𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌇𑌤𑍍𑌯𑍁𑌕𑍍𑌤𑌃 𑌕𑌰𑍁𑌣𑌂 𑌵𑌾𑌕𑍍𑌯𑌂 𑌵𑌾𑌨𑌰𑍈𑌸𑍍𑌤𑍍𑌯𑌕𑍍𑌤𑌜𑍀𑌵𑌿𑌤𑍈𑌃 ।
𑌸𑌬𑌾𑌷𑍍𑌪𑍋 𑌵𑌾𑌨𑌰𑌾𑌨𑍍𑌗𑍃𑌧𑍍𑌰𑌃 𑌪𑍍𑌰𑌤𑍍𑌯𑍁𑌵𑌾𑌚 𑌮𑌹𑌾𑌸𑍍𑌵𑌨𑌃 ॥ 1 ॥
𑌯𑌵𑍀𑌯𑌾𑌨𑍍𑌮𑌮 𑌭𑍍𑌰𑌾𑌤𑌾 𑌜𑌟𑌾𑌯𑍁𑌰𑍍𑌨𑌾𑌮 𑌵𑌾𑌨𑌰𑌾𑌃 ।
𑌯𑌮𑌾𑌖𑍍𑌯𑌾𑌤 𑌹𑌤𑌂 𑌯𑍁𑌦𑍍𑌧𑍇 𑌰𑌾𑌵𑌣𑍇𑌨 𑌬𑌲𑍀𑌯𑌸𑌾 ॥ 2 ॥
𑌵𑍃𑌦𑍍𑌧𑌭𑌾𑌵𑌾𑌦𑌪𑌕𑍍𑌷𑌤𑍍𑌵𑌾𑌚𑍍𑌛𑍃𑌣𑍍𑌵𑌂𑌸𑍍𑌤𑌦𑌪𑌿 𑌮𑌰𑍍𑌷𑌯𑍇 ।
𑌨 𑌹𑌿 𑌮𑍇 𑌶𑌕𑍍𑌤𑌿𑌰𑌸𑍍𑌤𑍍𑌯𑌦𑍍𑌯 𑌭𑍍𑌰𑌾𑌤𑍁𑌰𑍍𑌵𑍈𑌰𑌵𑌿𑌮𑍋𑌕𑍍𑌷𑌣𑍇 ॥ 3 ॥
𑌪𑍁𑌰𑌾 𑌵𑍃𑌤𑍍𑌰𑌵𑌧𑍇 𑌵𑍃𑌤𑍍𑌤𑍇 𑌪𑌰𑌸𑍍𑌪𑌰𑌜𑌯𑍈𑌷𑌿𑌣𑍌 ।
𑌆𑌦𑌿𑌤𑍍𑌯𑌮𑍁𑌪𑌯𑌾𑌤𑍌 𑌸𑍍𑌵𑍋 𑌜𑍍𑌵𑌲𑌂𑌤𑌂 𑌰𑌶𑍍𑌮𑌿𑌮𑌾𑌲𑌿𑌨𑌮𑍍 ॥ 4 ॥
𑌆𑌵𑍃𑌤𑍍𑌤𑍍𑌯𑌾𑌽𑌕𑌾𑌶𑌮𑌾𑌰𑍍𑌗𑍇 𑌤𑍁 𑌜𑌵𑍇𑌨 𑌸𑍍𑌮 𑌗𑌤𑍌 𑌭𑍃𑌶𑌮𑍍 ।
𑌮𑌧𑍍𑌯𑌂 𑌪𑍍𑌰𑌾𑌪𑍍𑌤𑍇 𑌦𑌿𑌨𑌕𑌰𑍇 𑌜𑌟𑌾𑌯𑍁𑌰𑌵𑌸𑍀𑌦𑌤𑌿 ॥ 5 ॥
𑌤𑌮𑌹𑌂 𑌭𑍍𑌰𑌾𑌤𑌰𑌂 𑌦𑍃𑌷𑍍𑌟𑍍𑌵𑌾 𑌸𑍂𑌰𑍍𑌯𑌰𑌶𑍍𑌮𑌿𑌭𑌿𑌰𑌰𑍍𑌦𑌿𑌤𑌮𑍍 ।
𑌪𑌕𑍍𑌷𑌾𑌭𑍍𑌯𑌾𑌂 𑌛𑌾𑌦𑌯𑌾𑌮𑌾𑌸 𑌸𑍍𑌨𑍇𑌹𑌾𑌤𑍍𑌪𑌰𑌮𑌵𑌿𑌹𑍍𑌵𑌲𑌃 ॥ 6 ॥
𑌨𑌿𑌰𑍍𑌦𑌗𑍍𑌧𑌪𑌕𑍍𑌷𑌃 𑌪𑌤𑌿𑌤𑍋 𑌵𑌿𑌂𑌧𑍍𑌯𑍇𑌽𑌹𑌂 𑌵𑌾𑌨𑌰𑌰𑍍𑌷𑌭𑌾𑌃 ।
𑌅𑌹𑌮𑌸𑍍𑌮𑌿𑌨𑍍𑌵𑌸𑌨𑍍𑌭𑍍𑌰𑌾𑌤𑍁𑌃 𑌪𑍍𑌰𑌵𑍃𑌤𑍍𑌤𑌿𑌂 𑌨𑍋𑌪𑌲𑌕𑍍𑌷𑌯𑍇 ॥ ॥
𑌜𑌟𑌾𑌯𑍁𑌷𑌸𑍍𑌤𑍍𑌵𑍇𑌵𑌮𑍁𑌕𑍍𑌤𑍋 𑌭𑍍𑌰𑌾𑌤𑍍𑌰𑌾 𑌸𑌂𑌪𑌾𑌤𑌿𑌨𑌾 𑌤𑌦𑌾 ।
𑌯𑍁𑌵𑌰𑌾𑌜𑍋 𑌮𑌹𑌾𑌪𑍍𑌰𑌾𑌜𑍍𑌞𑌃 𑌪𑍍𑌰𑌤𑍍𑌯𑍁𑌵𑌾𑌚𑌾𑌂𑌗𑌦𑌸𑍍𑌤𑌤𑌃 ॥ ॥
𑌜𑌟𑌾𑌯𑍁𑌷𑍋 𑌯𑌦𑌿 𑌭𑍍𑌰𑌾𑌤𑌾 𑌶𑍍𑌰𑍁𑌤𑌂 𑌤𑍇 𑌗𑌦𑌿𑌤𑌂 𑌮𑌯𑌾 ।
𑌆𑌖𑍍𑌯𑌾 𑌹𑌿 𑌯𑌦𑌿 𑌜𑌾𑌨𑌾𑌸𑌿 𑌨𑌿𑌲𑌯𑌂 𑌤𑌸𑍍𑌯 𑌰𑌕𑍍𑌷𑌸𑌃 ॥ ॥
𑌅𑌦𑍀𑌰𑍍𑌘𑌦𑌰𑍍𑌶𑌿𑌨𑌂 𑌤𑌂 𑌵𑍈 𑌰𑌾𑌵𑌣𑌂 𑌰𑌾𑌕𑍍𑌷𑌸𑌾𑌧𑌿𑌪𑌮𑍍 ।
𑌅𑌂𑌤𑌿𑌕𑍇 𑌯𑌦𑌿 𑌵𑌾 𑌦𑍂𑌰𑍇 𑌯𑌦𑌿 𑌜𑌾𑌨𑌾𑌸𑌿 𑌶𑌂𑌸 𑌨𑌃 ॥ 10 ॥
𑌤𑌤𑍋𑌽𑌬𑍍𑌰𑌵𑍀𑌨𑍍𑌮𑌹𑌾𑌤𑍇𑌜𑌾 𑌜𑍍𑌯𑍇𑌷𑍍𑌠𑍋 𑌭𑍍𑌰𑌾𑌤𑌾 𑌜𑌟𑌾𑌯𑍁𑌷𑌃 ।
𑌆𑌤𑍍𑌮𑌾𑌨𑍁𑌰𑍂𑌪𑌂 𑌵𑌚𑌨𑌂 𑌵𑌾𑌨𑌰𑌾𑌨𑍍𑌸𑌂𑌪𑍍𑌰𑌹𑌰𑍍𑌷𑌯𑌨𑍍 ॥ 11 ॥
𑌨𑌿𑌰𑍍𑌦𑌗𑍍𑌧𑌪𑌕𑍍𑌷𑍋 𑌗𑍃𑌧𑍍𑌰𑍋𑌽𑌹𑌂 𑌹𑍀𑌨𑌵𑍀𑌰𑍍𑌯𑌃 𑌪𑍍𑌲𑌵𑌂𑌗𑌮𑌾𑌃 ।
𑌵𑌾𑌙𑍍𑌮𑌾𑌤𑍍𑌰𑍇𑌣 𑌤𑍁 𑌰𑌾𑌮𑌸𑍍𑌯 𑌕𑌰𑌿𑌷𑍍𑌯𑍇 𑌸𑌾𑌹𑍍𑌯𑌮𑍁𑌤𑍍𑌤𑌮𑌮𑍍 ॥ 12 ॥
𑌜𑌾𑌨𑌾𑌮𑌿 𑌵𑌾𑌰𑍁𑌣𑌾𑌨𑍍𑌲𑍋𑌕𑌾𑌨𑍍𑌵𑌿𑌷𑍍𑌣𑍋𑌸𑍍𑌤𑍍𑌰𑍈 𑌵𑌿𑌕𑍍𑌰𑌮𑌾𑌨𑌪𑌿 ।
𑌮𑌹𑌾𑌸𑍁𑌰𑌵𑌿𑌮𑌰𑍍𑌦𑌨𑍍𑌵𑌾 𑌶𑍍𑌚 𑌹𑍍𑌯𑌮𑍃𑌤𑌸𑍍𑌯 𑌚 𑌮𑌂𑌥𑌨𑌮𑍍 ॥ 13 ॥
𑌰𑌾𑌮𑌸𑍍𑌯 𑌯𑌦𑌿𑌦𑌂 𑌕𑌾𑌰𑍍𑌯𑌂 𑌕𑌰𑍍𑌤𑌵𑍍𑌯𑌂 𑌪𑍍𑌰𑌥𑌮𑌂 𑌮𑌯𑌾 ।
𑌜𑌰𑌯𑌾 𑌚 𑌹𑍃𑌤𑌂 𑌤𑍇𑌜𑌃 𑌪𑍍𑌰𑌾𑌣𑌾𑌶𑍍𑌚 𑌶𑌿𑌥𑌿𑌲𑌾 𑌮𑌮 ॥ 14 ॥
𑌤𑌰𑍁𑌣𑍀 𑌰𑍂𑌪𑌸𑌂𑌪𑌨𑍍𑌨𑌾 𑌸𑌰𑍍𑌵𑌾𑌭𑌰𑌣𑌭𑍂𑌷𑌿𑌤𑌾 ।
𑌹𑍍𑌰𑌿𑌯𑌮𑌾𑌣𑌾 𑌮𑌯𑌾 𑌦𑍃𑌷𑍍𑌟𑌾 𑌰𑌾𑌵𑌣𑍇𑌨 𑌦𑍁𑌰𑌾𑌤𑍍𑌮𑌨𑌾 ॥ 15 ॥
𑌕𑍍𑌰𑍋𑌶𑌂𑌤𑍀 𑌰𑌾𑌮 𑌰𑌾𑌮𑍇𑌤𑌿 𑌲𑌕𑍍𑌷𑍍𑌮𑌣𑍇𑌤𑌿 𑌚 𑌭𑌾𑌮𑌿𑌨𑍀 ।
𑌭𑍂𑌷𑌣𑌾𑌨𑍍𑌯𑌪𑌵𑌿𑌧𑍍𑌯𑌂𑌤𑍀 𑌗𑌾𑌤𑍍𑌰𑌾𑌣𑌿 𑌚 𑌵𑌿𑌧𑍁𑌨𑍍𑌵𑌤𑍀 ॥ 16 ॥
𑌸𑍂𑌰𑍍𑌯𑌪𑍍𑌰𑌭𑍇𑌵 𑌶𑍈𑌲𑌾𑌗𑍍𑌰𑍇 𑌤𑌸𑍍𑌯𑌾𑌃 𑌕𑍌𑌶𑍇𑌯𑌮𑍁𑌤𑍍𑌤𑌮𑌮𑍍 ।
𑌅𑌸𑌿𑌤𑍇 𑌰𑌾𑌕𑍍𑌷𑌸𑍇 𑌭𑌾𑌤𑌿 𑌯𑌥𑌾 𑌵𑌾 𑌤𑌟𑌿𑌦𑌂𑌬𑍁𑌦𑍇 ॥ 1 ॥
𑌤𑌾𑌂 𑌤𑍁 𑌸𑍀𑌤𑌾𑌮𑌹𑌂 𑌮𑌨𑍍𑌯𑍇 𑌰𑌾𑌮𑌸𑍍𑌯 𑌪𑌰𑌿𑌕𑍀𑌰𑍍𑌤𑌨𑌾𑌤𑍍 ।
𑌶𑍍𑌰𑍂𑌯𑌤𑌾𑌂 𑌮𑍇 𑌕𑌥𑌯𑌤𑍋 𑌨𑌿𑌲𑌯𑌂 𑌤𑌸𑍍𑌯 𑌰𑌕𑍍𑌷𑌸𑌃 ॥ 1 ॥
𑌪𑍁𑌤𑍍𑌰𑍋 𑌵𑌿𑌶𑍍𑌰𑌵𑌸 𑌸𑍍𑌸𑌾𑌕𑍍𑌷𑌾𑌦𑍍𑌭𑍍𑌰𑌾𑌤𑌾 𑌵𑍈𑌶𑍍𑌰𑌵𑌣𑌸𑍍𑌯 𑌚 ।
𑌅𑌧𑍍𑌯𑌾𑌸𑍍𑌤𑍇 𑌨𑌗𑌰𑍀𑌂 𑌲𑌂𑌕𑌾𑌂 𑌰𑌾𑌵𑌣𑍋 𑌨𑌾𑌮 𑌰𑌾𑌕𑍍𑌷𑌸𑌃 ॥ 1 ॥
𑌇𑌤𑍋 𑌦𑍍𑌵𑍀𑌪𑌸𑍍𑌸𑌮𑍁𑌦𑍍𑌰𑌸𑍍𑌯 𑌸𑌂𑌪𑍂𑌰𑍍𑌣𑍇 𑌶𑌤𑌯𑍋𑌜𑌨𑍇 ।
𑌤𑌸𑍍𑌮𑌿𑌨𑍍𑌲𑌂𑌕𑌾𑌪𑍁𑌰𑍀 𑌰𑌮𑍍𑌯𑌾 𑌨𑌿𑌰𑍍𑌮𑌿𑌤𑌾 𑌵𑌿𑌶𑍍𑌵𑌕𑌰𑍍𑌮𑌣𑌾 ॥ 20 ॥
𑌜𑌾𑌂𑌬𑍂𑌨𑌦𑌮𑌯𑍈𑌰𑍍𑌦𑍍𑌵𑌾𑌰𑍈𑌶𑍍𑌚𑌿𑌤𑍍𑌰𑍈𑌃 𑌕𑌾𑌂𑌚𑌨𑌵𑍇𑌦𑌿𑌕𑍈𑌃 ।
𑌪𑍍𑌰𑌾𑌸𑌾𑌦𑍈𑌰𑍍𑌹𑍇𑌮𑌵𑌰𑍍𑌣𑍈𑌶𑍍𑌚 𑌮𑌹𑌦𑍍𑌭𑌿𑌃 𑌸𑍁𑌸𑌮𑌾 𑌕𑍃𑌤𑌾 ॥ 21 ॥
𑌪𑍍𑌰𑌾𑌕𑌾𑌰𑍇𑌣𑌾𑌰𑍍𑌕𑌵𑌰𑍍𑌣𑍇𑌨 𑌮𑌹𑌤𑌾 𑌚 𑌸𑌮𑌾𑌨𑍍𑌵𑌿𑌤𑌾 ।
𑌤𑌸𑍍𑌯𑌾𑌂 𑌵𑌸𑌤𑌿 𑌵𑍈𑌦𑍇𑌹𑍀 𑌦𑍀𑌨𑌾 𑌕𑍌𑌶𑍇𑌯𑌵𑌾𑌸𑌿𑌨𑍀 ॥ 22 ॥
𑌰𑌾𑌵𑌣𑌾𑌂𑌤𑌃𑌪𑍁𑌰𑍇 𑌰𑍁𑌦𑍍𑌧𑌾 𑌰𑌾𑌕𑍍𑌷𑌸𑍀𑌭𑌿𑌸𑍍𑌸𑍁𑌰𑌕𑍍𑌷𑌿𑌤𑌾 ।
𑌜𑌨𑌕𑌸𑍍𑌯𑌾𑌤𑍍𑌮𑌜𑌾𑌂 𑌰𑌾𑌜𑍍𑌞𑌸𑍍𑌤𑌤𑍍𑌰 𑌦𑍍𑌰𑌕𑍍𑌷𑍍𑌯𑌥 𑌮𑍈𑌥𑌿𑌲𑍀𑌮𑍍 ॥ 23 ॥
𑌲𑌂𑌕𑌾𑌯𑌾𑌮𑌥 𑌗𑍁𑌪𑍍𑌤𑌾𑌯𑌾𑌂 𑌸𑌾𑌗𑌰𑍇𑌣 𑌸𑌮𑌂𑌤𑌤𑌃 ।
𑌸𑌂𑌪𑍍𑌰𑌾𑌪𑍍𑌯 𑌸𑌾𑌗𑌰𑌸𑍍𑌯𑌾𑌂𑌤𑌂 𑌸𑌂𑌪𑍂𑌰𑍍𑌣𑌂 𑌶𑌤𑌯𑍋𑌜𑌨𑌮𑍍 ॥ 24 ॥
𑌆𑌸𑌾𑌦𑍍𑌯 𑌦𑌕𑍍𑌷𑌿𑌣𑌂 𑌤𑍀𑌰𑌂 𑌤𑌤𑍋 𑌦𑍍𑌰𑌕𑍍𑌷𑍍𑌯𑌥 𑌰𑌾𑌵𑌣𑌮𑍍 ।
𑌤𑌤𑍍𑌰𑍈𑌵 𑌤𑍍𑌵𑌰𑌿𑌤𑌾𑌃 𑌕𑍍𑌷𑌿𑌪𑍍𑌰𑌂 𑌵𑌿𑌕𑍍𑌰𑌮𑌧𑍍𑌵𑌂 𑌪𑍍𑌲𑌵𑌂𑌗𑌮𑌾𑌃 ॥ 25 ॥
𑌜𑍍𑌞𑌾𑌨𑍇𑌨 𑌖𑌲𑍁 𑌪𑌶𑍍𑌯𑌾𑌮𑌿 𑌦𑍃𑌷𑍍𑌟𑍍𑌵𑌾 𑌪𑍍𑌰𑌤𑍍𑌯𑌾𑌗𑌮𑌿𑌷𑍍𑌯𑌥 ।
𑌆𑌦𑍍𑌯𑌃 𑌪𑌂𑌥𑌾𑌃 𑌕𑍁𑌲𑌿𑌂𑌗𑌾𑌨𑌾𑌂 𑌯𑍇 𑌚𑌾𑌨𑍍𑌯𑍇 𑌧𑌾𑌨𑍍𑌯𑌜𑍀𑌵𑌿𑌨𑌃 ॥ 26 ॥
𑌦𑍍𑌵𑌿𑌤𑍀𑌯𑍋 𑌬𑌲𑌿𑌭𑍋𑌜𑌾𑌨𑌾𑌂 𑌯𑍇 𑌚 𑌵𑍃𑌕𑍍𑌷𑌫𑌲𑌾𑌶𑌿𑌨𑌃 ।
𑌭𑌾𑌸𑌾𑌸𑍍𑌤𑍃𑌤𑍀𑌯𑌂 𑌗𑌚𑍍𑌛𑌂𑌤𑌿 𑌕𑍍𑌰𑍌𑌂𑌚𑌾𑌶𑍍𑌚 𑌕𑍁𑌰𑌰𑍈𑌸𑍍𑌸𑌹 ॥ 2 ॥
𑌶𑍍𑌯𑍇𑌨𑌾𑌶𑍍𑌚𑌤𑍁𑌰𑍍𑌥𑌂 𑌗𑌚𑍍𑌛𑌂𑌤𑌿 𑌗𑍃𑌧𑍍𑌰𑌾 𑌗𑌚𑍍𑌛𑌂𑌤𑌿 𑌪𑌂𑌚𑌮𑌮𑍍 ।
𑌬𑌲𑌵𑍀𑌰𑍍𑌯𑍋𑌪𑌪𑌨𑍍𑌨𑌾𑌨𑌾𑌂 𑌰𑍂𑌪𑌯𑍌𑌵𑌨𑌶𑌾𑌲𑌿𑌨𑌾𑌮𑍍 ॥ 2 ॥
𑌷𑌷𑍍𑌠𑌸𑍍𑌤𑍁 𑌪𑌂𑌥𑌾 𑌹𑌂𑌸𑌾𑌨𑌾𑌂 𑌵𑍈𑌨𑌤𑍇𑌯𑌗𑌤𑌿𑌃 𑌪𑌰𑌾 ।
𑌵𑍈𑌨𑌤𑍇𑌯𑌾𑌚𑍍𑌚 𑌨𑍋 𑌜𑌨𑍍𑌮 𑌸𑌰𑍍𑌵𑍇𑌷𑌾𑌂 𑌵𑌾𑌨𑌰𑌰𑍍𑌷𑌭𑌾𑌃 ॥ 2 ॥
𑌇𑌹𑌸𑍍𑌥𑍋𑌽𑌹𑌂 𑌪𑍍𑌰𑌪𑌶𑍍𑌯𑌾𑌮𑌿 𑌰𑌾𑌵𑌣𑌂 𑌜𑌾𑌨𑌕𑍀𑌂 𑌤𑌥𑌾 ।
𑌅𑌸𑍍𑌮𑌾𑌕𑌮𑌪𑌿 𑌸𑍌𑌵𑌰𑍍𑌣𑌂 𑌦𑌿𑌵𑍍𑌯𑌂 𑌚𑌕𑍍𑌷𑍁𑌰𑍍𑌬𑌲𑌂 𑌤𑌥𑌾 ॥ 30 ॥
𑌤𑌸𑍍𑌮𑌾𑌦𑌾𑌹𑌾𑌰𑌵𑍀𑌰𑍍𑌯𑍇𑌣 𑌨𑌿𑌸𑌰𑍍𑌗𑍇𑌣 𑌚 𑌵𑌾𑌨𑌰𑌾𑌃 ।
𑌆𑌯𑍋𑌜𑌨𑌶𑌤𑌾𑌤𑍍𑌸𑌾𑌗𑍍𑌰𑌾𑌦𑍍𑌵𑌯𑌂 𑌪𑌶𑍍𑌯𑌾𑌮 𑌨𑌿𑌤𑍍𑌯𑌶𑌃 ॥ 31 ॥
𑌅𑌸𑍍𑌮𑌾𑌕𑌂 𑌵𑌿𑌹𑌿𑌤𑌾 𑌵𑍃𑌤𑍍𑌤𑌿𑌰𑍍𑌨𑌿𑌸𑌰𑍍𑌗𑍇𑌣 𑌚 𑌦𑍂𑌰𑌤𑌃 ।
𑌵𑌿𑌹𑌿𑌤𑌾 𑌪𑌾𑌦𑌮𑍂𑌲𑍇 𑌤𑍁 𑌵𑍃𑌤𑍍𑌤𑌿𑌶𑍍𑌚𑌰𑌣𑌯𑍋𑌧𑌿𑌨𑌾𑌮𑍍 ॥ 32 ॥
𑌗𑌰𑍍𑌹𑌿𑌤𑌂 𑌤𑍁 𑌕𑍃𑌤𑌂 𑌕𑌰𑍍𑌮 𑌯𑍇𑌨 𑌸𑍍𑌮 𑌪𑌶𑌿𑌤𑌾𑌶𑌿𑌨𑌾 ।
𑌪𑍍𑌰𑌤𑍀𑌕𑌾𑌰𑍍𑌯𑌂 𑌚 𑌮𑍇 𑌤𑌸𑍍𑌯 𑌵𑍈𑌰𑌂 𑌭𑍍𑌰𑌾𑌤𑍃𑌕𑍃𑌤𑌂 𑌭𑌵𑍇𑌤𑍍 ॥ 33 ॥
𑌉𑌪𑌾𑌯𑍋 𑌦𑍃𑌶𑍍𑌯𑌤𑌾𑌂 𑌕𑌶𑍍𑌚𑌿𑌲𑍍𑌲𑌂𑌘𑌨𑍇 𑌲𑌵𑌣𑌾𑌂𑌭𑌸𑌃 ।
𑌅𑌭𑌿𑌗𑌮𑍍𑌯 𑌤𑍁 𑌵𑍈𑌦𑍇𑌹𑍀𑌂 𑌸𑌮𑍃𑌦𑍍𑌧𑌾𑌰𑍍𑌥𑌾 𑌗𑌮𑌿𑌷𑍍𑌯𑌥 ॥ 34 ॥
𑌸𑌮𑍁𑌦𑍍𑌰𑌂 𑌨𑍇𑌤𑍁𑌮𑌿𑌚𑍍𑌛𑌾𑌮𑌿 𑌭𑌵𑌦𑍍𑌭𑌿𑌰𑍍𑌵𑌰𑍁𑌣𑌾𑌲𑌯𑌮𑍍 ।
𑌪𑍍𑌰𑌦𑌾𑌸𑍍𑌯𑌾𑌮𑍍𑌯𑍁𑌦𑌕𑌂 𑌭𑍍𑌰𑌾𑌤𑍁𑌸𑍍𑌸𑍍𑌵𑌰𑍍𑌗𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 35 ॥
𑌤𑌤𑍋 𑌨𑍀𑌤𑍍𑌵𑌾 𑌤𑍁 𑌤𑌂 𑌦𑍇𑌶𑌂 𑌤𑍀𑌰𑌂 𑌨𑌦𑌨𑌦𑍀𑌪𑌤𑍇𑌃 ।
𑌨𑌿𑌰𑍍𑌦𑌗𑍍𑌧𑌪𑌕𑍍𑌷𑌂 𑌸𑌂𑌪𑌾𑌤𑌿𑌂 𑌵𑌾𑌨𑌰𑌾𑌸𑍍𑌸𑍁𑌮𑌹𑍌𑌜𑌸𑌃 ॥ 36 ॥
𑌪𑍁𑌨𑌃 𑌪𑍍𑌰𑌤𑍍𑌯𑌾𑌨𑌯𑌿𑌤𑍍𑌵𑌾 𑌚 𑌤𑌂 𑌦𑍇𑌶𑌂 𑌪𑌤𑌗𑍇𑌶𑍍𑌵𑌰𑌮𑍍 ।
𑌬𑌭𑍂𑌵𑍁𑌰𑍍𑌵𑌾𑌨𑌰𑌾 𑌹𑍃𑌷𑍍𑌟𑌾𑌃 𑌪𑍍𑌰𑌵𑍃𑌤𑍍𑌤𑌿𑌮𑍁𑌪𑌲𑌭𑍍𑌯 𑌤𑍇 ॥ 3 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌅𑌷𑍍𑌟𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
