍𑌯𑌭𑍂𑌤𑌾𑌨𑌾𑌂 𑌕𑌥𑌾𑌨𑌾𑌂 𑌨𑌾𑌸𑍍𑌤𑌿 𑌮𑍇 𑌵𑌿𑌭𑍋 ॥ 35 ॥
𑌕𑌰𑍍𑌮𑌕𑌾𑌲𑍋 𑌮𑍁𑌨𑌿𑌶𑍍𑌰𑍇𑌷𑍍𑌠 𑌲𑌂𑌬𑌤𑍇 𑌰𑌵𑌿𑌮𑌂𑌡𑌲𑌮𑍍 ।
𑌶𑍍𑌵𑌃 𑌪𑍍𑌰𑌭𑌾𑌤𑍇 𑌮𑌹𑌾𑌤𑍇𑌜𑍋 𑌦𑍍𑌰𑌷𑍍𑌟𑍁𑌮𑌰𑍍𑌹𑌸𑌿 𑌮𑌾𑌂 𑌪𑍁𑌨𑌃 ॥ 36 ॥
𑌸𑍍𑌵𑌾𑌗𑌤𑌂 𑌤𑌪𑌤𑌾𑌂 𑌶𑍍𑌰𑍇𑌷𑍍𑌠 𑌮𑌾𑌮𑌨𑍁𑌜𑍍𑌞𑌾𑌤𑍁𑌮𑌰𑍍𑌹𑌸𑌿 ।
𑌏𑌵𑌮𑍁𑌕𑍍𑌤𑍋 𑌮𑍁𑌨𑌿𑌵𑌰𑌃 𑌪𑍍𑌰𑌶𑌸𑍍𑌯 𑌪𑍁𑌰𑍁𑌷𑌰𑍍𑌷𑌭𑌮𑍍 ॥ 3 ॥
𑌵𑌿𑌸𑌸𑌰𑍍𑌜𑌾𑌶𑍁 𑌜𑌨𑌕𑌂 𑌪𑍍𑌰𑍀𑌤𑌂 𑌪𑍍𑌰𑍀𑌤𑌮𑌨𑌾𑌸𑍍𑌤𑌦𑌾 ।
𑌏𑌵𑌮𑍁𑌕𑍍𑌤𑍍𑌵𑌾 𑌮𑍁𑌨𑌿𑌶𑍍𑌰𑍇𑌷𑍍𑌠𑌂 𑌵𑍈𑌦𑍇𑌹𑍋 𑌮𑌿𑌥𑌿𑌲𑌾𑌧𑌿𑌪𑌃 ॥ 3 ॥
𑌪𑍍𑌰𑌦𑌕𑍍𑌷𑌿𑌣𑌂 𑌚𑌕𑌾𑌰𑌾𑌶𑍁 𑌸𑍋𑌪𑌾𑌧𑍍𑌯𑌾𑌯𑌸𑍍𑌸𑌬𑌾𑌂𑌧𑌵𑌃 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑍋𑌽𑌪𑌿 𑌧𑌰𑍍𑌮𑌾𑌤𑍍𑌮𑌾 𑌸𑌹𑌰𑌾𑌮𑌸𑍍𑌸𑌲𑌕𑍍𑌷𑍍𑌮𑌣𑌃 ॥ 3 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌪𑌂𑌚𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
