𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌿𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌕𑌾𑌲𑌧𑌰𑍍𑌮𑌂 𑌗𑌤𑍇 𑌰𑌾𑌮 𑌸𑌗𑌰𑍇 𑌪𑍍𑌰𑌕𑍃𑌤𑍀𑌜𑌨𑌾𑌃 ।
𑌰𑌾𑌜𑌾𑌨𑌂 𑌰𑍋𑌚𑌯𑌾𑌮𑌾𑌸𑍁𑌰𑌂𑌶𑍁𑌮𑌂𑌤𑌂 𑌸𑍁𑌧𑌾𑌰𑍍𑌮𑌿𑌕𑌮𑍍 ॥ 1 ॥
𑌸 𑌰𑌾𑌜𑌾 𑌸𑍁𑌮𑌹𑌾𑌨𑌾𑌸𑍀𑌦𑌂𑌶𑍁𑌮𑌾𑌨𑍍 𑌰𑌘𑍁𑌨𑌂𑌦𑌨 ।
𑌤𑌸𑍍𑌯 𑌪𑍁𑌤𑍍𑌰𑍋 𑌮𑌹𑌾𑌨𑌾𑌸𑍀𑌦𑍍𑌦𑌿𑌲𑍀𑌪 𑌇𑌤𑌿 𑌵𑌿𑌶𑍍𑌰𑍁𑌤𑌃 ॥ 2 ॥
𑌤𑌸𑍍𑌮𑌿𑌨𑍍 𑌰𑌾𑌜𑍍𑌯𑌂 𑌸𑌮𑌾𑌵𑍇𑌶𑍍𑌯 𑌦𑌿𑌲𑍀𑌪𑍇 𑌰𑌘𑍁𑌨𑌂𑌦𑌨 ।
𑌹𑌿𑌮𑌵𑌚𑍍𑌛𑌿𑌖𑌰𑍇 𑌪𑍁𑌣𑍍𑌯𑍇 𑌤𑌪𑌸𑍍𑌤𑍇𑌪𑍇 𑌸𑍁𑌦𑌾𑌰𑍁𑌣𑌮𑍍 ॥ 3 ॥
𑌦𑍍𑌵𑌾𑌤𑍍𑌰𑌿𑌂𑌶𑌚𑍍𑌚 𑌸𑌹𑌸𑍍𑌰𑌾𑌣𑌿 𑌵𑌰𑍍𑌷𑌾𑌣𑌿 𑌸𑍁𑌮𑌹𑌾𑌯𑌶𑌾𑌃 ।
𑌤𑌪𑍋𑌵𑌨𑌂 𑌗𑌤𑍋 𑌰𑌾𑌮 𑌸𑍍𑌵𑌰𑍍𑌗𑌂 𑌲𑍇𑌭𑍇 𑌤𑌪𑍋𑌧𑌨𑌃 ॥ 4 ॥
𑌦𑌿𑌲𑍀𑌪𑌸𑍍𑌤𑍁 𑌮𑌹𑌾𑌤𑍇𑌜𑌾𑌶𑍍𑌶𑍍𑌰𑍁𑌤𑍍𑌵𑌾 𑌪𑍈𑌤𑌾𑌮𑌹𑌂 𑌵𑌧𑌮𑍍 ।
𑌦𑍁𑌃𑌖𑍋𑌪𑌹𑌤𑌯𑌾 𑌬𑍁𑌦𑍍𑌧𑍍𑌯𑌾 𑌨𑌿𑌶𑍍𑌚𑌯𑌂 𑌨𑌾𑌧𑍍𑌯𑌗𑌚𑍍𑌛𑌤 ॥ 5 ॥
𑌕𑌥𑌂 𑌗𑌂𑌗𑌾𑌵𑌤𑌰𑌣𑌂 𑌕𑌥𑌂 𑌤𑍇𑌷𑌾𑌂 𑌜𑌲𑌕𑍍𑌰𑌿𑌯𑌾 ।
𑌤𑌾𑌰𑌯𑍇𑌯𑌂 𑌕𑌥𑌂 𑌚𑍈𑌤𑌾𑌨𑌿𑌤𑌿 𑌚𑌿𑌂𑌤𑌾𑌪𑌰𑍋𑌽𑌭𑌵𑌤𑍍 ॥ 6 ॥
𑌤𑌸𑍍𑌯 𑌚𑌿𑌂𑌤𑌯𑌤𑍋 𑌨𑌿𑌤𑍍𑌯𑌂 𑌧𑌰𑍍𑌮𑍇𑌣 𑌵𑌿𑌦𑌿𑌤𑌾𑌤𑍍𑌮𑌨𑌃 ।
𑌪𑍁𑌤𑍍𑌰𑍋 𑌭𑌗𑍀𑌰𑌥𑍋 𑌨𑌾𑌮 𑌜𑌜𑍍𑌞𑍇 𑌪𑌰𑌮𑌧𑌾𑌰𑍍𑌮𑌿𑌕𑌃 ॥ ॥
𑌦𑌿𑌲𑍀𑌪𑌸𑍍𑌤𑍁 𑌮𑌹𑌾𑌤𑍇𑌜𑌾 𑌯𑌜𑍍𑌞𑍈𑌰𑍍𑌬𑌹𑍁𑌭𑌿𑌰𑌿𑌷𑍍𑌟𑌵𑌾𑌨𑍍 ।
𑌤𑍍𑌰𑌿𑌂𑌶𑌦𑍍𑌵𑌰𑍍𑌷𑌸𑌹𑌸𑍍𑌰𑌾𑌣𑌿 𑌰𑌾𑌜𑌾 𑌰𑌾𑌜𑍍𑌯𑌮𑌕𑌾𑌰𑌯𑌤𑍍 ॥ ॥
𑌅𑌗𑌤𑍍𑌵𑌾 𑌨𑌿𑌶𑍍𑌚𑌯𑌂 𑌰𑌾𑌜𑌾 𑌤𑍇𑌷𑌾𑌮𑍁𑌦𑍍𑌧𑌰𑌣𑌂 𑌪𑍍𑌰𑌤𑌿 ।
𑌵𑍍𑌯𑌾𑌧𑌿𑌨𑌾 𑌨𑌰𑌶𑌾𑌰𑍍𑌦𑍂𑌲 𑌕𑌾𑌲𑌧𑌰𑍍𑌮𑌮𑍁𑌪𑍇𑌯𑌿𑌵𑌾𑌨𑍍 ॥ ॥
𑌇𑌂𑌦𑍍𑌰𑌲𑍋𑌕𑌂 𑌗𑌤𑍋 𑌰𑌾𑌜𑌾 𑌸𑍍𑌵𑌾𑌰𑍍𑌜𑌿𑌤𑍇𑌨𑍈𑌵 𑌕𑌰𑍍𑌮𑌣𑌾 ।
𑌰𑌾𑌜𑍍𑌯𑍇 𑌭𑌗𑍀𑌰𑌥𑌂 𑌪𑍁𑌤𑍍𑌰𑌮𑌭𑌿𑌷𑌿𑌚𑍍𑌯 𑌨𑌰𑌰𑍍𑌷𑌭𑌃 ॥ 10 ॥
𑌭𑌗𑍀𑌰𑌥𑌸𑍍𑌤𑍁 𑌰𑌾𑌜𑌰𑍍𑌷𑌿𑌰𑍍𑌧𑌾𑌰𑍍𑌮𑌿𑌕𑍋 𑌰𑌘𑍁𑌨𑌂𑌦𑌨 ।
𑌅𑌨𑌪𑌤𑍍𑌯𑍋 𑌮𑌹𑌾𑌤𑍇𑌜𑌾𑌃 𑌪𑍍𑌰𑌜𑌾𑌕𑌾𑌮𑌸𑍍𑌸 𑌚𑌾𑌪𑍍𑌰𑌜𑌃 ॥ 11 ॥
𑌮𑌂𑌤𑍍𑌰𑌿𑌷𑍍𑌵𑌾𑌧𑌾𑌯 𑌤𑌦𑍍𑌰𑌾𑌜𑍍𑌯𑌂 𑌗𑌂𑌗𑌾𑌵𑌤𑌰𑌣𑍇 𑌰𑌤𑌃 ।
𑌸 𑌤𑌪𑍋 𑌦𑍀𑌰𑍍𑌘𑌮𑌾𑌤𑌿𑌷𑍍𑌠𑌦𑍍𑌗𑍋𑌕𑌰𑍍𑌣𑍇 𑌰𑌘𑍁𑌨𑌂𑌦𑌨 ॥ 12 ॥
𑌊𑌰𑍍𑌧𑍍𑌵𑌬𑌾𑌹𑍁𑌃 𑌪𑌂𑌚𑌤𑌪𑌾 𑌮𑌾𑌸𑌾𑌹𑌾𑌰𑍋 𑌜𑌿𑌤𑍇𑌂𑌦𑍍𑌰𑌿𑌯𑌃 ।
𑌤𑌸𑍍𑌯 𑌵𑌰𑍍𑌷𑌸𑌹𑌸𑍍𑌰𑌾𑌣𑌿 𑌘𑍋𑌰𑍇 𑌤𑌪𑌸𑌿 𑌤𑌿𑌷𑍍𑌠𑌤𑌃 ॥ 13 ॥
𑌅𑌤𑍀𑌤𑌾𑌨𑌿 𑌮𑌹𑌾𑌬𑌾𑌹𑍋 𑌤𑌸𑍍𑌯 𑌰𑌾𑌜𑍍𑌞𑍋 𑌮𑌹𑌾𑌤𑍍𑌮𑌨𑌃 ।
𑌸𑍁𑌪𑍍𑌰𑍀𑌤𑍋 𑌭𑌗𑌵𑌾𑌨𑍍 𑌬𑍍𑌰𑌹𑍍𑌮𑌾 𑌪𑍍𑌰𑌜𑌾𑌨𑌾𑌂 𑌪𑌤𑌿𑌰𑍀𑌶𑍍𑌵𑌰𑌃 ॥ 14 ॥
𑌤𑌤𑌸𑍍𑌸𑍁𑌰𑌗𑌣𑍈𑌸𑍍𑌸𑌾𑌰𑍍𑌧𑌮𑍁𑌪𑌾𑌗𑌮𑍍𑌯 𑌪𑌿𑌤𑌾𑌮𑌹𑌃 ।
𑌭𑌗𑍀𑌰𑌥𑌂 𑌮𑌹𑌾𑌤𑍍𑌮𑌾𑌨𑌂 𑌤𑌪𑍍𑌯𑌮𑌾𑌨𑌮𑌥𑌾𑌬𑍍𑌰𑌵𑍀𑌤𑍍 ॥ 15 ॥
𑌭𑌗𑍀𑌰𑌥 𑌮𑌹𑌾𑌭𑌾𑌗 𑌪𑍍𑌰𑍀𑌤𑌸𑍍𑌤𑍇𑌽𑌹𑌂 𑌜𑌨𑍇𑌶𑍍𑌵𑌰 ।
𑌤𑌪𑌸𑌾 𑌚 𑌸𑍁𑌤𑌪𑍍𑌤𑍇𑌨 𑌵𑌰𑌂 𑌵𑌰𑌯 𑌸𑍁𑌵𑍍𑌰𑌤 ॥ 16 ॥
𑌤𑌮𑍁𑌵𑌾𑌚 𑌮𑌹𑌾𑌤𑍇𑌜𑌾𑌃 𑌸𑌰𑍍𑌵𑌲𑍋𑌕𑌪𑌿𑌤𑌾𑌮𑌹𑌮𑍍 ।
𑌭𑌗𑍀𑌰𑌥𑍋 𑌮𑌹𑌾𑌭𑌾𑌗𑌃 𑌕𑍃𑌤𑌾𑌂𑌜𑌲𑌿𑌰𑍁𑌪𑌸𑍍𑌥𑌿𑌤𑌃 ॥ 1 ॥
𑌯𑌦𑌿 𑌮𑍇 𑌭𑌗𑌵𑌨𑍍 𑌪𑍍𑌰𑍀𑌤𑍋 𑌯𑌦𑍍𑌯𑌸𑍍𑌤𑌿 𑌤𑌪𑌸𑌃 𑌫𑌲𑌮𑍍 ।
𑌸𑌗𑌰𑌸𑍍𑌯𑌾𑌤𑍍𑌮𑌜𑌾𑌸𑍍𑌸𑌰𑍍𑌵𑍇 𑌮𑌤𑍍𑌤𑌸𑍍𑌸𑌲𑌿𑌲𑌮𑌾𑌪𑍍𑌨𑍁𑌯𑍁𑌃 ॥ 1 ॥
𑌗𑌂𑌗𑌾𑌯𑌾𑌸𑍍𑌸𑌲𑌿𑌲𑌕𑍍𑌲𑌿𑌨𑍍𑌨𑍇 𑌭𑌸𑍍𑌮𑌨𑍍𑌯𑍇𑌷𑌾𑌂 𑌮𑌹𑌾𑌤𑍍𑌮𑌨𑌾𑌮𑍍 ।
𑌸𑍍𑌵𑌰𑍍𑌗𑌂 𑌗𑌚𑍍𑌛𑍇𑌯𑍁𑌰𑌤𑍍𑌯𑌂𑌤𑌂 𑌸𑌰𑍍𑌵𑍇 𑌮𑍇 𑌪𑍍𑌰𑌪𑌿𑌤𑌾𑌮𑌹𑌾𑌃 ॥ 1 ॥
𑌦𑍇𑌯𑌾 𑌚 𑌸𑌂𑌤𑌤𑌿𑌰𑍍𑌦𑍇𑌵 𑌨𑌾𑌵𑌸𑍀𑌦𑍇𑌤𑍍𑌕𑍁𑌲𑌂 𑌚 𑌨𑌃 ।
𑌇𑌕𑍍𑌷𑍍𑌵𑌾𑌕𑍂𑌣𑌾𑌂 𑌕𑍁𑌲𑍇 𑌦𑍇𑌵 𑌏𑌷 𑌮𑍇𑌽𑌸𑍍𑌤𑍁 𑌵𑌰𑌃𑌪𑌰𑌃 ॥ 20 ॥
𑌉𑌕𑍍𑌤𑌵𑌾𑌕𑍍𑌯𑌂 𑌤𑍁 𑌰𑌾𑌜𑌾𑌨𑌂 𑌸𑌰𑍍𑌵𑌲𑍋𑌕𑌪𑌿𑌤𑌾𑌮𑌹𑌃 ।
𑌪𑍍𑌰𑌤𑍍𑌯𑍁𑌵𑌾𑌚 𑌶𑍁𑌭𑌾𑌂 𑌵𑌾𑌣𑍀𑌂 𑌮𑌧𑍁𑌰𑌾𑌂 𑌮𑌧𑍁𑌰𑌾𑌕𑍍𑌷𑌰𑌾𑌮𑍍 ॥ 21 ॥
𑌮𑌨𑍋𑌰𑌥𑍋 𑌮𑌹𑌾𑌨𑍇𑌷 𑌭𑌗𑍀𑌰𑌥 𑌮𑌹𑌾𑌰𑌥 ।
𑌏𑌵𑌂 𑌭𑌵𑌤𑍁 𑌭𑌦𑍍𑌰𑌂 𑌤𑍇 𑌇𑌕𑍍𑌷𑍍𑌵𑌾𑌕𑍁𑌕𑍁𑌲𑌵𑌰𑍍𑌧𑌨 ॥ 22 ॥
𑌇𑌯𑌂 𑌹𑍈𑌮𑌵𑌤𑍀 𑌗𑌂𑌗𑌾 𑌜𑍍𑌯𑍇𑌷𑍍𑌠𑌾 𑌹𑌿𑌮𑌵𑌤𑌸𑍍𑌸𑍁𑌤𑌾 ।
𑌤𑌾𑌂 𑌵𑍈 𑌧𑌾𑌰𑌯𑌿𑌤𑍁𑌂 𑌶𑌕𑍍𑌤𑍋 𑌹𑌰𑌸𑍍𑌤𑌤𑍍𑌰 𑌨𑌿𑌯𑍁𑌜𑍍𑌯𑌤𑌾𑌮𑍍 ॥ 23 ॥
𑌗𑌂𑌗𑌾𑌯𑌾𑌃 𑌪𑌤𑌨𑌂 𑌰𑌾𑌜𑌨𑍍 𑌪𑍃𑌥𑌿𑌵𑍀 𑌨 𑌸𑌹𑌿𑌷𑍍𑌯𑌤𑌿 ।
𑌤𑌾𑌂 𑌵𑍈 𑌧𑌾𑌰𑌯𑌿𑌤𑍁𑌂 𑌵𑍀𑌰 𑌨𑌾𑌨𑍍𑌯𑌂 𑌪𑌶𑍍𑌯𑌾𑌮𑌿 𑌶𑍂𑌲𑌿𑌨𑌃 ॥ 24 ॥
𑌤𑌮𑍇𑌵𑌮𑍁𑌕𑍍𑌤𑍍𑌵𑌾 𑌰𑌾𑌜𑌾𑌨𑌂 𑌗𑌂𑌗𑌾𑌂 𑌚𑌾𑌭𑌾𑌷𑍍𑌯 𑌲𑍋𑌕𑌕𑍃𑌤𑍍 ।
𑌜𑌗𑌾𑌮 𑌤𑍍𑌰𑌿𑌦𑌿𑌵𑌂 𑌦𑍇𑌵𑌸𑍍𑌸𑌹𑌦𑍇𑌵𑍈𑌰𑍍𑌮𑌰𑍁𑌦𑍍𑌗𑌣𑍈𑌃 ॥ 25 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌦𑍍𑌵𑌿𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
