𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌏𑌵𑌂 𑌬𑍃𑌵𑌂𑌤𑍍𑌯𑌾𑌂 𑌸𑍀𑌤𑌾𑌯𑌾𑌂 𑌸𑌂𑌰𑌬𑍍𑌦𑌃 𑌪𑌰𑍁𑌷𑌂 𑌵𑌚𑌃 ।
𑌲𑌲𑌾𑌟𑍇 𑌭𑍃𑌕𑍁𑌟𑍀𑌂 𑌕𑍃𑌤𑍍𑌵𑌾 𑌰𑌾𑌵𑌣𑌃 𑌪𑍍𑌰𑌤𑍍𑌯𑍁𑌵𑌾𑌚 𑌹 ॥ 1 ॥
𑌭𑍍𑌰𑌾𑌤𑌾 𑌵𑍈𑌶𑍍𑌰𑌵𑌣𑌸𑍍𑌯𑌾𑌹𑌂 𑌸𑌾𑌪𑌤𑍍𑌨𑍍𑌯𑍋 𑌵𑌰𑌵𑌰𑍍𑌣𑌿𑌨𑌿 ।
𑌰𑌾𑌵𑌣𑍋 𑌨𑌾𑌮 𑌭𑌦𑍍𑌰𑌂 𑌤𑍇 𑌦𑌶𑌗𑍍𑌰𑍀𑌵𑌃 𑌪𑍍𑌰𑌤𑌾𑌪𑌵𑌾𑌨𑍍 ॥ 2 ॥
𑌯𑌸𑍍𑌯 𑌦𑍇𑌵𑌾𑌸𑍍𑌸𑌗𑌂𑌧𑌰𑍍𑌵𑌾𑌃 𑌪𑌿𑌶𑌾𑌚𑌪𑌤𑌗𑍋𑌰𑌗𑌾𑌃 ।
𑌵𑌿𑌦𑍍𑌰𑌵𑌂𑌤𑌿 𑌭𑌯𑌾𑌦𑍍𑌭𑍀𑌤𑌾 𑌮𑍃𑌤𑍍𑌯𑍋𑌰𑌿𑌵 𑌸𑌦𑌾 𑌪𑍍𑌰𑌜𑌾𑌃 ॥ 3 ॥
𑌯𑍇𑌨 𑌵𑍈𑌶𑍍𑌰𑌵𑌣𑍋 𑌰𑌾𑌜𑌾 𑌦𑍍𑌵𑍈𑌮𑌾𑌤𑍍𑌰𑌃 𑌕𑌾𑌰𑌣𑌾𑌂𑌤𑌰𑍇 ।
𑌦𑍍𑌵𑌂𑌦𑍍𑌵𑌮𑌾𑌸𑌾𑌦𑌿𑌤𑌃 𑌕𑍍𑌰𑍋𑌧𑌾𑌦𑍍𑌰𑌣𑍇 𑌵𑌿𑌕𑍍𑌰𑌮𑍍𑌯 𑌨𑌿𑌰𑍍𑌜𑌿𑌤𑌃 ॥ 4 ॥
𑌯𑌦𑍍𑌭𑌯𑌾𑌰𑍍𑌤𑌃 𑌪𑌰𑌿𑌤𑍍𑌯𑌜𑍍𑌯 𑌸𑍍𑌵𑌮𑌧𑌿𑌷𑍍𑌠𑌾𑌨𑌮𑍃𑌦𑍍𑌧𑌿𑌮𑌤𑍍 ।
𑌕𑍈𑌲𑌾𑌸𑌂 𑌪𑌰𑍍𑌵𑌤𑌶𑍍𑌰𑍇𑌷𑍍𑌠𑌮𑌧𑍍𑌯𑌾𑌸𑍍𑌤𑍇 𑌨𑌰𑌵𑌾𑌹𑌨𑌃 ॥ 5 ॥
𑌯𑌸𑍍𑌯 𑌤𑌤𑍍𑌪𑍁𑌷𑍍𑌪𑌕𑌂 𑌨𑌾𑌮 𑌵𑌿𑌮𑌾𑌨𑌂 𑌕𑌾𑌮𑌗𑌂 𑌶𑍁𑌭𑌮𑍍 ।
𑌵𑍀𑌰𑍍𑌯𑌾𑌦𑍇𑌵𑌾𑌰𑍍𑌜𑌿𑌤𑌂 𑌭𑌦𑍍𑌰𑍇 𑌯𑍇𑌨 𑌯𑌾𑌮𑌿 𑌵𑌿𑌹𑌾𑌯𑌸𑌮𑍍 ॥ 6 ॥
𑌮𑌮 𑌸𑌂𑌜𑌾𑌤𑌰𑍋𑌷𑌸𑍍𑌯 𑌮𑍁𑌖𑌂 𑌦𑍃𑌷𑍍𑌟𑍍𑌵𑍈𑌵 𑌮𑍈𑌥𑌿𑌲𑌿 ।
𑌵𑌿𑌦𑍍𑌰𑌵𑌂𑌤𑌿 𑌪𑌰𑌿𑌤𑍍𑌰𑌸𑍍𑌤𑌾𑌸𑍍𑌸𑍁𑌰𑌾𑌶𑍍𑌶𑌕𑍍𑌰𑌪𑍁𑌰𑍋𑌗𑌮𑌾𑌃 ॥ ॥
𑌯𑌤𑍍𑌰 𑌤𑌿𑌷𑍍𑌠𑌾𑌮𑍍𑌯𑌹𑌂 𑌤𑌤𑍍𑌰 𑌮𑌾𑌰𑍁𑌤𑍋 𑌵𑌾𑌤𑌿 𑌶𑌂𑌕𑌿𑌤𑌃 ।
𑌤𑍀𑌵𑍍𑌰𑌾𑌂𑌶𑍁𑌶𑍍𑌶𑌿𑌶𑌿𑌰𑌾𑌂𑌶𑍁𑌶𑍍𑌚 𑌭𑌯𑌾𑌤𑍍𑌸𑌂𑌪𑌦𑍍𑌯𑌤𑍇 𑌰𑌵𑌿𑌃 ॥ ॥
𑌨𑌿𑌷𑍍𑌕𑌂𑌪𑌪𑌤𑍍𑌰𑌾𑌸𑍍𑌤𑌰𑌵𑍋 𑌨𑌦𑍍𑌯𑌶𑍍𑌚 𑌸𑍍𑌤𑌿𑌮𑌿𑌤𑍋𑌦𑌕𑌾𑌃 ।
𑌭𑌵𑌂𑌤𑌿 𑌯𑌤𑍍𑌰 𑌯𑌤𑍍𑌰𑌾𑌹𑌂 𑌤𑌿𑌷𑍍𑌠𑌾𑌮𑌿 𑌵𑌿𑌚𑌰𑌾𑌮𑌿 𑌚 ॥ ॥
𑌮𑌮 𑌪𑌾𑌰𑍇 𑌸𑌮𑍁𑌦𑍍𑌰𑌸𑍍𑌯 𑌲𑌂𑌕𑌾 𑌨𑌾𑌮 𑌪𑍁𑌰𑍀 𑌶𑍁𑌭𑌾 ।
𑌸𑌂𑌪𑍂𑌰𑍍𑌣𑌾 𑌰𑌾𑌕𑍍𑌷𑌸𑍈𑌰𑍍𑌘𑍋𑌰𑍈𑌰𑍍𑌯𑌥𑍇𑌂𑌦𑍍𑌰𑌸𑍍𑌯𑌾𑌮𑌰𑌾𑌵𑌤𑍀 ॥ 10 ॥
𑌪𑍍𑌰𑌾𑌕𑌾𑌰𑍇𑌣 𑌪𑌰𑌿𑌕𑍍𑌷𑌿𑌪𑍍𑌤𑌾 𑌪𑌾𑌂𑌡𑍁𑌰𑍇𑌣 𑌵𑌿𑌰𑌾𑌜𑌤𑌾 ।
𑌹𑍇𑌮𑌕𑌕𑍍𑌷𑍍𑌯𑌾 𑌪𑍁𑌰𑍀 𑌰𑌮𑍍𑌯𑌾 𑌵𑍈𑌢𑍂𑌰𑍍𑌯𑌮𑌯𑌤𑍋𑌰𑌣𑌾 ॥ 11 ॥
𑌹𑌸𑍍𑌤𑍍𑌯𑌶𑍍𑌵𑌰𑌥𑌸𑌂𑌬𑌾𑌧𑌾 𑌤𑍂𑌰𑍍𑌯𑌨𑌾𑌦𑌵𑌿𑌨𑌾𑌦𑌿𑌤𑌾 ।
𑌸𑌰𑍍𑌵𑌕𑌾𑌲𑌫𑌲𑍈𑌰𑍍𑌵𑍃𑌕𑍍𑌷𑍈𑌸𑍍𑌸𑌂𑌕𑍁𑌲𑍋𑌦𑍍𑌦𑍍𑌯𑌾𑌨𑌶𑍋𑌭𑌿𑌤𑌾 ॥ 12 ॥
𑌤𑌤𑍍𑌰 𑌤𑍍𑌵𑌂 𑌵𑌸𑌤𑍀 𑌸𑍀𑌤𑍇 𑌰𑌾𑌜𑌪𑍁𑌤𑍍𑌰𑌿 𑌮𑌯𑌾 𑌸𑌹 ।
𑌨 𑌸𑍍𑌮𑌰𑌿𑌷𑍍𑌯𑌸𑌿 𑌨𑌾𑌰𑍀𑌣𑌾𑌂 𑌮𑌾𑌨𑍁𑌷𑍀𑌣𑌾𑌂 𑌮𑌨𑌸𑍍𑌵𑌿𑌨𑌿 ॥ 13 ॥
𑌭𑍁𑌂𑌜𑌾𑌨𑌾 𑌮𑌾𑌨𑍁𑌷𑌾𑌨𑍍𑌭𑍋𑌗𑌾𑌂𑌦𑌿𑌵𑍍𑌯𑌾𑌂𑌶𑍍𑌚 𑌵𑌰𑌵𑌰𑍍𑌣𑌿𑌨𑌿 ।
𑌨 𑌸𑍍𑌮𑌰𑌿𑌷𑍍𑌯𑌸𑌿 𑌰𑌾𑌮𑌸𑍍𑌯 𑌮𑌾𑌨𑍁𑌷𑌸𑍍𑌯 𑌗𑌤𑌾𑌯𑍁𑌷𑌃 ॥ 14 ॥
𑌸𑍍𑌥𑌾𑌪𑌯𑌿𑌤𑍍𑌵𑌾 𑌪𑍍𑌰𑌿𑌯𑌂 𑌪𑍁𑌤𑍍𑌰𑌂 𑌰𑌾𑌜𑍍𑌞𑌾 𑌦𑌶𑌰𑌥𑍇𑌨 𑌯𑌃 ।
𑌮𑌂𑌦𑌵𑍀𑌰𑍍𑌯𑌸𑍍𑌸𑍁𑌤𑍋 𑌜𑍍𑌯𑍇𑌷𑍍𑌠𑌸𑍍𑌤𑌤𑌃 𑌪𑍍𑌰𑌸𑍍𑌥𑌾𑌪𑌿𑌤𑍋 𑌵𑌨𑌮𑍍 ॥ 15 ॥
𑌤𑍇𑌨 𑌕𑌿𑌂 𑌭𑍍𑌰𑌷𑍍𑌟𑌰𑌾𑌜𑍍𑌯𑍇𑌨 𑌰𑌾𑌮𑍇𑌣 𑌗𑌤𑌚𑍇𑌤𑌸𑌾 ।
𑌕𑌰𑌿𑌷𑍍𑌯𑌸𑌿 𑌵𑌿𑌶𑌾𑌲𑌾𑌕𑍍𑌷𑌿 𑌤𑌾𑌪𑌸𑍇𑌨 𑌤𑌪𑌸𑍍𑌵𑌿𑌨𑌾 ॥ 16 ॥
𑌸𑌰𑍍𑌵𑌰𑌾𑌕𑍍𑌷𑌸𑌭𑌰𑍍𑌤𑌾𑌰𑌂 𑌕𑌾𑌮𑌾𑌤𑍍𑌸𑍍𑌵𑌯𑌮𑌿𑌹𑌾𑌗𑌤𑌮𑍍 ।
𑌨 𑌮𑌨𑍍𑌮𑌥𑌶𑌰𑌾𑌵𑌿𑌷𑍍𑌟𑌂 𑌪𑍍𑌰𑌤𑍍𑌯𑌾𑌖𑍍𑌯𑌾𑌤𑍁𑌂 𑌤𑍍𑌵𑌮𑌰𑍍𑌹𑌸𑌿 ॥ 1 ॥
𑌪𑍍𑌰𑌤𑍍𑌯𑌾𑌖𑍍𑌯𑌾𑌯 𑌹𑌿 𑌮𑌾𑌂 𑌭𑍀𑌰𑍁 𑌪𑌰𑌿𑌤𑌾𑌪𑌂 𑌗𑌮𑌿𑌷𑍍𑌯𑌸𑌿 ।
𑌚𑌰𑌣𑍇𑌨𑌾𑌭𑌿𑌹𑌤𑍍𑌯𑍇𑌵 𑌪𑍁𑌰𑍂𑌰𑌵𑌸𑌮𑍂𑌰𑍍𑌵𑌶𑍀 ॥ 1 ॥
𑌅𑌂𑌗𑍁𑌲𑍍𑌯𑌾 𑌨 𑌸𑌮𑍋 𑌰𑌾𑌮𑍋 𑌮𑌮 𑌯𑍁𑌦𑍍𑌧𑍇 𑌸 𑌮𑌾𑌨𑍁𑌷𑌃 ।
𑌤𑌵 𑌭𑌾𑌗𑍍𑌯𑍇𑌨 𑌸𑌂𑌪𑍍𑌰𑌾𑌪𑍍𑌤𑌂 𑌭𑌜𑌸𑍍𑌵 𑌵𑌰𑌵𑌰𑍍𑌣𑌿𑌨𑌿 ॥ 1 ॥
𑌏𑌵𑌮𑍁𑌕𑍍𑌤𑌾 𑌤𑍁 𑌵𑍈𑌦𑍇𑌹𑍀 𑌕𑍍𑌰𑍁𑌦𑍍𑌧𑌾 𑌸𑌂𑌰𑌕𑍍𑌤𑌲𑍋𑌚𑌨𑌾 ।
𑌅𑌬𑍍𑌰𑌵𑍀𑌤𑍍𑌪𑌰𑍁𑌷𑌂 𑌵𑌾𑌕𑍍𑌯𑌂 𑌰𑌹𑌿𑌤𑍇 𑌰𑌾𑌕𑍍𑌷𑌸𑌾𑌧𑌿𑌪𑌮𑍍 ॥ 20 ॥
𑌕𑌥𑌂 𑌵𑍈𑌶𑍍𑌰𑌵𑌣𑌂 𑌦𑍇𑌵𑌂 𑌸𑌰𑍍𑌵𑌭𑍂𑌤𑌨𑌮𑌸𑍍𑌕𑍃𑌤𑌮𑍍 ।
𑌭𑍍𑌰𑌾𑌤𑌰𑌂 𑌵𑍍𑌯𑌪𑌦𑌿𑌶𑍍𑌯 𑌤𑍍𑌵𑌮𑌶𑍁𑌭𑌂 𑌕𑌰𑍍𑌤𑍁𑌮𑌿𑌚𑍍𑌛𑌸𑌿 ॥ 21 ॥
𑌅𑌵𑌶𑍍𑌯𑌂 𑌵𑌿𑌨𑌶𑌿𑌷𑍍𑌯𑌂𑌤𑌿 𑌸𑌰𑍍𑌵𑍇 𑌰𑌾𑌵𑌣 𑌰𑌾𑌕𑍍𑌷𑌸𑌾𑌃 ।
𑌯𑍇𑌷𑌾𑌂 𑌤𑍍𑌵𑌂 𑌕𑌰𑍍𑌕𑌶𑍋 𑌰𑌾𑌜𑌾 𑌦𑍁𑌰𑍍𑌬𑍁𑌦𑍍𑌧𑌿𑌰𑌜𑌿𑌤𑍇𑌂𑌦𑍍𑌰𑌿𑌯𑌃 ॥ 22 ॥
𑌅𑌪𑌹𑍃𑌤𑍍𑌯 𑌶𑌚𑍀𑌂 𑌭𑌾𑌰𑍍𑌯𑌾𑌂 𑌶𑌕𑍍𑌯𑌮𑌿𑌂𑌦𑍍𑌰𑌸𑍍𑌯 𑌜𑍀𑌵𑌿𑌤𑍁𑌮𑍍 ।
𑌨 𑌚 𑌰𑌾𑌮𑌸𑍍𑌯 𑌭𑌾𑌰𑍍𑌯𑌾𑌂 𑌮𑌾𑌮𑌪𑌨𑍀𑌯𑌾𑌸𑍍𑌤𑌿 𑌜𑍀𑌵𑌿𑌤𑌮𑍍 ॥ 23 ॥
𑌜𑍀𑌵𑍇𑌚𑍍𑌚𑌿𑌰𑌂 𑌵𑌜𑍍𑌰𑌧𑌰𑌸𑍍𑌯 𑌹𑌸𑍍𑌤𑌾𑌚𑍍𑌛𑌚𑍀𑌂 𑌪𑍍𑌰𑌧𑍃𑌷𑍍𑌯𑌾𑌪𑍍𑌰𑌤𑌿𑌰𑍂𑌪𑌰𑍂𑌪𑌾𑌮𑍍 ।
𑌨 𑌮𑌾𑌦𑍃𑌶𑍀𑌂 𑌰𑌾𑌕𑍍𑌷𑌸 𑌦𑍂𑌶𑌯𑌿𑌤𑍍𑌵𑌾 𑌪𑍀𑌤𑌾𑌮𑍃𑌤𑌸𑍍𑌯𑌾𑌪𑌿 𑌤𑌵𑌾𑌸𑍍𑌤𑌿 𑌮𑍋𑌕𑍍𑌷𑌃 ॥ 24 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌅𑌷𑍍𑌟𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
